საბა მიგრიაული

არასტანდარტული მოგზაურობა: მაროკო, ბარსელონა, კანარის კუნძულები და 250 ევრო საჩუქრად

480
(განახლებულია 16:39 02.11.2018)

გიმოგზაურიათ აფრიკასა და ევროპაში, სამ ქვეყანასა და რვა ქალაქში ათ დღეში და მიგიღიათ 250 ევრო საჩუქრად ამ ყველაფრისთვის? 

თუ არა, მაშინ ჩვენი რუბრიკის სტუმარი საბა მიგრიაული გიამბობთ არასტანდარტული მოგზაურობის შესახებ.

საბა მიგრიაული
საბა მიგრიაული
საბა მიგრიაული: ჩვენი პირველი გაჩერება იყო ტანჟირი, მაროკო, სადაც ქუთაისიდან ბარსელონის გავლით ჩავედით. აეროპორტიდან გამოსვლისთანავე გადავწყვიტეთ, რომ ნაცვლად ტაქსის დაქირავებისა ან ავტობუსის მოძებნისა, ავტოსტოპით წასვლა გვეცადა. მცდელობა საკმაოდ წარმატებული გამოდგა. თერთმეტნი ვიყავით და ორ ნაწილად გავიყავით. ორივე ჯგუფს, ფაქტობრივად, პირველივე მანქანებმა გაგვიჩერეს.

ჩვენი მძღოლი ისეთი პოზიტიური ადამიანი გამოდგა, ცოტა მეწყინა კიდეც, რომ ჩვენთან ერთად არ აგრძელებდა მოგზაურობას. თანაც აღმოჩნდა, რომ საქართველოზეც იცოდა, თბილისზეც და ჩვენ მიმართაც კარგად იყო განწყობილი.

სახელები გამოგვკითხა და ჩემი რომ ვუთხარი, უცებ გაჩერდა და ჩამეკითხა:

- საბაა?!

ცოტა სასაცილოა, მაგრამ როგორც აღმოჩნდა, საბა მათ ყველაზე დიდ დედოფალს რქმევია. ჰო, დედოფალს! რაღა ჩვენი თამარ მეფე და რაღა იმათი საბა დედოფალი.

ასე საუბარ-საუბარში მიგვიყვანა Old Medina-ში, საითაც თვითონ საერთოდ არ ჰქონდა გზა, უბრალოდ, პატივი გვცა. არადა, ქალაქის მეორე ბოლოში იყო.

ტანჟირში სულ რამდენიმე საათით გავჩერდით და მსოფლიოს ყველაზე ლურჯ ქალაქში – შიფშაუენში გადავინაცვლეთ.

შიფშაუენი

შიფშაუენი-მაროკო
შიფშაუენი-მაროკო

მაროკოელები რომ ზემეგობრული ხალხია, ამის პირველი გამოვლინება სწორედ შიფშაუენში ვიხილეთ. თუ ქუჩაში შეგამჩნიეს, რომ რაიმეს ეძებ, მაშინვე მოგცვივდებიან დახმარების სურვილით გამსჭვალულნი. ასე მოხდა ჩვენ შემთხვევაშიც.

ტაქსის მძღოლს ვუთხარით, რომ სასტუმროში მივეყვანეთ და მისამართიც მივეცით. ქალაქის ცენტრში რომ შევედით, გააჩერა მანქანა და გვითხრა, აღმართს აუყევით და თქვენი სასტუმროც იქვეაო. გადმოვედი მანქანიდან და გავხედე აღმართს. ამ დროს საიდანღაც გაჩნდა რამდენიმე მაროკოელი, რომლებიც დაინტერესდნენ, რას ეძებო. ვანახე სასტუმროს მისამართი. მითხრეს, ეგ სასტუმრო 2-3 კილომეტრშია აქედანო. თუმცა დასაზუსტებლად მაინც გადარეკეს სასტუმროში, გაარკვიეს, სად იყო, მერე კი ერთ-ერთი ტაქსიში შეხტა და, ფაქტობრივად, დაუკითხავად წამოვიდა ჩვენთან ერთად. მიუხედავად იმისა, რომ ტაქსის მძღოლს ერთი სული ჰქონდა, როდის მოგვიშორებდა თავიდან, მისმა მოძმე მაროკოელმა მაინც სასტუმროს კარამდე მიაყვანინა ჩვენი თავი. 

შიფშაუენი-მაროკო
შიფშაუენი-მაროკო

მაროკო მარიხუანისა და ჰაშიშის ერთ-ერთი ყველაზე დიდი მწარმოებელია მსოფლიოში და რეალურად მოსახლეობის შემოსავლის მთავარი წყაროც ეს არის. ამიტომ ტურისტულ ადგილებში, ყველა თუ არა, ყოველი მეორე მაინც მარიხუანას გთავაზობს. ისე კი, მარიხუანისა და სხვა ნარკოტიკების მოხმარება ლეგალიზებული არ არის. ამ „სიკეთეს” სულ უცხოელებისთვის ამზადებენ „ჯიგრები“...

ქალაქის ფერი სათავეს 1930-იან წლებიდან იღებს, როცა სეფარდიელმა ებრაელმა ლტოლვილებმა, ღმერთის ძალის შესახსენებლად, თავიანთი სახლები და კედლები ლურჯად შეღებეს. მიუხედავად იმისა, რომ დროთა განმავლობაში ებრაელი მოსახლეობა ნელ-ნელა ჩანაცვლდა მუსლიმებით, მათი გავლენა დიზაინსა და ისტორიაზე ისევ ბატონობს – ქალაქს კვლავ ლურჯი იერი აქვს.

თუმცა არსებობს მეორე ვერსიაც, რომლის მიხედვითაც, ებრაელებს უბრალოდ სჯეროდათ, რომ ლურჯი ფერი კოღოებს განიზიდავდა...  

ფეზი-მაროკო
ფეზი-მაროკო

პრინციპში, ლურჯი მხოლოდ ტურისტული ზონაა, ანუ Old Medina. იქ თუ მოხვდით, აუცილებლად ესტუმრეთ რესტორან Aladin-ს, საიდანაც იშლება კიდეც ის ცნობილი ხედი, რომელიც ინტერნეტში გექნებათ ნანახი. თანაც უგემრიელეს კერძებსაც ამზადებენ და ფასებიც ძალიან დაბალია.

ისიც უნდა გითხრათ, რომ მაროკოს ასეთ პატარა ქალაქებში კვება ნამდვილად სერიოზული პრობლემაა ანტისანიტარიის გამო. ასე რომ, „ალადინი“ საუკეთესო მიგნებაა.

შიფშაუენიდან, წესით, მარაკეშში უნდა წავსულიყავით, მაგრამ გვირჩიეს, გზად ისტორიულ ქალაქ ფესში შეგვევლო.

ახლა ვფიქრობ, რამდენად მაგარი იქნებოდა მაროკოში მოგზაურობა, ფესში შევლა „შავ ლაქად“ რომ არ აჩნდეს მას – არაფერი იყო სანახავი, დრო ტყუილად დავკარგეთ. ეგაა მხოლოდ, იქ გავსინჯე კაქტუსის ნაყოფი, რომელსაც შიფშაუენში შორიდან ვუყურებდი ეჭვის თვალით. არადა, მომეწონა, მართლა უგემრიელესი იყო, განსხვავებული არომატი ჰქონდა. თუ სადმე შემხვდება, ერთ კილოს კიდევ დავაგემოვნებ.

კაქტუსის ნაყოფი
კაქტუსის ნაყოფი

სხვათა შორის, სასტუმროში ჩვენმა მეზობელმა ბიჭუნამ ძალიან უცნაური, თუმცა, თავისი აზრით, სარფიანი გარიგება შემომთავაზა: ჩემ მეგობარ ქერა გოგონას სამ აქლემში მიცვლიდა... ოთხი რომ მოეცა, იქნებ დავთანხმებოდი კიდეც, მაგრამ სამი აქლემი ვის ეყოფა? მეცოტავა და უარი ვუთხარი.

იქაურობას მალევე გავეყარეთ და ჩემ ფავორიტ ქალაქს, მარაკეშს „შევეყარეთ“.

მარაკეში

ეს არის ქალაქი, სადაც ნამდვილად გრძნობ, რამდენად განსაკუთრებული და ეგზოტიკური ქვეყანაა მაროკო. შიფშაუენი თუ ლურჯი იყო, მარაკეშს წითელ ქალაქს ეძახიან. იქ ყველაზე მეტად ისტორიული და თანამედროვე მაროკოს კონტრასტი მხიბლავს. ერთ წუთში თუ ძველ უბანს ათვალიერებ, მეორე წუთში ბარებისა და კლუბების ნაწილში ხვდები.

სხვათა შორის, მარაკეში ჰოლივუდელი რეჟისორების საყვარელი ადგილია. იქაა გადაღებული სცენები ფილმებიდან „გლადიატორი“, „შეუსრულებელი მისია“, „ჯეიმს ბონდი“ და სხვა მრავალი...

მარაკეში-მაროკო
მარაკეში-მაროკო

იცოდეთ:

  • თუ მაროკოში ოდესმე ჩაი ან ხორციანი კერძი შემოგთავაზეს, არასდროს თქვათ უარი, ვინაიდან ეს უპატივცემულობად მიიჩნევა. გარდა ამისა, ხორცი აუცილებლად მარჯვენა ხელით უნდა მიირთვათ. მოკლედ, თუ ცაცია ხართ ან ვეგეტარიანელი, ან, მით უმეტეს, ორივე ერთად, ძალიან არ გაგიმართლათ.
  • მაროკოს მოსახლეობას სახლებში ფაქტობრივად არ აქვთ სააბაზანოები, თუ ძალიან მცირე ნაწილს და სასტუმროებს არ ჩავთვლით. ძირითადად ყველანი აბანოებში დადიან, ანუ იქაურად „ჰამანებში“. 
  • მოერიდეთ თეთრი ტანსაცმლის ჩაცმას, რადგან ეს იქ გლოვის ფერია. ამიტომ იქაურები სულ ფერად-ფერადადად არიან შემოსილები. ტურისტები დიდად არ ითვალისწინებენ ამ ამბავს, მაგრამ ვფიქრობ, ადგილობრივი კულტურის გათვალისწინება აუცილებელია.

ამასობაში მაროკოს აფრიკული დღეები ამოიწურა და ბარსელონისკენ გავეშურეთ.

...მაგრამ, როგორც უნდა დაგეგმო მოგზაურობა და დეტალებში გათვალო ყველაფერი, ცხოვრებისეულ სიურპრიზებს ვერსად გაექცევი. 

ლისაბონი
ლისაბონი

მარაკეში–ლისაბონი–ბარსელონის რეისით მივფრინავდით. მარაკეშიდან ლისაბონში ჩავფრინდით, იქიდან კი ბარსელონაში უნდა წავსულიყავით, მაგრამ... ლისაბონში მხოლოდ 55 წუთი გვქონდა, რომ ერთი თვითმფრინავიდან მეორეში გადავმსხდარიყავით. ამ დროში უნდა მოგვესწრო ყველა საჭირო პროცედურის გავლაც. ბევრი კი ვირბინეთ, მაგრამ მაინც დაგვაგვიანდა, გეითთან რომ მივედით, უკვე დაკეტილი იყო.

მაგრამ, იცით, რა? ძალიან გამიხარდა ასე რომ მოხდა. სანამ თავად მიხვდებით, რა გამიხარდა, გეტყვით, რომ როცა ავიაკომპანიის მიზეზით თვითმფრინავს ვერ მიუსწრებთ, ანუ გამოტოვებთ დაკავშირებულ ფრენას, კომპენსაცია გეკუთვნით – 600 ევრომდე ფულადი სახით, სასტუმრო, ტრანსფერი სასტუმრომდე და უკან და ასევე უფასო კვება. ამიტომ ავიაკომპანიის წარმომადგენელს ყველაფერი ზემოთ ჩამოთვლილი მოვთხოვე და მათაც დაუყოვნებლივ გაგვიშვეს Radisson-ში. ჩვენ შემთხვევაში, საფრენი კილომეტრებიდან გამომდინარე, საკომპენსაციო თანხამ 250 ევრო შეადგინა თითოეულზე. ჯგუფის თერთმეტივე წევრმა იქვე შევავსეთ აპლიკაცია FlyBack.Ge-ზე და თანხა ორ თვეში მივიღეთ. 

ეს უკვე მეორე შემთხვევა იყო, როცა ავიაკომპანიამ კომპენსაცია გადამიხადა. პირველად კვიპროსის რეისზე დაგვიანებისთვის ავიღე 250 ევრო რამდენიმე თვის წინ.

მოვიდა ბარსელონასთან შეხვედრის დროც. 

ბარსელონა, Mirame!

ბარსელონა
ბარსელონა

ეს ქალაქი ჩემი აღმოჩენაა. სულ სხვა თვალით დავინახე. მართალია, ერთ-ერთი ყველაზე ცნობილი ტურისტული ადგილია მსოფლიოში, მაგრამ, იცოდით, რომ ბარსელონას აქვს შვიდი სანაპირო და შვიდივე ხელოვნურია? 

თურმე ქალაქს 1992 წლამდე სანაპირო არ ჰქონია. სანამ ოლიმპიადის მასპინძლობა არ ერგოთ წილად, მანამ სანაპირო საწარმოებს ეკავა. ახლა კი ბარსელონის სანაპიროები ტოპ-ათეულშია შესული National Geographic-ის მიხედვით.

ქალაქის დასათვალიერებლად თავიდან სულ ორ-ნახევარი დღე გვქონდა გათვალისწინებული. მაგრამ ლისაბონში შეყოვნების გამო ერთი დღე გამოგვაკლდა და მხოლოდ დღე-ნახევარიღა გვქონდა დარჩენილი. ამიტომ ბევრ ადგილზე წასვლა ვერ მოვასწარით. ყველაზე ცნობილი Sagrada Familia-ს ნახვით, La Rambla-ზე სეირნობითა და Camp Nou-ზე სტუმრობით შემოვიფარგლეთ.

ჰოდა, რახან ბევრი რამ დამრჩა სანახავი, კიდევ ერთხელ უნდა ვესტუმრო ბარსელონას, მით უმეტეს, რომ თანაც ვგიჟდები ესპანელებზე...

მოგზაურობის ბოლოს, ამდენი დატვირთული და, ცოტა არ იყოს, დამღლელი დღეების შემდეგ მცირედი რელაქსაცია კანარის კუნძულებზე, კერძოდ, ტენერიფეზე ვპოვეთ.

ტენერიფე

ტენერიფე - კანარის კუნძულები
ტენერიფე - კანარის კუნძულები

იქ არც იმდენი სანაპიროა, ყველას რომ წარმოგვიდგენია, და არც იმდენად მაღალი ფასები, მე რომ მეგონა. ვიპ-ზონაში შესვლა თავისი აუზებით, კაფეებითა და მთელი ამბებით მხოლოდ ხუთი ევრო ღირს! მთავარია, დილის 10 საათზე უკვე ადგილზე იყოთ.

მერე კი, ზემოდანაც თუ გადმოხედავთ ქალაქს, ურიგო არ იქნება...

მოკლედ, ძალიან დატვირთული, თუმცა საინტერესო და სასიამოვნო მოგზაურობა გამოგვივიდა. წინ კიდევ ბევრი ასეთი, უფრო უკეთესი და იაფი მოგზაურობები გველოდება.

ასე რომ, შემომიერთდით და ვიმოგზაუროთ ერთად.

480
ზურაბ გერმანიშვილი

მარანში ღამით შეპარული სტუმარი, კახური ღვინო და ნივრიანი ხაშლამა კოვიდისგან თავდასაცავად

2010
(განახლებულია 22:27 17.10.2020)
ოქტომბერია, გოგლა ლეონიძის სიტყვებით, “ჩამაჭრდა კახეთს ჰაერი“. ახლა იქ გზებზე ფერადი ხალიჩაა და კახური შემოდგომა თავისკენ გიხმობს...

თელავში ბევრი რამაა სანახავი, უფრო სწორედ, ხელახლა სანახავი და იქ ჩასულ სტუმრებს ამაში ცალკეული ადამიანებიც ეხმარებიან. გერმანიშვილების, პროფესიონალი ექიმების ტრადიციულ ოჯახს ყველა იცნობს. პანდემიამდე მათ არაჩვეულებრივი სასტუმრო „ამელი“ გახსნეს. იქ ჩასულები მარტო პასიურად კი არ ისვენებენ, კახური შემოდგომის ფერხულში უშუალოდაც ებმევიან.

ჯერ ორი სიტყვა მასპინძლებზე მინდა გითხრათ, ბატონი ზურაბ გერმანიშვილი გახლავთ ნეიროქირურგი, რომელიც წლებია თბილისის პირველ კლინიკურ საავადმყოფოში მუშაობს და პაციენტებში ნდობითა და პატივისცემით სარგებლობს. ასევე მისი მეუღლე, თამარ ბარამიძეც ექიმია, სამედიცინო ინსტიტუტის პროფესორი და მარდალეიშვილის კლინიკის თავ-კისრის ონკოლოგი. მათი ვაჟი, ასლანი, მამის კვალს გაჰყვა, ნეიროქირურგია და გერმანიის ერთ-ერთ კლინიკაში 13 წლის განმავლობაში მუშაობდა, ამჟამად საქართველოშია.

ზურაბ გერმანიშვილი და თამარ ბარამიძე
ზურაბ გერმანიშვილი და თამარ ბარამიძე

როგორც ექიმებმა, კარგად იციან რა არის საჭირო იმისთვის, რომ ადამიანმა ფიზიკურის გარდა, სრული ფსიქოლოგიური რელაქსი განიცადოს. საკუთარი ხელით შექმნილ ედემში საამისო ყველა პირობაა: არაჩვეულებრივი გარემო, გემოვნებით მოწყობილი ლანდშაფტი და სასტუმრო, რომელიც ყოველ სეზონზე, იქ ჩასულებს, ახალ-ახალ სიურპრიზებს სთავაზობს. სასტუროს ხშირად სტუმრობდნენ უცხოელი ტურისტები და საქართველოს სხვადასხვა კუთხიდან ჩამოსულები, მათ შორის, ბევრი ცნობადი სახეც იყო. დანარჩენს თავად ბატონი ზურაბი გვეტყვის.

სტუმრები ისრაელიდან
სტუმრები ისრაელიდან

- ბატონო ზურაბ, შემოდგომა განსაკუთრებით აქტიურია თქვენთან...

- კოვიდამდე წელიწადის არც ერთ სეზონზე არ ვუჩიოდით სტუმრების ნაკლებობას და ყველა საჭირო პირობის დაცვით, მათ ახლაც ვმასპინძლებთ. ისევე ყოველ ოქტომბერს, ახლაც, 20 ოქტომბრიდან ჩვენთან მასტერ-კლასები დაიწყება. ეს იქნება სასიამოვნო პროცესი, რომლის დროსაც ჩვენთან მოსული სტუმარი ისწავლის: ჩურჩხლის ამოვლებას, პურის ცხობას, მწვადის შეწვას, ხინკლის მოხვევას. რა თქმა უნდა, მათ საშუალება ექნებათ, რომ ჩვენს მიერ დაწურული არაჩვეულებრივი საფერავი და გამოხდილი ჭაჭა დააგემოვნონ. მოკლედ ეს იქნება სახალისო და ამასთან, შემეცნებითი ფორმის დასვენება, რომელიც დაუვიწყარ მოგონებას აჩუქებს. ჩვენ გვინდა სულ სხვა თვალით დანახული თელავი დაგამახსოვროთ.

სტუმრები თონეში პურს აკრავენ
სტუმრები თონეში პურს აკრავენ

- თქვენი კრეატივი, „ფოტოსესია წარსულში“ რას გულისმობს?

- მოგეხსენებათ, როგორი აქტუალურია ფოტო-სესიის მოწყობა, რომლისთვისაც სხვადასხვა საინტერესო გარემოს ეძებენ. მე ვფიქრობ, რომ ის, რასაც ჩვენ ვთავაზობთ ნებისმიერი ასაკის სტუმრისთვის სახალისო იქნება. ჩვენთან შეიძლება ფოტოების გადაღება ძველ, რეტრო გარემოში და ამასთან ქართული ნაციონალური სამოსით. კარგად იცით, რომ ეროვნული ტანსაცმელი ეთნიკური კუთხეების მიხედვით როგორი მრავალფეროვნებით გამოირჩევა. მანდილოსნებისთვის გვაქვს ტრადიციული გრძელი კაბები და თავსაბურავები, მამაკაცებისთვის კი- ჩოხა-ახალუხი, გვაქვს ასევე ძველი ქალაქური სამოსიც, მოკლედ არჩევანი თქვენზეა.

ფოტოსესია
ფოტოსესია

-თქვენთან არის თონე, სადაც ნებისმიერ მსურველს შეუძლია საკუთარი ხელით ჩაკრული პური დააგემოვნოს...

- დიახ, თონეც გვაქვს. თავიდან უფრთხიან ხოლმე თონეში პურის ჩაკვრას, მაგრამ უკვე მეორე მცდელობაზე ვატყობთ, რომ ამას სიამოვნებით აკეთებენ. რა ჯობია თონეში საკუთარი ხელით ჩაკრულ პურს?

ეზოში მოწყობილი თონე
ეზოში მოწყობილი თონე

- აქ გაქვთ მარანი, სადაც ვფიქრობ, განსაკუთრებით უცხოელი სტუმრებისთვის, ბევრი გექნებათ სათქმელი...

- ჩვენთან მოსული უცხოელი სტუმრები სიამოვნებით აგემოვნებენ ქვევრის ღვინოს, აქვე, რა თქმა უნდა, მათ ქართული სუფრის ტრადიციაზე ვესაუბრებით, მოგვიანებით კი, ყველაფერს უკვე თვალნათლივ ვაჩვენებთ. განსაკუთრებული ხაზგასმით ვეუბნებით (ვინც იცის, მათ ვახსენებთ) იმ ფაქტს, რომ სიტყვა „ღვინო“ მსოფლიოში ქართული სიტყვისგან გავრცელდა, რადგან საქართველო ღვინის სამშობლოა, სადაც 8000 წელზე უფრო ადრინდელი ყურძნის წიპწებიანი თიხის დოქებია აღმოჩენილი, რომ ჩვენთან ადამიანმა ველური ვაზი „გააკულტურულა და გააშინაურა“.

ამელის მარანი
"ამელის" მარანი

- დარწმუნებული ვარ, რომ ამ მარანში განსაკუთრებით მამაკაცებს უყვართ დაყოვნება...

 - ერთ ასეთ ამბავს გავიხსენებ, რომელიც ცნობილი ფილმის, „ღვინის ქურდების“ ეპიზოდს გაგახსენებთ. ადრე ბალტისპირეთიდან გვყავდა სტუმრები, როდესაც ყველამ დაიძინა, მარნიდან ხმაური შემომესმა. ავდექი და რას ვხედავ?- ჩვენი ერთი სტუმარი მისულია ერთ-ერთ ქვევრთან, რომელსაც შუშა აქვს გადაფარებული და მას ახლოდან აკვირდება. მივედი და ვეკითხები: რა ხდება მეთქი? ასე მიპასუხა: ვერაფრით დავიჯერე, რომ ამ ქვევრებში მართლა ღვინო გაქვთო. მე გადავწიე შუშა და ვაჩვენე. სიცილით მითხრა: გამაგებინეთ, რა გაძინებთ ზემოთ ასე მშვიდად, როდესაც აქ ამდენი ღვინოაო?

ფოტოსესია ამელში
ფოტოსესია "ამელში"

- უკვე წარმომიდგენია, როგორც მოიქცეოდით...

- იქვე დავსხედით, ქვევრიდან ღვინო ამოვიღე და დილამდე მარანში ვიყავით. დილით მისი მეგობრებიც შემოგვიერთდნენ. აქ მარტო ღვინოში არაა საქმე, მათ ჩვენგან წაღებული სითბო და იმ დღის მოგონება, დარწმუნებული ვარ, დიდხანს გაჰყვებათ. ისიც ეცოდინებათ, რომ ქართული სტუმართ-მასპინძლობის ამბავი ლეგენდა არ არის...

ამელის ეზო
"ამელის" ეზო

- თქვენთან ბევრი ცნობადი სახე ყოფილა სტუმრად...

- დიახ, გამორჩეული სტუმრებიც გვყავდა. მარტო ის რად ღირს, რომ ჩვენს როიალზე თავისი ქართული მუსიკა ააჟღერეს ისეთმა კომპოზიტორებმა, როგორებიც არიან: ვაჟა აზარაშვილი და კახა ცაბაძე, მეამაყება, რომ ისინი აქედან ნასიამოვნები წავიდნენ.

რეკვიზიტები ფოტოსესიისთვის
რეკვიზიტები ფოტოსესიისთვის

- როგორც ექიმი, შექნილ ვითარებაში რას ურჩევდით ადამიანებს?

- ძალიან მიკვირს მათი, ვისაც ამ ფონზე, რაც მსოფლიოში და კერძოდ, ჩვენთანაცაა, ჯერ კიდევ ეჭვი ეპარებათ კოვიდის არსებობაში. ყველას მინდა კიდევ ერთხელ ვურჩიო, რომ გაითვალისწინონ ჩემი კოლეგა ეპიდემიოლოგების რეკომენდაციები. ჩვენს სასტუმროშიც მათ ზედმიწევნით მკაცრად ვიცავთ. სხვაგვარად არაფერი გამოვა...

ზურან გერმანიშვილი და მისი მეუღლე, თამარ ბარამიძე
ზურან გერმანიშვილი და მისი მეუღლე, თამარ ბარამიძე

- რაიმე, განსაკუთრებული კახური რეკომენდაცია ხომ არ გაქვთ?

- რა თქმა უნდა მაქვს, პროფილაქტიკისთვის ყველას ორას გრამ წითელ ღვინოს და ნივრიან ხაშლამას ვთავაზობთ. საერთოდ კი, მე, როგორც ნეიროქირურგი გირჩევთ, გონება გაათავსუფლონ ნეგატიური აზრებისგან, ატარეთ დამცავი პირბადეები და უარი თქვით ხელოვნური, შინაგანი ნიღბებისგან, რაც ცხოვრებასა და ადამიანებთან ურთიერთობაში ხელს გიშლით...

 

2010
მოდელი სალომე ღვინიაშვილი

ზღაპრული სანაპირო და შოკოლადისფერი რუჯი: სად და როგორ ისვენებენ ქართველი სელებრითები

635
(განახლებულია 17:27 22.05.2019)
ზაფხულის დაუვიწყარი დღეებისთვის მომზადება ქართველმა ვარსკვლავებმა წინასწარ დაიწყეს. შოკოლადისფერი რუჯი და ხავერდოვანი კანი არც ერთ მათგანს არ აკლია, თუმცა ზღვის ნაპირზე ან მთაში დასვენება მეტ ენერგიას, სილაღესა და კომფორტს ჰმატებთ.

Sputnik-საქართველო მოგიყვებათ, რომელ კურორტს ან ვისთან ერთად დასვენებას მიანიჭეს უპირატესობა ქართველმა სელებრითებმა...

ყველაზე სექსუალური და წარმატებული: აირჩიეთ ქართველი მაჩო>>

ყველასათვის საყვარელმა და შეუდარებელმა მოდელმა სალომე ღვინიაშვილმა 18 მაისს 35 წლის იუბილე ფეხბურთელ მეუღლესთან ზურა ხიზანიშვილთან ერთად აღნიშნა.

წყვილმა საგაზაფხულო არდადეგები თურქეთის ხუთვარსკვლავიან სასტუმროში მოიწყო. უამრავ მილოცვასთან ერთად სალომე ღვინიაშვილის ფოტოებმა 10 000 მოწონება დაიმსახურა.

ეკო ფანგანი – ქართული ტელესივრცის ერთ-ერთი გამორჩეული სახეა. მისი თვალშისაცემი სტილი და დამახასიათებელი ხმის ტემბრი არავის ტოვებს გულგრილს. ჟურნალისტმა და ტელეწამყვანმა მეგობრებთან ერთად ქალაქ ბოდრუმს მიანიჭა უპირატესობა და მზიანი დღეების გასატარებლად სწორედ თურქეთში გაემგზავრა. 

ვიცე-მის საქართველომ, მოდელმა და ცნობილი ჟურნალისტების ქალიშვილმა ნანუკა გოგიჩაიშვილმა რომაული არა, მაგრამ ავსტრიული არდადეგები ნამდვილად მოიწყო. მოდელმა ვენაში დაუვიწყარი დღეები გაატარა. ულამაზეს ტყავის მოსასხამსა და კაბაში გამოწყობილი სელებრითი ნება-ნება მისეირნობს ევროპის განსაკუთრებულ ქალაქში.

ნოე სულაბერიძე და ჯანეტ ქერდიყოშვილი სულ ახლახან დაოჯახდნენ და ერთად მოგზაურობას არ წყვეტენ. საზოგადოებამ მათი მარშრუტი ალბათ ზეპირად იცის... მათ იტალია, ავსტრია, თურქეთი მოიარეს. ამჯერად ულამაზესი წყვილი ისევ თურქეთშია.

ამ ქართველ მსახიობს ხშირად მე-20 საუკუნის უმშვენიერეს ვარსკვლავს ოდრი ჰეპბერნს ადარებენ. ნინო გაჩეჩილაძე საზოგადოებამ ყველასათვის ცნობილი სატელევიზიო სერიალიდან „ჩემი ცოლის დაქალებიდან“ გაიცნო. მისი გმირი ჩერჩეტი და ქარაფშუტა ქალბატონი კატოა, რომელიც მუდმივად ქალური ბედნიერების ძიებაშია. ამჯერად ნინო გაჩეჩილაძე „ფორმულა კრეატივის“ შემოქმედებით ჯგუფთან ერთად ეგვიპტეში, შარმ-ელ-შეიხშია გადაღებაზე.

ქეთევან ხატიაშვილი ტანმოვარჯიშეა, საზოგადოებამ გაიცნო პროექტით „ცეკვავენ ვარსკვლავები“ და მალევე შეაყვარა ყველას თავი. მისი მეუღლე ცნობილი ქართველი მორაგბე დავით კაჭარავაა. წყვილმა მაისის არდადეგები საქართველოში, ყაზბეგის მთებში მოიწყო. ეს წყვილი თქვენ ყურადღებას აუცილებლად მიიპყრობს.

635
ნანიკო ხაზარაძე

ნანიკო ხაზარაძეს 48 წელი შეუსრულდა - როგორ მიულოცა იუბილე ერთადერთმა შვილმა დედას?

0
(განახლებულია 11:48 26.10.2020)
ცნობილი ტელეწამყვანი იუბილარია. სოციალურ ქსელში მოკრძალებული დაბადების დღიდან ემოციური კადრები ვრცელდება

ნანიკო ხაზარაძე წლებია მედიასივრცის შეუცვლელი სახეა. კარიერა იმ პერიოდში დაიწყო, როდესაც საქართველოში მასმედია განვითარების პირველ საფეხურებს გადიოდა. პოპულარული ტელეწამყვანი ბევრი ადამიანის საყვარელ ტელესახედ იქცა. რამდენიმე თვეა ნანიკო ხაზარაძე ყოველდღე „იმედის დღის“ პირდაპირი ეთერით აღარ გვესალმება, სიახლეებს არ გაგვაცნობს და საკუთარ გამოცდილებას არ გვიზიარებს. თუმცა, ტელეწამყვანმა ახალი საავტორო გადაცემა დაიწყო.

სატელევიზიო სივრცეში ძალიან საინტერესო რუბრიკა „საიმედო რეკომენდაციები“ მალევე გამოჩნდა. მისი ავტორი და წამყვანი ნანიკო ხაზარაძეა. ტელესახე მხოლოდ საინტერესო რჩევებით არ შემოიფარგლება და მაყურებელს სხვადასხვა საყოფაცხოვრებო საკითხზე საკუთარ გამოცდილებას პირდაპირ ეთერში უზიარებს. ტელეკომპანია „იმედში“ 2010 წლიდან გამოჩნდა. „დღის შოუ“ უმეტესად ცნობილი ქალბატონებით დაკომპლექტებულმა „იმედის დღემ“ ჩაანაცვლა, სადაც ნანიკო, ნიკოლოზ წულუკიძე, ეკა ამირეჯიბი, ეკო ფანგანი და სხვა ცნობილი სახეები იყვნენ წარმოდგენილი.

View this post on Instagram

48 ❣️

A post shared by ნანიკო (@naniko.khazaradze) on

48 წლის ჟურნალისტი აქტუალობას არ კარგავს. მისი ყოველდღიური ცხოვრება საკმაოდ  საინტერესო და მრავალფეროვანია. მშვენიერი ნანიკო ხაზარაძე პირად ცხოვრებას ფართო საზოგადოებას არასდროს უმალავს. ტელეეთერებში ხმამაღლა სხვადასხვა პრობლემებსა და საკუთარ გამოცდილებაზე საუბრობს. 2018 წლის ნოემბერში ნანიკო მეორედ დაქორწინდა. მისი რჩეული ლევან მათითაშვილია. ლევან მათითაშვილი ცნობილი ექიმის და უკვე ტელესახის, გადაცემა „ექიმების“ ყოფილი წამყვანის კოტე მათითაშვილის ძმაა. ძმები ერთმანეთს ძალიან ჰგვანან.

იუბილარმა დაბადების დღე მოკრძალებულად, ოჯახის წევრების გარემოცვაში აღნიშნა. მას ქალიშვილმა და ოჯახის წევრებმა საჩუქრები უსახსოვრეს. „ეს მხოლოდ ციფრებია“, - წერენ ნანიკო ხაზარაძის მეგობრები. ტელესახეს ბევრმა ცნობილმა ქართველმა მიულოცა დაბადების დღე. მათ შორის არიან პოლიტიკოსები, ტელეწამყვანები, მომღერლები და სხვა სატელევიზიო სახეები. აი, რას წერს პოპულარული ჟურნალისტი ნინო არაზაშვილი მის გვერდზე: „დღეს 28 წლის რომ გამხდარიყავი, უფრო დავიჯერებდი ისეთ „ვიდზე” ხარ, მაგრამ 30 წელზე მეტია გიცნობ და ეს ბადებს ეჭვს!“.

0
თემები:
სელებრითების ცხოვრება