ქარვისფერი ღვინის დეგუსტაცია კორეაში

კორეაში ქართული ქარვისფერი ღვინოები დააგემოვნეს: სპეციალური დეგუსტაცია

139
(განახლებულია 19:48 26.08.2019)
დეგუსტაცია დეჯონში გამართული ღვინის კონკურსის Asia Wine Trophy-ს ფარგლებში ღვინის ეროვნული სააგენტოს მხარდაჭერით ჩატარდა.

თბილისი, 26 აგვისტო — Sputnik. სამხრეთ კორეის რესპუბლიკის ქალაქ დეჯონში ქარვისფერი ღვინოების სპეციალური დეგუსტაცია გაიმართა, აღნიშნულია ღვინის ეროვნული სააგენტოს მიერ გავრცელებულ განცხადებაში

ღონისძიებაზე საქართველოდან და მსოფლიოს კიდევ რამდენიმე ქვეყნიდან (იაპონია, ხორვატია, ახალი ზელანდია, იტალია, სლოვენია) 12 ქარვისფერი ღვინო იყო წარმოდგენილი. დეგუსტაციას ესწრებოდნენ ცნობილი ღვინის მწერლები, იმპორტიორები და სომელიეები – სულ ასამდე ღვინის პროფესიონალი. დეგუსტაციის შემდეგ გაიმართა მსჯელობა, თუ რა პერსპექტივა აქვს კორეის ბაზარზე ქარვისფერ ღვინოებს, 12 დეგუსტატორს კი საპატიო სერტიფიკატები გადაეცა.

დეგუსტაცია დეჯონში გამართული ღვინის კონკურსის Asia Wine Trophy-ს ფარგლებში ღვინის ეროვნული სააგენტოს მხარდაჭერით ჩატარდა.

Asia Wine Trophy, რომელიც ერთ-ერთ ყველაზე მასშტაბურ ღვინის კონკურსად მიიჩნევა, ვაზისა და ღვინის მსოფლიო ორგანიზაციის (OIV) პატრონაჟით უკვე მეშვიდედ გაიმართა. მასზე მსოფლიოს 35 ქვეყნის 4 ათასზე მეტი ნიმუში იყო წარმოდგენილი. ჟიურის შემადგენლობაში შედიოდა 127 ღვინის პროფესიონალი მსოფლიოს 26 ქვეყნიდან.

აღნიშნული ღონისძიება კორეის რესპუბლიკაში საქართველოს საელჩოსა და ღვინის ეროვნული სააგენტოს თანამშრომლობის ნაწილია, რომლის მიზანია კორეის ბაზარზე ქართული ღვინის ცნობადობისა და, შესაბამისად, ექსპორტის გაზრდა.

საქართველო ასევე საპატიო სტუმრის რანგში იყო მიწვეული დეჯონის ღვინის ფესტივალის გახსნაზე, რომელშიც დეჯონის მთავრობის წარმომადგენლები და მსოფლიოს სხვადასხვა ქვეყნიდან ჩამოსული ღვინის პროფესიონალები მონაწილეობდნენ.

 

139
თემები:
ღვინის კულტურა და მეღვინეობა (67)
უმუშევრები მშრალ ხიდზე

უმუშევართა დათვლის სისტემა საქართველოში შესაძლოა წლის ბოლომდე შეიცვალოს

71
ახალი მეთოდოლოგიით, ადამიანი, რომელიც მხოლოდ საკუთარი თავისთვის და ოჯახისთვის მუშაობს, თვითდასაქმებულებიდან ამოიშლება, ეს კი უმუშევრობის დონეს ავტომატურად გაზრდის

თბილისი, 1 ივნისი - Sputnik. საქართველოში დასაქმებისა და უმუშევრობის სტატისტიკა „თვითდასაქმებულის“ დეფინიციის ცვლილების ხარჯზე შეიცვლება, განაცხადა სტატისტიკის ეროვნული სამსახურის აღმასრულებელმა დირექტორმა გოგიტა თოდრაძემ დარგობრივი ეკონომიკისა და ეკონომიკური პოლიტიკის საპარლამენტო კომიტეტის სხდომაზე სამსახურის საქმიანობის შესახებ 2019 წლის ანგარიშის წარდგენისას.

პრემიერმა უმუშევრობის კომპენსაციის დროულად გაცემის ბრძანება გასცა >>

დღეს ყველა დასაქმებულ მოქალაქეს „საქსტატი“ ყოფს დაქირავებულებად და თვითდასაქმებულებად. ამჟამად ყველა დასაქმებულს ყოფენ დაქირავებულებად და თვითდასაქმებულებად. თვითდასაქმებულად მიიჩნევა ადამიანი, რომელიც ოჯახურ საწარმოში უანგაროდ მუშაობს, ან მესაკუთრეა, რომელიც გარკვეული პერიოდი მოგების მიღებისთვის მუშაობს.

„თვითდასაქმებულთა კატეგორია, რომელიც პროდუქციას აწარმოებს უმთავრესად საკუთარი მოხმარებისთვის, ახლებური სტანდარტით აღარ ჩაითვლება თვითდასაქმებულად და დასაქმებულად. შესაბამისად, ეს დასაქმებისა და უმუშევრობის სტატისტიკაში გარკვეულ ცვლილებებს გამოიწვევს“, - აღნიშნა თოდრაძემ.

მისი თქმით, მიმდინარე წლის იანვრიდან დათვლა მიმდინარეობს ერთდროულად ძველი და ახალი მეთოდოლოგიით.

„ძველი კვლევების პარალელურად, იანვრიდან ჩვენ დავიწყეთ მონაცემების შეგროვება ახალი კითხვარით. მიმდინარე კვლევა გაგრძელდება პირველი ორი კვარტალის განმავლობაში და ამ ორი კვარტალის მონაცემები შესაძლებლობას მოგვცემს, გადავიდეთ ახალ სტანდარტზე მიმდინარე წლის ბოლოდან“, - განმარტა თოდრაძემ.

ამიერიდან თვითდასაქმებულების შესახებ მონაცემები ახალი მეთოდით დაითვლება. თუ ადრე თვითდასაქმებულად მიიჩნეოდა საკუთარ მიწაზე მომუშავე ნებისმიერი ადამიანი, აწარმოებდა ის პროდუქციას თავისთვის თუ ბაზარზე გასაყიდად, ახალი მეთოდოლოგიით, ადამიანი, რომელიც მხოლოდ საკუთარი თავისთვის მუშაობს, თვითდასაქმებულებიდან ამოიშლება.

საქართველოში უმუშევრობის დონეს ამჟამად ეკონომიკურად აქტიური მოსახლეობის დასაქმებულთა და უმუშევართა რაოდენობების თანაფარდობის საფუძველზე ითვლიან.

ეკონომიკურად აქტიურად მიიჩნევა 15 წლისა და უფროსი ასაკის მოქალაქე, რომელიც მუშაობს ან ეძებს სამუშაოს. პირი უმუშევრად იმ შემთხვევაში ჩაითვლება, თუ გამოკითხვამდე შვიდი დღის განმავლობაში არ შეუსრულებია სამუშაო ანაზღაურების მიღების მიზნით, ბოლო ოთხი კვირა ეძებდა სამუშაოს და მზადაა, უახლოეს ორ კვირაში დაიწყოს მუშაობა.

„საქსტატის“ 2019 წლის მონაცემებით, საქართველოში უმუშევრობის დონემ 11,1% შეადგინა - ოფიციალურად უმუშევრად 221 ათასი ადამიანი მიიჩნეოდა.

ექსპერტები ახალ სისტემას მიესალმებიან და ირწმუნებიან, რომ უფრო ნათლად გამოკვეთს სურათს, თუმცა აქვე დასძენენ, რომ დათვლის მეთოდის შეცვლის შემდეგ უმუშევრობის დონე ქვეყანაში მნიშვნელოვნად გაიზრდება.

71
თემები:
სოციალური სფერო საქართველოში
პრემიერი გიორგი გახარია

პრემიერი: ყველაფერს ვაკეთებთ, რომ ეკონომიკა აღდგეს

37
(განახლებულია 20:42 01.06.2020)
მთავრობა მუშაობს, რომ ადამიანებს მიეცეთ შესაძლებლობა, აღადგინონ ის შემოსავლები, რაც მათ პანდემიამდე ჰქონდათ, განაცხადა პრემიერმა.

თბილისი, 1 ივნისი – Sputnik. საქართველოს მთავრობა აცნობიერებს კორონავირუსის პანდემიის გამო შექმნილ მოქალაქეების მძიმე სოცილურ მდგომარეობას, ამიტომ ყველაფერს აკეთებს იმისთვის, რათა აღადგინოს ეკონომიკური საქმიანობა, განაცხადა საქართველოს პრემიერ-მინისტრმა გიორგი გახარიამ ბრიფინგზე ორშაბათს.

საქართველოში მაღაზიები იხსნება: რა წესების დაცვა მოუწევთ „შოპინგის“ მოყვარულებს>>

კორონავირუსის პანდემიამ საქართველოს ეკონომიკას, ისევე, როგორც მოქალაქეების კეთილდღეობას, სერიოზული ზიანი მიაყენა. ბევრი ადამიანი დარჩა უმუშევარი, შემოსავლების გარეშე. ქვეყნის ხელისუფლებამ შეიმუშავა როგორც მოსახლეობის, ისე ეკონომიკის სხვადასხვა სექტორის დახმარების ანტიკრიზისული გეგმა. ასევე კორონავირუსის გავრცელების აღკვეთის წარმატებული ზომების ფონზე მოხსნეს საგანგებო მდგომარეობის რეჟიმი, შეუდგნენ შეზღუდვების ეტაპობრივ მოხსნასა და ეკონომიკური აქტივობის აღდგენას.

„ჩვენ იძულებული ვართ, ნელ-ნელა ეკონომიკა გავხსნათ და ჩვენ არ გვაქვს არანაირი სურვილი უკან დაბრუნების, ეკონომიკის შემდგომი ან ხელახალი დახურვისა და გადაკეტვის“, – განაცხადა გახარიამ.

ანტიკრიზისული გეგმის ფარგლებში მთავრობამ ფულადი კომპენსაცია გადაუხადა 400 ათასზე მეტ მოქალაქეს. სახელმწიფოსგან დახმარებას იღებენ პანდემიის აფეთქების პერიოდში უმუშევრად დარჩენილები, კონტრაქტის საფუძველზე მომუშავე ან დეკრეტულ შვებულებაში მყოფნი, თვითდასაქმებულები, ასევე სოციალურად დაუცველები და მრავალშვილიანი ოჯახები, შეზღუდული შესაძლებლობების მქონე პირები.

„ეს სოციალური დახმარება არ არის საკმარისი, ამიტომ ვაკეთებთ ყველაფერს, რომ ეკონომიკა გავხსნათ და ადამიანებს მივცეთ საშუალება, აღიდგინონ ის შემოსავალი, რომელიც მათ COVID-19-მდე ჰქონდათ, შემოსავალი, რომელიც მათ უნდა მიიტანონ ოჯახში და დაიბრუნონ ცხოვრების ის დონე, რომელიც ჰქონდათ წლის დასაწყისში. ეს არის ჩვენი ერთმანეთისადმი ვალდებულება“, – განაცხადა პრემიერმა.

იზრდება იმ თვითდასაქმებულების რაოდენობა, რომლებმაც სახელმწიფოსგან დახმარება მიიღეს>>

ტურიზმისა და ეკონომიკური საქმიანობის აღდგენის ყველა გეგმა ხორციელდება ფრთხილად და გონივრულად, ისე, რომ რისკი არ შეიქმნას მოქალაქეების ჯანმრთელობისთვის, აღნიშნა გახარიამ და დასძინა, რომ საზოგადოებრივი ტრანსპორტის, რესტორნების, მაღაზიებისა და სავაჭრო ცენტრების გახსნით იზრდება ვირუსის გავრცელების რისკი.

„თითოეული ჩვენგანის პასუხისმგებლობა არის ელემენტარული წესების დაცვა და მინდა თითოეულ მოქალაქეს მოვუწოდო, ყოველთვის ვატაროთ პირბადე, განსაკუთრებით, როცა ვართ საზოგადოებრივ ტრანსპორტში, მაშინ, როცა ვართ საზოგადოებრივი თავშეყრის ადგილებში, ამას უკიდურესად დიდი მნიშვნელობა აქვს... ეს არის ის სამოქალაქო პასუხისმგებლობა, რომელიც მარტივია და შეგვიძლია ყველამ გავაკეთოთ“, – განაცხადა გახარიამ.

საქართველოში კორონავირუსის პირველი შემთხვევა 26 თებერვალს დაფიქსირდა. მარტის ბოლოს ხელისუფლებამ საგანგებო მდგომარეობა დააწესა, რომელიც 23 მაისამდე გაგრძელდა. 23 მაისიდან, როდესაც მოიხსნა საგანგებო მდგომარეობა, დარჩა გარკვეული შეზღუდვები, რომლებსაც ხელისუფლება ეტაპობრივად ხსნის.

ამჟამად ქვეყანაში კრონავირუსის 794 დადასტურებული შემთხვევაა გამოვლენილი. აქედან გამოჯანმრთელდა 624 ადამიანი, გარდაიცვალა – 12 პაციენტი.

37
თემები:
COVID-19 საქართველოში
დაკეტილი მაღაზიები აბანოთუბანში

კორონავირუსი საქართველოში: საგანგებო მდგომარეობის შემდეგ შეზღუდვების სრული სია/2 ივნისი

79043
(განახლებულია 00:58 02.06.2020)
23 მაისიდან საქართველოში საგანგებო მდგომარეობა აღარ მოქმედებს, მაგრამ მთავრობამ შეზღუდვების ნაწილი ძალაში დატოვა.

თბილისი, 2 ივნისი – Sputnik. საქართველოს მთავრობა დაჩქარებული ტემპით აგრძელებს შეზღუდვების მოხსნას, რომლებიც კორონავირუსის პანდემიის გამო დაწესდა.

2 ივნისისთვის ქვეყნის ტერიტორიაზე შემდეგი შეზღუდვები მოქმედებს:

 

  • დახურულ სივრცეებში, საჯარო დაწესებულებებში, ოფისებსა და მაღაზიებში სავალდებულოა პირბადის ტარება და სოციალური დისტანციის დაცვა;
  • კარანტინის რეჟიმი მოქმედებს თეთრიწყაროში და ბოლნისის მუნიციპალიტეტის ორ სოფელში – მუშევანსა და გეტაში;
  • საზოგადოებრივ ტრანსპორტში დაუშვებელია პირბადის გარეშე ყოფნა და კონდიციონერების ჩართვა;

  •  

    8 ივნისამდე ნარცუნდება შეზღუდვა საერთაშორისო სახმელეთო, საზღვაო და ავიამიმოსვლაზე, ასევე აკრძალულია დახურული ტიპის რესტორნების და ბარების მუშაობა;

  • ტაქსის მძღოლისთვის სავალდებულოა პირბადის ტარება, ტაქსით ორზე მეტი მგზავრის გადაყვანა არ შეიძლება, ისიც უკანა სავარძელზე
  • აკრძალულია კულტურული და სპორტული ღონისძიებების გამართვა;
  • კაზინოების და ტოტალიზატორების მუშაობა დაშვებულია მხოლოდ ონლაინ;
  • აკრძალულია 10-ზე მეტი ადამიანის თავშეყრა ტრადიციულ სოციალურ ღონისძიებებზე (ქორწილი, ნებისმიერი იუბილე, ქელეხი და ა.შ.);
  • ყველა სახის ტრენინგი, კონფერენცია და სემინარი უნდა ჩატარდეს დისტანციურად;
  • სკოლებსა და უნივერსიტეტებში სასწავლო პროცესი კვლავ დისტანციურად განხორციელდება;
  • დასაშვებია უნივერსიტეტში პრაქტიკული/ლაბორატორიული სამუშაოებისა და გამოცდების ჩატარება არადისტანციურად, მაგრამ რეკომენდაციების შესაბამისად;
  • კულტურული ღონისძიებები მხოლოდ დისტანციური ფორმით ჩატარდება;
  • აკრძალულია მასობრივი სპორტული ღონისძიებების, შეკრებების და შეჯიბრებების ჩატარება;
  • აკრძალულია ვალუტის გადამცვლელი პუნქტების მუშაობა;
  • ადამიანების თავშეყრის ადგილებში აკრძალულია სპლიტ-სისტემის კონდიციონერების გამოყენება, რომლებიც ჰაერს იღებენ შენობიდან, აგრილებენ და ისევ აბრუნებენ. დაშვებულია სამრეწველო კონდიციონერების გამოყენება, რომლებიც კონდიცირება-ვენტილაციის სისტემებს მოიცავს (ჰაერი შენობაში გარედან შეაქვს);
  • 29 მაისიდან ქვეყანაში ამუშავდა საზოგადოებრივი ტრანსპორტი, 1 ივნისიდან - სავაჭრო მოლები და ღია ცის ქვეშ მქონე სივრცეების რესტორნები. დახურული ტიპის დაწესებულებები 8 ივნისს იხსნება;
  • 15 ივნისიდან აღდგება შიდა ტურიზმი, ხოლო 1 ივლისიდან საქართველო უცხოელი მოგზაურების მიღებას დაიწყებს.

ამ მომენტისათვის ინფიცირებულთა რაოდენობა 794 ადამიანს შეადგენს, აქედან 624 გამოჯანმრთელდა, 12 კი გარდაიცვალა. კიდევ სამი ინფიცირებული მოქალაქე სამკურნალოდ სხვა ქვეყნებიდან ჩამოიყვანეს. ეპიდემიოლოგები მიიჩნევენ, რომ ჯერჯერობით აუცილებელია სოციალური დისტანციის უზრუნველყოფა და მოქალაქეთა მობილობის შეზღუდვა.

კორონავირუსით ინფიცირების ახალი შემთხვევების უმრავლესობა შიდა გადაცემას უკავშირდება.

საქართველო სხვა ქვეყნებისთვის კორონავირუსთან ბრძოლაში სამაგალითოა >>

უწყებათშორისი საკოორდინაციო საბჭო ოპერატიულად აფასებს სიტუაციას და შეიმუშავებს ახალ რეკომენდაციებს და შეზღუდვებს.

მთავრობის სპეციალურ ვებ-გვერდზე stopcov.ge გამოქვეყნებული ბოლო მონაცემების თანახმად, საკარანტინო სივრცეში იმყოფება 2508, სტაციონარებში მეთვალყურეობის ქვეშ კი 300 ადამიანია.

მთავრობა მოსახლეობას მოუწოდებს, ქვეყანაში კორონავირუსთან დაკავშირებით მხოლოდ და მხოლოდ გადამოწმებულ და ოფიციალურად დადასტურებულ ინფორმაციას ენდონ. ყველა ინფორმაციის მოძიება შესაძლებელია მთავრობის მიერ სპეციალურად შექმნილ ვებ-გვერდზე StopCoV.ge.

„ცხელი ხაზის“ ნომრები: ცხელი ხაზი კარანტინის რეჟიმის საკითხებზე – 144. საქართველოს ჯანდაცვა – 15 05 (დღე-ღამის განმავლობაში); დაავადებათა კონტროლის ცენტრი – 116 001 (21:00-მდე სამუშაო დღეებში და 18:00-მდე დასვენების დღეებში).

ყველა მოხალისეს, რომელსაც აქვს დრო და სურვილი დაეხმაროს ხანდაზმულ ადამიანებს, ასევე მათ, ვისაც სპეციალური დახმარება ესაჭიროება, შეუძლია დარეკოს მერიის ცხელ ხაზზე (032)2722222 და წითელი ჯვრის ცხელ ხაზზე - 0800 000 018.

კორონავირუსი საქართველოში: შეზღუდვების მოხსნის ეტაპები
© Sputnik / Konstantin Ivanov.
კორონავირუსი საქართველოში: შეზღუდვების მოხსნის ეტაპები
79043
თემები:
COVID-19 საქართველოში