თბილისი

რა იცვლება შენების წესებში... გამარტივდება თუ არა რეგულაციები?

1078
(განახლებულია 12:58 14.10.2019)
გიორგი გახარია ორმოცდაათამდე დეველოპერული და სამშენებლო კომპანიის წარმომადგენელს ორი საათის განმავლობაში უსმენდა. რა ითქვა კონკრეტულად, რას ითხოვს სამშენებლო ბიზნესი, როგორია სახელმწიფოს ხედვა და შედგა თუ არა კონსენსუსი?

სამსონ ხონელი

ღვინობისთვის მეორე დეკადის დასაწყისში მთავრობამ ბიზნესის წარმომადგენლებთან სასაუბროდ მოიცალა. სამართლიანობა მოითხოვს და უნდა ითქვას, მეოცნებე ხელისუფლებისთვის ბიზნესის სამყაროსთან კომუნიკაცია უცხო არ არის. ამჯერად თემატური შეხვედრები გაიმართა. მთავრობის თავმჯდომარე ჯერ ტურიზმის, შემდეგ მევენახეობა-მეღვინეობის და ბოლოს სამშენებლო დარგის წარმომადგენლებს შეხვდა. სამივე თავყრილობის ანალიტიკას წინამდებარე სტატია ვერ დაიტევს. არჩევანს სამშენებლო ბიზნესის წარმომადგენლებთან გამართულ შეხვედრაზე შევაჩერებ. როგორც თავად გიორგი გახარიამ განაცხადა, მშენებლობა ჩვენი ეკონომიკის ის ერთ-ერთი წამყვანი დარგია, რომელიც ყველაზე მეტ ადამიანს ასაქმებს. გარდა ამისა, ტურიზმისა და მევენახეობა-მეღვინეობის მიმართულებით არსებულ გამოწვევებზე ბოლო პერიოდში ხშირად ვსაუბრობდი. ასე რომ, იმედია, მიღებულ გადაწყვეტილებას მკითხველი გაგებით მოეკიდება და, სულ ცოტა, არ მიწყენს.

„ყველანაირი დანდობის, გაფრთხილებისა და მოფერების გარეშე თქვენ მეუბნებით – კონკრეტულად სად რა პრობლემა გაქვთ“, − ამ სიტყვებით მიმართა გიორგი გახარიამ შეხვედრის მონაწილეებს და მოუწოდა ღიად ესაუბრათ ყველა იმ გამოწვევაზე, რომელიც დარგში არსებობს. არადა, უნდა ითქვას, რომ ბოლო პერიოდში სასაუბრო მართლაც ბევრი დაგროვდა...

დარგის სპეციალისტები რამდენიმე თვეა აცხადებენ, რომ სამშენებლო ბიზნესში კრიზისია. მათი შეფასებით, მიზეზი მიმდინარე წლიდან სრულად ამოქმედებული ახალი საბანკო და სამშენებლო რეგულაციებია. შეიცვალა და გამკაცრდა ყველა სახის, მათ შორის, იპოთეკური კრედიტის გაცემის წესი. არახალია, რომ უძრავი ქონების შესაძენად საჭირო ფინანსების უდიდესი ნაწილი სწორედ საბანკო სესხებზე მოდიოდა. „მენაშენეთა ასოციაციის“ თავმჯდომარე ირაკლი როსტიაშვილი ჯერ კიდევ გაზაფხულზე ამბობდა, რომ უძრავი ქონების გაყიდვების მოცულობა თითქმის განახევრდა, სამშენებლო კომპანიების უმრავლესობა ახალი პროექტის დაწყებას კითხვის ნიშნის ქვეშ აყენებდა. თავად მისი ვარაუდით, ამგვარ ვითარებაში დაახლოებით 40000 მოქალაქეს შესაძლოა დასაქმების პრობლემა შექმნოდა. რამდენად გამართლდა ეს ვარაუდი, ჯერჯერობით უცნობია, მაგრამ ფაქტია, რომ სამშენებლო ბიზნესს ახლა მძიმე პერიოდი უდგას. ანალიტიკოსების შეფასებით, გამკაცრებულ საბანკო რეგულაციებთან ერთად დამატებით პრობლემად იქცა მშენებლობის ნებართვების გაცემის საკმაოდ რთული პირობები. სამართლიანობისთვის აქ არ უნდა დაგვავიწყდეს, რომ სამშენებლო რეგულაციების გამკაცრება არავის ახირება არ იყო და ის ამ სფეროში მრავალი წლის განმავლობაში არსებულმა ქაოსმა და ურბანულმა სუიციდმა განაპირობა. სხვა საკითხია, რომ სამშენებლო ბიზნესი წესების დაცვით თამაშს მოუმზადებელი შეხვდა. 

ფაქტია, რომ სამშენებლო და საბანკო რეგულაციების გამკაცრებიდან მალევე სამშენებლო სექტორი ყველა ძირითადი პარამეტრით შემცირდა. სტატისტიკის ეროვნული სამსახურის „საქსტატის“ მონაცემებით, ამ შემცირებამ ჯამში მიმდინარე წლის პირველ კვარტალში 9.6 პროცენტი, ხოლო მეორე კვარტალში 4.6 პროცენტი შეადგინა. „საქსტატის“ გასული წლების მონაცემებსაც თუ გავეცნობით, ვნახავთ, რომ 2017-2018 წლებში სექტორი საშუალოდ 22 პროცენტით იზრდებოდა.

უძრავი ქონების გაყიდვების მოცულობის კლებაზე მიანიშნებს საჯარო რეესტრის ეროვნული სააგენტოს ინფორმაციაც. კერძოდ, შემცირებულია უძრავი ქონების რეგისტრაციის დინამიკა. კონკრეტული ციფრების მოყვანა საჭირო არ არის, დაინტერესებულ მკითხველს თავად შეუძლია გაეცნოს. სამშენებლო სექტორში შემცირდა უცხოური ინვესტიციები. ანალიტიკური კომპანიის „თიბისი რისერჩის“ ინფორმაციით, შემცირების ერთ-ერთი მიზეზი მოჭარბებული ფინანსური და სამშენებლო რეგულაციებია. მიმდინარე წლის მეორე კვარტალში დარგში ჩაიდო სულ 4 მილიონი დოლარის ინვესტიცია, რაც გასული წლის ამავე პერიოდთან შედარებით 91 პროცენტით ნაკლებია. საყურადღებოა, კიდევ ერთი პარამეტრი: მიმდინარე წლის პირველ ნახევარში ჯამურად გაყიდულ უძრავ ქონებაში არარეზიდენტი პირების მიერ შეძენილი ქონების წილიც შემცირდა. „თიბისი რისერჩის“ კვლევით, კლებამ ხუთი ერთეული შეადგინა − 13 პროცენტიდან 8 პროცენტამდე. ანალიტიკური კომპანიის ექსპერტები კლების მთავარ მიზეზად ირანიდან მოთხოვნის შემცირებას ასახელებენ. ირანიდან საქართველოს უძრავი ქონების ბაზარზე ინტერესის განელებით მხოლოდ დედაქალაქში სამშენებლო სექტორმა დაახლოებით 80 მილიონი დოლარით იზარალა...

სიტყვა გამიგრძელდა და დროა პრემიერ-მინისტრის სამშენებლო ბიზნესის წარმომადგენლებთან შეხვედრას დავუბრუნდეთ.

ერთი სიტყვით, ორი საათის განმავლობაში გიორგი გახარია ორმოცდაათამდე დეველოპერული და სამშენებლო კომპანიის წარმომადგენელს უსმენდა. თემა − დარგში არსებული პრობლემები და მათი მოგვარების გზები, ამ პროცესში სახელმწიფოს როლი და სექტორის განვითარების პერსპექტივა. რა ითქვა კონკრეტულად, რას ითხოვს სამშენებლო ბიზნესი, როგორია სახელმწიფოს ხედვა და შედგა თუ არა კონსენსუსი? კითხვებზე არ არსებობს ერთმნიშვნელოვანი პასუხი. შეხვედრა მასმედიისთვის დახურული იყო და დეტალები მოგვიანებით და ისიც, სავარაუდოდ, არასრულად თავყრილობის შემდეგ გახდა ცნობილი...

დეველოპერული და სამშენებლო კომპანიების დამფუძნებლებმა და ხელმძღვანელებმა შეხვედრის შემდეგ განაცხადეს, რომ პრემიერ-მინისტრის ყურადღება რამდენიმე საკითხზე გაამახვილეს. პირველ რიგში მათ ხაზი გაუსვეს სახელმწიფოს მხრიდან გადაწყვეტილებათა დროულად მიღებისა და ამ პროცესში დარგის წარმომადგენელთა მონაწილეობის აუცილებლობას. ისაუბრეს საბანკო რეგულაციების ნეგატიური გავლენის ასპექტებზეც. ითქვა, რომ იპოთეკურ სესხზე ადვილად ხელმისაწვდომობის შეზღუდვამ ერთხანს უძრავი ქონების გაყიდვები შეამცირა. დღეს ეს საკითხი მეტ-ნაკლებად დარეგულირდა, მაგრამ დღის წესრიგიდან არ მოხსნილა. იმსჯელეს სამშენებლო სფეროს საკანონმდებლო ბაზაზეც. შეხვედრის მონაწილეებს პრემიერ-მინისტრისთვის უთქვამთ, რომ მშენებლობის დადგენილ ახალ სტანდარტებთან და უსაფრთხოების ნორმებთან პრეტენზია არავის აქვს, მაგრამ არის საკითხები, რომლებმაც პრობლემები გამოიწვია და ეფექტურად უნდა გადაიჭრას. როგორც კომპანია „რედ-კოს“ მენეჯერმა მალხაზ კუნელაურმა განაცხადა, შეხვედრაზე ითქვა, რომ საბანკო თუ საკანონმდებლო რეგულაციები, რომლებიც პრობლემებს ქმნის, შესაძლებელია გადაიხედოს კიდეც, რაც სირცხვილი არ არის. ისაუბრეს დარგში არსებულ საკადრო დეფიციტზე. როგორც გაირკვა, ეს საკითხი კომპანია „მ2“-ის გენერალურმა დირექტორმა ირაკლი ბურდილაძემ წამოჭრა.

პრემიერ-მინისტრმა რა ბრძანა? − ჩამეიება მკითხველი. ვიცით მხოლოდ ის, რაც გიორგი გახარიამ შეხვედრის დასაწყისში განაცხადა. კერძოდ, მას ესმის, რომ საბანკო თუ სხვა სახის რეგულაციებმა სამშენებლო სექტორს გარკვეული პრობლემები შეუქმნა. სადაც პრობლემების სწრაფად გადაჭრის რესურსია, პრობლემები სწრაფად უნდა გადაიჭრას და სისტემური პრობლემების მოგვარების გზები დაისახოს... სულ ეს არის. შეხვედრის დამთავრების შემდეგ პრემიერ-მინისტრს კომენტარი არ გაუკეთებია. როგორც პრეს-სამსახურმა მოგვიანებით განმარტა, მას სხვა შეხვედრაზე ეჩქარებოდა... და, ბოლოს, კომპანია „არქის“ დამფუძნებელმა ილია წულაიამ გვითხრა, რომ იყო საქმიანი შეხვედრა კონკრეტულ საკითხებზე. მისივე შეფასებით, ბიზნესი სიხარულით შეხვდა მთავრობის თავმჯდომარის პოზიციას − „იქნება მაქსიმალური ჩართულობა, პირდაპირი კომუნიკაცია 24 საათის განმავლობაში“...

რა იგულისხმება ამ მაქსიმალურობის და პირდაპირობის მიღმა, ჯერ უცნობია, მაგრამ იმედია, მალე გაირკვევა...  

 

1078
ვალუტის გადამცვლელი პუნქტი

მოსახლეობის საყურადღებოდ: 8 ივნისიდან სავალუტო ჯიხურები იხსნება

62
(განახლებულია 13:45 03.06.2020)
მომავალი კვირიდან საქართველოს მოსახლეობა ვალუტის ყიდვას ან გადაცვლას ვალუტის გადამცვლელ პუნქტებში შეძლებენ

 

თბილისი, 3 ივნისი  - Sputnik.  საქართველოს მთელ ტერიტორიაზე ვალუტის გადამცვლელი პუნქტები, რომლებმაც მუშაობა კორონავირუსის პანდემიის გამო შეაჩერეს, საქმიანობას 8 ივნისიდან განაახლებენ, ნათქვამია საქართველოს ეროვნული ბანკის ვებგვერდზე გავრცელებულ განცხადებაში. 

ვალუტის გადამცვლელმა პუნქტებმა მუშაობა 31 მარტს შეაჩერეს. ამ ეტაპზე მოქალაქეებს ვალუტის გადაცვლა მხოლოდ ბანკებსა და მიკროსაფინანსო ორგანიზაციებში შეუძლიათ.

 „ერთობლივი ქმედებებით ჩვენ სწრაფად შევძლებთ ვირუსის დამარცხებას და საქმიანობის ჩვეულ რეჟიმში დაბრუნებას“, – ნათქვამია უწყების მიერ გავრცელებულ განცხადებაში.

ეროვნული ბანკი მოუწოდებს ვალუტის გადამცვლელი პუნქტების მფლობელებს მკაცრად დაიცვან პროფესიონალთა რეკომენდაციები და რჩევები. 

საქართველოში საგანგებო მდგომარეობა 21 მარტს გამოცხადდა და 23 მაისამდე მოქმედებდა. მთავრობა პანდემიის გამო დაწესებული შეზღუდვების დაჩქარებულ ტემპში მოხსნის პროცესს აგრძელებს.

შეზღუდვების მოხსნის გეგმა ექვსეტაპიანია და მისი განხორციელება ქვეყანაში ეპიდსიტუაციაზეა დამოკიდებული. გეგმის თანახმად, შეზღუდვები სრულად 6 ივლისისთვის უნდა იყოს გაუქმებული. მანამდე კი ქვეყანაში დახურულ სივრცეებში პირბადის ტარება აუცილებელი პირობაა.

62
თემები:
COVID-19 საქართველოში
თბილისი

ასმილიონიანი შეთანხმება: საქართველო კრიზისთან ბრძოლისთვის თანხას მიიღებს

48
(განახლებულია 14:02 03.06.2020)
აზიის განვითარების ბანკის მიერ გამოყოფილი თანხები საშუალებას იძლევა, შემსუბუქდეს კრიზისის ნეგატიური გავლენა ბიზნესზე და გამოიყოს თანხები მოსახლეობის მოწყვლადი ჯგუფების დასახმარებლად.

თბილისი, 3 ივნისი – Sputnik. საქართველომ ხელი მოაწერა შეთანხმებას აზიის განვითარების ბანკთან (ADB) 100 მილიონი აშშ დოლარის ოდენობის კრედიტის მიღების თაობაზე, რომელიც მიიმართება კორონავირუსის პანდემიის გამო შექმნილი პრობლემების გადასაწყვეტად, ნათქვამია საქართველოს ფინანსთა სამინისტროს განცხადებაში.

შეთანხმებას ხელი მოაწერეს ფინანსთა მინისტრმა ივანე მაჭავარიანმა და საქართველოში ADB-ს მუდმივი წარმომადგენლობის დირექტორმა შეინ როზენტალმა.

მაჭავარიანის განცხადებით, აზიის განვითარების ბანკი საქართველოს ერთ-ერთი მსხვილი პარტნიორია და პანდემიის პირობებში მასთან თანამშრომლობა სასიცოცხლოდ მნიშვნელოვანია.

ADB-ს ფინანსური დახმარება მიმართული იქნება პროგრამის CARES (ხარჯვითი დახმარება) მხარდაჭერაზე. დაფინანსება მოხმარდება პანდემიით შექმნილი ვითარების ეკონომიკური ხარჯების შემსუბუქებას, მაკროეკონომიკური პირობებისა და მოსახლეობის კეთილდღეობის გაუმჯობესებას; ძირითადი აქცენტი გაკეთდება მოსახლეობის ყველაზე მოწყვლად ჯგუფებზე, რომელთა საარსებო წყაროზე მნიშვნელოვანი გავლენა მოახდინა პანდემიამ.

აქტიური რეაგირება და ხარჯვითი დახმარება

პროგრამა CARES (ხარჯვითი დახმარება) საბიუჯეტო დახმარებას გაუწევს მთავრობას და დააფინანსებს მის კომპლექსურ ანტიკრიზისულ გეგმას. დაფინანსება მოიცავს გადასახადების გადავადებას 4 ათასზე მეტი მცირე და საშუალო ტურისტული საწარმოსთვის, ასევე კრედიტების სუბსიდირებას მინიმუმ 2 ათასი მცირე და საშუალო სასტუმროსთვის.

კრედიტი ასევე მოხმარდება მოსახლეობის მოწყვლად ჯგუფებს. დროებით ფინანსურ დახმარებას მიიღებს დაახლოებით 350 ათასი მოქალაქე, რომლებიც პანდემიის გამო სამსახურის დაკარგვის რისკის ქვეშ არიან, 250 ათასი თვითდასაქმებული მოქალაქე, აგრეთვე მოხმარდება 1,2 მილიონი მოქალაქის კომუნალური ხარჯების სუბსიდირებას. ამას გარდა, ნახევარი წლის განმავლობაში ცხრა ძირითად პროდუქტზე იქნება ფიქსირებული ფასები.

აზიის განვითარების ბანკის პაკეტი შემუშავდა საერთაშორისო სავალუტო ფონდთან და სხვა პარტნიორებთან ერთად საქართველოში COVID-19-ის კრიზისის დასაძლევად კოორდინირებული სამუშაოების ფარგლებში.

აზიის განვითარების ბანკის მიზანია აზია–წყნარი ოკეანის რეგიონის წარმატებული, მრავალმხრივი განვითარების ხელშეწყობა. ამასთან, ის განაგრძობს მუშაობას რეგიონში უკიდურესი სიღარიბის აღმოსაფხვრელად. ორგანიზაცია, რომელიც 1966 წელს დაარსდა, აერთიანებს 68 ქვეყანას, მათ შორის 49 აზიის რეგიონიდანაა.

ნიკა შენგელია: ემიგრანტები საქართველოში სულ უფრო ნაკლებს გადმორიცხავენ>>

აზიის განვითარების ბანკი საქართველოს მხარს 2007 წლიდან უჭერს და მისი ერთ-ერთი ყველაზე მრავალმხრივი პარტნიორია. საქართველოსთვის დღემდე გამოყოფილი ვალების საერთო რაოდენობა 2,8 მილიარდ დოლარს შეადგენს.

48
თემები:
საქართველოს ეკონომიკა
ქართველი მაშველები ვერტმფრენით

ოთხფეხა მეგობრები მაშველების გვერდით: ზვავქვეშ მოყოლილების ძებნაში ძაღლები ჩაერთვებიან

0
(განახლებულია 16:52 03.06.2020)
ძაღლი გაივლის იქ, სადაც ამას ადამიანი ვერ შეძლებს, ხოლო სპეციალურად გაწვრთნილი მაშველებს მიუთითებს, სად უნდა ეძებონ ზვავქვეშ მოყოლილი ადამიანი

თბილისი, 3 ივნისი – Sputnik. „მთის კურორტების განვითარების კომპანია“, ახალი პროექტის ფარგლებში, ავსტრიის განვითარების სააგენტოს (Austrian Development Agency) მხარდაჭერით, ორ გაწვრთნილ ბელგიურ ძაღლსა და შესაბამის საწვრთნელ აღჭურვილობას შეიძენს კინოლოგებისთვის, იუწყება საქართველოს ეკონომიკისა და მდგრადი განვითარების სამინისტროს პრეს–სამსახური.

ტრაგედია თუშეთში: ზვავში მოყოლილ 62 წლის მამაკაცს მესამე დღეა უშედეგოდ ეძებენ>>

ძაღლების გაწვრთნის პროექტმა „ზვავში გადარჩენილთა ძებნა: გაწვრთნილი მაშველი ძაღლები ზვავში დაშავებულთა გადარჩენის გარანტი“ სამთო-სათხილამურო კურორტებზე თეთნულდსა და გუდაურში მაშველი ძაღლების წვრთნისა და გამოყენების პრაქტიკა უნდა დანერგოს.

კინოლოგების უნარების სპეციალურ სწავლებას გაივლიან ასევე სამაშველო სამსახურის თანამშრომლებიც.

„პირველად საქართველოში დაინერგება ზვავში მაშველი ძაღლების წვრთნისა და გამოყენების პრაქტიკა, რაც გაზრდის სამთო-სათხილამურო კურორტების მომსახურების ხარისხს სამაშველო-საზვავე უსაფრთხოების კუთხით და უზრუნველყოფს ზვავში დაშავებულთა დროულ ძებნასა და გადარჩენას,“ - განაცხადა „მთის კურორტების განვითარების კომპანიის“ დირექტორმა ირაკლი ჭირაქაძემ.

მიუხედავად კვალიფიცირებული მაშველებისა, ბოლო ოთხ წელიწადში გაიზარდა იმ ადამიანების რაოდენობა, რომლებიც ზვავის ჩამოწოლის გამო დაშავდნენ ან დაიღუპნენ. მაშველებს არ ჰქონდათ სპეციალური აღჭურვილობა რთულად მისადგომ ადგილებში საძიებო სამუშაოების წარმოებისთვის, რაც ხშირად იწვევდა ადამიანების დაღუპვას.

0