საბურთალო

„მოძრაობის თეატრი“ 17-სართულიანი სახლის სახურავზე პრემიერას გამართავს

501
„ლიზას ტორტი“ პირველი სპექტაკლია, რომელსაც მოძრაობის თეატრი პოსტპანდემიურ პერიოდში, 6-თვიანი იძულებითი პაუზის შემდეგ პირველად ითამაშებს

თბილისი, 30 აგვისტო — Sputnik. „მოძრაობის თეატრი“ 31 აგვისტოს, 1 და 2 სექტემბერს, 17 სართულიანი სახლის სახურავზე სპექტაკლის პრემიერას გამართავს, იუწყება ბილეთების ონლაინ გაყიდვების საიტი TKT.GE.

პოსტპანდემიურ პერიოდში, საპრემიერო სპექტაკლი „ლიზას ტორტი“ განათლების, მეცნიერების, კულტურის და სპორტის სამინისტროს მხარდაჭერით დაიდგა. იოსებ ბაკურაძის „ლიზას ტორტს“ მაყურებელი კალისტრატე ქუთათელაძის #17-ში მდებარე 17 სართულიანი სახლის სახურავზე იხილავს.

პრემიერა 20:00 საათზე დაიწყება და სპექტაკლის მთავარ დეკორაციად მზის ჩასვლის ულამაზესი პეიზაჟი იქცევა, სახურავიდან დანახული თბილისის ულამაზესი ხედების ფონზე.

რეჟისორის, იოსებ ბაკურაძის განმატებით, ამ სპექტაკლით სურდა გამოხმაურებოდა იმ მტკივნეულ თემებს, რომელიც დღევანდელ საზოგადოებას ყველაზე მეტად აწუხებს - გულგრილობა, დანაშაულის დაფარვა და სხვა მსგავსი საკითხები.

მისივე თქმით, ეს არის სპექტაკლი ადამიანებზე, რომლებისთვისაც მნიშვნელობა არ აქვს არც სიმართლეს, არც მოსამართლეს და არც სასამართლოს, მთავარი ყოველთვის წესრიგია.

„პრემიერა მაღალსართულიანი შენობის სახურავზე გაიმართება, საიდანაც მთელი თბილისი მოსჩანს, განსაკუთრებით ნუცუბიძის პლატო, ამ ადგილიდან ისე ლამაზად ჩანს, თბილისს მანჰეტენიც კი შევარქვი. როდესაც ფრანკომ დიდი ესპანელი რეჟისორი ლუის ბუნუელი ესპანეთიდან გააძევა, ნიუ-იორკში თავის ცხოვრების უკანასკნელ წლებში თქვა, ოცნება მაქვს პორნოგრაფია გადავიღო ნიუ-იორკის რომელიმე ცათამბჯენზეო. ცათამბჯენი და პორნოგრაფია არა, მაგრამ რეგულაციების გამო, სანამ ღია სივრცეში უნდა დავდგა სპექტაკლი, სჯობს ქალაქის თავზე დაიდგას“, - განაცხადა იოსებ ბაკურაძემ.

სპექტაკლში როლებს ასრულებენ ნიკოლოზ გოგიძე, ლაშა რობაქიძე, ბექა გარსენიშვილი, მარიამ ბალახაძე, თათა თავდიშვილი, ანი მასხარაშვილი, ნინიკო ავალიანი, თანო ჩხეიძე, ირაკლი სარალიძე.

„ლიზას ტორტი“ პირველი სპექტაკლია, რომელსაც მოძრაობის თეატრი პოსტპანდემიურ პერიოდში, 6-თვიანი იძულებითი პაუზის შემდეგ პირველად ითამაშებს.

501
თემები:
საქართველო და კულტურა (932)
ცისფერი გალერეა

„ზამთრის მხატვარი“: თბილისში გურამ დოლენჯაშვილის გამოფენა გაიხსნა

118
ეს ფერმწერი საოცრად ხატავს ზამთრის პეიზაჟებს - მისი ნახატები ერთი შეხედვით ფოტოებში შეიძლება აგერიოთ

თბილისი, 22 სექტემბერი – Sputnik. ცნობილი ქართველი გრაფიკოსის, „ზამთრის მხატვრის“ - გურამ დოლენჯაშვილის რეტროსპექტული გამოფენა დიმიტრი შევარდნაძის სახელობის ეროვნულ გალერეაში გაიხსნა.

დამთვალიერებლები შუქჩრდილის ვირტუოზული „თამაშით“ განთქმული ოსტატის სხვადასხვა ნამუშევრებს ნახავენ. დოლენჯაშვილის ნახატები, რომლებსაც ის უბრალო ფანქრით ხატავს, იმდენად რეალისტურად არის შესრულებული, რომ ბევრს ფოტოები ჰგონიათ.

„შუქჩრდილი ფანტასტიკურია, არის შეგრძნება, თითქოს მთვარის შუქი თვალს ჭრის. მის ნამუშევრებში სილამაზის სივრცეები ერთდროულად არსებობს - მაყურებელი მაკროსამყაროდან მიკროსამყაროში ხვდება, თანაც ისე, რომ სუნთქვა ჩერდება. კოსმიურად მშვენიერი ზეციდან - იმერელი გლეხის ურმამდე, თიხის ქოთნის უმცირეს ბზარამდე. ტოტებზე დადებული საოცრად რეალური თოვლიდან - კვლავ განუსაზღვრელი სიმაღლის ზეცაში, მთვარისკენ, კოსმოსში“, - წერს დოლენჯაშვილის შესახებ მოსკოველი ხელოვნებათმცოდნე რაისა ნესტერენკო.

გამოფენა 21 ოქტომბრამდე გაგრძელდება.

გურამ დოლენჯაშვილი 1943 წელს დაიბადა ქალაქ ქუთაისში, დაამთავრა თბილისის სახელმწიფო სამხატვრო აკადემია. საქართველოს დამსახურებული მხატვარია, რუსეთის სამხატვრო აკადემიის საპატიო აკადემიკოსი, მრავალი საერთაშორისო კონკურსის ლაურეატი. 90-იანი წლებიდან ცხოვრობდა რუსეთში, ამჟამად ცხოვრობს საქართველოში.

დოლენჯაშვილის ნამუშევრები იყო გამოფენილი სხვადასხვა ქვეყნებში: ავსტრალიაში, ავსტრიაში, ინგლისში, არგენტინაში, ბელგიაში, ბულგარეთში, უნგრეთში, ვიეტნამში, გერმანიაში, ინდოეთში, ერაყში, კვიპროსში, კუბაში, მექსიკაში, მონღოლეთში, ნიდერლანდებში, ნიკარაგუაში, პოლონეთში, რუმინეთში, აშშ-ში, გერმანიაში, საფრანგეთში, ჩეხოსლოვაკიაში, შვედეთში, შვეიცარიაში, იუგოსლავიასა და იაპონიაში.

დოლენჯაშვილის ნამუშევრები ასევე ინახება ტრეტიაკოვის გალერეაში, პუშკინის სახელობის მუზეუმში და მსოფლიოს მრავალ მუზეუმში.

118
თემები:
საქართველო და კულტურა (932)
თბილისის სახელმწიფო უნივერსიტეტი

თბილისის სახელმწიფო უნივერსიტეტი ახალგაზრდა ლიტერატორებისთვის კონკურსს ატარებს

39
(განახლებულია 18:44 22.09.2020)
პროექტი განკუთვნილია დამწყები ლიტერატორებისთვის, ხოლო 2020 წლის თემა – ახალ რეალობაში ჩაძირული სამყაროს გავლენაა.

თბილისი, 22 სექტემბერი – Sputnik. თბილისის სახელმწიფო უნივერსიტეტმა (თსუ) სტუდენტური ლიტერატურული კონკურსის „შემოდგომის ლეგენდის“ დაწყება გამოაცხადა. კონკურსი უკვე მეთორმეტედ ტარდება, აღნიშნულია უნივერსიტეტის განცხადებაში.

თსუ-ის და კომპანია Silknet-ის ერთობლივი პროექტი განკუთვნილია მათთვის, ვინც ქმნის პროზაულ ნაწარმოებებს, სურს ლიტერატურული გამოცდილების მიღება, და მათი შემოქმედების საქართველოსთვის გაცნობა.

„ლიტერატურა სოლიდარობისთვის“: მწერლების მხარდასაჭერად ახალი პროექტი იწყება>>

კონკურსში მონაწილეობა საქართველოს ყველა უმაღლესი სასწავლებლის სამივე საგანმანათლებლო საფეხურის (ბაკალავრიატი, მაგისტრატურა, დოქტორანტურა) სტუდენტებს შეუძლიათ. წელს კონკურსი გაფართოვდა და ის კონკურსში მონაწილეობისთვის ასევე პროფსასწავლებლების მოსწავლეებსაც იწვევს.

წლევანდელი კონკურსის კონცეფციაა – ახალი რეალობითა და რეგულაციებით შეცვლილი სამყაროს გავლენა, სადაც თითოეული ადამიანი მარტოა და, ამავე დროს, სამყაროსთან კავშირშია.

„შემოდგომის ლეგენდა“ ორ ეტაპად ტარდება. პირველ ტურში კონკურსანტებმა კონკურსის ონლაინ–აპლიკაციის მეშვეობით უნდა გაგზავნონ საკუთარი ნამუშევრები ჟანრისა და თემისგან დამოუკიდებლად.

შემდეგ ჟიური შეარჩევს ათ მონაწილეს, რომლებიც გადავლენ ფინალურ ტურში და 12 საათის განმავლობაში დაწერენ თავიანთ ნამუშევარს ჟიურის წევრების მიერ წარმოდგენილ თემაზე. ფინალური ტური გაიმართება წინანდალში, ჭავჭავაძის სახლ-მუზეუმის ტერიტორიაზე.

წელს ცვლილებები შეეხო ლიტერატურული ჟიურის შემადგენლობასაც: დათო ტურაშვილის, თეონა დოლენჯაშვილისა და მაკა ლდოკონენის ტრიოს ორი ახალი წევრი – ანა კორძაია-სამადაშვილი და დავით გაბუნია დაემატება. ჟიურის წევრებს შორის არიან ასევე გასული წლის გამარჯვებული ცოტნე ავსაჯანიშვილი და დავით ქართველიშვილი, რომელიც აშშ-ში ცხოვრობს და კონკურსში დისტანციურად იმუშავებს.

სტუდენტურ კონკურსში გამოვლინდება სამი გამარჯვებული. ისინი დაჯილდოვდებიან 1000, 700 და 500 ლარის ოდენობის ფულადი პრიზებით თსუ-სგან და Silknet-სგან.

გამარჯვებული ნოემბერში გამოვლინდება.

39
თემები:
საქართველო და კულტურა (932)
რთველი

რთველი 2020: ფერმერებმა 148,3 ათასი ტონა ყურძენი ჩააბარეს

0
(განახლებულია 08:08 24.09.2020)
საქართველოს მთავრობამ წელს COVID-19-ის პანდემიის შედეგად დაზარალებული მევენახეობა-მეღვინეობის დარგის მხარდასაჭერად „რქაწითელისა“ და „კახური მწვანეს“ ჯიშის ყურძნის სუბსიდირება გადაწყვიტა.

თბილისი, 24 სექტემბერი  — Sputnik.  საქართველოში „რთველი 2020“–ის ფარგლებში ამ დროისთვის  დაახლოებით 148,3 ათასი ტონა ყურძენია გადამუშავებული, იუწყება ღვინის ეროვნული სააგენტო. 

კახეთში ყურძნის მოსავლის აღების სეზონი 22 აგვისტოს დაიწყო. გადამუშავების პროცესში 60–ზე მეტი ღვინის საწარმოა ჩართული.  ამ დროისთვის ჩაბარებული ყურძნის ღირებულებამ დაახლოებით 148,2 მლნ ლარი შეადგინა.

საქართველოს მთავრობამ წელს COVID-19-ის პანდემიის შედეგად დაზარალებული მევენახეობა-მეღვინეობის დარგის მხარდასაჭერად „რქაწითელისა“ და „კახური მწვანეს“ ჯიშის ყურძნის სუბსიდირება გადაწყვიტა.

სუბსიდიას მიიღებენ ის კომპანიები, რომლებიც შეისყიდიან და გადაამუშავებენ ამ ჯიშების სულ ცოტა 1 ათას ტონა ყურძენს. ამასთან, ღვინის ქარხნებს დადგენილი აქვთ ერთი კილოგრამი ყურძნის ფასი – არანაკლებ 80 თეთრისა. სახელმწიფოს სუბსიდია ერთ კილოგრამზე 30 თეთრს შეადგენს.

უწყების ცნობით, ამ ეტაპზე გადამუშავებულია 109,6 ათასი ტონა „რქაწითელი”, 32 ათასი ტონა  „საფერავი”, 2,3 ათასი ტონა „კახური მწვანე”, 125,1 ტონა „ალექსანდროული–მუჯურული“ და 4,1 ათასი ტონა სხვა ჯიშის ყურძენი.

0
თემები:
საქართველოს სოფლის მეურნეობა