თბილისი

საქართველოში ხელოვნური ინტელექტის პირველი ბიზნეს-ასოციაცია გაიხსნა

86
(განახლებულია 14:55 23.10.2019)
კომპანია დაეხმარება ნიჭიერ ახალგაზრდებს, რომლებიც ხელოვნური ინტელექტის შექმნით არიან დაინტერესებული

თბილისი, 23 ოქტომბერი — Sputnik. საქართველოში ხელოვნური ინტელექტის პირველი ბიზნეს-ასოციაცია AI Georgia შეიქმნა, რომლის მთავარი მიზანი ქვეყანაში ინტელექტუალური მანქანების შექმნის ტექნოლოგიების განვითარებაა, განუცხადეს „Sputnik-საქართველოს“ ბიზნესისა და ტექნოლოგიების უნივერსიტეტის (BTU) პრეს-სამსახურში.

ასოციაცია საზოგადოებას მუდმივად მიაწვდის ინფორმაციას იმის შესახებ, თუ რაოდენ მნიშვნელოვანია პრაქტიკაში ხელოვნური ინტელექტის დანერგვა, რომელსაც ბიზნეს-სამყაროსა და მთელი სახელმწიფოს საქმიანობის უსაფრთხოებასა და შემსუბუქებაში მნიშვნელოვანი როლის შესრულება შეუძლია. ორგანიზაცია ხელს შეუწყობს ასევე აღნიშნულ სფეროში კვლევების ჩატარებას.

AI Georgia-მ საქმიანობა ახალი კვლევა-პროექტის პრეზენტაციით დაიწყო. კვლევა, რომელზეც ქართული ხელოვნური ინტელექტის - Digital Mind - შემქმნელი, 18 წლის გიორგი ჩახნაშვილი მუშაობს, ბიზნესისა და ტექნოლოგიების უნივერსიტეტის ბაზაზე წარმოებს. სწორედ ჩახნაშვილმა წარუდგინა დამსწრეთ თავისი უნიკალური პროექტი.

Digital Mind-ი (ციფრული გონება) ვირტუალური პერსონალური ასისტენტია, რომელსაც შეუძლია სასწავლო თუ სამუშაო პროცესის შემსუბუქება. მაგალითად, თუ ადამიანს სჭირდება წიგნის წაკითხვა ან რამდენიმე ვიდეომასალის ნახვა, რაც, დავუშვათ, მოითხოვს დაახლოებით 60 წუთს, Digital Mind-ის მეშვეობით ამის გაკეთება უფრო მოკლე დროშია შესაძლებელი. პროგრამის ამოცანაა მაქსიმალური ინფორმაციის  მინიმალურ დროში მიღება.

სხვათა შორის, ჩახნაშვილის ხელოვნური ინტელექტით უკვე დაინტერესდნენ მსოფლიოს ტურისტული ორგანიზაცია (UNWTO), Google და სხვა მსხვილი ევროპული კორპორაციები. ამასთან, გიორგი ჩახნაშვილმა ყველა დაინტერესებულ მეცნიერს შესთავაზა, შეუერთდნენ მის კვლევას.

„ეპოქაში, რომელიც სწრაფად ვითარდება, კრიტიკულად მნიშვნელოვანია, რომ საქართველომ ფეხი აუბას მსოფლიო ტრენდებს. სწორედ ამიტომ, მაშინ როცა ქვეყანაში არსებობს უზარმაზარი პოტენციალი, აუცილებელია, სახელმწიფო და კერძო სტრუქტურებმა წაახალისონ ახალგაზრდები და ხელი შეუწყონ მათ განათლებას ამ მიმართულებით“, - აღნიშნეს  AI Georgia-ს პრეს-სამსახურში.

AI Georgia იქნება პირველი დაწესებულება, რომელიც ბიზნესისა და ტექნოლოგიების უნივერსიტეტს ხელოვნური ინტელექტის შექმნით დაინტერესებული ახალგაზრდების სტიპენდიებისთვის 2,5 ათას ლარს გადასცემს.

ნიშანდობლივია, რომ ასოციაციის პრეზენტაციას ესწრებოდა გაეროს ხელოვნური ინტელექტისა და რობოტიკის ცენტრის ხელმძღვანელი ირაკლი ბერიძე. მან სტუმრებს გააცნო საერთაშორისო გამოცდილება ხელოვნური ინტელექტის სფეროში და გაუზიარა თავისი მოსაზრება იმასთან დაკავშირებით, თუ რა უნდა მოიმოქმედოს საქართველომ, რათა მაქსიმალურად ეფექტიანად გამოიყენოს ამ სფეროში არსებული პოტენციალი.

„ხელოვნური ინტელექტი თანამედროვე საზოგადოების ფუნქციონირების განუყოფელი ნაწილია. გამომთვლელი მანქანების სიჩქარის სწრაფი და ყოვლისმომცველი ზრდა, მონაცემთა მრავალრიცხოვნობა და ალგორითმების ხელმისაწვდომობა მნიშვნელოვნად აუმჯობესებს ხელოვნური ინტელექტის შესაძლებლობებს და აფართოებს მის დიაპაზონს. ამ ტექნოლოგიის პოტენციალს უკვე იყენებენ ჯანდაცვის, სოფლის მეურნეობის, წარმოების, ენერგეტიკის, ფინანსების, კომუნიკაციის, უსაფრთხოებისა და სხვა სექტორები. ისინი იყენებენ მას ეფექტიანობის გასაზრდელად, რესურსების ოპტიმიზაციისათვის, ხარჯის შესამცირებლად და ახალი შესაძლებლობების შესაქმნელად“, - აღნიშნა ბერიძემ.

ორგანიზაციის ხელოვნური ინტელექტისადმი მიძღვნილი კვლევის გაცნობა შესაძლებელია ბიზნესისა და ტექნოლოგიების უნივერსიტეტისა და ხელოვნური ინტელექტის ბიზნეს-ასოციაცია AI Georgia-ს ვებ-გვერდებზე.

86
თემები:
საქართველოს ეკონომიკა (637)
ვალუტის გადამცვლელი პუნქტი

ლარის კურსი 7 ივლისს

88
(განახლებულია 09:23 07.07.2020)
წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0006 ლარით გაუფასურდა. 

თბილისი, 7 ივლისი — Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,0532 GEL/$1 ნიშნულზე დაადგინა.

წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0067 ლარით გაუფასურდა. 

ლარის კურსი 7 ივლისს
88
პიტერ სიიარტო

„ექსიმბანკი“ უნგრულ კომპანიებს საქართველოში ინვესტიციების განხორციელებაში დაეხმარება

90
(განახლებულია 13:18 07.07.2020)
უნგრეთის ბანკმა შექმნა 155 მილიონი ევროს მოცულობის ფონდი, რომელიც შეიძლება დაიხარჯოს საქართველოს ტერიტორიაზე.

თბილისი, 7 ივლისი — Sputnik. უნგრეთის ექსპორტ-იმპორტის ბანკმა „ექსიმბანკმა“ საკრედიტო ხაზი გამოყო იმ უნგრული კომპანიებისთვის, რომლებიც საქართველოში ინვესტიციების განხორციელებას გადაწყვეტენ, იუწყება საქართველოს ეკონომიკისა და მდგრადი განვითარების სამინისტრო.

ეკონომიკის მინისტრმა ნათია თურნავამ უნგრეთის საგარეო საქმეთა მინისტრთან პიტერ სიიარტოსთან შეხვედრა გამართა, რომელიც საგანგებო მდგომარეობის დასრულების შემდეგ პირველი მაღალი რანგის სტუმარია საქართველოში. თურნავას თქმით, უნგრეთი საქართველოს სტრატეგიული პარტნიორია, ქვეყნებს ბევრი საერთო პროგრამა და პროექტი, ასევე მზარდი ეკონომიკური თანამშრომლობა აქვთ.  

„უნგრეთის საგარეო საქმეთა და ვაჭრობის მინისტრმა აღნიშნა, რომ უნგრეთის სახელმწიფო განვითარების ბანკ „ექსიმბანკში“ სპეციალური საკრედიტო ხაზია გამოყოფილი იმ უნგრული კომპანიებისთვის, რომლებიც საქართველოში თავისი თანხების დაბანდებას გადაწყვეტენ. უნგრეთის მინისტრმა ბრძანა, რომ ჩვენ მსგავსად, უნგრელი ინვესტორებიც ხედავენ საგარეო ბაზარზე ახალ შესაძლებლობებს, რომლებიც გაჩნდა პოსტპანდემიურ პერიოდში. კომპანიებს სურთ დივერსიფიკაცია“, – აღნიშნა ნათია თურნავამ.

როგორც პიტერ სიიარტომ განაცხადა, უნგრეთის ბანკმა შექმნა 155 მილიონი ევროს მოცულობის ფონდი, რომელიც შეიძლება დაიხარჯოს საქართველოს ტერიტორიაზე.

„საქსტატის“ მონაცემებით, 2019 წელს უნგრეთიდან საქართველოში ინვესტიციების მოცულობამ 2,7 მლნ დოლარი შეადგინა, რაც თითქმის ორჯერ აღემატება 2018 წლის ანალოგიური პერიოდის მაჩვენებელს.

ორმხრივი ურთიერთობები

საქართველომ და უნგრეთმა დიპლომატიური ურთიერთობები 1992 წლის 14 მარტს დაამყარეს. ქვეყნები თანამშრომლობენ ეკონომიკის, ვაჭრობის, ტრანსპორტის, ტურიზმის, განათლებისა და მეცნიერების სფეროებში. 

ტურიზმის ეროვნული ადმინისტრაციის მონაცემებით, 2019 წელს საქართველოს დაახლოებით 7,8 ათასი უნგრელი ეწვია, რაც 18,9%-ით მეტია 2018 წლის ანალოგიურ მაჩვენებელთან შედარებით. 

სტატისტიკის ეროვნული სამსახურის მონაცემებით, 2019 წელს ქვეყნებს შორის სავაჭრო მოცულობამ დაახლოებით 45,9 მლნ დოლარი შეადგინა, რაც 5,6%-ით ნაკლებია 2018 წლის მონაცემთან შედარებით.

საქართველოსა და უნგრეთს შორის ურთიერთობების გაღრმავების მიზნით 2013 წლიდან ფუნქციონირებს სახელმწიფოთაშორისი კომისია ეკონომიკური თანამშრომლობის საკითხებში.

90
თემები:
საქართველოს საგარეო პოლიტიკა
ილო ბეროშვილი ანი ბებია

ანი ბებიას და ილო ბეროშვილს შვილი შეეძინათ - უსაყვარლესი ვიდეო სამშობიაროდან

0
(განახლებულია 12:27 07.07.2020)
მსახიობებმა ანი ბებიამ და ილო ბეროშვილმა სულ ცოტა ხნის წინ გაამჟღავნეს სასიხარულო ინფორმაცია. შვილს წყვილმა უცნაური სახელი დაარქვა

მსახიობებს ანი ბებიას და ილო ბეროშვილს ვაჟი შეეძინათ. პოპულარულმა მსახიობების წყვილმა შვილს უცნაური სახელი ჯერი დაარქვა. სიახლე საზოგადოებას ილომ ამცნო და ახალშობილისა და ახალნამშობიარევი ანის ფოტოები და ვიდეო გამოაქვეყნა. წყვილმა უამრავი მილოცვა მიიღო.

ანისთვის და ილოსთვის ჯერი პირველი საერთო შვილია. ანის პირველი ქორწინებიდან შვილი არ ჰყოლია. ილოს კი პირველ ქორწინებაში ჟურნალისტ ნელი აგირბასთან ორი გოგონა ჰყავს. აპრილის ბოლოს მესამე ქორწინებიდან ნელი აგირბასაც შეეძინა მესამე შვილი.

ცნობილ სახეებს ილო ბეროშვილს და ანი ბებიას რამდენიმეწლიანი ურთიერთობა აკავშირებთ. პოპულარული ცოლ-ქმარი ტელეეკრანებზე ერთობლივად „ჩემი ცოლის დაქალებში" გამოჩნდა. წარმოუდგენელი იყო, მაგრამ სერიალის გმირს შავლეგ მადლიანს ვაკეში არსებული აფთიაქის ფარმაცევტი შეუყვარდა. ფარმაცევტის როლს ანი ბებია ასრულებდა.

რეიტინგულ სერიალში მათი სასიყვარულო ისტორია არ განვითარდა. წყვილს შორის კი სასიყვარულო ქიმია, როგორც თავად ამბობენ, მანამდე დაიწყო. „ბავშვს სახელი დიდი ხნის წინ შევურჩიეთ. არ ჰქონდა მნიშვნელობა გოგო იქნებოდა თუ ბიჭი, მას მაინც ამ სახელს დავარქმევდით. ჩემი გადაწყვეტილებით მას დავარქმევთ ჯერის, არაქართული სახელია და მე ძალიან მომწონს“, – განაცხადა ბებიამ.

0
თემები:
სელებრითების ცხოვრება