ღვინო „შუმი“

ქართული ღვინო და იშვიათი ტექნოლოგიები - თანამედროვე მეღვინეების ექსპერიმენტები

194
(განახლებულია 18:30 09.04.2019)
საქართველო ღვინის სამშობლოა და ეს უკვე მსოფლიო საზოგადოებრიობის მიერ აღიარებული ფაქტია. ამიტომ გასაკვირი არაა, რომ მეღვინეობა ქართველებისთვის - ერთგვარი კულტია.

საქართველოს ღვინის კომპანიები ორიგინალური გემოებისა და არომატების მისაღებად ექსპერიმენტებს ატარებენ და ახალ ტექნოლოგიებს იგონებენ. ერთ-ერთი ასეთი კომპანიაა „შუმი“, რომლის წარმომადგენელმაც „Sputnik-საქართველოსთან“ საუბრისას უჩვეულო ღვინოების წარმოების საიდუმლო გაამჟღავნა.

„წარმატებული მეღვინე რომ გამოხვიდე, პირველ რიგში, ეს სფერო უნდა გიყვარდეს. თუ ეს საქმე არ გიყვარს, წარმატებას ვერ მიაღწევ. როგორ უნდა მიუდგე მეღვინეობას? წარმოიდგინეთ, რომ ზრდით ბავშვს და ამისთვის არ იშურებთ ძალ-ღონეს, შრომას, დროს. იგივე ეხება ღვინის წარმოებასაც“, - ამბობს საბა ქიტესაშვილი.

Вино Шуми
© Sputnik / Alex Shlamov
ღვინო „შუმი“

მართლაც, საქმის სიყვარული ახალგაზრდა კაცის თითოეულ სიტყვაში იგრძნობა. იგი დარწმუნებულია, რომ ისინი, ვინც მეღვინეობაში წარმატებას ვერ მიაღწია, ან არასაკმარისად იყო შეყვარებული თავის საქმეზე ან არასაკმარისად შრომისმოყვარე იყო.

„არიან მეღვინეები, რომელთათვისაც ეს უბრალოდ სამუშაოა და მეტი არაფერი. პირველ რიგში, უნდა იყოს სიყვარული, შემდეგ კი ეს სიყვარული გაძლევს სფეროს შესწავლისა და განვითარების სტიმულს“, - ამბობს საბა.

შრომისმოყვარეობის ნაყოფი

„შუმის“ ნაწარმი, სწორედ საქმეზე შეყვარებული ახალგაზრდების შრომისმოყვარეობის წყალობით, არაერთხელ გამხდარა პრესტიჟული ჯილდოს მფლობელი და საერთაშორისო კონკურსის გამარჯვებული.

ასე მაგალითად, 2012 წლის მოსავლის ღვინო „ილერკომ“ 2016 წელს ლონდონში ღვინის საერთაშორისო კონკურსის ოქროს მედალი მოიპოვა. ის გახდა ერთადერთი ქართული ღვინო, რომელმაც იმ წელს ოქროს მედალი დაიმსახურა. „ილერკო“ მეღვინეების განსაკუთრებული სიამაყის საგანია.

Вино Шуми
© Sputnik / Alex Shlamov
ღვინო „შუმი“

თუმცა „ილერკო“ კომპანია „შუმის“ ერთადერთი წარმატებული ნაწარმი არ არის. უნდა აღინიშნოს, რომ ეს არის პირველი კომპანია საქართველოში, რომელმაც ბიოღვინის დამზადება დაიწყო.

„ვენახიც, ნიადაგიც და ვაზიც მაქსიმალურად კარგად უნდა იყოს გასუფთავებული, რომ უსუფთავესი პროდუქტი მივიღოთ. ყველაფერი მიახლოებული უნდა იყოს ნატურალური მეღვინეობის სტანდარტებთან - აკრძალულია სხვადასხვა ქიმიკატის გამოყენება“, - აღნიშნავს ქიტესაშვილი.

ეს არ არის ერთადერთი ტექნოლოგია, რომლის ავტორიც „შუმია“. ძალიან საინტერესოა ახალგაზრდა ექსპერიმენტატორების მიერ მოგონილი „მწვანე რთველის“ მეთოდი.

Вино Шуми
© Sputnik / Alex Shlamov
ღვინო „შუმი“

„მაგალითად, თუ ვაზზე ათი მტევანია, „მწვანე რთველის“ მეთოდით ჩვენ ვწყვეტთ ხუთს, დარჩენილ ხუთს კი ვაზზე ვტოვებთ დასამწიფებლად. ამგვარად, ეს ხუთი მტევანი იღებს კომპონენტებსა და რესურსებს ორმაგი მოცულობით“, - განმარტავს საბა.

მაგალითად, ამ მეთოდით დამზადებულმა ღვინო „გეორგიკა საფერავმა“ 2017 წელს ღვინისა და ალკოჰოლური სასმელების საერთაშორისო გამოფენის ფარგლებში WinExpo Georgia 2017 ოქროს მედალი მოიპოვა და საუკეთესო ღვინის წოდება დაიმსახურა.

ღვინის ფასი

რასაკვირველია, იშვიათი ტექნოლოგიებით დამზადებული ღვინო იაფი არ ღირს. თუმცა არც ის უნდა ვიფიქროთ, რომ კომპანიის პროდუქცია მხოლოდ ჯიბესქელი მომხმარებლებისთვის მზადდება. კომპანიას აქვს ასევე კლასიკური ტექნოლოგიებით დამზადებული სტანდარტული ღვინოები სავსებით ხელმისაწვდომ ფასად.

„კომპანია „შუმს“ აქვს სტანდარტული ღვინოების ხაზი, რომლის ერთი ბოთლის ფასიც 7,5 ლარიდან 15 ლარამდე მერყეობს. ჩვენ ვცდილობთ, არ ვიყოთ ორიენტირებული მხოლოდ იმ კატეგორიაზე, რომელსაც მეტის გადახდა შეუძლია“, - აღნიშნა ქიტესაშვილმა.

Вино Шуми
© Sputnik / Alex Shlamov
ღვინო „შუმი“

თავის ერთ-ერთ უპირატესობად კომპანია საკუთარი ვენახების არსებობას მიიჩნევს, რომლებიც მთელ საქართველოში, 19 მიკროზონაშია გადაჭიმული. სხვათა შორის, არა მხოლოდ კახეთში, არამედ რაჭაშიც.

„საკუთარი ვენახების არქონა კომპანიებისთვის სერიოზული პრობლემაა. ისინი იძულებული არიან, შეიძინონ ყურძენი ისე, რომ არ არიან დარწმუნებული მის ხარისხში, ზუსტად არ იციან, რა ჯიშისაა, აქვს თუ არა შერეული სხვა ჯიშის ყურძენი... ჩვენ კი შესაძლებლობა გვაქვს, მაქსიმალურად გავაკონტროლოთ მოვლის პროცესი. ყურძნის და, შესაბამისად, ღვინის ხარისხი ხომ მის მოვლაზეა დამოკიდებული“, - ამბობს ღვინის კომპანიის წარმომადგენელი.

Вино Шуми
© Sputnik / Alex Shlamov
ღვინო „შუმი“

კომპანია „შუმის“ მიერ წარმოებული ღვინის დაახლოებით 80% ექსპორტზე გადის, შიდა ბაზარზე კი 20% იყიდება.

„საქართველოს შიდა ბაზარზე ჯერ კიდევ არ არის ბოლომდე დამკვიდრებული ბოთლის ღვინის მოხმარების პრაქტიკა. აქ არ უყვართ ბოთლის ღვინოში მაღალი ფასის გადახდა. აქედან გამომდინარე, არა მარტო ჩვენ, არამედ მრავალი ღვინის კომპანიაც სწორედ ამგვარად ანაწილებს პრიორიტეტებს უცხოური ბაზრების სასარგებლოდ“, - ასკვნის ქიტესაშვილი.

სტატისტიკა

მსოფლიოში ქართული ღვინის პოპულარობა წლიდან წლამდე იზრდება - საქართველომ 2019 წლის დასაწყისიდან მსოფლიოს 37 ქვეყანაში 19,4 მილიონი ბოთლი ღვინო გაიტანა - 10%-ით მეტი, ვიდრე გასული წლის იანვრიდან მარტამდე. ექსპორტირებული ღვინის საერთო ღირებულება 47 მილიონი დოლარია, რაც 16%-ით აღემატება წინა წლის მაჩვენებელს. ქართული ღვინის იმპორტიორი ქვეყნების ხუთეულის პირველ ადგილს რუსეთი იკავებს. განსაკუთრებული პოპულარობით სარგებლობს ქინძმარაული, მუკუზანი, წინანდალი, ახაშენი და ხვანჭკარა.

 

194
თემები:
ღვინის კულტურა და მეღვინეობა (84)
სავალუტო ჯიხური

მიზეზ-მიზეზ... ანუ რა აკლია ლარს?

25
ლარის საშემოდგომო გამოცდა... ეროვნული ვალუტა რეკორდულად უფასურდება... რა გახდა ამის მიზეზი და რა საფრთხე ემუქრება სახელმწიფოს ფინანსურ სისტემას.

სამსონ ხონელი

სავალუტო ბაზარზე სიახლეა! ღვინობისთვის პირველი რიცხვიდან ეროვნული ვალუტის ოფიციალური გაცვლითი კურსი ბლუმბერგის ახალ - Bmatch-ის პლატფორმაზე გამართული სავაჭრო გარიგებებით დადგინდება. ეს რას ნიშნავს? − დაინტერესდება მკითხველი, თუმცა, დარწმუნებული ვარ, მას ნაკლებად აღელვებს, სად და რა წესით ყალიბდება ლარის კურსი. მისთვის მნიშვნელოვანი შედეგია და მოახლოებულ სიახლესაც ამ კონტექსტში განიხილავს, კერძოდ, როგორ აისახება ის ლარის კურსზე. ამ საკითხებზე ვრცლად მომდევნო სტატიაში მოგახსენებთ, ამჯერად კი მარტივად მივანიშნებ - სავალუტო ბაზრის სუბიექტები სიახლის მოლოდინში არიან, თუმცა ეროვნულ ვალუტას, როგორც „წყაროზე“ ამბობენ, დიდი ხანია „დედა აღარ ჰყავს“...

საკამათო არ არის, ლარის გაუფასურების ახალი და სავარაუდოდ, ყველაზე ძლიერი ტალღა დაიწყო. მიმდინარე კვირაში ეროვნული ვალუტა კიდევ 13 პუნქტით გაუფასურდა. კერძოდ, ორშაბათს ლარი 1 დოლართან მიმართებაში 3.22−3.25−ის ფარგლებში მერყეობდა, პარასკევს, დღის მეორე ნახევარში 1 დოლარის ღირებულებამ 3.35−ს ლარს გადააჭარბა. საინტერესოა, რატომ უფასურდება ლარი?.. შესაძლოა, ჩამეძიოთ, ახალი რა უნდა ბრძანოთო, მაგრამ, მე მაინც ვეცდები...  

არავის გავეჯიბრები, თუმცა ვიტყვი, კითხვაზე პასუხის ძიებისას, ექსპერტ-ანალიტიკოსთა აქცენტები, ხშირად, შემცირებულ პირდაპირ უცხოურ ინვესტიციებზე გადადის ხოლმე. არადა, პირდაპირ უცხოურ ინვერსტიციებს სავალუტო ბაზარზე ისეთი ძლიერი გავლენა არა აქვს, როგორც სხვა მაკროეკონომიკურ ფაქტორებს - ექსპორტს, ფულად გზავნილებსა და საერთაშორისო ტურიზმს ვგულისხმობ. არც ეროვნული ბანკის პოლიტიკა დავივიწყოთ, თანმიმდევრულად მივყვეთ:

ექსპორტი

სტატისტიკის ეროვნული სამსახურის მონაცემებით, მიმდინარე წლის იანვარ-აგვისტოში საქართველოს საგარეო სავაჭრო ბრუნვაში ექსპორტი 2071.4 მილიონ დოლარს, გასული წლის ანალოგიურ პერიოდთან შედარებით, 14.7 პროცენტით ნაკლებს შეადგენდა. საანგარიშო პერიოდში იმპორტის მოცულობა 4951.4 მილიონი დოლარით, 17.5 პროცენტით ნაკლები იყო. თვალნათლივ ჩანს, რომ სავაჭრო ბრუნვის შემცირების მიუხედავად, ქვეყნის უარყოფითმა სავაჭრო ბალანსმა, 2020 წლის იანვარ-აგვისტოში, 2880.0 მილიონი დოლარი შეადგინა, რაც საგარეო სავაჭრო ბრუნვის 41.0 პროცენტია და 1.5 პროცენტით ნაკლებია გასული წლის ანალოგიური პერიოდის მაჩვენებელზე. მთავარია, რომ ექსპორტზე მეტად შემცირებულია იმპორტი ანუ წმინდა ექსპორტი ბალანსში დადებით დინამიკას ინარჩუნებს. სავალუტო კურსზე სწორედ წმინდა ექსპორტის დადებითი დინამიკა ახდენს პოზიტიურ გავლენას. დასკვნა − ლარის საშემოდგომო გაუფასურების მიზეზი ნაკლებად სავარაუდოა, ექსპორტის შემცირება იყოს...    

ფულადი გზავნილები

ეს უცხოური ვალუტის შემოდინების კიდევ ერთი მნიშვნელოვანი წყაროა. „საქსტატისა“ და ტურიზმის ეროვნული სააგენტოს მონაცემებით, მიმდინარე წლის აგვისტოში საქართველოში შემოსული ფულადი გზავნილების მოცულობამ 184.2 მილიონი დოლარი შეადგინა, რაც 25.8 პროცენტით მეტია გასული წლის ანალოგიური მაჩვენებელზე. ვფიქრობ, ეს გარემოება, განსაკუთრებით კი გლობალური კრიზისისას, პოზიტიურად უნდა შეფასდეს. დასკვნა − ფულადი გზავნილების შემოდინების დინამიკა ეროვნული ვალუტის მკვეთრი გაუფასურების ფაქტორი არ არის.   

საერთაშორისო ტურიზმი

არახალია, ზოგადად, ლარის კურსზე მისი ეფექტი არის, მაგრამ ამ ეტაპზე ის ძალზე მცირეა, რადგან უცხოური ტურიზმის გაჩერების გამო, შემოსავლები ფაქტიურად განულებულია. დასკვნა − ეს ფაქტორი შესაძლებელია, ლარის გაუფასურების მიზეზი იყოს, თუმცა აქ ისიც უნდა გავითვალისწინოთ, რომ საერთასორისო ტურიზმიდან ვერმიღებული შემოსავლები, ნაწილობრივ, საერთაშორისო დახმარებებმა დააბალანსა.

ფისკალური ხარჯები

საკამათო არ არის, ეს კიდევ ერთი ფაქტორია, რომელსაც სავალუტო კურსზე გავლება აქვს. მოგეხსენებათ, რომ აგვისტო-სექტემბერში მთავრობამ სოციალური დახმარების რამდენიმე პროგრამა განახორციელა. 1200 და 300 ლარიანი კომპენსაცია გაიცა დასაქმებულებსა და თვითდასაქმებულებზე, 17 წლამდე პირებმა ერთჯერადი დახმარების სახით 200 ლარი მიიღეს. დასკვნა − ბოლო სამ თვეში ფისკალური ხარჯები გაიზარდა, რის გამოც სავსებით შესაძლებელია, ეროვნულ ვალუტაზე დაწოლა გაზრდილიყო.

ეროვნული ბანკის პოლიტიკა

ეს უწყება ლარის სტაბილურობაზე პირდაპირ აგებს პასუხს. კობა გვენეტაძის უწყებამ სწორედ ეროვნული ვალუტის კურსის მხარდასაჭერად, მარტიდან მოყოლებული სექტემბრის პირველი ნახევრის ჩათვლით, ინტერვენციის სახით სავალუტო ბაზარზე 409.6 მილიონი დოლარი გაყიდა და საფინანსო ბაზარზე მიმოქცევიდან მილიარდ ლარზე მეტი ამოიღო, თუმცა ამავე პერიოდში რეფინანსირების სესხების საბაბით ბაზარს ორ მილიარდზე მეტი ლარი მიაწოდა. კიდევ სხვა საკითხია ეროვნული ბანკის ინტერვენციების სტრუქტურა. თუ დავაკვირდებით დავინახავთ, რომ კობა გვენეტაძის უწყება სავალუტო ბაზარს, ძირითადად, 40 მილიონ დოლარს აწვდის. საკითხავია, ეს რამდენად ჰყოფნის სავალუტო ბაზარს. ერთი ნათელია, შეუძლებელია სავალუტო ბაზარი მუდმივად ერთი და იგივე რაოდენობის დოლარის რესურსს ითხოვდეს... დასკვნა − დღეს სავალუტო ბაზარზე ინტერვენციები ლარის კიდევ უფრო მკვეთრ გაუფასურებას აჩერებს, თუმცა პარალელურად მიმოქცევაში ლარის ჭარბი მოცულობის გაშვება სავალუტო კურსზე ერთმნიშვნელოვნად ნეგატიურად აისახება.       

სხვა რა მიზეზი შეიძლება იყოს? − უსათუოდ ჩამეძიება მკითხველი. გამოვთქვამ ვარაუდს, რომ ფისკალური ხარჯებისა და საფინანსო ბაზარზე ლარის მოცულობის ზრდასთან ერთად, ეროვნული ვალუტის ამჟამინდელი გაუფასურების მიზეზი უარყოფითი მოლოდინებია...

ფაქტია, რომ ლარმა სწრაფი ტემპით გაუფასურება მას შემდეგ დაიწყო, რაც საქართველოში COVID-19-ით ინფიცირებულთა რაოდენობა მკვეთრად გაიზარდა. მოლოდინებზე მხოლოდ ნეგატიურად აისახება გაცხადებული ე.წ. მეორე ტალღის სცენარი და ეკონომიკის შესაძლო გაჩერება. ასეთ პირობებში ბიზნესი რისკებს აზღვევს და თანხები სავალუტო ანგარიშზე გადააქვს. მოსახლეობის ნაწილიც ანალოგიურად იქცევა, ვისაც ამის შესაძლებლობს აქვს, უცხოურ ვალუტას იმარაგებს. ეს მიუხედავად იმისა, არის თუ არა ამის საჭიროება. ბუნებრივია, რომ უცხოურ ვალუტაზე მოთხოვნა იზრდება.

წინამდებარე სტატია დასასრულს უახლოვდება და ერთსაც ვიტყვი, მიუხედავად იმისა, თუ

რა არის ლარის გაუფასურების მიზეზი, ფაქტია ეს პროცესი უკიდურესად მძიმედ აისახება ამ ქვეყნის მოქალაქეთა უმრავლესობის ყოფაზე. განსაკუთრებით მათზე, ვისაც კრედიტები უცხოურ ვალუტაში აქვთ. მარტივი არითმეტიკაა, მოქალაქეს, რომელმაც სესხი დოლარში 2015 წლის სექტემბრამდე აიღო, ყოველთვიური საბანკო ვალდებულება ფაქტიურად უკვე გაუორმაგდა და არავინ იცის, რა იქნება ხვალ. სამწუხაროდ, ამ საკითხზე არავინ მსჯელობს, არადა, თუ ასე გაგრძელდა, მერწმუნეთ, რომ არც იპოთეკური კრიზისის პირველი ნიშნები დააყოვნებს... შეიქმნება ვითარება, როცა მსესხებელი სახესხო ვალდებულების გასტუმრებას ვეღარ აუვა, ხოლო კრედიტის უზრუნველსაყოფად გათვალისწინებული უძრავი ქონების მყიდველი, თუნდაც სალიკვიდაციო ფასად, ფაქტიურად არავინ იქნება... ძნელი არ არის წარმოვიდგინოთ, სოციალური ფონის უკიდურესად გაუარესებასთან ერთად, რა საფრთხე დაემუქრება სახელმწიფოს საფინანსო სისტემას. ასე რომ, ვფიქრობ, დროა, სახელმწიფომ გამოსავლის ძიება დაიწყოს და კონკრეტული გადაწყვეტილებებიც მიიღოს. ასე დიდხანს ვეღარ გაგრძელდება და წაყრუება სიკეთეს ვერ მოიტანს...  

 

25
ვაშლი

საქართველოდან ვაშლის ექსპორტი წელს თითქმის 5-ჯერ გაიზარდა

46
(განახლებულია 12:42 26.09.2020)
წელს საქართველოდან ვაშლის ექსპორტის უდიდესი ნაწილი - 94% - რუსეთის ფედერაციაშიაზე მოდის. უმნიშვნელო რაოდენობით ვაშლი გადის ყაზახეთში, სომხეთში და სხვა ქვეყნებში

თბილისი, 20 სექტემბერი - Sputnik. 24 სექტემბრის მონაცემებით, საქართველოდან 1054 ტონა ვაშლია ექსპორტირებული, ინფორმაციას გარემოს დაცვისა და სოფლის მეურნეობის სამინისტრო ავრცელებს.

სახელმწიფო პროგრამის „დანერგე მომავალი“ ფარგლებში გაშენებულ ბაღებში მოსავლის აღება მიმდინარეობს.

ვაშლის ექსპორტი წინა წლის ანალოგიურ პერიოდს 832 ტონით აღემატება. ხოლო, ექსპორტირებული ვაშლით მიღებული შემოსავალი 321 ათასი აშშ დოლარით აღემატება წინა წლის ანალოგიურ მაჩვენებელს.

ქართული ვაშლის ექსპორტის მაჩვენებელი ქვეყნების მიხედვით ასეთია: რუსეთის ფედერაცია (990.5 ტონა - რაც მთლიანი იმპორტის თითქმის 94%-ს შეადგენს), ყაზახეთის რესპუბლიკა (59.9 ტონა), სომხეთის რესპუბლიკა (3.6 ტონა), დანარჩენი ქვეყნები (0,10 ტონა).

ინტენსიური და ნახევრად ინტენსიური ვაშლის ბაღები, საქართველოს მასშტაბით, სახელმწიფო პროგრამის „დანერგე მომავალი“ ფარგლებში, 1 128 ჰექტარზე გაშენდა. სახელმწიფოს თანადაფინანსებამ კი, 9 მლნ ლარზე მეტი შეადგინა.

პროგრამას „დანერგე მომავალი“ სოფლის განვითარების სააგენტო 2015 წლიდან ახორციელებს. სოფლის განვითარების სააგენტოს პროგრამები გათვლილია გრძელვადიან განვითარებაზე და მათი მიზანია ისეთი გარემოს შექმნა, რომელიც ხელს შეუწყობს მაღალხარისხიანი პროდუქციის წარმოების სტაბილურ ზრდას და სურსათის უვნებლობის საერთაშორისო სტანდარტების დანერგვას.

46
თემები:
საქართველოს სოფლის მეურნეობა
გიორგი გახარია

გახარია: ნებისმიერი შემდგომი შეზღუდვები იქნება მხოლოდ ლოკალური

0
(განახლებულია 12:31 27.09.2020)
საქართველოს პრემიერ-მინისტრის, გიორგი გახარიას თქმით, სისტემური და მასშტაბური შეზღუდვები ქვეყანაში ამ ეტაპზე არ იგეგმება

თბილისი, 27 სექტემბერი – Sputnik. სასწავლო პროცესი განახლდება ზუსტად იმ რეჟიმში, როგორც გამოვაცხადეთ, განუცხადა ჟურნალისტებს საქართველოს პრემიერ-მინისტრმა გიორგი გახარიამ.

როდის მოხვდება საქართველო ნარინჯისფერ ან წითელ ზონაში: თამარ გაბუნიას განმარტება >>

ქვეყანაში სასწავლო წელი 15 სექტემბერს განახლდა, მაგრამ ეპიდვითარების გაუარესების გამო რვა ქალაქის – თბილისი, ბათუმი, ქობულეთი, ქუთაისი, ფოთი, რუსთავი, ზუგდიდი, გორი, ასევე კახეთის, გურიისა და შიდა ქართლის ზოგიერთი სოფლის სკოლების მოსწავლეები და სტუდენტები იძულებული არიან 1 ოქტომბრამდე დისტანციურად ისწავლონ. სხვა ქალაქებსა და სოფლებში სასწავლო დაწესებულებები გაიხსნა.

მთავრობის მეთაურის თქმით, კორონავირუსის გავრცელების წინააღმდეგ შემდგომ ღონისძიებებს ექნება მიზნობრივი და ლოკალური ხასიათი, სისტემური შეზღუდვები ამ ეტაპზე არ იგეგმება.

„ნებისმიერი ჩვენი შემდგომი ღონისძიება, ქმედება, ვირუსის გავრცელების წინააღმდეგ იქნება მიზნობრივი და ლოკალური. სისტემური შეზღუდვები ამ ეტაპზე არ იგეგმება. კიდევ ერთხელ ვიმეორებ – ჩვენ მარტივად შეგვიძლია ამის გაკეთება, მაგრამ ამას მოჰყვება მძიმე სოციალური და ეკონომიკური შედეგები“, - განაცხადა გახარიამ.

მან კიდევ ერთხელ მოუწოდა მოსახლეობას ეპიდემიოლოგების რეკომენდაციების დაცვისკენ.

„ნორმალური ცხოვრების პირობებში გავრცელება რომ იყოს შედარებით დაბალი, უნდა ვატაროთ პირბადე, დავიცვათ დისტანცია და მარტივად – დავიბანოთ ხელი უფრო ხშირად“, – განაცხადა გიორგი გახარიამ.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 294-ით გაიზარდა და 5254-ს მიაღწია, გამოჯანმრთელებულთა რაოდენობას დაემატა 87 ადამიანი.

ამ დროისათვის სულ გამოჯანმრთელდა 1906 ადამიანი, გარდაიცვალა – 28, კარანტინის რეჟიმში იმყოფება 5674, სტაციონარებში ექიმების დაკვირვების ქვეშ 836 პაციენტია, ხოლო კოვიდ–სასტუმროებში 800 ადამიანი იმყოფება.

ასევე კორონავირუსის დიაგნოზით უცხოეთიდან სამშობლოში გადმოყვანილია საქართველოს 41 მოქალაქე, მათ შორის 38 – სამხედრო მოსამსახურე.

საქართველოში კორონავირუსის პირველი შემთხვევა 26 თებერვალს დაფიქსირდა.

0
თემები:
COVID-19 საქართველოში