რუსთავის მეტალურგიული ქარხნის საამქრო

საქართველოს ეკონომიკა: რა უწყობს ხელს ზრდას

83
(განახლებულია 16:12 01.11.2019)
ყველაზე მეტად ეკონომიკური ზრდა შეინიშნება მშენებლობის, ტრანსპორტისა და ვაჭრობის, ასევე სასტუმროებისა და რესტორნების სფეროებში.

თბილისი, 1 ნოემბერი — Sputnik. 2019 წლის სექტემბერში რეალურმა ეკონომიკურმა ზრდამ 5,2% შეადგინა 2018 წლის ანალოგიურ პერიოდთან შედარებით, განაცხადა საქართველოს სტატისტიკის ეროვნული სამსახურის „საქსტატის" აღმასრულებელმა დირექტორმა გოგიტა თოდრაძემ ბრიფინგზე.

რეალურმა ეკონომიკურმა ზრდამ 2019 წლის მესამე კვარტალში, წინასწარი მონაცემებით, წინა წლის ანალოგიურ პერიოდთან შედარებით, 5,7% შეადგინა, იანვარ-სექტემბერში კი – 5%.

თოდრაძის ინფორმაციით, ზრდა სექტემბერში დაფიქსირდა მშენებლობის, ტრანსპორტის, ვაჭრობის, გადამამუშავებელი მრეწველობის, ასევე სასტუმროებისა და რესტორნების სფეროებში. ვარდნა ფიქსირდება სამთო-მომპოვებელ მრეწველობაში და კომუნალური, სოციალური და პერსონალური მომსახურების სფეროებში.

რა უწყობს ხელს ზრდას?

მშენებლობის სფეროში ზრდის ტენდენცია, „საქსტატის" ხელმძღვანელის სიტყვებით, განპირობებულია როგორც საცხოვრებელი და არასაცხოვრებელი ნაგებობების, ისე გზების, ხიდებისა და ესტაკადების სამშენებლო სამუშაოების გააქტიურებით.

„მიმდინარე წლის ცხრა თვეში მშენებლობაზე გაცემული ნებართვების საერთო ფართობი დაახლოებით 24 პროცენტით გაიზარდა, ასევე 32 პროცენტით არის გაზრდილი ექსპლუატაციაში მიღებული ობიექტების საერთო ფართობი", – აღნიშნა თოდრაძემ.

ტრანსპორტის სექტორის ზრდის გამომწვევ მიზეზებს შორის, მისი თქმით, არის ტვირთის სატრანსპორტო დამუშავება და მის ტრანსპორტირებასთან დაკავშირებული საქმიანობის გააქტიურება.

რას მოუტანს საქართველოს „Doing Business 2020“ რეიტინგში ქულების ისტორიული მაქსიმუმი>>

„ვაჭრობის დარგში კი ზრდა დაკავშირებული იყო 2019 წლის სექტემბერში საცალო ვაჭრობის მიმართულებით და ძირითადად საკვები პროდუქტებით ვაჭრობასთან, ასევე სასმელების და თამბაქოს ნაწარმით ვაჭრობასთან", – განაცხადა სტატისტიკის ეროვნული სამსახურის აღმასრულებელმა დირექტორმა.

საბითუმო ვაჭრობაში მან გამოყო ბუნებრივი აირით, მანქანებითა და მოწყობილობებით ვაჭრობა.

„საქსტატის" ხელმძღვანელმა აღნიშნა ასევე, რომ სასტუმროებისა და რესტორნების სექტორში ბრუნვის მაღალი მაჩვენებელი პირდაპირ არის დაკავშირებული საერთაშორისო მოგზაურების ვიზიტების რაოდენობის ზრდასთან.

„მართალია, შემცირების ტენდენცია ფიქსირდება რუსეთიდან დაახლოებით 21 პროცენტით და დაახლოებით 38 პროცენტით შემცირდა ვიზიტორების რაოდენობა ირანიდან, თუმცა, მიუხედავად ამისა, მნიშვნელოვანი ზრდა შეინიშნებოდა ამ მიმართულებით სომხეთიდან, თურქეთიდან – დაახლოებით 8-8 პროცენტით გაიზარდა ვიზიტორების რაოდენობა, დაახლოებით 5 პროცენტით გაიზარდა აზერბაიჯანიდან ვიზიტორების რაოდენობა. აღსანიშნავია ევროკავშირის ისეთი ქვეყნები, როგორიცაა გერმანია, პოლონეთი", – აღნიშნა ბრიფინგზე თოდრაძემ.

მისი თქმით, გადამამუშავებელი მრეწველობის სფეროში ზრდა ძირითადად უკავშირდებოდა დღგ-ის შედარებით მაღალ მოცულობას, რომელიც ქიმიურ მრეწველობაში შეიქმნა.

„ამ მიმართულებით აღსანიშნავია ფარმაცევტული პროდუქციის წარმოების გაფართოება და აზოტოვანი სასუქების წარმოების გაფართოება. რაც შეეხება მეტალურგიას, ბოლო თვეების განმავლობაში გრძელდება შემცირების ტენდენცია ამ მიმართულებით, რაც დასტურდება კიდეც საგარეო ვაჭრობის მონაცემებით. დაახლოებით 13 პროცენტით არის შემცირებული ფერო-სილიკო-მანგანუმის ექსპორტის მაჩვენებელი", – განაცხადა თოდრაძემ.

როგორც „საქსტატის" ხელმძღვანელმა განმარტა, სამთო-მომპოვებელ მრეწველობაში შემცირების გამომწვევ მიზეზებს შორისაა ლითონის მადნების მოპოვების კლება.

ეკონომიკური ზრდის პროგნოზები

საერთაშორისო სარეიტინგო სააგენტო Fitch-ის პროგნოზის თანახმად, საქართველოში ეკონომიკური ზრდა 2018 წლის 4,7%-დან 2019 წელს 4,3%-მდე შემცირდება, რადგან მცირდება დაკრედიტების ზრდა, რუსეთიდან რეისების აკრძალვა კი აფერხებს ტურისტული სექტორის გაფართოებას.

ამის მიუხედავად, Fitch-ის შეფასებით, საქართველოში ეკონომიკური ზრდა „BB" რეიტინგის ქვეყნების საშუალო პროგნოზირებულ მაჩვენებელზე (3,3%) მაღალია. ინფრასტრუქტურაზე ხარჯის დაჩქარება და მცირედით შესუსტებული საგადასახადო-საბიუჯეტო პოლიტიკა ხელს შეუწყობს 2020-2021 წლებში ზრდის ტემპის 4,7%-მდე დაჩქარებას, მიიჩნევს Fitch.

საერთაშორისო სავალუტო ფონდმა, მიუხედავად იმისა, რომ ტურისტების რაოდენობამ მოსალოდნელზე ნაკლები შეადგინა, დაადასტურა 2019 წელს მშპ-ის ზრდის პროგნოზი 4,6%-ის დონეზე.

ეკონომიკური ზრდის შემცირებას ვარაუდობს კონსალტინგური კომპანია Galt & Taggart. მისი პროგნოზის თანახმად, 2019 წლის მეორე ნახევარში ზრდა იქნება 4,3% – ტურიზმის სფეროში შემოსავლების მოსალოდნელი დაკარგვის გამო. მთლიანობაში, წლის განმავლობაში ეკონომიკა 4,5%-ით გაიზრდება, ვინაიდან 2019 წლის პირველ ორ კვარტალში ზრდამ 4,8% შეადგინა, ფიქრობენ კომპანიის ანალიტიკოსები.

ეროვნული ბანკის პოლიტიკის გამკაცრება ეკონომიკაზე შეიძლება უარყოფითად აისახოს>>

რაც შეეხება საქართველოს ეროვნული ბანკის მოსაზრებას, ამ ეტაპზე საგარეო მოთხოვნილების (ტურიზმის ექსპორტი) მოსალოდნელი შესუსტების ფონზე 2019 წელს მშპ-ის რეალური ზრდა 4,5%-ს მიაღწევს. 2019 წლის სახელმწიფო ბიუჯეტის თანახმად, ეკონომიკური ზრდის პროგნოზი 4,5%-ია.

83
თემები:
საქართველოს ეკონომიკა (795)
ქალი პროდუქტებით ქუჩაში

რატომ ვაჭრობს საქართველო ნაკლებს და გაძვირდება თუ არა პური

39
(განახლებულია 14:38 29.10.2020)
ეკონომისტების შეფასებით, საგარეო ვაჭრობის შემცირების ძირითადი მიზეზი ახალი კორონავირუსის პანდემია და ის ეკონომიკური პრობლემებია, რაც ამ ვირუსის გავრცელებამ შექმნა როგორც საქართველოში, ასევე მის ძირითად სავაჭრო პარტნიორებთან მსოფლიოში.

ნატა პატარაია

საქართველოს სტატისტიკის ეროვნული სამსახურის „საქსტატის“ მონაცემებით, 2020 წლის დასაწყისიდან საგარეო სავაჭრო ბრუნვა, გასული წლის იანვარი–სექტემბერთან შედარებით, 14,9%-ით შემცირდა და 8,1 მილიარდ დოლარზე მეტი შეადგინა. 9 თვეში ექსპორტზე 2,4 მლრდ დოლარზე მეტი ღირებულების ქართული პროდუქცია გავიდა, რაც 12,1%-ით ნაკლებია გასული წლის ანალოგიურ პერიოდთან შედარებით. ხოლო იმპორტმა 5,7 მლრდ დოლარზე მეტი შეადგინა, რაც გასული წლის იანვარი–სექტემბრის პერიოდთან შედარებით 15,9%-ით ნაკლებია.

ქვეყანაში იმპორტის შემცირება მოთხოვნის კლებამ გამოიწვია, რაც, თავის მხრივ, მოსახლეობის მსყიდველობითი უნარის შემცირებით არის განპირობებული, აღნიშნა ეკონომისტმა ნიკა შენგელიამ „Sputnik-საქართველოსთან“ საუბრისას.

„კორონავირუსის პანდემიის გამო დაწესებული შეზღუდვების შედეგად დაზარალდა როგორც ბიზნესი, ასევე მოსახლეობა, გაიზარდა უმუშევრობა, თვითდასაქმებული მოსახლეობის დიდ ნაწილს შეუმცირდა შემოსავალი, რასაც დაემატა ეროვნული ვალუტის გაუფასურებაც, გაძვირდა პირველადი მოხმარების პროდუქტი. ყოველივე ამან ნეგატიურად იმოქმედა მოსახლეობის მსყიდველობითუნარიანობაზე და, შესაბამისად, შეამცირა ბაზარზე მოთხოვნაც“, – აღნიშნა ნიკა შენგელიამ.
ნიკა შენგელია
ნიკა შენგელია

ეკონომიკის ექსპერტი ფიქრობს, რომ იმპორტის მოცულობის შემცირებამ საშუალოვადიან პერსპექტივაში შეიძლება ბაზარზე გარკვეული პროდუქტების დეფიციტიც კი გამოიწვიოს, თუმცა მხოლოდ რამდენიმე კვირით.

რაც შეეხება გაძვირებული დოლარით შეძენილი იმპორტირებული პროდუქციის ღირებულებას, ეკონომისტის აზრით, გარკვეულ ჯგუფებზე ფასების ზრდა კიდევ არის მოსალოდნელი.

„თებერვლიდან ველოდებით ფასების მატებას პურზე, ხორცზე და რძის პროდუქტებზე, რადგან ხორბალზე, სიმინდზე და სოიოზე სასაქონლო ბირჟებზე ფასი რეკორდულად მატულობს“ – განაცხადა ნიკა შენგელიამ.

რაც შეეხება ექსპორტისგან მიღებულ ნაკლებ შემოსავალს, ეკონომისტი მიიჩნევს, რომ ქვეყანაში 9 თვეში შემოსული ნაკლები დოლარი ლარის კურსზე მოცემულ შემთხვევაში ზეგავლენას ვერ მოახდენს.  

„მოკლევადიან პერიოდში ეროვნულ ვალუტაზე იმოქმედებს პოლიტიკური სტაბილურობის ფაქტორი, ანუ დიდი მნიშვნელობა აქვს – არჩევნების ჩატარების შემდეგ როგორი ვითარება იქნება საქართველოში“, – აღნიშნა ნიკა შენგელიამ.

მისი თქმით, შექმნილ ვითარებაში სახელმწიფომ „კორონა ეკონომიკის“ პირობებში ეკონომიკის რეცესიიდან გამოსაყვანად უნდა შეიმუშაოს განვითარების სტრატეგია და მიჰყვეს მას. 

„მხოლოდ ტურისტული სექტორზე ფიქრი შედეგებს ვერ მოიტანს. ეკონომიკის თითქმის ყველა სექტორს უნდა მიექცეს ყურადღება. ვინაიდან ჯერჯერობით ქართული ეკონომიკის გრძელვადიანი განვითარების სტრატეგია არ არის წარმოდგენილი, მანამდე მცირე და საშუალო მეწარმეობის დასახმარებლად შემოშავებული პროექტები უნდა განხორციელდეს“, – განაცხადა შენგელიამ.

ეკონომისტ რატი აბულაძის აზრით კი, საგარეო ვაჭრობა მთელ მსოფლიოში შემცირდა და შეიძლება ითქვას, რომ ბევრ ქვეყანაში ეს ტენდენცია უფრო მასშტაბურიცაა, ვიდრე საქართველოში.

რატი აბულაძე
რატი აბულაძე

„სამწუხაროდ, საერთაშორისო ვაჭრობის ნეგატიურ მაჩვენებელს ქმნის შესუსტებული ეკონომიკური აქტივობა, დასუსტებული ბიზნესი, შემცირებული შემოსავლები, დაკლებული სარგებელი და გაზრდილი უმუშევრობა“, – აღნიშნა რატი აბულაძემ „Sputnik–საქართველოსთან“ საუბრისას.

მისი თქმით, მეწარმეები, რომლებიც აწვდიდნენ პროდუქციას გლობალურ ბაზრებს, ეპიდემიის გამო შეეჯახნენ ბაზრებთან წვდომის პრობლემებს, მოთხოვნის სტრუქტურის ცვლილებას, მიწოდების ქსელში წარმოქმნილ შეფერხებებს,  სასაზღვრო და სავაჭრო შეზღუდვებს. დასაქმებულ პირთა ვირუსით ინფიცირების მასშტაბურობის გამო საფრთხის წინაშე დადგა ხელშეკრულებით გათვალისწინებული მოთხოვნების შესრულება და დაგეგმილ ვადებში მუშაობაც.

„უნდა აღინიშნოს, რომ რეგიონული კონფლიქტების, პოლიტიკური კონფრონტაციების, პანდემიისა და ჯანდაცვის სექტორში არსებული გამოწვევების ფონზე ბიზნესი, კონკურენცია და ბაზრის მოცვა სულ უფრო რთული გახდა“, – აღნიშნა რატი აბულაძემ.

მისი აზრით, შექმნილ ვითარებაში საქართველო პირველ რიგში უნდა გაუფრთხილდეს უმსხვილესი სავაჭრო პარტნიორ ქვეყნებთან არსებულ ურთიერთობებს. საქართველოს საგარეო სავაჭრო აქტივობის აღდგენა კი დამოკიდებულია ხელისუფლების მხრიდან ბიზნესის ხელშეწყობაზე, ახალ სავაჭრო სქემებზე, აქტიურ ბიზნეს-პოლიტიკაზე და აგრესიული საგარეო ეკონომიკური პოლიტიკის გატარებაზე.

სტატისტიკის ეროვნული სამსახურის ცნობით, საქართველოს ყველაზე დიდი სავაჭრო პარტნიორები 2020 წლის დასაწყისიდან არიან თურქეთი, რუსეთი და ჩინეთი — ამ ქვეყნებთან სავაჭრო ბრუნვამ იანვარი–სექტემბრის პერიოდში 2,5 მილიარდ დოლარს გადააჭარბა, რაც მთლიანი სავაჭრო ბრუნვის 36%-ია.

საქართველოს სავაჭრო პარტნიორების ათეულში ასევე შედიან: აზერბაიჯანი, სომხეთი, უკრაინა, აშშ, გერმანია, ბულგარეთი, იტალია.

 

39
ვალუტის გადამცვლელი პუნქტი

ლარის კურსი 29 ოქტომბერს

49
(განახლებულია 09:04 29.10.2020)
წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0103 ლარით გაუფასურდა.

თბილისი, 29 ოქტომბერი – Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,2345 GEL/$1 ნიშნულზე დაადგინა.

წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0103 ლარით გაუფასურდა.

ლარის კურსი 29 ოქტომბერს
49
თემები:
ლარის კურსი დღეს
შსს–ს შენობა

შსს: ესებუას გადაადგილების გავრცელებული კადრები არასწორი და გაყალბებულია

0
უწყების პოზიციით, ტელევიზიების მიერ გავრცელებული არასწორი და გაყალბებული ინფორმაცია საზოგადოების სიცრუეში შეყვანასა და სამართალდამცველი უწყებების დისკრედიტაციას ემსახურება.

თბილისი, 29 ოქტომბერი - Sputnik. საქართველოს შინაგან საქმეთა სამინისტრო მედიასაშუალებებში გავრცელებულ ბანკის ფილიალზე თავდამსხმელის, ბადრი ესებუას გადაადგილების ამსახველ ფოტო და ვიდეომასალასთან დაკავშირებით განცხადებას და ვიდეოს ავრცელებს.

დღეს ტელეკომპანიებმა „ფორმულამ“ და „მთავარმა არხმა“ გაავრცელეს ვიდეო და ფოტო მასალა. მათი ინფორმაციით, ჩანაწერები სამართალდამცავი უწყებებიდან წყარომ მიაწოდათ და კადრებში ასახულია ბადრი ესებუას გაადაადგილება ზუგდიდის ტერიტორიაზე 27 ოქტომბერს.

უწყების ცნობით, ტელევიზიებმა საზოგადოებას არასწორი და გაყალბებული ინფორმაცია მიზნმიმართულად მიაწოდეს, რაც საზოგადოების სიცრუეში შეყვანას და სამართალდამცველი უწყებების დისკრედიტაციას ემსახურება.

„ფოტო და ვიდეომასალა სხვადასხვა ობიექტზე განთავსებული ვიდეომონიტორინგის მოწყობილობების მიერ გადაღებულია მიმდინარე წლის 6 ოქტომბერს და არა 27 ოქტომბერს, ასევე, გასაჯაროებული მასალა გადაღებულია სამეგრელოს რეგიონის სხვა მუნიციპალიტეტში და არა ზუგდიდში, როგორც ეს მედიასაშუალებებმა გაავრცელეს“, - აღნიშნულია განცხადებაში.

შსს-ს ინფორმაციით, პოლიცია ბადრი ესებუას ადგილსამყოფელის დადგენისა და დაკავების მიზნით, სპეციალურ ოპერატიულ, საგამოძიებო და სამძებრო მოქმედებებს აქტიურ რეჟიმში განაგრძობს.

ბადრი ესებუას მამა ისევ პოლიციაში გამოკითხვაზე დაიბარეს>>

დღეს აღნიშნულთან დაკავშირებით განმარტება გააკეთა ბადრი ესებუას მამამ, ტარიელ ესებუამაც. მისი თქმით, ტანსაცმელი, რომელიც მის შვილს აცვია  ტელევიზიაში ნაჩვენებ კადრებში, სახლში არის დატოვებული და შესასამისად, ქუჩის სათვალთვალო კამერით გადაღებული კადრები 27 ოქტომბრის ვერ იქნება.

21 ოქტომბერს შეიარაღებული პირი „საქართველოს ბანკის“ ზუგდიდის ფილიალში შეიჭრა და 43 ადამიანი მძევლად აიყვანა. ბოროტმოქმედმა ხელისუფლებისგან ნახევარი მილიონი დოლარი, ვერტმფრენი ან მანქანა, ასევე მისი უსაფრთხოების გარანტიები მოითხოვა. აღნიშნული მოთხოვნების დაკმაყოფილების შემდეგ მან ყველა მძევალი გაათავისუფლა და მიმალვა მოახერხა. მისი ადგილსამყოფელი ამ დრომდე უცნობია.

„საქართველოს ბანკზე“ თავდამსხმელი ამ დროისათვის იდენტიფიცირებულია. პირი, რომელსაც ბანკის ზუგდიდის ფილიალში მძევლების აყვანა ედება ბრალად, 1988 წელს დაბადებული ბადრი ესებუაა. შსს-ს მიერ გავრცელებული ინფორმაციით, მისი ვინაობის დადგენა თავდასხმის ღამესვე მოხდა.

26 ოქტომბერს, გვიან ღამით პოლიციამ ზუგდიდის მუნიციპალიტეტის სოფელ გრიგოლიშში ბადრი ესებუასა და მისი ნათესავების სახლებში, ასევე მიკროსაფინანსო ორგანიზაციის შენობაში, სადაც ეჭვმიტანილი მუშაობდა, ჩხრეკა განახორციელა, თუმცა უწყება არ აზუსტებს, რაიმე სახის მტკიცებულებები ამოიღო თუ არა.

გახარია: პოლიციამ კონკრეტული დავალება მიიღო და პირნათლად შეასრულა>>

შინაგან საქმეთა სამინისტრომ ბანკზე თავდასხმის ფაქტს ტერორისტული აქტის კვალიფიკაცია მისცა.

გამოძიება საქართველოს სისხლის სამართლის კოდექსის 236-ე, 323-ე და 329-ე მუხლებით მიმდინარეობს, რაც ტერორისტულ აქტს, მძევლად ხელში ჩაგდებას ტერორისტული მიზნით და ცეცხლსასროლი იარაღის უკანონოდ შეძენა-შენახვა-ტარებას გულისხმობს.

0
თემები:
ზუგდიდში შეიარაღებულმა პირმა მძევლები აიყვანა