Expo GEORGIA

ცოტა ღვინო, ცოტაც თხილი... კიდევ რას ვყიდით მსოფლიო ბაზარზე?

1070
(განახლებულია 19:47 07.02.2020)
როგორია გასული წლის საგარეო ვაჭრობის მოცულობა, რა ნიშნულზე დაფიქსირდა ექსპორტ-იმპორტის ბალანსი და შემცირდა თუ არა უარყოფითი სავაჭრო სალდო?

სამსონ ხონელი

მიყვარს წელიწადის ეს დრო. რატომ, განსაკუთრებული რა ხდება? − ალბათ, ჩამეძიება მკითხველი. მიზეზი ბევრია, ყველას ვერ ჩამოვთვლი, ერთს კი ვიტყვი, ძველის და ახლის გასაყარი პროფესიული თვალსაზრისით გამორჩეულად საინტერესო პერიოდია. სხვადასხვა მიმართულებით შემაჯამებელი სტატისტიკური მონაცემები ქვეყნდება, რაც განვითარებული პროცესების სიღრმისეული ანალიზისა და დასკვნების საშუალებას იძლევა. ვიცი, რომ ამ მოსაზრებას ყველა არ დაეთანხმება, მაგრამ ფაქტია, წინამდებარე სტრიქონებიც მას შემდეგ დაიწერა, რაც სტატისტიკის ეროვნული სამსახურის ანგარიშს გავეცანი. ამჯერად თქვენს ყურადღებას ექსპორტ-იმპორტის ბალანსზე გავამახვილებ. მრავალგზის მითქვამს, რომ საგარეო ვაჭრობის სალდო ზოგადად ქვეყნის ეკონომიკისა და კონკრეტულად კი მისი საწარმოო პოტენციალის ერთ-ერთი მნიშვნელოვანი ინდიკატორია.

ბოლო წლებში საგარეო სავაჭრო ბრუნვის მოცულობის ზრდასთან ერთად იზრდებოდა ექსპორტი და მნიშვნელოვნად შემცირდა უარყოფითი სავაჭრო სალდო. დადებითი ტენდენცია გასულ წელსაც შენარჩუნდა. „საქსტატის“ ცნობით, საგარეო სავაჭრო ბრუნვამ 12.8 მილიონი ამერიკული დოლარი შეადგინა. ეს 2018 წლის შესაბამის მაჩვენებელზე 2.7 პროცენტით მეტია. ექსპორტი 12.4 პროცენტით გაიზარდა და 3.7 მილიონი ამერიკული დოლარი შეადგინა. იმპორტი კი 0.8 პროცენტით შემცირდა, მისი მოცულობა 9.0 მილიონი ამერიკული დოლარი იყო. 2019 წელს უარყოფითმა სავაჭრო ბალანსმა 5.2 მილიონი ამერიკული დოლარი და საგარეო სავაჭრო ბრუნვის 41.2 პროცენტი შეადგინა. ვნახოთ, როგორია საგარეო ვაჭრობის, კერძოდ, ექსპორტის სტრუქტურა. რას ვყიდით მსოფლიო ბაზარზე? ამ არცთუ მარტივ კითხვაზე საპასუხოდ კვლავ „საქსტატის“ მონაცემებს მოვიშველიებ.

შესაძლოა, გაგიკვირდეთ, მაგრამ 2019 წელს საქართველოდან ექსპორტირებულ პროდუქტებს შორის პირველ ადგილს მსუბუქი ავტომობილები იკავებს. გასულ წელს მათი ექსპორტი 68.2 პროცენტით გაიზარდა და 686.7 მილიონი ამერიკული დოლარი შეადგინა. კი, მაგრამ, ჩვენ რომ ავტომობილებს არ ვაწარმოებთ, რას ვყიდით? − სავარაუდოდ, ჩამეძიება მკითხველი. განვმარტავ, რომ ამ შემთხვევაში რეექსპორტზე – საქართველოში ჯერ უცხოეთიდან იმპორტირებულ და შემდეგ ექსპორტზე გატანილ მსუბუქ ავტომობილებზეა საუბარი.

საინტერესოა, მთლიანი ექსპორტის მოცულობაში როგორია ადგილობრივი წარმოების პროდუქციის წილი. „საქსტატის“ მონაცემებით, გასულ წელს საქართველოდან ექსპორტირებული პროდუქციის 62 პროცენტი ადგილობრივი წარმოებისაა. პირველ ადგილზე, 651.6 მილიონი ამერიკული დოლარით, წარმოდგენილია სპილენძის მადნები და კონცენტრატები. აღნიშნული სასაქონლო ჯგუფის წილი მთლიანი ადგილობრივი ექსპორტის 27.7 პროცენტს შეადგენს. მეორე ადგილზეა ფეროშენადნობები 302.1 მილიონი ამერიკული დოლარით, რაც მთლიანი ადგილობრივი ექსპორტის 12.8 პროცენტია. 221.6 მილიონი ამერიკული დოლარით მესამე პოზიცია ყურძნის ნატურალურ ღვინოებს უკავია. ეს კი მთლიანი ადგილობრივი ექსპორტის 9.4 პროცენტია.

რაკი ღვინო ვახსენე, აქვე მოგახსენებთ, რომ გასულ წელს საქართველოდან მსოფლიოს 53 ქვეყანაში 94 მილიონამდე ბოთლი (0.75 ლ) ღვინო იყო ექსპორტირებული, რაც 2018 წლის რაოდენობას 9 პროცენტით აღემატება და დამოუკიდებელი საქართველოს ისტორიაში ყველაზე მაღალი მაჩვენებელია. ღვინის ეროვნული სააგენტოს ცნობით, გასულ წელს ექსპორტირებული ღვინის ღირებულება 240 მილიონ ამერიკულ დოლარს აღწევს. ეს კი 2018 წლის ანალოგიურ მონაცემზე 17 პროცენტით მეტია. 2019 წელს სხვადასხვა მოცულობის ღვინის ექსპორტი 341-მა კომპანიამ განახორციელა. ბრენდის ექსპორტით მიღებულმა შემოსავალმა გასულ წელს 68 მილიონი ამერიკული დოლარი შეადგინა, რაც 67 პროცენტით აღემატება წინა წლის ამავე მონაცემს. მსოფლიოს სულ 25 ქვეყანაში ექსპორტზე გავიდა 31.6 მილიონი ბოთლი (0.5 ლ) ბრენდი, რაც 2018 წლის ანალოგიურ მაჩვენებელს 58 პროცენტით აჭარბებს. აღსანიშნავია, რომ 48 პროცენტით გაიზარდა ჭაჭის ექსპორტი. მსოფლიოს 28 ქვეყანაში ექსპორტირებულია 625 ათასი ბოთლი (0.5 ლ) ჭაჭა. მიღებული შემოსავალი 1.7 მილიონ ამერიკულ დოლარს აღწევს, რაც წინა წლის მაჩვენებელზე 38 პროცენტით მეტია. და, ბოლოს, ღვინის ეროვნული სააგენტოს მონაცემებით, ღვინის, ბრენდის, ჭაჭის, საბრენდე სპირტისა და ჩამოსასხმელი ბრენდის ექსპორტის შედეგად გასულ წელს მიღებულია 345 მილიონი ამერიკული დოლარი, რაც 15 პროცენტით აღემატება 2018 წლის ანალოგიური პერიოდის მაჩვენებელს.

რამ განაპირობა ქართული ღვინისა და ზოგადად სპირტიანი სასმელების ექსპორტის ზრდა? როგორც დარგის სპეციალისტები და ექსპერტები აცხადებენ, მეღვინეობა ქვეყნის ეკონომიკის ერთ-ერთი პრიორიტეტული მიმართულებაა. საგრძნობლად გაუმჯობესდა ხარისხი, წარმოებული პროდუქცია აკმაყოფილებს საერთასორისო სტანდარტებს, მოხერხდა ბაზრის დივერსიფიკაცია და, შესაბამისად, შესაძლებელი გახდა დარგის განვითარება...  

საგულისხმოა, რომ 2019 წელს, წინა წელთან შედარებით, 10.6 პროცენტით გაიზარდა თხილის ექსპორტიც. მთავრობის ცნობით, გასულ წელს 67 მილიონი ამერიკული დოლარის თხილი გავიდა ექსპორტზე, რაც 2014 წლის შემდეგ ყველაზე დიდი მაჩვენებელია. რეკორდულია როგორც მთლიანი ექსპორტის, ასევე საქართველოდან ევროკავშირში ექსპორტის მოცულობაც.

ღვინოს, ბრენდს, ჭაჭასა და თხილს არც მანდარინი ჩამორჩა. მოგეხსენებათ, ნარინჯისფერი რთველი დასრულდა. გარემოს დაცვისა და სოფლის მერუნეობის სამინისტროს წინასწარი ინფორმაციით, გასულ წელს მანდარინის მოსავლმა 50 ათას ტონას გადააჭარბა. გაიზარდა ექსპორტიც და სექტემბერ-იანვრის თვეში 31 ათასი ტონა შეადგინა, რაც 5 პროცენტით აღემატება წინა წლის ანალოგიური პერიოდის მაჩვენებელს. მანდარინის ექსპორტი განხორციელდა რუსეთში, უკრაინაში, სომხეთში, ბელარუსში, ყაზახეთსა და ყირგიზეთში. ექსპერტები ხაზგასმით აღნიშნავენ, რომ ქართული მანდარინის ტრადიციულ საექსპორტო ქვეყნებს გასულ წელს დაემატა სლოვენია, მოლდოვა, პოლონეთი, ლიეტუვა, ყატარი და სინგაპური. სპეციალისტების შეფასებით, 2019 წლის მოსავლის მაღალი ხარისხი დიდწილად განაპირობა აზიური ფაროსანას წინააღმდეგ სახელმწიფოს მიერ გატარებულმა ღონისძიებებმა. პროდუქციის მაღალი ხარისხი კი პირდაპირპროპორციულად განაპირობებდა მაღალ საბაზრო ფასს. მანდარინზე საბითუმო ფასი 0.6 ლარიდან 2.0 ლარამდე იყო.

და, ბოლოს, თვალი გადავავლოთ ადგილობრივი წარმოების პროდუქციის ექსპორტის გეოგრაფიას. გასულ წელს ევროკავშირის ქვეყნებში განხორციელებული ადგილობრივი ექსპორტის მოცულობა 736.6 მილიონი ამერიკული დოლარით განისაზღვრა, რაც 17.2 პროცენტით აღემატება 2018 წლის შესაბამის მაჩვენებელს და ქვეყნის მთლიანი ადგილობრივი ექსპორტის 31.3 პროცენტს შეადგენს. დამოუკიდებელ სახელმწიფოთა თანამეგობრობის ქვეყნებში განხორციელებული ადგილობრივი ექსპორტის მოცულობა 855.2 მილიონ ამერიკულ დოლარს შეადგენს, რაც 10 პროცენტით მეტია წინა წლის შესაბამის მაჩვენებელზე და ქვეყნის მთლიანი ადგილობრივი ექსპორტის 36.4 პროცენტია.

სულ ეს არის, აქ დავსვამ წერტილს. როგორი იქნება ექსპორტ-იმპორტის სალდო წლის ბოლოს, ამას დრო გვიჩვენებს. მთავარია, მანამდე მძიმე პოლიტიკურმა შემოდგომამ არ გადაგვიყოლოს...

1070
დაკეტილი სასტუმროები, კაფე–ბარები

შრომის ინსპექციამ წესების დარღვევისთვის სამი ობიექტი დააჯარიმა

21
(განახლებულია 09:56 19.01.2021)
ბოლო დღეებში შრომის ინსპექციამ 500-ზე მეტი სხვადასხვა ობიექტი შეამოწმა, აქედან გააფრთხილეს 485  ობიექტი

თბილისი, 19 იანვარი - Sputnik. საქართველოში კოვიდ-შეზღუდვების ამოქმედების შემდეგ 48 ათასზე მეტი ობიექტი შემოწმდა, განაცხადა შრომის პირობების ინსპექტირების უფროსმა ბექა ფერაძემ.

ფერაძის განმარტებით, ახალი შეზღუდვების ამოქმედების შემდეგ, 28 ნოემბრიდან 17 იანვრის ჩათვლით პერიოდში ზედამხედველობა განხორციელდა 48 589 ობიექტზე, რეკომენდაციები კი გაიცა 26 841 ობიექტზე.

14-17 იანვარს  შემოწმდა 553 ობიექტი, მათგან 485-ს ზეპირსიტყვიერი გაფრთხილება მიეცა, 65 ობიექტი კი საქმიანობას პროტოკოლის სრული დაცვით ახორციელებდა.

„ამავე პერიოდში 322-ე დადგენილების მიხედვით აკრძალული საქმიანობის განხორციელებისთვის სამი ობიექტი დაჯარიმდა. მათგან ერთ-ერთი ახორციელებდა დახურულ სოციალურ ღონისძიებას, რომელსაც 100-ზე მეტი ფიზიკური პირი ესწრებოდა“, -აღნიშნა ფერაძემ.

საქართველოში ინფიცირებულთა ზრდის მაჩვენებლის შეკავების მიზნით ხელისუფლებამ 28 ნოემბრიდან მკაცრი შეზღუდვები დააწესა. არ მუშაობს მუნიციპალური ტრანსპორტი, კაფე–რესტორნები, ფიტნეს–დარბაზები და აუზები და ა.შ. გარდა ამისა, ქვეყნის მთელ ტერიტორიაზე 21:00 საათიდან 05:00 საათამდე იკრძალება ქუჩაში როგორც ქვეითების, ისე ტრანსპორტის გადაადგილება.

21
თემები:
საქართველოს ეკონომიკა
„ენგურჰესი

თურნავა: „ენგურჰესის“ რემონტი მნიშვნელოვანია საქართველოს ენერგოუსაფრთხოებისთვის

26
(განახლებულია 08:49 19.01.2021)
სარემონტო–აღდგენითი სამუშაოები განუწყვეტლივ რეჟიმში ჩატარდება, რათა „ენგურჰესმა“ დროულად განაახლოს ფუნქციონირება

თბილისი, 19 იანვარი – Sputnik. საქართველოში ყველაზე მძლავრი სადგურის – „ენგურჰესის“ რემონტის პროექტი მასშტაბურია და კრიტიკულად მნიშვნელოვანი საქართველოს ენერგოუსაფრთხოებისთვის, განაცხადა ეკონომიკისა და მდგრადი განვითარების მინისტრმა ნათია თურნავამ.

დერივაციული (ჰიდროტექნიკური) გვირაბის დაგეგმილი სამუშაოების გამო სადგური 20 იანვრიდან 1 მაისამდე არ იმუშავებს. გამოირთვება „ენგურჰესის“ ხუთივე აგრეგატი.

მასშტაბური პროექტის მოსამზადებელი სამუშაოების შესახებ დეტალური ინფორმაცია თურნავამ ქვეყნის ენერგოსექტორის სახელმწიფო უწყებებისა და იმ სამშენებლო კომპანიების წარმომადგენლებთან ერთად განიხილა, რომლებიც ჰესის რემონტის პროექტს ახორციელებენ.

„ენგურჰესი“ ჩვენთვის ძალიან მნიშვნელოვანი ობიექტი და იაფი ენერგიის წყაროა... მისი უსაფრთხო ექსპლუატაციისთვის პერიოდულად აუცილებელია სადგურზე სარეაბილიტაციო–სარემონტო სამუშაოების ჩატარება. ამჯერად განხორციელდება საკმაოდ მასშტაბური სამუშაოები – ესაა გვირაბის ცემენტაცია, დალექილი ლამის გამოტანა, ელექტრომექანიკური ნაწილების შეკეთება–რეაბილიტაცია, რაც საბოლოო ჯამში უზრუნველყოფს იმას, რომ სადგურის მიერ წყლის დანაკარგი შემცირდება, ელექტროსადგურის გამომუშავება კი მოიმატებს“, – განუცხადა თურნავამ ჟურნალისტებს.

მისი თქმით, სარემონტო სამუშაოები უწყვეტ– 24–საათიან რეჟიმში განხორციელდება, რათა დროულად ამუშავდეს ქვეყნის უმძლავრესი ჰესი.

თურნავა: საქართველოს ენერგოსისტემა ენგურჰესის გაჩერებით არ დაზარალდება>>

სარემონტო სამუშაოები „ენგურჰესზე“ ბოლოს 15 წლის წინ ჩატარდა. თურნავას განცხადებით, ჰიდროსადგურის მუშაობის უსაფრთხოებისთვის მისი გაჩერება აუცილებელია. ამისთვის კი ყველაზე ოპტიმალური დრო შეარჩიეს, როდესაც „ენგურჰესის“ წყლის რესურსები მინიმალურია.

რემონტის პროექტის სრული ღირებულებაა 45 მლნ ევრო. აქედან 7 მლნ ევროკომისიის გრანტია, 38 მლნ – ევროპის რეკონსტრუქციისა და განვითარების ბანკი (EBRD) მიერ გამოყოფილი თანხა.

„ენგურჰესი“ ყველაზე დიდი ჰესია კავკასიაში და ის საქართველოს ელექტროენერგიის ძირითად წყაროს წარმოადგენს. ამ ჰესის მიერ გამომუშავებული ელექტროენერგია ზამთარში აფხაზეთს მიეწოდება, რომელსაც საქართველოს ცენტრალური ხელისუფლება ვერ აკონტროლებს.

„ენგურჰესი“ ჰიდროელექტროსადგურების კასკადია, რომელშიც შედის თვით ენგურჰესი, რომლის დადგმული სიმძლავრეა 1300 ათ. კვტ, ვარდნილჰესი №1 (სიმძლავრე 220 ათ. კვტ) და სამი 40 ათ. კვტ სიმძლავრის ჰესი. ენგურჰესის თაღოვან კაშხალს, რომელიც ერთ-ერთი ყველაზე მაღალია მსოფლიოში ამ ტიპის დამბებს შორის, მინიჭებული აქვს ეროვნული მნიშვნელობის კულტურის ძეგლის სტატუსი.

26
თემები:
საქართველოს ენერგეტიკა
COVID 19 ჩინეთში - რიგი ვაქცინაციაზე

ჩინეთში კორონავირუსის ახალი აფეთქებაა: პეკინში შესვლა შეიზღუდა

0
(განახლებულია 12:24 19.01.2021)
გამომდინარე იქიდან, რომ ჩინეთში კვლავ გამოვლინდა კორონავირუსით ინფიცირების შემთხვევები, ხელისუფლებამ ახალი საავადმყოფოების აგება გადაწყვიტა და ხუთ დღეში ააშენა ჰოსპიტალი

თბილისი, 19 იანვარი — Sputnik. ჩინეთში ერთი დღის განმავლობაში კორონავირუსით ინფიცირების 118 შემთხვევა გამოვლინდა, საიდანაც 106 ლოკალურია, ხოლო 12 — ქვეყნის გარედან შეტანილი, იუწყება სააგენტო „სინჰუა“ ჩინეთის ჯანდაცვის სახელმწიფო კომიტეტზე დაყრდნობით.

კორონავირუსის ქვეყნისშიდა შემთხვევების ეპიცენტრი პროვინცია ცზილინის ჩრდილო–აღმოსავლეთი ნაწილი გახდა, სადაც ინფიცირებულთა რაოდენობა იზრდება. წინა დღით პროვინციაში 43 ახალი დაავადებული გამოვლინდა, ხოლო ერთი დღით ადრე — 30.

მანამდე უფრო მწვავე ვითარება შეინიშნებოდა ჰებეის პროვინციაში, სადაც გუშინ ინფიცირების 35 შემთხვევა დადასტურდა.

ხელისუფლებამ შეზღუდვები დააწესა პეკინში შესვლაზე, ვინაიდან ქალაქი ჰებეის ტერიტორიაზე მდებარეობს.

აღსანიშნავია, რომ მას შემდეგ, რაც რამდენიმე თვიანი შესვენების შემდეგ ჩინეთში კორონავირუსით ინფიცირების შემთხვევებმა კვლავ იჩინა თავი, ხელისუფლებამ ახალი დროებითი საავადმყოფოების აგება გადაწყვიტა.

ჰებეიში ხუთ დღეში აიგო სპეციალური ჰოსპიტალი, რომელიც 1500 ადგილზეა გათვლილი. თითოეული პალატის ფართობი 18 კვადრატული მეტრია, ყოველი მათგანი აღჭურვილია ვენტილაციის კარგი სისტემით, აქვს ცალკე საპირფარეშო და შესაძლებელია ინტერნეტზე წვდომა. ხელისუფლება კიდევ ექვსი ასეთი ჰოსპიტლის აგებას გეგმავს.

 

0
თემები:
საერთაშორისო პანორამა