ოსკარი

ცნობილი გახდა, როდის გაიმართება „ოსკარის“ დაჯილდოების ცერემონია

52
(განახლებულია 16:35 16.06.2020)
„ოსკარის“ დაჯილდოების ცერემონიის ჩატარება 2021 წლის 28 თებერვალს იყო დაგეგმილი, თუმცა ის პანდემიის გამო გადაიდო.

თბილისი, 16 ივნისი – Sputnik. ამერიკის კინოაკადემიის პრემია „ოსკარის“ დაჯილდოების ცერემონია მომავალი წლის 25 აპრილს გაიმართება. ამის შესახებ ნათქვამია კინოაკადემიის განცხადებაში, რომელიც გამოქვეყნებულია Twitter-ზე.

​„მართალია – შემდეგი ოსკარი გაიმართება 2021 წლის 25 აპრილს“, – ნათქვამია განცხადებაში. ნომინაციები გამოცხადდება 2021 წლის 15 მარტს.

მათივე ინფორმაციით, დაჯილდოების ცერემონიის ორი თვით გადადების გადაწყვეტილება კორონავირუსის პანდემიის გამო მიიღეს.

ანიმაციური მხატვრული ფილმის, დოკუმენტური მხატვრული ფილმის, მოკლემეტრაჟიანი ფილმის, საერთაშორისო მხატვრული ფილმისა და ანიმაციური მოკლემეტრაჟიანი ფილმის წარდგენის ვადა 2020 წლის 1 დეკემბერით განისაზღვრა. საუკეთესო ფილმისა და ორიგინალური სიმღერის წარდგენის ბოლო ვადა კი 2021 წლის 15 იანვარია.

„ოსკარის“ დაჯილდოების ცერემონიის ჩატარება თავდაპირველად 2021 წლის 28 თებერვალს იყო დაგეგმილი.

52
ვაჟა-ფშაველა

„ვაჟაობა" სოციალურ ქსელში: კლასიკოსის განსხვავებული იუბილე

62
(განახლებულია 20:59 14.07.2020)
ცნობილი მწერალი, ქართველების „მთის არწივი" ვაჟა-ფშაველა, იგივე ლუკა რაზიკაშვილი დაიბადა 1861 წლის 14 ივლისს სოფელ ჩარგალში, მდინარე ჩარგლულას ნაპირას, პატარა ქვიტკირის სახლში.

თბილისი, 14 ივლისი — Sputnik. ქართული ლიტერატურის კლასიკოსის, პოეტისა და მწერლის ვაჟა-ფშაველას შთამომავალი ლეილა რაზიკაშვილი მწერლის 195 წლის იუბილეს აღნიშვნას გეგმავს და საზოგადოებას სოციალურ ქსელში ვაჟა-ფშაველას შემოქმედების გაზიარებას სთავაზობს.

საქართველო დღეს, 14 ივლისს ვაჟა-ფშაველას დაბადების დღეს აღნიშნავს. თუმცა, კორონავირუსის პანდემიის გამო, ყოველწლიური დღესასწაული "ვაჟაობა" წელს გადაიდო.

„წელს ჩვენ ეს დღე შეგვიძლია აღვნიშნოთ ისე, როგორც არასდროს, – წერს რაზიკაშვილი. – ჩვენ შეგვიძლია „ვაჟაობა" აღვნიშნოთ მთელ საქართველოსთან და მსოფლიოსთან ერთდ ისე, რომ ეს დღესასწაული საყოველთაო გახდეს. ამისთვის არაა საჭირო სცენარები, რეჟისორები, მოსაწვევები და ა.შ. ამისთვის საჭიროა მხოლოდ მისი პოეტური სიტყვა და ფრაზები. ჩვენ შეგვიძლია ერთი დღით ჩვენი სოციალური ქსელი ვაჟა-ფშაველას ლექსებითა და ფრაზებით შევავსოთ".

ვაჟა-ფშაველა

ცნობილი მწერალი, ქართველების „მთის არწივი" ვაჟა-ფშაველა, იგივე ლუკა რაზიკაშვილი დაიბადა 1861 წლის 14 ივლისს სოფელ ჩარგალში, მდინარე ჩარგლულას ნაპირას, პატარა ქვიტკირის სახლში.

Грузинский писатель и поэт Важа-Пшавела - Лука Разикашвили
© photo: Sputnik /
ქართველი ლმწერალი და პოეტი ვაჟა-ფშაველა

მშობლები: მამა — პავლე რაზიკაშვილი, სოფლის მღვდელი იყო. სწორედ მან ჩაუნერგა პატარა ვაჟას წიგნების სიყვარული. დედა — ბარბალე (გულქან) ფხიკელაშვილი, რომლის წყალობით ვაჟამ უამრავი ხალხური ლექსი იცოდა ზეპირად. გულქანი მას საგმირო ამბებს, ფშაურ თქმულებებსა და ლექსებს აცნობდა.

ლუკა რაზიკაშვილს ფსევდონიმი ვაჟა-ფშაველა პეტერბურგში სწავლისას მისმა თუშმა მეგობარმა დიმიტრი ცისკარიშვილმა შეარქვა. ფშავ-ხევსურეთში "ვაჟა" კარგ ბიჭს, ვაჟკაცს ნიშნავდა.

Грузинский писатель и поэт Важа-Пшавела - Лука Разикашвили
© photo: Sputnik /
ქართველი კლასიკოსი ვაჟა-ფშაველა

1879 წელს ლუკამ გორის სამასწავლებლო სემინარიაში ჩააბარა. 1883 წელს პეტერბურგში გაემგზავრა და თავისუფალ მსმენელად შევიდა უნივერსიტეტში, იურიდიულ ფაკულტეტზე. თუმცა, ხელმოკლეობის გამო სწავლა მიატოვა, სამშობლოში დაბრუნდა და ჩარგალში დასახლდა.

ვაჟა-ფშაველა მთის ხალხში დიდი გავლენით სარგებლობდა. იშვიათად თუ ჩამოდიოდა ბარად. სწორედ ფშაური ზამთრის გრძელ ღამეებში დაიწერა მისი გენიალური პოემები, მოთხრობები და ლექსები: „ალუდა ქეთელაური", „ბახტრიონი", „სტუმარ-მასპინძელი", „გველისმჭამელი", „შვლის ნუკრის ნაამბობი", „ხმელი წიფელი" და ა.შ.

Грузинский писатель и поэт Важа-Пшавела - Лука Разикашвили
© photo: Sputnik / РИА Новости
ვაჟა-ფშაველა საავადმყოფოში

მძიმე შრომამ და გაჭირვებამ ვაჟას ჯანმრთელობა შეურყია. მას ფილტვის პლევრიტი დაუდგინეს და ოპერაციაც გაუკეთეს. ერთხანს თითქოს მოიკეთა, თუმცა მძიმე სენმა თავი მაინც არ ანება და, ექიმების მცდელობის მიუხედავად, ვეღარ უშველეს. 1915 წლის 27 ივლისს ვაჟა-ფშაველა გარდაიცვალა. იგი ჯერ დიდუბის პანთეონში დაკრძალეს, 1935 წლის 18 ოქტომბერს კი, ვაჟა-ფშაველას გარდაცვალების ოცი წლის თავზე, მისი ნეშტი გადაასვენეს მთაწმინდის პანთეონში.

ვაჟა-ფშაველა 36 პოემის, 400-მდე ლექსის, ასევე პიესებისა და მოთხრობების ავტორია. ქართული ლიტერატურის ისტორიაში იგი შევიდა როგორც XIX საუკუნის გამორჩეული მწერალი.

62
თემები:
საქართველო და კულტურა
ქვევრი

წინანდალში ქვევრის ღვინის საერთაშორისო კონკურსი ჩატარდა

56
(განახლებულია 13:42 13.07.2020)
წელს კონკურსზე წარმოდგენილი იყო ღვინის 460 ნიმუში, რაც სამჯერ აღემატება პირველ კონკურსზე წარდგენილი ღვინოების რაოდენობას.

თბილისი, 13 ივლისი – Sputnik. წინანდალში ქვევრის ღვინის საერთაშორისო კონკურსი უკვე მეოთხედ ჩატარდა, იუწყება ღვინის ეროვნული სააგენტო.

ორგანიზატორების თქმით, კონკურსის მიზანია საუკეთესო ქვევრის ღვინოების წარმოდგენა, ქვევრის ღვინის წარმოებისა და რეალიზაციის ხელშეწყობაა.

კონკურსი „ასოციაცია ქართული ღვინოს“ ორგანიზებით და ღვინის ეროვნული სააგენტოს მხარდაჭერით გაიმართა ალექსანდრე ჭავჭავაძის სახლ-მუზეუმის ტერიტორიაზე. სწორედ აქ მდებარეობს საქართველოში ერთ-ერთი პირველი მარანი, სადაც ღვინო ბოთლში ჩამოისხა.

„წელს კონკურსზე ღვინის 460 ნიმუში იყო წარმოდგენილი, რაც სამჯერ აღემატება პირველ კონკურსზე წარმოდგენილი ღვინოების რაოდენობას. ეს მეღვინეების მხრიდან კონკურსისადმი დიდ ინტერესზე მიუთითებს. ჟიურის შემადგენლობაში საერთაშორისო რანგის ქართველი ღვინის ექსპერტები შედიოდნენ. ისინი თანხმდებიან, რომ ქვევრის ღვინის ხარისხი ყოველწლიურად უმჯობესდება. მისასალმებელია, რომ კონკურსზე ქვევრის ღვინო საქართველოს თითქმის ყველა რეგიონიდან იყო წარმოდგენილი“, – აღნიშნა ღვინის ეროვნული სააგენტოს თავმჯდომარემ, კონკურსის ჟიურის წევრმა ლევან მეხუზლამ.

გამარჯვებული ღვინოები ივლისის ბოლომდე დასახელდება. გამარჯვებული ღვინოები ევროპის სხვადასხვა ქვეყანაში ონლაინ-დეგუსტაციებზე გაიგზავნება, რაც განსაკუთრებით მნიშვნელოვანია მეღვინეობის დარგში პანდემიით გამოწვეული სირთულეების ფონზე, ნათქვამია ორგანიზატორების განცხადებაში.

ორგანიზატორების თქმით, კონკურსმა დიდი ინტერესი გამოიწვია, განსაკუთრებით მარნების მხრიდან. მსგავს კონკურსებში მონაწილეობა მათთვის კარგი სტიმულია შემდგომი განვითარებისთვის.

ქართული ღვინის მორიგი გამარჯვება მსოფლიო არენაზე: ოქროსა და ვერცხლის მედლები პოლონეთში >>

კონკურსის ჟიურის თავმჯდომარე წელს საქართველოს დამსახურებული მეღვინე, ენოლოგი გიორგი დაქიშვილი იყო.

ქვევრის ღვინის კონკურსი საქართველოში პირველად 2017 წელს გაიმართა და იმ დროიდან ამ სახეობის ღვინის მიმართ ინტერესი მნიშვნელოვნად გაიზარდა. 2018 წელს წარმოდგენილი და დაჭაშნიკებული იყო 25%-ით მეტი ღვინო, ვიდრე კონკურსის ჩატარების პირველ წელს, აღნიშნავენ ორგანიზატორები.

დღეისათვის საქართველოში ათასობით სხვადასხვა ჯიშის ყურძენი მოჰყავთ – მთელ მსოფლიოში ყურძნის 4 ათასი ცნობილი ჯიშიდან დაახლოებით 500 ქართული წარმომავლობისაა.

56
თემები:
ღვინის კულტურა და მეღვინეობა
კიკვიძის პარკი

თბილისში კიკვიძის განახლებული პარკი გაიხსნა

0
პარში მოეწყო სპორტული და სამაგიდო თამაშების მოედნები, დასასვენებელი პავილიონები, სარწყავი, განათებისა და ვიდეომეთვალყურეობის სისტემები

თბილისი, 14 ივლისი — Sputnik. თბილისში ვეტერანთა კულტურისა და დასვენების განახლებული პარკი (კიკვიძის) გაიხსნა, იუწყება მერიის ვებგვერდი.

გახსნის ღონისძიებას დედაქალაქის მერი კახა კალაძე და საქართველოს პრემიერ-მინისტრი გიორგი გახარია დაესწრნენ.

თბილისის მერმა მოსახლეობას განახლებული პარკის გახსნა მიულოცა. მისი განცხადებით, პარკში შესაბამისი სივრცე ყველა თაობის ადამიანისთვის მოეწყო.

„თბილისს კიდევ ერთი მნიშვნელოვანი რეკრეაციული სივრცე შეემატა. რაც შეეხება პარკს, იგი მთლიანად იქნა რეაბილიტირებული. გაჩნდა ახალი ზონები, ბავშვებისთვის შესაბამისი ადგილები, სადაც განთავსებულია ატრაქციონები. ყველა თაობის ადამიანისთვის არის შესაბამისი ზონა, სადაც გაქვთ შესაძლებლობა, თქვენი შვილებითა და შვილიშვილებით დაისვენოთ. ნამდვილად მიხარია, რომ ჩვენთან უკვე ჩნდება ის საპარკო კულტურა, რაც ყველა განვითარებულ ქვეყანაშია. ჩვენ გვაქვს პარკების ნაკლებობა, მაგრამ პირობა მაქვს მიცემული თბილისელებისთვის, რომ ჩვენი ქალაქი ევროპაში ყველაზე მწვანე, ყველაზე მოწესრიგებული, განახლებული, უსაფრთხო და კეთილმოწყობილი იქნება“, - განაცხადა კახა კალაძემ.

რეაბილიტაციის ფარგლებში, პარკს შეუერთდა მიმდებარედ არსებული ტერიტორია, მოეწყო სპორტული და სამაგიდო თამაშების მოედნები, დასასვენებელი პავილიონები, სარწყავი, განათებისა და ვიდეომეთვალყურეობის სისტემები.

პარკის ტერიტორიაზე განთავსდა შინაური ცხოველების სასეირნო სივრცე, ველო და სარბენი ბილიკები. ერისთავის ქუჩის მხრიდან კი, მოეწყო პარკში შესასვლელი პანდუსი. რეაბილიტაცია ჩაუტარდა პარკში არსებული შენობებსა და შადრევანს.

ტერიტორიაზე, რომლის ფართობიც 72 ათას 100 კვადრატული მეტრია, ჯამში, 12 ათას 124 ძირი ხე-მცენარე დაირგო. სამუშაოების განსახორციელებლად დედაქალაქის ბიუჯეტიდან 4 მლნ 500 ათასი ლარი გამოიყო.

0
თემები:
თბილისის მერია