ბენზინგასამართი სადგური

დიზელის საწვავზე „ევრო-5"-ის სტანდარტის შემოღება ერთი წლით გადაიდო

63
(განახლებულია 14:42 20.11.2019)
მთავრობა ბიზნესის წარმომადგენლებთან დათმობაზე წავიდა და დიზელის საწვავზე ახალი სტანდარტების დაწესება გადადო.

თბილისი, 20 ნოემბერი — Sputnik. მთავრობის დადგენილების შესაბამისად, დიზელის საწვავზე „ევრო-5" სტანდარტის ამოქმედება 2021 წლისთვის გადაიდო.

ახალი სტანდარტის ამოქმედება 2020 წლის 1 იანვრისთვის იყო დაგეგმილი, თუმცა ბიზნეს-გაერთიანებების წარმომადგენლებმა სიახლის ამოქმედების გადავადება ითხოვეს.

სპეციალისტების აზრით, „ევრო-5"-ის სტანდარტის ამოქმედების შემდეგ აზერბაიჯანიდან საქართველოში საწვავის მოწოდება შეწყდება და მისი შემოტანა მხოლოდ რუსეთიდან იქნება შესაძლებელი.

ამჟამად აზერბაიჯანში უკვე მიმდინარეობს, მაგრამ ჯერ არ დასრულებულა ნავთობგადამამუშავებელი ქარხის მოდერნიზაცია, რის შემდეგაც შესაძლებელი გახდება დიზელის საწვავის ახალი სტანდარტით წარმოება.

საქართველოს ნავთობპროდუქტების იმპორტიორთა კავშირის თავმჯდომარე ვანო მთვრალაშვილი მიიჩნევს, რომ ახალი სტანდარტის დანერგვა ეკოლოგიას უკავშირდება.

მთვრალაშვილის განცხადებით, საქართველოს აქვს გარკვეული ვალდებულებები, რომლებსაც ევროკავშირთან ასოცირების შეთანხმება ითვალისწინებს. აქედან გამომდინარე, ხარისხის მაჩვენებელი აუცილებლად ამაღლდება.

ნავთობპროდუქტების იმპორტიორთა კავშირის მონაცემებით, დიზელის საწვავის იმპორტმა 2019 წლის იანვარ-ოქტომბერში 434,6 ათასი ტონა შეადგინა, რაც 5,2 პროცენტით ნაკლებია გასული წლის ამავე პერიოდის მაჩვენებელზე.

63
თემები:
საქართველოს ეკონომიკა (747)
ვალუტის გადამცვლელი პუნქტი

ლარის კურსი 21 სექტემბერს

50
(განახლებულია 09:27 21.09.2020)
წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0254 ლარით გაუფასურდა.

თბილისი, 21 სექტემბერი  — Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,2140 GEL/$1 ნიშნულზე დაადგინა.

წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0254 ლარით გაუფასურდა. 

ლარის კურსი 21 სექტემბერს
ლარის კურსი 21 სექტემბერს



50
თემები:
ლარის კურსი დღეს
ვაშლი ხის ტოტზე

სახელმწიფოს მხარდაჭერით გაშენებულ ბაღებში მოსავლის აღება მიმდინარეობს

60
საქართველოს მასშტაბით, პროექტის „დანერგე მომავალი“ ფარგლებში გაშენებული ბაღები 10 ათას ჰა-მდე ფართობს შეადგენს

თბილისი, 20 სექტემბერი - Sputnik. სახელმწიფო პროგრამის „დანერგე მომავალი“ ფარგლებში გაშენებულ ბაღებში მოსავლის აღება მიმდინარეობს, ნათქვამია სოფლის განვითარების სააგენტოს მიერ გავრცელებულ განცხადებაში.

სააგენტოს ცნობით, გორის მუნიციპალიტეტის სოფელ ძევერაში კომპანია „აგროქართლი“ 2020 წელს 200 ტონამდე ვაშლის მოსავალს ელოდება, მათ უკვე 30 ტონაზე მეტი ვაშლის ექსპორტი მოახდინეს. კომპანიამ, რომელიც  პროგრამის „დანერგე მომავალი“ ფარგლებში  ვაშლის ბაღი 10 ჰექტარზე 2017 წელს გააშენა,  ბაღის გაშენებისათვის და სარწყავი სისტემის მოწყობისთვის 100 ათას ლარამდე სახელმწიფო დაფინანსება მიიღო. „აგროქართლი“ სეზონურად 60-მდე ადგილობრივს ასაქმებს.

პროგრამის „დანერგე მომავალი“ ფარგლებში გაშენებულ ბაღებში მოსავლის აღების პროცესს გარემოს დაცვისა და სოფლის მეურნეობის მინისტრის პირველი მოადგილე გიორგი ხანიშვილი და შიდა ქართლის რეგიონის რწმუნებულის მოადგილე ნუგზარ სამხარაძე გაეცნენ.

„ქართული ეკონომიკისთვის მნიშვნელოვანი ფაქტორია ის, რომ სახელმწიფოს მხარდაჭერით გაშენებულ ბაღში მისმა მეპატრონეებმა უკვე მიიღეს მოსავალი, რომელიც ექსპორტზე გავიდა მეზობელ ქვეყნებში. დღეისათვის, საქართველოდან უკვე 1 ათას ტონაზე მეტი ვაშლია ექსპორტირებული“, - განაცხადა გიორგი ხანიშვილმა.

საქართველოს მასშტაბით, პროექტის „დანერგე მომავალი“ ფარგლებში გაშენებული ბაღები 10 ათას ჰექტრამდე ფართობს შეადგენს. შიდა ქართლის რეგიონში სხვადასხვა ხეხილის ბაღი, ჯამში, 2,4 ათას ჰექტრამდე მიწის ფართობზე გაშენდა, გაცემულმა თანადაფინანსებამ 16 მლნ-მდე ლარი შეადგინა.

გიორგი გახარია: 50 ათასი ტონა თხილის ექსპორტიდან რეგიონში შემოსავალი 100 მლნ დოლარი იქნება >>

პროგრამას „დანერგე მომავალი“ სოფლის განვითარების სააგენტო 2015 წლიდან ახორციელებს. სოფლის განვითარების სააგენტოს პროგრამები გათვლილია გრძელვადიან განვითარებაზე და მათი მიზანია ისეთი გარემოს შექმნა, რომელიც ხელს შეუწყობს მაღალხარისხიანი პროდუქციის წარმოების სტაბილურ ზრდას და სურსათის უვნებლობის საერთაშორისო სტანდარტების დანერგვას.

60
თემები:
საქართველოს სოფლის მეურნეობა
მეტრო

თბილისის მეტრო მუშაობის ჩვეულ გრაფიკს უბრუნდება

0
(განახლებულია 09:23 21.09.2020)
გასული წლიდან მეტროში მაღალი ძაბვის კაბელების შეცვლის, სიგნალიზაციისა და სავენტილაციო სისტემების მოდერნიზაციის სამუშაოები მიმდინარეობდა. ამის გამო მეტრო შემცირებული გრაფიკით – ღამის 11 საათამდე მუშაობდა.

თბილისი, 21 სექტემბერი  — Sputnik.  თბილისის მეტროპოლიტენი 21 სექტემბრიდან მუშაობის ჩვეულ გრაფიკს დაუბრუნდება. ამის შესახებ „Sputnik–საქართველოს“ თბილისის სატრანსპორტო კომპანიის პრეს-სამსახურში აცნობეს. 

დღეიდან მეტრო თბილისელებსა და დედაქალაქის სტუმრებს დილის 6 საათიდან ღამის 12 საათამდე პერიოდში მოემსახურება, როგორც ეს სარემონტო სამუშაოების დაწყებამდე, 2019 წლის ივნისამდე იყო.

გასული წლიდან მეტროში მაღალი ძაბვის კაბელების შეცვლის, სიგნალიზაციისა და სავენტილაციო სისტემების მოდერნიზაციის სამუშაოები მიმდინარეობდა. ამის გამო მეტრო შემცირებული გრაფიკით – ღამის 11 საათამდე მუშაობდა.

„პროექტის ფარგლებში სრულად შეიცვალა მაღალი ძაბვის 450 კმ სიგრძის კაბელები, განხორცილდა 28 ძველი სავენტილაციო სისტემის დემონტაჟი და მათ ნაცვლად განთავსდა, სრულად ახალი, ევროპული სტანდარტის 32 სავენტილაციო სისტემა. აღნიშნული პროექტი მნიშვნელოვნად გაზრდის მეტროს უსაფრთხოებას და შეუფერხებელ მოძრაობას," - განაცხადა კომპანიის საზოგადოებასთან ურთიერთობის მენეჯერმა თამაზ რობაქიძემ.

ამჟამად თბილისის მეტროპოლიტენი ორ ხაზზე – ახმეტელი-ვარკეთილისა და საბურთალოს ხაზებზე 23 სადგურს ითვლის. ხაზების საერთო სიგრძეა 57 კილომეტრი (პირველი ხაზი - 40 კმ, მეორე - 17 კმ).

0