თბილისი, 17 მარტი — Sputnik. საქართველოში ფულადი გზავნილების მოცულობით რუსეთი ლიდერობს — 2017 წლის თებერვალში ამ ქვეყნიდან 30,3 მლნ აშშ დოლარია გადმორიცხული, რაც 15%-ით მეტია იანვრის თვის მონაცემთან შედარებით და 21%-ით მეტია 2016 წლის თებერვლის თვესთან შედარებით, აღნიშნულია საქართველოს ეროვნული ბანკის ვებ-გვერდზე.
თებერვალში ელექტრონული სისტემების მეშვეობით საქართველოს კომერციულ ბანკებში ფულადი გზავნილების მთლიანი მოცულობის 32,2% რუსეთის წილზე მოდის.
თებერვალში საქართველოში სხვადსხვა ქვეყნიდან საერთო ჯამში 94,1 მილიონი დოლარია გადმოგზავნილი, რაც 17,9%-ით მეტია გასული წლის ანალოგიურ პერიოდთან შედარებით.
მიმდინარე წლის იანვარ-თებერვლის პერიოდში რუსეთიდან საქართველოში ფულადი გზავნილები 27%-ით მეტია გასული წლის საანგარიშო პერიოდთან შედარებით. აღნიშნულ პერიოდში რუსეთიდან ფულადი გზავნილების საერთო მოცულობამ 57 მლნ აშშ დოლარი შეადგინა.