ტანკერი ფოთის პორტში

საქართველოს საგარეო ბრუნვა: ექსპორტი იზრდება, იმპორტი მცირდება

85
(განახლებულია 12:49 20.08.2019)
საქართველოს უმსხვილესი სავაჭრო პარტნიორები არიან თურქეთი, რუსეთი და აზერბაიჯანი.

თბილისი, 20 აგვისტო — Sputnik. ქართული პროდუქციის ექსპორტი 2019 წლის იანვრიდან ივლისის ჩათვლით, გასული წლის ამავე პერიოდთან შედარებით, 12,4%-ით გაიზარდა და 2,1 მილიარდ აშშ დოლარზე მეტი შეადგინა, ნათქვამია ქვეყნის სტატისტიკის ეროვნული სამსახურის „საქსტატის" მასალებში.

ექსპორტი რეექსპორტის გარეშე მიმდინარე წლის იანვრიდან 1,6%-ით გაიზარდა 2018 წლის ანალოგიურ პერიოდთან შედარებით და 1,3 მილიარდ აშშ დოლარზე მეტი შეადგინა.

ამავე დროს, 2019 წლის დასაწყისიდან იმპორტმა დაახლოებით 5 მლრდ აშშ დოლარი შეადგინა – 4,7%-ით ნაკლები, ვიდრე წინა წლის ამავე პერიოდში.

მთლიანობაში, საგარეო ბრუნვა საქართველოში 2019 წლის იანვრიდან ივლისის ჩათვლით, გასული წლის ანალოგიურ პერიოდთან შედარებით, 0,2%-ით შემცირდა და დაახლოებით 7,1 მლრდ დოლარი შეადგინა (არაორგანიზებული ვაჭრობის გაუთვალისწინებლად).

საქართველოს უარყოფითმა სავაჭრო ბალანსმა 2019 წლის იანვრიდან ივლისის ჩათვლით დაახლოებით 2,9 მლრდ დოლარი შეადგინა, რაც მთლიანი საგარეო სავაჭრო ბრუნვის 40,5%-ია.

რა გადის საქართველოდან

საქართველოდან საკმაოდ ფართო ასორტიმენტის საქონელი გადის – სპილენძის მადნები და კონცენტრატები, ყურძნის ნატურალური ღვინო, ფეროშენადნობები, მინერალური წყლები, მედიკამენტები, მსუბუქი ავტომობილები, დამუშავებული ან ნახევრად დამუშავებული ოქრო, თხილი და სხვ.

საქართველოში საერთაშორისო ვაჭრობის ეროვნული კომიტეტი შეიქმნა>>

სპილენძის მადნებისა და კონცენტრატების ექსპორტი 2019 წლის იანვრიდან ივლისის ჩათვლით 31,2%-ით გაიზარდა, მსუბუქი ავტომობილების – 56,7%-ით, მედიკამენტების – 54,8%-ით, ყურძნის ნატურალური ღვინის – 7,7%-ით და ა.შ.

ამავე დროს 5%-ით შემცირდა ფეროშენადნობების ექსპორტი.

რატომ მცირდება იმპორტი

საერთაშორისო სარეიტინგო სააგენტო Fitch მიიჩნევს, რომ იმპორტის შემცირება საქართველოში დიდი ენერგეტიკული პროექტების დასრულებას უკავშირდება. გარდა ამისა, სააგენტოს ანგარიშში საქართველოსთან დაკავშირებით აღნიშნულია, რომ იმპორტის დინამიკაზე მოქმედებს სამომხმარებლო დაკრედიტების ზრდის შენელება და დაგროვებითი საპენსიო სისტემის ამოქმედების შემდეგ შიდა დანაზოგების ზრდა.

„საქსტატის" მონაცემებით, იმპორტი, ძირითადად, ნავთობპროდუქტების მოწოდების 17,3%-ით შემცირების გამო ეცემა.

საწვავის იმპორტის შემცირების მიზეზად ნავთობპროდუქტების იმპორტიორთა კავშირში მიიჩნევენ შემოტანილი დიზელის საწვავის ოდენობის შემცირებას, რაც ძირითადად უკავშირდება საწვავის ამ სახეობის რეექსპორტის მოცულობის მნიშვნელოვან შემცირებას საქართველოდან თურქეთში. ასევე ჰიბრიდული ტიპის ავტომობილების იმპორტის მნიშვნელოვან ზრდას.

საქართველოში, გარდა ნავთობისა და ნავთობპროდუქტებისა, შემოაქვთ მსუბუქი ავტომობილები, ნავთობის აირები და აირისებრი ნახშირწყალბადები, სპილენძის მადანი და კონცენტრატი, დაფასოებული მედიკამენტები, ხორბალი, ელექტროენერგია, ტელეფონის აპარატები და სხვ.

სპილენძის მადნებისა და კონცენტრატების იმპორტი 2019 წლის პირველ შვიდ თვეში 51,4%-ით გაიზარდა, მედიკამენტების – 10%-ით, მსუბუქი ავტომობილების – 3,9%-ით, ნავთობის აირებისა და აირისებრი ნახშირწყალბადების – 7%-ით და სხვ.

ვისთან ვაჭრობს საქართველო

საქართველოს ყველაზე დიდი სავაჭრო პარტნიორები წლის დასაწყისიდან არიან თურქეთი, რუსეთი და აზერბაიჯანი. მთლიანობაში ამ ქვეყნებთან სავაჭრო ბრუნვამ 2019 წლის პირველ შვიდ თვეში დაახლოებით 2,4 მლრდ აშშ დოლარი შეადგინა, რაც საერთო სავაჭრო ბრუნვის 33,8%-ია.

პირველ ადგილზეა თურქეთი.

მეზობელ ქვეყანასთან საგარეო სავაჭრო ბრუნვამ მიმდინარე წლის იანვარ-ივლისში დაახლოებით 1 მლრდ აშშ დოლარი შეადგინა, რაც საქართველოს საერთო სავაჭრო ბრუნვის 14,1%-ია. სავაჭრო ბრუნვა ორ ქვეყანას შორის წინა წლის ანალოგიურ მაჩვენებელთან შედარებით 0,2%-ით შემცირდა.

თურქეთში 2019 წლის დასაწყისიდან გაიტანეს დაახლოებით 49,3 ათასი ტონა ნახშირბადიანი ფოლადის ნახევარფაბრიკატები, 9,3 ათას ტონაზე მეტი სპილენძის მადნეული და კონცენტრატი, 10 ათას ტონაზე მეტი ფეროშენადნობი, დაახლოებით 1,2 ათასი ტონა ტრიკოტაჟის ნაწარმი და სხვ.

თურქეთიდან ამავე პერიოდში შემოვიდა დაახლოებით 15,1 ათასი ტონა შავი ლითონის კონსტრუქციები, დაახლოებით 4,6 ათასი ტონა იზოლირებული მავთულები და კაბელები, 852 ტონა დაფასოებული მედიკამენტი, დაახლოებით 27,5 ათასი ტონა მილები, მილაკები და ღრუ პროფილები, 1646 მსუბუქი ავტომობილი და სხვ.

მეორე ადგილზეა რუსეთი

2019 წლის იანვარ-ივლისში საქართველოსა და რუსეთს შორის სავაჭრო ბრუნვა 4%-ით გაიზარდა წინა წლის ანალოგიურ მაჩვენებელთან შედარებით და 790,2 მლნ დოლარი შეადგინა – საქართველოს საერთო სავაჭრო ბრუნვის 11,2%.

2019 წლის დასაწყისიდან საქართველოდან რუსეთში გავიდა 78,8 ათასი ტონა ფეროშენადნობი, 22 ათასი ტონა ყურძნის ნატურალური ღვინო, დაახლოებით 54,5 ათასი ტონა მინერალური და მტკნარი წყალი, 39,7 ტონა ცენტრიფუგა, 3,9 ათასი ტონა სპირტიანი სასმელი და ა.შ.

რუსეთი ქართული ღვინის მთავარი იმპორტიორია – 2019 წლის იანვარ-ივლისში რუსეთში დაახლოებით 29,1 მილიონი ბოთლი ღვინო გაიტანეს, რაც 2018 წლის იმავე პერიოდის მაჩვენებელს 2%-ით აღემატება.

ამასთან, რუსეთი საქართველოში საწვავის ყველაზე მსხვილი მომწოდებელია – წლის დასაწყისიდან დაახლოებით 172,1 ათასი ტონა ნავთობი და ნავთობპროდუქტი შემოვიდა.

რუსეთიდან შემოვიდა ასევე 173,2 ათასი ტონა ხორბალი, დაახლოებით 63,6 ათასი ტონა ქვანახშირის კოქსი და ნახევარკოქსი, დაახლოებით 155,8 ათასი ტონა ქვანახშირი და ქვანახშირისაგან მიღებული მყარი საწვავის სახეობები, 53,3 ათასი ტონა ნავთობის აირები და აირისებრი ნახშირწყალბადები და სხვ.

მესამე ადგილზეა აზერბაიჯანი

აზერბაიჯანთან საქართველოს საგარეო სავაჭრო ბრუნვამ დაახლოებით 600,6 მლნ დოლარი შეადგინა, რაც საერთო სავაჭრო ბრუნვის 8,5%-ს შეადგენს. ორ ქვეყანას შორის სავაჭრო ბრუნვა გასული წლის ანალოგიური პერიოდის მაჩვენებელთან შედარებით 1,8%-ით გაიზარდა.

წლის დასაწყისიდან აზერბაიჯანში გავიდა 10 788 მსუბუქი ავტომობილი, 1,1 ათასი ტონა სიგარები, სიგარილები და სიგარეტები, 459,9 ტონა მედიკამენტები, 844 სატვირთო ავტომობილი და სხვ.

აზერბაიჯანიდან იმპორტირებულია 1 მილიონ ტონაზე მეტი ნავთობის აირები და აირისებრი ნახშირწყალბადები, 31,6 მლნ დოლარის ღირებულების ელექტროენერგია, დაახლოებით 116,4 ათასი ტონა ნავთობი და ნავთობპროდუქტი, 231 ათასი ტონა ცემენტი, 19,1 ათას ტონაზე მეტი წნელები ნახშირბადიანი ფოლადისაგან, შემდგომი დამუშავების გარეშე და სხვ.

საქართველოს საგარეო ბრუნვა: ექსპორტი იზრდება, იმპორტი მცირდება>>

საქართველოს სხვა სავაჭრო პარტნიორები

საქართველოს სავაჭრო პარტნიორები არიან ასევე: ჩინეთი – 567,9 მლნ აშშ დოლარი, უკრაინა – 362 მლნ დოლარი, სომხეთი – 334,8 მლნ დოლარი, აშშ – 302 მლნ დოლარი, გერმანია – 277,6 მლნ დოლარი, ბულგარეთი – 238,2 მლნ დოლარი, რუმინეთი – 242,4 მლნ დოლარი.

საქართველო წარმატებით ვაჭრობს ევროკავშირის ქვეყნებთან – საგარეო სავაჭრო ბრუნვამ 2019 წლის იანვარ-ივლისში დაახლოებით 1,8 მილიარდი აშშ დოლარი შეადგინა, რაც გასული წლის იმავე პერიოდის მაჩვენებელს 5,2%-ით ჩამოუვარდება. ექსპორტმა შეადგინა 503,5 მლნ დოლარი – 20,6%-ით მეტი, იმპორტმა – 1,3 მლრდ დოლარი – 12,6%-ით ნაკლები. ევროკავშირის ქვეყნების წილი მთლიან უარყოფით სავაჭრო ბალანსში 27,2%-ია.

შეგახსენებთ, რომ საქართველომ 2014 წელს ევროკავშირთან გააფორმა ასოცირების შეთანხმება, რომლის განუყოფელი ნაწილია ხელშეკრულება თავისუფალი სავაჭრო ზონის შესახებ.

საქართველოს ვაჭრობა დსთ-ის ქვეყნებთან ასევე წარმატებით ვითარდება – სავაჭრო ბრუნვა 2019 წლის პირველ შვიდ თვეში 2,4 მილიარდი დოლარია, რაც 0,7%-ით აღემატება წინა წლის იმავე პერიოდის მაჩვენებელს.

ექსპორტმა შეადგინა 1,1 მლრდ დოლარი – 26,6%-ით მეტი 2018 წლის ანალოგიურ მაჩვენებელზე, იმპორტმა – 1,3 მლრდ დოლარი – 14,3%-ით ნაკლები. დსთ-ის ქვეყნების წილი უარყოფით სავაჭრო ბალანსში 6,9%-ია.

გასაღების ბაზრები ფართოვდება

საქართველო და ინდოეთი თავისუფალ ვაჭრობაზე მოლაპარაკებებს დაიწყებენ – კვლევამ აჩვენა, რომ საქართველოსა და ინდოეთს შორის თავისუფალი ვაჭრობა ორივე მხარისთვის ხელსაყრელი იქნება, აღნიშნულია საქართველოს ეკონომიკის სამინისტროს 2018 წლის 12 იანვრის განცხადებაში.

საექსპორტო ქართულმა ღვინომ მკაცრი კონტროლი გაიარა>>

ინდოეთთან თავისუფალი ვაჭრობის შესაძლებლობის კვლევის დაწყების მიზანშეწონილობის შესახებ შეთანხმებას საქართველომ 2017 წლის აპრილში მოაწერა ხელი.

ბოლო პერიოდში საქართველომ თავისუფალი ვაჭრობის შესახებ ხელშეკრულებები გააფორმა ევროკავშირთან, ევროპის თავისუფალი ვაჭრობის ასოციაციის (EFTA) წევრ ქვეყნებთან, თურქეთთან, ჰონკონგთან და ჩინეთთან. გარდა ამისა, მიმდინარეობს განხილვა მსგავსი ხელშეკრულებების იაპონიასთან და აშშ-სთან გაფორმების შესაძლებლობაზე. უკვე დაწყებულია წინასწარი კონსულტაციები დიდ ბრიტანეთთან Brexit-ის შემდეგ თავისუფალი ვაჭრობის რეჟიმის თაობაზე მოლაპარაკებების შესაძლებლობასთან დაკავშირებით.

85
თემები:
საქართველოს ეკონომიკა (752)
საქართველოსა და ევროკავშირის დროშები

მორიგი დახმარება COVID-19–თან ბრძოლისთვის: ევროკავშირთან ორ შეთანხმებას მოეწერა ხელი

21
(განახლებულია 21:37 29.09.2020)
მხარდაჭერა მოიცავს მედიკამენტებს, მოწყვლადი ჯგუფების სოციალურ მხარდაჭერას, გრანტებს ფერმერებისთვის და სხვ.

თბილისი, 29 სექტემბერი – Sputnik. საქართველო მიიღებს 129 მილიონ ევროს, რომელიც ქვეყანას დაეხმარება, გაუმკლავდეს კორონავირუსის აფეთქებას და მის გავლენას ეკონომიკაზე.

ევროკომისარმა სამეზობლო და გაფართოების საკითხებში ოლივერ ვარჰელმა და საქართველოს პრემიერ–მინისტრმა გიორგი გახარიამ ბრიუსელში 129 მლნ ევროზე ორ ფინანსურ შეთანხმებას მოაწერეს ხელი, აღნიშნულია ევროპის კომისიის განცხადებაში.

კორონავირუსის პანდემიამ ნეგატიური გავლენა მოახდინა როგორც კერძო სექტორზე, ისე საქართველოს მოქალაქეების სოციალურ მდგომარეობაზე. მთავრობა იძულებული გახდა, მეწარმეებისა და მოაქალაქეების დასახმარებლად, ასევე ეპიდემიის გავრცელების აღმოსაფხვრელად და დაავადებულთა მკურნალობისთვის დამატებითი რესურსები მოეზიდა.

ევროკავშირის დახმარება საქართველოსთვის (პანდემიის დაწყებიდან მოყოლებული) რიგ მოქმედებებს მოიცავს, რაც ითვალისწინებს ქვეყნის მოქალაქეების დახმარებას პანდემიის შედეგებთან გამკლავებაში. მხარდაჭერა მოიცავს მედიკამენტებს, მოწყვლადი ჯგუფების სოციალურ მხარდაჭერას, უპროცენტო სესხებსა და გრანტებს ფერმერებისთვის, ასევე პირდაპირ ფინანსურ მხარდაჭერას სახელმწიფო ბიუჯეტში.

რას ხმარდება გაზრდილი სახელმწიფო ვალი და რა განრიგით მოუწევს ქვეყანას მისი გასტუმრება>>

პირველი შეთანხმების ფარგლებში ევროკავშირი მხარს დაუჭერს საქართველოს ანტიკრიზისულ ეკონომიკურ გეგმას 75 მლნ ევროს ოდენობის გრანტის მეშვეობით.

ზომები მოიცავს სოციალურად დაუხცველი ოჯახების სოციალურ დახმარებას, ბიზნესის მხარდაჭერას, რომლებმაც რთულ დროს სამუშაო შეინარჩუნეს. ის ასევე ითვალისწინებს ინტენსიური თერაპიის განყოფილებებში საწოლების რაოდენობის გაზრდას, რათა ქვეყანა მზად იყოს ინფექციის პოტენციური ზრდისთვის.

მეორე შეთანხმებაა „ინტეგრირებული ტერიტორიული განვითარება“, რომლის ფარგლებშიც გრანტების სახით 54 მილიონი ევრო გამოიყოფა. ეს თანხა რეგიონების განვითარებას მოხმარდება. პროგრამა მიმართულია ქალაქის ინფრასტრუქტურის აღდგენასა და მშენებლობაზე, ტურიზმის განვითარების წახალისებასა და მცირე და საშუალო კომპანიებისა და ინოვაციების მხარდაჭერაზე.

21
თემები:
COVID-19 საქართველოში
ნიკა შენგელია

ექსპერტის მოსაზრება: რატომ არის აუცილებელი ფულად-საკრედიტო პოლიტიკის შეცვლა

66
(განახლებულია 15:01 29.09.2020)
დევალვირებული ლარი და გაკოტრებული ბიზნესი – აი, რას მიიღებს ქვეყანა, თუ არ მოხდა ქვეყნის ფულად-საკრედიტო პოლიტიკის მკვეთრი ცვლილება, თვლის ეკონომიკის ექსპერტი ნიკა შენგელია.

ლარის კურსმა მკვეთრი ვარდნა 9 მარტიდან დაიწყო, როდესაც კორონავირუსის პანდემიასთან დაკავშირებულ გაურკვევლობას მსოფლიო ბაზრებზე ნავთობის ფასების მკვეთრი ვარდნა დაემატა. 25 მარტისთვის ლარი უკვე 3,45 ნიშნულამდე იყო მისული. თუმცა ეროვნულმა ბანკმა ინტერვენციებით შეძლო ლარის გამყარება 40 თეთრით.

ბოლო თვეებში ლარის სტაბილურობის შესანარჩუნებლად მარეგულირებელს არაერთი სავალუტო აუქციონი აქვს გამართული და 410 მილიონ დოლარზე მეტი აქვს ბაზრისთვის მიწოდებული, თუმცა ეროვნული ვალუტა რყევას მაინც განაგრძობს.

მაგალითად, თუ 1 სექტემბერს ეროვნული ვალუტის კურსი აშშ დოლარის მიმართ 3,06 ნიშნულზე იყო, დღეს 1 დოლარის შეძენას კომერციულ ბანკებში უკვე 3.36 ლარი სჭირდება.

სავალუტო ბაზრის სტაბილიზაციის მიზნით ეროვნულმა ბანკმა 40 მილიონი დოლარი 23 სექტემბერსაც გაყიდა. თუმცა ამ ინტერვენციას ლარის კურზე გავლენა გამყარების თვალსაზრისით არ მოუხდენია.

40-მილიონიანი ინტერვენცია ბაზარმა ისე შეისრუტა, რომ ამან არათუ გაამყარა ლარი, არამედ მისი გაუფასურების შეჩერებაც ვერ შეძლო, მიაჩნია ეკონომისტ ნიკა შენგელიას.

„ჩვენ სამი თვის წინ ვაკეთებდით პროგნოზს, რომ ლარის კურსი სექტემბრის ბოლომდე 3.20-3,25 მაჩვენებელს მიუახლოვდებოდა, თუმცა დღეს უკვე ცალსახაა, რომ 3,25 ნიშნულის დონე ლარის კურსმა გაარღვია ზედა მიმართულებით. მოკლევადიან პერსპექტივაში თუ რეგულატორმა ინტერვენციის მოცულობას არ მოუმატა, ლარის კურსს 3,25 ნიშნულის დაბლა ჩამოსვლა გაუჭირდება და 3,30 ნიშნულთან იტრიალებს“, – აღნიშნა ნიკა შენგელიამ „Sputnik–საქართველოსთან“ საუბრისას.

ეკონომისტის თქმით, იმისათვის რომ ქვეყნის ეკონომიკა განვითარდეს და კურსი არ იყოს მერყევი, ფულად-საკრედიტო პოლიტიკის ძირეული ცვილილებაა აუცილებელი.

„დღეს ფულად-საკრედიტო პოლიტიკა გადამყიდველებსა და მსხვილ საბანკო სექტორზეა მორგებული, ქვეყნის ეკონომიკური განვითარებისთვის კი აუცილებელია განახევრდეს რეფინანსირების საპროცენტო განაკვეთი, რომელიც დღეს 8 პროცენტია, და დავიდეს 3-4 პროცენტამდე. ეს გაზრდის ბიზნესისთვის ფულზე ხელმისაწვდომობას და მოახდენს ეკონომიკის სტიმულირებას“, – განაცხადა ექსპერტმა.

ნიკა შენგელიას თქმით, სპეციალისტები უკვე წლებია აკრიტიკებენ მთავრობის ეკონომიკის იმ კურსსაც, რომელიც ეკონომიკაში მხოლოდ ტურიზმის სექტორის განვითარებას ემყარება.

„ის, რომ ლარის კურსი ჩამოკიდებული იყო წლების მანძილზე ტურიზმსა და ემიგრანტების შრომაზე, ეს იყო შეცდომა. სახელმწიფომ ტურიზმი ჯერ კიდევ წინა მთავრობის პირობებში აქცია პრიორიტეტად და ამჟამინდელმაც გააგრძელა. შედეგები, თუ რა მოგვიტანმა ასეთმა ეკონომიკურმა კურსმა, დავინახეთ“, – აღნიშნა შენგელიამ.

ლარის კურსის სამომავლო პროგნოზზე საუბრისას ნიკა შენგელიამ ყურადღება იმაზეც გაამახვილა რომ, იმ მაკროეკონომიკური ფაქტორებიდან, რომელზეც არის დამოკიდებული ლარის სტაბილურობა, ნაწილში უკვე არის ჩავარდნა და თუ დროულად არ მოხდება ფულად-საკრედიტო პოლიტიკის ცვლილება, საშუალოვადიან პერსპექტივაში მთავრობა უფრო მეტად დევალვირებულ ლარს და ბევრ გაკოტრებულ ბიზნესს მიიღებს.

ეროვნული ბანკის პრეზიდენტის პროგნოზით კი პანდემიასთან დაკავშირებული გაურკვევლობის აღმოფხვრისა და ტრადიციული წინასაარჩევნო აჟიოტაჟის გადავლის შემდეგ კურსი მის წონასწორულ ნიშნულს დაუბრუნდება.

დღევანდელი მდგომარეობით, ეროვნული ბანკის სავალუტო რეზერვების მოცულობა 3 931 898 ათასი დოლარია. წლის ბოლომდე კი მარეგულირებელს ლარის სტაბილიზაციის მიზნით მილიონების გაყიდვა კიდევ არაერთხელ მოუწევს.

 

ნატა პატარაია

66
საპატრულო პოლიცია

მარნეულში ჟურნალისტებსა და ოპერატორებს ფიზიკურად გაუსწორდნენ

0
შემთხვევა „ქართული ოცნებისა“ და „ნაციონალური მოძრაობის“ აქტივისტებს შორის შეხლა-შემოხლის დროს მოხდა.

თბილისი, 29 სექტემბერი - Sputnik. მარნეულში ჟურნალისტებსა და ოპერატორებს თავს დაეხდნენ, ასევე დამტვრეულია კამერები, იუწყება პირველი არხი.

შემთხვევა პარტიების „ქართული ოცნება – დემოკრატიული საქართველო“ და „ერთიანი ნაციონალური მოძრაობა“ აქტივისტებს შორის შეხლა-შემოხლის დროს მოხდა.

გავრცელებული ინფორმაციით, ინციდენტის მონაწილე ერთ-ერთი პირი ფიზიკურად გაუსწორდა  პირველი არხის ოპერატორს,  დამტვრეულია კამერაც.

საქართველოს პირველი არხის გადამღები ჯგუფი ამ დროისთვის პოლიციაში გამოკითხვაზე იმყოფება.

ასევე მარნეულში თავს დაესხნენ ტელეკომპანია „მთავარი არხის“  ოთხ თანამშრომელსაც:  ორ ჟურნალისტსა და ორ ოპერატორს, ერთ-ერთ ჟურნალისტს თავი აქვს გატეხილი. დაზიანებულია აპარატურაც.

ფაქტზე მიმდინარეობს გამოძიება.

0
თემები:
საქართველოს საპარლამენტო არჩევნები 2020