დადიანების სასახლე ზუგდიდში

Google-ის კულტურულმა ინსტიტუტმა დადიანების სასახლეების საგანძური გამოფინა: იხილეთ გამოფენა

76
(განახლებულია 19:22 06.01.2021)
გამოფენა სახელწოდებით „დადიანების სასახლეების საგანძური“ 6 იანვრის ღამის პირველ საათზე ატვირთა „გუგლის“ კულტურულმა ინსტიტუტმა საკუთარ პლატფორმაზე

თბილისი, 6 იანვარი – Sputnik. მსოფლიოს უდიდესმა, „გუგლის“ კულტურულმა ინსტიტუტმა თავისი პლატფორმა დადიანების სასახლეებს დაუთმო, წერს სოციალურ ქსელში ხელოვნების სასახლის ხელმძღვანელი გიორგი კალანდია, რომელიც დადიანების სასახლეების მზრუნველთა საბჭოს თავჯდომარედ დაახლოებით ოთხი თვის წინ დაინიშნა.

„შეიძლება ითქვას, შეუძლებელი შევძელით! მსოფლიოს უდიდესმა, „გუგლის“ კულტურულმა ინსტიტუტმა თავისი პლატფორმა დადიანების სასახლეებს დაუთმო! ზუგდიდი, ხელოვნების სასახლის შემდეგ მეორე ქართული მუზეუმია, რომლის კოლექციაც მრავალმილიონიანი მსოფლიო აუდიტორიის წინაშე გამოიფინა“, – აღნიშნავს გიორგი კალანდია.

გამოფენა სახელწოდებით „დადიანების სასახლეების საგანძური“ 6 იანვრის ღამის პირველ საათზე ჩაიტვირთა. პროცესს ნიუ-იორკში ესწრებოდა და კოორდინაციას უწევდა მზრუნველთა საბჭოს წარმომადგენელი მერი ხარაიშვილი.

როგორც კალანდია აღნიშნავს, ამ გამოფენას ორმაგი მნიშვნელობა აქვს: პირველი ის, რომ მსოფლიოს კიდევ ერთხელ გააცნობს საქართველოს უმდიდრეს წარსულს და ამასთან „კულტურის პირუთვნელი ფაქტების ენით მსოფლიოს დაანახებს ჩვენი ქვეყნის ტერიტორიული ერთიანობის ისტორიულ საფუძვლებს“.

გამოფენის ექსპონატებს შორის დამთვალიერებლები იხილავენ ილორის, მოქვის უძვირფასეს ოქროს ხატებს, რომელთაც ქართული წარწერები და ქართველ ისტორიულ მოღვაწეთა სახელები ამშვენებს.

„მხოლოდ აქ, მხოლოდ „გუგლის“ ტექნოლოგიების წყალობით, უმცირეს დეტალებამდე შეგიძლიათ დაათვალიეროთ სამეგრელოს განძი, რომელიც ასე ბრწყინვალედ, ასე პომპეზურად, მთელი მსოფლიოს გასაოცებლად და გასაოგნებლად პირველად გამოიფინა“, — წერს გიორგი კალანდია.

გამოფენის სრულად დასათვალიერებლად მიჰყევით ბმულს>> 

76
თემები:
ქართული კულტურული მემკვიდრეობის ძეგლები (71)
არიადნა შენგელაია და მერაბ ელიოზიშვილი ფილმში „თეთრი ქარავანი“

შენგელაია-88: კინოცენტრი „თეთრი ქარავანის“ განახლებულ ვერსიას აჩვენებს

23
ეს საკულტო ფილმი აღდგენილია კანის ფესტივალზე წარსადგენად, სადაც ფილმი პირველი წარმატებული ჩვენებიდან 55 წლის შემდეგ აჩვენეს

თბილისი, 26 იანვარი – Sputnik. ეროვნული კინოცენტრი ფილმ „თეთრი ქარავანის" (1963) აღდგენილი ვერსიის ჩვენებას ფილმის ავტორის - ლეგენდარული რეჟისორის, ელდარ შენგელაიას 88 წლის იუბილეს აღსანიშნავად გამართავს.

ფილმი Facebook-ის პირდაპირ ეთერში კინოცენტრის ოფიციალურ ვებგვერდზე შაბათს, 30 იანვარს, 22:00 საათზე იქნება ნაჩვენები. ფილმის ლინკი ხელმისაწვდომი იქნება ასევე ეროვნული კინოცენტრის კინოკლუბის ვებგვერდზე.

ელდარ შენგელაიას და თამაზ მელიავას ფილმი „თეთრი ქარავანი" 1964 წელს პირველად აჩვენეს კანის საერთაშორისო კინოფესტივალის საკონკურსო პროგრამაში. 2019 წელს, 55 წლის შემდეგ, იგი კანში კვლავ დაბრუნდა სექციაში „კანის კლასიკა".

სწორედ 2019 წელს, კანის საერთაშორისო კინოფესტივალზე კვლავ წარსადგენად, ეროვნულ არქივთან თანამშრომლობით გაკეთდა ფილმის ფერის, გამოსახულებისა და ხმის კორექცია.

„თეთრ ქარავანს" სამი წლის განმავლობაში იღებდნენ. სცენარზე მერაბ ელიოზიშვილი მუშაობდა, ხოლო ოპერატორი ტიტო კალატოზიშვილი იყო. ფილმში მთავარ როლებს ასრულებენ სპარტაკ ბაღაშვილი, დოდო აბაშიძე, არიადნა შენგელაია და იმედო კახიანი.

ელდარ შენგელაია დაიბადა თბილისში 1933 წელს. 1958 წელს დაამთავრა კინემატოგრაფიის საკავშირო სახელმწიფო ინსტიტუტის („ვგიკის“) კინოსარეჟისორო ფაკულტეტი (სერგეი იუტკევიჩის და სერგეი სკვორცოვის სახელოსნო). მან გადაიღო ისეთი საკულტო ფილმები, როგორებიცაა „თოვლის ზღაპარი“, „თეთრი ქარავანი“, „არაჩვეულებრივი გამოფენა“, სამანიშვილის დედინაცვალი“, „ცისფერი მთები ანუ დაუჯერებელი ამბავი“ და სხვ.

23
„ოსკარის“ ქანდაკება

ქართულ დრამას „დასაწყისი“ „ოსკარის“ ნომინაციაზე წარდგენას უწინასწარმეტყველებენ

24
(განახლებულია 21:44 26.01.2021)
მოხვდება თუ არა ქართული ფილმი იეღოვას მოწმეების დევნის შესახებ პრესტიჟული კინოპრემიის ნომინანტებს შორის, 9 თებერვალს გახდება ცნობილი.

თბილისი, 26 იანვარი – Sputnik. ავტორიტეტულმა პორტალმა IndieWire ქართველი რეჟისორის დეა კულუმბეგაშვილის ფილმი „დასაწყისი“ იმ 15 საუკეთესო საერთაშორისო კინოსურათს შორის დაასახელა, რომლებიც შეიძლება „ოსკარის“ ნომინანტები გახდნენ.

IndieWire – ესაა ვებ-გვერდი, რომელიც 1996 წელს შეიქმნა და კინოინდუსტრიასა და კინომიმოხილვას ეძღვნება. განსაკუთრებული ყურადღება ვებ-გვერდზე დამოუკიდებელ კინოს ექცევა.

IndieWire-ის მიერ შერჩეულ ფილმებს შორის მოხვდა სხვადასხვა ქვეყნის კინოსურათები – საბერძნეთის, ჩეხეთის, ნორვეგიის, შვეიცარიისა და სხვ.

დრამა „დასაწყისი“ საქართველოსა და საფრანგეთის ერთობლივი ნამუშევარია. ფილმი მოგვითხრობს იეღოვას მიმდევართა ერთი ჯგუფის ისტორიას, რომელიც პროვინციულ ქალაქში ექსტრემისტული დაჯგუფების მხრიდან თავდასხმას განიცდის.

მთავარი გმირი იანა ერთ-ერთი იეღოველის მეუღლეა. მისთვის ნაცნობი სამყარო კონფლიქტის შედეგად ნელ-ნელა იმსხვრევა. იანას შინაგანი მღელვარება ძლიერდება, როდესაც იგი საკუთარი სურვილების გაანალიზებას იწყებს.

დეა კულუმბეგაშვილის სრულმეტრაჟიანმა სადებიუტო მხატვრულმა ფილმმა ერთბაშად ოთხი მთავარი ჯილდო დაიმსახურა პრესტიჟულ სან-სებასტიანის საერთაშორისო კინოფესტივალზე, მიიღო ტორონტოს კინოკრიტიკოსთა საერთაშორისო ასოციაციის პრიზი, თავად რეჟისორი კი Special Cannes 2020-ის ჟიურის წევრად გამოცხადდა.

„დასაწყისი” გადაღებულია ლაგოდეხის მუნიციპალიტეტში – ლაგოდეხსა და მის ირგვლივ სოფლებში და შექმნილია ეროვნული კინოცენტრის მხარდაჭერით.

ამერიკული „ოსკარის“ პრემიის ნომინანტებს 9 თებერვალს დაასახელებენ.

24
თემები:
საქართველო და კულტურა
 Georgian Water and Power-ის (GWP) თანამშრომელი

GWP: თანამშრომლების გაფიცვა წყალმომარაგებაზე არ აისახება

0
სამუშაო პირობებით უკმაყოფილო კომპანიის თანამშრომლებმა კომპანიის ადმინისტრაციას საკუთარი მოთხოვნები წაუყენეს

თბილისი,  26 იანვარი – Sputnik. წყალგამანაწილებელი კომპანია Georgian water and power–ის (GWP) განცხადებით, თბილისის სტაბილურ წყალმომარაგებას საფრთხე არ შეექმნება, იუწყება პირველი არხი.

წყალგამანაწილებელი კომპანიის კონტრაქტორების ერთმა ნაწილმა, რომელიც კომპანიას დაქირავებული ჰყავს გარკვეული ვადით და პირობებით, ორი დღეა, უარი განაცხადა სამუშაოს შესრულებაზე.

GWP–ის დაახლოებით ოცამდე თანამშრომელმა კომპანიის სასარგებლოდ შედგენილი ხელშეკრულების პირობების გადახედვა, კუთვნილ შვებულებაზე ნებართვის მიღება და ხელფასის გაზრდა მოითხოვა.

„ერთი მხრივ, ისინი არ ასრულებენ ხელშეკრულებით გათვალისწინებულ მოვალეობებს, მეორე მხრივ კი, სხვებსაც ხელს უშლიან სამუშაოს შესრულებაში, რითაც აფერხებენ კომპანიის მიმდინარე საქმიანობას. მიუხედავად შექმნილი მდგომარეობისა, თბილისის სტაბილურ წყალმომარაგებას არანაირი საფრთხე არ შეექმნება“, – განაცხადეს კომპანიაში.

კომპანიაში ამავე დროს ხაზი გაუსვეს იმასაც, რომ „ჯორჯიან უოთერ ენდ ფაუერმა“, მიუხედავად პანდემიით გამოწვეული რთული ვითარებისა და მკვეთრად შემცირებული შემოსავლებისა, გამოიჩინა მაღალი სოციალური პასუხისმგებლობა და კომპანიაში დასაქმებულ ყველა თანამშრომელს შეუნარჩუნა სამუშაო ადგილი და ანაზღაურება, მაშინ როდესაც კომპანიების დიდი ნაწილი გაჩერებულია და ადამიანები სამუშაოს გარეშე დარჩნენ.

კომპანიის განცხადებით, „ჯორჯიან უოთერ ენდ ფაუერმა“ მაქსიმალური ძალისხმევა გამოიჩინა კონტრაქტორებთან შექმნილი სიტუაციის განსამუხტად.

თბილისში ათასობით ოჯახი 24 საათის განმავლობაში უწყლოდ დარჩება >>

დამსაქმებელსა და დასაქმებულებს შორის სადავო საკითხების გადაწყვეტის პროცესში ჩართული იყო პროფკავშირის წარმომადგენელიც, რომელიც GWP–ის ხელმძღვანელობასთან კონსულტაციებს მართავდა.

აღსანიშნავია, რომ „ჯორჯიან უოთერ ენდ ფაუერმა“ 26-27 იანვარს ღრმაღელე-სამგორის წყალგამტარ გვირაბზე, წყალმომარაგების სტაბილურობის მიზნით, ტექნიკური სამუშაოები დაიწყო, რის გამოც ჩუღურეთისა და ნაძალადევის რაიონებში ათასობით აბონენტს წყალმომარაგება შეუწყდა.

 

0