სარკინიგზო გვირაბის მშენებლობა ქვიშხეთში

უფრო სწრაფად და უსაფრთხოდ: ახალი სარკინიგზო მონაკვეთი თითქმის დასრულებულია

171
(განახლებულია 23:22 26.10.2018)
მთებში გაჭრილი გვირაბი შეამოკლებს მანძილს თბილისიდან ბათუმისა და ფოთის პორტებამდე

თბილისი, 27 ოქტომბერი — Sputnik. გრანდიოზული პროექტის - ხაშური-ზესტაფონის 40 კილომეტრიანი სარკინიგზო მონაკვეთის მშენებლობა დასასრულს უახლოვდება.

სპეციალურად ამისათვის „საქართველოს რკინიგზამ“ ჟურნალისტებისთვის მოაწყო პრესტური, რათა ადგილზე ეჩვენებინა მშენებლობის მასშტაბები და შესრულებული სამუშაოს შესახებ ანგარიში ჩაებარებინა.

მშენებლობას კომპანია „ჩინეთის რკინიგზის 23-ე ბიურო“ ახორციელებს.

რისთვის ახალი რკინიგზა?

ალტერნატიული სარკინიგზო მონაკვეთის პროექტზე ხელისუფლებამ მუშაობა 2010 წელს დაიწყო. ამისათვის რამდენიმე მიზეზი არსებობდა. პირველ რიგში, ამჟამად მოქმედი ხაშური-ზესტაფონის მონაკვეთი ექსპლუატაციაში 1894 წელს ჩაბარდა.

Строительство железнодорожного тоннеля в Квишхети
SPUTNIK / DENIS ASLANOV
სარკინიგზო გვირაბის მშენებლობა ქვიშხეთში

ამ მონაკვეთის მთავარი შემადგენელი ნაწილია ციპის გვირაბი, რომლის მშენებლობა XIX საუკუნის ბოლოს დასრულდა. იმის გამო, რომ ხაშური-ზესტაფონის სარკინიგზო მონაკვეთი აღმოსავლეთ და დასავლეთ საქართველოს „საზღვარზე“ მდებარეობს და აღმოსავლეთ საქართველო ბევრად მაღალია დასავლეთზე, გვირაბიდან გამოსული მატარებელი ციცაბო აღმართს აწყდება და მას ტვირთის აზიდვა სამი ლოკომოტივის გარეშე არ შეუძლია.

თბილისში მეტროს ახალი მიწისზედა სადგურები გაიხსნება >>

„საქართველოს რკინიგზის“ კორპორატიული მართვის დეპარტამენტის უფროსის მოადგილემ, გიორგი ზაზაშვილმა ასევე განაცხადა, რომ ძველ სარკინიგზო მონაკვეთზე 32-33 გრადუსის დაქანების დაღმართები არსებობს, როდესაც დასაშვები მაჩვენებელი 18 გრადუსს შეადგენს.

გარდა ამისა, მოქმედ მონაკვეთზე არსებობს 200 მეტრზე ნაკლები რადიუსის მქონე მოსახვევები, რაც მატარებლის სვლას საგრძნობლად ანელებს.

რა აშენდა?

ხაშური-ზესტაფონის ახალი სარკინიგზო მონაკვეთი პირობითად იყოფა ორ ნაწილად: ხაშური-მოლითი და ხარაგაული-ზესტაფონი. ამ მომენტისთვის ხარაგაული-ზესტაფონის ნაწილი 90%-ით აშენებულია და იქ რელსების დაწყობა მიმდინარეობს.

ხაშური-მოლითის მონაკვეთს რაც შეეხება, მისი მშენებლობაც სრულდება. გათხრილია 8,3 კილომეტრიანი გვირაბი, რომელიც ამ მონაკვეთზე ყველაზე გრძელია.

გვირაბში უკვე მზად არის ე.წ. უსაფრთხო გასასვლელები (გვირაბში ხანძრისა ან სხვა საგანგებო მდგომარეობის შემთხვევაში), რომლებიც ყოველ 300 მეტრშია განლაგებული. ზაზაშვილის თქმით, ამ გასასვლელებში მოეწყობა სახელურები push bar, რომელთა გახსნის შემთხვევაში განგაშის სიგნალი სამაშველო სამსახურში შევა.

„ამ კარების სახელურის შეხებისას უსაფრთხოების სისტემა ერთიანად ამუშავდება. მსგავსი სისტემა არსებობს ავსტრიაში და ავსტრიელებმა ეს საქართველოშიც გააკეთეს. ამ კარის გაღებისას სისტემა საგანგებო სამსახურებს გადასცემს შეტყობინებას, რომ ამ ადგილას მოხდა ხანძარი“, - განაცხადა ზაზაშვილმა.

თბილისიდან ბათუმამდე მგზავრობის დრო 20-30 წუთით მცირდება >>

„საქართველოს რკინიგზა“ ყოველდღიურ რეჟიმში ობიექტების მშენებლობის კონტროლს ახორციელებს, ამისათვის კი მან დაიქირავა მსოფლიოში წამყვანი საკონსულტაციო ავსტრიული კომპანია ILF Consulting Engineers.

„ეს მშენებლობის სფეროში გიგანტური საკონსულტაციო კომპანიაა. მსოფლიოში ორი ყველაზე დიდი გვირაბია. პირველი - 50 კილომეტრის სიგრძის გვირაბი Gotthard Base Tunnel შვეიცარიაში, მეორე - გვირაბი Brenner Base Tunnel, რომელიც ავსტრიაში შენდება და მას იტალიასთან აკავშირებს. ამ გვირაბების მშენებლობაში ეს კომპანია ზედამხედველის სტატუსით მონაწილეობს“, - აღნიშნა ზაზაშვილმა.

© Sputnik / Denis Aslanov
სარკინიგზო გვირაბის მშენებლობა ქვიშხეთში

სარკინიგზო მონაკვეთის მშენებლობაში ასევე მონაწილეობს გერმანული კომპანია, ქვეყნის სარკინიგზო ოპერატორი Deutsche Bann.

ახალი პროექტის უპირატესობანი

2013 წელს მშენებლობის დაწყებიდან სამ წელში „საქართველოს რკინიგზის“ ხელმძღვანელობას პროექტში ცვლილებების შეტანა მოუწია.

საქმე ისაა, რომ 8,3 კილომეტრიანი გვირაბის მარცხენა პორტალი უნდა ყოფილიყო სათადარიგო და მასზე მატარებლებს არ უნდა ემოძრავათ. გადაწყდა, რომ მარცხენა პორტალზეც გაივლიან მატარებლები. წინააღმდეგ შემთხვევაში ეს მონაკვეთი ცალმხრივი იქნებოდა, რაც საქონელბრუნვის მოცულობას მნიშვნელოვნად შეამცირებდა.

„მიღებულ იქნა ძალიან სწორი გადაწყვეტილება, რადგან აღმოჩნდა, რომ თუ დღეს გამტარუნარიანობა წელიწადში 27 მილიონ ტონას შეადგენს, ის 12 მილიონამდე შემცირდებოდა. დაიხარჯებოდა უზარმაზარი თანხა, დაახლოებით 267 მილიონი შვეიცარიული გირვანქა, და ეს ყველაფერი გამტარუნარიანობის შესამცირებლად“, - ხაზგასმით აღნიშნა მან.

ზაზაშვილის თქმით, ახალი პროექტის წყალობით საქონელბრუნვა წელიწადში 48 მილიონი ტონით გაიზრდება.

გარდა ამისა, თუ დღეს ყველა გამოუსადეგარი მოსახვევისა და დაღმართის გამო „საქართველოს რკინიგზა“ დიდ თანხებს ხარჯავს, ახალი მონაკვეთის ამოქმედების შემდეგ ეს საჭირო აღარ იქნება.

„კომპანიამ მიიღო გადაწყვეტილება პროექტი ისეთნაირად შედგეს, რომ მოსახვევების მინიმალური რადიუსი 400 მეტრზე დიდი იყოს, რაც მოგვცემს შესაძლებლობას ერთხელ დავდოთ რკინაბეტონის შპალი და 40 წლის განმავლობაში მას ხელი არ ვახლოთ“, - განაცხადა ზაზაშვილმა.

პროექტის უმთავრესი უპირატესობა მდგომარეობს იმაში, რომ სამგზავრო მატარებელი თბილისიდან ბათუმამდე მანძილს 40 წუთით ნაკლებ დროში დაფარავს.

171
თემები:
ტრანსპორტი საქართველოში–2018 (279)
კომპიუტერული სერვერი

მსხვილი IT-კომპანია საქართველოში შვილობილ კომპანიას გახსნის

27
(განახლებულია 10:24 05.12.2020)
საერთაშორისო სტატუსის მქონე IT-კომპანიები ქვეყანაში საგადასახადო შეღავათებით სარგებლობენ - საშემოსავლო გადასახადს 20%-ის ნაცვლად 15%-ს იხდიან

თბილისი, 5 დეკემბერი – Sputnik. უმსხვილესმა IT-კომპანიამ საქართველოში შვილობილი კომპანიის რეგისტრაციის პროცედურა დაიწყო, განაცხადა ინოვაციებისა და ტექნოლოგიების სააგენტოს თავმჯდომარემ ავთანდილ კასრაძემ.

მთავრობის დადგენილებით, საერთაშორისო სტატუსის მქონე IT-კომპანიები ქვეყანაში საგადასახადო შეღავათებით სარგებლობენ და საშემოსავლო გადასახადს 20%-ის ნაცვლად 15%-ს იხდიან.

„ასეთი საერთაშორისო კომპანიების გამოჩენა ბაზარზე საქართველოს ინოვაციური ეკოსისტემისთვის ძალიან მნიშვნელოვანია. ეს უნიკალური შესაძლებლობაა ჩვენი მოქალაქეებისთვის მაღალანაზღაურებადი სამუშაო მიიღონ“, - განაცხადა კასრაძემ პირველი არხის ეთერში.

მან აღნიშნა, რომ საგადასახადო შეღავათების გარდა საერთაშორისო ტექნოლოგიური კომპანიებისთვის მიმზიდველი აღმოჩნდა ინოვაციებისა და ტექნოლოგიების სააგენტოს მასშტაბური სასწავლო პროგრამა, რომლის ფარგლებში საერთო ჯამში სამი ათასი IT-სპეციალისტი აიმაღლებს კვალიფიკაციას.

EPAM Systems – 9 მილიარდი დოლარის წლიური შემოსავლის მქონე IT-კომპანიაა, რომელიც ნიუ-იორკის საფონდო ბირჟაზეა დარეგისტრირებული. 20 წლის წინ დაარსებული კომპანია მთელ მსოფლიოში 1000 თანამშრომელს და 23 ოფისს ითვლის (აშშ, პოლონეთი, ლიეტუვა, გერმანია, ბელარუსი, უკრაინა, რუსეთი, უზბეკეთი).

27
თემები:
თანამედროვე ტექნოლოგიები
წყალმომარაგების სისტემის მშენებლობა ზუგდიდში

საქართველოში ინფრასტრუქტურულ პროექტებზე ასიგნებები ერთი მესამედით გაიზრდება

24
(განახლებულია 11:42 05.12.2020)
მომავალ წელს უწყების ბიუჯეტი 2,3 მილიარდ ლარს შეადგენს, საიდანაც 9955 მილიონი საერთაშორისო დონორების დახმარებაა

თბილისი, 5 დეკემბერი – Sputnik. სახელმწიფო ბიუჯეტის პროექტის თანახმად, რეგიონალური განვითარებისა და ინფრასტრუქტურის სამინისტროს დაფინანსება 2021 წლისთვის უწყების ისტორიაში ყველაზე მაღალი იქნება და 2020 წლის დამტკიცებულ ბიუჯეტს 551,3 მლნ ლარით (30%) გადააჭარბებს.

თავდაპირველად, ინფრასტრუქტურის სამინისტროს ბიუჯეტი 2021 წლისთვის 2.4 მილიარდი ლარი იყო. თუმცა, COVID-19-ის პანდემიის სამართავად რესურსების გამოყოფის საჭიროებიდან გამომდინარე, დაფინანსების ოდენობა 50 მილიონით შემცირდა. ამრიგად, მომავალი წლისთვის უწყების ბიუჯეტი 2.3 მილიარდ ლარს შეადგენს. აქედან 995,5 მილიონი საერთაშორისო დონორების დახმარებაა. ამ თანხის დიდი ნაწილი, 1,5 მილიარდი, საგზაო ინფრასტრუქტურის განვითარებაზე დაიხარჯება.

წყალმომარაგება რეგიონებში

ინფრასტრუქტურის სამინისტროს ინფორმაციით, რეგიონებში წყალმომარაგების სისტემების განვითარების მიზნით, უწყების დაქვემდებარებაში მყოფი „საქართველოს გაერთიანებული წყალმომარაგების კომპანიის“ ბიუჯეტი 2021 წელს 69% -ით გაიზრდება და 347 მილიონ ლარს გადააჭარბებს.

ეს თანხები დაიხარჯება ახალ პროექტებზე იმერეთში, კახეთში, ყაზბეგსა და ხაშურში, აგრეთვე ახლომდებარე დასახლებებში.

სამუშაოები დაგეგმილია სამტრედიაში, ვანში, ბაღდათში და ყაზბეგში, რისთვისაც ჯამში 130 მილიონ ევრომდე დაიხარჯება. შედეგად, 50 ათასზე მეტი ადამიანი 24 საათიან წყალმომარაგებას მიიღებს.  კახეთის რეგიონში მცხოვრები 45 ათასზე მეტი ადამიანი ასევე მუდმივად მიიღებს წყალს.

მომავალ წელს გაგრძელდება გარდაბნის მუნიციპალიტეტის სოფლებში წყლის ახალი სისტემების მშენებლობა, აგრეთვე გაგრძელდება გუდაურის, ზუგდიდის, ჭიათურის, ჯვრისა და მარნეულის წყალმომარაგების ქსელის მშენებლობისა და შეკეთების პროექტები.

ასევე გაგრძელდება კანალიზაციის სისტემების მშენებლობა ფოთში, მარნეულში, ბოლნისსა და გუდაურში. დაფინანსდება გამწმენდი ნაგებობების მშენებლობა ფოთში, გუდაურსა და მარნეულში, ასევე დასრულდება გამყოფ ხაზთან მდებარე სოფლებში წყალმომარაგების ქსელის მოწყობის სამუშაოები.

დიდი გეგმები

2021 წელს 41 მილიონი ლარი გამოიყოფა მყარი ნარჩენების მართვის პროგრამისთვის.

161 მილიონი ლარის ოდენობით დაფინანსდება რეგიონებში საგანმანათლებლო ინფრასტრუქტურის მშენებლობა და შეკეთება. 2021 წლის გეგმებშია 49 სკოლის მშენებლობის დასრულება და 80-ის სარემონტო სამუშაოები. თანხები გამოიყოფა 17 ახალი საბავშვო ბაღის მშენებლობისთვის.

ინფრასტრუქტურის სამინისტროს ცნობით, მომავალ წელს გაგრძელდება იძულებით გადაადგილებულ პირთა საცხოვრებელი სახლების მშენებლობა. 2021 წელს ახალ ბინებს მიიღებს 1020 ოჯახი ზუგდიდსა და წყალტუბოში, ხოლო 2022 წელს - 800 ოჯახი ქუთაისში.

უწყება გეგმავს განაგრძოს პროექტები ქვეყნის სხვადასხვა რეგიონში ქალაქების განახლებისა და ტურისტული ინფრასტრუქტურის მოწყობისთვის.

მომავალ წელს, მუნიციპალური ტრანსპორტის განვითარების პროგრამის ფარგლებში, ზუგდიდში, რუსთავში, ქუთაისში, გორსა და თელავში EURO 5 სტანდარტის 175 ახალი თანამედროვე ავტობუსი გადანაწილდება.

ტურისტული ინფრასტრუქტურის განვითარების მიზნით, ბაკურიანი მიიღებს სათხილამურო კურორტებისთვის ადაპტირებულ 10 ავტობუსს და 16 ერთეულ მუნიციპალურ სპეციალურ აღჭურვილობას. სპეციალური ტექნიკა ასევე გადაეცემა გურიის რეგიონს შავი ზღვის სანაპიროს მომსახურებისთვის.

რეგიონებში განსახორციელებელი პროექტების ფონდი განისაზღვრება 280 მილიონი ლარის ოდენობით, კვლავ 40 მილიონი ლარით დაფინანსდება სოფლის მხარდაჭერის პროგრამა, რომლის ფარგლებშიც  3.7 ათასი დასახლებული პუნქტის მოსახლეობა თავად აირჩევს პრიორიტეტულ პროექტებს. ხოლო მაღალმთიან დასახლებებში სხვადასხვა პროექტებზე 20 მილიონი ლარი დაიხარჯება.

ინფრასტრუქტურის სამინისტროს ბიუჯეტი 2020 წელს 1,8 მილიარდ ლარზე მეტს შეადგენს. უწყებაში აღნიშნავენ, რომ კორონავირუსის პანდემიით გამოწვეული სირთულეების მიუხედავად, ის გადაჭარბებით შესრულდება. ნოემბრის მონაცემებით, ამ თანხის 99,4% უკვე ათვისებულია, რაც 138 მილიონით მეტია გასულ წელთან შედარებით.

ასევე, საქართველოს საავტომობილო გზების დეპარტამენტმა 11 თვის განმავლობაში აითვისა ბიუჯეტის 104% - 1,2 მილიარდი ლარი, ხოლო „გაერთიანებულმა წყალგამანაწილებელმა კომპანიამ“ - 110%, ანუ 209 მილიონი ლარი.

24
თემები:
საქართველოს ეკონომიკა
ზუგდიდის რეფერალური სააავდმყოფო

სამეგრელო-ზემო სვანეთში გასულ დღე-ღამეში კორონავირუსით ორი ადამიანი გარდაიცვალა

0
66 და 84 წლის მამაკაცებს, რომლებსაც კორონავირუსი დადასტურებული ჰქონდათ, თანმდევი დაავადებები აღენიშნებოდათ

თბილისი, 5 დეკემბერი – Sputnik. სამეგრელო-ზემო სვანეთის რეგიონების მასშტაბით COVID-19 434 ადამიანს დაუდასტურდა, კოვიდმიმღებ საავადმყოფოებში თავისუფალი საწოლების რაოდენა 41-ს შეადგენს. ამის შესახებ ინფორმაციას სამხარეო ადმინისტრაციაში ადასტურებენ, იუწყება Sputnik-საქართველოს კორესპონდენტი.

მათი ცნობით, რეგიონის მასშტაბით სულ საკარანტინე სივრცეში იმყოფება 128 ადამიანი.

რუხის კლინიკაში იმყოფება კორონავირუსით ინფიცირებული 150 პაციენტი, მათ შორის საშუალო სიმძიმის - 60, თავისუფალი საწოლფონდის რაოდენობა კი 30-ს შეადგენს.

სენაკში არსებულ „სენამედის“ კლინიკაში იმყოფება - 38 პაციენტი, მათ შორის მძიმე - 8, კლინიკაში თავისუფალია სულ 2 საწოლი.

ფოთის კლინიკაში იმყოფება - 39 პაციენტი, მათ შორის მძიმე 12 პაციენტია, თავისუფალი საწოლ ფონდის რაოდენობა -1.

ზუგდიდის რეფერალურ ჰოსპიტალში 31 პაციენტია მოთავსებული, თავისუფალი საწოლ ფონდის რაოდენობა - 1. 

აბაშის „ევექსის“ კოვიდ-კლინიკაში 21 პაციენტი იმყოფება, თავისუფალი საწოლ ფონდის რაოდენობა კი 7-ს შეადგენს.

სამეგრელო – ზემო სვანეთის სამხარეო ადმინისტრაციის ინფორმაციით, გასული დღე-ღამის განმავლობაში რეგიონში ორი კოვიდინფიცირებული პაციენტი გარდაიცვალა. აბაშის მკვიდრი 66 წლის პაციენტი ქუთაისის „ჰოსპიტალ-სერვისში“ მკურნალობდა და მას თანმდევი დაავადებები ჰქონდა. ასევე თანმდევი დაავადებები ჰქონდა სენაკის მკვიდრ 84 წლის მამაკაცს, რომელიც სენაკის კლინიკა „სენამედში“ გარდაიცვალა.

საქართველოში კორონავირუსით კიდევ 37 პაციენტი გარდაიცვალა >>

ქვეყანაში COVID-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა შეადგენს 158 154-ს. ბოლო 24 საათში გამოჯანმრთელდა 2 306 პირი, ხოლო ჯამში გამოჯანმრთელებულთა რაოდენობა გაიზარდა – 129 210-მდე. გასულ დღე-ღამეში კორონავირუსით გარდაცვალების 37 ახალი შემთხვევა დაფიქსირდა. 2020 წლის 26 თებერვლიდან დღემდე სულ 1 462 ადამიანი გარდაიცვალა.

 

0
თემები:
COVID-19 საქართველოში