ელექტრომობილი Changan Automobile

ქართული ელექტრომობილები ტესტირებას უნგრეთში გაივლიან

152
(განახლებულია 13:42 06.09.2019)
ასეთი წინადადებით გამოვიდა თავად უნგრეთის პრეზიდენტი, რომელიც თბილისში ვიზიტით იმყოფება.

თბილისი, 6 სექტემბერი — Sputnik. უნგრეთის პრეზიდენტმა იანოშ ადერმა გამოთქვა ინიციატივა – საქართველოში წარმოებული ელექტრომობილების ტესტირება მის ქვეყანაში ჩატარდეს.

საქართველომ ევროპის ქვეყნებს გაუსწრო - ელექტრომობილების ქარხანა ქუთაისში გაიხსნება >>

იანოშ ადერი თბილისში ორდღიანი ოფიციალური ვიზიტით ოთხშაბათს ეწვია. ვიზიტის ოფიციალური ნაწილი ხუთშაბათს დაიწყო. სტუმარს პრეზიდენტის რეზიდენციაში სახელმწიფოს მეთაურმა სალომე ზურაბიშვილმა უმასპინძლა. მხარეებმა ორი ქვეყნის პოლიტიკური, ეკონომიკური და კულტურული თანამშრომლობის საკვანძო საკითხები განიხილეს, შემდეგ კი პრეზიდენტები ერთობლივ პრესკონფერენციაზე სიტყვით გამოვიდნენ.

„რამდენადაც ჩემთვის ცნობილია, საქართველო ჩინეთის დახმარებით ელექტრომობილების წარმოებას გეგმავს. იყო დრო, როდესაც უნგრეთი არ უშვებდა ავტომობილებს, დღეს კი უნგრეთში წარმოდგენილია ისეთი მსოფლიო ფირმები, როგორიცაა Suzuki, Mercedes, Opel, Audi. აქ კი საუბარია ინოვაციურ ელექტრონულ ავტომობილზე, რაც ძალიან მნიშვნელოვანია ჩვენი მომავლისა და ეკონომიკისთვის. და ჩვენ გვინდა, რომ აქ წარმოებულმა ავტომობილებმა ტესტირება უნგრეთში გაიარონ. ჩვენ ამის შესაძლებლობა გაგვაჩნია“, – განაცხადა ადერმა.

რეგიონში ელექტრომობილების მწარმოებელ პირველ ქარხანას ქუთაისში ააშენებენ, შესაბამისი მემორანდუმი ქართულმა ჰოლდინგმა Igroup-მა და ჩინურმა კონსორციუმმა Changan Automobile-მა მაისში გააფორმეს.

მოსალოდნელია, რომ ქარხანა ყოველწლიურად 40 ათას ელექტრომობილს გამოუშვებს, მათი ნახევარი შიდა ბაზარზე დარჩება, მეორე ნახევარი კი ექსპორტზე ევროკავშირის ქვეყნებში გაიგზავნება. საწარმოში 300-მდე ადგილობრივი დასაქმდება.

ინდუსტრიული კომპლექსი ქუთაისში 100 ჰექტარ ფართობზე განთავსდება. აღნიშნულ ტერიტორიაზე ასევე განთავსდება ეკოპროდუქციის მწარმოებელი საწარმოები – მზის პანელების და სხვა მაღალტექნოლოგიური პროდუქტების.

ტურიზმის განვითარება

საქართველოს და უნგრეთის პრეზიდენტების შეხვედრაზე საუბარი იყო ასევე ტურიზმის განვითარებაზე და ამ კუთხით აღინიშნა უნგრული დაბალბიუჯეტიანი ავიაკომპანია Wizz Air-ის წარმატებული საქმიანობა. ავიაკომპანია ქუთაისის აეროპორტიდან ევროპის 20-ზე მეტ ქვეყანაში პირდაპირ რეისებს ახორციელებს.

ჰამბურგი, ვენეცია, ნიცა – ფრენები ქუთაისის აეროპორტიდან 12 ახალი მიმართულებით შესრულდება >>

„ვიცით, რომ Wizz Air-მა სამი-ოთხი წლის წინ დაიწყო მიმოსვლა საქართველო-უნგრეთს შორის, რაც ძალიან დიდი წვლილია ტურიზმის თვალსაზრისით. იმედი მაქვს, მომავალში უნგრეთის მოსახლეობა დაინტერესებული იქნება საქართველოში ჩამოსვლით, მისი კულტურით, ღვინითა და გასტრონომიით“, – აღნიშნა ადერმა.

კულტურის ხიდი

პრესკონფერენციაზე გამოსვლისას უნგრეთის პრეზიდენტმა ასევე აღნიშნა ქვეყნების თანამშრომლობის მნიშვნელობა კულტურის სფეროში.

„გუშინ მქონდა შესაძლებლობა, მომესმინა ქართველი მომღერლების მიერ შესრულებული სიმღერებისთვის, რამაც ძალიან დიდი ეფექტი მოახდინა ჩემზე. შევპირდი საქართველოს პრეზიდენტს, რომ ყველაფერს გავაკეთებ, რათა იმ ფესტივალებზე, რომლებიც უნგრეთში ტარდება, ჩამოვიდნენ და მონაწილეობა მიიღონ ქართველმა მომღერლებმა. ეს აქამდეც ხდებოდა, თუმცა მინდა გაფართოვდეს“, – აღნიშნა ადერმა.

მხარეები შეხვედრაზე ასევე შეეხნენ თერმული წყლების გამოყენების საკითხს.

„უნგრეთს უდიდესი გამოცდილება აქვს ამ კუთხით. თუ ვითანამშრომლებთ, შეგვიძლია დიდ წარმატებებს მივაღწიოთ“, – ხაზგასმით აღნიშნა უნგრეთის პრეზიდენტმა.

უნგრეთის პრეზიდენტი იანოშ ადერი საქართველოს ეწვია თავის მეუღლესთან ანიტა ჰერცეგთან ერთად. მათ ქვეყანა 5 სექტემბერს საღამოს დატოვეს.

ორი ქვეყნის ურთიერთობები

საქართველომ და უნგრეთმა დიპლომატიური ურთიერთობები 1992 წლის 14 მაისს დაამყარეს. ქვეყნები თანამშრომლობენ ეკონომიკის, ვაჭრობის, ტრანსპორტის, ტურიზმის, განათლებისა და მეცნიერების კუთხით.

საქართველოსა და უნგრეთს შორის ურთიერთობების გაღრმავების მიზნით 2013 წლიდან ფუნქციონირებს სახელმწიფოთაშორისი კომისია ეკონომიკური თანამშრომლობის საკითხებში.

152
თემები:
საქართველოს საგარეო პოლიტიკა (232)
კაფე

შემოსავლიანი ვიზიტორები საზღვარს უპრობლემოდ გადმოკვეთენ: მთავრობის ახალი ინიციატივა

37
(განახლებულია 15:23 16.07.2020)
მთავრობა გამონაკლისის წესით დაუშვებს ყველა ქვეყნის მოქალაქის საზღვრის კვეთას, რომელსაც საქართველოს ტერიტორიაზე სულ მცირე, ექვსი თვით ცხოვრების უფლება ექნება.

თბილისი, 16 ივლისი — Sputnik. უცხოეთის მოქალაქეებს, რომლებიც თვითდასაქმებული არიან, ან შეუძლიათ საკუთარი ბიზნესის მსოფლიოს ნებისმიერი წერტილიდან მართვა, შესაძლებლობა ეძლევათ საქართველოში განსაკუთრებული რეჟიმით შემოვიდნენ, იუწყება საქართველოს ეკნომიკისა და მდგრადი განვითარების სამინისტრო.

შესაბამისი გადაწყვეტილება, ქვეყნის ეტაპობრივი გახსნის სტრატეგიის ფარგლებში, მთავრობის საკოორდინაციო საბჭომ მიიღო. პროექტი საქართველოს პრემიერ-მინისტრის ინიციატივითა და დავალებით, ეკონომიკისა და მდგრადი განვითარების სამინისტრომ, ტურიზმის ეროვნულ ადმინისტრაციასთან ერთად მოამზადა.

პროექტი გათვლილია იმ უცხოელებზე, რომლებიც არიან ფრილანსერები (თვითდასაქმებულები), მუშაობენ დისტანციურად, ან შეუძლიათ საკუთარი ბიზნესი მსოფლიოს ნებისმიერი წერტილიდან მართონ.

„ჩვენ ამ მიზნობრივ აუდიტორიას ვიწვევთ საქართველოში და სპეციალური პირობებით ჩვენს ქვეყანაში ცხოვრებას ვთავაზობთ. საქართველოს მსოფლიოში ეპიდემიოლოგიური თვალსაზრისით უსაფრთხო ქვეყნის იმიჯი აქვს და ჩვენ ამ შესაძლებლობის გამოყენება გვინდა – საუბარია საზღვრის გახსნაზე ისე, რომ ერთი მხრივ, მაქსიმალურად დავიცვათ ჩვენი ქვეყნის მოქალაქეთა ჯანმრთელობა, მაგრამ, მეორე მხრივ, საქართველოში შემოვუშვათ უკლებლივ ყველა ქვეყნის მოქალაქე, რომელიც ზემოხსენებულ კატეგორიას მიეკუთვნება", – განაცხადა ნათია თურნავამ.

პროექტის თანახმად, მთავრობა გამონაკლისის წესით დაუშვებს ყველა ქვეყნის მოქალაქის საზღვრის კვეთას, რომელსაც საქართველოს ტერიტორიაზე სულ მცირე, ექვსი თვით ცხოვრების უფლება ექნება.

საქართველოში გრძელვადიანი პერიოდით ყოფნის მსურველებისთვის შემუშავდა განაცხადების მიღების ელექტრონული პლატფორმა.

გრძელვადიანი პერიოდით ვიზიტორის ქვეყანაში შემოსვლისთვის სავალდებულოა სამივე კატეგორიის მოგზაურმა შეავსოს სავალდებულო აპლიკაცია და მიიღოს ქვეყნის საზღვრის კვეთისთვის საჭირო წინასწარი დასტური. განცხადებაში პირები წარმოადგენენ პირად ინფორმაციას, ცნობას დამსაქმებლის ან კონტრაქტორის შესახებ, წინასწარ დასტურს სავალდებულო 14-დღიანი კარანტინის გავლის თაობაზე და ა.შ.

ე.წ. გრძელვადიანი ვიზიტორები 14-დღიან კარანტინს კომერციული ტარიფით, საკუთარი ხარჯით გაივლიან, ასევე განიხილება ექვსთვიანი სამოგზაურო დაზღვევის ქონა.

თურნავას თქმით, ინიციატივის წყალობით, საქართველოში ფინანსურად უფრო შეძლებული ვიზიტორები შეძლებენ ჩამოსვლას.

„ეს ადამიანები საქართველოში დიდი ხნით იცხოვრებენ, რაც იმას ნიშნავს, რომ ჩვენ დავეხმარებით ბინის გაქირავების ბიზნესსაც, რომელიც პანდემიამ ძალიან დააზარალა, ასევე სასტუმროების სექტორს კარანტინის დროს, სარესტორნო ბიზნესს და სხვ. პროექტი ხელს შეუწყობს ასევე ტურისტულ კომპანიებს, ტრანსპორტისა და გიდების სერვისების აქტიურად გამოყენებას, რადგან გრძელვადიანი ვიზიტორები ქვეყანაში მხარჯველუნარიანი ტურისტები იქნებიან", – განაცხადა თურნავამ.

პროექტი საჯარო განხილვაზე უახლოეს დღეებში გავა, რათა მიზნობრივი ჯგუფების წარმომადგენლებს ჰქონდეთ საშუალება, დაიწყონ აპლიკაციების შევსება, იმოგზაურონ საქართველოში და საკუთარი ბიზნეს-საქმიანობა აქედან აწარმოონ.

37
თემები:
COVID-19 საქართველოში
გიორგი გახარია

გახარია: სახელმწიფო გააგრძელებს შემოსავლის გარეშე დარჩენილი მოქალაქეების დახმარებას

91
(განახლებულია 18:42 16.07.2020)
პრემიერი, მთლიანობაში, კმაყოფილია იმით, თუ როგორ უმკლავდება ქვეყნის ეკონომიკა კორონავირუსის პანდემიის გამო შექმნილ ვითარებას და როგორ გამოდის კრიზისიდან.

თბილისი, 15 ივლისი – Sputnik. მთავრობა მოიზიდავს საჭირო ფინანსურ რესურსებს, რათა კიდევ ერთხელ დაეხმაროს მოქალაქეებს, რომლებიც კორონავირუსის პანდემიის გამო რთულ ფინანსურ მდგომარეობაში აღმოჩნდნენ, განაცხადა საქართველოს პრემიერ-მინისტრმა გიორგი გახარიამ მთავრობის სხდომაზე ხუთშაბათს.

„რქაწითელი" და „კახური მწვანე": მთავრობა რთვლის სუბსიდირებას გეგმავს>>

სახელმწიფოსგან სოციალური დახმარების პაკეტებით ამ დროისთვის უკვე ისარგებლა 721 ათასმა მოქალაქემ. ფულად კომპენსაციებს, მათ შორის, იღებენ თვითდასაქმებულები, ასევე ის დასაქმებულები, რომლებმაც შემოსავალი ან სამუშაო პანდემიის დროს დაკარგეს. გარდა ამისა, ერთჯერად დახმარებას იღებენ ის მოქალაქეები, რომლებიც სხვადასხვა ქვეყანაში სეზონურად მუშაობდნენ.

„მიუხედავად იმ შედარებით პოზიტიური ტენდენციისა, რომელსაც დღეს ქართული ეკონომიკა აჩვენებს, რა თქმა უნდა, პანდემიის შოკის ზემოქმედება ჩვენს ეკონომიკაზე მინიმუმ წლის ბოლომდე გაგრძელდება. ამიტომ ჩვენ შეძლებისდაგვარად კიდევ ერთხელ უნდა გადავამოწმოთ ყველა სოციალური ჯგუფი და სადაც განსაკუთრებული აუცილებლობა არსებობს, მოვიზიდოთ რესურსები იმისთვის, რომ ჩვენს მოქალაქეებს მივეხმაროთ“, – განაცხადა გახარიამ.

პრემიერმა ფინანსთა სამინისტროს დაავალა, გადახედოს იმ მოქალაქეების სიას, რომლებსაც სახელმწიფო სოციალურ მიზნობრივ დახმარებას უწევს და იფიქროს, რისი გაკეთება შეიძლება დამატებით მათთვის.

ამასთან, პრემიერმა აღნიშნა, რომ სოფლის მეურნეობა დინამიკურად ვითარდება. მისი თქმით, სახელმწიფოს დახმარების პროგრამით უკვე 70 ათასზე მეტმა ფერმერმა ისარგებლა. პრემიერმა სოფლის მეურნეობის მინისტრს რთვლისა და თხილის მოსავლის აღების სეზონის მოახლოებასთან დაკავშირებით ამ სფეროებისთვის განსაკუთრებული ყურადღების მიქცევა დაავალა.

პრემიერმა ასევე განაცხადა, რომ გუშინ თელავისა და ყვარლის რაიონებში სეტყვისგან რამდენიმე სოფელი დაზარალდა და პირობა დადო, რომ მთავრობა ფერმერებზე იზრუნებს.

ყველაფერი არც ისე ცუდადაა, როგორც ველოდებოდით

მიუხედავად ნეგატიური მოლოდინებისა, საქართველოს ეკონომიკაში გარკვეული პოზიტიური ძვრები შეინიშნება, ასევე აშკარად იზრდება აქტიურობა ტურისტული სექტორის მიღმა. დადებითი მაჩვენებლებია ფინანსურ სექტორში როგორც საგადასახადო შემოსავლების, ისე მიმდინარე ანგარიშის ბალანსის თვალსაზრისით. ეს საკითხები გამოყო პრემიერმა.

„უნდა გავითვალისწინოთ ისიც, რომ ექსპორტში, მიუხედავად ჩვენი პესიმისტური საპროგნოზო ციფრებისა, თუ არ ჩავთვლით რეექსპორტს, რაც პირველ რიგში აჩვენებს ეკონომიკის მდგომარეობას რეგიონში, ექსპორტის კლება არის დაახლოებით 6-7 პროცენტი, ჩვენი გათვლები უფრო პესიმისტური იყო“, – განაცხადა გახარიამ.

პრემიერის თქმით, რამდენიმე დარგში, განსაკუთრებით სახელმწიფო მხარდაჭერის პროგრამის გამოცხადების შემდეგ, აშკარად გაიზარდა აქტიურობა. მაგალითად, სამშენებლო სექტორში ბოლო თვეებში მნიშვნელოვნად გაიზარდა უძრავი ქონების გაყიდვები.

როგორც გახარიამ აღნიშნა, ეს იმის შედეგია, რომ ქვეყანამ მოქალაქეებთან ერთად მოახერხა და კიდევ ახერხებს კორონავირუსის ეფექტურ მართვას და ეს „არის გასაღები შემდგომი ეკონომიკური სწრაფი და ეფექტური აღდგენის“.

91
თემები:
საქართველოს ეკონომიკა
პარიზი

ოჰ, ეს უცნაური პარიზი! - რა მოთხოვნებს უყენებს საფრანგეთი საქართველოს მოქალაქეებს

0
(განახლებულია 16:02 16.07.2020)
ევროკავშირმა საქართველო ევროკავშირის არაწევრი 15 ქვეყნის სიაში შეიყვანა, რომლებისთვისაც 1 ივლისიდან საზღვრები გახსნა.

თბილისი, 16 ივლისი — Sputnik. საფრანგეთის საელჩომ რიგი მოთხოვნები გამოაქვეყნა, რომელთაც საქართველოს მოქალაქეებს საფრანგეთში შესვლისას წარუდგენენ.

როგორც საელჩოს განცხადებაშია ნათქვამია, 2 ივლისიდან საფრანგეთის კონტინენტურ ტერიტორიაზე შესვლისთვის აუცილებელია იყოთ ამ ქვეყნის ან ევროკავშირის სხვა რომელიმე ქვეყნის მოქალაქე; ან საფრანგეთის ან ევროკავშირის სხვა რომელიმე ქვეყნის ბინადრობის ბარათის მფლობელი უცხო ქვეყნის მოქალაქე; ან D ტიპის საფრანგეთის ვიზის მფლობელი.

თუმცა, თუ თქვენ ხართ საქართველოს მოქალაქე, საფრანგეთის საზღვრის გადაკვეთისას აუცილებლად უნდა გქონდეთ ბიომეტრული პასპორტი და შემდეგი დოკუმენტები: გამგზავრების და უკან დაბრუნების ბილეთი, დადასტურებული სასტუმროს ჯავშანი, მოწვევის წერილი ან ოფიციალური მოწვევა ; საფრანგეთში ყოფნის მთელ პერიოდზე საკმარისი ფინანსური რესურსის დამადასტურებელი საბუთი, ნაღდი ფულით ან საბანკო ანგარიშზე; სამედიცინო დაზღვევა ქვეყანაში ყოფნის მთელ პერიოდზე გათვლილი.

საფრანგეთში სტუმრობა შეუძლია შენგენის ვიზის მფლობელ ნებისმიერ პირს.

საელჩო ასევე იუწყება, რომ თუ საფრანგეთში ბინადრობის უფლების დოკუმენტს მოქმედების ვადა 2020 წლის 16 მარტსა და 15 ივნისს შორის პერიოდში ამოეწურა, იგი 6 თვით ავტომატურად გახანგრძლივდება.

ევროკავშირმა საქართველო ევროკავშირის არაწევრი 15 ქვეყნის სიაში შეიყვანა, რომლებისთვისაც 1 ივლისიდან საზღვრები გახსნა. საქართველოს მოქალაქეებისთვის საზღვრები გახსნეს შვეიცარიამ, უნგრეთმა, გერმანიამ, ლატვიამ, საფრანგეთმა, ესპანეთმა, ნიდერლანდებმა, იტალიამ, მონტენეგრომ და სხვ.

თავის მხრივ, საქართველომ ზოგიერთი ქვეყნის მოქალაქეებისთვის საზღვრები უპირობოდ გახსნა. ხუთი ქვეყნის – გერმანიის, საფრანგეთის, ლატვიის, ლიეტუვასა და ესტონეთის მოქალაქეებს საქართველოში ჩამოსვლა ყოველგვარი წინააღმდეგობის გარეშე შეუძლიათ.

0
თემები:
COVID-19-ის პანდემია მსოფლიოში