ეროვნული ბანკის ოფისი

საბანკო რეგულაციები შესაძლოა გამარტივდეს

269
(განახლებულია 14:44 26.09.2019)
თუმცა, ეროვნული ბანკი პრინციპის ცვლილებას არ აპირებს

მასშტაბური საბანკო რეგულაციები, რომლებიც სრული დატვირთვით 1 იანვრიდან ამოქმედდა, შეიძლება შეარბილონ. ყოველ შემთხვევაში, ეროვნული ბანკის პრეზიდენტის მიერ გასულ კვირაში გაკეთებული განცხადებები, ალბათ, ამას უნდა ნიშნავდეს, თუმცა, კობა გვენეტაძე იქვე იმასაც ამბობს, რომ რაღაცები, შესაძლოა, მართლაც შეცვალონ, ოღონდ პრინციპი უცვლელი დარჩება.

ზოგადად, რეგულაციების შემოღების გაცხადებული მიზეზი „ჭარბვალიანობასთან“ ბრძოლა და ეკონომიკის გაჯანსაღების ხელშეწყობა იყო. ხალხს სესხზე ხელმისაწვდომობა უნდა შეზღუდვოდა, რათა მოსახლეობაში „ვალების ზრდა“ შემცირებულიყო. სესხების აღება მართლაც გართულდა, თუმცა ეკონომიკის ხელშეწყობის რა მოგახსენოთ... როგორც ხშირად ხდება ხოლმე, მიზანი და შედეგი ამ შემთხვევაშიც მთლად არ დაემთხვა ერთმანეთს.

რეგულაციების შესაძლო შერბილების მოტივად კობა გვენეტაძემ სწორედ „მიზნების მიღწევა“ დაასახელა, რაც სესხების გამკაცრების პოლიტიკის შედეგად გამოიკვეთა. მისი თქმით, „სესხები გაიცემა უფრო კარგი მაჩვენებლებით და უფრო კარგი სტანდარტებით“. ასეთ დამოკიდებულებას საბანკო რეგულაციების მოწინააღმდეგეები არ იზიარებენ. მათი თქმით, სესხებზე შეზღუდვამ თუ რამე გააკეთა, ეს არის არსებული რთული ეკონომიკური სიტუაციის კიდევ უფრო გაუარესება და რეგულაციების გაუქმების მოტივიც ეს უნდა გახდეს.

აღსანიშნავია, რომ რეგულაციების შემოღებიდან მალევე დაიწყო ლაპარაკი „შესაძლო შერბილებაზე“. სულ რაღაც ორიოდე თვეში შეზღუდვებმა მნიშვნელოვანი ზიანი მიაყენა ეკონომიკას – შემცირდა გაყიდვები, შესაბამისად, კომპანიებს შეუმცირდათ შემოსავალი, რამაც, თავის მხრივ, უმუშევრობის ზრდას შეუწყო ხელი. ასეთმა ჯაჭვურმა რეაქციამ კი საბოლოო ჯამში, ცხადია, ეკონომიკა და ქვეყანა დააზარალა.

მიუხედავად ასეთი სურათისა, ხელისუფლების წარმომადგენლები პოზიციას ბოლო დრომდე არ ცვლიან და მხოლოდ აქა-იქ თუ წამოსცდა რომელიმეს, რომ რეგულაციებმა სიტუაცია გაართულა. თუმცა, არიან ისეთებიც, ვინც სესხების შეზღუდვის ეროვნული ბანკისა და ფინანსთა სამინისტროს ერთობლივ პოლიტიკას არ ეთანხმება. „ქართული ოცნების“ წარმომადგენელმა, დეპუტატმა ნინო წილოსანმა ახალი მინისტრთა კაბინეტის დამტკიცებისას რეგულაციები უარყოფითად შეაფასა:

„საბანკო რეგულაციებით ზიანი მიადგათ მცირე და საშუალო მეწარმეებს. ვგულისხმობ იმას, რომ განვადების პორტფელი ამ რეგულაციებით შემცირდა 42%-ით, რაც ნიშნავს, რომ ადამიანებს, ვინც კეთილსინდისიერად დაფარა სესხი, აღარ მიეცათ საშუალება, რომ დამატებით გამოეტანათ ტექნიკა, ავეჯი და ა.შ. მაგრამ ამის გარდა ზიანი მიადგათ მცირე და საშუალო ბიზნესის წარმომადგენლებს, ადამიანებს, რომლებიც თავიანთი შრომით აწყობენ ბიზნესს და ჩვენი მხრიდან რეგულაციების შემოღებით მათ მოულოდნელი ეფექტი დაეცათ და მათ ბიზნესს მიადგა ზიანი“, – განაცხადა დეპუტატმა 5 სექტემბერს. მისი თქმით, რეგულაციების შედეგად, რადგან სესხები შეიზღუდა, ეკონომიკაში ბრუნვა მილიარდითაა შემცირებული.

თავის მხრივ არ უარუყვია რეგულაციების შესახებ გამოთქმული მოსაზრება ფინანსთა მინისტრს ივანე მაჭავარიანს.

„საბანკო რეგულაციებთან დაკავშირებით არაერთხელ გამიკეთებია განცხადება და აღარ წავალ სიღრმეებში. იყო ნაწილი, რასაც არ ვეთანხმებოდი და ეს, პირველ რიგში, იპოთეკურ სესხებს ეხებოდა. ქალბატონმა ნინომაც აბსოლუტურად სწორად აღნიშნა, რომ ამ სექტორში გაფუჭებული სესხების პროცენტი იმდენად მცირე იყო, რომ ალბათ არ საჭიროებდა განსაკუთრებულ დარეგულირებას“, – განაცხადა მაჭავარიანმა.

გავიხსენოთ თბილისის მერის განცხადებაც საბანკო რეგულაციებთან დაკავშირებით.

„საბანკო რეგულაციები ხელს უშლის ეკონომიკურ ზრდას, ხელს უშლის ეკონომიკის განვითარებას, ამ სექტორს. მხედველობაში მაქვს დეველოპერები, მხედველობაში მაქვს სამშენებლო სექტორი. შესაბამისად, ცვლილებების განხორციელება ალბათ აუცილებლად მოგვიწევს“, – განაცხადა კახა კალაძემ ჯერ კიდევ ივნისში.

კალაძის მიერ დასახელებული პრობლემები „საქსტატის“ მონაცემებითაც დადასტურდა, 2019 წლის მეორე კვარტალში მშენებლობის სექტორი 4.6%-ით შემცირდა. თავისთავად, ასეთი შემცირება შესაძლოა საგანგაშოდ არ ჩანდეს, თუმცა, თუ წინა წლის მონაცემებს ვნახავთ, მდგომარეობა დამაფიქრებელია. 2018 წელს საქართველოს უძრავი ქონების ბაზრის ღირებულებამ (დადებულმა ტრანზაქციებმა) რეკორდულ მოცულობას – 4,1 მლრდ ლარს მიაღწია. ეს კი 2017 წელთან შედარებით 31%-ით მეტი იყო. ასე რომ, სავალალო ტენდენცია აშკარაა.

სესხების შეზღუდვამ ტექნიკის მაღაზიებში პირველ სამ თვეში გაყიდვები დაახლოებით 50%-ით შეამცირა, რადგან განვადებები ძალიან ძნელად მტკიცდებოდა. ამის შემდეგ კი  მაღაზიებმა შიდა განვადებების შემოღება დაიწყეს და მდგომარეობა შედარებით გამოსწორდა. თუმცა, თვითონ რეგულაციის პრინციპი რჩება გაუგებარი – თუ ადამიანს ბანკიდან სესხის აღებას უზღუდავენ, რათა „ჭარბვალიანობა“ არ გაიზარდოს, რა სხვაობაა, როცა კონკრეტული მაღაზიის ვალი ექნება ადამიანს და შიდა განვადებით იყიდის ნივთს?

სესხის გაცემაზე დაწესებული შეზღუდვების წყალობით მნიშვნელოვნად შემცირდა სესხის გამცემი ორგანიზაციების რაოდენობა. 2019 წლის იანვრის მდგომარეობით, ქვეყანაში 65 მიკროსაფინანსო ორგანიზაცია იყო რეგისტრირებული, ხოლო 18 სექტემბრის მდგომარეობით მათი რიცხვი 52-ს შეადგენდა.

ყოფილი ონლაინ-სესხების კომპანია „ვივუს ჯი“, რომელიც მიკროსაფინანსო ორგანიზაციად გადაკეთდა, რთულ სიტუაციაში აღმოჩნდა:

„შევამცირეთ თანამშრომლები და დავხურეთ ფილიალები, დაპაუზებულები ვართ“, – განაცხადა მიკროსაფინანსო ორგანიზაცია 4 Finance-ის (vivus.ge) დირექტორმა ლაშა ერედელმა BM.GE-სთან საუბრისას. მისი თქმით, ეს ეროვნული ბანკის მიერ შემოღებული რეგულაციების „დამსახურებაა“, რომელმაც ბაზარი საკმაოდ მძიმე მარწუხებში მოაქცია. მისი თქმით, მიკროსაფინანსო ორგანიზაციებისთვის 2019 წლის პირველი ნახევარი ზარალიანი იყო.

ამ სიტუაციაში მიკროსაფინანსო ორგანიზაციების შემცირება, გარდა იმისა, რომ ბაზარზე სესხის გამცემი სუბიექტების კონკურენციას და მომხმარებლისთვის არჩევანს ამცირებს, ნიშნავს ასევე, რომ იზრდება უმუშევართა რაოდენობაც მათ ხარჯზე, ვინც ამ ორგანიზაციებში იყო დასაქმებული.

ბიზნესმენი ლაშა პაპაშვილი საბანკო რეგულაციებს უარყოფითად აფასებს და მიაჩნია, რომ არასწორი გადაწყვეტილებები, რომელსაც რეგულატორი იღებს, მოგვიანებით იჩენს თავს.

რეგულაციების შერბილების მომხრეა საქართველოს სავაჭრო–სამრეწველო პალატის პრეზიდენტი გიორგი პერტაიაც. 

„ფაქტია, რომ საბანკო რეგულაციებმა შეამცირა ეკონომიკა. პირდაპირ ვილაპარაკოთ - საბანკო რეგულაციები აუცილებლად უნდა შერბილდეს“, – აცხადებს პერტაია. მისი თქმით, გასაგებია რატომაც შემოიღეს რეგულაციები, თუმცა ახლა უნდა შერბილდეს, რადგან „სხვანაირად გაგვიჭირდება ეკონომიკის ზრდა“.

ასეა თუ ისე, საბოლოოდ ისევ სებ-მა გადაასხა ცივი წყალი რეგულაციების შესაძლო შერბილების იმედს. ეროვნული ბანკის ვიცე-პრეზიდენტმა არჩილ მესტვირიშვილმა განაცხადა, რომ გადახედვა კი მიმდინარეობს, მაგრამ შერბილება ან პრინციპის შეცვლა გამორიცხულია.

„რაც შეეხება რეგულაციებს, ეს ცოცხალი დოკუმენტია და მუდმივად ხდება შეფასება, თუ რამდენად კარგად მუშაობს და ხომ არ სჭირდება გადახედვა. რაც შეეხება გადახედვის პრინციპებს, ჩვენ ამაზე ვმუშაობთ, მაგრამ ეს არ ნიშნავს, რომ პრინციპები შეიცვლება. ჩვენ საუბარი გვაქვს გამარტივებაზე და არა შერბილებაზე“, – განაცხადა მესტვირიშვილმა.

მისი თქმით, კომუნიკაცია აქვთ კერძო სექტორთან და მუშაობენ, რომ რეგულაციები უფრო მოქნილი გახდეს. შედეგად კი ბანკებსა და მიკროსაფინანსო ორგანიზაციებს ამ რეგულირების პირობებში მეტი ლავირების საშუალება მიეცემათ.

და, მაინც, ყველაზე საინტერესო ალბათ ისევ სებ-ის პრეზიდენტის შეფასებაა საბანკო რეგულაციების შესახებ:

„ტაქსიში ვზივარ. მძღოლი, ვანო მეუბნება - „ბატონო კობა, ღმერთი გაგახარებთ, ჭარბვალიანობაზე რომ ზრუნავთ. ისე ადვილად იძლეოდა სესხებს ყველა, მერე ხალხი ვერ იხდიდა და ერთი ადგილიდან მეორეში მიდიოდა და იქიდან იღებდა ფულს. კი გლანძღავენ ამის გამო, მაგრამ ეს და მეტი ხალხი კიდევ უფრო დიდ გაჭირვებას ააცილეთ“, – დაწერა ფეისბუქზე ეროვნული ბანკის პრეზიდენტმა 29 აპრილს.

თემურ იოსელიანი

 

269
ქართული ფული

ეროვნულმა ბანკმა რეფინანსირების განაკვეთი ისევ შეამცირა

50
(განახლებულია 17:28 05.08.2020)
მონეტარული პოლიტიკის კომიტეტმა  რეფინანსირების განაკვეთის 25 საბაზისო პუნქტით შემცირების გადაწყვეტილება მიიღო.

თბილისი, 5 აგვისტო – Sputnik. საქართველოს ეროვნული ბანკის მონეტარული პოლიტიკის კომიტეტმა რეფინანსირების განაკვეთის 8.25 % დან 8.0 % მდე შემცირების გადაწყვეტილება მიიღო, ნათქვამია საქართველოს ეროვნული ბანკის განცხადებაში.

რა უჯდება ეროვნულ ბანკს ეროვნული ვალუტის სტაბილურობა>>

ეროვნულმა ბანკმა მონეტარული პოლიტიკის შემსუბუქება მიმდინარე წლის აპრილიდან, გამკაცრების ხანგრძლივი პერიოდის შემდეგ დაიწყო. უწყებამ მონეტარული პოლიტიკის გამკაცრება კი 2019 წლის სექტემბრიდან, ეროვნული ვალუტის კურსის დაცემის შემდეგ ინფლაციაზე ზეწოლის განეიტრალების მიზნით დაიწყო. რეფინანსირების განაკვეთი სექტემბერ–დეკემბრის პერიოდში 6,5%-დან 9%-მდე გაიზარდა.

საქართველოში ინფლაციის მიზნობრივი მაჩვენებელი 3 პროცენტია. მაისში ინფლაციის დონემ 6,5% შეადგინა, ივნისში - 6.1%, ივლისში კი ინფლაციის მაჩვენებელმა შემცირება განაგრძო და 5.7 პროცენტი გახდა.

„ეროვნული ბანკის პროგნოზით, სხვა თანაბარ პირობებში, წლის მომდევნო პერიოდში ინფლაცია შემცირებას განაგრძობს, 2021 წლის პირველ ნახევარში მიზნობრივ დონეს ჩამოცდება და შემდგომ მას ქვემოდან დაუახლოვდება. ინფლაციის შემცირების დინამიკას სუსტი მოთხოვნა უზრუნველყოფს. კერძოდ, ეროვნული ბანკის განახლებული პროგნოზით, 2020 წელს ეკონომიკის 5–პროცენტიანი შემცირებაა მოსალოდნელი, რაც ინფლაციის პროგნოზზეც შემცირების მიმართულებით მოქმედებს“, - ნათქვამია ეროვნული ბანკის ვებგვერდზე.

რეფინანსირების განაკვეთი – პროცენტის ოდენობაა წლიური გაანგარიშებით, რომელსაც საკრედიტო ორგანიზაციები ეროვნულ ბანკს მათთვის გამოყოფილი კრედიტებისთვის უხდიან. რეფინანსირების განაკვეთი ეროვნული ბანკის ფულად-საკრედიტო პოლიტიკის ძირითადი ინსტრუმენტია და საფინანსო სექტორში საბაზრო განაკვეთების ორიენტირად არის მიჩნეული.

რა ელის ლარის კურსს: საქართველოს ეროვნული ბანკი რეზერვების გაყიდვას განაგრძობს>>

მონეტარული პოლიტიკის კომიტეტის შემდეგი სხდომა 2020 წლის 16 სექტემბერს ჩატარდება.

50
თემები:
საქართველოს ეკონომიკა
შატილი

შატილამდე მისასვლელი გზა უსაფრთხო და კომფორტული გახდება

45
(განახლებულია 16:17 05.08.2020)
საერთო ჯამში, შატილის მიმართულებით მიმდინარე 12 პროექტის ფარგლებში რეაბილიტაცია ჩაუტარდება გზის 86 კილომეტრ მონაკვეთსა და 15 ხიდს

თბილისი, 5 აგვისტო - Sputnik. შატილის მიმართულებით გზის რეაბილიტაციის სამუშაოები ინტენსიურ რეჟიმში მიმდინარეობს, ნათქვამია საავტომობილო გზების დეპარტამენტის მიერ გავრცელებულ განცხადებაში.

დეპარტამენტის ცნობით, მიუხედავად გეოლოგიური გამოწვევებისა, წელს შატილის მიმართულების გზაზე სამუშაოები ფაქტობრივად არ გაჩერებულა.

„პროექტის მიზანია, შატილამდე მისასვლელ გზაზე ავტოტრანსპორტის გადაადგილება გახდეს ბევრად უსაფრთხო, ვინაიდან არსებული გზა არის გრუნტის, ხშირად ვითარდება მეწყრული პროცესები და ორი ავტომანქანისთვის გვერდის ავლა პრაქტიკულად შეუძლებელია“, -აღნიშნულია განცხადებაში.

უწყების ინფორმაციით, გზის რეაბილიტაციის დასრულების შემდეგ შატილის მიმართულებით გზის პარამეტრები გაუმჯობესდება, გაფართოვდება გზის სავალი ნაწილი, მოეწყობა ბაგიროვანი ზღუდარები და გადაადგილება გაცილებით უსაფრთხო და კომფორტული გახდება.

გზის რეაბილიტაციის ერთი მონაკვეთი, „მთის გზების“ პროექტის ფარგლებში, სნო-ჯუთა- როშკა-შატილი-ომალო-ხადორის ხეობა-ბაწარა-ახმეტას   საავტომობილო გზის მშენებლობის შემადგენელი ნაწილია.

„მთის გზების“ პროექტის პარალელურად, გზის რეაბილიტაციის ორი  პროექტი მსოფლიო ბანკის, სამი პროექტი კი  სახელმწიფო ბიუჯეტის დაფინანსებით მიმდინარეობს.

ყველაზე პრობლემური – თუშეთის გზა ორ წელიწადში უსაფრთხო გახდება>>

საერთო ჯამში, შატილის მიმართულებით მიმდინარე 12 პროექტის ფარგლებში რეაბილიტაცია ჩაუტარდება  86 კმ. გზასა და 15 ხიდს. აღნიშნული პროექტების განხორციელებაზე  59 მლნ ლარზე მეტი დაიხარჯება.

შატილი შუასაუკუნეების ციხე-სოფელია, რომელიც 60–ზე მეტ კოშკს აერთიანებს, მდებარეობს ზღვის დონიდან 1400 მეტრზე. 2007 წლიდან შატილის კოშკები იუნესკოს მსოფლიო კულტურული მემკვიდრეობის საცდელ ნუსხაშია შეტანილი.

45
თემები:
საქართველოს ეკონომიკა
სასამართლოს შენობა

ექიმები ექიმების მხარდასაჭერად: აქცია თბილისის საქალაქო სასამართლოსთან

0
(განახლებულია 19:52 05.08.2020)
დაკავებულ ექიმებს, რომელთაც ბრალად ედებათ უკანონო საექიმო საქმიანობა, მხარდაჭერა გამოუცხადეს არამარტო ქართველმა, არამედ უცხოელმა ექიმებმაც.

თბილისი, 5 აგვისტო  — Sputnik.  ქართველმა ექიმებმა თბილისის ცენტრალური საავადმყოფოს დირექტორისა და ექიმების მხარდამჭერი აქცია თბილისის საქალაქო სასამართლოსთან გამართეს. 

ექიმ ვახტანგ ყიფიანს ბრალად ედება უკანონო საექიმო საქმიანობა, რომელსაც ჯანმრთელობის დაზიანება მოჰყვა. მას 6–დან 9 წლამდე ვადით პატიმრობა ემუქრება.

საავადმყოფოს დირექტორს ბრალად ედება გულგრილობა, მას ორიდან ხუთ წლამდე ვადით პატიმრობა ემუქრება.

საქმის კიდევ ერთ ფიგურანტს, ანესთეზიოლოგ მაგდა ხოჭოლავას უკანონო საექიმო საქმიანობისთვის ბრალი დაუსწრებლად წარედგინა, იგი ამ დროისთვის ცხოვრობს და მუშაობს იტალიაში. მასაც ცხრა წლამდე ვადით პატიმრობა ემუქრება.

აქციაში მონაწილეობა მიიღო ექიმმა ვაჟა გაფრინდაშვილმა, რომელიც ფართო საზოგადოებისთვის ცნობილია არამარტო პროფესიული საქმიანობიდან გამომდინარე, არამედ როგორც პიროვნება, რომელიც ცხინვალში ტყვედ იმყოფებოდა და მსოფლიო საზოგადოების ზეწოლის შედეგად გათავისუფლდა. იგი, ისევე როგორც ბრალდებულთა სხვა კოლეგები, დარწმუნებულია, რომ დაკავებულებს საექიმო საქმიანობის ლიცენზია ჰქონდათ, მაგრამ შეიძლება მათ მოქმედების ვადა ჰქონდათ გასული.

როგორც გაფრინდაშვილმა აღნიშნა, მისთვის გაუგებარია კოლეგების დაკავების მიზეზები.

 „აღნიშნულ საქმეზე 2019 წლის მარტში ჯანდაცვის სამინისტროს შესაბამისმა კომისიამ დადგენილება გამოიტანა, რომელიც ჩემი აზრით, არის აბსოლუტურად არასწორი, რადგან ერთ–ერთი მთავარი მიზეზი, რასაც ედავებიან ისაა, რომ ერთ-ერთ ბრალდებულს არ ჰქონდა ლიცენზია ტრავმატოლოგ-ორთოპედიაში და ისე ჩაერია ოპერაციაში. აქ ჩაერია რადიოლოგი და არა ტრავმატოლოგი. ჩემი კოლეგები, რომლებიც მთელი ამ პერიოდის განმავლობაში თანამშრომლობდნენ, არ დამალვიან გამოძიებას, რადგან ისინი თავს დამნაშავეებად არ მიიჩნევენ. კვარიათში, ბავშვებთან ერთად, 22:00 საათზე დაკავება არის წარმოუდგენელი“, – განაცხადა გაფრინდაშვილმა. 

რაც შეეხება ანესთეზიოლოგ მაგდა ხოჭოლავას, გაფრინდაშვილის თქმით,   მას 30 წელია იცნობს და ის არის რეანიმატოლოგ-ანესთეზიოლოგი, რომელიც მუშაობდა რესპუბლიკურ საავადმყოფოში და ახლა იტალიის მოქალაქეა.

დღეს Facebook–ზე ანესთეზიოლოგ მაგდა ხოჭოლავას განცხადება გავრცელდა, რომელშიც იგი უარყოფს მისთვის წარდგენილ ბრალს და აცხადებს, რომ ბოლო 15 წელია ცხოვრობს და მუშაობს იტალიაში, ამიტომაც მედიაში გავრცელებული ფორმულირება იმის შესახებ, რომ იგი ქვეყნიდან გაიქცა, აბსოლუტურად არასწორია.

 „პირველ რიგში, ხაზგასმით მინდა აღვნიშნო, რომ არ ვეთანხმები პროკურატურის მიერ წარდგენილ ბრალს და იმედი მაქვს, მალე სასამართლოს მიერ მიღებული იქნება ობიექტური და სამართლიანი გადაწყვეტილება. ასევე, მინდა გამოვეხმაურო ტელევიზიით არასწორად გავრცელებულ სრულიად უსაფუძვლო და აბსურდულ ბრალდებას იმის თაობაზე, რომ თითქოს გამოძიებისგან თავის არიდების მიზნით, განზრახ დავტოვე ქვეყანა და „გავიქეცი“ იტალიაში. უკვე 25 წელზე მეტია აქტიურად ვეწევი ლიცენზირებულ, დამოუკიდებელ საექიმო საქმიანობას ანესთეზია-რეანიმაციის მიმართულებით და 10 წელი შესაბამისი ლიცენზიის ფარგლებში, ვმუშაობდი ანესთეზიოლოგად საქართველოში და ბოლო 15 წელიწადია ვცხოვრობ და ვმოღვაწეობ იტალიაში ბერგამოს სააუნივერსიტეტო კლინიკაში, რამაც განაპირობა ჩემი ქვეყანაში არ ყოფნა“, – დაწერა ხოჭოლავამ.

ქართველი კოლეგების მხარდასაჭერად საკუთარი აზრი დააფიქსირა ბერგამოს საუნივერსიტეტო კლინიკის იტალიელმა ექიმმა რობერტო აგაციმ.

 „მინდა დავადასტურო, რომ ჩვენ, იტალიელი ექიმები, 2016–2018 წლებში წარმატებით ვთანამშრომლობდით ჩვენს პარტნიორებთან – ქართველ ექიმებთან პაციენტების განკურნების პროცესში. ეს პროცედურები ემყარებოდა მინიმალურ ინვაზიურ, თანამდეროვე სამედიცინო ჩარევებს სხვადასხვა დაავადების სამკურნალოდ“, – დაწერა ექიმმა.

როგორც მან აღნიშნა, იგი კმაყოფილი დარჩა ქართველი ექიმების საქმიანობით, მოტივირებულობითა და მაღალი პროფესიონალიზმით.

მან ქართულ მასმედიაში გავრცელებულ ინფორმაციას დეზინფორმაცია უწოდა და იმედი გამოთქვა, რომ საბოლოოდ სიმართლე იზეიმებს.

კლინიკის Facebook–გვერდზე ასევე გამოქვეყნებულია იმ სამედიცინო დაწესებულებების სია, რომლებიც ღიად გამოხატავენ მხარდაჭერას დაკავებული ექიმებისადმი.

 

0