ქართული ბიზნეს-ცენტრის გახსნა ჩინეთში

ინვესტორების ძიებაში: საქართველოს საპარტნიორო ფონდმა ჩინეთში მემორანდუმი გააფორმა

68
(განახლებულია 20:21 29.08.2019)
საქართველო ერთადერთი ქვეყანაა რეგიონში, რომელმაც ჩინეთთან თავისუფალი ვაჭრობის შესახებ შეთანხმება გააფორმა.

თბილისი, 29 აგვისტო — Sputnik. „საქართველოს საპარტნიორო ფონდმა“ ჩინეთის დელეგაციასთან თანამშრომლობის მემორანდუმი გააფორმა, ნათქვამია ორგანიზაციის ვებ-გვერდზე გამოქვეყნებულ განცხადებაში.

საპარტნიორო ფონდის ინფორმაციით, დელეგაციაში გუანტუნის პროვინციის ქალაქ გუანჯოუს ტუნგუანის ხელისუფლების, საბაჟო სახლის და ასევე ფინანსური ბიუროს ხელმძღვანელი პირები შედიან.

„აქტიურად ვმუშაობთ ჩვენ პარტნიორებთან, თუმცა ჩინეთში ერთობლივი ბიზნეს-პროექტების მიმართულებით სერიოზული ნაბიჯები გვაქვს გადასადგმელი", – განაცხადა საპარტნიორო ფონდის აღმასრულებელმა დირექტორმა, საქართველოსა და ჩინეთს შორის მთავრობათაშორისი კომისიის თავმჯდომარემ დავით საგანელიძემ.

შეხვედრაზე მხარეებმა განიხილეს სამომავლო თანამშრომლობის დეტალები, ასევე პოტენციური საინვესტიციო პროექტები და ქვეყნებს შორის სავაჭრო ბრუნვის განვითარების პერსპექტივები. ჩინეთის დელეგაციამ ხაზი გაუსვა საქართველოს, როგორც ევროპასთან დამაკავშირებელი სავაჭრო დერეფნის დიდ მნიშვნელობას.

„საქართველოს საინვესტიციო პოტენციალი პერსპექტიულია. ვთვლით, რომ თქვენი ქვეყანა ევროპის ბაზრის გასაღებია და ამ ფაქტს პოზიტიურად ვაფასებთ. საპარტნიორო ფონდი ერთობლივი პროექტების განსახორციელებლად მნიშვნელოვანი პარტნიორი იქნება, ამიტომ კონკრეტულ საინვესტიციო წინადადებებს ვამზადებთ", – აღნიშნა შეხვედრაზე ჩინეთის ქალაქ გუანჯოუს ტუნგუანის ზონის მთავრობის საგამოფენო კომიტეტის გენერალურმა მდივანმა.

თბილისი და გუანჯოუ თანამშრომლობის განვითარებაზე შეთანხმდნენ>>

საგანელიძემ გუანჯოუში საქართველოდან ექსპორტის ზრდის ხელშესაწყობად ქართული სავაჭრო სახლის გახსნასთან დაკავშირებულ საკითხებზე გაამახვილა ყურადღება. ქართული ბიზნეს-სახლი გუანჯოუში 2019 წლის იანვარში გაიხსნა. აქ ქართული პროდუქციის ფართო ასორტიმენტია წარმოდგენილი.

2017 წლის სექტემბრიდან გუანჯოუში მუშაობს ასევე საქართველოს სავაჭრო-სამრეწველო პალატის სპეციალური ოფისი. მისი საქმიანობა მიმართულია საქართველოსა და ჩინეთს შორის ორმხრივი სავაჭრო ურთიერთობის განვითარებისკენ. ოფისი ქართველ მეწარმეებს ეხმარება ადგილობრივ ბიზნესთან საქმიანი ურთიერთობის მოგვარებაში და მართავს კონსულტაციებს.

შეხვედრაზე დელეგაციის ხელმძღვანელმა ქართველი მეწარმეები მიიწვია საპარტნიორო ფონდის მიერ ორგანიზებულ საერთაშორისო გამოფენაზე, რომელიც 2020 წლის 16-19 აპრილს გაიმართება.

საქართველომ და ჩინეთმა დიპლომატიური ურთიერთობა 1992 წელს დაამყარეს. დღეისათვის ჩინეთი საქართველოს ერთ-ერთი მთავარი სავაჭრო პარტნიორია. 2018 წლის იანვარში მხარეებმა ხელი მოაწერეს თავისუფალი ვაჭრობის შესახებ შეთანხმებას.

ჩინეთის მხარდაჭერით საქართველოში ხორციელდება რამდენიმე პროექტი, მათ შორის, ქუთაისში ელექტრომობილების ქარხნის მშენებლობა. საქართველოს სამშენებლო, ენერგეტიკის, ინფრასტრუქტურისა და გზების მშენებლობის სფეროებში დაახლოებით 25 ჩინური კომპანია მუშაობს.

ჩინეთში პირველი ქართული ბიზნეს–სახლი გაიხსნა>>

2018 წელს საქართველო-ჩინეთის სავაჭრო ბრუნვამ 1 მილიარდი დოლარი შეადგინა, რაც 2017 წლის მაჩვენებელს 32%-ით აღემატება.

საქართველოს ჩინეთში გააქვს სპილენძის მადანი, ნატურალური ღვინო და სხვა საქონელი. ჩინეთი საქართველოს ძირითადად ამარაგებს გამომთვლელი ტექნიკით, რეზინის საბურავებითა და სხვა საქონლით.

საპარტნიორო ფონდი არის სახელმწიფო საინვესტიციო ფონდი, რომელიც 2011 წელს დაფუძნდა. მისი მთავარი დანიშნულება საქართველოში ინვესტიციების წახალისებაა საინვესტიციო პროექტების განვითარების საწყის ეტაპზე თანამონაწილეობის გზით. ამ მომენტისთვის მთავრობა მისი რეფორმირების საკითხს იხილავს.

ფონდის მიზანია თანამშრომლობის განვითარება საჯარო და კერძო სექტორებს შორის საინვესტიციო პროექტების განსახორციელებლად, სამუშაო ადგილების შესაქმნელად, უცხოური ინვესტიციების მოსაზიდად და ქვეყნის ეკონომიკის გასავითარებლად. ფონდი ოთხ სექტორში ფუნქციონირებს – ენერგეტიკის, სოფლის მეურნეობის, წარმოებისა და უძრავი ქონების. საპარტნიორო ფონდის ფინანსური თანამონაწილეობა პროექტის ჯამური კაპიტალის 49%-ით და პროექტის ჯამური ღირებულების 25%-ით შემოიფარგლება. დანარჩენ კაპიტალს სტრატეგიული ინვესტორი უზრუნველყოფს.

68
თემები:
საქართველოს ეკონომიკა (639)
თბილისი

კომპენსაციის მიღების მსურველებო, დარეგისტრირდით: მთავრობამ ვადა გაახანგრძლივა

74
(განახლებულია 20:13 09.07.2020)
ამ დროისათვის სახელმწიფოსგან 300 ლარის დახმარება 100 ათასზე მეტმა თვითდასაქმებულმა და 200 ლარის თითქმის 130 ათასმა სამსახურდაკარგულმა მიიღო.

თბილისი, 9 ივლისი — Sputnik. საქართველოს მთავრობამ პანდემიის გამო შემოსავლის გარეშე დარჩენილი მოქალაქეებისა და თვითდასაქმებული პირებისთვის დახმარების მისაღებად რეგისტრაციის ვადა 1 აგვისტომდე გაახანგრძლივა, განაცხადა საქართველოს პრემიერ-მინისტრმა გიორგი გახარიამ მთავრობის სხდომის წინ.

სახელმწიფოს მხრიდან კომპენსაციის მისაღებად იმ პირთა რეგისტრაცია, რომლებმაც COVID-19-ის პანდემიის გამო შემოსავალი დაკარგეს, 15 მაისს დაიწყო და 1 ივლისს დასრულდა.

გახარიას თქმით, აუცილებლობის შემთხვევაში ვადა მომავალშიც გახანგრძლივდება.

„მოგეხსენებათ, რომ რეგისტრაციების ვადა ამოწურულია, მაგრამ მთავრობამ მიიღო გადაწყვეტილება მისი 1 აგვისტომდე გაგრძელების შესახებ. ვინც დააგვიანა, ან ვერ შეძლო ელემენტარულად საჭირო საბუთების შეგროვება, ამ ადამიანებისთვის ეს ვადა გაგრძელდა, და თუ საჭირო იქნება, რეგისტრაციის ვადა შემდგომაც გაგრძელდება. დღეს ჩვენი პირველი და ყველაზე მნიშვნელოვანი ამოცანა, ეპიდემიასთან ბრძოლასთან ერთად, იმ ჩვენი მოქალაქეების დახმარებაა, რომლებსაც კრიზისის გამო შემოსავალი შეუმცირდათ და საერთოდ დაკარგეს შემოსავალი", – განაცხადა გახარიამ.

პრემიერის თქმით, სახელმწიფოსგან 300 ლარის დახმარება 121719-მა თვითდასაქმებულმა, ხოლო 200-ლარიანი დახმარება 129 ათასზე მეტმა პირმა მიიღო, ვინც შემოსავალი დაკარგა.

რეგისტრაციის გავლა ასევე შეუძლიათ იმ პირებს, რომლებიც უცხოეთში სეზონურ სამუშაოზე იყვნენ დასაქმებული.

74
თემები:
COVID-19 საქართველოში
რთველი

„რქაწითელი" და „კახური მწვანე": მთავრობა რთვლის სუბსიდირებას გეგმავს

93
(განახლებულია 19:26 09.07.2020)
გიორგი გახარიას თქმით, ფერმერული საქმიანობის სტიმულირება მთავრობის ანტიკრიზისული გეგმის ერთ-ერთი მიზნობრივი მიმართულებაა.

თბილისი, 9 ივლისი — Sputnik. საქართველოს მთავრობა ქართული ყურძნის ჯიშების „რქაწითელისა" და „კახური მწვანის" სუბსიდირებას განახორციელებს, განაცხადა საქართველოს პრემიერ-მინისტრმა გიორგი გახარიამ მთავრობის სხდომაზე.

მანამდე ღვინის ეროვნული სააგენტოს თავმჯდომარემ ლევან მეხუზლამ განაცხადა, რომ, მთავრობის გადაწყვეტილებით, წელს რთვლის სუბსიდირებაზე 60 მილიონი ლარი დაიხარჯება.

მეხუზლას თქმით, სუბსიდია, სავარაუდოდ, მხოლოდ „რქაწითელის" ჯიშის ყურძენს შეეხება. თუმცა, როგორც აღმოჩნდა, სიაში „კახური მწვანეც" არის.

„მთავრობა რთველის სუბსიდირებას განახორციელებს, განსაკუთრებით, ყურძნის ისეთი ჯიშების, როგორიცაა „რქაწითელი" და „კახური მწვანე", რომელთა ფასიც 80 თეთრზე დაბალი არ იქნება", – განაცხადა გახარიამ.

გახარიას თქმით, ფერმერული საქმიანობის სტიმულირება მთავრობის ანტიკრიზისული გეგმის ერთ-ერთი მიზნობრივი მიმართულებაა.

„ყველამ კარგად იცის, რომ მთავრობის ანტიკრიზისული გეგმის ერთ-ერთი მთავარი სამიზნე გახლავთ სოფელი, ფერმერი, ქართველი გლეხი. ჩვენ ყველაფერი გავაკეთეთ იმისთვის, რომ სხვადასხვა ინსტრუმენტით ამ ადამიანებს დავხმარებოდით, ქართველი ფერმერი გაგვეძლიერებინა კრიზისის პირობებში", – განაცხადა გახარიამ.

როგორც მან აღნიშნა, თუ აუცილებლობა იქნება, სახელმწიფო ყურძნის შესყიდვაშიც ჩაერთვება.

ამასთან, პრემიერმა მოკლე ექსკურსი გააკეთა და აღნიშნა, თუ რამდენად წარმატებული იყო გასული წლები ქართული მევენახეობისა და მეღვინეობისთვის.

„2019 წელი იყო რეკორდული – საქართველოდან 94 მილიონი ბოთლი ღვინის ექსპორტი განხორციელდა. რა თქმა უნდა, შიდა მოხმარებაც იზრდებოდა. 2012 წელს ქართულ ექსპორტში მეღვინეობის წილი მთლიანობაში დაახლოებით 2.5% იყო, დღეს კი 6%-ია", – განაცხადა გახარიამ.

საქართველოში რთველის სეზონი სექტემბრიდან იწყება. იმისთვის, რომ პანდემიის გამო გამოწვეული ეკონომიკური კრიზისი რთველზე არ აისახოს, საქართველოს ხელისუფლებამ მეღვინეობის დარგზე ანტიკრიზისული გეგმის ფარგლებში ზრუნვა გადაწყვიტა. აღნიშნული გადაწყვეტილება ივნისის დასაწყისში პრემიერთან სოფლის მეურნეობის სამინისტროსა და შესაბამისი უწყებების წარმომადგენლების სამუშაო შეხვედრაზე იქნა მიღებული.

93
თემები:
საქართველოს მთავრობა
მყიდველები ბაზარში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/10 ივლისი

86404
საქართველოში საგანგებო მდგომარეობა ერთი თვის წინ მოიხსნა, მაგრამ მთავრობამ შეზღუდვების ნაწილი ძალაში დატოვა.

თბილისი, 10 ივლისი – Sputnik. საქართველოს მთავრობა აგრძელებს კორონავირუსის პანდემიის გამო დაწესებული შეზღუდვების მოხსნას, მაგრამ ამავე დროს მთავრობა და ეპიდემიოლოგები მოუწოდებენ მოქალაქეებს გამოიჩინონ სიფრთხილე და დაიცვან ჯანდაცვის სამინისტროს რეკომენდაციები.

ქვეყნის ტერიტორიაზე მოქმედებს შემდეგი შეზღუდვები:

  • დახურულ სივრცეებში, საჯარო დაწესებულებებში, საზოგადოებრივ ტრანსპორტში, ოფისებსა და მაღაზიებში სავალდებულოა პირბადის ტარება და სოციალური დისტანციის დაცვა;
  • საზოგადოებრივ ტრანსპორტში დაუშვებელია პირბადის გარეშე ყოფნა და კონდიციონერების ჩართვა;

  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე;
  • დახურულ სივრცეებში აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;
  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • უნივერსიტეტებში სასწავლო პროცესი კვლავ დისტანციურად განხორციელდება;
  • ადამიანების თავშეყრის ადგილებში აკრძალულია სპლიტ-სისტემის კონდიციონერების გამოყენება, რომლებიც ჰაერს იღებენ შენობიდან, აგრილებენ და ისევ აბრუნებენ. დაშვებულია სამრეწველო კონდიციონერების გამოყენება, რომლებიც კონდიცირება-ვენტილაციის სისტემებს მოიცავს (ჰაერი შენობაში გარედან შეაქვს).

ამ მომენტისათვის ინფიცირებულთა რაოდენობა 968 ადამიანს შეადგენს, აქედან 844 გამოჯანმრთელდა, 15 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

15 ივნისიდან აღდგა შიდა ტურიზმი, ხოლო 1 ივლისიდან საქართველო საზღვრებს უცხოელი ტურისტებისთვის გახსნის.

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 4851, სტაციონარებში მეთვალყურეობის ქვეშ კი 231 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე stopcov.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
86404
თემები:
COVID-19 საქართველოში