აღდგენილი კესელო

ომალოში „კესელოს“ ციხის რეაბილიტაციის მორიგი ეტაპი დასრულდა

71
(განახლებულია 20:59 08.11.2019)
ჩატარებული სამუშაოების შედეგად მოსწორდა და გაფართოვდა კოშკთან მისასვლელი ბილიკები, კლდეში გამოიჭრა კიბის საფეხურები, დამონტაჟდა ლითონის მოაჯირები და აღდგა დანგრეული გალავანი.

თბილისი, 8 ნოემბერი — Sputnik. თუშეთის სოფელ ომალოში კესელოს ციხის რესტავრაციის მორიგი ეტაპი დასრულდა, იუწყება საქართველოს კულტურული მემკვიდრეობის დაცვის სააგენტო.

თუშეთში ომალოს ისტორიული უბანი კესელო წარმოადგენს ციხე-სოფელს. დღესდღეობით შემორჩენილია შვიდი კოშკი. სოფელში ორი სალოცავი ნიშაა და ლუდის სახარში შენობა, კესელოს ერთ-ერთ კოშკში არის ეთნოგრაფიული მუზეუმი, სადაც წარმოდგენილია თუშური საყოფაცხოვრებო ინვენტარი და საბრძოლო იარაღები. 

სააგენტოს ინფორმაციით, არქიტექტორ იოსებ ბანძელაძის მიერ 2001 წელს მომზადებული სარესტავრაციო პროექტის მიხედვით 2019 წლის სარეაბილიტაციო პროცესმა უმთავრესად არქიტექტურული კომპლექსის ინფრასტრუქტურული მოწყობის ნაწილი მოიცვა, რომელიც კომპანია „იკორთა 2007“-მა შეასრულა.

რესტავრაციის ფარგლებში მოსწორდა და გაფართოვდა კოშკთან მისასვლელი ბილიკები, კლდეში გამოიჭრა კიბის საფეხურები, უსაფრთხოების ნორმების გათვალისწინებით დამონტაჟდა ლითონის მოაჯირები, სიპი ქვის წყობით დუღაბზე აღდგა დანგრეული გალავანი.

სარესტავრაციო სამუშაოები ამ ეტაპზეც საქართველოს კულტურული მემკვიდრეობის დაცვის ეროვნული სააგენტოსა და ფონდ „კესელოს“ ერთობლივი ძალისხმევითა და თანადაფინანსებით ჩატარდა.  

ფონდის ძალისხმევით განხორციელდა 2019 წლამდე კესელოს კომპლექსის ექვსი ციხე-სახლის რესტავრაციაც. 

სააგენტოს ცნობით, კულტურული მემკვიდრეობის ძეგლების სარეაბილიტაციო-სარესტავრაციო პროგრამულ ნუსხაში კესელოს კომპლექსი მომდევნო წლებშიც იქნება წარმოდგენილი, რაც ციხე-სოფლის ტერიტორიაზე დღემდე ჩამოშლილი 6 კოშკის აღდგენას ითვალისწინებს.

სარესტავრაციო პროცესი ტრადიციული თუშური არქიტექტურის მქონე კოშკების ფიქალის ქვის მშრალი წყობით აღდგენასა და ინტერიერის სართულშუა ხის გადახურვების მოწყობას მოიცავს.

ეთნოგრაფ ნუგზარ იდოიძესთან ერთობლივად შემუშავებული კონცეფციის მიხედვით, სრულმასშტაბიანი სარეაბილიტაციო სამუშაოების დასრულების შემდგომ კესელოს ციხე-სოფელი თუშეთის კულტუროლოგიური ცენტრის ფუნქციასაც შეიძენს, რაც სამომავლოდ კულტურული მემკვიდრეობის ძეგლის სამუზეუმო და საგამოფენო სივრცედ ქცევასაც გულისხმობს.

 

71
თემები:
ქართული კულტურული მემკვიდრეობის ძეგლები (55)
ქეთი მელუა

ქეთი მელუა აჭარაში ვიდეოკლიპებს იღებს

55
(განახლებულია 14:31 07.08.2020)
ქეთი მელუას აჭარაში გადაღებულ ვიდეორგოლებს, რომელიც მერვე ალბომის ორი სიმღერისთვის იქმნება, მაყურებელი ეკრანებზე 2020 წლის შემოდგომაზე იხილავს.

თბილისი, 7 აგვისტო — Sputnik. მსოფლიოში აღიარებული ქართული წარმოშობის ბრიტანელი მომღერალი ქეთი მელუა აჭარაში კლიპებს იღებს, იუწყება საზოგადოებრივი მაუწყებლის პირველი არხი. 

მომღერლის ახალი სიმღერების ვიდეოგადაღებები ბათუმის ბოტანიკურ ბაღში, ბათუმის ბულვარში, სარფისა და ციხისძირის სანაპიროზე, ასევე სოფელ მერისში მიმდინარეობს.

როგორც აჭარის ტურიზმის დეპარტამენტის განცხადებაშია ნათქვამი,  ეს პირველი შემთხვევაა, როცა აჭარის ბუნების მრავალფეროვნებას, მთისა და ზღვის ერთობლიობას მომღერლის მილიონობით თაყვანისმცემელი ახალი ვიდეორგოლით გაეცნობა.

აჭარის ტურიზმის დეპარტამენტი გადაღებებისთვის მიმზიდველი ტურისტული ადგილების შერჩევასა და პროექტის განხორციელებაში აქტიურადაა ჩართული.

ვიდეორგოლის რეჟისორი მარიამ სიჭინავაა, ოპერატორი კი ალექს ომიაძეა. მომღერლის ჩაცმულობაზე ბათუმელი დიზაინერი თაკო მექვაბიძე ზრუნავს. 

ვიდეოგადაღებები რეგიონში დღეს სრულდება. ქეთი მელუას აჭარაში გადაღებულ ვიდეორგოლებს, რომელიც მერვე ალბომის ორი სიმღერისთვის იქმნება, მაყურებელი ეკრანებზე 2020 წლის შემოდგომაზე იხილავს.

ქეთი მელუა 1984 წელს საქართველოში დაიბადა. ის ერთი წლის იყო, როდესაც მისი ოჯახი ჩრდილოეთ ირლანდიაში გადავიდა საცხოვრებლად, ხოლო 14 წლისა — ინგლისში. მისი დებიუტი 2003 წელს გაიმართა, როდესაც გამოვიდა მისი პირველი ალბომი Call Off the Search. ხუთ თვეში ამ ალბომის 1,2 მილიონი ასლი გაიყიდა.

საქართველოს ექს-პრეზიდენტმა გიორგი მარგველაშვილმა ქეთი მელუა საზღვარგარეთ ქართული კულტურის პოპულარიზებაში შეტანილი წვლილისთვის, ასევე ნაყოფიერი შემოქმედებითი საქმიანობისთვის  „ღირსებით ორდენით“ დააჯილდოვა. ხოლო 2018 წელს, როდესაც ქეთი თბილისში უფასო კონცერტით გამოდიოდა, მას საპატიო თბილისელის წოდება მიენიჭა.


55
თემები:
საქართველო და კულტურა
საზოგადოებრივი მაუწყებლის შენობა

„პირველი არხის“ პროექტი „ელექტრონავტის“ გამარჯვებულია

48
(განახლებულია 15:12 07.08.2020)
„აკუსტიკა“ ერთ-ერთ საუკეთესო მუსიკალურ პროექტად აღიარეს. მისი პოპულარობის შესახებ ისიც მეტყველებს, რომ პროგრამა პანდემიის პირობებშიც კი გადიოდა ეთერში.

თბილისი, 7 აგვისტო – Sputnik. საქართველოს საზოგადოებრივი მაუწყებლის „პირველი არხის“ პროექტი „აკუსტიკა“ კონკურსი „ელექტრონავტის“ გამარჯვებული გახდა ნომინაციაში „წლის საუკეთესო მედია“.

„აკუსტიკა“ მუსიკალური პროექტია, რომელსაც ცნობილი მუსიკოსები, კომპოზიტორები, ფოლკლორისტები და მომღერლები სტუმრობენ.

„გადაცემა „აკუსტიკა” პანდემიის პერიოდშიც კი არ გაჩერებულა და მისი შემოქმედებითი გუნდი ყოველდღიურად სთავაზობდა მაყურებელს ცნობილი თუ ნაკლებად ცნობილი ახალგაზრდა მუსიკოსების მიერ იზოლაციის პირობებში ჩაწერილ მუსიკალურ პროგრამას – „სახლიდან სახლში“, – ნათქვამია „პირველი არხის“ განცხადებაში.

თავისი აქტუალური კონცეფციის წყალობით პროექტი კვლავ რჩება ქართულ მედიასივრცეში ერთ-ერთ ყველაზე წარმატებულ მუსიკალურ პროექტად.

ინოვაციური პოპ-კულტურის პრემიის „ელექტრონავტი XI“ დაჯილდოების მეთერთმეტე ცერემონია პანდემიის გამო განსაკუთრებული ფორმატით გაიმართა – თითოეულს ჰქონდა საშუალება, თვალი ედევნებინა ცერემონიის ტრანსლაციისთვის პირდაპირ ეთერში ვებ-გვერდზე www.electronauts.ge.

პრემიის გამარჯვებულებს, ტრადიციულად, ინტერნეტ-გამოკითხვის გარდა, პროფესიული ჟიური ავლენს. ონლაინ-გამოკითხვით პროგრამამ ხმების 40% მიიღო, ხოლო ჟიურის წევრებისგან – 60%.

ელექტრონავტი“ – ესაა მუსიკალური ვებ-პლატფორმა საინფორმაციო-გასართობი პროგრამებისთვის და ყოველწლიური ჯილდოებისთვის ელექტრონულ მუსიკაში, ხელოვნებასა და ინოვაციურ პოპ-კულტურაში.
48
თემები:
საქართველო და კულტურა
რუსთავი

თბილისის შემდეგ რუსთავში: გაეროს განვითარების პროგრამამ მოხუცებულთა სახლს ტექნიკა გადასცა

0
(განახლებულია 15:32 07.08.2020)
საქართველოში კორონავირუსის გავრცელების პირველივე დღეებიდან UNDP პანდემიასთან ბრძოლისა და ამ მხრივ, საქართველოს ხელშეწყობის მოწინავე ხაზზეა.

თბილისი, 7 აგვისტო  — Sputnik.  გაეროს განვითარების პროგრამამ (UNDP) ქალაქ რუსთავის მოხუცებულთა სახლს საჩუქრად სამედიცინო და საყოფაცხოვრებო ტექნიკა გადასცა, ნათქვამია რუსთავის მერიის ვებგვერდზე გავრცელებულ განცხადებაში.

UNDP–იმ ამ დღეებში ანალოგიური ჰუმანიტარული დახმარება აღმოუჩინა თბილისის მოხუცებულთა სახლს.

საქართველოში გაეროს მუდმივი კოორდინატორი და პროგრამის წარმომადგენელი ლუიზა ვინტონი რუსთავის მოხუცთა სახლს, საქართველოს რეგიონული განვითარებისა და ინფრასტრუქტურის მინისტრის მოადგილე მზია გიორგობიანთან და რუსთავის მერ ირაკლი ტაბაღუასთან ერთად ესტუმრა.  

როგორც განცხადებაშია ნათქვამი, ლუიზა ვინტონმა მოხუცთა სახლს სამედიცინო და საყოფაცხოვრებო აღჭურვილობა, მათ შორის ჟანგბადის კონცენტრატორი, მაცივრები, გაზქურა, სამზარეულოს სავენტილაციო სისტემა და მინიტრაქტორი გადასცა.

 „კორონავირუსის პანდემია განსაკუთრებულ საფრთხეს წარმოადგენს უსახლკარო და მზრუნველობამოკლებული ადამიანებისთვის. ამ  თვალსაზრისით თავშესაფრების რაოდენობა ნამდვილად მისასალმებელია. UNDP-ის მიზანია თავშესაფრების უსაფრთხოებისა და საცხოვრებელი პირობების გაუმჯობესება, პანდემიის შემდეგ კი გრძელვადიანი სისტემური გადაწყვეტილებების მოძიება მოწყვლადი მოსახლეობის დასახმარებლად“, – განაცხადა ლუიზა ვინტონმა.

საყოფაცხოვრებო ტექნიკისა და სამედიცინო აღჭურვილობის შეძენა, გაეროს განვითარების პროგრამის ინიციატივით, დანიის მთავრობისა და გაეროს პანდემიაზე რეაგირებისა და აღდგენის ფონდის ფინანსური ხელშეწყობით განხორციელდა.

საქართველოში კორონავირუსის გავრცელების პირველივე დღეებიდან UNDP პანდემიასთან ბრძოლისა და ამ მხრივ, საქართველოს ხელშეწყობის მოწინავე ხაზზეა. ქვეყანაში შექმნილი ვითარების გათვალისწინებით ორგანიზაცია ცვლილებები შეიტანა მიმდინარე პროექტებში, რომელთა ჯამური ღირებულება წელიწადში 20 მილიონ აშშ დოლარს შეადგენს.

0