კრიპტომატი

რა შემთხვევაში გადაიხდის კრიპტობიზნესი დღგ-ს

356
(განახლებულია 14:22 05.07.2019)
საქართველოს მთავრობამ კრიპტობიზნესის რეგულირების მიმართულებით პირველი ნაბიჯი გადადგა.

ნატა პატარაია

კრიპტობიზნესი, რომელიც საქართველოში დარეგისტრირებული საშუამავლო კომპანიის – ე.წ. მაინინგ–პულის მომსახურებით ისარგებლებს, დამატებითი ღირებულების გადასახადით დაიბეგრება, განუცხადა „Sputnik-საქართველოს“ კომპანია „ოქროს საწმისის“ დამფუძნებელმა ვახტანგ გოგოხიამ.

„მაინერები, რომლებიც კრიპტოვალუტას სხვა ქართული კომპანიისგან მიიღებენ, დღგ-თი დაიბეგრებიან. მომსახურების გამწევ კომპანიას კი დღგ-ის ჩათვლის უფლება ექნება“, – აღნიშნა ვახტანგ გოგოხიამ ფინანსთა სამინისტროს მიერ კრიპტოაქტივის და მის მოსაპოვებლად გამოთვლითი სიჩქარის (სიმძლავრის) მიწოდების ოპერაციების გადასახადებით დაბეგვრის თაობაზე მიღებულ გადაწყვეტილებაზე საუბრისას.

კრიპტოვალუტა ვირტუალური ფულია, მაინერი – მისი მომპოვებელი კომპიუტერი, ვირტუალური ფულის წარმოების პროცესს მაინინგს უწოდებენ, ხოლო მაინინგ–პული ის შუამავალია, რომელიც ამ სიმძლავრეებს ერთ სივრცეში აერთიანებს.

კრიპტოვალუტის მოპოვება დღეს ნებისმიერ მსურველს შეუძლია, რომელსაც შესაბამისი სიმძლავრის კომპიუტერული მოწყობილობები და სპეციალური პროგრამული უზრუნველყოფა გააჩნია. მაინინგის პროცესში კომპიუტერები „მონეტებს" კრიპტოგრაფიული ალგორითმის გამოთვლით და ტრანზაქციების ვალიდურობის დადასტურებაში მონაწილებით მოიპოვებენ.

ფინანსთა სამინისტროს მიერ კრიპტოაქტივებზე გამოქვეყნებული საჯარო გადაწყვეტილების თანახმად, „კრიპტოაქტივის მოსაპოვებლად გამოთვლითი სიმძლავრის მიწოდება ექვემდებარება დღგ-ით დაბეგვრას, თუ ამ მომსახურების მიმღები წარმოადგენს საქართველოში რეგისტრირებულ პირს ან საქართველოში გააჩნია მიღებულ მომსახურებასთან დაკავშირებული მართვის ადგილი ან მუდმივი დაწესებულება“.

ვახტანგ გოგოხიას განმარტებით, ფინანსთა სამინისტროს დოკუმენტში საუბარია „მაინინგ–პულებზე“ – საშუამავლო კომპანიებზე, რომლებიც უამრავ მაინერს აკავშირებს ერთმანეთთან შესაბამისი ვებ-გვერდის მეშვეობით. დღგ-ის გადამხდელი ხდება ის მაინერი, რომელიც ამ საიტს უკავშირდება, მაინინგ–პულს კი შეუძლია დღგ ჩაითვალოს.

„მაინინგ–პულები“ იმისათვის არის, რომ მცირე და საშუალო სიმძლავრის მაინერები გააერთიანოს, მათი შედარებით არასტაბილური შემოსავალი კი გაასაშუალოოს და პროპორციულად გადაანაწილოს. მაგალითად, თუ ერთი სერვერი გარკვეული კრიპტოვალუტის მოპოვებას უნდება რამდენიმე თვე და ის შემდეგ ჩაერიცხება, მაინინგ–პულთან დაკავშირების შემთხვევაში მას შეიძლება ყოველდღე ჩაერიცხოს იმ თანხის პროპორციული რაოდენობა და სტაბილურად მიიღოს შემოსავალი“, – აღნიშნა ვახტანგ გოგოხიამ.

კომპანია „ოქროს საწმისის“ დამფუძნებლის თქმით, სამინისტროს გადაწყვეტილებიდან გამომდინარე, კრიპტო-ბიზნესის დაბეგვრაც იმავე რეჟიმით მოხდება, როგორც სხვა მომსახურების რეალიზაციის შემთხვევაში იქნებოდა. იქნება გათვალისწინებული ბიზნესის წლიური ბრუნვაც, რადგან, საგადასახადო კანონმდებლობის თანახმად, კომპანია დღგ-ის გადამხდელი მხოლოდ 100 000 ლარის მოცულობით ბრუნვის შემთხვევაში ხდება.

„აღსანიშნავია ისიც, რომ საქართველოში მაინერების 99% იყენებს უცხოურ მაინინგ–პულებს, შესააბამისად, ეს ოპერაცია საქართველოდან ჩაითვლება როგორც მომსახურების ექსპორტი ან გამოთვლითი სიმძლავრის ექსპორტი და არ დაიბეგრება“, – აღნიშნა ვახტანგ გოგოხიამ.

რაც შეეხება ქართულ მაინინგ–პულებს. ვახტანგ გოგოხიას თქმით, მართალია, საქართველოში შეიქმნა რამდენიმე, მაგრამ მათ ადგილობრივ მაინერებს შორის პოპულარობა ვერ მოიპოვეს.

ფინანსთა სამინისტროს გადაწყვეტილების თანახმად, ფიზიკური პირების საქმიანობა გათავისუფლებულია საშემოსავლო გადასახადისგან; ფიზიკური პირის მიერ კრიპტოაქტივის მიწოდებით მიღებული შემოსავალიც ასევე გათავისუფლებულია დღგ-სგან.

ფინანსთა სამინისტროს დოკუმენტში ასევე აღნიშნულია, რომ კრიპტოაქტივის თითოეულ ერთეულს გააჩნია საბაზრო ღირებულება, იგი შეიძლება იქნეს ემისირებული, ჰყავდეს მესაკუთრე, გადაეცეს საკუთრების უფლება სხვას და დაიყოს ნაწილებად, შესაძლებელია მისი შესყიდვა და გაყიდვა. გადაწყეტილებაში ამავე დროს დაფიქსირებულია, რომ, საქართველოს კანონმდებლობის შესაბამისად, კრიპტოაქტივი არ არის გადახდის კანონიერი საშუალება და არც ელექტრონული ფული.

„ამ გადაწყვეტილებაში ყველაზე მნიშვნელოვანი მაინც ისაა, რომ სახელმწიფომ დააფიქსირა საკუთარი პოზიცია კრიპტოვალუტებთან დაკავშირებით და ხაზი გაუსვა იმას, რომ ეს ვირტუალური ფული ვალუტის ალერნატივაა და არა საქონელი ან სხვა რაიმე აქტივი“, – მიაჩნია ვახტანგ გოგოხიას.

მართალია, საქართველოს კანონმდებლობა არ არეგულირებს ვირტუალურ ვალუტასთან დაკავშირებულ საქმიანობას და კრიპტოვალუტა არ წარმოადგენს ქვეყანაში გადახდის კანონიერ საშუალებას, მაგრამ ფიზიკურ პირებს შორის ვირტუალური ფულით ანგარიშსწორება მაინც ხდება და ეს იგივეა, რაც, მაგალითად, ბარტერი.

რაც შეეხება საქართველოში კრიპტოვალუტის გადახდის საშუალებად ცნობის პერსპექტივას, ვახტანგ გოგოხიას აზრით, ეს ჯერ ევროკავშირში უნდა მოხდეს.

კრიპტოვალუტების მაინინგი ბოლო წლებში საქართველოში პოპულარულ საქმიანობად ითვლება. 2018 წელს გამოქვეყნებული  კემბრიჯის ალტერნატიული ფინანსების ცენტრის (CCAF) კვლევის შედეგებით, საქართველო კრიპტოვალუტის მაინინგზე დახარჯული ელექტროენერგის მოცულობით მსოფლიოში მეორე ადგილზე იყო. ქვეყანაში ვირტუალური ვალუტის მოპოვებაზე კი 60 მეგავატი ელექტროენერგია იხარჯებოდა.

356
ცარიელი რესტორნები

შესაძლოა რესტორნებმა ღამის საათებში კვლავ განაგრძონ ფუნქციონირება

78
რესტორნების 22:00 საათზე დახურვის გადაწყვეტილებას საქართველოს მთავრობა კიდევ ერთხელ გადახედავს. საკითხის ხელახლა განხილვასთან დაკავშირებით პირობა რესტორატორთა ასოციაციის დამფუძნებელმა მთავრობის მეთაურისგან მიიღო.

თბილისი, 24 ოქტომბერი - Sputnik. პრემიერ-მინისტრისგან მივიღეთ პირობა, რომ რესტორნების 22:00 საათზე დახურვის გადაწყვეტილება კიდევ ერთხელ გადაიხედება. ამის შესახებ საქართველოს რესტორატორთა ასოციაციის დამფუძნებელმა და ვიცე-პრეზიდენტმა, შოთა ბურჯანაძემ განაცხადა. ინფორმაციას „საქართველოს პირველი არხი“ იუწყება.

ბურჯანაძის თქმით, საუბარია რესტორნების დივერსიფიკაციაზე, რომლებსაც შესაძლებლობა ექნებათ, იმუშაონ 22:00 საათის შემდეგ ისე, რომ ვირუსის გადაცემის რისკი მაქსიმალურად შემცირდეს.

 „კონკრეტული დაპირება მიღებულია შეთავაზებიდან გამომდინარე. ბოლო რეგულაცია, რომელიც 22:00 საათზე რესტორნების დახურვას ეხება, გადაიხედება და ჩვენ აუცილებლად შევთავაზებთ იმ სიტუაციას, რითაც შეიძლება მდგომარეობის გაუმჯობესება და ამაზე შეპირება კონკრეტული მიღებულია“, – განაცხადა ბურჯანაძემ.

შოთა ბურჯანაძის თქმით პრემიერთან შეხვედრაზე მთავრობის მეთაურს ბიზნესის სფეროში არსებული პრობლემები გააცნეს.

რესტორატორთა ასოციაციის დამფუძნებელი აცხადებს, რომ პანდემიის გამო სამასპინძლო ბიზნესზე დიდი დარტყმაა, რის გამოც 300 000 ადამიანზე მეტს სამსახურის დაკარგვა ემუქრება.

 „ჩვენი ასოციაციის სახელით მოთხოვნა იყო პრემიერთან შეხვედრა იმ პრობლემებთან დაკავშირებით სასაუბროდ, რომელიც დღეს აღნიშნულ სფეროში არსებობს. პრემიერმა აღნიშნა, რომ პრობლემა ძალიან დიდია და აუცილებელია სახელმწიფოს ჩარევა ბიზნესის დახმარების კუთხით“, - განაცხადა შოთა ბურჯანაძემ.

მისი თქმით, აუცილებელია ბიზნეს სექტორში სამუშაო ადგილების გადარჩენა, აღნიშნული საკითხი კი პრემიერის მხრიდან სრულად და ადეკვატურად იქნა გაზიარებული.

შეხვედრაზე ასევე იმსჯელეს დღგ-ს გადასახადზე და ბანკებთან ურთიერთობებზე.

ბურჯანაძის განცხადებით, შეიქმნება სამუშაო ჯგუფი, რომელიც არსებული სიტუაციის გაუმჯობესებაზე იმუშავებს.

შეგახსენებთ, რესტორნები თბილისსა და იმერეთის რეგიონში, კორონავირუსის პანდემიის გავრცელების აღკვეთის მიზნით, 16 ოქტომბრიდან მუშაობის შეზღუდულ რეჟიმზე გადავიდნენ – მათ სტუმრების მომსახურება მხოლოდ 22:00 საათამდე შეუძლიათ.

20 ოქტომბერს კი რესტორნების სამუშაო გრაფიკი მცხეთის მუნიციპალიტეტშიც შეიზღუდა.

საქართველოში ბოლო დროს კორონავირუსით ინფიცირების შემთხვევები ძალიან გაიზარდა. ქვეყანა ფაქტობრივად უკვე გადავიდა ისეთ რეჟიმში, როდესაც ინფიცირებულთა ყოველი მომდევნო სტატისტიკა რეკორდულია.

ბოლო დღეებში საქართველოში ახალი კორონავირუსით დაავადებულთა რაოდენობა კიდევ უფრო გაიზარდა. ბოლო დღე-ღამეში ინფიცირებულთა რიცხვმა 1941-ით იმატა და საერთო რაოდენობა 26503-ს შეადგენს. მონაცემები საქართველოს მთავრობის მიერ შექმნილ სპეციალურ ვებ-გვერდზე stopcov.ge დღის პირველ ნახევარში განახლდა.

საქართველოში კორონავირუსის პირველი შემთხვევა 26 თებერვალს დაფიქსირდა.

78
თემები:
COVID-19 საქართველოში
ფოთის პორტი

ფოთის პორტი გაფართოვდება: ინვესტორებმა შეთანხმება უკვე გააფორმეს

42
(განახლებულია 11:26 24.10.2020)
APM Terminals Poti მოახდენს ინვესტირებას 400 მეტრის სიგრძის ნავმისადგომის მშენებლობაში და 13.5 მეტრამდე ფსკერის დაღრმავებაში, ხოლო კორპორაცია განახორციელებს ინვესტიციას მშრალი და ნაყარი ტვირთებისთვის განკუთვნილ ახალ ინფრასტრუქტურაში

თბილისი, 24 ოქტომბერი – Sputnik. კომპანიამ APM Terminals Poti და „ფოთის ახალი ტერმინალების კორპორაციამ“ (PNTC) ხელი მოაწერეს შეთანხმებას ფოთის საზღვაო ნავსადგურის ჩრდილოეთით მშრალი და ნაყარი ტვირთების ახალი ტერმინალის ერთობლივად განვითარებაზე, ნათქვამია კომპანიის განცხადებაში.

აღნიშნული დოკუმენტის თანახმად, APM Terminals Poti მოახდენს ინვესტირებას 400 მეტრის სიგრძის ნავმისადგომის მშენებლობაში და 13.5 მეტრამდე ფსკერდაღრმავებითი სამუშაოებში, ხოლო კორპორაცია განახორციელებს ინვესტიციას მშრალი და ნაყარი ტვირთებისთვის განკუთვნილ ახალ ინფრასტრუქტურაში, რომელიც მოიცავს მასშტაბური საოპერაციო ზონის მოწყობას და სარკინიგზო ხაზთან კავშირის უზრუნველყოფას ფოთში.

ინვესტიციების განხორციელება შესაბამისი სამშენებლო ნებართვების მიღებაზეა დამოკიდებული.

ფოთის პორტის გაფართოება

ფოთის პორტის მფლობელმა კომპანია APM Terminals Poti-მ მიწათსარგებლობის ნებართვა მიიღო, რაც ღრმაწყლოვანი ნავსადგურის მშენებლობის ნებართვის მოპოვების სამსაფეხურიანი პროცედურის საწყის ეტაპს წარმოადგენს.

კომპანიას ფოთის ნავსადგურის გაფართოება სურს, რათა საქართველოს გააჩნდეს თანამედროვე ლოგისტიკური კარიბჭე, რომელიც Panamax-ის ტიპის გემებს მოემსახურება.

APM Terminals Poti პროექტის განხორციელებას 24-30 თვეში გეგმავს. ის ორი ფაზისგან შედგება.

პირველი ფაზა 1,7 ათასი მეტრი სიგრძის მოლის მშენებლობასა და ასევე 400 მ სიგრძისა და 13,5 მ სიღრმის მრავალფუნქციური ნავმისადგომის მოწყობას ითვალისწინებს. ეს პორტს 9 ათას TEU–მდე წყალტევადობის ხომალდების მიღების  და დამატებით 150 ათას TEU-მდე მოცულობის ტვირთების გადამუშავების საშუალებას მისცემს.

მეორე ფაზა 300 მეტრიანი საკონტეინერო ნავმისადგომის მშენებლობას მოიაზრებს, სადაც სამი ამწე იქნება განთავსებული და რაც წლიურ ტვირგამტარობას 1 მლნ TEU–მდე გაზრდის.

ფოთის პორტი ღრმაწყლოვანი ანაკლიის აშენებამდე გახდება >>

კომპანია მშრალი ტვირთების ოპერირებას გეგმავს. ეს იქნება რკინის ჯართი მთელი რეგიონიდან, სასუქი, ასევე მარცვლეული აზერბაიჯანიდან, თურქმენეთიდან და ყაზახეთიდან.

42
თემები:
საქართველოს ეკონომიკა
ნახევარმთვარე

მთვარის კალენდარი: 25 ოქტომბერი რისი გაკეთება შეიძლება და რისი არა

0
(განახლებულია 18:14 24.10.2020)
გაეცანით ჩვენს ყოველდღიურ კალენდარს და შეიტყვეთ, რა საქმიანობა იქნება წარმატების მომტანი ამა თუ იმ დღეს ღამის მანათობლის განწყობის მიხედვით.

მთვარეს უზარმაზარი ძალა გააჩნია და დიდი ზეგავლენის მოხდენა შეუძლია ადამიანებზე, რადგან ყველა კოსმოსურ ობიექტს შორის დედამიწასთან ყველაზე ახლოს იმყოფება.

25 ოქტომბერი, კვირა. ამ დღეს მზე მართავს. მზარდი მთვარე მერწყულის ნიშანშია.

მთვარე მერწყულის ნიშანში – ამ დღეს ჩნდება ინტერესი ყოველი ახლისადმი, მოულოდნელად მოდის საინტერესო იდეები, ადამიანებში იზრდება დამოუკიდებლობის წყურვილი, ექსტრავაგანტულობა, კომუნიკაბელურობა, ექსპერიმენტებისკენ სწრაფვა, შემოქმედებითი დამოკიდებულება ყველაფრისადმი.

კარგი დღეა მეგობრობისა და ფლირტისთვის. თუ გინდათ, რომ პარტნიორისთვის საყვარელი ადამიანი იყოთ, გახდით მისი მეგობარიც და არ შეუშინდეთ ორიგინალობას. მთვარეს მერწყულში უცნაური და უჩვეულო ნაცნობობა შეუძლია მოიტანოს. არ გაგიკვირდეთ ვითარების სწრაფი ცვლა, ეცადეთ, პარტნიორი იდეალურად არ აღიქვათ.

ასეთ დროს სასიყვარულო ურთიერთობებზე დიდ გავლენას ახდენს მეგობრების მოსაზრებები. თუ გაჩნდება მეგობრობა, ურთიერთგაგება, მაშინ რომანი, დიდი ალბათობით, დიდხანს გაგრძელდება. ეს უფრო ორიგინალური კავშირი იქნება, ვიდრე მგზნებარე და ვნებიანი.

როგორი საფულე უნდა შეარჩიონ ზოდიაქოს ნიშნების წარმომადგენლებმა>>

რეკომენდებულია დასვენება, ძალების აღდგენა, შინაგან სამყაროზე ზრუნვა, ფრთხილი დამოკიდებულება ძვირფასეულობის მიმართ – არის გაქურდვის, დაკარგვის ალბათობა, თავშეკავება და მოთმინება სამუშაოზე ურთიერთობებში – ამ დღეს წარმოქმნილი კონფლიქტის მოგვარება რთული იქნება, თავის შეკავება როგორც აგრესიის, ისე კეთილი ზრახვების გამოვლენისგან, უარის თქმა მომგებიან გარიგებებზე და ავანტიურულ ღონისძიებებში ჩაბმაზე, სერიოზული საქმეების გაუქმება ან გადადება, შემოქმედებითი საქმიანობა.

არარეკომენდებულია ბიზნეს–საქმიანობა, პრეზენტაციებსა და გასართობ ღონისძიებებზე დასწრება, კონტრაქტების დადება, დოკუმენტებზე ხელმოწერა, ვალის გაცემა და აღება.

ხელსაყრელი დღეა მგზავრობისთვის, მოგზაურობის დაწყებისთვის.

თმის შეჭრა, შეღებვა: ამ დღეს სჯობს, თმის შეჭრისგან თავი შეიკავოთ. შეღებვისთვის კარგი დროა. მანიკურისთვის ძალზე ხელსაყრელი დღეა.

მებაღეობა:  ვინაიდან მერწყულის ნიშანი მებაღეობის მხრივ არცთუ ნაყოფიერი პერიოდია, შეიძლება მხოლოდ ბრძოლა მავნებლებთან, მცენარეების შეწამვლა, ნიადაგის გაფხვიერება, არ ღირს პიკირება, მცენარეების დარგვა და გადარგვა.

0