დეხვირის მუზეუმი

ცაგერში შუა საუკუნეების ციხის ნანგრევები აღმოაჩინეს

448
(განახლებულია 16:16 09.07.2019)
მეცნიერები ნანგრევებს XIV-XVII საუკუნეებს მიაკუთვნებენ და მას დეხვირის ციხის კომპლექსის ნაწილს უწოდებენ.

თბილისი, 9 ივლისი — Sputnik. ცაგერის რაიონის სოფელ დეხვირში არქეოლოგებმა ციხის ნანგრევები აღმოაჩინეს, იუწყება პირველი არხი.

მეცნიერები აღმოჩენას XIV-XVII საუკუნეებს მიაკუთვნებენ და მას დეხვირის ციხის კომპლექსის ნაწილს უწოდებენ

„ძეგლი, სავარაუდოდ, XIV-XVII საუკუნეებს უნდა ეკუთვნოდეს. ძალიან მნიშვნელოვანი ციხეა, რადგან ვახუშტი ბატონიშვილის აღწერილობით „დეხვირის ციხეა თავი თაკვერისა", რაც იმას ნიშნავს, რომ ამ ციხეთა მფლობელი მთელი ლეჩხუმის მფლობელი იყო", – განაცხადა არქეოლოგმა შალვა ბუაძემ.

დეხვირში არქეოლოგიური გათხრები ერთი კვირის წინ დაიწყო, თუმცა ამავე სახელწოდების ციხე-სიმაგრის კვლევას სპეციალისტები ჯერ კიდევ 2015 წელს შეუდგნენ. სამუშაოებს ცაგერის რაიონის მერია აფინანსებს.

ამ წლების განმავლობაში არქეოლოგებმა აღმოაჩინეს ანტიკური პერიოდის რამდენიმე სამარხი, ციხე, მათ შორის, დეხვირის კომპლექსის მთავარი ციხე-სიმაგრე.

დეხვირში არქეოლოგთა ორი ჯგუფი მუშაობს: მცხეთა-დეხვირის არქეოლოგიური ექსპედიცია და შუა საუკუნეების მკვლევარების ჯგუფი.

დეხვირში 2012 წლიდან ფუნქციონირებს არქეოლოგიურ-ეთნოგრაფიული მუზეუმი ღია ცის ქვეშ.

448
თემები:
საქართველო და კულტურა (858)
ქვევრი

წინანდალში ქვევრის ღვინის საერთაშორისო კონკურსი ჩატარდა

55
(განახლებულია 13:42 13.07.2020)
წელს კონკურსზე წარმოდგენილი იყო ღვინის 460 ნიმუში, რაც სამჯერ აღემატება პირველ კონკურსზე წარდგენილი ღვინოების რაოდენობას.

თბილისი, 13 ივლისი – Sputnik. წინანდალში ქვევრის ღვინის საერთაშორისო კონკურსი უკვე მეოთხედ ჩატარდა, იუწყება ღვინის ეროვნული სააგენტო.

ორგანიზატორების თქმით, კონკურსის მიზანია საუკეთესო ქვევრის ღვინოების წარმოდგენა, ქვევრის ღვინის წარმოებისა და რეალიზაციის ხელშეწყობაა.

კონკურსი „ასოციაცია ქართული ღვინოს“ ორგანიზებით და ღვინის ეროვნული სააგენტოს მხარდაჭერით გაიმართა ალექსანდრე ჭავჭავაძის სახლ-მუზეუმის ტერიტორიაზე. სწორედ აქ მდებარეობს საქართველოში ერთ-ერთი პირველი მარანი, სადაც ღვინო ბოთლში ჩამოისხა.

„წელს კონკურსზე ღვინის 460 ნიმუში იყო წარმოდგენილი, რაც სამჯერ აღემატება პირველ კონკურსზე წარმოდგენილი ღვინოების რაოდენობას. ეს მეღვინეების მხრიდან კონკურსისადმი დიდ ინტერესზე მიუთითებს. ჟიურის შემადგენლობაში საერთაშორისო რანგის ქართველი ღვინის ექსპერტები შედიოდნენ. ისინი თანხმდებიან, რომ ქვევრის ღვინის ხარისხი ყოველწლიურად უმჯობესდება. მისასალმებელია, რომ კონკურსზე ქვევრის ღვინო საქართველოს თითქმის ყველა რეგიონიდან იყო წარმოდგენილი“, – აღნიშნა ღვინის ეროვნული სააგენტოს თავმჯდომარემ, კონკურსის ჟიურის წევრმა ლევან მეხუზლამ.

გამარჯვებული ღვინოები ივლისის ბოლომდე დასახელდება. გამარჯვებული ღვინოები ევროპის სხვადასხვა ქვეყანაში ონლაინ-დეგუსტაციებზე გაიგზავნება, რაც განსაკუთრებით მნიშვნელოვანია მეღვინეობის დარგში პანდემიით გამოწვეული სირთულეების ფონზე, ნათქვამია ორგანიზატორების განცხადებაში.

ორგანიზატორების თქმით, კონკურსმა დიდი ინტერესი გამოიწვია, განსაკუთრებით მარნების მხრიდან. მსგავს კონკურსებში მონაწილეობა მათთვის კარგი სტიმულია შემდგომი განვითარებისთვის.

ქართული ღვინის მორიგი გამარჯვება მსოფლიო არენაზე: ოქროსა და ვერცხლის მედლები პოლონეთში >>

კონკურსის ჟიურის თავმჯდომარე წელს საქართველოს დამსახურებული მეღვინე, ენოლოგი გიორგი დაქიშვილი იყო.

ქვევრის ღვინის კონკურსი საქართველოში პირველად 2017 წელს გაიმართა და იმ დროიდან ამ სახეობის ღვინის მიმართ ინტერესი მნიშვნელოვნად გაიზარდა. 2018 წელს წარმოდგენილი და დაჭაშნიკებული იყო 25%-ით მეტი ღვინო, ვიდრე კონკურსის ჩატარების პირველ წელს, აღნიშნავენ ორგანიზატორები.

დღეისათვის საქართველოში ათასობით სხვადასხვა ჯიშის ყურძენი მოჰყავთ – მთელ მსოფლიოში ყურძნის 4 ათასი ცნობილი ჯიშიდან დაახლოებით 500 ქართული წარმომავლობისაა.

55
თემები:
ღვინის კულტურა და მეღვინეობა
გელათის მონასტერი

გელათის რეაბილიტაციის დროს დაფიქსირებული ხარვეზები სრულად გამოსწორდება

114
(განახლებულია 20:28 11.07.2020)
სააგენტოს ინფორმაციით, ტაძრის რეაბილიტაციის დროს დაშვებულ ხარვეზებს შემსრულებელი – „ხელოვნების საერთაშორისო ცენტრი“ გამოასწორებს

თბილისი, 11 ივლისი - Sputnik. გელათის რეაბილიტაციის დროს დაფიქსირებული ხარვეზები, რომელიც ღვთისმშობლის მიძინების ტაძრის კრამიტით გადახურვის მოწყობას უკავშირდება, სრულად იქნება გამოსწორებული, ნათქვამია კულტურული მემკვიდრეობის დაცვის ეროვნული სააგენტოს მიერ გავრცელებულ განცხადებაში.

Фреска апсиды Гелатского монастыря
გელათის მონასტერი

სააგენტოს ცნობით, ხარვეზები, რომლებიც 2020 წლის მარტში დაფიქსირდა, შემსრულებლის – „ხელოვნების საერთაშორისო ცენტრის“ მიერ სრულად გამოსწორდება.

„გადახურვის მასალაზე გამოვლენილი დაზიანებების აღმოფხვრა დამკვეთსა და შემსრულებელ კომპანიას შორის გაფორმებული სახელშეკრულებო პირობებით განხორციელდება, რაც საექსპლუატაციო ვადაში აღმოჩენილ დეფექტებზე შემსრულებლის ვალდებულებას განსაზღვრავდა“, - აღნიშნულია განცხადებაში.

Реставрация Гелатского монастыря
გელათის მონასტერი

სააგენტოს ინფორმაციით, მსოფლიო მემკვიდრეობის ძეგლის საბურველის ნაწილის პრობლემის გადაჭრის პროცესი ფინანსური კუთხითაც კომპანიის მიერ იქნება უზრუნველყოფილი.

გელათის სამონასტრო კომპლექსის ფართომასშტაბიანი რეაბილიტაციის პროგრამას სახელმწიფო 2008 წლიდან მსოფლიო მემკვიდრეობის ცენტრთან შეთანხმებული პროგრამის მიხედვით ეტაპობრივად ახორციელებს. სხვადასხვა ეტაპზე სახელმწიფოსთან ერთად საგრანტო პროგრამების ფარგლებში პროექტს აფინანსებდა აშშ-ს საელჩოს ფონდი და საქართველოს მუნიციპალური განვითარების ფონდი.

Реставрация Гелатского монастыря
https://www.facebook.com/mrdi.gov.ge
გელათის მონასტერი

გელათის მონასტერი ქუთაისიდან აღმოსავლეთით რამდენიმე კილომეტრშია, შეტანილია იუნესკოს მსოფლიო კულტურული მემკვიდრეობის ძეგლების სიაში (1994).

მონასტერი დაარსებულია 1106 წელს დავით აღმაშენებლის თაოსნობით. შემოზღუდულია გალავნით. ანსამბლში შედის სხვადასხვა დროინდელი (ძირითადად XII-XIII სს.) შენობები. მონასტერში იმავე 1106 წლიდან ფუნქციონირებდა გელათის აკადემია. დავითმა გელათის აკადემიაში სამოღვაწოდ შეკრიბა სწავლული ქართველები, რომელთა შორის იყვნენ იოანე პეტრიწი და არსენ იყალთოელი. თანამედროვენი გელათის აკადემიას „ასუად ათინად“, „აღმოსავლეთის მეორე იერუსალიმად“ იხსენიებდნენ.

 

114
თემები:
ქართული კულტურული მემკვიდრეობის ძეგლები
ელექტრომობილი

ელექტრომობილების გამოშვება საქართველოში კორონავირუსის პანდემიის გამო გადაიდო

0
(განახლებულია 09:41 14.07.2020)
პანდემიამ ხელი შეუშალა ადგილობრივი კადრების მომზადების გეგმებს, რომლებიც ჩინეთში იანვარ–თებერვალში უნდა გამგზავრებულიყვნენ

თბილისი, 14 ივლისი – Sputnik. ქართულმა ჰოლდინგმა Igroup, რომელიც საქართველოში ავტომობილების წარმოების პირველი ქარხნის აშენებას გეგმავს, ბოლოს და ბოლოს მიიღო ჯერ კიდევ გასულ წელს შეძენილი საწარმოო ხაზი და ტექნოლოგიური სიმძლავრეები, განაცხადა ინდუსტრიული ჰოლდინგის დირექტორთა საბჭოს თავმჯდომარე კახაბერ გულედანმა.

ბრიფინგი ორშაბათს ქუთაისში აეროპორტის ტერიტორიაზე გაიმართა, სადაც მდებარეობს ავტომობილების წარმოების ქარხნის მშენებლობისთვის განკუთვნილი მონაკვეთი. ქარხნის მშენებლობის შესახებ ქვეყნის ხელისუფლებამ 2019 წლის გაზაფხულზე განაცხადა. შესაბამის მემორანდუმს ქართულმა ჰოლდინგმა IGroup ჩინურ კონსორციუმ Changan Automobile–თან მოაწერა ხელი. მხარეები მშენებლობის 24 თვეში დასრულებაზე შეთანხმდნენ.

„COVID 19-ის გამო შექმნილი ვითარებიდან გამომდინარე, რამაც გამოიწვია ლოგისტიკური შეფერხებები... საწარმოო ხაზი და ტექნოლოგიური სიმძლავრეები, რომელიც კომპანიამ პარტნიორისგან, ავტოინდუსტრიის ჩინური გიგანტი კომპანია Changan Automobile–ისგან ჯერ კიდევ 2019 წლის შემოდგომაზე შეიძინა და დეკემბერში უნდა ჩამოსულიყო, 2020 წლის ივლისის პირველ რიცხვებში ჩამოვიდა საქართველოში... ვერ დავიწყეთ ვერც მშენებლობა, რადგან ამ კონტექსტში უმნიშვნელოვანესი საკითხია კადრების გადამზადება და მივლინებები. ქარხნის მშენებლობისთვის და ასევე, ტექნოლოგიური სიმძლავრეების გამართვისთვის ჩინეთიდან ქუთაისში უნდა ჩამოსულიყვნენ ინჟინრები“, – განაცხადა კახაბერ გულედანმა.

ამას გარდა, მისი თქმით, პანდემიამ ხელი შეუშალა ასევე ადგილობრივი კადრების გადამზადებას ჩინეთში, სადაც ისინი ამა წლის იანვარ–თებერვალში უნდა წასულიყვნენ.

თბილისში ელექტრომობილების დამტენი 160 მოწყობილობა დამონტაჟდება>>

აქედან გამომდინარე, ცხადია, რომ დასახელებული ვადები გადაიხედება, მაგრამ კომპანიის წარმომადგენლები ყველაფერს აკეთებენ იმისთვის, რომ დაიწყონ ელექტროავტომობილების წარმოების რეგიონში პირველი ქარხნის დაპირებული მშენებლობა. გეგმის მიხედვით, პირველი პროექტი – ეს ქარხანაა, რომლის მუშაობის დაწყებიდან წელიწადნახევარში ბაზარზე 5 ათასი ელექტრომობილი გამოჩნდება.

ქარხანაში თავდაპირველად ოთხი მოდელის ავტომობილს აწარმოებენ. ხუთი წლის შემდეგ საქართველოში წარმოებული ავტომობილები წარწერით Made in Georgia საქართველოს მთავარი საექსპორტო პროდუქცია გახდება.

სავარაუდოდ, ქარხანა ყოველწლიურად 40 ათას ელექტრომობილს გამოუშვებს, მათი ერთი მესამედი შიდა ბაზარზე, მეორე კი ექსპორტზე, ევროკავშირის ქვეყნებში გაიგზავნება. საწარმოში  300–მდე ადგილობრივი დასაქმდება.

ინდუსტრიული კომპლექსი ქუთაისში 100 ჰექტარ ფართობზე განთავსდება. აღნიშნულ ტერიტორიაზე ასევე განთავსდება ეკოპროდუქციის მწარმოებელი საწარმოები, მზის პანელები და მაღალტექნოლოგიური პროდუქციები.

0
თემები:
საქართველოს ეკონომიკა