სავალუტო ჯიხური

ემუქრება თუ არა კორონავირუსი ლარს, ანუ ბუნდოვანი პერსპექტივა

1132
(განახლებულია 14:55 06.03.2020)
ეროვნული ვალუტა მყარდება, ლარის კურსი ბოლო თვეების მინიმუმზეა. რა ფაქტორებმა განაპირობა ეროვნული ვალუტის გამყარება, რა გავლენა ექნება გლობალურ გამოწვევას საქართველოს ეკონომიკასა და, კონკრეტულად, ეროვნული ვალუტის კურსზე?

სამსონ ხონელი

გასული ზამთარი ეროვნული ვალუტისთვის იღბლიანი გამოდგა – ლარის კურსი ბოლო რამდენიმე თვის მინიმუმზეა. მართალია, დღეს ამერიკული დოლარი თორმეტი თვის წინანდელ პერიოდთან შედარებით თითქმის 11 თეთრით უფრო ძვირი ღირს, მაგრამ ფაქტია, ეროვნული ვალუტა ახალი წლის პირველი რიცხვებიდან მოყოლებული სტაბილურად მყარდება. დასტურად ციფრებს მოვიშველიებ. თუ გასული წლის მიწურულს ლარი დოლარის მიმართ 2.96-2.98-ს შორის მერყეობდა, ახლა ის 2.78-2.80-ის ნიშნულზეა.

რატომ, საინტერესოა, რამ განაპირობა ეროვნული ვალუტის გამყარების ტენდენცია? ხელისუფლების, ეროვნული ბანკის წარმომადგენელთა, ექსპერტ-ანალიტიკოსთა თუ სპეციალისტთა შეფასებით, ლარის გამყარებაზე ერთდროულად რამდენიმე ფაქტორი მოქმედებს.

მათი უმრავლესობის განმარტებით, ლარის კურსზე, პირველ რიგში, გავლენა აქვს ეროვნული ბანკის ფულად-საკრედიტო პოლიტიკას. კერძოდ, გასული წლის მეორე ნახევრიდან ეროვნულმა ბანკმა მონეტარული პოლიტიკა გაამკაცრა, რეფინანსირების განაკვეთი ბოლო ერთი წლის განმავლობაში 6.75 პროცენტიდან 9 პროცენტამდე გაზარდა, რაც ბოლო ათი წლის ყველაზე მაღალი მაჩვენებელია.

პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძე ეროვნული ვალუტის გამყარების ერთ-ერთ ძირითად ფაქტორად სწორედ კობა გვენეტაძის უწყების ე.წ. „ძვირი ფულის“ პოლიტიკას ასახელებს. „რეფინანსირების განაკვეთის ზრდასთან ერთად მნიშვნელოვანი იყო უცხოურ ვალუტაში მოზიდულ სახსრებზე საპროცენტო განაკვეთის შემცირება და სავალუტო ბაზარზე განხორციელებული ინტერვენციები“, − აცხადებს ირაკლი კოვზანაძე.

თავად ეროვნულ ბანკში კი ამბობენ, რომ საბანკო სფეროს მარეგულირებელი უწყების მიერ გატარებული მკაცრი და თანმიმდევრული პოლიტიკის პარალელურად იყო ლარის გამყარების გამომწვევი სხვა მიზეზებიც. „გასული წლის განმავლობაში ძლიერი იყო საგარეო ფაქტორი. რუსეთის მხრიდან ავიამიმოსვლაზე დაწესებული შეზღუდვის მიუხედავად, ტურიზმის სექტორი საკმაოდ პოზიტიურ მაჩვენებლებზე გავიდა, ისტორიულად მინიმალურ ნიშნულამდე შემცირდა მიმდინარე ანგარიშის დეფიციტი, ანუ იმპორტსა და ექსპორტს შორის სხვაობა... უცხოელების მხრიდან გაიზარდა ფასიან ქაღალდებში ლარში დაბანდების ინტერესი“, − ბრძანა ეროვნული ბანკის ვიცე-პრეზიდენტმა პაპუნა ლეჟავამ. ეკონომიკისა და მდგრადი განვითარების მინისტრის ნათია თურნავას თქმით, „ლარის გამყარება აბსოლუტურად ლოგიკური და მოსალოდნელი პროცესია, რასაც სხვა ფაქტორებთან ერთად ხელს უწყობს ქვეყნის ეკონომიკის სტაბილური განვითარება“.

საგულისხმოა, რომ ოფიციალურ პირთა პოზიციას ანალიტიკოსები და სპეციალისტებიც იზიარებენ. ნათქვამის დასადასტურებლად ახლა ციტირების მეთოდს არ გამოვიყენებ. იმედია, მკითხველი მენდობა და მოკლედ მოგახსენებთ, რომ ექსპერტების, ფინანსისტებისა და ეკონომისტების შეფასებით, გასული წლის განმავლობაში ლარის გაუფასურება განაპირობა არა ძირითადი მაკროეკონომიკური პარამეტრების გაუარესებამ, არამედ უარყოფითმა მოლოდინებმა. ეროვნული ვალუტის პოზიციის შესუსტებამ დააჩქარა ინფლაციური პროცესი. კრიზისულ ვითარებაში კობა გვენეტაძის უწყებამ შეიმუშავა კონკრეტული სამოქმედო გეგმა და ეტაპობრივად დაიწყო მისი განხორციელება. ეროვნულმა ბანკმა გაამკაცრა მონეტარული პოლიტიკა, 5 პროცენტით შეამცირა უცხოურ ვალუტაში მოზიდული სახსრების დარეზერვების საპროცენტო განაკვეთი, რამაც კომერციულ ბანკებს ეკონომიკური საქმიანობისთვის თითქმის 700 მილიონი ამერიკული დოლარი გამოუთავისუფლა. დროული იყო სავალუტო ინტერვენციებიც.

პოზიტიური გავლენა ჰქონდა საზოგადოებასთან ეროვნული ბანკის სწორ კომუნიკაციას. რა თქმა უნდა, მნიშვნელოვანი იყო და არის ძირითადი მაკროეკონომიკური ფაქტორების გაუმჯობესება. ეს არის ტურისტული ნაკადებისა და ფულადი გზავნილების მზარდი მაჩვენებლები, ექსპორტისა და იმპორტის მოცულობებს შორის სხვაობის შემცირება ექსპორტის სასარგებლოდ. ასეთია ის მთავარი ფაქტორები, რამაც ანალიტიკური წრეების წარმომადგენელთა და სპეციალისტთა მოსაზრებითაც ეროვნული ვალუტის გამყარების ტენდენცია განაპირობა... ერთი წუთით, ერთი წუთით! ფინანსთა მინისტრი რას ამბობს? − შესაძლოა, ჩამეძიოს მკითხველი და მართალიც იქნება. არ ვიცი, რა უნდა გითხრათ, როცა ქვეყნის მთავარ ფინანსისტს ლარის გამყარების ფაქტორებზე არაფერი უთქვამს. ჟურნალისტებთან საუბრისას ივანე მაჭავარიანი მხოლოდ ფაქტის კონსტანტაციით შემოიფარგლა. მომავლის პროგნოზირებისგან კი თავი შეიკავა. „დღეს ჩვენი და ეროვნული ბანკის ანალიზით, ლარი მიუახლოვდა წონასწორობის ნიშნულს და ამ დიაპაზონში ვდგავართ. ეს არის დღევანდელი მოცემულობა. რა იქნება ერთ თვეში ან სამ თვეში, ამაზე არც არავინ არ უნდა გააკეთოს პროგნოზი. ბევრი რამე დამოკიდებული იქნება საგარეო მოვლენების განვითარებაზე... ტურიზმის სეზონზე. კორონავირუსმა ავიამიმოსვლა უკვე შეამცირა. როგორი იქნება მისი ეფექტი, იმაზე მეტი ტურისტი იქნება, ვიდრე წარმოგვიდგენია, თუ ნაკლები? სხვა მრავალი ფაქტორიც არის, მთავარია, ნებისმიერ შემთხვევაში ხელოვნური ჩარევისგან თავი შევიკავოთ“, − განაცხადა ივანე მაჭავარიანმა.

ქვეყნის პირველმა ფინანსისტმა კორონავირუსი ახსენა და საკამათო არ არის, რომ ეს გლობალური პრობლემა მსოფლიო ეკონომიკურ პროცესებზე ნეგატიურად აისახება და გამონაკლისი არც ჩვენი ქვეყანაა. სასტუმროებისა და რესტორნების ფედერაციის თავმჯდომარე შალვა ალავერდაშვილი აცხადებს, რომ კორონავირუსის გავრცელების გამო ქვეყნის ტურიზმის ინდუსტრიას უკვე ძალიან დიდი პრობლემები შეექმნა. „პირველი დარტყმა ჩვენ მივიღეთ. ამ ბოლო დღეების განმავლობაში მარტისა და აპრილის თვეზე ჯავშნების 90 პროცენტი ყველას გაუუქმდა. ინდუსტრია თითქმის გაბანკროტების ზღვარზეა. არ ვიცით, ხვალ რა იქნება. კორონავირუსი გლობალური პრობლემაა და არავის დადანაშაულებას არ ვაპირებთ. ახლა ამ სიტუაციიდან გამოსავალი უნდა მოვიფიქროთ, რა გავაკეთოთ, რომ პერსონალი არ გავუშვათ სამსახურებიდან“, − ამბობს შალვა ალავერდაშვილი. მისი თქმით, ყველაზე დიდი დარტყმა თბილისმა მიიღო. რეგიონების დიდ ნაწილში სეზონი ჯერ დაწყებული არ იყო და ეს მათ მდგომარეობას ამსუბუქებს. კორონავირუსის გავრცელების გამო საქართველოში ტურიზმის სფეროში შექმნილ გამოწვევებზე მსჯელობისას ითქვა, რომ პირველი რიგის ამოცანა ბანკებთან ურთიერთობა იქნება. უნდა გაირკვეს სესხების დაფარვის საკითხი...

„კორონავირუსის საქართველოს ეკონომიკაზე გავლენის მასშტაბი ამ ეტაპზე მცირეა და განგაშის საფუძველი არ არსებობს“, − წერს სოციალურ ქსელში ეკონომისტი ვახტანგ ჭარაია. თუმცა, მისი აზრით, ჯობს ამთავითვე ვიცოდეთ, რა გამოწვევის წინაშე ვდგავართ სხვადასხვა მიმართულებით თხუთმეტპროცენტიანი დანაკარგის პირობებში. როგორც ეკონომისტი წერს, იტალიაში, რუსეთში, საბერძნეთსა და გერმანიაში ქართველი დასაქმებულებისთვის, არსებული და მომავალში შესაძლო სირთულეების გათვალისწინებით, ფულადი გზავნილების შემცირება მოსალოდნელია თითქმის 10 მილიონი ამერიკული დოლარით. კორონოვირუსის გავრცელებითა და საარჩევნო წლისთვის დამახასიათებელი პოლიტიკური რყევების გათვალისწინებით, უცხოური ინვესტიციები შესაძლოა დაახლოებით 40 მილიონი ამერიკული დოლარით შემცირდეს. ეკონომისტის შეფასებით, საგარეო

შოკს ყველაზე დიდი უარყოფითი გავლენა ტურიზმის სექტორზე ექნება. მისი თქმით, მხოლოდ ხმელეთის მეზობელი სახელმწიფოებიდან ყოველთვიურად საქართველოს ნახევარ მილიონამდე ვიზიტორი სტუმრობს, რაც, მათი საშუალო დანახარჯის და თხუთმეტპროცენტიანი დანაკარგის პირობის შემთხვევაში, დაახლოებით 40 მილიონი ლარის ზარალს უდრის. თუ ამას დავუმატებთ იტალიასთან ფაქტობრივად შეჩერებულ ავიამიმოსვლას, ირანთან და ჩინეთთან ჩაკეტილ საზღვარს, ეს დანაკარგი კიდევ 40 მილიონი ლარით იზრდება და ჯამში მხოლოდ ამ ქვეყნებიდან დანაკარგი 80 მილიონ ლარს მიაღწევს. ვახტანგ ჭარაია აღნიშნავს, რომ ქართულ ექსპორტს ამ ეტაპზე რაიმე საფრთხე არ ემუქრება, თუმცა იმპორტის შესაძლო შეზღუდვამ შეიძლება ნედლეული გააძვიროს. ეს პირველ რიგში ინფრასტრუქტურული პროექტების სამშენებლო მასალებს ეხება...

ერთი სიტყვით, ისეთი პირი უჩანს, რომ „გაჭირვებულს ქვა აღმართში დაეწია“, „გამოფხიზლებულ“ ლარს საკონტროლო დარტყმით ახლა უკვე კორონავირუსი ემუქრება და საეჭვოა, საფინანსო სექტორში მხოლოდ ჰიგიენური პირობების გამკაცრებამ პოზიტიური შედეგი გამოიღოს... მიუხედავად ამისა, ოპტიმისტური პროგნოზიც კეთდება, ანალიტიკოსთა და სპეციალისტთა ნაწილი ვარაუდობს, რომ 2020 წლისთვის ერთი ამერიკული დოლარის ღირებულება საშუალოდ 2.80 ლარის ფარგლებში შენარჩუნდება.  

 

1132
პურის მაღაზიაში

რატომ გაიზარდა ხორბლის ფქვილზე სუბსიდიის მოცულობა - ლევან სილაგავას განმარტება

40
 ერთი ტომარა ხორბლის ფქვილზე სახელმწიფო სუბსიდიის მოცულობა გაიზარდა და 15 ლარი გახდა. სუბსიდირების პირველ ეტაპზე ეს თანხა 10 ლარს შეადგენდა

თბილისი, 23 იანვარი - Sputnik. სახელმწიფო სუბსიდირება რომ არა, ყოველდღიური მოხმარების, ქარხნულ პურზე ფასი სავარაუდოდ 15-20 თეთრით გაიზრდებოდა. განაცხადა ფქვილის მწარმოებელთა ასოციაციის აღმასრულებელმა დირექტორმა ლევან სილაგავამ პირველ არხთან საუბრისას.

ლევან სილაგაძემ ერთ ტომარა ფქვილზე სუბსიდიის გაზრდასთან დაკავშირებით ისაუბრა. ცოტა ხნის წინ ერთი ტომარა ხორბლის ფქვილზე სახელმწიფო სუბსიდიის მოცულობა გაიზარდა და 15 ლარი გახდა.

სილაგაძემ აღნიშნა, რომ ფქვილის ფასის სუბსიდირების პროგრამა ორ ეტაპად ხორციელდება, კერძოდ, პირველ ეტაპზე დეკემბერ-იანვარში ერთი ტომარა პირველი ხარისხის ფქვილი 63 ლარი ღირდა, თუმცა უკვე თებერვალსა და მარტში გლობალურ ბაზრებზე ხორბლის მნიშვნელოვანი გაძვირების შედეგად საქართველოში ფქვილის ფასი 68 ლარამდე გაიზარდა.

„შესაბამისად იმისათვის, რომ წისქვილკომბინატებმა მიაწოდონ პურის ქარხნებს 53 ლარად ფქვილი, აღარ არის საკმარისი 10-ლარიანი სუბსიდია და საჭირო გახდა სუბსიდირების თანხის 15 ლარამდე გაზრდა“, - განმარტა სილაგავამ.

ამასთან, ხორბლისა და ფქვილის მწარმოებელთა ასოციაციის აღმასრულებელი დირექტორის განმარტებით, 27 იანვარს გამოცხადდება ტენდერი და ნებისმიერ წისქვილკომბინატს შესაძლებლობა ექნება მიიღოს მასში მონაწილეობა თავისუფალი პრინციპით.

„ეს სუბსიდირების პროგრამა მოიცავს ახლა უკვე პირველი თებერვლიდან პირველ აპრილამდე დღევანდელი ფასის დაჭერას. მონაწილე კომპანიები ამ პირობით შედიან ტენდერში, რომ 53 ლარად მიაწოდებენ პურის ქარხნებს ფქვილს“, - განაცხადა ლევან სილაგავამ.

მწარმოებელ ქვეყნებში ხორბლის ცუდმა მოსავალმა, ეკონომიკურმა კრიზისმა და ლარის მერყევმა კურსმა იმოქმედა ფქვილის ღირებულებაზე, რამაც გააჩინა საფუძვლიანი ეჭვი, რომ ქვეყანაში პური გაძვირდებოდა. ამის თავიდან აცილების მიზნით საქართველოს ხელისუფლებამ მიიღო პირველი ხარისხის ხორბლის ფქვილის იმპორტის სუბსიდირების გადაწყვეტილება.

პროგრამა გათვლილია 4 თვეზე და ის დეკემბრიდან ამოქმედდა. წისქვილკომბინატებისთვის დაწესებულია ფიქსირებული ფასი – 53 ლარი პირველი ხარისხის ფქვილის 50 კგ-იან ტომარაზე. პროგრამა 1 მარტამდე იმოქმედებს.

ხორბლის ფქვილის სუბსიდირებისთვის სახელმწიფო ჯამში 10 მლნ ლარის გამოყოფას გეგმავს.

აღსანიშნავია, რომ საქართველოში ხორბლის იმპორტის 90% რუსეთზე მოდის, რაც დაახლოებით ნახევარ მილიონ ტონა მარცვლეულს ნიშნავს.

40
ფერმა

ქვემო ქართლის რეგიონში მესაქონლეობის ახალი ფერმა ამოქმედდა

40
(განახლებულია 12:48 23.01.2021)
მესაქონლეობის ახალ ფერმაში 20 ადგილობრივია დასაქმებული. წარმოებული პროდუქციის რეალიზაცია ადგილობრივ ბაზარზე ხორციელდება

თბილისი, 23 იანვარი - Sputnik. მარნეულის მუნიციპალიტეტის სოფელ დამია-გიაურარხში თანამედროვე სტანდარტებით აღჭურვილი მესაქონლეობის ახალი ფერმა ამოქმედდა. ინფორმაციას სოფლის მეურნეობის სააგენტო ავრცელებს.

სააგენტოს ცნობით, ახალი ფერმის მშენებლობაზე 2 მილიონ ლარამდე თანხა დაიხარჯა, აქედან 1.5 მლნ ლარი შეღავათიანი აგროკრედიტია, დანარჩენი კი ფერმერის ინვესტიცია. ფერმაში, სადაც 20 ადგილობრივია დასაქმებული ყოველდღიურად 4 ტონა ნედლ რძეს აწარმოებენ. პროდუქციის რეალიზაცია ადგილობრივ ბაზარზე ხორციელდება.

მესაქონლეობის ახალი ფერმა სოფლის განვითარების სააგენტოს დირექტორმა ილია თამარაშვილმა ქვემო ქართლის მხარის სახელმწიფო რწმუნებულთან შოთა რეხვიაშვილთან ერთად დაათვალიერა.

სააგენტოს დირექტორის განცხადებით, სოფლის განვითარების სააგენტო აგრარულ საქმიანობაში ჩართული პირებისთვის სესხის პროცენტის თანადაფინანსებას ახორციელებს. სახელმწიფოს მხრიდან ფინანსური მხარდაჭერა ფერმერებს ბიზნესის წამოწყებასა და მის განვითარებაში ეხმარება.

„სოფელ დამია-გიაურარხში აშენებული ახალი ფერმა კიდევ ერთი მაგალითია, თუ როგორ შესაძლებლობებს იძლევა სოფლის მეურნეობისა და ეკონომიკის მიმართულებით არსებული სახელმწიფო პროექტები“, - განაცხადა შოთა რეხვიაშვილმა.

შეღავათიანი აგროკრედიტის სახელმწიფო პროექტი 2013 წლიდან ხორციელდება, პროგრამა ითვალისწინებს მიზნობრივ კრედიტებს დაბალი ტარიფით ფერმერების დასახმარებლად.

 

 

40
თბილისი

დღის ასტროპროგნოზი ზოდიაქოს ნიშნებისთვის: 24 იანვარი

0
(განახლებულია 13:46 23.01.2021)
გთავაზობთ ყოველდღიურ ასტროლოგიურ პროგნოზს ზოდიაქოს თითოეული ნიშნისთვის. გაიგეთ ჩვენი ჰოროსკოპიდან, რას გიმზადებენ ვარსკვლავები და რას გირჩევენ ასტროლოგები

დღეს 2021 წლის 24 იანვარია, კვირა. მზარდი მთვარე ტყუპის ნიშანშია. ამ დღეს პლანეტა მზე მფარველობს.

დღეს შესანიშნავი დღეა იმისთვის, რომე ნებისმიერ გადაუჭრელ საკითხში, ეხება ეს სამუშაოსა თუ პირად ცხოვრებას, სიცხადე შეიტანოთ. თუ შეძლებთ გრძნობების გაკონტროლებას, გაქვთ შანსი, რომ ჩაწვდეთ პრობლემის არსს და ერთადერთი სწორი გადაწყვეტილება მიიღოთ. მაგრამ საფრთხე ისაა, რომ ვნებათაღელვა და ტემპერამენტი მომატებული იქნება, ამიტომ, ეცადეთ, გამოავლინოთ მხოლოდ პოზიტიური ენერგია, ხოლო ნეგატიური დამალოთ, არ მოაწყოთ „საქმის გარჩევა“ საყვარელ ადამიანთან – ეს შეიძლება ძალიან მძიმე შედეგით დამთავრდეს.

2021 წლის ჰოროსკოპი ზოდიაქოს ნიშნებისთვის>>

ვერძი: დღეს უნარი გაქვთ, საქმის არსს ჩასწვდეთ და თითოეული საკითხი „ატომებისა და მოლეკულების“ დონეზე „დაშალოთ“. ამან, შესაძლოა, სრულიად ახალ, მათ შორის, მოულოდნელ დასკვნებამდე მიგიყვანოთ. ყველაზე უბრალო ყოველდღიურ საქმეებშიც კი, თუ მათ სხვა კუთხით შეხედავთ, ადრე უხილავ ნიუანსებს დაინახავთ. ასევე იქნება ადამიანებთან მიმართებითაც – ირგვლივ მყოფნი თქვენგან სულ უმნიშვნელო საიდუმლოსაც ვერ დამალავენ.

კურო: დღეს რაღაც ისეთ საქმეში იქნებით ჩართული, რომელიც ასე თუ ისე ფულთან არის დაკავშირებული. ეს შეიძლება ნებისმიერი რამ იყოს – ხელმძღვანელობასთან ხელფასზე საუბრიდან დაწყებული ბანალურ კამათამდე ზედმეტი ხარჯების გამო. ვარსკვლავები გირჩევენ, არ გაცხარდეთ ასეთი ლაპარაკის დროს და მოერიდოთ უსარგებლო დეტალებს. ეცადეთ, შეინარჩუნოთ სიმშვიდე და ფაქტებზე გაამახვალითო ყურადღება. წყენასა და ურთიერთპრეტენზიებს სერიოზული პრობლემების შექმნა შეუძლია დღეს.

ტყუპი: დღეს თქვენ ხმაში მბრძანებლური ტონი გაიჟღერებს. გარშემომყოფებისთვის საკუთარ სიმართლის მტკიცებას დაიწყებთ და არაა გამორიცხული, რომ ზედმეტად გაცხარდეთ. ზედმეტად თავდაჯერებული ბრძანდებით, ასი პროცენტით გჯერათ, რომ რასაც აკეთებთ, სწორად აკეთებთ. ირგვლივ მყოფებს კი ამაში ეჭვი ეპარებათ და დახმარების სურვილი არა აქვთ, რაც, შესაძლოა, საბოტაჟს დაემსგავსოს. დღე რომ უაზრო კამათში არ გავიდეს, უნდა მოთოკოთ თქვენი მღელვარება, შეაჩეროთ სხვებზე ზეწოლა. ბოლოს და ბოლოს, ხომ შეიძლება ამ ადამიანებთან შეთანხმება ჩხუბის გარეშე?

კირჩხიბი: კარგი დღეა იმისთვის, რომ ურთიერთობებში სიცხადე შეიტანოთ, თუ, რა თქმა უნდა, ამის აუცილებლობას ხედავთ. რაზეც ვერ ბედავთ დალაპარაკებას, კითხვები, რომლების დასმაც გერიდებათ – ეს ყველაფერი შეიძლება დღეს გააკეთოთ უშიშრად. თქვენი განწყობა იმგვარია, რომ იყოთ პატიოსანი, გულწრფელი და გამგები თანამოსაუბრე. ეს დაგეხმარებათ, რომ ისაუბროთ პრეტენზიების გარეშე თუნდაც ყველქზე ფაქიზ თემებზე.

ლომი: დღეს, შესაძლოა, რაღაც საკითხში თავდაჯერებულობამ გიღალატოთ. რაშიც ასი პროცენტით იყავით დარწმუნებული, არაა გამორიცხული, რომ სულ სხვაგვარად დაინახოთ, მოულოდნელი მხრიდან შეხედოთ მას. ასევე შესაძლებელია, რომ რაღაც საკითხზე მოსაზრება შეიცვალოთ. სხვა სიტყვებით რომ ვთქვათ, დღეს მზად უნდა იყოთ ცვლილებებისთვის, თუნდაც ეს ცვლილებები მხოლოდ თქვენს თავში „დატრიალდეს“.

ქალწული: მზად ხართ, ყველაფერს ძირისძირობამდე ჩაუღრმავდეთ, თუნდაც სულ უბრალო და მცირე მნიშვნელობის საკითხი იყოს. გაურკვევლობა საქმეებში თუ სიტყვებში გაგაღიზიანებთ და იქამდე „იკირკიტებთ“ საკითხში, სანამ ყველაფერი ნათელი არ გახდება. ეს დაგეხმარებათ, რომ შეცდომებს აარიდოთ თავი. თუმცა, იმდენ კითხვას დასვამთ დაზუსტების მიზნით, რომ გარშემომყოფებს შეიძლება მოეჩვენოთ, რომ დასცინით მათ.

სასწორი: დღეს უნდა გადაწყვიტოთ, რა არის ის, რისგანაც დიდი ხნის წინ უკვე უნდა გათავისუფლებულიყავით და ახლისთვის დაგეთმოთ ადგილი. შესაძლოა, უკან გექაჩებათ უკვე ყავლგასული რაღაც იდეები, განუხორციელებელი გეგმები, შეუსრულებელი ვალდებულებების ტვირთი. არ არის გამორიცხული, რომ დღეს რომელიმე ილუზიასთან ან ოცნებასთან დამშვიდობება მოგიწიოთ, მაგრამ მხოლოდ იმისთვის, რომ წინ ნამდვილი პერსპექტივები გახსნათ.

მორიელი: დღეს არანაირ კომპრომისზე წასასვლელად არ ხართ მზად. თქვენი „დიახ“ ნიშნავს „დიახ“–ს და „არა“ – არას. მათ შორის სხვა არაფერი არსებობს. ასეთი უაპელაციო მცდელობა, რომ სამყარო შავ და თეთრ ფერებად დაყოთ, გარშემომყოფების მხრიდან აუცილებლად წინააღმდეგობას გამოიწვევს. დღეს ძალზე ემოციური და სიმართლისმოყვარული ბრძანდებით, ამიტომ ურთიერთობების გამორკვევის ნებისმიერი მცდელობა კამათით დამთავრდება. ეს რომ არ მოხდეს, უნდა გათავისუფლდეთ ილუზიისგან, რომ ვინმესთვის რამის დამტკიცებას შეძლებთ – ეს დღეს ნამდვილად არ გამოგივათ.

მშვილდოსანი: ექსპერტების მთავარი რჩევა დღეს ასეთია – არ იჩქაროთ არანაირი სერიოზული გადაწყვეტილების მიღება. სჯობს, დრო ინფორმაციის შეგროვებას დაუთმოთ. შესაძლოა, რაღაც ვერ გაითვალისწინეთ ან სათანადო ცნობები არ მოგეპოვებათ. შეცდომა არ დაუშვათ, დღეს ფაზლის ყველა დეტალი უნდა ააწყოთ: დაელაპარაკოთ საკითხის მცოდნე ადამიანებს, იპოვოთ პასუხები კითხვებზე, მოიძიოთ და ჩაუსხდეთ წიგნებს, შეისწავლოთ ფაქტები. მხოლოდ ამის შემდეგ შეგიძლიათ „ბრძოლის ველზე“ გასვლა.

თხის რქა: დიდი ალბათობით, მოგიწევთ საკუთარი შეხედულების გადახედვა რომელიმე ადამიანზე, რამე მოვლენაზე ან პრობლემაზე. ეს, შესაძლოა, საკუთარი სურვილის მიუხედავად გააკეთოთ, უბრალოდ, სიტუაციის გამო რაღაც ფაქტები შეიძლება ჩაგივარდეთ ხელში, რომელთა გათვალისწინებაც მოგიწევთ. ამან რომ მთელი დღე კალაპოტიდან არ ამოგაგდოთ, სჯობს, მოულოდნელობისთვის მზად იყოთ და აუცილებლობის შემთხვევაში რაღაც საკითხში მოქნილობა გამოავლინოთ.

მერწყული: დღეს გარშემომყოფებთან ურთიერთობებში, სავარაუდოდ, ძალიან გაჯიუტდებით. იმის გათვალისწინებით, რომ ძალზე ემოციური ხართ და ყველაფეი ადვილად გწყინთ, არ არის გასაკვირი, რომ ცხარე კონფლიქტების წყარო გახდეთ. ასტროლოგები გირჩევენ, დღეს თქვენთვის შეინახოთ ძვირფასი, „ერთადერთი სწორი“ მოსაზრება და მას ხმამაღლა გამოთქვამთ, მაშინ მზად იყავით, რომ კომპრომისზე წახვიდეთ და ბოდიშიც მოიხადოთ.

თევზები: ყველაფერი წესრიგში და სისუფთავეში უნდა იყოს – სულშიც, ფიქრებშიცა და მუშაობის მხრივაც. ყველაფერს ხედავთ და ამჩნევთ – სულ მცირე მტვრის ნაწილაკსაც კი და მთელი ძალით ცდილობთ დასუფთავებას. უმნიშვნელო არეულობას ან სიბინძურესაც კი გარშემომყოფების ნაკლოვანებების – მათი არაიდეალურად სუფთა საქციელისა და სიტყვების გამოვლენა შეუძლია. ნაკლებსავარაუდოა, რომ დღეს ვინმემ ან რამემ შეაკავოს თქვენი მისწრაფება, რომ პირდაპირ მიახალოთ სათქმელი სისუფთავის „დამრღვევს“.

0