ახალი თბოელექტროსადგური

გარდაბანში კომბინირებული ტიპის ელექტროსადგურის მშენებლობა დასრულდა

66
(განახლებულია 14:14 25.12.2019)
ახალი ელექტროსადგური განკუთვნილია ზამთრის პერიოდში ელექტროენერგიის გამომუშავებისთვის, როდესაც ქვეყნის ჰესებზე მისი გამომუშავება შემცირებულია.

თბილისი, 25 დეკემბერი — Sputnik. გარდაბანში ახალი აშენებული 230 მეგავატი სიმძლავრის თბოელექტროსადგური სატესტო რეჟიმში მუშაობს და ელექტროენერგიას საქართველოს ერთიან ელექტროსისტემას აწვდის, აცნობეს „Sputnik-საქართველოს" „საქართველოს ნავთობისა და გაზის კორპორაციის" (GOGC) პრეს-სამსახურში.

„გარდაბნის თბოელექტროსადგური 2" GOGC-ს დაფინანსებით ჩინურმა კომპანიამ China Tianchen Engineering Corporation (CTEC) ააშენა. ინვესტიციის მოცულობა 180 მილიონი აშშ დოლარი იყო.

„პროექტს უმნიშვნელოვანესი სტრატეგიული მნიშვნელობა აქვს ქართული ენერგოსისტემის დამოუკიდებლობისთვის, ქვეყნის ენერგოუსაფრთხოების გაძლიერებისა და მთლიანობაში ენერგეტიკული სექტორის შეუქცევადი განვითარებისთვის", – განაცხადეს კორპორაციის პრეს-სამსახურში.

მშენებლობა 2018 წლის თებერვლიდან 2019 წლის დეკემბრამდე მიმდინარეობდა. ამჟამად ელექტროსადგური ზამთრის სეზონისთვის ელექტროენერგიის გამომუშავებას უკვე უზრუნველყოფს.

ამგვარი პროექტების რეალიზაცია პრიორიტეტულია, რადგან ზამთრის პერიოდში ადგილობრივი ობიექტების მიერ ელექტროენერგიის მზარდი მოხმარების დაკმაყოფილება შეუძლებელია.

საქართველოში პირველად ახალი თბოელექტროსადგური აღჭურვილია ე.წ. ნულიდან ჩაშვების ფუნქციით, რაც გულისხმობს ქსელში ელექტროენერგიის პირველად მიწოდებას და საგანგებო მდგომარეობის დროს მთელი სისტემის ნულიდან აღდგენას.

ახალი თბოელექტროსადგური თითქმის ორჯერ ნაკლებ გაზს მოიხმარს, ის უფრო ეკონომიურია, ვიდრე საქართველოში არსებული ბუნებრივ გაზზე მომუშავე ძველი ენერგობლოკები.

საქართველოში კიდევ ერთ კომბინირებული ციკლის თბოელექტროსადგურს ააგებენ>>

თბოელექტროსადგური აღჭურვილია კომპანია „ჯენერალ ელექტრონიქსის" (GE-Power) გაზისა და ორთქლის თანამედროვე ტიპის ტურბინებით, ასევე გენერატორებით. ეს კომპანია ამ მოწყობილობების წარმოების მხრივ ლიდერია მთელ მსოფლიოში და ხარისხის მაღალი სტანდარტითა და ენერგოეფექტურობით გამოირჩევა.

საქართველოში ელექტროენერგიის მოხმარება სტაბილურად იზრდება, რასთან დაკავშირებითაც მაღალი ეფექტურობის მქონე და ეკონომიური კომბინირებული თბოელექტროსადგურების მშენებლობა მთავრობის ერთ-ერთ პრიორიტეტს წარმოადგენს.

ახალი სადგურის სრულყოფილად ექსპლუატაციაში გაშვება 2020 წლის ზამთარში იგეგმება.

CTEC – ჩინეთის ერთ-ერთი მსხვილი საინჟინრო-ინდუსტრიული კორპორაციაა, რომელიც 1953 წელს დაარსდა. ამჟამად კომპანიის წლიური შემოსავალი ერთ მილიარდ დოლარს აჭარბებს, ხოლო საერთაშორისო საინჟინრო პროექტები 30-ზე მეტ ქვეყანას მოიცავს.

გარდაბანში 237 მეგავატი დადგმული სიმძლავრის კომბინირებული ტიპის პირველი ელექტროსადგური ექსპლუატაციაში 2015 წლის აგვისტოში შევიდა. მისი ექსპლუატაციის ვადაა 25 წელი.

66
თემები:
საქართველოს ენერგეტიკა (95)
ვალუტის გადამცვლელი პუნქტი

ლარის კურსი 22 სექტემბერს

126
წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0155 ლარით გაუფასურდა.

თბილისი, 22 სექტემბერი  — Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,2295 GEL/$1 ნიშნულზე დაადგინა.

წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0155 ლარით გაუფასურდა.  

ლარის კურსი 22 სექტემბერს

 

126
თემები:
ლარის კურსი დღეს
რთველი

რთველი 2020: კახეთში 120 ათასი ტონა ყურძენი გადამუშავდა

93
(განახლებულია 19:47 21.09.2020)
მიუხედავად პანდემიის პირობებში მძიმე მდგომარეობისა, ყოველდღიურად ქარხნებს 10 ათას ტონაზე მეტ ყურძენს აბარებენ.

თბილისი, 21 სექტემბერი – Sputnik. კახეთში რთველი დაუბრკოლებლივ მიმდინარეობს და პიკურ ფაზაშია – „რთველი 2020“-ის ფარგლებში, ბოლო მონაცემებით, 120 ათასი ტონა ყურძენი გადამუშავდა, ნათქვამია გარემოს დაცვისა და სოფლის მეურნეობის სამინისტროს განცხადებაში.

რთველი კახეთში წელს 22 აგვისტოს დაიწყო. 21 სექტემბრის მონაცემებით, რეგიონში უკვე გადამუშავებულია 120 ათასი ტონა ყურძენი, გადამუშავების პროცესში 60-ზე მეტი ღვინის ქარხანაა ჩართული.

„რთველი კახეთში შეფერხებების გარეშე მიმდინარეობს. უკვე იწყება პიკური პერიოდი, რაც იმას ნიშნავს, რომ ყურძნის დღიური გადამუშავება 10 ათას ტონაზე მეტი იქნება. ვფიქრობთ, სექტემბრის ბოლოსთვის კახეთში წარმოებული ყურძნის ძირითადი ნაწილი გადამუშავებული იქნება. საკოორდინაციო შტაბი სრულადაა მობილიზებული“, – განაცხადა სოფლის მეურნეობის მინისტრმა ლევან დავითაშვილმა.

მისი თქმით, მევენახეები მოსავალს 12 საათის განმავლობაში აბარებენ, მაშინ, როდესაც რამდენიმე წლის წინ ორი-სამი დღე რიგში უწევდათ დგომა.

საქართველოს მთავრობამ წელს COVID-19-ის პანდემიის შედეგად დაზარალებული მევენახეობა-მეღვინეობის დარგის მხარდასაჭერად „რქაწითელისა“ და „კახური მწვანეს“ ჯიშის ყურძნის სუბსიდირება გადაწყვიტა.

სუბსიდიას იღებენ ის კომპანიები, რომლებიც შეისყიდიან და გადაამუშავებენ ამ ჯიშების სულ ცოტა 1 ათას ტონა ყურძენს. ამასთან, ღვინის ქარხნებს დადგენილი აქვთ ერთი კილოგრამი ყურძნის ფასი – არანაკლებ 80 თეთრისა. სახელმწიფოს სუბსიდია ერთ კილოგრამზე 30 თეთრს შეადგენს.

„რთველი 2020“-ის საკოორდინაციო შტაბი თელავში 24-საათიან რეჟიმში მუშაობს და აქტიურ კოორდინირებას უწევს სახელმწიფო ორგანოების, მეწარმეებისა და მევენახეების ურთიერთობებს.

93
თემები:
საქართველოს სოფლის მეურნეობა
ნიკოლოზ ბასილაშვილი

ბასილაშვილის კრიზისი გრძელდება: საქართველოს პირველი ჩოგანი კიდევ დამარცხდა

0
(განახლებულია 17:22 22.09.2020)
კორონავირუსის პანდემიის გამო შეჩერებული საჩოგბურთო სეზონის განახლების შემდეგ ბასილაშვილმა შვიდი მატჩი წააგო ისე, რომ არც ერთი სეტი არ მოუგია.

თბილისი, 22 სექტემბერი – Sputnik. საქართველოს პირველმა ჩოგანმა ნიკოლოზ ბასილაშვილმა (33–ე ნომერი АТР–ს რეიტინგში) საჩოგბურთო სეზონის განახლების შემდეგ უკვე მეშვიდედ წააგო.

ჰამბურგის ტურნირის პირველივე წრეში (Hamburg European Open) ბასილაშვილი ესპანელ რობერტო ბაუტისტა–აგუტთან (11) ორ სეტში დამარცხდა. მატჩს საათნახევარზე ნაკლები დრო დასჭირდა.

ქართველ ჩოგბურთელს ჰქონდა გარკვეული შანსები, თუმცა თავად მან მისცა ბაუტისტა აგუტს ოთხი ბრეიკის გაკეთების საშუალება. ამან კი საბოლოოდ მისი დამარცხება გამოიწვია.

ბასილაშვილი ჰამბურგის ტურნირებს ბოლო ორი წელი იგებდა. ამჯერად მან ვერ შეძლო თავისი ტიტულის დაცვა და 500 სარეიტინგო ქულა დაკარგა. ეს ნიშნავს, რომ АТР–ს განახლებულ რეიტინგში, რომელიც 28 სექტემბერს გამოქვეყნდება, ბასილაშვილი 33–ე ადგილიდან დაახლოებით მე–60 პოზიციაზე გადაინაცვლებს.

საჩოგბურთო სეზონის განახლების შემდეგ, რომელიც COVID-19–ის პანდემიის გამო იყო შეჩერებული, ბასილაშვილმა შვიდი მატჩი წააგო ისე, რომ არც ერთი სეტი არ მოუგია.

ბასილაშვილს ბრალი არ დამძიმებია: გენპროკურატურა ინფორმაციას უარყოფს>>

ცალსახად შეიძლება ითქვას, რომ ბასილაშვილის ასეთი უსახური თამაში ყოფილ მეუღლესთან დაკავშირებულ ვითარებას უკავშირდება. ნეკა დოროყაშვილი ბასილაშვილს ოჯახურ ძალადობაში ადანაშაულებს. ამ საკითხზე სასამართლო პროცესი 20 ოქტომბერს არის დანიშნული. ასეთ ვითარებაში სპორტსმენს, როგორც ჩანს, უჭირს ჩოგბურთზე კონცენტრირება.

0
თემები:
სპორტის ამბები