თბილისი, 25 სექტემბერი — Sputnik. ეგვიპტური ავიაკომპანია Air Cairo კაირო-თბილისი-კაიროს მიმართულებით რეგულარულ რეისებს 3 ნოემბრიდან განახორციელებს, ნათქვამია საქართველოს ეკონომიკისა და მდგრადი განვითარების სამინისტროს სამოქალაქო ავიაციის სააგენტოს Facebook-გვერდზე.
ეგვიპტისა და საქართველოს დედაქალაქებს შორის ფრენებს საჰაერო ხომალდი Airbus A320 კვირაში ორჯერ — ორშაბათს და ხუთშაბათს შეასრულებს. შესაბამისი ნებართვა სამოქალაქო ავიაციის სააგენტომ ეგვიპტური კომპანიისთვის უკვე გასცა.
ახალი მიმართულების პარალელურად ზამთრის სანავიგაციო სეზონის განმავლობაში (ოქტომბერი-მარტი) ავიაკომპანია Air Cairo გააგრძელებს ფრენებს შარმ-ელ-შეიხიდან და ჰურგადიდან თბილისის მიმართულებით.
Air Cairo ქართულ ავიაბაზარზე 2014 წლიდან ოპერირებს და EgyptAir-ის შვილობილ კომპანიას წარმოადგენს, რომელიც მგზავრებს დაბალბიუჯეტიან მოდელზე დაფუძნებულ სერვისებს სთავაზობს.
ბოლო დროს საქართველოში ტურიზმის სფერო დინამიურად ვითარდება — წლიდან წლამდე იზრდება უცხოელ ვიზიტორთა რაოდენობა, მათ შორის, ეგვიპტიდან.
საქართველოს 2017 წლის პირველი რვა თვის განმავლობაში 5,1 მილიონამდე უცხოელი ვიზიტორი ეწვია, აქედან 6500-მდე ეგვიპტელი ვიზიტორი იყო, რაც 2016 წლის ანალოგიურ პერიოდთან შედარებით 97,4%-ით მეტია.
