კონცერტი

თბილისში გაიმართება საიუბილეო მუსიკალური ფესტივალი „აღდგომიდან ამაღლებამდე“

101
(განახლებულია 14:57 03.10.2020)
ფესტივალის მიზანია ქართველი შემსრულებლების შემოქმედების პოპულარიზება და ახალგაზრდობის ინტერესის ამაღლება კლასიკური მუსიკისადმი

თბილისი, 2 ოქტომბერი – Sputnik. რიგით მეთხუთმეტე საერთაშორისო მუსიკალური ფესტივალი „აღდგომიდან ამაღლებამდე“ გაიმართება 6–11 ოქტომბერს თბილისში, ღია სივრცეში და ჯანდაცვის სამინისტროს ყველა რეკომენდაციის გათვალისწინებით, იუწყება საქართველოს კულტურის სამინისტრო.

ფესტივალი 6 ოქტომბერს გია ყანჩელის სახელობის (არტოს) ბაღში გაიხსნება ხელნაწერთა ეროვნული ცენტრის საგამოფენო-საგანმანათლებლო პროექტით „ნოტებად ქცეული გმირობა".

ფესტივალის ფარგლებში დაგეგმილია გამოჩენილი ქართველი კომპოზიტორის სულხან ცინცაძის დაბადებიდან 95 წლისთავისადმი მიძღვნილი საიუბილეო კონცერტი, ასევე ეთნომუსიკოსის ანზორ ერქომაიშვილის დაბადებიდან 80 წლის იუბილესადმი მიძღვნილი საღამო.

ფესტივალის ფარგლებში სოლო კონცერტებს გამართავენ ფრანსისკო ვინიასის სახელობის ვოკალისტთა საერთაშორისო კონკურსის ლაურეატი ნატალია ქუთათელაძე და ესპანეთის ქალაქ ვიგოს პიანისტთა საერთაშორისო კონკურსის ლაურეატი გიგა გიგაშვილი.

ფესტივალის ფარგლებში აღინიშნება კომპოზიტორების გიორგი შავერზაშვილისა და ოთარ ტატიშვილის საიუბილეო საღამოები.

ფესტივალის დასკვნით საღამოში მონაწილეობას მიიღებენ საოპერო მომღერალი იანო ალიბეგაშვილი, თბილისის ყოვლადწმიდა სამების საკათედრო ტაძრის საპატრიარქო გუნდი და პიანისტი სალომე მოდებაძე.

საერთაშორისო მუსიკალური ფესტივალი „აღდგომიდან ამაღლებამდე" 2006 წელს სრულიად საქართველოს კათოლიკოს-პატრიარქის საერთაშორისო საქველმოქმედო ფონდმა დააარსა აკაკი რამიშვილის ფონდთან „ტრადიციები და ინოვაციები" ერთად.

ფესტივალის სამხატვრო ხელმძღვანელია იტალიაში მცხოვრები ცნობილი ქართველი საოპერო მომღერალი იანო თამარ ალიბეგაშვილი, ღონისძიების მხატვრული მრჩეველი - პიანისტი ალექსანდრე კორსანტია აშშ-დან.

პროექტი საქართველოს კულტურული ცხოვრების განუყოფელი ნაწილია. ფესტივალის მიზანია ქართველი შემსრულებლების შემოქმედების პოპულარიზება და ახალგაზრდობის ინტერესის ამაღლება კლასიკური და საეკლესიო მუსიკისადმი.

ფესტივალის მხარდამჭერი არიან საქართველოს განათლების, მეცნიერების, კულტურისა და სპორტის სამინისტრო, ქალაქ თბილისის მერია, საქართველოს ეროვნული მუზეუმი, ხელნაწერთა ეროვნული ცენტრი.

101
თემები:
საქართველო და კულტურა (1050)
გელათის მონასტერი

რა ეტაპზეა გელათში მიმდინარე სარეაბილიტაციო სამუშაოები

20
(განახლებულია 16:31 01.03.2021)
კულტურული მემკვიდრეობის დაცვის ეროვნული სააგენტოს ცნობით ამ ეტაპზე იწყება დრენაჟის მოსაწყობად ჩასატარებელი სამუშაოები.

თბილისი, 1 მარტი – Sputnik. გელათში წმინდა გიორგის სახელობის ტაძრის დროებითი გადახურვის სამუშაოები დასრულებულია.

გელათში ღვთისმშობლის ტაძრის აღდგენაზე ახალი კომპანია იმუშავებს>>

კულტურული მემკვიდრეობის დაცვის ეროვნული სააგენტოს თანამშრომლის ზაზა ჩხიკვაძის ცნობით, ამ ეტაპზე იწყება დრენაჟის მოწყობისთვის საჭირო სამუშაოები.

„დრენაჟი ტაძრის გარე პერიმეტრზე საძირკვლისა და ბაზისის ნაწილიდან ატმოსფერული ნალექების მოცილებას უზრუნველყოფს. ასევე მიმდინარეობს შიდა ხარაჩოების მოწყობაც. სადრენაჟო სამუშაოები უზრუნველყოფს ტაძრის ინტერიერში ტენიანობის შემცირებას”, – განუცხადა ჩხიკვაძემ პირველ არხს.

რაც შეეხება მთავარ ღვთისმშობლის სახელობის ტაძარს,  მის შიდა ინტერიერში ხარაჩოების მოსაწყობად ჩასატარებელი სამუშაოები მიმდინარეობს.

გელათის სამონასტრო კომპლექსის ტერიტორიაზე მდებარე ღვთისმშობლის სახელობის ტაძრის აღდგენაზე ახალი კომპანია - „ბაგინეთი+“ მუშაობს. კომპანიები – „იკორთა 2007“ და „ხელოვნების საერთაშორისო ცენტრი“, რომლებიც აღნიშნულ სამუშაოებს „ბაგინეთამდე“ აწარმოებდნენ, აღდგენითი სამუშაოების პროცესში შეცდომების გამო 12-12 ათასი ლარით დაჯარიმდნენ.

გელათის სამონასტრო კომპლექსის სარეაბილიტაციო სამუშაოები 2014 წელს დაიწყო. ღვთისმშობლის მიძინების ტაძრის კრამიტით გადახურვის სამუშაოები 2016 წელს შესრულდა, მაგრამ კრამიტის სახურავზე დეფექტები გამოვლინდა, რის გამოც ტაძარში წვიმის წყალი ჩადის და XII, XIV და XVI საუკუნეების უნიკალურ ფრესკებს აზიანებს. სახურავი დროებით თუნუქით გადახურეს.

გელათის ღვთისმშობლის სახელობის მონასტერი ქუთაისში საქართველოში შუა საუკუნეების ერთ-ერთი უმნიშვნელოვანესი ძეგლია, საეკლესიო და კულტურული ცხოვრების ცენტრი. 1994 წლიდან არის მსოფლიო მემკვიდრეობის ძეგლი.

20
თემები:
ქართული კულტურული მემკვიდრეობის ძეგლები
„ბერლინალეს“ ჯილდო

ეროვნული კინოცენტრი მაყურებელს „ბერლინალეს“ მონაწილე ქართული ფილმების ჩვენებას სთავაზობს

44
რეტროსპექტივა ბერლინალეს პარალელურად, მარტ-ივნისში გაიმართება. ფილმების ონლაინ-ჩვენება კვირაობით ეროვნული კინოცენტრის კინოკლუბის ვებგვერზე შედგება

თბილისი, 28 თებერვალი – Sputnik. საქართველოს კინემატოგრაფიის ეროვნული ცენტრი მაყურებელს „ბერლინალეს“ მონაწილე ქართული ფილმების ონლაინ რეტროსპექტივას სთავაზობს.

ონლაინ-ჩვენება ბერლინის 71–ე საერთაშორისო კინოფესტივალის საზეიმო გახსნის პარალელურად გაიმართება. კინოფესტივალის მსგავსად, რეტროსპექტივაც ორ ნაწილად, მარტისა და ივნისის თვეებში გაიმართება.

მარტის თვის პროგრამა:

6 მარტი – „ახალგაზრდა კომპოზიტორის მოგზაურობა“

ლეგენდარული ქართველი რეჟისორის – გიორგი შენგელაიას „ახალგაზრდა კომპოზიტორის მოგზაურობა“ იყო პირველი ქართული ფილმი, რომელიც 1986 წელს საბჭოთა კავშირის სახელით ბერლინალეზე გამოჩნდა და საქართველოსა და ბერლინის საერთაშორისო კინოფესტივალის თანამშრომლობას ჩაუყარა საფუძველი. ფილმი წარმოდგენილი იყო ფესტივალის მთავარ კონკურსში და მას გადაეცა „ვერცხლის დათვი“ საუკეთესო რეჟისურისთვის.

13 მარტი – „უძინართა მზე“

თემურ ბაბლუანის გახმაურებული ფილმი „უძინართა მზე“ კიდევ ერთი ქართული ფილმი აღმოჩნდა, რომელმაც საქართველოს „ვერცხლის დათვი“ მოუტანა. ფილმი 1993 მონაწილეობდა ფესტივალის მთავარ კონკურსში, უკვე დამოუკიდებელი საქართველოს სახელით.

20 მარტი – „იქ, ჩემთან“

1992 წელს ზაზა ხალვაში ახალგაზრდა, ნიჭიერი რეჟისორი იყო, რომლისთვისაც  ფილმი „იქ-ჩემთან “ წარმატებული სტარტი აღმოჩნდა. ნამუშევარი წარმოდგენილი იყო სექციაში „ფორუმი“ და მას შემდეგ იგი არაერთ საერთაშორისო კინოფესტივალზე აჩვენეს.

27 მარტი – „მზის ქალაქი“

რეჟისორი და პროდიუსერი რატი ონელი 2017 წელს ბერლინალეზე წარსდგა დოკუმენტური ფილმით „მზის ქალაქი“. იგი აჩვენეს სექციაში „ფორუმი“. ფილმს მრავალი პრესტიჟული საერთაშორისო ჯილდო აქვს მიღებული.

ფილმების ონლაინ ჩვენებები გაიმართება ეროვნული კინოცენტრის კინოკლუბში, 22:00 საათზე.

აღსანიშნავია, რომ თითქმის 30-წლიანი პაუზის შემდეგ, ბერლინალეს 71–ე საერთაშორისო კინოფესტივალის მთავარ კონკურსში ქართული სრულმეტრაჟიანი ფილმი იქნება წარმოდგენილი. წლევანდელი „ბერლინალეს“ მთავარ სელექციაში ქართველი რეჟისორის ალექსანდრე კობერიძის ფილმის „რას ვხედავთ, როდესაც ცას ვუყურებთ?“ მსოფლიო პრემიერა გაიმართება. კობერიძის ფილმი იმ 15 ფილმს შორის არის, რომელიც კინოფესტივალის მთავარ ნომინაციაში იასპარეზებს.

ბერლინალეს მთავარ საკონკურსო პროგრამაში ქართული სრულმეტრაჟიანი ფილმი მოხვდა >>

ბერლინის საერთაშორისო კინოფესტივალი 1951 წელს დაარსდა და მსოფლიოში ერთ-ერთი მთავარი კინომოვლენაა, რომელიც კანისა და ვენეციის კინოფესტივალებთან ერთად, ევროპის წამყვან კინოფესტივალთა სამეულში შედის.

44
Georgian Airways Airzena

გერმანიაში დასაქმების სურვილი საქართველოს 92 ათასზე მეტმა მოქალაქემ გამოთქვა

0
(განახლებულია 17:23 01.03.2021)
საუბარია მხოლოდ სეზონური დასაქმების პროგრამაზე სოფლის მეურნეობის სფეროში, რომელიც 1 აპრილიდან იწყება. დასაქმებისთვის საქართველოს მოქალაქეები გარკვეულ მოთხოვნებს უნდა აკმაყოფილებდნენ.

თბილისი, 1 მარტი – Sputnik. შრომითი მიგრაციის სპეციალურ პორტალზე, რომელიც უცხოეთში დროებითი დასაქმების მსურველთათვის ორი კვირის წინ ამოქმედდა, 92 ათასზე მეტი საქართველოს მოქალაქეა დარეგისტრირებული, ნათქვამია დასაქმების ხელშეწყობის სახელმწიფო სააგენტოს ვებგვერდზე გავრცელებულ განცხადებაში.

პირველ ეტაპზე საუბარია გერმანიაში სეზონურ დასაქმებაზე.

გერმანიის სოფლის მეურნეობისა და კვების ფედერალური სამინისტროს ვებგვერდზე აღნიშნულია, რომ საქართველოდან სეზონურ სამუშაოებზე მხოლოდ 500 მოქალაქეს მიიღებენ, სურვილი კი 92 ათასზე მეტმა ადამიანმა გამოთქვა.

გერმანიის დასაქმების სააგენტო მკაცრად გააკონტროლებს დამსაქმებელსა და დასაქმებულს შორის კონტრაქტით გათვალისწინებული პირობების მაქსიმალურ დაცვას. 

რა ხარჯებთან იქნება დაკავშირებული საქართველოს მოქალაქეების გერმანიაში სეზონურ სამუშაოებზე გამგზავრება? პასპორტის (არქონის შემთხვევაში), თვითმფრინავის (ორივე მიმართულებით) ბილეთის ღირებულება, ცნობები ჯანმრთელობის (ფორმა–100), ნასამართლეობის (10 დღის ვადაში აღნიშნული ცნობის აღება უფასოა) შესახებ, PCR-–ტესტი.

დადებითი პასუხის შემთხვევაში დასაქმების მსურველი მოქალაქეების ინფორმირება მინიმუმ ერთი თვის ვადაში მოხდება. როგორც სააგენტოში აღნიშნავენ, საქართველოს იმ მოქალაქეებმა, რომლებიც კეთილსინდისიერად იმუშავებენ, შეიძლება მომავალში მოწვევა პირდაპირ ფერმერებისგან მიიღონ და მათთან საქმიანი ურთიერთობა გაგრძელდეს.

დასაქმებული მოქალაქეების საცხოვრებელი სამუშაო ადგილთან ახლოს უნდა იყოს და მისი ღირებულება არ უნდა აღემატებოდეს დღეში 6–15 ევროს. ჯანმრთელობის დაზღვევას გერმანელი დამსაქმებლები უზრუნველყოფენ – იქნება ეს ტრავმა, კორონავირუსი თუ სხვა შემთხვევა.

როგორც გაირკვა, გერმანიაში ლეგალურად დასაქმების სურვილი ყველაზე მეტად თბილისსა და აჭარაში მცხოვრებლებმა გამოთქვეს.

დასაქმების ხელშეწყობის სააგენტოსა და გერმანიის ფედერალური დასაქმების სააგენტოს (BA) შორის 2020 წლის 17 იანვარს დაიდო შეთანხმება „გერმანიის ფედერაციულ რესპუბლიკაში სეზონურ სამუშაოზე ქართული სამუშაო ძალის დასაქმების შესახებ“, რითიც საფუძველი ჩაეყარა გერმანიაში საქართველოს მოქალაქეების ლეგალური დასაქმების პროექტს.

სეზონური სამუშაოები 1 აპრილიდან დაიწყება. დასაქმება შესაძლებელია სოფლის მეურნეობის სფეროში, რაც სხვადასხვა სეზონური მოსავლის აღებას გულისხმობს.

გერმანიაში ლეგალურად დასაქმების მსურველი უნდა აკმაყოფილებდეს შემდეგ მოთხოვნებს: უნდა იყოს 18 წლიდან 60-წლამდე ასაკის საქართველოს მოქალაქე; გერმანიაში გამგზავრებამდე 3 თვით ადრე პერიოდში არ უნდა ჰქონდეს შენგენის ქვეყნებში მოგზაურობის ისტორია; უნდა იყოს ფიზიკურად ჯანმრთელი; ჰქონდეს მოსავლის აღების სამუშაო გამოცდილება და მოტივაცია; არ უნდა ჰქონდეს არანაირი დარღვევა, რაც ქვეყანაში მის შესვლას ხელს შეუშლის; სავალდებულოა გერმანული ან ინგლისური ენის საკომუნიკაციო დონეზე ცოდნა. ენის ცოდნის მოთხოვნას განსაზღვრავს დამსაქმებელი.  

რაც შეეხება თავად სამუშაოს, საუბარია ერთიდან სამ თვემდე პერიოდში სხვადასხვა სეზონური მოსავლის აღებაზე. სამუშაო პერიოდი კვირაში 5-6 დღეა, დრო კი 8–10 საათი დღეში. მინიმალური ხელფასი ერთ საათში 9,5 ევროა, რომელსაც გამოაკლდება გადასახადების, კვებისა და საცხოვრებლის ხარჯები.

რეგისტრაციის გავლის შემდეგ საქართველოს ჯანდაცვის სამინისტროს დასაქმების ხელშეწყობის სახელმწიფო სააგენტოს თანამშრომლები დაუკავშირდებიან დასაქმების მსურველებს. სერვის–ცენტრში მისვლისას სამუშაოს მაძიებელს თან უნდა ჰქონდეს პირადობის მოწმობა და/ან საქართველოს მოქალაქის ბიომეტრიული პასპორტი.

კონკრეტულ ვაკანსიაზე დასაქმების მსურველთა შესახებ მონაცემები მიეწოდება გერმანელ დამსაქმებელს, რომელიც საბოლოო გადაწყვეტილებას მიიღებს. გერმანელი დამსაქმებლის მხრიდან დადებითი გადაწყვეტილების შემთხვევაში დამსაქმებელი დაინტერესებულ პირს გამოუგზავნის შრომით ხელშეკრულებას, რომელიც მხარეებს შორის გაფორმდება გერმანიაში გამგზავრებამდე.

0