თბილისი, 30 ნოემბერი — Sputnik. საბერძნეთის ფინანსთა სამინისტროს მიერ შემუშავებულმა საინფორმაციო სისტემამ 500 მლრდ გადამალული გადასახადები გამოავლინა, იუწყება საინფორმაციო სააგენტო РИА Новости.
აღნიშნულის თაობაზე ჟურნალისტებს საბერძნეთის მთავრობის ოფიციალურმა წარმომადგენელმა დიმიტრის ძანაკოპულოსმა აუწყა.
საუბარია 2002-2014 წლების პერიოდში გადასახადებისგან თავის არიდებაზე, რაც, ძანაკოპულოსის თქმით, არის კიდეც ერთ-ერთი მიზეზი ქვეყნის ღრმა ფინანსურ კრიზისში ჩაფლვისა.
„[ახალი] სისტემა საგადასახადო დეკლარაციებს საბანკო დეპოზიტებს ადარებს, რის შედეგადაც კონკრეტული დასკვნები გაკეთდა. ამგვარად, სახეზეა 2002-2014 წლებში 500 მლრდ ევროზე მეტი გადასახადისგან თავის არიდება… ასე რომ, საუბარია ერთ-ერთ იმ მთავარ მიზეზზე, რამაც კრიზისამდე მიგვიყვანა“, — განაცხადა მთავრობის წარმომადგენელმა.
ძანაკოპულოსის თქმით, საბერძნეთის მთავრობა ამზადებს ზომებს გადასახადების მოკრებისა და საგადასახადო სისტემის მექანიზმების გასაუმჯობესებლად.
