კადრი ფილმიდან იარ–არი–გიუმრი

კიკაბიძე ახალ ფილმში გადაიღეს თბილისში პრემიერა გაიმართება

177
(განახლებულია 17:40 15.04.2019)
დოკუმენტურ–მხატვრული ფილმი ქართველებისა და სომხების მეგობრობის შესახებ მოგვითხრობს.

თბილისი, 15 აპრილი – Sputnik. დოკუმენტურ–მხატვრული ფილმის „იარ-არი-გიუმრის“ პრემიერა გაიმართება პარლამენტის ეროვნული ბიბლიოთეკის საგამოფენო დარბაზში 16 აპრილს, ფილმში მთავარი როლი ცნობილმა ქართველმა მსახიობმა და მომღერალმა ვახტანგ კიკაბიძემ ითამაშა.

ფილმის ავტორია ვიქტორია მაქსოევა – რეჟისორი და საზოგადოებრივი ორგანიზაცია „აგორა–ჯორჯიას“ (საქართველო) ხელმძღვანელი, რომლის საქმიანობა რეგიონში პოლიტიკური, ეკონომიკური და კულტურული კავშირების გამტკიცებისკენ არის მიმართული.

„ფილმის მთავარი გმირია ქალაქი გიუმრი. ჩვენ ვსაუბრობთ მის კულტურაზე, ისტორიაზე და იმაზე, თუ რა აკავშირებს ამ მშვენიერ ქალაქს საქართველოსთან. პირველ რიგში, ეს, რა თქმა უნდა, ხალხია. სიმბოლურია, რომ 30 წლის წინ გიუმრიში მიწისძვრა მოხდა და საქართველო იყო პირველი ქვეყანა, რომელიც მოძმე სომეხი ხალხის დასახმარებლად მოვიდა. თუმცა, ფილმში ჩვენ არ ვსაუბრობთ ისტორიის ტრაგიკულ მომენტებზე, რადგან გიუმრი სომხეთის იუმორის დედაქალაქია. ჩვენ, პირველ რიგში, ქალაქს იუმორისტული თვალსაზრისით წარმოვადგენთ. მით უმეტეს, რომ ჩვენი ფილმი ნახევრადდოკუმენტურია, და მასში არის მხატვრული ხაზი, რომელიც სავსეა იუმორითა და ფანტასტიკით“, – განუცხადა „Sputnik–საქართველოს“ მაქსოევამ.

ფილმის ავტორის თქმით, სურათში ერთ–ერთი სიუჟეტური ხაზია ვახტანგ კიკაბიძისა და მისი მეგობრის, გიუმრის მკვიდრის ფრუნზიკ მკრტჩიანის მეგობრობის ისტორია. ფილმში ქართველი მსახიობი ფრუნზიკის სამშობლოდან ძვირფასი მეგობრის სამახსოვროდ რამის ჩამოტანას ითხოვს. ფინალში გიუმრის ფრუნზიკ მკრტჩიანის მუზეუმიდან ორიგინალური გზავნილი ჩამოდის.

კიკაბიძესთან ერთად ფილმში გადაღებული არიან ემილ გალსტიანი (სომხეთი), ასევე ირინა და ქსენია ჩერნიაევები (რუსეთი).

მაქსოევას თქმით, გადამღები ჯგუფი ქართულ–სომხურია. ამ ჯგუფმა უკვე გადაიღო ექვსი ფილმი, რომლებსაც სხვადასხვა ჯილდო აქვს მიღებული.

„პრეზენტაციაზე წარმოდგენილი იქნება რამდენიმე ექსპონატი მკრტჩიანის მუზეუმიდან, რომლებსაც მუზეუმის წარმომადგენელი აჩვენებს. ასევე ნაჩვენები იქნება ფრუნზიკის გრაფიკული ნამუშევრების სლაიდ–შოუ. საღამოზე გამოვა ასევე თბილისის მოსწავლე ახალგაზრდობის სასახლის ანსამბლი“, – აღნიშნა მაქსოევამ.

ფილმის პრემიერა უკვე გაიმართა (2019 წლის იანვარში) სომხეთსა და რუსეთში. ის თავდაპირველად აჩვენეს სომხეთის საზოგადოებრივი ტელევიზიის ეთერში, ხოლო შემდეგ – სანქტ-პეტერბურგისა და ლენინგრადის ოლქის ტელევიზიით.

ფილმის ჩვენება 18:00 საათზე დაიწყება. ღონისძიებაზე მიწვეული არიან საქართველოსა და სომხეთის სამინისტროებისა და უწყებების წარმომადგენლები, ასევე უცხოელი დიპლომატები. დასწრება თავისუფალია.

177
თემები:
საქართველო და კულტურა (1050)
ღირსების ორდენი

საქართველოს პრეზიდენტმა ეროვნული ბიბლიოთეკის თანამშრომელი ღირსების ორდენით დააჯილდოვა

52
დაჯილდოება უკავშირდება წვლილს ემიგრაციის მუზეუმში, სადაც თავმოყრილი ექსპონატები უცხოეთში მყოფი ქართველი ემიგრანტების ცხოვრებასა და მოღვაწეობაზე მოგვითხრობენ

თბილისი, 27 თებერვალი – Sputnik. საქართველოს პრეზიდენტმა სალომე ზურაბიშვილმა პარლამენტის ეროვნული ბიბლიოთეკის საბიბლიოთეკო რესურსების დეპარტამენტის დირექტორს, ლევან თაქთაქიშვილს ქართული სახელმწიფოს მშენებლობის საქმეში შეტანილი პირადი წვლილისთვის ღირსების ორდენი გადასცა, ნათქვამია პრეზიდენტის ადმინისტრაციის განცხადებაში.

„ის, რომ დღეს პარლამენტის ეროვნულ ბიბლიოთეკაში ყველასთვის ხელმისაწვდომია ემიგრაციის შემოქმედება - ლიტერატურა, ფოტომასალა და ისტორია, რომლის დაბრუნებაც ძალიან ხანგრძლივი და რთული საქმე იყო, სწორედ ლევან თაქთაქიშვილის დამსახურებაა“, - განაცხადა საქართველოს პრეზიდენტმა.

ამასთან მან აღნიშნა, რომ ემიგრანტების შესახებ ისტორიული მასალების დაბრუნება ჯერ არ დასრულებულა.

2020 წლის ივლისში ეროვნულ ბიბლიოთეკაში ემიგრაციის მუზეუმი გაიხსნა, სადაც თავმოყრილია ექსპონატები, რომლებიც უცხოეთში ქართველი ემიგრანტების ცხოვრებასა და მოღვაწეობაზე მოგვითხრობენ. მანამდე ეს მუზეუმი 1994 წლიდან თბილისის სახელმწიფო უნივერსიტეტის შენობაში ფუნქციონირებდა.

მასში ინახება ბევრი ემიგრანტის პირადი არქივი, მათ შორის საფრანგეთში ლევილის მამულის არქივი. ეს მამული დევნილობაში მყოფმა საქართველოს მთავრობამ ნოე ჟორდანიას მეთაურობით ქართველი ემიგრანტების თავშესაფრად შეიძინა.

 

52
ველოსიპედისტი ლუკ გრენფელ-შოუ

ინგლისიდან ჩინეთამდე ონკოპაციენტების მხარდასაჭერად: ველომოგზაური უკვე საქართველოშია

73
მისი თქმით, ყველაზე შთამბეჭდავი ოყო ადგილობრივი მცხოვრებლების„ღრმა და გულითადი სითბო“ სტუმრებისა და თავად საქართველოს მიმართ

თბილისი, 27 თებერვალი – Sputnik. სიმსივნით დაავადებული 26 წლის ველოსიპედისტი ლუკ გრენფელ-შოუ, რომელმაც მისნაირი დიაგნოზის მქონე ადამიანების მხარდასაჭერად გადაწყვიტა მანძილი ბრისტოლიდან (დიდი ბრიტანეთი) პეკინამდე (ჩინეთი) ველოსიპედით დაფაროს, უკვე საქართველოშია. ამის შესახებ მან თავის Instagram-გვერდზე დაწერა.

„ბრისტოლიდან პეკინამდე“ - ასეთი სახელწოდებით ველომარშრუტის ფარგლებში ლუკი გეგმავს 30 ქვეყნის გადაკვეთას და კიბოთი დაავადებულთათვის 300 ათასი ევროს შეგროვებას. ასეთი გეგმა ახალგაზრდა მამაკაცმა ორი წლის წინ დაისახა. და ამ ყველაფრის მიზეზი გახდა დიაგნოზი, რომელიც ექიმებმა მას დაუსვეს - მეოთხე სტადიის კიბო. მაშინ ლუკ გრენფელ-შოუმ გადაწყვიტა წავიდეს სამოგზაუროდ, რათა სიცოცხლე ბოლომდე შეიგრძნოს და აჩვენოს სხვებს, რომ ოცნების ახდენა შესაძლებელია და ცხოვრება საინტერესოა. 2020 წლის იანვარში ლუკმა ველოექსპედიციის გზას დაადგა.

„საქართველოში მოგზაურობის საოცარი დასაწყისი! წვიმისგან თავშესაფარი იქცა ფინჯან ყავად, რომელიც ჭიქა ჭაჭაში გადაიზარდა! შემდეგ მას კიდევ ოთხი ჭიქა მოყვა! ბათუმამდე ბოლო კილომეტრზე ნამეტანი კონცენტრირებული ვიყავი ველოსიპედზე და, შესაძლოა, წვიმა გამოფხიზლებაში დამეხმარა! რა სიხარულია ვიყო აქ, ამ გიჟური არქიტექტურის ქალაქში, და ძალიან მიხარია, რომ შევისწავლი საქართველოს და ბევრ ხაჭაპურს შევჭამ“, - დაწერა მან ბათუმში ჩამოსვლისას.

მისი თქმით, ქალაქი ძალიან მრავალფეროვანია: „ბრწყინვალე თანამედროვე შენობები, ლონდონიდან ამოგლეჯილი ტაუნ-ჰაუსები, საბჭოური ეპოქის მრავალბინიანი სახლები“. როგორც ლუკმა აღნიშნა, ყველაზე ძლიერი შთაბეჭდილება დატოვა მცხოვრებლების „ღრმა და გულითადმა სითბომ“ როგორც სტუმრებისა, ისე თავად საქართველოს მიმართ.

პროექტმა მედიის ყურადღება მიიპყრო, და ლუკის მოგზაურობას გამომწერებთან ერთად თვალს ადევნებენ ჟურნალისტებიც. ამჟამად საქართველოში მას თან ახლავს BBC-ს ჟურნალისტი, რომელიც ველოსიპედისთის მოგზაურობის შესახებ ფილმს იღებს.

რეგიონში ყოფნისას ახალგაზრდა მოგზაურმა დაათვალიერა ბათუმის ძირითადი ტურისტული ღირსშესანიშნაობები, ბათუმის ბოტანიკური ბაღი და მთიანი აჭარა. რეგიონში ლუკის მოგზაურობა ორგანიზებულია აჭარის ტურიზმის დეპარტამენტის მიერ. დღეს ის გზას განაგრძობს და აღმოსავლეთ საქართველოში გაემგზავრება.

73
კარვები პარლამენტის შენობის წინ

რუსთაველის გამზირზე კარვების ქალაქი იზრდება

0
ორშაბათს, 1 მარტს, ოპოზიციის წარმომადგენლები გამართავენ მიტინგს მმართველი პარტია „ქართული ოცნების“ დამფუძნებლის, მილიარდერ ბიძინა ივანიშვილის სახლთან

თბილისი, 28 თებერვალი - Sputnik. თბილისში, პარლამენტის შენობის წინ ოპოზიციის წარმომადგენლებმა კიდევ ერთი, მე-15 კარავი დადგეს.

კარვის დადგმის დროს აქციის მონაწილეებსა და პოლიციას შორის მცირე შელაპარაკება მოხდა. მაგრამ ამჯერად საქმე დაკავებამდე არ მისულა და სიტუაცია განიმუხტა. ოპოზიციის წარმომადგენლებმა კარავი დადგეს, პოლიციამ კი მიმდებარე ტერიტორია დატოვა.

აქციის მონაწილეების თქმით, ორშაბათს, 1 მარტს, ისინი გამართავენ მიტინგს მმართველი პარტია „ქართული ოცნება - დემოკრატიული საქართველოს“ დამფუძნებლის, მილიარდერ ბიძინა ივანიშვილის სახლთან. აქცია 12:00 საათზე დაიწყება. სამშაბათს, 2 მარტს, პლენარული სხდომის დღეს ოპოზიციამ პარლამენტის შენობის პიკეტირება დააანონსა.

მომიტინგეები პოლიტპატიმრების გათავისუფლებას და ვადამდელი არჩევნების ჩატარებას მოითხოვენ. წინააღმდეგ შემთხვევაში ისინი კარვებში დარჩენას აპირებენ და მასშტაბურ აქციებს აანონსებენ.

საქართველოში პოლიტიკური კრიზისი „ერთიანი ნაციონალური მოძრაობის“ ლიდერის, ნიკა მელიას დაპატიმრების შემდეგ გამწვავდა. ოპოზიცია გავიდა ქუჩებში და ორი კვირის განმავლობაში აპირებს საპროტესტო აქციების გამართვას. ლიდერების თქმით, აქციები მხოლოდ იმ შემთხვევაში გადაიდება, თუ მმართველ პარტიასთან მოლაპარეკებები განახლდება.

0