სანდრა გადელია

„საბავშვო ევროვიზია 2020“-ზე საქართველოს სანდრა გადელია წარადგენს

174
(განახლებულია 11:19 29.11.2020)
საერთაშორისო კონკურსის ფინალი 29 ნოემბერს პოლონეთში მსოფლიოში რთული ეპიდემიოლოგიური სიტუაციის გამო ტელეხიდის ფორმატში გაიმართება

თბილისი, 14 ნოემბერი – Sputnik. საქართველოს „საბავშვო ევროვიზია 2020“-ზე 10 წლის სანდრა გადელია წარადგენს - სწორედ მან მოიგო საბავშვო ვოკალურ კონკურსში „რანინა“, რომლის გამარჯვებულები ტრადიციულად წარადგენენ ქვეყანას კონკურსზე.

სანდრა გადელია მოსკოვში დაიბადა. საქართველოს პირველად ოთხი წლის ასაკში ეწვია. გოგონა ძირითადად მოსკოვში ცხოვრობს, სამშობლოში ზამთარში და ზაფხულში ჩამოდის, ამიტომაც ქართულად ჯერჯერობით საუბარი ცოტა უჭირს.

გოგონა მუსიკით პატარა ასაკიდანაა გატაცებული. მას საკმაოდ აქტიური შემოქმედებითი ცხოვრება აქვს: მას აქვს მონაწილეობა მიღებული ისეთ სატელევიზიო პროექტებში, როგორებიცაა Лучше всех („ყველაზე უკეთესი“) მაქსიმ გალკინთან ერთად, Король Караоке („კარაოკეს მეფე“), ასევე „პოლა ნეგრის“ მიუზიკლი.

პროექტის საუკეთესოს წოდებისთვის სანდრასთან ერთად იბრძოდნენ 12 წლის მარიტა ხვედელიძე და 11 წლის რატი გელოვანი, რომლებმაც მეორე და მესამე ადგილები დაიკავეს.

სიმღერის ყოველწლიური კონკურსი „საბავშვო ევროვიზია 2020“ პოლონეთის დედაქალაქში 29 ნოემბერს მსოფლიოში არსებული ეპიდემიური ვითარების გამო ტელეხიდის ფორმატში გაიმართება. პროფესიული გუნდი და წამყვანები ვარშავის სტუდიაში განთავსდებიან, ხოლო ყოველი მონაწილე თავისი ქვეყნის სტუდიიდან იმღერებს.

კონკურსის სამართლიანობისა და ყველა არტისტის ღირსეული წარდგენისთვის, ევროპის სამაუწყებლო კავშირის (EBU) წევრები ყველა მოედანზე სცენის ანალოგიურ გეგმარებას და ტექნიკურ განათებას გამოიყენებენ.

მე-18 ფესტივალის სლოგანია Move the world! („აამოძრავე მსოფლიო“). კონკურსის ფინალში 12 ქვეყნის წარმომადგენელი მიიღებს მონაწილეობას: საქართველო, რუსეთი, ბელარუსი, საფრანგეთი, ყაზახეთი, მალტა, ნიდერლანდები, სერბეთი, ესპანეთი, უკრაინა, პოლონეთი, გერმანია.

2019 წელს პოლონეთის ქალაქ გლივიცაში გამართულ  „საბავშვო ევროვიზია 2019“-ზე საქართველო წარადგინა 13 წლის გიორგი როსტიაშვილმა სიმღერით „გვინდა გვიყვარდეს“ (We need love) და კონკურსში მე-14 ადგილი დაიკავა. კონკურსის გამარჯვებული პოლონელი ვიკი გაბორი გახდა.

საქართველო „საბავშვო ევროვიზიის“ გამარჯვებული სამჯერ გახდა – 2008, 2011 და 2016 წლებში.

174
თემები:
საქართველო და კულტურა (1115)
ხარაჩოები გელათის მონასტერში

ქართველი რესტავრატორები გელათის ტაძარს იუნესკოს ექსპერტების ჩამოსვლისთვის ამზადებენ

38
(განახლებულია 13:41 12.06.2021)
უცხოელი ექსპერტების რეკომენდაციების მიხედვით, პრობლემების აღმოფხვრის სამოქმედო გეგმა ქართველი სპეციალისტების ჩართულობით განისაზღვრება.

თბილისი, 12 ივნისი - Sputnik. საქართველოს კულტურის, სპორტისა და ახალგაზრდობის საქმეთა მინისტრი თეა წულუკიანი გელათის სამონასტრო კომპლექსს ეწვია და საქართველოში იუნესკოს ექსპერტების ვიზიტის მოსამზადებელ სამუშაოებს გაეცნო.

სამინისტროს ინიციატივით, გელათის ძირითადი ტაძრის შიდა და გარე პერიმეტრზე კედლის ფერწერის და სახურავის სრულფასოვნად შესასწავლად ხარაჩოები აღიმართა.

იუნესკოს ექსპერტები გელათის ტაძარზე 2008 წელს შედგენილი პროექტის მიხედვით ჩატარებული ძირითადი ტაძრის გადახურვის სამუშაოების დროს დაშვებული ხარვეზების შედეგად შექმნილ მდგომარეობას შეისწავლიან და შესაბამის რეკომენდაციებს გასცემენ. ექსპერტები ასევე შეისწავლიან კედლის ფერწერის დაზიანებულ ნაწილებს და ზიანის გამოსწორების მიზნით სამოქმედო გეგმას დასახავენ.

უცხოელი ექსპერტების რეკომენდაციების მიხედვით, გელათის სამონასტრო კომპლექსის წინაშე არსებული პრობლემების აღმოფხვრის სამოქმედო გეგმა ქართველი სპეციალისტების ჩართულობით განისაზღვრება.

საქართველოს კულტურის, სპორტისა და ახალგაზრდობის სამინისტრომ მომდინარე წლის აპრილიდან არაერთი მნიშვნელოვანი ნაბიჯი გადადგა გელათის სამონასტრო კომპლექსში არსებული სიტუაციის შესწავლისა და პრობლემების აღმოფხვრის მიზნით. სამინისტროსთან შეიქმნა არქიტექტორ-რესტავრატორთა სამუშაო ჯგუფი, რომელიც აქტიურად მუშაობს. პარალელურად შეიქმნა კედლის მხატვრობის რესტავრატორთა ჯგუფი დაზიანებული ფერწერის შესანარჩუნებლად.

გარდა ამისა, სამინისტროში მიმდინარე წლის 25 მაისს ხელოვნებათმცოდნეებსა და კედლის მხატვრობის რესტავრატორებთან გამართულ შეხვედრაზე გადაწყდა, რომ იუნესკოს ექსპერტთა ჯგუფის ჩამოსვლამდე მოხდება ფერწერის ფენის კვლევა. კვლევის პარალელურად, ქართველმა პროფესიონალმა რესტავრატორებმა დაზიანებულ ფრესკებს უნდა რეგულარულად მოაშორონ მარილი იმ ადგილებში, სადაც ეს ფერწერის დაზიანების გარეშე ჯერ კიდევ შესაძლებელია.

38
ანზორ ერქომაიშვილი

თბილისში ანზორ ერქომაიშვილის სახელობის ფოლკლორის საერთაშორისო ფესტივალი გაიმართება

30
(განახლებულია 18:52 11.06.2021)
მერიის ინფორმაციით, ფესტივალი ანზორ ერქომაიშვილის სახელის უკვდავსაყოფად და იმ საქმისადმი მადლიერების გამოსახატად დაარსდა, რომელიც მან ქართული ფოლკლორის გადარჩენისა და განვითარებისთვის გასწია.

თბილისი, 11 ივნისი – Sputnik. ჯანსუღ კახიძის სახელობის თბილისის მუსიკალურ-კულტურული ცენტრი ახალ ფესტივალს უმასპინძლებს, რომელიც დიდი ქართველი მუსიკოსის, მომღერლის, საგუნდო დირიჟორის, ხალხური სიმღერების შემკრებისა და პედაგოგის, ანზორ ერქომაიშვილის სახელს ატარებს, ნათქვამია ორგანიზატორების განცხადებაში.

ქართველი მომღერალი, ლოტბარი და ფოლკლორის გამორჩეული ქომაგი ანზორ ერქომაიშვილი 80 წლის ასაკში 31 მარტს კორონავირუსის გართულებით გარდაიცვალა. ის მთაწმინდის პანთეონში დაკრძალეს.

„ღონისძიების სტატუსი საერთაშორისოა, თუმცა წელს მსოფლიოში შექმნილი ვითარების გამო ფოლკლორული ანსამბლების სხვადასხვა ქვეყნიდან ჩამოყვანა ვერ ხერხდება, რის გამოც მსმენელის წინაშე საკონცერტო პროგრამებით მხოლოდ ქართული ანსამბლები წარდგებიან“, - ნათქვამია განცხადებაში.

ფესტივალის ფარგლებში წელს ოთხი კონცერტი გაიმართება: 12 ივნისს საქართველოს ხალხური სიმღერისა და ცეკვის სახელმწიფო აკადემიური ანსამბლი „რუსთავი“ წარდგება მაყურებლის წინაშე; 13 ივნისს – ქართული სიმღერის სახელმწიფო ანსამბლი „ბასიანი“; 19 ივნისს – საქართველოს ხალხური სიმღერის სახელმწიფო ანსამბლი „ერისიონი“; 20 ივნისს – აფხაზეთის სიმღერის სახელმწიფო ანსამბლი „შავნაბადა“.

ქვეყანაში არსებული კოვიდ-რეგულაციებიდან გამომდინარე, ბილეთები გაიყიდება მხოლოდ ელექტრონულად, პორტალზე www.biletebi.ge.

ფესტივალის მხარდამჭერია ქალაქ თბილისის მუნიციპალიტეტის მერია.

ანზორ ერქომაიშვილი 1940 წლის 10 აგვისტოს ბათუმში დაიბადა. 1968 წლიდან 2019 წლამდე იყო ანსამბლ „რუსთავის“ ხელმძღვანელი.

ანზორ ერქომაიშვილი არის საქართველოს ხელოვნების დამსახურებული მოღვაწე (1969), თბილისის საპატიო მოქალაქე (2014). საქართველოს პრეზიდენტმა სალომე ზურაბიშვილმა იგი ბრწყინვალების ორდენით დააჯილდოვა.

ავტორია წიგნებისა „ხმა უცნაური“, „შავი შაშვი ჩიოდა“, „ბაბუა“.

30
თემები:
საქართველო და კულტურა (1115)
მეხანძრე-მაშველებმა 13 ივნისს დაღუპულთა ხსოვნას პატივი მიაგეს

მეხანძრე-მაშველებმა 13 ივნისს დაღუპულთა ხსოვნას პატივი მიაგეს

0
(განახლებულია 12:32 13.06.2021)
13 ივნისის სტიქიამ 21 ადამიანის სიცოცხლე იმსხვერპლა, ორი ადამიანი კი ამ დრომდე დაკარგულად ითვლება. დაიღუპა დაახლოებით 300 ცხოველი

თბილისი, 13 ივნისი - Sputnik. საგანგებო სიტუაციების მართვის სამსახურის თანამშრომლები 13 ივნისს გარდაცვლილთა მემორიალთან მივიდნენ და დაღუპულთა ხსოვნას პატივი მიაგეს, ნათქვამია უწყების მიერ გავრცელებულ განცხადებაში.

მემორიალთან იმყოფებოდნენ საგანგებო სიტუაციების მართვის სამსახურის სახანძრო-სამაშველო ძალების დეპარტამენტის უფროსის მოადგილე სამოქალაქო უსაფრთხოების პოლკოვნიკი მამუკა სეფიაშვილი და თბილისის მთავარი სამმართველოს უფროსი, სამოქალაქო უსაფრთხოების ვიცე-პოლკოვნიკი ოთარ კერესელიძე.

ზურაბ მუზაშვილი 13 ივნისის მოვლენების დროს ერთ-ერთი პირველი იყო იმ მაშველთაგან, ვინც სტიქიის ეპიცენტრში გამოცხადდა. სამაშველო ოპერაციის მსვლელობისას მან 6 ადამიანის სიცოცხლის გადარჩენა შეძლო, თვითონ კი წყლიდან გამოსვლა ვეღარ მოახერხა.

Разрушенная наводнением трасса Ваке-Сабуртало и ущелье, где текла речка Вере. Из серии Тбилисское наводнение 13 июня
© Sputnik / Alexander Imedashvili
2015 წლის 13 ივნისის დამანგრეველი წყალდიდობა თბილისში2015 წლის 13 ივნისის დამანგრეველი წყალდიდობა თბილისში

2015 წლის 13 ივნისს ადიდებულმა მდინარე ვერემ დატბორა საცხოვრებელი სახლები, ზოოპარკი, „მზიურის" პარკი, თამაზ ელიზბარაშვილის ძაღლების კერძო თავშესაფარი და ასევე მოშალა ქალაქის ინფრასტრუქტურა. სტიქიამ 21 ადამიანის სიცოცხლე იმსხვერპლა, ორი ადამიანი კი ამ დრომდე დაკარგულად ითვლება. დაიღუპა დაახლოებით 300 ცხოველი.

Разрушенная наводнением трасса Ваке-Сабуртало. Из серии Тбилисское наводнение 13 июня
photo: Sputnik / Kakhi Bilanishvili
Разрушенная наводнением трасса Ваке-Сабуртало. Из серии "Тбилисское наводнение 13 июня"

ოფიციალური ვერსიით, ტრაგედიის მიზეზი წყნეთი-ბეთანიის დამაკავშირებელ გზაზე ჩამოწოლილი მეწყერი გახდა. დაახლოებით ერთი მილიონი კუბური მეტრი მიწის მასის ჩამოსვლამ ვერეს ხეობაში წყალდიდობა და გამანადგურებელი პროცესები გამოიწვია. მოვარდნილმა ღვარცოფმა გაანადგურა საცხოვრებელი სახლები, გზები, ხიდები, გვირაბები, საყრდენი კედლები, საკომუნიკაციო სისტემები. თითქმის მთლიანად დაიტბორა „მზიურისა" და ზოოპარკის ტერიტორია.

 

ზარალმა დაახლოებით 90 მილიონი დოლარი შეადგინა.

0