თბილისი, 13 ივლისი — Sputnik. თბილისში, ეროვნული საპარლამენტო ბიბლიოთეკის მეორე კორპუსში 13 ივლისს დიდი შემოქმედის, გენიალური ქართველი პოეტისა და მწერლის ვაჟა-ფშაველას სახელობის სამკითხველო დარბაზი, ასევე მკითხველის ახალი სარეგისტრაციო სივრცე გაიხსნება, აღნიშნულია ბიბლიოთეკის პრეს-სამსახურის განცხადებაში.
როგორც ბიბლიოთეკაში აღნიშნავენ, ვაჟა-ფშაველას სამკითხველო დარბაზში გამოფენილი იქნება მწერლის სიცოცხლეში დაბეჭდილი უნიკალური გამოცემები, მისი პორტრეტები და ეროვნული ბიბლიოთეკის ფონდში დაცული ვაჟას ხელნაწერები.
ეროვნული ბიბლიოთეკის გენერალური დირექტორი გიორგი კეკელიძე ვაჟა-ფშაველას დარბაზის გახსნას აუცილებლად მიიჩნევს, რადგან, მისი თქმით, „ამ აზროვნებისა და გაქანების ადამიანი ჩვენ ორი-სამი თუ გვყავდა და მისი სახელის ქვეყნის უპირველეს წიგნსაცავში შესაბამისი წარმოჩენა ძალიან მახარებს".
„მით უფრო მნიშვნელოვანი და სიმბოლურია ამ დარბაზის დამოუკიდებლობის დარბაზი-მუზეუმის სივრცეში გაჩენა — ვაჟა თავისუფლების უმთავრესი ქომაგია. სასიამოვნოა, რომ ამ ყველაფერს განახლებული რეგისტრატურაც ემატება და ეს ყველაფერი კერძო ბიზნესის ხელშეწყობით ხდება", — აღნიშნავს კეკელიძე.
„საქართველოში დაწესდება ვაჟა-ფშაველას სახელობის ლიტერატურული პრემია">>
ბიბლიოთეკაში ვაჟა-ფშაველას სახელობის სამკითხველო დარბაზისა და ახალი სარეგისტრაციო სივრცის გახსნა ხორციელდება კომპანია „m2 უძრავი ქონების" მხარდაჭერით, 2017 წელს კომპანიასა და ბიბლიოთეკას შორის ხელმოწერილი თანამშრომლობისა მემორანდუმის ფარგლებში.
