გვირაბი „სამხედრო გზაზე

საქართველო ქვეშეთი–კობის გვირაბის მშენებლობისთვის ინვესტიციებს იზიდავს

87
(განახლებულია 17:42 03.10.2019)
ახალი გზა სატრანზიტო მოძრაობას წელიწადის ნებისმიერ დროს უზრუნველყოფს.

თბილისი, 3 ოქტომბერი — Sputnik. მცხეთა–სტეფანწმინდა–ლარსის ავტომაგისტრალზე ცხრაკილომეტრიანი გვირაბის მშენებლობისთვის ევროპის რეკონსტრუქციისა და განვითარების ბანკმა (EBRD) 60 მილიონი აშშ დოლარი გამოყო, ნათქვამია საქართველოს საავტომობილო გზების დეპარტამენტის განცხადებაში.

ისტორიული პროექტი: კობი-გუდაურის გზის მშენებლობა წლის ბოლომდე დაიწყება>>

ახალი გვირაბის მშენებლობა ე.წ. საქართველოს სამხედრო გზაზე მასშტაბური გეგმის ნაწილია, რომელიც ხელს შეუწყობს სატრანსპორტო ქსელის განვითარებას და საქართველოს დამკვიდრებას რეგიონის სავაჭრო და ტურისტულ ცენტრად.

ქვეშეთი–კობის გზის მშენებლობა დაყოფილია ორ მონაკვეთად. ჯამში დაგეგმილია ორზოლიანი 22.7-კილომეტრიანი ასფალტ-ბეტონის გზის, ექვსი ხიდისა და ხუთი გვირაბის მშენებლობა. გვირაბს გაიყვანენ ჯვრის უღელტეხილის ქვეშ – სოფელ წკერედან სოფელ კობამდე.

ქვეშეთი–კობის 9-კილომეტრიანი გვირაბი 15 მეტრის სიგანის იქნება, რაც საკმაოდ იშვიათია არა მარტო ამიერკავკასიაში, არამედ მსოფლიო მასშტაბით. ის უზარმაზარი დიამეტრის მქონე გვირაბების სიაში შევა, აღნიშნავენ საავტომობილო გზების დეპარტამენტში. გზა რთულ გეოგრაფიულ მარშრუტს აუვლის გვერდს, რომელიც ზამთარში დიდთოვლობით გამოირჩევა.

ქვეშეთი-კობის გზას ჩინური კომპანია ააშენებს>>

პროექტის სავარაუდო ღირებულება 558,6 მლნ დოლარია. გზების მშენებლობას დააფინანსებს აზიის განვითარების ბანკი და ევროპის რეკონსტრუქციისა და განვითარების ბანკი, რომლებმაც საქართველოს, შესაბამისად, 415 მლნ და 60 მლნ დოლარის მოცულობის კრედიტი გამოუყვეს. პროექტში ასევე მონაწილეობს საქართველოს მთავრობა, რომელმაც 83,6 მლნ დოლარი გამოყო.

ერთ-ერთ მონაკვეთს ააშენებს ჩინური კომპანია China Railway 23rd Bureau Group Co, რომელმაც შესაბამის ტენდერში გაიმარჯვა.

87
თემები:
ტრანსპორტი საქართველოში (330)
ვალუტის გადამცვლელი კურსი

ლარის კურსი 24 სექტემბერს

70
(განახლებულია 23:45 23.09.2020)
წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0242 ლარით გაუფასურდა.

თბილისი, 24 სექტემბერი  — Sputnik. საქართველოს ეროვნულმა ბანკმა ლარის კურსი აშშ დოლარის მიმართ 3,2641 GEL/$1 ნიშნულზე დაადგინა.

წინა ნიშნულთან შედარებით ქართული ეროვნული ვალუტის კურსი აშშ დოლარის მიმართ 0,0104 ლარით გაუფასურდა. 

ლარის კურის 24 სექტემბერს
70
თემები:
ლარის კურსი დღეს
ლარის სხვადასხვა ნომინალის კუპიურები

რატომ ყიდის ეროვნული ბანკი რეზერვებიდან დოლარს კობა გვენეტაძის განმარტება

226
(განახლებულია 20:41 23.09.2020)
ეროვნული ბანკის პრეზიდენტის პროგნოზით, პანდემიასთან დაკავშირებული გაურკვევლობის აღმოფხვრისა და ტრადიციული წინასაარჩევნო აჟიოტაჟის გადავლის შემდეგ კურსი მის წონასწორულ ნიშნულს დაუბრუნდება.

თბილისი, 23 სექტემბერი – Sputnik. ეროვნული ბანკის ინტერვენციების მიზანი ბაზარზე უცხოური ვალუტის მიწოდებაა, აცხადებს საქართველოს ეროვნული ბანკის პრეზიდენტი კობა გვენეტაძე.

ეროვნული ბანკი განაგრძობს ვალუტის გაყიდვას. დღეს გამართულ მორიგ აუქციონზე მან ლარის კურსის დასტაბილურების მიზნით კიდევ 40 მილიონი აშშ დოლარი გაყიდა.

პანდემია და არჩევნები საქართველოში: რა ხდება ლარის კურსთან დაკავშირებით>>

სავალუტო ბაზრის სტაბილიზებისთვის ეროვნულმა ბანკმა სავალუტო აუქციონებზე ნახევარ წელიწადში უკვე 400 მლნ დოლარზე მეტი გაყიდა.

„ბოლო დროს ხშირად ისმის განცხადებები: „ეროვნულმა ბანკმა 20 მილიონი დოლარი გაყიდა, მაგრამ ლარი მაინც ვერ გაამყარა“. ეს არასწორია. მსურს განვმარტო, რომ ეროვნული ბანკის ინტერვენციების მიზანი ლარის გამყარება ან გაუფასურება არ გახლავთ. შეგახსენებთ, რომ საქართველოში მოქმედებს მცურავი გაცვლითი კურსის რეჟიმი... პანდემიის პერიოდში განხორციელებული ინტერვენციები ლარის კურსის საბაზრო ქცევას ხელს არ უშლის. ამჟამინდელი ინტერვენციების მიზანი ბაზარზე უცხოური ვალუტის მიწოდებაა“, – დაწერა კობა გვენეტაძემ თავის Facebook-გვერდზე.

გვენეტაძის თქმით, მიუხედავად იმისა, რომ მცურავი კურსის პირობებში შეუძლებელია იმის თქმა, თუ სად არის ამა თუ იმ ვალუტის წონასწორული კურსი, დიდი ალბათობით, დღეს ლარი წონასწორულზე მეტად გაუფასურებულია. პანდემიასთან დაკავშირებული გაურკვევლობის აღმოფხვრისა და ტრადიციული წინასაარჩევნო აჟიოტაჟის გადავლის შემდეგ კი კურსი მის წონასწორულ ნიშნულს დაუბრუნდება.

„პანდემიის გავლენა საქართველოს ეკონომიკაზე ძირითადად ტურიზმიდან მიღებული შემოსავლების თითქმის განულებაში აისახა. ქვეყნის ეკონომიკურმა გუნდმა პანდემიის მიერ დაზიანებული ეკონომიკის დასახმარებლად დროის უმოკლეს პერიოდში უცხოური ვალუტით მოცულობითი დახმარება მოიზიდა, რომლის ნაწილიც, საერთაშორისო საფინანსო ინსტიტუტებთან შეთანხმებული პროგრამის ფარგლებში, ეროვნული ბანკის ინტერვენციების მეშვეობით მიმდინარე წელს და, სავარაუდოდ, მომავალი წლის პირველ ნახევარშიც ეკონომიკას ეტაპობრივად მიეწოდება“, – აღნიშნა გვენეტაძემ.

გვენეტაძის აზრით, ისეთი სულისკვეთების განცხადებები, როგორიცაა „ეროვნულმა ბანკმა 20 მილიონი დოლარი გაყიდა, მაგრამ ლარი მაინც ვერ გაამყარა“, ნებსით თუ უნებლიეთ, მოსახლეობას და ბიზნესს არასწორი გადაწყვეტილებებისკენ უბიძგებს და, საბოლოო ჯამში, მათ მხოლოდ აზარალებს.

„ამიტომ სასურველია გავიაზროთ, რომ როგორც მთელი მსოფლიო, ასევე საქართველო უპრეცედენტოდ რთულ პერიოდს გადის. ამ გამოწვევის წინააღმდეგ სწორი ნაბიჯების გადადგმით - რისი გამოცდილებაც ეროვნულ ბანკს აქვს - ამ კრიზისს მინიმალური დანახარჯებით გადავლახავთ“, – განაცხადა გვენეტაძემ.

პანდემია სერიოზულად აისახა ლარის კურსზე. ეროვნული ვალუტის კურსზე, რომელიც ანტირეკორდებს ამყარებს, ჯერ ნავთობის, ხოლო შემდეგ მსოფლიო ეკონომიკური კრიზისი აისახა.

40 მილიონი დოლარის გაყიდვის შემდეგ საშუალო შეწონილმა გაცვლითმა კურსმა 3.2641 შეადგინა.

226
თემები:
ლარის კურსის დაცემა
თბილისი

„განსაკუთრებით ყურადღებით უნდა ვიყოთ“ პედიატრი ზამთრის პერიოდზე

15
(განახლებულია 09:25 24.09.2020)
 წელს მშობლებმა განსაკუთრებული ყურადღება უნდა გამოიჩინონ, რადგანაც COVID-19–სა და სხვა სეზონური ვირუსების სიმპტომები მსგავსია

თბილისი, 24 სექტემბერი – Sputnik.  პანდემიის პირობებში წლევანდელი ზამთარი მარტივი არ იქნება, მიაჩნია ქართველ პედიატრ მაია ხერხეულიძეს.

მისი თქმით, სეზონურ გრიპთან და სხვა რესპირატორულ დაავადებებთან ერთად, ამ ზამთარში კორონავირუსით ინფიცირების რისკი იქნება.

 „წელს განსაკუთრებული ყურადღება გვჭირდება, როგორც მშობლებს, ასევე ექიმებს, რადგან ხშირ შემთხვევაში კორონავირუსული ინფექცია და მისი მიმდინარეობა,  განსაკუთრებით ბავშვებში, არ განსხვავდება  სხვა ბანალური ვირუსული ინფექციებისგან“, – განაცხადა ხერხეულიძემ ტელეკომპანია Imedi-ის ეთერში.

როგორც მან აღნიშნა, კორონავირუსულ ინფექციასთან განსაკუთრებული ყურადღების გამოჩენაა საჭირო, რამდენადაც Covid-19 ბოლომდე შესწავლილი არაა. 

 „დასაწყისში გვეგონა, რომ ბავშვებში ეს ვირუსი არ არსებობს, მერე ვნახეთ, რომ თურმე ისინიც ინფიცირდებიან, თუმცა, შედარებით მსუბუქად. შემდეგ ვნახეთ რომ გართულებაც შესაძლებელია, ანუ ჩვენ გზადაგზა ვსწავლობთ რაღაცებს, ამიტომ ნებისმიერი სიმპტომის შემთხვევაში, აუცილებლად საჭიროა ექიმთან კონსულტაცია“, - განაცხადა პედიატრმა.

ოქტომბრის დასაწყისში საქართველოს განკარგულებაში ექნება  გრიპის ოთხკომპონენტიანი ვაქცინის 135 ათასი დოზა. ვაქცინა ფრანგული წარმოებისაა, იგი გათვლილია  რისკ-ჯგუფებზე, რომლებსაც ყოველ წელს ჯანდაცვის სამინისტროსთან არსებული იმუნიზაციის კომიტეტი განსაზღვრავს.

რისკ–ჯგუფში პირველ რიგში შედიან ორსულები, ხანდაზმულები, ბავშვები და ქრონიკული დაავადებების მქონე პირები.

ამასთან, დაავადებათა კონტროლის ეროვნული ცენტრი ვაქცინის დამატებითი რაოდენობით შეძენის საკითხზე მუშაობს.

საქართველოს მოსახლეობაში გრიპის საწინააღმდეგო ვაქცინის პოპულარიზაცია 2014-2015 წლებში დაიწყო. 2018 წელს ქვეყანამ შეიძინა 40 ათასი დოზა, მაგრამ პრეპარატის დიდი ნაწილი აუთვისებელი დარჩა. გასულ წელს ქვეყანამ შეიძინა უკვე 100 ათასი დოზა, საიდანაც გამოუყენებელი ძალიან მცირე ნაწილი დარჩა.

15