ქეთი მელუა

„მარადიული სიყვარული?“: ქეთი მელუამ ძალიან პირადული ალბომი გამოუშვა

125
(განახლებულია 08:53 17.10.2020)
მელუამ თავის მუსიკაში, როგორც ყოველთვის, ჩააქსოვა მთელი თავისი სული და პირადი სამყარო, რომელიც მოტომრბოლელ მეუღლესთან განქორწინების შემდეგ სერიოზულად შეირყა

თბილისი, 17 ოქტომბერი — Sputnik. მსოფლიოში აღიარებულმა ქართული წარმოშობის ბრიტანელმა მომღერალმა ქეთი მელუამ ახალი ალბომი ALBUM №8 გამოუშვა.

ფირფიტაში ALBUM №8 შევიდა 10 სრულიად ახალი კომპოზიცია, რომლებიც ქეთიმ ინგლისსა და საქართველოში დაწერა. ალბომის ჩაწერაში საქართველოს ფილარმონიული ორკესტრი და გორის ქალთა კამერული გუნდი მონაწილეობდნენ.

„ქეთი მელუას ALBUM №8 - ძალიან პირადული, ღია ალბომია სიყვარულსა და დანაკარგზე, რომელიც ორჯერ არის ნომინირებული პრემიაზე Brit Award, მისი პროდიუსერია ლეო აბრაჰამსი. ის მოიცავს ათ შესანიშნავად შედგენილ, ავტობიოგრაფიულ კომპოზიციას. თითოეული მოგვითხრობს ისტორიას, ფიქრების სერიას, თითქოსდა დღიურიდან წაკითხულს“, - წერს The Upcoming.

საინტერესოა, რომ ახალ ალბომში ქეთი მელუა ეხება მარადიული სიყვარულის თემას. ამის მიზეზია მომღერლის ძლიერი შინაგანი განცდები. ქეთი აგვისტოში დაშორდა თავის მეუღლეს, ინგლისელ მოტომრბოლელ ჯეიმს ტოუზლენდს, რომელთანაც ქორწინებამ შვიდ წელს გასტანა.

აღსანიშნავია, რომ ახალი ალბომის ერთ-ერთი სიმღერის კლიპი მელუამ აჭარაში გადაიღო. გადაღებები მიმდინარეობდა ბათუმის ბოტანიკურ ბაღში, ბათუმის ბულვარში, სარფისა და ციხისძირის სანაპიროზე, ასევე სოფელ მერისში.

კლიპის რეჟისორია მარიამ სიჭინავა, ოპერატორი კი ალექს ომიაძეა. მომღერლის ჩაცმულობაზე ბათუმელმა დიზაინერმა თაკო მექვაბიძემ იზრუნა. 

ქეთი მელუა 1984 წელს საქართველოში დაიბადა. ის ერთი წლის იყო, როდესაც მისი ოჯახი ჩრდილოეთ ირლანდიაში გადავიდა საცხოვრებლად, ხოლო 14 წლისა — ინგლისში. მსოფლიო მუსიკაში მისი დებიუტი 2003 წელს გაიმართა, როდესაც გამოვიდა მისი პირველი ალბომი Call Off the Search. ხუთ თვეში ამ ალბომის 1,2 მილიონი ასლი გაიყიდა.

საქართველოს მეოთხე პრეზიდენტმა გიორგი მარგველაშვილმა ქეთი მელუა საზღვარგარეთ ქართული კულტურის პოპულარიზებაში შეტანილი წვლილისთვის, ასევე ნაყოფიერი შემოქმედებითი საქმიანობისთვის „ღირსებით ორდენით“ დააჯილდოვა. ხოლო 2018 წელს, როდესაც ქეთი თბილისში უფასო კონცერტით გამოდიოდა, მას საპატიო თბილისელის წოდება მიენიჭა.

125
თემები:
საქართველო და კულტურა (968)
ლუკა ჩიქოვანის

ქართველი მსახიობი იტალიურ ფილმში იულიუს კეისრის როლს შეასრულებს

106
(განახლებულია 23:24 23.10.2020)
ჩიქოვანის გვარი მართლაც იტალიურად ჟღერს! ყოველ შემთხვევაში ფილმ „ბედნიერი ლაზარეს“ შემდეგ ქართველ მსახიობს ძალიან უმართლებს

თბილისი, 24 ოქტომბერი – Sputnik. ქართული წარმოშობის ახალგაზრდა იტალიელ მსახიობ ლუკა ჩიქოვანს რეჟისორ ჯოვანი ტროილოს ფილმში „რომის ძალა“ (Рower of Rome) გადაიღებენ.

ახალი ამბავი იმის შესახებ, რომ ჩიქოვანი შეასრულებს ერთ-ერთ მთავარ როლს - ეს არის გაიუს ოქტავიანე ავგუსტუსი მსახიობმა თავის Instagram-ზე გამოაქვეყნა და რამდენიმე ფოტოც დაურთო.

„ეს იყო საკმაოდ დიდი პასუხისმგებლობა - შეასრულო იმპერატორ ავგუსტუსის როლი, და დიდი იმედი მაქვს, რომ თქვენ მოგეწონებათ ამ სასწაული როლის ჩემი შესრულება. ეს ჩემთვის უზარმაზარი პატივია! ედოარდო ლეოსთან და დიდ რეჟისორ ჯოვანი ტროილოსთან მუშაობა ძალიან სასიამოვნო იყო“, - წერს ლუკა.

აღსანიშნავია, რომ ეს ჩიქოვანის კინოში პირველი როლი არაა. ადრე ის გადაიღეს იტალიელი რეჟისორის, ალიჩე როხვალერის ფილმში „ბედნიერი ლაზარე“. სრულმეტრაჟიანმა ფილმმა კანის ფესტივალზე პრიზი საუკეთესო სცენარისთვის მიიღო.

ლუკა ჩიქოვანი დაიბადა თბილისში, ხოლო ექვსი წლიდან დედასთან ერთად გადავიდა იტალიაში, სადაც დღემდე ცხოვრობს და მუშაობს. ჩიქოვანი საკმაოდ მრავალმხრივი ადამიანია, პერიოდულად იყო მოდელის, მსახიობის და მომღერლის აპმლუაში.

106
თემები:
საქართველო და კულტურა (968)
მშვიდობის თაღი

კულტურის პოპულარიზაცია: განათლების სამინისტრო და  ფონდი „ათინათი“ თანამშრომლობას იწყებენ

39
(განახლებულია 21:01 23.10.2020)
ქართული კულტურული მემკვიდრეობის ძეგლების პოპულარიზაციის მიზნით საქველმოქმედო ფონდი სხვადასხვა აქტივობებს განახორციელებს.

თბილისი, 23 ოქტომბერი – Sputnik. საქართველოს განათლების სამინისტრო ქართული კულტურისა და ხელოვნების პოპულარიზაციისა და განვითარების მიზნით საქველმოქმედო ფონდ „ათინათთან“ თანამშრომლობას იწყებს, ნათქვამია განათლების, მეცნიერების, კულტურისა და სპორტის სამინისტროს მიერ გავრცელებულ განცხადებაში. 

უწყების ინფორმაციით, ფონდ „ათინათთან“ თანამშრომლობის ფარგლებში მოხდება საერთაშორისო ასპარეზზე ქართული კულტურისა და ხელოვნების ცნობადობის გაზრდისა და სხვადასხვა პროექტების განხორციელების ხელშეწყობა.

ასევე, ქართული კულტურული მემკვიდრეობის ძეგლების პოპულარიზაციის მიზნით, ფონდი მოამზადებს სხვადასხვა შემეცნებით ვიდეორგოლს და სამინისტროს მხარდაჭერით საქართველოსა და მის ფარგლებს გარეთ დაგეგმილი კულტურული ღონისძიებების შესახებ ინფორმაციას „ათინათის“ მედიაპლატფორმაზე და სოციალურ ქსელში განათავსებს.

განათლების სამინისტრო ფონდ „ათინათთან“ განათლების სფეროშიც ითანამშრომლებს. მხარეებმა ერთობლივი პროექტების განხორციელების შესაძლებლობები უკვე განიხილეს.

შესაბამის მემორანდუმს ხელი მინისტრის მოადგილემ ლევან ხარატიშვილმა და ფონდის დირექტორმა ანა ალავერდაშვილმა მოაწერეს.

ფონდი „ათინათი“ არაერთ კულტურულ და საგანმანათლებლო პროექტს ახორციელებს, მათ შორისაა საგანმანათლებლო პროექტი საზღვარგარეთ მცხოვრები სკოლამდელი ასაკის ქართველი ბავშვებისთვის, რომელიც ქართული ენის შესწავლის მიზნით ანიმაციური კურსის შექმნას გულისხმობს.

39
თემები:
საქართველო და კულტურა (968)
თეა წულუკიანი

თეა წულუკიანი იუსტიციის მინისტრის პოსტზე დაბრუნებას არ აპირებს

0
დადგა დრო დაინიშნოს ახალი მინისტრი, რომელიც არსებულ ფუნდამენტზე უკეთეს შენობას ააგებს, განაცხადა წულუკიანმა

თბილისი, 25 ოქტომბერი - Sputnik. იუსტიციის ყოფილი მინისტრი თეა წულუკიანი არჩევნების შემდეგ ძველ თანამდებობაზე დაბრუნებას არ აპირებს.

წულუკიანის თქმით, აქტიურად ვრცელდება ხმები მის დაბრუნებაზე, თუმცა თვითონ მსგავს არაფერს არ გეგმავს.

„ამაზე გვქონდა გუნდის შიგნით მსჯელობა და ეს, რა თქმა უნდა, ასე არ იგეგმება, იმიტომ რომ მე ბევრჯერ მითქვამს, რომ 8 წელი საკმარისია და ვფიქრობ, რომ ის, რაც შეიძლება ერთმა ადამიანმა, ერთმა გუნდმა და ერთმა სამინისტრომ 8 წლის განმავლობაში ერთგულად აკეთოს, ეს ვაკეთეთ. ახლა დროა, რომ დაინიშნოს ახალი მინისტრი, რომელიც ამ ფუნდამენტზე უკვე კიდევ უკეთეს შენობას ააგებს, რომელსაც იუსტიციის სისტემა ჰქვია“, - აღნიშნა წულუკიანმა ტელეკომპანია „იმედის“ ეთერში.

იუსტიციის ყოფილი მინისტრმა თეა წულუკიანმა თანამდებობა საარჩევნო კამპანიაში მონაწილეობის გამო დატოვა. წულუკიანი მთავრობაში ყველაზე გამოცდილი მინისტრია. ის მაშინდელი პრემიერის, ბიძინა ივანიშვილის მიერ ჩამოყალიბებულ მინისტრთა კაბინეტში 2012 წელს მოხვდა და თანამდებობაზე დარჩა ყველა სხვა მინისტრზე დიდ ხანს. მან იმუშავა ხუთი პრემიერ-მინისტრის დროს - ბიძინა ივანიშვილის, გიორგი ღარიბაშვილის, გიორგი კვირიკაშვილის, მამუკა ბახტაძის და გიორგი გახარიას დროს.

საქართველოში საპარლამენტო არჩევნები 31 ოქტომბერს გაიმართება. ამ დროისათვის არჩევნებში მონაწილეობის მისაღებად დარეგისტრირებულია 48 პარტია და ორი ბლოკი.

0
თემები:
საქართველოს პოლიტიკური ცხოვრება