ნათია თურნავა

დავალება შესრულებულია თურნავამ ტყიბულელი მეშახტეების პრობლემა გადაჭრა

89
(განახლებულია 23:08 26.09.2019)
„საქნახშირს“ ჩაანაცვლებს ახალი კომპანია, რომელიც სახელფასო დავალიანებას დაფარავს.

თბილისი, 26 სექტემბერი — Sputnik. ტყიბულელმა მეშახტეებმა, რომლებიც უკვე მესამე დღეა ხელფასების მოთხოვნით საპროტესტო აქციას მართავენ, გაფიცვა შეწყვიტეს – ქვანახშირის საბადოზე კომპანია „საქნახშირის“ ნაცვლად ახალი ინვესტორი შედის, განაცხადა ეკონომიკის მინისტრმა ნათია თურნავამ კომპანიის ხელმძღვანელობასთან და მეშახტეებთან შეხვედრის დასრულების შემდეგ.

ტყიბულში მაღაროელთა მუშაობა კითხვის ქვეშ დგას - „საქნახშირს“ ფინანსური პრობლემები აქვს >>

ტრაგედიების სერიის შემდეგ ტყიბულის 25-ვე შახტი 2018 წლის ივლისში საქართველოს პრემიერ-მინისტრის ბრძანებით დახურეს. ამის მიუხედავად მეშახტეები ხელფასს იღებდნენ, მაგრამ ამჯერად ჯამაგირის გაცემა გაჭიანურდა. მეშახტეები ხელფასებს 15 სექტემბრამდე ელოდებოდნენ. კომპანია „საქნახშირმა" განაცხადა, რომ მას ფინანსური პრობლემები აქვს.

კომპანია „საქნახშირი" ჰოლდინგი „ქართული ინდუსტრიული ჯგუფის" (GIG) შვილობილი კომპანიაა, რომელიც ქვანახშირს მოიპოვებს.

ნათია თურნავას განცხადებით, უკვე ორშაბათს დასაქმებულების სახელფასო დავალიანება დაიფარება.

„დღეიდან ინვესტორი კომპანია, რომელიც შემოდის ტყიბულში, მეშახტეებთან ერთად დაიწყებს შახტებში ჩასვლას და არსებული ვითარების შესწავლას. მზადყოფნა იქნა გამოცხადებული, რომ ორშაბათს სახელფასო დავალიანება იქნას გასტუმრებული. კომპანიამ იკისრა ვალდებულება, რომ გაისტუმროს გარკვეული სოციალური გადასახადებიც, მათ შორის დაზარალებული ოჯახების წინაშე“, – განაცხადა ნათია თურნავამ პირველი არხის ეთერში.

მინისტრის თქმით, საუბარია ასევე ქვანახშირის მოპოვების აღდგენაზე.

„პრაქტიკულად ერთ წელიწადზე მეტია შახტები გაჩერებულია. დაიწყება მოპოვება და უახლოესი ორი წლის განმავლობაში მოხდება შახტების გაფართოება“, – აღნიშნა თურნავამ.

მინისტრმა არ დაასახელა ის კომპანია, რომელიც კომპანია „საქნახშირს“ ჩაანაცვლებს. მხოლოდ განმარტა, რომ ახალი ინვესტორი „ქართულმა ინდუსტრიულმა ჯგუფმა" თავად მოიძია და 100-პროცენტიან წილს სწორედ მას მიჰყიდის. თურნავას თქმით, კომპანია არის ქართული, რომელსაც ჰყავს უკრაინელი პარტნიორები და მას მადნეულის მოპოვების გამოცდილება აქვს როგორც საქართველოში, ასევე უკრაინაში.

რატომ იხოცებიან მაღაროელები საქართველოში და ვინ დაიცავს მათ უფლებებს? >>

„ჩვენ ძალიან მოხარულები ვართ. ყველაფერი წარმატებით დასრულდა. ორი შახტი – მინდელის და ძიძიგურის მუშაობას ნოემბრიდან განაახლებს. ამ მაღაროებში გამოჩნდება ახალი ინვესტორი. ეს ქართული კომპანიაა", – განუცხადა „Sputnik-საქართველოს“ ტყიბულის მაღაროელთა პირველადი პროფკავშირის თავმჯდომარემ გაგა ისაკაძემ.

ტყიბულში არსებული მდგომარეობის მოგვარება საქართველოს პრემიერ-მინისტრმა გიორგი გახარიამ ნათია თურნავას დილით გამართულ მთავრობის სხდომაზე დაავალა.

89
თემები:
საქართველოს ეკონომიკა (593)
ბეტონის ნაკეთობათა ქარხანა

„უარესი იქნება“ - ნათია თურნავა მშპ-ს კატასტროფული ვარდნის შესახებ საუბრობს

83
მოსალოდნელი 5%-იანი ეკონომიკური ზრდის ნაცვლად საქართველოში საშუალოდ 5%-იანი ვარდნა დაფიქსირდა - კორონავირუსის პანდემიის ფონზე თითქმის ყველა დარგი დაზარალდა

თბილისი, 30 მაისი – Sputnik. საქართველოს ეკონომიკის მინისტრმა ნათია თურნავამ განაცხადა, რომ ქვეყანას ეკონომიკური განვითარების კუთხით მძიმე პერიოდი ელის.

თურნავა: საქართველოში საუკეთესო ბიზნეს გარემოა შექმნილი >>

კორონავირუსის პანდემიის ფონზე 2020 წლის აპრილში მშპ-ის მოცულობამ, გასული წლის ანალოგიურ პერიოდთან შედარებით, 16,6%-ით დაიკლო. სერიოზული კლება აპრილში დაფიქსირდა ქვეყნის ეკონომიკის პრაქტიკულად ყველა სფეროში, ზრდა კი – მხოლოდ სამთომოპოვებით მრეწველობაში.

„აპრილის თვეში 16 პროცენტიანი, უფრო მეტი – 16.6 პროცენტიანი ვარდნა მოსალოდნელი იყო. ამ დროს იყო ზუსტად საგანგებო ვითარება, როდესაც ეკონომიკური საქმიანობა შეზღუდული იყო და ეს გაკეთდა შეგნებულად, რათა დაგვეცვა ჩვენი მოსახლეობა ეპიდემიის გავრცელებისგან. თუმცა არ დაგიმალავთ, მაისიც ძალიან მძიმე იქნება და ივნისიც მძიმე იქნება“, - განაცხადა თურნავამ.

მისი თქმით, ეკონომიკური ზრდის ვარდნა წლის ბოლომდე გაგრძელდება, მაგრამ საქართველო ყველაფერს გააკეთებს იმისათვის, რომ 2021 წლისთვის სიტუაცია გამოსწორდეს. ამასთან ეკონომიკის მინისტრმა გამოთქვა ვარაუდი, რომ მშპ -5%-მდე დაეცემა.

„მთლიანად წელიწადი არ იქნება სახარბიელო, რადგან მოსალოდნელი 5 პროცენტიანი ზრდის ნაცვლად, მივიღებთ საშუალოდ 5 პროცენტიან ვარდნას“, - განაცხადა თურნავამ.

კორონავირუსი ეკონომიკის წინააღმდეგ

საქართველოში კორონავირუსით ინფიცირების პირველი შემთხვევა 26 თებერვალს დაფიქსირდა. საქართველოში 21 მარტს გამოცხადებული საგანგებო მდგომარეობა 23 მაისამდე გაგრძელდა. ამჟამად შეზღუდვები ეტაპობრივად იხსნება.

საქართველოს ეკონომიკა პანდემიისა და გლობალური კრიზისის ფონზე მძიმე მდგომარეობაში აღმოჩნდა. საერთაშორისო ორგანიზაციები წელს უარყოფითი ეკონომიკური ბალანსის პროგნოზს აკეთებენ, თუმცა აქვე აღნიშნავენ, რომ 2021 წელს საქართველო ცხოვრების ჩვეულ რიტმს დაუბრუნდება. ამასთან, საერთაშორისო ორგანიზაციების მონაცემებით, საქართველოს ეკონომიკა საშუალოდ –4%-მდე შემცირდება.

ყველაზე პესიმისტური, როგორც საქართველოში მიაჩნიათ, არის ევროპის რეკონსტრუქციისა და განვითარების ბანკის პროგნოზი, რომლის თანახმად, საქართველოში 2020 წელს მშპ 5,5%-ით შემცირდება, 2021 წელს კი ეკონომიკა 5,5%-ით გაიზრდება.

საერთაშორისო სავალუტო ფონდი (სსფ) ვარაუდობს, რომ საქართველოს ეკონომიკის ვარდნა 2020 წელს 4%-ს მიაღწევს, ინფლაცია კი 4,6% იქნება.

თუმცა, ამასთან, სსფ-ის პროგნოზი 2021 წლისთვის საკმაოდ ოპტიმისტურია. ფონდის შეფასებით, უკვე 2021 წელს საქართველოს ეკონომიკა 3%-ით მოიმატებს, ინფლაცია კი 3,7%-მდე შემცირდება.

საქართველო პირველი ქვეყანა გახდა, რომელიც სსფ-სგან კრიზისის პერიოდში დახმარებას მიიღებს. სსფ დათანხმდა პროგრამა „გაფართოებული დაფინანსების მექანიზმის“ გაგრძელებას, რაც ნიშნავს საქართველოსთვის 447 მლნ დოლარის გამოყოფას წლის ბოლომდე.

გარდა ამისა, ზოგიერთი საერთაშორისო დონორი საქართველოს 2020 წლის ბოლომდე ჯამში 1,5 მილიარდ აშშ დოლარს გამოუყოფს.

83
თემები:
საქართველოს ეკონომიკა (593)
ნათია თურნავა

თურნავა: საქართველოში საუკეთესო ბიზნეს გარემოა შექმნილი

56
(განახლებულია 19:13 30.05.2020)
სამინისტროს ცნობით, კომპანია სამომავლოდ როგორც წყლის ელექტროგამაცხელებლების წარმოების ზრდას, ისე ახალი მასშტაბური პროექტების დაწყებას გეგმავს

თბილისი, 30 მაისი - Sputnik. შპს „ატლანტიკ საქართველოს" გაფართოების პროცესი ადასტურებს, რომ საქართველოში საუკეთესო ბიზნეს გარემოა შექმნილი, განაცხადა საქართველოს ეკონომიკისა და მდგრადი განვითარების მინისტრმა ნათია თურნავამ.

ეკონომიკის მინისტრი ქუთაისში არსებულ თავისუფალ ინდუსტრიულ ზონას ესტუმრა. თურნავამ იმერეთის მხარეში სახელმწიფო რწმუნებულთან, ზვიად შალამბერიძესთან ერთად კომპანია „ატლანტიკ საქართველოში“ მიმდინარე პროცესი დაათვალიერა და მისი სამომავლო გეგმებს გაეცნო.

„ატლანტიკ საქართველო“, რომელიც ქუთაისის თავისუფალ ინდუსტრიულ ზონაში 2017 წლიდან ფუნქციონირებს, ფრანგული საერთაშორისო ჯგუფის Groupe Atlantic-ის შვილობილი კომპანიაა.

Groupe Atlantic მსოფლიოს 73 ქვეყანაში საქმიანობს, საქართველოში ის მთლიანად საექსპორტო ნაწარმს - წყლის ელექტროგამაცხელებლებს აწარმოებს. ინვესტირებულმა კაპიტალმა 2017 წელს 47,1 მლნ ლარი, ხოლო 2018-ში - 26,2 მლნ ლარი შეადგინა. კომპანიას საქართველოში 140-მდე ადამიანი ჰყავს დასაქმებული, გაფართოების შემდეგ კი დასაქმებულთა რიცხვი კიდევ უფრო გაიზრდება.

„მნიშვნელოვანია, რომ გლობალური კრიზისის მიუხედავად, კომპანია გაფართოებას გეგმავს და თუ დღეს ისინი 140-მდე ადამიანს ასაქმებენ, რამდენიმე თვეში, გაფართოების შემდეგ ჩვენს 200-ზე მეტ მოქალაქეს დაასაქმებენ - მათ ძალიან კარგი, მიმზიდველი პირობები და ხელფასები აქვთ. ჩვენი სამინისტრო პროგრამა „აწარმოე საქართველოში“ საშუალებით ვეხმარებით მათ, რომ ყველა ტექნიკური პრობლემა და საკითხი, რაც არსებობს, რაც შეიძლება სწრაფად გადაწყვიტონ და მალე მოხდეს საწარმოს გაფართოება“, - განაცხადა ეკონომიკის მინისტრმა.

სამინისტროს ცნობით, კომპანია სამომავლოდ  როგორც წყლის ელექტროგამაცხელებლების წარმოების ზრდას, ისე ახალი მასშტაბური პროექტების დაწყებას გეგმავს: სტეატიტის (გამაცხელებელი ელემენტი) წარმოებას, კონვექტორის (რადიატორი) დამზადებასა და კომპანია Bosch-თან თანამშრომლობას. აღნიშნული პროექტების განხორციელების მიზნით კომპანია დამატებით ინვესტირებას განახორციელებს, თანამშრომელთა რიცხვი კი 50 ახალი კადრით გაიზრდება.

 

56
თემები:
საქართველოს ეკონომიკა (593)
შსს-ს შენობა

შინაგან საქმეთა მინისტრმა და პრემიერ-მინისტრმა პოლიციის თანამშრომლები დააჯილდოვეს

0
პოლიციელის პროფესიულ დღესთან დაკავშირებით, შინაგან საქმეთა მინისტრის სახელით, სამინისტროს 5 ათასამდე თანამშრომელს სხვადასხვა სახის ჯილდო გადაეცა

თბილისი, 31 მაისი - Sputnik. შინაგან საქმეთა მინისტრმა, ვახტანგ გომელაურმა და საქართველოს პრემიერ-მინისტრმა, გიორგი გახარიამ პოლიციის დღისადმი მიძღვნილ ღონისძიებაზე პოლიციის თანამშრომლები მედლებით დააჯილდოვეს, ნათქვამია უწყების მიერ გავრცელებულ განცხადებაში.

საქართველოს პრემიერ-მინისტრმა გიორგი გახარიამ პოლიციელებს მიულოცა და აღნიშნა, რომ ემსახურო შენს ქვეყანას და მოქალაქეს, დაიცვა მისი ჯანმრთელობა, სიცოცხლე, მშვიდი ყოველდღიური ცხოვრება, ამაზე უფრო დიდი ღირსება არ არსებობს.

„ჩემთვის დიდი პატივია და საამაყოა, მქონდეს შესაძლებლობა, კიდევ ერთხელ მივულოცო პოლიციის დღე თითოეულ თქვენგანს. ყველა ის პოლიციელი და შსს-ს ყველა თანამშრომელი, რომელმაც თავი გაწირა, როგორც კრიმინალთან ბრძოლაში, ასევე ქვეყნის ინტერესების, ერთიანობის, დაცვის კონტექსტში, ყველა უნდა გვახსოვდეს, ყველას პატივი უნდა მივაგოთ, ყველას ოჯახებზე უნდა ვიზრუნოთ, ყველას შვილებს უნდა მივხედოთ“, - განაცხადა გახარიამ.

ვახტანგ გომელაურმაც უწყების თანამშრომლებს მათი პროფესიული დღესასწაული მიულოცა და კორონავირუსის პანდემიის დროს მათი თავდადებული სამსახური აღნიშნა.

„ეს სამი თვე, საგანგებო რეჟიმზე ვიყავით გადასული, ვართ კიდევაც, ვაგრძელებთ. თვეები ოჯახში არ ყოფილხართ, ადგილებზე იყავით დარჩენილი, თითქმის ყველა რეგიონში. იყო შემთხვევები, ბატონო პრემიერო, როდესაც შვილი შეეძინათ, ერთ-ერთი გვყავს - სულხანი და დიდი ხნის განმავლობაში ნანახი არ ჰყავდა შვილი“, - განაცხადა ვახტანგ გომელაურმა.

საქართველოს პრემიერ-მინისტრმა, გიორგი გახარიამ I ხარისხის მედალი – „განსაკუთრებული დამსახურებისათვის“ ქვემო ქართლის პოლიციის დეპარტამენტის დირექტორს, პოლიციის პოლკოვნიკ ლაშა გოგნიაშვილს პირადად გადასცა. II ხარისხის მედალი – „განსაკუთრებული დამსახურებისათვის“ კი გადაეცათ სამინისტროს სხვადასხვა სტრუქტურული დანაყოფის თანამშრომლებს: საინფორმაციო-ანალიტიკური დეპარტამენტი – ოთარ ჭელიძე, საზოგადოებრივი უსაფრთხოების მართვის ცენტრი “112” – ავთანდილ ჩიტაძე, საგანგებო სიტუაციების მართვის სამსახური – მანუჩარ მარგიანი, საპატრულო პოლიციის დეპარტამენტი – ალექსანდრე ბირთველიშვილი, განსაკუთრებულ დავალებათა დეპარტამენტი – რამაზ თარაშვილი, ცენტრალური კრიმინალური პოლიციის დეპარტამენტი – ბაკურ კურტანიძე, თბილისის პოლიციის დეპარტამენტი – ტარიელ ალავიძე, საექსპერტო-კრიმინალისტიკური დეპარტამენტი – ალექსანდრე დადიანიძე, დაცვის პოლიციის დეპარტამენტი – კარლო ურუშაძე.

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/29 მაისი >>

პოლიციელის პროფესიულ დღესთან დაკავშირებით, შინაგან საქმეთა მინისტრის სახელით, სამინისტროს 5 ათასამდე თანამშრომელს სხვადასხვა სახის ჯილდო გადაეცა.

პოლიციის დღე, რომელიც 2010 წელს დაარსდა, ბოლო წლებში 31 მაისს აღინიშნება.

0