თბილისი, 14 მარტი — Sputnik. საქართველოს ვიცე-პრემიერი, ენერგეტიკის მინისტრი კახა კალაძე სამუშაო ვიზიტით მინსკში გაემგზავრა.
ვიზიტის ფარგლებში კალაძე შეხვედრებს გამართავს რუსული კომპანია „ინტერ რაოს“ წარმომადგენლებთან. მორიგი სამუშაო შეხვედრის მსვლელობისას მხარეები მიმდინარე საკითხებს განიხილავენ, აღნიშნულია საქართველოს ენერგეტიკის სამინისტროს ვებ-გვერდზე განთავსებულ განცხადებაში.
სს „თელასი“ ერთ-ერთი მსხვილი კომპანიაა საქართველოში ელექტროენერგიის დისტრიბუციის დარგში, რომელიც 2003 წლის აგვისტოში „ინტერ რაოს“ შემადგენლობაში შევიდა. „ინტერ რაოს" მფლობელობაშია „თელასის“ აქციათა 75%, ხოლო 25%-მდე სახელმწიფოს საკუთრებაა.
„თელასის“გარდა საქართველოში „ინტერ რაოს“ აქტივების სტრუქტურაში შედის „ხრამჰესი-1“-ისა და „ხრამჰესი-2“-ის ჰიდროენერგეტიკული აქტივები.
