ბათუმის ტერმინალი

ინვესტიციების ვარდნა რეკორდული კლება მეორე კვარტალში

167
(განახლებულია 19:11 07.10.2019)
ქვეყნის საინვესტიციო კლიმატის მდგომარეობის საუკეთესო მაჩვენებელი, ბუნებრივია, პირდაპირი უცხოური ინვესტიციების (FDI) შემოდინებაა.

2018 წელს 2017 წელთან შედარებით FDI-ს მოცულობა 35%-ით შემცირდა. სტატისტიკის ეროვნული სამსახურის „საქსტატის“ მიერ ბოლოს გამოქვეყნებული მონაცემებით, უცხოური ინვესტიციების მოცულობამ 2019 წლის მეორე კვარტალში 187 მლნ აშშ დოლარი შეადგინა, რაც 2018 წლის ანალოგიურ მონაცემებზე 53.7%-ით ნაკლებია. ასე რომ, კლება კიდევ უფრო მასშტაბურია, ვიდრე ეს წლიური მაჩვენებლების შედარებისას იყო.

პირდაპირი უცხოური ინვესტიციების დინამიკა საქართველოში
© Sputnik / Konstantin Ivanov
პირდაპირი უცხოური ინვესტიციების დინამიკა საქართველოში

ინვესტორები ქვეყნების მიხედვით

ინვესტორთა შორის პირველი ადგილი $58 მლნ-ით ნიდერლანდებმა დაიკავა. მეორეა აშშ ($36 მლნ), მესამე – თურქეთი ($28 მლნ). მეოთხე ადგილზეა აზერბაიჯანი $15.8 მლნ-ით. მეხუთე ადგილზეა პანამა $15.5 მლნ-ით. მეექვსეა ჩეხეთი $14.8 მლნ-ით. მეშვიდე პოზიციაზეა კორეა $14.2 მლნ-ით, მერვე ადგილი იაპონიამ დაიკავა, საიდანაც ქვეყანაში $11.83 მილიონის ინვესტიციაა შემოსული.

აქვე აღსანიშნავია, რომ „საქსტატის“ მონაცემებში ინვესტიციების გატანის მაჩვენებელიც იზრდება. მაგალითად, მეორე კვარტალში, $16.567 მლნ გატანილია გაერთიანებული სამეფოს მიერ, $2.5 მლნ – კვიპროსის მიერ. კვიპროსს ასევე პირველ კვარტალში ჰქონდა უარყოფითი მაჩვენებელი – გატანილი იყო $9.79 მლნ-ზე მეტი. ლატვიამ მეორე კვარტალში $1.22 მლნ, პირველ კვარტალში კი $1.55 მლნ-მდე გაიტანა.

უკრაინამ მეორე კვარტალში $2.84 მლნ გაიტანა. ვირჯინიის კუნძულების ეგიდით $31,34 მლნ-ია გატანილი, ამავე ქვეყნის მიერ პირველ კვარტალში $6,71 მლნ-ია გატანილი. მეორე კვარტალში ჩინეთმა $10.88 მლნ გაიტანა, ისრაელმა – $2,75 მლნ.

ინვესტიციები სფეროების მიხედვით

ინვესტორებისთვის ყველაზე მიმზიდველი სფერო ენერგეტიკის სექტორი აღმოჩნდა, რომელშიც მეორე კვარტალში $63,67 მლნ-ია შემოსული, მეორე ადგილს იკავებს დამამუშავებელი მრეწველობა $38.39 მლნ-ით, მესამეზეა სასტუმროები და რესტორნები $28.097 მლნ-ით, მეოთხეზე ტრანსპორტი $26,46 მლნ-ით, მეხუთეზე კი უძრავი ქონება $22,823 მლნ-ით.

აქვე აღსანიშნავია, რომ გასული წლის ლიდერი სფერო ინვესტიციების განხორციელების მხრივ „საფინანსო სექტორი“, რომელიც მთელი ინვესტიციების 22.5%-ს შეადგენდა, მიმდინარე წლის მეორე კვარტალში ინვესტიციების გატანის ლიდერ სფეროდ გადაიქცა. სექტორიდან $33,80 მლნ-ია გატანილი. აქედან ჩანს, რომ ინვესტორებისთვის საფინანსო სექტორი აღარ არის მიმზიდველი. 

რატომ მცირდება ინვესტიციები – მიზეზები

ეკონომისტი ბესო ნამჩავაძე პირდაპირი უცხოური ინვესტიციების კლების ერთ-ერთ მიზეზად ქვეყანაში სასამართლოსთან დაკავშირებულ რისკებს ასახელებს.

„თუ ინვესტორს გარკვეული პრობლემა შეექმნება სამართლებრივი კუთხით, ის სამართალს ვერ იპოვის. შეიძლება ხელისუფლებამ შეგავიწროვოს და სამართალი ვერ იპოვო. ამ რისკების გათვალისწინებით რატომ უნდა უნდოდეს ვინმეს აქ ფულის ჩადება, არ მესმის“, – ამბობს ნამჩავაძე „ნეტგაზეთთან“ საუბრისას.

ინვესტიციების შემცირებას ეკონომიკურ პოლიტიკაში არსებულ გაურკვევლობას უკავშირებს ეკონომისტი გიორგი პაპავა.

„ეს შემცირება არ შეიძლება ერთ კონკრეტულ სექტორს დავუკავშიროთ. FDI-ს შემცირება ასახვაა იმ ბოლოდროინდელი მოვლენების, რაც ქვეყანაში მიმდინარეობს. მაგალითად, ძალიან დიდი გაურკვევლობა ეკონომიკურ პოლიტიკაში“, – ამბობს პაპავა.

კონკრეტულად საფინანსო სექტორში პირდაპირი უცხოური ინვესტიციების შემცირებას ბესო ნამჩავაძე „თიბისი ბანკის“ დამფუძნებლების მიმართ ბრალის წაყენებას უკავშირებს, რამაც ლონდონის საფონდო ბირჟაზე განთავსებული კომპანიების აქციების ფასების შემცირება გამოიწვია.

„ამ ფაქტს საბანკო რეგულაციებს ვერ დავუკავშირებთ, რადგან გასულ წელს, მაშინ, როცა სექტორში გარკვეული რეგულირება უკვე დაწყებული იყო, ზრდა გვქონდა. მგონია, რომ ეს უფრო მამუკა ხაზარაძესა და ბადრი ჯაფარიძეს უკავშირდება, რომელთათვის ბრალის წარდგენამ „თიბისი ბანკის“ აქციების ფასი დაბლა დასწია. ეს იყო სიგნალი ინვესტორებისთვის, პირველ რიგში, საფინანსო სექტორის ინვესტორებისთვის, რომ საქართველოში ინვესტირება სარისკოა. წელიწად-ნახევარია უკვე ინვესტიციები მცირდება და ეს მხოლოდ ერთჯერადი ფაქტორებით ვერ იქნება გამოწვეული. ეს მიანიშნებს იმას, რომ ქვეყანამ საინვესტიციო მიმზიდველობა დაკარგა“, – აცხადებს ბესო ნამჩავაძე.

ხელისუფლების პოზიცია

ხელისუფლების წარმომადგენლები გასულ წელსაც და ამჯერადაც ინვესტიციების შემცირების ერთ-ერთ მიზეზად გარკვეული პროექტების დასრულებას ასახელებენ და ამბობენ, რომ კატასტროფული არაფერი ხდება. BM.GE-სთან კომენტარი ფინანსთა მინისტრმა ივანე მაჭავარიანმა გააკეთა.

მისი თქმით, მნიშვნელოვანია ინვესტირება ხორციელდებოდეს, ხოლო ინვესტიცია ადგილობრივი იქნება თუ უცხოური, მეორეხარისხოვანია. მაჭავარიანი ამბობს, რომ FDI-ს შემცირების მიზეზი რამდენიმეა – ქვეყნის შიგნით მიმდინარე პროცესები, დაძაბულობა, მთავრობის ცვლილება.

„დაწყებული იქიდან, რომ შეიძლება იყოს პოლიტიკურად მაღალი ტემპერატურა, ამ შემთხვევაში ბიზნესს არ აინტერესებს ვინ არის მართალი, ვინ არის მტყუანი. ტემპერატურა აიწევს? – დამთავრებულია! დაიძაბება ურთიერთობა მეზობელთან, იქნება რუსეთი, თურქეთი თუ ვიღაცა? იქაც არ აინტერესებთ ვინ არის მართალი, ვინ არა. ტემპერატურამ აიწია? – სენტიმენტები, განწყობები შემცირდა“, – ამბობს მაჭავარიანი.

მისი თქმით, ეკონომიკურად დაძაბუნდა რეგიონიც. საბოლოო ჯამში კი შიდაპოლიტიკური და რეგიონული ფაქტორები ახდენს გავლენას ინვესტორებზე.

ეკონომიკის მინისტრი ნათია თურნავა FDI-ს შემცირების მიზეზად ანაკლიის პორტსაც ასახელებს.

„მოლოდინი გვქონდა, რომ წლევანდელ წელს ჩვენ მიგვეღო ანაკლიის ღრმაწყლოვანი პორტის ინვესტიცია. ეს საკმაოდ სოლიდური ინვესტიცია წლევანდელ სტატისტიკას ძალიან წაადგებოდა“, – ამბობს თურნავა.

თურნავას პოზიციას არ ეთანხმება ბესო ნამჩავაძე. მისი თქმით, ეს განცხადება პრობლემის ხაზარაძისთვის გადაბრალების მცდელობას ჰგავს.

კლება მოსალოდნელი იყო

„ეკონომიკური ტრანსფორმაციის ცენტრის“ პრეზიდენტი რამაზ გერლიანი „რადიო თავისუფლებასთან“ საუბრისას აცხადებს, რომ ტენდენცია კარგა ხანია არსებობს და ამიტომ არ იყო გასაკვირი ინვესტიციების მკვეთრად შემცირების დაფიქსირება.

„ჯერ კიდევ შარშან ვამბობდი, რომ გვექნებოდა სტაგნაცია. თუმცა, მისი ახსნა მხოლოდ იმით, რომ ძველი პროექტები დამთავრდა - მიუღებელია. რაღაც ტიპის ინფრასტრუქტურულ პროექტს, რომელიც ინვესტორის მიერ ხორციელდება, აქვს დასაწყისი და დასასრული. ეს თარიღები მეტ-ნაკლებად ცნობილია. შარშანწინაც ვიცოდით, რომ ეს პროექტები დამთავრდებოდა. ამიტომაც საჭიროა ხელშემწყობი პოლიტიკის გატარება იმ მიმართულებით, რომ არ გვქონდეს ჩავარდნა ინვესტიციებში. ინვესტიციური ნაკადების შემცირება უკვე ზეგავლენას ახდენს სხვა ეკონომიკურ მაჩვენებლებზე – დაწყებული დასაქმებიდან, გაგრძელებული იგივე ლარის გაცვლითი კურსით“, – ამბობს გერლიანი.

მისი თქმით, საინვესტიციო გარემოს გაუმჯობესების ნაცვლად ხელისუფლებამ რეგულაციები გაზარდა, პლუს დაემატა პოლიტიკური მომენტებიც, რაც ასევე უარყოფით ზეგავლენას ახდენს.

„საბანკო რეგულაციები იმიტომ არ მოგვწონს, რომ ზუსტად ვიცოდით – ექნებოდა უარყოფითი შედეგი. მშენებლობაში სტაგნაცია არა მხოლოდ მშენებლობის ნაწილში გამკაცრების ბრალია, არამედ ერთ-ერთი მიზეზია სწორედ საბანკო რეგულაციები, როდესაც ადამიანები საბოლოო პროდუქტის რეალიზებას ვერ ახდენენ. ინვესტორი იმიტომ დებს თანხას, რომ მან მიიღოს საბოლოო მომგებიანი შედეგი. თუ ის ხედავს, რომ ის პროდუქტი თუ მომსახურება, რომელსაც აწარმოებს, ვერ გაიყიდება, ლოგიკურია, რომ ის ამ სეგმენტიდან გასვლას იწყებს. შესაბამისად, შედეგიც სახეზეა“, – ამბობს გერლიანი.

ამ სიტუაციაში კი აშკარა გახდა ერთი შეხედვით ამოუცნობი მოვლენის – ლარის მუდმივი გაუფასურების ერთ-ერთი, არცთუ მეორეხარისხოვანი მიზეზი. 2004 წლიდან მოყოლებული, როდესაც ქვეყანაში პირდაპირი უცხოური ინვესტიციების მოცულობა იზრდებოდა, სხვა ეკონომიკურ ფაქტორებთან ერთად, ეს მაჩვენებელიც მნიშვნელოვან გავლენას ახდენდა ლარის კურსის სტაბილურობაზე. ამჟამად კი ლამის ყველა ეკონომიკური მაჩვენებელი, მათ შორის ინვესტიციების შემოდინება, გაუარესების გზას ადგას და შედეგიც სახეზეა...

თემურ იოსელიანი

167
მანდარინი

ბათუმის პორტიდან ექსპორტზე კვირაში ორჯერ 300–300 ტონა მანდარინი გადის

32
(განახლებულია 21:06 04.12.2020)
წელს მანდარინის მოსავლის საპროგნოზო მაჩვენებელი დაახლოებით 40 ათას ტონას შეადგენს. ბოლო მონაცემებით, უკვე ექსპორტირებულია 7 ათასი ტონა სტანდარტული მანდარინი.

თბილისი, 4 დეკემბერი - Sputnik. ბათუმის პორტიდან უკრაინაში ექსპორტზე 300 ტონა მანდარინი გავიდა, იუწყება აჭარის სოფლის მეურნეობის სამინისტრო.

უწყების ცნობით, მანდარინი უკრაინაში ბორნით გადააქვთ. ბათუმის პორტიდან გემი „კაუნასი'' კვირაში ორჯერ (პარასკევსა და შაბათს) გავა.

აჭარის მთავრობის თავმჯდომარე თორნიკე რიჟვაძე ავტონომიური რესპუბლიკის სოფლის მეურნეობის მინისტრთან გიორგი სურმანიძესთან ერთად ბათუმის პორტის საბორნე გადასასვლელზე იმყოფებოდა, სადაც გემი მანდარინით იტვირთება.

აჭარის მთავრობის თავმჯდომარის განცხადებით, აჭარაში აქტიურად მიმდინარეობს ნარინჯისფერი რთველი, აღებული მოსავალი კი ექსპორტზეც გადის და ადგილობრივ ბაზარზეც იყიდება.

„დღეს ჩვენ დავათვალიერეთ და ადგილზე გავეცანით მიმდინარე ექსპორტის პროცედურას. ბორნის მეშვეობით კვირაში ორჯერ ექსპორტზე გადის დაახლოებით 300 ტონაზე მეტი ციტრუსი. დღემდე უკვე ექსპორტირებულია 7 000 ტონაზე მეტი მანდარინი აჭარიდან და დაახლოებით 40 000 ტონა ციტრუსის ექსპორტი იგეგმება წლის განმავლობაში“, – განაცხადა თორნიკე რიჟვაძემ.

ამჟამად მანდარინის ექსპორტი აჭარიდან უკრაინაში, სომხეთში, ყაზახეთში, რუსეთსა და მოლდოვაში ხორციელდება.

აჭარის სოფლის მეურნეობის სამინისტროს ცნობით, წელს ქართული მანდარინი მაღალი ხარისხით გამოირჩევა, რაც, შესაბამისად, მაღალ საბაზრო ფასს განაპირობებს.

მანდარინის მოსავლის აღება-დაბინავების ორგანიზებულად განხორციელების მიზნით აჭარაში შესაბამისი შტაბი მუშაობს.

მიმდინარე წლის სეზონზე სტანდარტულ მანდარინს მოსახლეობისგან 30-მდე საწარმო იბარებს. რაც შეეხება არასტანდარტულ ნაყოფს, მისი ჩაბარება ფერმერებს ქობულეთის საკონსერვო ქარხანაში შეუძლიათ.

32
თემები:
საქართველოს სოფლის მეურნეობა
კორონავირუსის ეპიდემია

ინფლაციის დონე საქართველოში მესამე თვეა არ იცვლება ახალი სტატისტიკა

24
(განახლებულია 16:57 04.12.2020)
საქართველოს ეროვნული ბანკი აცხადებს, რომ ინფლაციის ბოლო თვეების დინამიკა რეგულატორის პროგნოზებს შეესაბამება.

თბილისი, 4 ნოემბერი – Sputnik. წლიურმა ინფლაციამ საქართველოში (2019 წლის ნოემბრიდან 2020 წლის ნოემბრამდე) მიზნობრივი 3%-იანი მაჩვენებლის პირობებში 3,8% შეადგინა, იუწყება სტატისტიკის ეროვნული სამსახური „საქსტატი“.

ამგვარად, ინფლაციის დონე უკვე მესამე თვეა არ იცვლება.

საქართველოში სამრეწველო პროდუქციაზე ფასები იზრდება>>

ნოემბერში, ოქტომბერთან შედარებით, ინფლაციის დონემ 0,9%, ოქტომბერში კი 0,8% შეადგინა.

„საქსტატის“ მონაცემებით, ნოემბერში ყველაზე მეტად – 0,1%-ით განათლების ფასები შემცირდა. ყველაზე მეტად გაძვირდა სურსათი – 1,8%-ით, ტრანსპორტი – 1,1%-ით და ავეჯი – 0,8%-ით.

როგორ იცვლებოდა ინფლაცია წლის დასაწყისიდან

2019 წელს წლიურმა ინფლაციამ 7% შეადგინა. მის შესაკავებლად ეროვნულმა ბანკმა 2019 წლის სექტემბრიდან მონეტარული პოლიტიკის გამკაცრება დაიწყო. წლის ბოლომდე რეფინანსირების განაკვეთი 6,5%-დან 9%-მდე გაიზარდა, ბოლოს – 2019 წლის დეკემბერში.

მიმდინარე წლის დასაწყისიდან ინფლაციის დონემ შემცირება დაიწყო – იანვარსა და თებერვალში მან 6,4% შეადგინა, მარტში – 6,1%, სექტემბერში – 3,8%. საქართველოში კორონავირუსის გავრცელების პრევენციის მიზნით ხელისუფლებამ 21 მარტიდან კარანტინი და კომენდანტის საათი დააწესა. ეკონომიკური აქტივობის სტიმულირებისთვის ეროვნულმა ბანკმა აპრილიდან სამ ეტაპად 8%-მდე შეამცირა მონეტარული პოლიტიკის ძირითადი განაკვეთი.

ამის მიუხედავად, ნოემბერში, გასული წლის ანალოგიურ პერიოდთან შედარებით, სურსათის ფასი 6%-ით გაიზარდა, თუმცა ხილის ფასი 5,3%-ით შემცირდა, რძე, ყველი და კვერცხი 8%-ით გაძვირდა, მზესუმზირის ზეთი – 23,2%-ით, ყავა – 7,6%-ით, პურპროდუქტები – 7,1%-ით, ხორცი – 3,7%-ით. კორონავირუსის გამო შექმნილი ვითარების გათვალისწინებით, 8,8%-ით გაიზარდა ჯანდაცვის სფეროს მომსახურების ფასებიც.

როგორ შეიცვლება ინფლაცია

საქართველოს ეროვნული ბანკი აღნიშნავს, რომ ინფლაციის ბოლო თვეების დინამიკა რეგულატორის პროგნოზებს შეესაბამება.

როგორც ეროვნული ბანკის განცხადებაშია ნათქვამი, მიმდინარე პროგნოზის თანახმად, სხვა თანაბარი პირობების არსებობისას, წლიური ინფლაციის შემცირების ტენდენცია შენარჩუნდება და 2021 წელს მიუახლოვდება მიზნობრივ ინფლაციას (3%-ს).

დოკუმენტში აღნიშნულია, რომ ინფლაციის შემცირების დინამიკა განპირობებულია სუსტი ჯამური მოთხოვნილებით და მოსალოდნელია, რომ ეს გავლენა მომავალშიც შენარჩუნდება. გარდა ამისა, საყურადღებოა საგარეო მოთხოვნილების შემცირებაც.

24
თემები:
საქართველოს ეკონომიკა
საპროტესტო აქცია

გაიმართება თუ არა მოლაპარაკებების მესამე რაუნდი: ოპოზიციამ ხელისუფლებას მოთხოვნები გადასცა

0
მმართველ პარტიაში იმედს იტოვებენ, რომ მხარეებს შორის მოლაპარაკების პროცესი შედეგს გამოიღებს და პარტიების ნაწილი მაინც შევა პარლამენტში.

 

თბილისი, 4 დეკემბერი - Sputnik. შვიდმა ოპოზიციურმა პარტიამ ევროკავშირისა და აშშ-ის ელჩების ხელით მმართველ პარტია „ქართული ოცნება–დემოკრატიულ საქართველოს“ მოთხოვნები გადასცა და ახლა ელოდება პასუხს, რომელზეც დამოკიდებული იქნება, გაიმართება თუ არა მოლაპარაკებების მესამე რაუნდი. 

ოპოზიციურმა პარტიებმა საქართველოში პოლიტიკური კრიზისის მოგვარებასთან დაკავშირებით გუშინ წინადადებების ერთობლივი დოკუმენტი შეიმუშავეს. დოკუმენტის შექმნაში „პატრიოტთა ალიანსის“ გარდა, ყველა ოპოზიციური პარტია მონაწილეობდა – „პატრიოტთა ალიანსი“, მართალია, მხარს უჭერს რიგგარეშე არჩევნებს, მაგრამ საერთო კონსულტაციებში არ მონაწილეობს.

 „ოპოზიციის ყველა მოთხოვნა და კრიზისის განმუხტვის ჩვენი ხედვა, რათა ქვეყანა წინ წავიდეს, წერილობითი სახით გადავეცით ელჩებს. ჩვენი თხოვნა იყო, რომ მათ, როგორც მოლაპარაკებების შუამავლებმა, ეს დოკუმენტი ოფიციალურად გადასცენ „ქართულ ოცნებას“ და ჩვენ ველოდებით პასუხს“, - განაცხადა „ევროპული საქართველოს“ ლიდერმა დავით ბაქრაძემ.

ამასთან, როგორც მან აღნიშნა, მხარეები შეთანხმდნენ, არ გაახმაურონ დოკუმენტის დეტალები მმართველი პარტიისთვის მის გადაცემამდე.

ევროკავშირისა და აშშ-ის საელჩოები ოპოზიციასა და ხელისუფლებას შორის მთავარი შუამავლები არიან. 2020 წლის დასაწყისში მათ მოახერხეს და მიაღწიეს მხარეებს შორის შეთანხმებას, რომლის საფუძველზეც შეიცვალა საარჩევნო სისტემა. საპარლამენტო არჩევნების შემდეგ მათ მხარეებს შორის ორი შეხვედრის ორგანიზება მოახერხეს, თუმცა. შეხვედრები უშედეგოდ დასრულდა.

ამასთან, როგორც პარტია „მოქალაქეების“ ლიდერმა ალეკო ელისაშვილმა აღნიშნა, ოპოზიციას იმედი აქვს, რომ მმართველი ძალისგან დოკუმენტალურ პასუხს მიიღებს. 

 „ველოდებით ჩვენს შეთავაზებაზე „ქართული ოცნების“ პასუხს, არა პრესკონფერენციაზე, არამედ იმ ფორმატით, რომლითაც ჩვენ გადავეცით“, - აღნიშნა ელისაშვილმა.

დოკუმენტის რამდენიმე დეტალი გაამხილა პარტია „ლელო საქართველოსთვის“ ლიდერმა ბადრი ჯაფარიძემ.

 „მოლაპარაკების საგანი არის პოლიტიკური შეთანხმება. ოპოზიციის შესვლა პარლამენტში არის ნაბიჯი, რომელიც გამომდინარეობს პოლიტიკური შეთანხმებიდან. ამიტომ მოლაპარაკებებზე ჩვენ ვისაუბრებთ პოლიტიკური შეთანხმების დეტალებზე“, - განაცხადა ჯაფარიძემ.

ამასთან, მან ხაზგასმით აღნიშნა, რომ რიგგარეშე არჩევნების მოთხოვნა ძალაში რჩება, თუმცა, დეტალებზე შეთანხმება შესაძლებელია. როგორც ჯაფარიძემ განმარტა, მიუხედავად იმისა, რომ შეხვედრას არ ესწრებოდა „პატრიოტთა ალიანსი“, ოპოზიცია გაუგზავნის მას დოკუმენტს, რომელზეც მიმდინარეობს მოლაპარაკება.

ოპოზიციაში არ მალავენ, რომ მმართველი პარტიის პასუხზე დამოკიდებული იქნება მოლაპარაკებების მესამე რაუნდის ჩატარება-არჩატარების საკითხი. 

ამ ეტაპზე ოპოზიცია არ ცნობს საპარლამენტო არჩევნების შედეგებს, რომლის თანახმადაც მმართველმა პარტიამ პარლამენტში 90 ადგილი მოიპოვა და არ აპირებს პარლამენტის საქმიანობაში მონაწილეობას.

მმართველ პარტიაში კი იმედს იტოვებენ, რომ მოლაპარაკების პროცესი შედეგს გამოიღებს და პარტიების ნაწილი მაინც შევა პარლამენტში. ამასთან, აცხადებენ, რომ არ აპირებენ რიგგარეშე არჩევნების დანიშვნას.

არჩევნების შედეგებით რვა ოპოზიციურმა პარტიამ პარლამენტში 60 ადგილი მიიღო. თუმცა, ისინი არ აღიარებენ კენჭისყრის შედეგებს და უარს აცხადებენ სადეპუტატო მანდატებზე. პოლიტიკური კრიზისის გადაჭრის პროცესში საქართველოში ევროკავშირისა და აშშ-ის ელჩები აქტიურად არიან ჩართული.

0
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს