ხანძრის შედეგები ნოტრ-დამში

იუნესკოს წარმომადგენელი: ქართველ ექსპერტებს ნოტრ-დამის აღდგენა შეუძლიათ

664
(განახლებულია 14:50 16.04.2019)
როგორც იუნესკოს წარმომადგენელმა მარინა თუმანიშვილმა აღნიშნა, იქიდან გამომდინარე, რომ არსებობს ყველა ნახაზი და ფოტოდოკუმენტაცია, ნოტრ-დამის აღდგენა შესაძლებელია.

თბილისი, 16 აპრილი — Sputnik. საქართველოში არიან სპეციალისტები, რომლებიც კულტურული მემკვიდრეობის დაზიანებული ან დანგრეული ძეგლების აღდგენით არიან დაკავებული, ასე რომ, აუცილებლობის შემთხვევაში მათ საფრანგეთის დახმარება შეუძლიათ, განუცხადა „Sputnik-საქართველოს" არქიტექტორმა, ურბანისტმა, იუნესკოს წარმომადგენელმა მარინა თუმანიშვილმა.

პარიზის ღვთისმშობლის ტაძარში გუშინ, საღამოს უძლიერესი ხანძარი გაჩნდა. ჩამოინგრა სამრეკლო და სახურავის ნაწილი, მოწყდა საათი. ადგილზე 400-მდე მეხანძრე და ტექნიკა მუშაობდა. ფრანგული მასმედიის ინფორმაციით, ხანძარი, შესაძლოა, სარესტავრაციო სამუშაოებს უკავშირდებოდეს, ტაძრის ნაწილი ხის მასალით იყო დაფარული.

„საქართველოს ჰყავს სპეციალისტები. ჩვენ თვითონ გვაქვს რამდენიმე ძეგლი, რომლებიც მსოფლიო მემკვიდრეობის ნუსხაშია ჩართული. ჩვენი სპეციალისტები მუშაობენ გელათის სამონასტრო კომპლექსის აღდგენაზე, რომელიც ასევე იუნესკოს ნუსხაშია, ასე რომ, პოტენციალი საქართველოს აქვს. რამდენად საჭირო გახდება ქართველი სპეციალისტების კვალიფიკაცია, ეს უკვე საფრანგეთის მთავრობაზე იქნება დამოკიდებული, მაგრამ მზადყოფნა, რა თქმა უნდა, არის", – განაცხადა თუმანიშვილმა.

თუმანიშვილი იუნესკოს საერთაშორისო ურთიერთობების განყოფილების კულტურული მემკვიდრეობის დაცვის სამსახურში მუშაობს.

Пожар в соборе Нотр-дам в Париже
© REUTERS / BENOIT TESSIER
ხანძარი პარიზის ღვთისმშობლის ტაძარში

მან დამაიმედებელი უწოდა ინფორმაციას იმის შესახებ, რომ ტაძრის მთავარი კონსტრუქცია, ქრისტეს ეკლიანი გვირგვინი, წმინდა ლუკას სუდარა და სხვა რელიკვიები შენარჩუნებულია. საფრანგეთს გააჩნია ამის რესურსები, და მსოფლიოც მზადაა დასახმარებლად, აღნიშნა მან.

„ვიმედოვნებთ, რომ დაზიანებული ნაწილი საერთაშორისო თანამეგობრობის, პროფესიონალების რეკომენდაციებით აღდგება და საწყის იერსახეს დაიბრუნებს. როდესაც ობიექტი იუნესკოს ნუსხაში შედის, აუცილებელია დოკუმენტაცია, რომელიც დეტალურად აღწერს ამა თუ იმ ძეგლს, ამიტომ ამ ნახაზებზე, ფოტოდოკუმენტაციაზე დაყრდნობით აღდგენა შესაძლებელია თეორიულადაც და პრაქტიკულადაც", – განაცხადა თუმანიშვილმა.

უკვე დაწყებულია სახსრების შეგროვება ნოტრ-დამის აღსადგენად. შესაბამისი განყოფილება გამოჩნდა საფრანგეთის კულტურული მემკვიდრეობის დაცვის სახელმწიფო ფონდის ვებ-გვერდზე.

მომხმარებელს სთავაზობენ 50-დან 500 ევრომდე თანხის შეტანას, ან სხვა, ნებისმიერი თანხის მითითებას. ალტერნატივაა – ყოველთვიურად ნაკლები თანხის ჩამოჭრა – 10-დან 100 ევრომდე, ან სხვა თანხის მითითება, შერჩევით.

664
თემები:
ხანძარი პარიზში - როდის აღადგენენ ნოტრ-დამს (8)
დარეჯან დედოფლის სასახლის სამონასტრო კომპლექსი

თბილისში დარეჯან დედოფლის სასახლის რესტავრაცია დასრულდა - ფოტო

39
XVIII საუკუნეში აგებული დარეჯანის სასახლის შესწავლა ქვეყნის კულტურული მემკვიდრეობის დაცვის ეროვნული სააგენტოს სპეციალისტებმა ჯერ კიდევ 2017 წელს დაიწყეს, მათ დაადგინეს, რომ კულტურული მემკვიდრეობის ძეგლს სასწრაფო რესტავრაცია სჭირდებოდა,

თბილისი, 26 ოქტომბერი - Sputnik. თბილისში ერთ-ერთი ყველაზე ღირსშესანიშნავი ხუროთმოძღვრული ძეგლის - დარეჯანის სასახლის რესტავრაცია დასრულდა, იუწყება თბილისის მერია.

XVIII საუკუნეში აგებული დარეჯანის სასახლის შესწავლა ქვეყნის კულტურული მემკვიდრეობის დაცვის ეროვნული სააგენტოს სპეციალისტებმა ჯერ კიდევ 2017 წელს დაიწყეს.

კომპლექსი დღეს დედაქალაქის მერმა კახა კალაძემ დაათვალიერა.

„აქ იყო უმძიმესი მდგომარეობა. სამუშაოების ჩატარებას დაახლოებით წელიწადზე მეტი დასჭირდა. მიხარია, რომ რეაბილიტაციის ფარგლებში მთლიანად განახლდა ეს სივრცე და ქალაქის ცენტრში, ისტორიულ ადგილზე გვაქვს დარეჯანის სასახლე, რომელიც ხვალიდან სტუმრებს მიიღებს“, - განაცხადა დედაქალაქის მერმა.

პროექტის ფარგლებში კეთილმოეწყო ტერიტორია. კერძოდ, ზედა და ქვედა ეზოები მოპირკეთდა ბუნებრივი ქვის ფილებით, მოეწყო ბორდიურები, ასევე, სანიაღვრე არხები ლითონის ცხაურებით და ჭებით. სასახლის ეზო და ციხის ტერასები გაზონები რულონური ბალახით და სხვადასხვა ხე-მცენარეებით გამწვანდა, ასევე მოეწყო სარწყავი სისტემა. დამონტაჟდა ლამპიონები, რესტავრაცია ჩაუტარდა ლითონის ჭიშკარს და მოაჯირებს.

აღდგა მეფე ერეკლეს აბანო. დაზიანებულ შენობას ჩაუტარდა კონსტრუქციული გამაგრება, აღდგა აბანოს არქიტექტურული იერსახე, აგურის წყობის კამარების რესტავრაციით, ჰიდროსაიზოლაციო ფენილის მოწყობით, დამონტაჟდა შესასვლელი ხის კარი, დაიგო აგურის იატაკი.

განხორციელდა კომპლექსის გალავნის სარესტავრაციო სამუშაოები: გალავნის რესტავრაცია შესრულდა აგურის წყობის ღარების შევსებით და ქართული აგურის წყობით კირის დუღაბზე; კედლების დაზიანებული ადგილები აღდგა ქვით და ქართული აგურით კირხსნარზე; მიწისქვეშა წყლების გასატარებლად მოეწყო სადრენაჟო მილები; გალავნის კედლებსა და ბურჯებზე დამონტაჟდა მინათების სისტემა.

სარესტავრაციო სამუშაოებისას გამოვლინდა არქეოლოგიური ნაშთები, მათ შორის, გალავნის ფრაგმენტები, რომელიც არქეოლოგების მიერ შესაბამისი წესების დაცვით გაიწმინდა და შენარჩუნდა.

პროექტის ფარგლებში შესრულდა ფერისცვალების დედათა მონასტრის XVIII საუკუნის ეკლესიის კედლის მხატვრობის საკონსერვაციო სამუშაოები.

სარესტავრაციო სამუშაოები სამშენებლო კომპანიის - „იკორთა 2007“ -მა შეასრულა. პროექტის ბიუჯეტმა 1 147 000 ლარი შეადგინა.

დარეჯანის სასახლე ავლაბარში, ღვინის აღმართზე მდებარეობს. აშენდა 1776 წელს ქართლ-კახეთის მეფე ერეკლე მეორის ბრძანებით მისი მეუღლე დარეჯან დედოფლისათვის (1734 – 1807). ეს იყო მდიდრული სასახლე, რომლის ტერიტორიაზეც იმავე პერიოდში აღიმართა კარის ეკლესია. აღსანიშნავია, რომ ტაძრის არქიტექტურა ირანულ ელემენტებსაც შეიცავს.

სასახლე და ეკლესია ნაწილობრივ დაინგრა XVIII საუკუნის ბოლოს, აღა-მაჰმად ხანის შემოსევისას. დედოფლის სანქტ-პეტერბურგში გადასახლების შემდეგ, 1807 წელს, ეგზარქოსმა თეოფილაქტემ ტაძართან საკვირაო სკოლა და სასულიერო სემინარია გახსნა. 1824 წელს აქ ამოქმედდა დედათა მონასტერი, 1862 წელს კი - სემინარია სასულიერო პირთა შვილებისთვის. 2001 წელს ეკლესიის საკურთხეველი ხელახლა მოიხატა. ამჟამად კი აქ დედათა მონასტერი ფუნქციონირებს.

39
თემები:
ქართული კულტურული მემკვიდრეობის ძეგლები
ასტრიდ ლინდგრენის პრემიით დაჯილდოების ცერემონია

ასტრიდ ლინდგრენის პრემიაზე 2021 წელს ოთხი ქართველი საბავშვო მწერალია წარდგენილი

21
(განახლებულია 19:51 26.10.2020)
საბავშვო ლიტერატურის დარგში პრესტიჟული პრემიის პრეტენდენტი წელს სულ 69 ქვეყნის 263 წარმომადგენელი გახდა.

თბილისი, 26 ოქტომბერი – Sputnik. საქართველომ ცნობილი შვედი საბავშვო მწერლის ასტრიდ ლინდგრენის საერთაშორისო პრემიაზე 2021 წლისთვის ხუთი ნომინანტი წარადგინა. ნომინანტების ვინაობა პრემიის ოფიციალურ ვებ-გვერდზეა გამოქვეყნებული.

ესენი არიან საბავშვო ავტორები ირმა მალაციძე, მარიამ წიკლაური, ბონდო მაცაბერიძე, თეა თოფურია, ასევე წმინდა ალექსანდრე ოქროპირიძის სახელობის ნიქოზის ხელოვნების სკოლა.

ასტრიდ ლინდგრენის ხსოვნის პრემია (Astrid Lindgren Memorial Award) არის შვედური პრემია მიღწევებისთვის საბავშვო ლიტერატურაში, რომელიც შვედეთის მთავრობამ 2002 წელს დააწესა. პრემია გაიცემა ყოველ წელს, საპრიზო ფონდი 5 მილიონ შვედურ კრონს (ნახევარ მილიონ აშშ დოლარზე მეტს) შეადგენს. 

პრემია გაიცემა არა მხოლოდ საბავშვო ლიტერატურის სფეროში მიღწევებისთვის, არამედ ასევე კითხვის პროპაგანდის საქმიანობისთვის.

პრესტიჟული პრემიისთვის 69 ქვეყნის 263 მონაწილეა წარდგენილი. ლაურეატებს 2021 წლის 13 აპრილს დაასახელებენ.

ნომინანტებს საქართველოდან, ტრადიციულად, ილია ჭავჭავაძის სახელობის საქართველოს ეროვნული საპარლამენტო ბიბლიოთეკა წარადგენს.

მარიამ წიკლაური არაერთი საბავშვო წიგნის ავტორი და მთარგმნელია. არის რამდენიმე პრესტიჟული ლიტერატურული პრემიის მფლობელი, რომელთა შორისაა „შოთაობა“, „საგურამო“, იაკობ გოგებაშვილის სახელობის პრემია და სხვ. მარიამ წიკლაურის პოეზია და თარგმანები ჩართულია ბევრ ქართულ და უცხოურ კრებულებსა და სახელმძღვანელოებში.

თეა თოფურია ქართველი მწერალი, პოეტი, ჟურნალისტი და რედაქტორია. დაიბადა 1977 წელს სოხუმში. 1998 წლიდან მუშაობს ჟურნალისტიკაში, აშუქებს ადამიანის უფლებებთან და გარემოს დაცვასთან დაკავშირებულ თემებს. არის მრავალრიცხოვანი ლიტერატურული კონკურსის ლაურეატი. მისი საბავშვო წიგნის „წყალდიდობა ზოოპარკში" გერმანულმა თარგმანმა, რომელიც თბილისში მომხდარი წყალდიდობის რეალურ მოვლენებს ეფუძნება, გერმანიაში ლიტერატურული ჯილდო მიიღო.

ბონდო მაცაბერიძე ცნობილი ქართველი საბავშვო მწერალია. წარმოშობით სამტრედიიდან არის. აქტიური ლიტერატურული მოღვაწეობა 1990-იანი წლებიდან დაიწყო. ის ავტორია ცნობილი ზღაპრებისა და კრებულებისა: „ზღაპრები ბექნა ბიჭზე", „ზღაპრები თეკლა გოგოზე", „ზადო და ბადო", „ზღაპარი თუსიზე და კიდევ ტუსიზე" და სხვ. მისი ნაწარმოებები თარგმნილია რუსულ, გერმანულ, თურქულ, ირანულ და სხვა მრავალ ენაზე. მაცაბერიძე ასტრიდ ლინდგრენის პრემიაზე 2018 წელსაც იყო ნომინირებული.

თბილისში საბავშვო და საყმაწვილო ლიტერატურული პრემიის გამარჯვებულები გამოვლინდნენ>>

ირმა მალაციძე საბავშვო მწერალი, ჟურნალისტი და მთარგმნელია. დაიბადა 1968 წელს ხაშურში. ის საბავშვო ლიტერატურის ფონდის დამფუძნებელი და ხელმძღვანელია. მუშაობდა ჟურნალისტად საზოგადოებრივ მაუწყებელსა და რამდენიმე საინფორმაციო სააგენტოსა და გაზეთში. პირველი გამარჯვებულია კონკურსის „ახალი სახეები ქართულ საბავშვო ლიტერატურაში“. არის კონკურსების „პენ–მარათონისა“ და „ლუარსაბ თათქარიძის“ ფინალისტი, „საბას“ ნომინანტი.

2020 წელს ასტრიდ ლინდგრენის პრემიის ლაურეატი გახდა მწერალი და მხატვარი სამხრეთ კორეიდან პეკ ხინა.

21
თემები:
საქართველო და კულტურა
სპეცოპერაცია ზუგდიდში

ზუგდიდში მძევლების აყვანა: პოლიციამ ეჭვმიტანილის სახლში ჩხრეკა დაასრულა

19
ზუგდიდის პოლიციის სამმართველოს უფროსმა პოლიციაში ეჭვმიტანილის მამა, ტარიელ ესებუა სამხარეო პოლიციაში პირადად გადაიყვანა

თბილისი, 26 ოქტომბერი - Sputnik. პოლიციამ ზუგდიდის მუნიციპალიტეტის სოფელ ალერწკარში დაასრულა ჩხრეკა ბადრი ესებუას სახლში, რომელსაც ზუგდიდში ბანკის ძარცვა და მძევლების აყვანა ედება ბრალად.

პირველი არხის ინფორმაციით, სამართალდამცველებმა დაადასტურეს, რომ ადგილზე საგამოძიებო მოქმედებები ჩატარდა, თუმცა არ დაუზუსტებიათ, იყო თუ არა ამოღებული სახლიდან რაიმე ნივთები.

გარდა ამისა, ზუგდიდის პოლიციის სამმართველოს უფროსმა ირაკლი ფაცაციამ ეჭვმიტანილის მამა, ტარიელ ესებუა პირადად გადაიყვანა სამეგრელო-ზემო სვანეთის სამხარეო პოლიციაში. 

საგამოძიებო მოქმედებები ასევე დასრულდა ბადრი ესებუას ძმის, ბიძინა ესებუას სახლში. გამოკითხვაზე არიან გადაყვანილნი ბიკენტი და ბიძინა ესებუები. ასევე, გამოკითხვაზე გადაიყვანეს ბადრი ესებუას დეიდა და დეიდაშვილი.

შსს-მ დღეს გაავრცელა ინფორმაცია იმის შესახებ, რომ ზუგდიდში „საქართველოს ბანკზე“ თავდასხმა ბადრი ესებუამ განახორციელა. შსს-მ ასევე მისი ფოტო გაავრცელა. მიმდინარეობს დამნაშავის ძებნის სპეცოპერაცია.

19
თემები:
ზუგდიდში შეიარაღებულმა პირმა მძევლები აიყვანა