WinExpo Georgia 2019

„ღმერთების სასმელი“ - საქართველოში ღვინის გამოფენა დაიწყო

92
ღვინისა და ალკოჰოლური სასმელების გამოფენამ WinExpo 2019 თბილისში 12 ქვეყნის 160 კომპანიის წარმომადგენელი შეკრიბა

თბილისი, 13 ივნისი — Sputnik. თბილისში ღვინისა და ალკოჰოლური სასმელების რიგით მეთორმეტე საერთაშორისო გამოფენა WinExpo Georgia 2019 გაიხსნა.

WinExpo Georgia  — საქართველოში ერთადერთი და ყველაზე მასშტაბური სავაჭრო გამოფენაა, რომელზეც წარმოდგენილია ღვინისა და ალკოჰოლური სასმელების წარმოებისთვის ყველა საჭირო კომპონენტი. ეს არის მევენახეობა-მეღვინეობის მანქანა-დანადგარები, სასუქები, ნერგები, ტარა და შესაფუთი მასალები, აქსესუარები და სერვისების ფართო სპექტრი. ღონისძიება აერთიანებს ტრადიციულ სავაჭრო გამოფენას დამატებითი ღონისძიებების გეგმით, რომელიც გამოფენის პარალელურად გაიმართება. გამოფენა 13-15 ივნისს გაიმართება.

ქართული ნატურალური ღვინო კრაკოვში დააგემოვნეს >>

„გამოფენის მასშტაბი, მონაწილე კომპანიების და ვიზიტორთა რაოდენობა ყოველწლიურად იზრდება, რაც ადასტურებს გამოფენის პრესტიჟულობას და ქართული ღვინისადმი გაზრდილ ინტერესს“, - განაცხადა სოფლის მეურნეობის მინისტრმა ლევან დავითაშვილმა გამოფენის გახსნაზე.

გამოფენაში 12 ქვეყნის (საქართველო, საფრანგეთი, გერმანია, იტალია, პორტუგალია, რუმინეთი, ესპანეთი, აზერბაიჯანი, რუსეთი, უკრაინა, ბელარუსია და თურქეთი) 160-მდე კომპანია მონაწილეობს, რომელთა შორის 110-ზე მეტი ღვინის მწარმოებელი მსხვილი, საშუალო და მცირე კომპანიაა.

WinExpo-ს ყოველწლიურად დაახლოებით 4 ათასი დამთვალიერებელი სტუმრობს.

„წლების განმავლობაში, ქვეყანაში ღვინის ინდუსტრია სწრაფად ვითარდება, იქმნება ღვინის მწარმოებელი ახალი კომპანიები, ინერგება ახალი ტექნოლოგიები და იწარმოება მაღალი ხარისხის ღვინო. ყოველწლიურად იზრდება ქართული ღვინის ექსპორტიც“, - აღნიშნა დავითაშვილმა.

ღვინის ექსპორტი საქართველოში
© Sputnik /
ღვინის ექსპორტი საქართველოში

ღვინის დამზადების ტრადიცია საქართველოში რვა ათას წელს ითვლის. მას განსაკუთრებული ადგილი უჭირავს ქართულ კულტურაში. ღვინისა და ვაზის გამოსახულებები გამოყენებულია ხალხურ ხელოვნებაში, სულიერი და მატერიალური კულტურის ძეგლებში. 2017 წელს საერთაშორისო სპეციალისტებმა დაამტკიცეს, რომ საქართველო მეღვინეობის სამშობლოა.

დღეს საქართველოში უამრავი ყურძნის ჯიში მოჰყავთ. დაახლოებით 500 სახეობა მთელ მსოფლიოში ცნობილი 4 ათასი სახეობიდან ქართული წარმომავლობისაა. ღვინის დამზადებისა და ქვევრში შენახვის ტრადიციული ქართული მეთოდი კი 2013 წლიდან იუნესკოს კულტურული მემკვიდრეობის ძეგლთა სიაშია შეტანილი.

92
თემები:
ღვინის კულტურა და მეღვინეობა (67)
ავტოგასამართი სადგური

ნავთობპროდუქტების იმპორტი: რატომ შემცირდა საწვავის შემოტანა საქართველოში

46
(განახლებულია 14:24 25.05.2020)
საქართველოში ნავთობპროდუქტების იმპორტის შემცირება ქვეყანაში ბოლო ორ თვეში საწვავის მოხმარების შემცირებითაა გამოწვეული.

თბილისი, 25 მაისი – Sputnik. საქართველოში საწვავის იმპორტი შემცირდა – 2020 წლის აპრილში ქვეყანაში 68,5 ათასი ტონა ბენზინი და დიზელის საწვავი შემოიტანეს, რაც 18,8%-ით ნაკლებია მიმდინარე წლის მარტის მაჩვენებელზე და 20,6%-ით ნაკლები 2019 წლის აპრილის თვის მაჩვენებელზე. ამის შესახებ საქართველოს ნავთობპროდუქტების იმპორტიორთა კავშირის განცხადებაშია აღნიშნული.

საქართველოში საწვავი შემოდის რუსეთიდან, აზერბაიჯანიდან, ბულგარეთიდან, რუმინეთიდან, თურქმენეთიდან, საბერძნეთიდან და თურქეთიდან. ნავთობპროდუქტები ქვეყანაში რკინიგზითა და ზღვით შემოდის.

ნავთობპროდუქტების ყველაზე მსხვილი მომწოდებელი რუსეთია. ნავთობპროდუქტების იმპორტიორთა კავშირის მონაცემებით, რუსეთიდან აპრილში 31,2 ათასი ტონა ნავთობპროდუქტი შემოვიდა, რაც მთელი იმპორტის 45,5%-ს შეადგენს.

სულ 2020 წლის იანვარი-აპრილის განმავლობაში საქართველოში ბენზინისა და დიზელის საწვავის იმპორტმა შეადგინა 312,9 ათასი ტონა, რაც 6,0 ათასი ტონით, ანუ 1,9%-ით ნაკლებია გასული წლის ანალოგიური პერიოდის მაჩვენებელთან (318,9 ათასი ტონა) შედარებით.

მათ შორის, მიმდინარე წლის აპრილის თვეში საქართველოში ბენზინის საწვავის იმპორტმა შეადგინა 32,1 ათასი ტონა (კლება გასული წლის ანალოგიური პერიოდის მაჩვენებელთან შედარებით 8,6 ათასი ტონით, ანუ 21,1%-ით), ხოლო დიზელის საწვავის იმპორტმა – 36,4 ათასი ტონა (კლება გასული წლის ანალოგიური პერიოდის მაჩვენებელთან შედარებით 9,2 ათასი ტონით, ანუ 20,2%-ით).

რატომ შემცირდა იმპორტი

ნავთობპროდუქტების იმპორტის შემცირება საქართველოში გამოწვეულია კორონავირუსის პანდემიის გამო დაწესებული შეზღუდვების შედეგად საწვავის მოხმარების შემცირებით, განმარტავს საქართველოს ნავთობპროდუქტების იმპორტიორთა კავშირის თავმჯდომარე ვანო მთვრალაშვილი.

„აპრილში თითქმის ორი კვირა იყო შეზღუდული დედაქალაქში ტრანსპორტის მოძრაობა. გარდა ამისა, მოქმედებდა კომენდანტის საათი და საღამოს ცხრა საათის შემდეგ ტრანსპორტით მოძრაობა აკრძალული იყო. დიდი ქალაქები ჩაიკეტა - საქალაქთაშორისო კავშირი შეწყდა, მათ შორის, გაჩერდა საზოგადოებრივი ტრანსპორტიც. მოკლედ, COVID-19-ის გამო ეკონომიკური საქმიანობა მნიშვნელოვნად შეიზღუდა“, - აღნიშნა მთვრალაშვილმა „Sputnik-საქართველოსთან" საუბრისას.

ამასთან, მისი თქმით, იმპორტის შემცირება იმდენად თვალშისაცემი არ არის, როგორც მოხმარებისა და გაყიდვების შემცირება.

ნავთობპროდუქტების იმპორტიორთა კავშირის თავმჯდომარის თქმით, ამ პერიოდში ნავთობის ფასი საერთაშორისო ბაზრებზე საგრძნობლად დაეცა, შესაბამისად, კომპანიებმა შეიძინეს მარაგი, რომელიც ჯერ არ არის რეალიზებული.

კორონავირუსის პანდემიის გამო 2020 წლის დასაწყისიდან მთელ მსოფლიოში ეცემა საწვავის ფასი, რაც ნავთობის გაიაფებით არის გამოწვეული. მარტის დასაწყისიდან ნავთობის ფასი ლონდონის ბირჟაზე (ICE Futures Europe) საშუალოდ 55,5%-ით დაეცა.

ვინ და როგორ შეძლებს მუშაობას საქართველოში: წესების და შეზღუდვების სრული ჩამონათვალი>>

„ანუ, რეალურად იმპორტის მაჩვენებელი არ ნიშნავს, რომ გაყიდვა და მოხმარება იდენტური იყო. გაყიდვა და მოხმარება კიდევ უფრო ნაკლები იყო, ვიდრე იმპორტი. გამომდინარე იქიდან, რომ შეზღუდვები გარკვეული სახის ეკონომიკურ საქმიანობაზე ეტაპობრივად იხსნება, ტრანსპორტის მოძრაობა დედაქალაქსა და სხვა რეგიონებში ნაწილობრივ აღდგენილია, გაყიდვებიც მაისიდან მნიშვნელოვნად მოიმატებს“, – აღნიშნა მთვრალაშვილმა.

საწვავის ფასი

საწვავის კატეგორიების მიხედვით 2020 წლის აპრილის თვეში ბენზინის საწვავის იმპორტმა შეადგინა: A-91 რეგულარი მარკის ბენზინი – 23,4 ათასი ტონა, ანუ 72,9%; A-95 პრემიუმი მარკის ბენზინი – 8,3 ათასი ტონა, ანუ 25,9%, A-98 სუპერი მარკის ბენზინი – 0,4 ათასი ტონა, ანუ 1,2%.

დღეს საქართველოში ხუთი  მსხვილი კომპანია ოპერირებს, რომელთაც მთელ ქვეყანაში 600-მდე ავტოგასამართი სადგური ეკუთვნის. მათ გარდა არის ასევე მცირე და საშუალო კომპანიები, ე.წ. არაბრენდირებული, რომლებსაც ერთად ასევე დაახლოებით 600 ავტოგასამართი სადგური ეკუთვნის.

საქართველოში საწვავის ფასი დამოკიდებულია მსოფლიო ბაზარზე ნავთობპროდუქტების ღირებულებასა და ლარის კურსზე.

„პანდემიის დაწყებას ემთხვევა ნავთობის ფასების ვარდნა გლობალურ ბაზრებზე, მათ შორის, მნიშვნელოვნად მცირდება ნავთობპროდუქტების საერთაშორისო ფასები Platts-ის მიხედვით. სწორედ ამ პერიოდში – პანდემიის დაწყებიდან დღემდე საქართველოში საწვავის ფასები საშუალოდ ყველა სახის პროდუქტზე 60-80 თეთრით შემცირდა“, – განაცხადა მთვრალაშვილმა.

ამასთან, როგორც მან აღნიშნა, ამ პერიოდში ლარი რომ არ გაუფასურებულიყო დოლარის მიმართ, საწვავი გაცილებით უფრო გაიაფდებოდა.

იაფი საწვავი ფერმერებისთვის: როგორ იმუშავებს სქემა>>

ამჟამად ბრენდირებული ავტოგასამართი სადგურების ქსელებში ერთი ლიტრი საწვავის საშუალო ფასია: სუპერის – 2,21-2,70 ლარი; პრემიუმის – 2,07-2,15 ლარი; რეგულარის – 1,92-2,05 ლარი; ევროდიზელის – 2,03-2,14. ლარის კურსი დოლარის მიმართ შეადგენს $1/3,2 ლ.

პროგნოზი

მთვრალაშვილი ოპტიმისტურადაა განწყობილი და ფიქრობს, რომ მთლიანობაში ნავთობპროდუქტების იმპორტიცა და მოხმარებაც გაიზრდება, თუმცა საწყის ნიშნულს არ დაუბრუნდება და წინა წლის მაჩვენებელსაც ჯერ ვერ მიაღწევს.

„ტურიზმი ქვეყანაში ნავთობპროდუქტების მოხმარების მთავარი ფაქტორი იყო. ტურიზმი, გამომდინარე იმავე მოვლენებიდან, ალბათ წელს და, განსაკუთრებით, მომდევნო თვეებში, არ აღდგება და მოხმარების ზრდაზეც ვერ მოახდენს გავლენას. თუმცა ჩვენ სხვა ფაქტორები და ინდიკატორებიც გვაქვს, რომლებიც მოხმარებაზე მოქმედებენ“, – აღნიშნა მთვრალაშვილმა.

რაც შეეხება ფასებს, ნავთობპროდუქტების იმპორტიორთა კავშირის თავმჯდომარემ აღნიშნა, რომ ფასები გლობალურ ბაზრებზე ბოლო 7–10 დღეა იზრდება და ეს ლოგიკურია, ვინაიდან 1 მაისიდან ძალაში შევიდა OPEC-ის შეთანხმება ნავთობის მოპოვების კვოტების შემცირების შესახებ.

„საერთო ჯამში, მსოფლიოში ეკონომიკა, ასე ვთქვათ, იხსნება, გაჩნდა მოთხოვნილება ნავთობზე და ფასებმა მატება დაიწყო. ამ ფონზე ფასი უმნიშვნელოდ გაიზარდა – საშუალოდ 3-5 თეთრით ზოგიერთ არაბრენდირებულ ავტოგასამართ სადგურზე. აქედან გამომდინარე, საქართველოში ფასების შემცირებას მომავალში აღარ ველოდებით“, – განაცხადა მთვრალაშვილმა.

რაც შეეხება ფასების ზრდასა და მათ კორექტირებას, ნავთობპროდუქტების იმპორტიორთა კავშირის თავმჯდომარის თქმით, ეს დამოკიდებული იქნება მომავალში ნავთობის ფასთან დაკავშირებულ პროცესებზე.

46
თემები:
საქართველოს ეკონომიკა
დაკეტილი რესტორნები და კაფეები აბანოთუბანში

საქართველო განაგრძობს საერთაშორისო დონორებისგან ფინანსური მხარდაჭერის მიღებას

37
(განახლებულია 13:04 25.05.2020)
ფრანგული მხარისგან მიღებული დაფინანსება საბიუჯეტო დახმარებას წარმოადგენს და მიმართული იქნება მთავრობის ასიგნების მხარდაჭერისკენ.

თბილისი, 25 მაისი – Sputnik. საფრანგეთის განვითარების სააგენტო (AFD) საქართველოს COVID-19-თან ბრძოლისთვის, ასევე ენერგეტიკული სექტორის რეფორმის პროგრამის მხარდაჭერისთვის 190 მილიონ ევროს გამოუყოფს, ნათქვამია საქართველოს ფინანსთა სამინისტროს განცხადებაში.

ფინანსთა მინისტრმა ივანე მაჭავარიანმა, AFD-ს სამხრეთ კავკასიის რეგიონული ოფისის დირექტორმა გაელლე ასაიაჟმა და საფრანგეთის ელჩმა საქართველოში დიეგო კოლასმა ხელი მოაწერეს ორ ხელშეკრულებას.

ფინანსთა სამინისტროს ინფორმაციით, ეს დაფინანსება საბიუჯეტო დახმარებას წარმოადგენს და მიმართული იქნება მთავრობის ასიგნების მხარდაჭერისკენ.

შეთანხმება, რომელსაც ხელი მოეწერა საფრანგეთის განვითარების სააგენტოსთან, წარმოადგენს იმ ფინანსური მხარდაჭერის ნაწილს, რომელსაც საქართველოს მთავრობა ქვეყნის ეკონომიკის შემდგომი რეაბილიტაციისთვის საერთაშორისო პარტნიორული დონორი ორგანიზაციებისგან იღებს.

მსოფლიო ბანკი საქართველოს მოსახლეობას კორონავირუსის პანდემიის დაძლევაში დაეხმარება>>

საერთაშორისო სავალუტო ფონდი დათანხმდა პროგრამა „დაფინანსების გაფართოების მექანიზმის“ გაგრძელებას, რაც საქართველოსთვის წლის ბოლომდე 447 მილიონი დოლარის გამოყოფას ნიშნავს. ამას გარდა, რიგი საერთაშორისო დონორი ორგანიზაციები საქართველოს 1,5 მილიარდ დოლარს გამოუყოფენ 2020 წლის ბოლომდე.

37
თემები:
COVID-19 საქართველოში
კადრი ფილმიდან 8 წუთი

დამოუკიდებლობის დღესთან დაკავშირებით საქართველოს კინოცენტრი 26 ფილმს აჩვენებს

0
(განახლებულია 14:06 25.05.2020)
ყველა სურათის ბმული აქტიური იქნება დღის განმავლობაში, ასე რომ, თანამედროვე ქართული მოკლემეტრაჟიანი ფილმების გაცნობის მსურველებმა უნდა იჩქარონ

თბილისი, 25 მაისი – Sputnik. საქართველოს დამოუკიდებლობის დღეს, 26 მაისს, საქართველოს კინემატოგრაფიის ეროვნული ცენტრის ორგანიზებით 26 ქართული მოკლემეტრაჟიანი ფილმის ონლაინ–ჩვენება გაიმართება.

ფილმები გამოქვეყნდება კინოცენტრის ოფიციალურ Facebook–გვერდზე. ყველა სურათის ბმული აქტიური იქნება დღის განმავლობაში, ასე რომ, თანამედროვე ქართული მოკლემეტრაჟიანი ფილმების გაცნობის მსურველებმა უნდა იჩქარონ.

წამოდგენილი იქნება ფილმები: „8 წუთი“, „ანა”, „ანდრო”, „გაბანა”, „გამოსვლა”, „დაკარგული სოფელი”, „დაცვის პოლიციელი”, „თემო”, „ლეთა”, „ლილე”, „მამა”, „მამული”, „მარქსის ქუჩა 12”, „მეთევზე და გოგონა”, „მექელეხე”, „მზადება”, „ოგასავარა”, „პირველი დღე”, „სამი საფეხური”, „სრულყოფილი შეკვეთა”, „ფრანი”, „ქარის დევნა”, „ღამის მორიგე”, „ცუდი ხალხი”, „ცხოველი”, „ჭა”.

26 მაისის დღესასწაული პირველი დემოკრატიული მთავრობის მიერ ნოე ჟორდანიას ხელმძღვანელობით 1918 წელს საქართველოს დამოუკიდებლობის გამოცხადებას უკავშირდება. პირველმა დემოკრატიულმა რესპუბლიკამ ორნახევარი წელი იარსება. საქართველომ დამოუკიდებლობა 1991 წელ აღადგინა. საყოველთაო რეფერენდუმზე დაფუძნებული შესაბამისი აქტი 9 აპრილს რესპუბლიკის უზენაესმა საბჭომ მიიღო.

0
თემები:
საქართველო და კულტურა