ნათია თურნავა

გაიზრდება თუ არა გაზის ტარიფი რისი სწამს ეკონომიკის მინისტრს

110
(განახლებულია 20:20 02.08.2019)
ეკონომიკის და მდგრადი განვითარების მინისტრის თქმით, განცხადებები, რომ გაზის ფასი გაიზრდებოდა შარშან, წინასაახალწლოდაც იყო, მაგრამ   გაზის ტარიფები პირიქით, შემცირდა.

თბილისი, 2 აგვისტო — Sputnik. გაზზე ტარიფების ზრდა არ მოხდება, ასეთი შინაგანი რწმენა მაქვს, განუცხადა ჟურნალისტებს ეკონომიკისა და მდგრადი განვითარების მინისტრმა, ნათია თურნავამ  მთავრობის სხდომის შემდეგ.

1 აგვისტოს  ბუნებრივი აირის სექტორში მოქმედი კომპანიებისათვის გეგმური ტარიფების დადგენის მიზნით საქართველოს ენერგეტიკისა და წყალმომარაგების მარეგულირებელმა ეროვნულმა კომისიამ საჯარო ადმინისტრაციული წარმოებები დაიწყო.

„ივლისის თვეში წლიური ინფლაციის დონე არის 4,6%, რაც ზომიერი ინფლაციაა. პანიკის საფუძველი არ არსებობს. მინდა მოგიწოდოთ, ნუ შევქმნით ნეგატიურ მოლოდინებს ამასთან დაკავშირებით. არ მოხდება გაზზე ტარიფების ზრდა. მე ასეთი შინაგანი რწმენა მაქვს და ჩემმა შინაგანმა რწმენამ შარშანაც გაამართლა“, – აღნიშნა ნათია თურნავამ.

მინსიტრის განცხადებით, მცდელობა და სხვადასხვა განცხადება,  რომ გაზის ფასი გაიზრდებოდა, შარშანაც იყო და ეს არათუ გამართლდა, არამედ გაზის ტარიფები შემცირდა კიდეც.

„ასე რომ, შეგიძლიათ სრულიად გვენდოთ ამ თვალსაზრისით“, – განაცხადა ნათია თურნავამ.

გაზისა და ელექტროენერგიის სამომხმარებლო ტარიფი დადგინდა მაშინ, როდესაც ლარის გაცვლითი კურსი დოლარის მიმართ 2,5-ს შეადგენდა. 1 აგვისტოს მონაცემებით, ლარის კურსმა დოლარის მიმართ 2,9718 შეადგინა. ექსპერტების თვალსაზრისით, ტარიფების გადახედვას ბიძგი სწორედ ამ ფაქტორმა მისცა.

საჯარო ადმინისტრაციული წარმოებები დაიწყო შპს „საქართველოს გაზის ტრანსპორტირების კომპანიის“ სატარიფო განაცხადის გეგმური გადახედვის ფარგლებში, ბუნებრივი გაზის ტრანსპორტირების ტარიფის დადგენის მიზნით. კომპანიებმა შპს „ყაზტრანსგაზ თბილისის“ (ამჟამად „თბილისის ენერჯი“), შპს „სოკარ ჯორჯია გაზის“, სს „საქორგგაზის“, სს „ენერგოკავშირის“, შპს „ვარკეთილაირის“, სს „საჩხერეგაზის“, შპს „ტაბას“, შპს „არზუ გაზის“, შპს „თელავგაზის“ ასევე დაიწყეს წარმოებები სატარიფო განაცხადების გეგმური გადახედვის ფარგლებში ბუნებრივი გაზის მიწოდების, განაწილების და მოხმარების ტარიფების დადგენის მიზნით.

შუქი და გაზი ძვირდება?>>

თუმცა, კომისიის თავმჯდომარის ირინა მილორავას განმარტებით წარმოებების დაწყება არ ნიშნავს, რომ ტარიფი გაიზრდება.

„თბილისის ენერჯის“ (ყოფილი „ყაზტრანსგაზის“) აბონენტები 2019 წლის 1 იანვრიდან ერთ კუბურ მეტრ გაზში 46,139 თეთრს იხდიან. Socar-ის აბონენტები - 49,5 თეთრს, „საქორგაზის“ – 50,02 თეთრს.

110
თემები:
საქართველოს ენერგეტიკა (88)
თბილისი

კომპენსაციის მიღების მსურველებო, დარეგისტრირდით: მთავრობამ ვადა გაახანგრძლივა

66
(განახლებულია 20:13 09.07.2020)
ამ დროისათვის სახელმწიფოსგან 300 ლარის დახმარება 100 ათასზე მეტმა თვითდასაქმებულმა და 200 ლარის თითქმის 130 ათასმა სამსახურდაკარგულმა მიიღო.

თბილისი, 9 ივლისი — Sputnik. საქართველოს მთავრობამ პანდემიის გამო შემოსავლის გარეშე დარჩენილი მოქალაქეებისა და თვითდასაქმებული პირებისთვის დახმარების მისაღებად რეგისტრაციის ვადა 1 აგვისტომდე გაახანგრძლივა, განაცხადა საქართველოს პრემიერ-მინისტრმა გიორგი გახარიამ მთავრობის სხდომის წინ.

სახელმწიფოს მხრიდან კომპენსაციის მისაღებად იმ პირთა რეგისტრაცია, რომლებმაც COVID-19-ის პანდემიის გამო შემოსავალი დაკარგეს, 15 მაისს დაიწყო და 1 ივლისს დასრულდა.

გახარიას თქმით, აუცილებლობის შემთხვევაში ვადა მომავალშიც გახანგრძლივდება.

„მოგეხსენებათ, რომ რეგისტრაციების ვადა ამოწურულია, მაგრამ მთავრობამ მიიღო გადაწყვეტილება მისი 1 აგვისტომდე გაგრძელების შესახებ. ვინც დააგვიანა, ან ვერ შეძლო ელემენტარულად საჭირო საბუთების შეგროვება, ამ ადამიანებისთვის ეს ვადა გაგრძელდა, და თუ საჭირო იქნება, რეგისტრაციის ვადა შემდგომაც გაგრძელდება. დღეს ჩვენი პირველი და ყველაზე მნიშვნელოვანი ამოცანა, ეპიდემიასთან ბრძოლასთან ერთად, იმ ჩვენი მოქალაქეების დახმარებაა, რომლებსაც კრიზისის გამო შემოსავალი შეუმცირდათ და საერთოდ დაკარგეს შემოსავალი", – განაცხადა გახარიამ.

პრემიერის თქმით, სახელმწიფოსგან 300 ლარის დახმარება 121719-მა თვითდასაქმებულმა, ხოლო 200-ლარიანი დახმარება 129 ათასზე მეტმა პირმა მიიღო, ვინც შემოსავალი დაკარგა.

რეგისტრაციის გავლა ასევე შეუძლიათ იმ პირებს, რომლებიც უცხოეთში სეზონურ სამუშაოზე იყვნენ დასაქმებული.

66
თემები:
COVID-19 საქართველოში
რთველი

„რქაწითელი" და „კახური მწვანე": მთავრობა რთვლის სუბსიდირებას გეგმავს

88
(განახლებულია 19:26 09.07.2020)
გიორგი გახარიას თქმით, ფერმერული საქმიანობის სტიმულირება მთავრობის ანტიკრიზისული გეგმის ერთ-ერთი მიზნობრივი მიმართულებაა.

თბილისი, 9 ივლისი — Sputnik. საქართველოს მთავრობა ქართული ყურძნის ჯიშების „რქაწითელისა" და „კახური მწვანის" სუბსიდირებას განახორციელებს, განაცხადა საქართველოს პრემიერ-მინისტრმა გიორგი გახარიამ მთავრობის სხდომაზე.

მანამდე ღვინის ეროვნული სააგენტოს თავმჯდომარემ ლევან მეხუზლამ განაცხადა, რომ, მთავრობის გადაწყვეტილებით, წელს რთვლის სუბსიდირებაზე 60 მილიონი ლარი დაიხარჯება.

მეხუზლას თქმით, სუბსიდია, სავარაუდოდ, მხოლოდ „რქაწითელის" ჯიშის ყურძენს შეეხება. თუმცა, როგორც აღმოჩნდა, სიაში „კახური მწვანეც" არის.

„მთავრობა რთველის სუბსიდირებას განახორციელებს, განსაკუთრებით, ყურძნის ისეთი ჯიშების, როგორიცაა „რქაწითელი" და „კახური მწვანე", რომელთა ფასიც 80 თეთრზე დაბალი არ იქნება", – განაცხადა გახარიამ.

გახარიას თქმით, ფერმერული საქმიანობის სტიმულირება მთავრობის ანტიკრიზისული გეგმის ერთ-ერთი მიზნობრივი მიმართულებაა.

„ყველამ კარგად იცის, რომ მთავრობის ანტიკრიზისული გეგმის ერთ-ერთი მთავარი სამიზნე გახლავთ სოფელი, ფერმერი, ქართველი გლეხი. ჩვენ ყველაფერი გავაკეთეთ იმისთვის, რომ სხვადასხვა ინსტრუმენტით ამ ადამიანებს დავხმარებოდით, ქართველი ფერმერი გაგვეძლიერებინა კრიზისის პირობებში", – განაცხადა გახარიამ.

როგორც მან აღნიშნა, თუ აუცილებლობა იქნება, სახელმწიფო ყურძნის შესყიდვაშიც ჩაერთვება.

ამასთან, პრემიერმა მოკლე ექსკურსი გააკეთა და აღნიშნა, თუ რამდენად წარმატებული იყო გასული წლები ქართული მევენახეობისა და მეღვინეობისთვის.

„2019 წელი იყო რეკორდული – საქართველოდან 94 მილიონი ბოთლი ღვინის ექსპორტი განხორციელდა. რა თქმა უნდა, შიდა მოხმარებაც იზრდებოდა. 2012 წელს ქართულ ექსპორტში მეღვინეობის წილი მთლიანობაში დაახლოებით 2.5% იყო, დღეს კი 6%-ია", – განაცხადა გახარიამ.

საქართველოში რთველის სეზონი სექტემბრიდან იწყება. იმისთვის, რომ პანდემიის გამო გამოწვეული ეკონომიკური კრიზისი რთველზე არ აისახოს, საქართველოს ხელისუფლებამ მეღვინეობის დარგზე ანტიკრიზისული გეგმის ფარგლებში ზრუნვა გადაწყვიტა. აღნიშნული გადაწყვეტილება ივნისის დასაწყისში პრემიერთან სოფლის მეურნეობის სამინისტროსა და შესაბამისი უწყებების წარმომადგენლების სამუშაო შეხვედრაზე იქნა მიღებული.

88
თემები:
საქართველოს მთავრობა
საპატრულო პოლიცია

ავარია სამეგრელოში - დაშავებულთა შორის ორი ბავშვია

0
BMW-ს მარკის მანქანის მძღოლმა საჭე ვერ დაიმორჩილა, ავტომობილი გზის სავალი ნაწილიდან გადავიდა და ხეს დაეჯახა.

თბილისი, 9 ივლისი – Sputnik. შვიდი ადამიანი დაშავდა ხობის მუნიციპალიტეტის სოფელ ჭალადიდში მომხდარი ავარიის შედეგად. დაშავებულთა შორის ორი ბავშვია, იუწყება საზოგადოებრივი მაუწყებლის პირველი არხი.

გავრცელებული ინფორმაციით, BMW-ს მარკის მანქანის მძღოლმა საჭე ვერ დაიმორჩილა, ავტომობილი გზის სავალი ნაწილიდან გადავიდა და ხეს დაეჯახა.

დაშავებულები სასწრაფო-სამედიცინო დახმარების ჯგუფებმა ფოთის ჰოსპიტალში გადაიყვანეს.

„ადგილზე მისულ სასწრაფო დახმარების ბრიგადას დახვდა შვიდი დაზარალებული, მათ შორის ორი ბავშვია. საჭირო გახდა დამატებითი ჯგუფების გამოძახება. ერთ-ერთ დაშავებულს აღენიშნებოდა მრავლობითი ტრავმა და იყო შედარებით მძიმე. ყველა მათგანს ადგილზე გაეწია პირველადი დახმარება და გადაყვანილი არიან ფოთის ჰოსპიტალში“, – განაცხადა საგანგებო სიტუაციების კოორდინირებისა და გადაუდებელი დახმარების ფოთის ცენტრის ხელმძღვანელმა, კესო გელენიძემ.

შსს-მ მომხდართან დაკავშირებით გამოძიება სისხლის სამართლის კოდექსის 276-ე მუხლის მეორე ნაწილით დაიწყო. იგი ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ჯანმრთელობის დაზიანება გამოიწვია.

0
თემები:
შემთხვევები საქართველოში