თბილისი

სექტემბრის ორი „რეკორდი“, ანუ რატომ ძვირდება ცხოვრება?

1084
(განახლებულია 15:29 08.10.2019)
სექტემბრიდან სექტემბრამდე... ფასები იზრდება, ცხოვრება ძვირდება! აქვს თუ არა მთავრობას რესურსი, შეაჩეროს ინფლაციური პროცესი?

სამსონ ხონელი

სტატისტიკის ეროვნული სამსახურის „საქსტატის“ ინფორმაციით, მიმდინარე წლის სექტემბერში, წინა თვესთან შედარებით, საქართველოში ინფლაციის დონემ 1.7 პროცენტი შეადგინა. ბევრია ეს თუ ცოტა? თავად განსაჯეთ – მიმდინარე წლის განმავლობაში ყოველთვიური ინფლაციის ყველაზე მაღალი ნიშნული სწორედ სექტემბერში დაფიქსირდა. საინტერესოა, რატომ?

თუ გავითვალისწინებთ, რომ ზაფხული ეკონომიკური თვალსაზრისით აქტიური პერიოდია, ეს კითხვა კიდევ უფრო მეტ აქტუალობას იძენს. ანალიტიკოსთა უმრავლესობა ამ გარემოებას ისევ და ისევ პოლიტიკური ვითარების არასტაბილურობას და ეკონომიკაზე მის ნეგატიურ გავლენას უკავშირებს. იგულისხმება პროცესი, რომელიც დედაქალაქის მთავარ გამზირზე 20 ივნისს დაიწყო და სამი თვის განმავლობაში გაგრძელდა.

იყო სხვა მიზეზებიც. რაღა თქმა უნდა, პირველ რიგში ეს არის ის ძირითადი მაკროეკონომიკური პარამეტრები, რომლებიც უშუალოდ ახდენენ გავლენას ეროვნული ვალუტის კურსის ფორმირებაზე. იგულისხმება ექსპორტ-იმპორტის ბალანსი, ფულადი გზავნილები, პირდაპირი უცხოური ინვესტიციები და შემოსავლები ტურიზმის სფეროდან...

ჯერ კიდევ აგვისტოს თვის და წლიური ინფლაციის მაჩვენებლების (შესაბამისად, 0.8 და 4.9 პროცენტი) შეფასებისას კომპანია „თიბისი რისერჩის“ ანალიტიკოსთა ჯგუფი ანგარიშში წერდა, რომ საანგარიშო პერიოდში ქვეყნის ეროვნული ბანკი რეკორდული ოდენობით სავალუტო რეზერვებს ყიდულობდა, რუსეთიდან ფრენების აკრძალვამ და პირდაპირი უცხოური ინვესტიციების შესუსტებამ ეკონომიკურ პროცესებზე ნეგატიურად იმოქმედა.

ამავე პერიოდში ამერიკული დოლარი მსოფლიოს ყველა ძირითადი ვალუტის მიმართ მცირედით გამყარდა და ისტორიულ მაქსიმუმს მიაღწია. ლარმა, თავის მხრივ, გაუფასურების მორიგი რეკორდი დაამყარა. გაძლიერდა ინფლაციაზე ლარის კურსის უარყოფითი გავლენა. ამავე ჯგუფის დასკვნით, „თუ ლარის კურსი არ გამყარდა, წლის ბოლომდე ინფლაცია დაახლოებით 7 პროცენტით განისაზღვრება...“

არ ვიცი, ვინ რას ფიქრობს, მე კი მგონია, პროგნოზი თუ უკვე არ იქცა რეალობად, არც ბევრი უკლია. ფაქტია, ბოლო ორი წლის განმავლობაში სექტემბერში წლიური ინფლაციის რეკორდული ნიშნული დაფიქსირდა და 6.4 პროცენტი შეადგინა. ეს კი ეროვნული ბანკის მიზნობრივ მაჩვენებელს ორჯერ აღემატება... „საქსტატის“ ანალიტიკოსთა განმარტებით, სექტემბრის თვის და წლიური ინფლაციის მაჩვენებლის ფორმირებაზე ძირითადი გავლენა ფასების ცვლილებამ იქონია. ამ ცვლილების მიღმა, სამწუხაროდ, ფასების ზრდა იგულისხმება. მივყვეთ თანმიმდევრულად, ვნახოთ, ბოლო ერთი წლის განმავლობაში რა და რამდენი პროცენტით გაძვირდა.

ფასებმა პრაქტიკულად ყველა მიმართულებით მოიმატა.

სურსათი და უალკოჰოლო სასმელები: ფასები გაიზარდა 11.7 პროცენტით. მათ შორის არის: თევზეული − 16.1 პროცენტით; რძე, ყველი და კვერცხი − 14.6 პროცენტით; შაქარი, ჯემი და სხვა ტკბილეული − 13.2 პროცენტით; ხორცი და ხორცის პროდუქტები − 12.6 პროცენტით; პური, პურპროდუქტები − 10.8 პროცენტით; ბოსტნეული და ბაღჩეული − 10.1 პროცენტით; მინერალური წყალი, უალკოჰოლო სასმელები და ნატურალური წვენები − 7.6 პროცენტით. ასევე ზეთი და ცხიმი – 3.0 პროცენტით. სექტემბრიდან სექტემბრამდე ფასები მომატებულია თამბაქოს ნაწარმზე 29.0 პროცენტით, ხოლო ალკოჰოლურ სასმელებზე – 2.6 პროცენტით.

დასვენება, გართობა და კულტურა: ფასებმა მოიმატა 6.9 პროცენტით. ფასები გაიზარდა გასართობ და კულტურულ მომსახურებაზე – 6.6 პროცენტით.

სასტუმროები, კაფეები და რესტორნები: ფასები გაიზარდა 6.7 პროცენტით.

ჯანმრთელობის დაცვა: ფასები მომატებულია 4.0 პროცენტით. სამედიცინო პროდუქცია, აპარატურა და მოწყობილობა გაძვირდა 6.6 პროცენტით; ამბულატორიული სამედიცინო მომსახურება − 3.7 პროცენტით და საავადმყოფოების მომსახურება − 1.1 პროცენტით.

ტრანსპორტი: ფასებმა 3.9 პროცენტით მოიმატა. სატრანსპორტო საშუალებების შეძენაზე ფასები გაიზარდა 9.1 პროცენტით; პირადი სატრანსპორტო საშუალებების ექსპლუატაციაზე − 4.0 პროცენტით, ხოლო სატრანსპორტო მომსახურებაზე − 2.0 პროცენტით.

ავეჯი, სოაჯახო ნივთები, სახლის მოვლა: ფასებმა მოიმატა 3.4 პროცენტით.

სამართლიანობა მოითხოვს და უნდა აღვნიშნოთ, გარკვეული სახეობის პროდუქცია გაიაფდა კიდეც. ტანსაცმელსა და ფეხსაცმელზე ფასები 5.5 პროცენტით შემცირდა. ანალიტიკოსები და ვაჭრობის სფეროს სპეციალისტები სამოსზე ფასების კლების რამდენიმე მიზეზს ასახელებენ. მათ შორის მთავარია მძიმე სოციალური ფონი – მოსახლეობის უმრავლესობის შემოსავლების უდიდესი ნაწილი საკვებ პროდუქტებზე, ჯანდაცვასა და აუცილებელი მოხმარების საგნების შეძენაზე იხარჯება. არ უნდა დაგვავიწყდეს საბანკო ვალდებულებებიც... 

მარტივად ვიტყვი – ხალხში ფული არ არის. ბევრი რომ აღარ გავაგრძელო, ექსპერტების შეფასებით, ამ სახეობის პროდუქციაზე ფასების კლება ეკონომიკაში მიმდინარე არა პოზიტიური, არამედ ნეგატიური პროცესის შედეგია. ერთი სიტყვით, ბაზარი ადეკვატურად რეაგირებს. ფასები იზრდება იმ პროდუქციასა თუ მომსახურებაზე, რომელზეც მოთხოვნა არის და პირიქით. მაგრამ უნდა გვახსოვდეს – ჩვენში ეს მოთხოვნა ძალიან ხშირად მხოლოდ კეთილ ნებაზე დამოკიდებული არ არის.

არავინ კამათობს, ინფლაციის მაჩვენებელი საკმაოდ მაღალია. ამ პრობლემაზე პირდაპირ და ღიად მიგვანიშნებენ საერთაშორისო საფინანსო ინსტიტუტების წარმომადგენლებიც. საბანკო სექტორის მთავარმა მარეგულირებელმა პრობლემა აღიარა, მეტიც, ინფლაციური პროცესების შესაჩერებლად ბოლო ერთი თვის განმავლობაში ორჯერ, ჯამურად 1 პროცენტით გაზარდა რეფინანსირების განაკვეთი და, როგორც კობა გვენეტაძის უწყებაში აცხადებენ, ეროვნული ბანკი „მომავალშიც ეფექტურად გამოიყენებს მის ხელთ არსებულ ყველა ინსტრუმენტს“.

„პანიკის საფუძველი არ არის, ჩვენ თანმიმდევრულად ვიყენებთ ყველა ბერკეტს, რომელმაც ინფლაციაზე ზეწოლა უნდა შეამციროს. ინფლაცია აუცილებლად შემცირდება“, − განაცხადა ეროვნული ბანკის პრეზიდენტმა კობა გვენეტაძემ საზოგადოებრივი მაუწყებლის პირველი არხის გადაცემა „ბიზნეს-პარტნიორის“ ეთერში. მისი განმარტებით, ინფლაციის მიზნობრივი მაჩვენებლის ე.წ. თარგეთირების რეჟიმი, რომელიც ქვეყანაში მოქმედებს, საშუალებას იძლევა, ეროვნულმა ბანკმა მონეტარული პოლიტიკის ინსტრუმენტები მოქნილად გამოიყენოს და შეამციროს ან გაზარდოს იმისდა მიხედვით, რა რისკებიც ქვეყნის წინაშე დგას. „საგარეო შოკები ნებისმიერ დროს შეიძლება მოხდეს, მაგრამ მთავარია, რამდენად შესაძლებელია გამკლავება. ჩვენ ამის ბერკეტები გვაქვს. შეუძლებელია შოკები ვიწინასწარმეტყველოთ, მაგრამ როცა ეს დადგება, საშუალება გვაქვს, გავანეიტრალოთ და პრობლემური პერიოდის გავლა გავაადვილოთ. არის კოორდინაცია მთავრობასთან. ეკონომიკისა და ინფლაციის საკითხები საერთო საზრუნავია. დარწმუნებული ვარ, რომ ეს სწორი მაკროეკონომკური მიდგომა აუცილებლად შედეგებს გამოიღებს“, − დასძინა ქვეყნის პირველმა ბანკირმა.

რა შედეგით დასრულდება ეროვნული ბანკის მცდელობა, შეძლებს თუ არა კობა გვენეტაძის უწყება ლარის დასტაბილურებას და ინფლაციის შეჩერებას, დრო გვიჩვენებს...

დაველოდოთ, „საქსტატი“ მალე ისევ დათვლის...  

1084
ვალუტის გადამცვლელი პუნქტი

მოსახლეობის საყურადღებოდ: 8 ივნისიდან სავალუტო ჯიხურები იხსნება

15
(განახლებულია 13:45 03.06.2020)
მომავალი კვირიდან საქართველოს მოსახლეობა ვალუტის ყიდვას ან გადაცვლას ვალუტის გადამცვლელ პუნქტებში შეძლებენ

 

თბილისი, 3 ივნისი  - Sputnik.  საქართველოს მთელ ტერიტორიაზე ვალუტის გადამცვლელი პუნქტები, რომლებმაც მუშაობა კორონავირუსის პანდემიის გამო შეაჩერეს, საქმიანობას 8 ივნისიდან განაახლებენ, ნათქვამია საქართველოს ეროვნული ბანკის ვებგვერდზე გავრცელებულ განცხადებაში. 

ვალუტის გადამცვლელმა პუნქტებმა მუშაობა 31 მარტს შეაჩერეს. ამ ეტაპზე მოქალაქეებს ვალუტის გადაცვლა მხოლოდ ბანკებსა და მიკროსაფინანსო ორგანიზაციებში შეუძლიათ.

 „ერთობლივი ქმედებებით ჩვენ სწრაფად შევძლებთ ვირუსის დამარცხებას და საქმიანობის ჩვეულ რეჟიმში დაბრუნებას“, – ნათქვამია უწყების მიერ გავრცელებულ განცხადებაში.

ეროვნული ბანკი მოუწოდებს ვალუტის გადამცვლელი პუნქტების მფლობელებს მკაცრად დაიცვან პროფესიონალთა რეკომენდაციები და რჩევები. 

საქართველოში საგანგებო მდგომარეობა 21 მარტს გამოცხადდა და 23 მაისამდე მოქმედებდა. მთავრობა პანდემიის გამო დაწესებული შეზღუდვების დაჩქარებულ ტემპში მოხსნის პროცესს აგრძელებს.

შეზღუდვების მოხსნის გეგმა ექვსეტაპიანია და მისი განხორციელება ქვეყანაში ეპიდსიტუაციაზეა დამოკიდებული. გეგმის თანახმად, შეზღუდვები სრულად 6 ივლისისთვის უნდა იყოს გაუქმებული. მანამდე კი ქვეყანაში დახურულ სივრცეებში პირბადის ტარება აუცილებელი პირობაა.

15
თემები:
COVID-19 საქართველოში
თბილისი

ასმილიონიანი შეთანხმება: საქართველო კრიზისთან ბრძოლისთვის თანხას მიიღებს

47
(განახლებულია 14:02 03.06.2020)
აზიის განვითარების ბანკის მიერ გამოყოფილი თანხები საშუალებას იძლევა, შემსუბუქდეს კრიზისის ნეგატიური გავლენა ბიზნესზე და გამოიყოს თანხები მოსახლეობის მოწყვლადი ჯგუფების დასახმარებლად.

თბილისი, 3 ივნისი – Sputnik. საქართველომ ხელი მოაწერა შეთანხმებას აზიის განვითარების ბანკთან (ADB) 100 მილიონი აშშ დოლარის ოდენობის კრედიტის მიღების თაობაზე, რომელიც მიიმართება კორონავირუსის პანდემიის გამო შექმნილი პრობლემების გადასაწყვეტად, ნათქვამია საქართველოს ფინანსთა სამინისტროს განცხადებაში.

შეთანხმებას ხელი მოაწერეს ფინანსთა მინისტრმა ივანე მაჭავარიანმა და საქართველოში ADB-ს მუდმივი წარმომადგენლობის დირექტორმა შეინ როზენტალმა.

მაჭავარიანის განცხადებით, აზიის განვითარების ბანკი საქართველოს ერთ-ერთი მსხვილი პარტნიორია და პანდემიის პირობებში მასთან თანამშრომლობა სასიცოცხლოდ მნიშვნელოვანია.

ADB-ს ფინანსური დახმარება მიმართული იქნება პროგრამის CARES (ხარჯვითი დახმარება) მხარდაჭერაზე. დაფინანსება მოხმარდება პანდემიით შექმნილი ვითარების ეკონომიკური ხარჯების შემსუბუქებას, მაკროეკონომიკური პირობებისა და მოსახლეობის კეთილდღეობის გაუმჯობესებას; ძირითადი აქცენტი გაკეთდება მოსახლეობის ყველაზე მოწყვლად ჯგუფებზე, რომელთა საარსებო წყაროზე მნიშვნელოვანი გავლენა მოახდინა პანდემიამ.

აქტიური რეაგირება და ხარჯვითი დახმარება

პროგრამა CARES (ხარჯვითი დახმარება) საბიუჯეტო დახმარებას გაუწევს მთავრობას და დააფინანსებს მის კომპლექსურ ანტიკრიზისულ გეგმას. დაფინანსება მოიცავს გადასახადების გადავადებას 4 ათასზე მეტი მცირე და საშუალო ტურისტული საწარმოსთვის, ასევე კრედიტების სუბსიდირებას მინიმუმ 2 ათასი მცირე და საშუალო სასტუმროსთვის.

კრედიტი ასევე მოხმარდება მოსახლეობის მოწყვლად ჯგუფებს. დროებით ფინანსურ დახმარებას მიიღებს დაახლოებით 350 ათასი მოქალაქე, რომლებიც პანდემიის გამო სამსახურის დაკარგვის რისკის ქვეშ არიან, 250 ათასი თვითდასაქმებული მოქალაქე, აგრეთვე მოხმარდება 1,2 მილიონი მოქალაქის კომუნალური ხარჯების სუბსიდირებას. ამას გარდა, ნახევარი წლის განმავლობაში ცხრა ძირითად პროდუქტზე იქნება ფიქსირებული ფასები.

აზიის განვითარების ბანკის პაკეტი შემუშავდა საერთაშორისო სავალუტო ფონდთან და სხვა პარტნიორებთან ერთად საქართველოში COVID-19-ის კრიზისის დასაძლევად კოორდინირებული სამუშაოების ფარგლებში.

აზიის განვითარების ბანკის მიზანია აზია–წყნარი ოკეანის რეგიონის წარმატებული, მრავალმხრივი განვითარების ხელშეწყობა. ამასთან, ის განაგრძობს მუშაობას რეგიონში უკიდურესი სიღარიბის აღმოსაფხვრელად. ორგანიზაცია, რომელიც 1966 წელს დაარსდა, აერთიანებს 68 ქვეყანას, მათ შორის 49 აზიის რეგიონიდანაა.

ნიკა შენგელია: ემიგრანტები საქართველოში სულ უფრო ნაკლებს გადმორიცხავენ>>

აზიის განვითარების ბანკი საქართველოს მხარს 2007 წლიდან უჭერს და მისი ერთ-ერთი ყველაზე მრავალმხრივი პარტნიორია. საქართველოსთვის დღემდე გამოყოფილი ვალების საერთო რაოდენობა 2,8 მილიარდ დოლარს შეადგენს.

47
თემები:
საქართველოს ეკონომიკა
კახა კალაძე

ყველა სერვისცენტრი მწყობრშია თბილისში მოქალაქეთა მომსახურების სფერომ მუშაობა განაახლა

0
(განახლებულია 14:03 03.06.2020)
კორონავირუსის გავრცელების პრევენციის მიზნით დაწესებული შეზღუდვების მოხსნა საქართველოში 27 აპრილიდან ეტაპობრივად დაიწყო.

თბილისი, 3 ივნისი - Sputnik. მოქალაქეები თბილისის სერვისცენტრებში დროულ და ხარისხიან მომსახურებას მიიღებენ, განაცხადა თბილისის მერმა კახა კალაძემ დედაქალაქის მთავრობის დღევანდელ სხდომაზე.

კორონავირუსის გავრცელების პრევენციის მიზნით, მერიის რაიონული მომსახურების ცენტრებმა მიმდინარე წლის მარტში ფუნქციონირება დროებით შეწყვიტეს.

კონდიციონერის გარეშე, ღია ფანჯრებით, პირბადეებით – ასე იმუშავებს საზოგადოებრივი ტრანსპორტი>>

კალაძის განცხადებით, მოქალაქეთა მომსახურების თერთმეტივე სერვისცენტრმა, რომლებიც მსოფლიო პანდემიის პირობებში დაიხურა, მუშაობა პირველი ივნისიდან განაახლა.

„მსოფლიო პანდემიის გამო ჩვენ მთელი რიგი ღონისძიებების გატარება მოგვიწია... მოგვიწია სერვისცენტრების დახურვა როგორც მერიაში, ისე ათივე რაიონულ გამგეობაში, რის გამოც სერვისებზე მოთხოვნა მნიშვნელოვნად გაიზარდა. ყველაფერს ვაკეთებთ იმისთვის, რომ მაქსიმალურად სწრაფად მივიღოთ გადაწყვეტილებები, დროულად მოხდეს წერილების ჩაბარება, რომ მოქალაქეებს რიგში დგომა არ მოუწიოთ“, – განაცხადა კახა კალაძემ.

თბილისის მერის განცხადებით, მომსახურების მიღების დროს სავალდებულოა წესების დაცვა, რათა მოქალაქეთა უსაფრთხოება და ჯანმრთელობა მაქსიმალურად იყოს დაცული.

„აუცილებლად გასათვალისწინებელია სოციალური დისტანცია და პირბადეების მოხმარება... მნიშვნელოვანია, გავითვალისწინოთ ყველა ის მოთხოვნა, რომელიც შესაბამისი უწყებების მხრიდან დაწესდა. ბრძოლა Covid-19-ის წინააღმდეგ არ დასრულებულა, ის ჯერ კიდევ ჩვენთანაა“, – აღნიშნა კახა კალაძემ.

ბოლო  მონაცემებით, საქართველოში კორონავირუსი 800 ადამიანს დაუდასტურდა. გამოჯანმრთელდა 640, გარდაიცვალა – 13. საკარანტინო რეჟიმში იმყოფება 2424 ადამიანი, სტაციონარებში მეთვალყურეობის ქვეშ კი 304 პაციენტია.

0
თემები:
თბილისი დღეს