ვალუტის გაცვლის პუნქტი

რა ელოდება ლარს: პროგნოზები და მიზეზები

91
ეროვნული ბანკის განცხადებით, მიუხედავად ლარის მერყეობისა, პანიკის საფუძველი არ არის.

თბილისი, 24 ოქტომბერი — Sputnik. საბროკერო კომპანია Galt & Taggart ვარაუდობს, რომ აშშ დოლარის მიმართ საქართველოს ეროვნული ვალუტის კურსი 2018 წლის მეოთხე კვარტალში შემცირდება – იმპორტის ზრდისა და მოსახლეობის ნეგატიური მოლოდინების გამო.

აგვისტოს დასაწყისიდან ლარის ოფიციალური კურსი 2,5 ნიშნულს ქვევით არ ჩამოსულა. თუ 10 აგვისტოს მონაცემებს დღევანდელ კურსს შევადარებთ, ჩანს, რომ ქართული ვალუტა დაახლოებით 9,2%-ით გაუფასურდა.

„მეოთხე კვარტალში ველოდებით ლარის სეზონურ შესუსტებას საშუალო დონემდე 2.70-2.75 GEL/$1. სახელმწიფო ხარჯების მოსალოდნელ გაზრდას ადგილობრივ ვალუტაზე დამატებითი გავლენის მოხდენა შეუძლია", – აღნიშნულია კომპანიის მიმოხილვაში.

Galt & Taggart აღნიშნავს, რომ ლარის სეზონური სისუსტე დაკავშირებულია წინასაახალწლო დღესასწაულების წინ იმპორტის ზრდასთან, ენერგიის იმპორტის ზრდასთან, ტურისტების რაოდენობის შემცირებასთან, ასევე წლის ბოლოსთვის ლართან მიმართებით ნეგატიურ მოლოდინებთან, რაც 2014-2017 წლებში ჩამოყალიბდა.

საშუალოვადიან პერსპექტივაში კომპანია ლარის კურსს პროგნოზირებს 2.5 GEL/$1 ნიშნულზე.

ამის პარალელურად საქართველოს ეროვნული ბანკის პრეზიდენტმა კობა გვენეტაძემ აღნიშნა, რომ ლარის კურსთან მიმართებით პანიკის საფუძვლები არ არის.

„საქართველოში გვაქვს მცურავი გაცვლითი კურსის რეჟიმი, რომლისთვისაც მოკლევადიან პერიოდში დამახასიათებელი არის რყევები. შეუძლებელია იმის გარკვევა, თუ ნებისმიერ დღეს რამ გამოიწვია კურსის ან გაუფასურება, ან გამყარება... მცურავი გაცვლითი რეჟიმი არის ყველაზე კარგი საშუალება, რათა ნებისმიერი შოკი, რომელიც შეიძლება მოხდეს, ეკონომიკამ შეიწოვოს", – განაცხადა გვენეტაძემ.

მისი თქმით, ეროვნულ ბანკს გაცვლითი კურსის რაიმე ნიშნული მაჩვენებელი არა აქვს, რეგულატორის საზრუნავია ინფლაცია, რაც უფრო მნიშვნელოვანია.

კოჭლი ლარი
კოჭლი ლარი

„ინფლაცია საქართველოში დაბალია. დღესდღეობით რაც გვაქვს, ეს არის მიზნობრივ მაჩვენებელზე ქვემოთ. როგორც მოგეხსენებათ, წლიური ინფლაცია 2.7 პროცენტია. ჩვენ გვაქვს ყველა ბერკეტი იმისთვის, რათა ინფლაცია ვაკონტროლოთ და დაბალ დონეზე შევინარჩუნოთ", - განაცხადა ეროვნული ბანკის პრეზიდენტმა.

Galt & Taggart წლიურ ინფლაციას პროგნოზირებს 2018 წელს 2,9%-ის, ხოლო 2019 წელს – 3,9%-ის დონეზე ლარის გაუფასურების ეფექტის გამო, ასევე მსოფლიო ბაზარზე მოსალოდნელი უფრო მაღალი ფასების გამო ნედლეულზე.

91
თემები:
ლარის კურსის დაცემა (35)
კორონავირუსის ეპიდემია

ინფლაციის დონე საქართველოში მესამე თვეა არ იცვლება - ახალი სტატისტიკა

13
(განახლებულია 12:26 04.12.2020)
საქართველოს ეროვნულ ბანკს მიაჩნია, რომ ინფლაციის ბოლო თვეების დინამიკა რეგულატორის პროგნოზებს შეესაბამება

თბილისი, 4 ნოემბერი - Sputnik. წლიურმა ინფლაციამ საქართველოში (2019 წლის ნოემბრიდან 2020 წლის ნოემბრამდე) მიზნობრივი 3%-იანი მაჩვენებლის პირობებში 3,8% შეადგინა, იუწყება სტატისტიკის ეროვნული სამსახური.

ამგვარად, ინფლაციის დონე უკვე მესამე თვეა, არ იცვლება.

საქართველოში სამრეწველო პროდუქციაზე ფასები იზრდება>>

ნოემბერში, ოქტომბერთან შედარებით, ინფლაციის დონემ 0,9%, ოქტომბერში კი - 0,8% შეადგინა.

„საქსტატის“ მონაცემებით, ნოემბერში ყველაზე მეტად - 0,1%-ით - განათლების ფასები შემცირდა. ყველაზე მეტად გაძვირდა სურსათი - 1,8%-ით, ტრანსპორტი - 1,1%-ით და ავეჯი - 0,8%-ით.

როგორ იცვლებოდა ინფლაცია წლის დასაწყისიდან

2019 წელს წლიურმა ინფლაციამ 7% შეადგინა. მის შესაკავებლად ეროვნულმა ბანკმა 2019 წლის სექტემბრიდან მონეტალური პოლიტიკის გამკაცრება დაიწყო. ამ პერიოდში რეფინანსირების განაკვეთი 6,5%-იდან 9%-მდე გაიზარდა, ბოლოს - 2019 წლის დეკემბერში.

წლის დასაწყისიდან ინფლაციის დონემ შემცირება დაიწყო - იანვარსა და თებერვალში მან 6,4% შეადგინა, მარტში – 6,1%, სექტემბერში - 3,8%. საქართველოში კორონავირუსის გავრცელების პრევენციის მიზნით, ხელისუფლებამ 21 მარტიდან კარანტინი და კომენდანტის საათი დააწესა. ეკონომიკური აქტივობის სტიმულირებისთვის ეროვნულმა ბანკმა აპრილიდან სამ ეტაპად შეამცირა მონეტარული პოლიტიკის ძირითადი განაკვეთი 8%-მდე.

ამის მიუხედავად, ნოემბერში, გასული წლის ანალოგიურ პერიოდთან შედარებით, სურსათის ფასი 6%-ით გაიზარდა, თუმცა ხილის ფასი 5,3%-ით შემცირდა, რძე, ყველა და კვერცხი 8%-ით გაძვირდა, მზესუმზირის ზეთი - 23,2%-ით, ყავა - 7,6%-ით, პურპროდუქტები - 7,1%-ით, ხორცი - 3,7%-ით. კორონავირუსის გამო შექმნილი ვითარების გათვალისწინებით, 8,8%-ით გაიზარდა ჯანდაცვის სფეროს მომსახურების ფასებიც.

როგორ შეიცვლება ინფლაცია

საქართველოს ეროვნული ბანკი მიიჩნევს, რომ ინფლაციის ბოლო თვეების დინამიკა რეგულატორის პროგნოზებს შეესაბამება.

როგორც ეროვნული ბანკის განცხადებაშია აღნიშნული, მიმდინარე პროგნოზის თანახმად, სხვა თანაბარი პირობების არსებობისას, წლიური ინფლაციის შემცირების ტენდენცია შენარჩუნდება და 2021 წელს მიუახლოვდება მიზნობრივ ინფლაციას (3%-ს).

დოკუმენტში აღნიშნულია, რომ ინფლაციის შემცირების დინამიკა განპირობებულია სუსტი ჯამური მოთხოვნილებით და მოსალოდნელია, რომ ეს გავლენა მომავალშიც შენარჩუნდება. გარდა ამისა, საყურადღებოა გარეშე მოთხოვნილების შემცირებაც.

13
თემები:
საქართველოს ეკონომიკა
თბილისი

სააგენტო „აწარმოე საქართველოში“ ივენთ კომპანიების განაცხადების მიღებას იწყებს

15
(განახლებულია 11:50 04.12.2020)
ივენთ კომპანიები სესხის პროცენტის სუბსიდიების პროგრამაში ადრეც იყვნენ ჩართული,  ახლა სახელმწიფო მათი ლიზინგის პროცენტის სუბსიდირებასაც მოახდენს, ვინაიდან ამ კომპანიებს გარკვეული ინვენტარი აქვთ ლიზინგით შეძენილი

თბილისი, 3 დეკემბერი – Sputnik. სააგენტო „აწარმოე საქართველოში“ პროგრამის „ღონისძიებების ორგანიზატორთა მიერ კომერციული ბანკისგან/ლიზინგის გამცემისგან მიღებული სესხის/სალიზინგო პროექტის სუბსიდირების მექანიზმი“ ფარგლებში 4 დეკემბრიდან განაცხადების მეორე ნაკადის მიღებას იწყებს, ნათქვამია უწყების მიერ გავრცელებულ ინფორმაციაში.

რას ჰპირდება სახელმწიფო ბიზნესს პანდემიის გამო დაწესებული შეზღუდვების სანაცვლოდ>>

კორონავირუსის პანდემიამ და ამის გამო დაწესებულმა შეზღუდვებმა საქართველოში სერიოზული პრობლემები შეუქმნა ბიზნესს. მთავრობა სხვადასხვა პროგრამის მეშვეობით ამ პრობლემების შემსუბუქებას ცდილობს. ამჯერად ხელისუფლება ბიზნესს საბანკო ვალდებულებების მომსახურების მიმართულებით ეხმარება.

„პროგრამის მიზანია კორონავირუსის პანდემიით გამოწვეული ეკონომიკური სირთულეებიდან გამომდინარე ნებისმიერი ტიპის ღონისძიებების ორგანიზების სფეროში მოქმედი იმ მეწარმე სუბიექტების მიერ კომერციულ ბანკში/ლიზინგის გამცემთან აღებული/შეთანხმებული სესხების/სალიზინგო პროექტის სუბსიდირება, რომელთაც შექმნილი ვითარებიდან გამომდინარე შეეზღუდათ ოპერირების შესაძლებლობა და, შესაბამისად, შეუმცირდათ ოპერირებიდან მიღებული შემოსავალი“, - აღნიშნულია სააგენტოს მიერ გავრცელებულ ინფორმაციაში.

უწყების ცნობით, სააგენტო „აწარმოე საქართველოში“ განახორციელებს 2020 წლის 1 მარტის მდგომარეობით, მეწარმე სუბიექტის სესხის/ლიზინგის საგნის ძირის ნაშთზე მომდევნო 12 თვის განმავლობაში დარიცხული საპროცენტო სარგებლის ჯამური ოდენობის სუბსიდირებას, რომელიც დაითვლება ამ სესხზე 1 მარტის მდგომარეობით არსებული საპროცენტო განაკვეთის გამოყენებით.

თანადაფინანსების თანხის გამოყენება შესაძლებელია როგორც აღნიშნული სესხის/ლიზინგის საგნის 2020 წლის 1 მარტამდე წარმოშობილი ვალდებულებების, ასევე 2020 წლის 1 მარტის შემდგომ გადასახდელი ვალდებულების დასაფარად.

კომერციული ბანკის/ლიზინგის გამცემის მიერ მეწარმე სუბიექტზე სესხი/ლიზინგის საგანი გაცემული უნდა იყოს 2020 წლის 1 მარტამდე პერიოდში.

პროგრამაში ჩართვის მსურველი, მიმართვის წარდგენის მომენტისათვის უნდა იყოს რეგისტრირებული ფიზიკური ან იურიდიული პირი და საქმიანობის პროფილის დამდგენი დოკუმენტების შესაბამისად ირკვეოდეს, რომ იგი ახორციელებს ღონისძიებების /შეკრებების /გამოფენების /კინოთეატრებში, კინო კლუბებში, ღია ცის ქვეშ ან სხვა სადემონსტრაციო ადგილებში კინოფილმების ან ვიდეოფილმების დემონსტრირების/შეხვედრების/წვეულებების ორგანიზებას; აღნიშნული ღონისძიებების ჩატარების ადგილებში პერსონალის მართვითა და მიწოდებით, ასევე საკვების მიწოდების სერვისით ან ამ სერვისის გარეშე.

კომერციულ ბანკთან/ლიზინგის გამცემთან კი  გაფორმებული უნდა ჰქონდეს სესხის/ლიზინგის ხელშეკრულება და საბანკო/სალიზინგო მიმართვის წარდგენის მომენტისათვის არ უნდა გააჩნდეს სახელმწიფოს მიმართ ვადაგადაცილებული საგადასახადო დავალიანება ან/და არ უნდა იყოს რეგისტრირებული მოვალეთა რეესტრში.

საკოორდინაციო საბჭოს გადაწყვეტილებით, ქვეყანაში 28 ნოემბრიდან სხვადასხვა შეზღუდვა ამოქმედდა, მათ შორის, იზღუდება მუნიციპალური ტრანსპორტის მუშაობა; სავაჭრო ობიექტების (გარდა სურსათის, ცხოველების საკვების, აფთიაქების, ვეტაფთიაქების, საყოფაცხოვრებო ქიმიისა და ჰიგიენის მაღაზიებისა და პრესის ჯიხურებისა) მუშაობა, ღია და დახურული ბაზრობების მუშაობა (გარდა აგრარული ბაზრებისა), სასწავლო დაწესებულებები მთლიანად დისტანციურ რეჟიმზე გადადიან.

„აწარმოე საქართველოში“ – საქართველოს ხელისუფლების ერთ-ერთი ყველაზე წარმატებული პროექტია, რომელიც მიზნად ისახავს ქვეყანაში ადგილობრივი წარმოების განვითარებას. სააგენტო აერთიანებს ყველა სახელმწიფო პროგრამას, მიმართულს ბიზნეს-სექტორის ხელშეწყობისა და ქვეყნის ეკონომიკური განვითარებისკენ.

15
თემები:
საქართველოს ეკონომიკა
ამირან გამყრელიძე

ამირან გამყრელიძე: გადაწყვეტილი არაა, დასჭირდებათ თუ არა კოვიდგადატანილ პირებს ვაქცინა

0
კორონავირუსის ვაქცინა, რომელსაც საქართველოს მთავრობა შეისყიდის, მოქალაქეებისთვის უფასოდ იქნება ხელმისაწვდომი. მისი ქვეყანაში შემოტანა მარტი-აპრილის თვეში იგეგმება.

თბილისი, 4 დეკემბერი - Sputnik. სჭირდებათ თუ არა ვაქცინაცია იმ ადამიანებს, რომლებმაც კორონავირუსი უკვე გადაიტანეს, ჯერ გადაწყვეტილი არ არის, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ საკოორდინაციო საბჭოს დასრულების შემდეგ მთავრობის ადმინისტრაციაში გამართულ ბრიფინგზე.

ლევან რატიანი: ადამიანს, რომელიც ვირუსს გადაიტანს, სავარაუდოდ, ვაქცინა არ დასჭირდება>>

გამყრელიძის თქმით, მსოფლიოში ამჟამად ამ საკითხზე მსჯელობა მიმდინარეობს. ბევრი დამატებითი ინექციის მომხრეა, რადგან ეს ადამიანის იმუნიტეტს აძლიერებს, თუმცა ზოგს ამის საწინააღმდეგო მოსაზრება აქვს.

„არის ხალხი, ვინც ემხრობა იმ მიმართულებას, რომ ისინი (ვისაც გადატანილი აქვს COVID-19) არ უნდა აიცრან. უმრავლესობა ემხრობა იმას, რომ თუ გადატანილი გაქვს ვირუსი, დამატებითი ე.წ. ბუსტერის დოზა არაფერს დაგიშავებს“, - განაცხადა ამირან გამყრელიძემ.

ამასთან, ზოგმა კორონავირუსი უსიმპტომოდ გადაიტანა და აქედან გამომდინარე, ძნელი გასარჩევია, ვინ გადაიტანა ვირუსი და ვინ არა და შესაბამისად, ვინ უნდა აიცრას და ვინ – არა.

როდის მიიღებს საქართველო COVID-19-ის საწინააღმდეგო ვაქცინას: ოპტიმისტური პროგნოზი>>

მან გაიხსენა წითელას ეპიდემია საქართველოში და აღნიშნა, რომ, როდესაც წითელას მასობრივი კამპანიები გვქონდა შარშან და შარშანწინ, ადამიანებს არ ვთხოვდით იმის ლაბორატორიულ დადასტურებას, ჰქონდა თუ არა დაავადება გადატანილი.

„დამატებითი ინექცია არაფერ ცუდს არ აკეთებს, პირიქით, იმუნიტეტს კიდევ უფრო აძლიერებს“, – აღნიშნა გამყრელიძემ.

როგორც საქართველოს მთავრობაში აცხადებენ კორონავირუსის ვაქცინა, სავარაუდოდ, 2021 წლის მარტი–აპრილში იქნება ხელმისაწვდომი მას შემდეგ, რაც ვაქცინას ჯანდაცვის მსოფლიო ორგანიზაცია დაამტკიცებს.

ასევე ცნობილია, რომ ვაქცინას საქართველოს მთავრობა შეისყიდის და ის ქვეყნის მოსახლეობისთვის უფასო იქნება.

საქართველოს მთავრობაში აღნიშნავენ, რომ ვაქცინაციის გეგმის მომზადებისა და მის შესყიდვაზე სპეციალურად შექმნილი უწყებათაშორისი კომისია მუშაობს. კომისია ასევე უზრუნველყოფს კოვიდ-ვაქცინაციის დასაწყებად საჭირო ტექნიკურ სამუშაოებს.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 5.068-ით გაიზარდა და ინფიცირებულთა საერთო რიცხვმა 152.704-ს მიაღწია.

„დარწმუნებული ვარ“: კორონავირუსის ვაქცინის შემქმნელი პანდემიის დასრულების თარიღს ასახელებს>>

ამ დროისათვის სულ გამოჯანმრთელდა 126.904 ადამიანი, გარდაიცვალა – 1.425.

საქართველოში კორონავირუსის პირველი შემთხვევა 26 თებერვალს დაფიქსირდა.

0
თემები:
COVID-19 საქართველოში