გოგა ქუცნიაშვილი

ოთხდღიანი მოგზაურობა კვიპროსზე 175 ლარად - როგორ დავგეგმოთ დაბალბიუჯეტიანი მოგზაურობა

6832
(განახლებულია 17:22 21.04.2018)
ჩვენი რუბრიკის დღევანდელ სტუმარს მოგზაურობა ბავშვობიდან იზიდავდა. მისი ოცნების პროფესია კი მფრინავობა იყო, თუმცა გარკვეული მიზეზების გამო ამ პროფესიაზე უარის თქმა მოუხდა. დღეს კი ღიმილით ამბობს - „თუ ვერ ვიჯდები მფრინავის კაბინაში, დავჯდები ორი რიგით უკან, მგზავრისთვის განკუთვნილ სკამზე, რა პრობლემაა?!“.

რუბრიკა  „ცნობილების ვოიაჟი“ ჟურნალისტ გოგა ქუცნიაშვილს წარმოგიდგენთ.

გოგა ქუცნიაშვილი
გოგა ქუცნიაშვილი

— დღეებს ითვლი როდის მოვა წასვლის თარიღი, სიხარულით (თვითმფრინავის გარეშე) მიფრინავ აეროპორტში, ჯდები თვითმფრინავში, მიფრინავ სამი საათი და ეშვები სხვა ქვეყნის აეროპორტში. რაღაც უცნაური გრძნობა ტრაპზევე გეუფლება… გრძნობ, რომ არ ხარ იქ, სადაც აქამდე მთელი ცხოვრება გაატარე, ყველაფერი სხვანაირია, განსაკუთრებული და გრძნობ, რომ ახალი კარი იღება, ის კარი, რომლის დახურვასაც არც ერთი ადამიანი შემდგომ აღარ ისურვებს. მთელი ორი კვირა გაღიმებული დავდიოდი და არ მინდოდა არც ერთი ნაბიჯის გადადგმა ქუჩაში ისე, რომ გარშემო არ მეყურა და რამე გამომრჩენოდა თვალთახედვის არეალიდან.

გოგა ქუცნიაშვილი
გოგა ქუცნიაშვილი

- როგორ ფიქრობთ შეგცვალათ მოგზაურობამ?

— დიახ, რა თქმა უნდა. მოგზაურობა და საკუთარი თავის განვითარება ჯაჭვური პრინციპითაა ერთმანეთზე გადაბმული. ნახულობ ახალ ადგილებს, ეცნობი ახალ ხალხს, ზოგჯერ აკეთებ იმას, რაც შეიძლება თბილისში ვერ გააკეთო, რადგან ყოველი მესამე ადამიანი შეიძლება პოტენციურად კარის მეზობელი, ნათესავი, ნაცნობი აღმოჩნდეს. ვფიქრობ, ყოველი ახალი მოგზაურობა რაიმე სიახლის მომტანია ადამიანისთვის. რჩევას მივცემ მათ, ვისაც ძალებში დარწმუნება და საკუთარი თავისთვის გამოცდის მოწყობა უნდა — სცადეთ მოგზაურობა მარტომ — ეს ისაა, რასაც სიტყვებით ვერ ახსნი და თუ ვინმეა ნამყოფი ეულად „ტურში“ და ახლა ამ სტატიას კითხულობს, ზუსტად მიხვდება, თუ რას ვგრძნობ და რისი გადმოცემა მინდა მკითხველისთვის.

გოგა ქუცნიაშვილი
გოგა ქუცნიაშვილი

- რამდენ  ქვეყანაში ხართ ნამყოფი?

— ვარ ნამყოფი პოლონეთში, აზერბაიჯანში, სომხეთში, უკრაინაში, კვიპროსზე, თურქეთში, გერმანიაში, იტალიასა და უნგრეთში. სია გრძელი არ არის, ადგილების ამოჩემება ვიცი და ძირითადად ჩამოთვლილი ქვეყნებიდან 2-2 ჯერ მაინც ვარ ნამყოფი. მაგალითაც, სტამბოლში ოთხჯერ ვარ ნამყოფი.

- რომელ ქვეყანას, ან ქალაქს გამოარჩევდით?

— არ შემიძლია არ გამოვყო სტამბოლი. რაღაცნაირი ქალაქია უცხო, ამავე დროს ძალიან ნაცნობი. იდუმალი და თან თბილი… სიძველის სუნით გაჟღენთილი, თან თანამედროვე…

ტრამვაის ფანჯრიდან დანახული კი ორმაგად საინტერესოა… სიმართლე გითხრათ, ღირსშესანიშნაობები დიდად არც ერთ ქალაქში მხიბლავს და არ ვარ ის ადამიანი, რომელიც სტამბოლს იმიტომ ეწვევა, რომ აია-სოფია ნახოს, ბერლინში — კედელი და მილანში — დუომო. რა თქმა უნდა, როდესაც ჩასული ვარ ქალაქში მთავარ ღირსშესანიშნაობებს ვნახულობ, თუმცა ეს არ არის მთავარი, რაც მიმაჯაჭვებს ამა თუ იმ ქალაქს. არსებობს რაღაც უხილავი „ღირსშესანიშნაობა“, ქიმიას რომ ეძახიან, აი ეს ქიმია თუ არის ჩემსა და ქალაქს შორის, მას ვერასდროს ვივიწყებ.

გოგა ქუცნიაშვილი
გოგა ქუცნიაშვილი

- როგორ გეგმავთ ტურს, რომ შეღავათიანიც იყოს და ნაყოფიერიც თქვენი მოგზაურობა?

— ბიუჯეტური მოგზაურობა არც თუ ისე რთულია. თუ გეტყვით, რომ კვიპროსზე ოთხ დღიანი დასვენება მხოლოდ 175 ლარი დამიჯდა, რომელშიც ავიაბილეთი, სასტუმრო, საუზმე და სამოგზაურო დაზღვევა შედიოდა დამიჯერებთ?

ეკონომიურად მოგზაურობა რა თქმა უნდა შესაძლებელია, თუ მოვერგებით ავიაკომპანიის მიერ შემოთავაზებული იაფი ბილეთების თარიღებს. ძირითადად ქუთაისის საერთაშორისო აეროპორტია, საიდანაც საკმაოდ იაფად შეგვიძლია ვიმგზავროთ ევროპის 20-ზე მეტი მიმართულებით. ბილეთების შეძენა გამგზავრებამდე 4-6 კვირით ადრეა რეკომენდირებული, რომ ფასი შედარებით იაფი იყოს, ვიდრე გაფრენის წინა დღეს.

სასტუმროებს რაც შეეხება, www.Booking.com  ერთერთი საკმაოდ წარმატებული საიტია, სადაც მსოფლიოს ნებისმიერ წერტილში შეგიძლია იპოვო შენთვის სასურველი სასტუმრო შესაბამის ფასში. აპარტამენტების კატეგორიაში კი www.airbnb.com —ია  ლიდერი.  თუ დროს გამონახავთ და არ დაგეზარებათ მასპინძლის მოძებნა, შესაძლოა, რომ ევროპის ნებისმიერ ქალაქში უფასოდ იპოვოთ თქვენთვის სასურველი სახლი, ქოუჩსერფინგის დახმარებით.  ავტობუსისა და მატარებლის ბილეთებს კი რაც შეეხება, მე პირადად საიტ  www.goeuro.com —ს ვიყენებ. ის ცდილობს სხვადასხვა საიტიდან მოგროვილი ინფორმაცია შემოგთავაზოს ფასისა და საათების მიხედვით. არჩევანი კი უკვე შენზეა.

გოგა ქუცნიაშვილი
გოგა ქუცნიაშვილი

- მოზაურობის დროს უცნაურ ან კურიოზულ სიტუაციაში თუ ჩავარდნილხართ?

— სტამბოლში შემემთხვა საკმაოდ კურიოზული სიტუაცია. სასტუმროში როდესაც მივედი, აღმოჩნდა, რომ ჩემი ნომერი მზად იყო, თუმცა, რატომღაც სასტუმროს მფლობელმა ძილი გადაწყვიტა და ამისათვის ჩემი ნომერი აირჩია. „რისეფშენში“ ამ „დანაშაულის“ გამოსასყიდად გადაწყვიტეს, რომ სხვა ნომერში შევეყვანე, რომელიც ჯამურად დაახლოებით 200$-ით ძვირი იყო ჩემს მიერ შერჩეულ ოთახზე. თანხა, რა თქმა უნდა, არ დამამატებინეს.

სტამბოლიშივე იყო ასეთი შემთხვევა, ქუჩებში დავდიოდი ჩემთვის, ყურში ყურსასმენები მეკეთა და ძველ ქუჩაზე ჩემთვის მივბოდიალობდი. დავინახე, რომ ჩემსკენ რაღაც მოფრინავდა და ინსტიქტურად ხელი გავიშვირე. სამ წამში ჩემს ხელში კომბოსტოს ფურცელი აღმოჩნდა, შემდეგ ვიღაც კაცი მომვარდა, ამ კომბოსტოში რაღაც ჩატენა, მთლიან ტანზე ბედნიერად ლიმონი დამაწურა და მაიძულა, რომ მეჭამა. გავსინჯე, მაგრამ საკმაოდ ცუდი გემო ჰქონდა. გადაყლაპული არ მქონდა ლუკმა რომ ტელევიზია მომვარდა და მკითხა რამდენად მომეწონა ეს კერძი. უმალვე ვუპასუხე, რომ უგემრიელესი იყო. აღმოჩნდა, რომ ეს კაცი საკმაოდ ცნობილი თურქი მზარეული იყო, სიუჟეტი კი მის მიერ შექმნილ შედევრებს ეძღვნებოდა… მომდევნო დღეს მეგობარი მწერს თუქეთიდან, რომ „სი ენ ენის“ საინფორმაციო გამოშვებაში მნახა.

გოგა ქუცნიაშვილი
გოგა ქუცნიაშვილი

- გაიხსენეთ ყველაზე უცნაური კანონი ან ადათ-წესი რაც უცხო ქვეყანაში შეგხვდათ…

— ამ მხრივ იტალიას გამოვყოფდი. ვენეციაში რატომღაც ფრინველების მიმართ სიყვარულმა გაიღვიძა ჩემში (ძალიან მეშინია ფრინველების) და გადავწყვიტე მტრედებისთვის პურის ნამცეცები დამეყარა, რაც თურმე აკრძალულია. საკმაო ხანი დამჭირდა დამეჯერებინა გარშემომყოფები, რომ ამ კანონის შესახებ არაფერი ვიცი. ერთი შეხედვით საკმაოდ სულელური კანონია, თუმცა იტალიელებს ამის გამამართლებელი მიზეზიც, რა თქმა უნდა, აქვთ. როცა იკვებებიან, შემდეგ ტერიტორიას აბინძურებენ. ამიტომ იკრძალება მათი გამოკვება.

- ერთ-ერთი ჯგუფის ადმინი ხართ. რა როლს ასრულებს ეს ჯგუფი, როგორ ეხმარება მოგზაურებს?

— ვფიქრობ, რომ ჯგუფი wetravel — რჩევები მოგზაურობაზე, მოგზაურებისთვის კომპეტენტური პასუხების მიღების ერთადერთი სივრცეა. ნებისმიერი კითხვა, რომელიც მოგზაურობას უკავშირდება, ნებისმერი რჩევა თუ გამოცდილების გაზიარებაა შესაძლებელი ამ ჯგუფში. თითქოს ერთი ოჯახივითაა, სადაც ყველა მოგზაურობს და საკუთარ გამოცდილებას სხვას უზიარებს.

- ჯგუფურ მოგზაურობაზე რას გვეტყვით. რამდენად მიზანშეწონილად მიგაჩნიათ 10-ზე მეტი ადამიანის ერთად გამგზავრება უცხო ქვეყენაში. თქვენ თუ მიგიღიათ მსგავსი ტიპის მოგზაურობაში მონაწილეობა?

— იცით რა? ჩემთვის პირადად ცოტა დისკომფორტია დიდ ჯგუფთან ერთად მოგზაურობა. ვიღაცა გვიან იღვიძებს, ნელა საუზმობს, საკმარისზე მეტი ფოტოს გადაღება უყვარს და გიწევს, რომ ლოდინში გაატარო დრო, მაშინ, როდესაც ეს დრო საკმაოდ ნაყოფიერად შეგიძლია გამოიყენო. ჩემთვის ცოტა დისკომფორტია 10 ადამიანთან ერთად მოგზაურობა, თუმცა ამის გამოცდილებაც, რა თქმა უნდა, მაქვს.

გოგა ქუცნიაშვილი
გოგა ქუცნიაშვილი

- ყველაზე ხშირად რა პრობლემებს აწყდებიან მოგზაურები მოგზაურობის დროს და რა უნდა გაითვალისწინონ აუცილებლად?

— ძირითადი პრობლემები, რომელიც დღეს ტურისტებს აქვთ ვიზალიბერალიზაციის წესების შესაბამისად არ ცოდნაა  და მთავარი კითხვები, რომელზეც პასუხის გაცემა მიწევს სწორედ ვიზალიბერალიზაციას უკავშირდება. იმ ფონზე, როდესაც საკმაოდ დიდი კამპანია ჩატარდა, თუ რა არის ვიზალიბერალიზაცია, რა საბუთები გვჭირდება და როგორ უნდა გამოვიყენოთ ის სწორად, მაინც არსებობს კითხვები, რომელზეც პასუხებს ნებისმიერ დროს ვცემ. ყველას ვურჩევ, ვინც გადაწყვეტს ქვეყნიდან გასვლას ვიზალიბერალიზაციის ფარგლებში პირველად, გადახედონ აუცილებელ მოთხოვნებს, რათა საზღვარზე უსაფრთხო და შეუფერხებელი გადაადგილების საშუალება ჰქონდეთ.

- ახლა საით გაქვთ გეზი აღებული, სად გაემგზავრებით?

— ჩემი მომდევნო გაჩერება კატოვიცეა, საიდანაც ჟუშევში გადავინაცვლებ, შემდეგ კი EVS პროექტის ფარგლებში ერთი წლით ბულგარეთში დავბანაკდები. თუმცა, რასაკვირველია, ამ პერიოდის განმავლობაში უკვე მაქვს გეგმები, თუ რომელი ქალაქები უნდა მოვინახულო.

6832
ზურაბ გერმანიშვილი

მარანში ღამით შეპარული სტუმარი, კახური ღვინო და ნივრიანი ხაშლამა კოვიდისგან თავდასაცავად

2008
(განახლებულია 22:27 17.10.2020)
ოქტომბერია, გოგლა ლეონიძის სიტყვებით, “ჩამაჭრდა კახეთს ჰაერი“. ახლა იქ გზებზე ფერადი ხალიჩაა და კახური შემოდგომა თავისკენ გიხმობს...

თელავში ბევრი რამაა სანახავი, უფრო სწორედ, ხელახლა სანახავი და იქ ჩასულ სტუმრებს ამაში ცალკეული ადამიანებიც ეხმარებიან. გერმანიშვილების, პროფესიონალი ექიმების ტრადიციულ ოჯახს ყველა იცნობს. პანდემიამდე მათ არაჩვეულებრივი სასტუმრო „ამელი“ გახსნეს. იქ ჩასულები მარტო პასიურად კი არ ისვენებენ, კახური შემოდგომის ფერხულში უშუალოდაც ებმევიან.

ჯერ ორი სიტყვა მასპინძლებზე მინდა გითხრათ, ბატონი ზურაბ გერმანიშვილი გახლავთ ნეიროქირურგი, რომელიც წლებია თბილისის პირველ კლინიკურ საავადმყოფოში მუშაობს და პაციენტებში ნდობითა და პატივისცემით სარგებლობს. ასევე მისი მეუღლე, თამარ ბარამიძეც ექიმია, სამედიცინო ინსტიტუტის პროფესორი და მარდალეიშვილის კლინიკის თავ-კისრის ონკოლოგი. მათი ვაჟი, ასლანი, მამის კვალს გაჰყვა, ნეიროქირურგია და გერმანიის ერთ-ერთ კლინიკაში 13 წლის განმავლობაში მუშაობდა, ამჟამად საქართველოშია.

ზურაბ გერმანიშვილი და თამარ ბარამიძე
ზურაბ გერმანიშვილი და თამარ ბარამიძე

როგორც ექიმებმა, კარგად იციან რა არის საჭირო იმისთვის, რომ ადამიანმა ფიზიკურის გარდა, სრული ფსიქოლოგიური რელაქსი განიცადოს. საკუთარი ხელით შექმნილ ედემში საამისო ყველა პირობაა: არაჩვეულებრივი გარემო, გემოვნებით მოწყობილი ლანდშაფტი და სასტუმრო, რომელიც ყოველ სეზონზე, იქ ჩასულებს, ახალ-ახალ სიურპრიზებს სთავაზობს. სასტუროს ხშირად სტუმრობდნენ უცხოელი ტურისტები და საქართველოს სხვადასხვა კუთხიდან ჩამოსულები, მათ შორის, ბევრი ცნობადი სახეც იყო. დანარჩენს თავად ბატონი ზურაბი გვეტყვის.

სტუმრები ისრაელიდან
სტუმრები ისრაელიდან

- ბატონო ზურაბ, შემოდგომა განსაკუთრებით აქტიურია თქვენთან...

- კოვიდამდე წელიწადის არც ერთ სეზონზე არ ვუჩიოდით სტუმრების ნაკლებობას და ყველა საჭირო პირობის დაცვით, მათ ახლაც ვმასპინძლებთ. ისევე ყოველ ოქტომბერს, ახლაც, 20 ოქტომბრიდან ჩვენთან მასტერ-კლასები დაიწყება. ეს იქნება სასიამოვნო პროცესი, რომლის დროსაც ჩვენთან მოსული სტუმარი ისწავლის: ჩურჩხლის ამოვლებას, პურის ცხობას, მწვადის შეწვას, ხინკლის მოხვევას. რა თქმა უნდა, მათ საშუალება ექნებათ, რომ ჩვენს მიერ დაწურული არაჩვეულებრივი საფერავი და გამოხდილი ჭაჭა დააგემოვნონ. მოკლედ ეს იქნება სახალისო და ამასთან, შემეცნებითი ფორმის დასვენება, რომელიც დაუვიწყარ მოგონებას აჩუქებს. ჩვენ გვინდა სულ სხვა თვალით დანახული თელავი დაგამახსოვროთ.

სტუმრები თონეში პურს აკრავენ
სტუმრები თონეში პურს აკრავენ

- თქვენი კრეატივი, „ფოტოსესია წარსულში“ რას გულისმობს?

- მოგეხსენებათ, როგორი აქტუალურია ფოტო-სესიის მოწყობა, რომლისთვისაც სხვადასხვა საინტერესო გარემოს ეძებენ. მე ვფიქრობ, რომ ის, რასაც ჩვენ ვთავაზობთ ნებისმიერი ასაკის სტუმრისთვის სახალისო იქნება. ჩვენთან შეიძლება ფოტოების გადაღება ძველ, რეტრო გარემოში და ამასთან ქართული ნაციონალური სამოსით. კარგად იცით, რომ ეროვნული ტანსაცმელი ეთნიკური კუთხეების მიხედვით როგორი მრავალფეროვნებით გამოირჩევა. მანდილოსნებისთვის გვაქვს ტრადიციული გრძელი კაბები და თავსაბურავები, მამაკაცებისთვის კი- ჩოხა-ახალუხი, გვაქვს ასევე ძველი ქალაქური სამოსიც, მოკლედ არჩევანი თქვენზეა.

ფოტოსესია
ფოტოსესია

-თქვენთან არის თონე, სადაც ნებისმიერ მსურველს შეუძლია საკუთარი ხელით ჩაკრული პური დააგემოვნოს...

- დიახ, თონეც გვაქვს. თავიდან უფრთხიან ხოლმე თონეში პურის ჩაკვრას, მაგრამ უკვე მეორე მცდელობაზე ვატყობთ, რომ ამას სიამოვნებით აკეთებენ. რა ჯობია თონეში საკუთარი ხელით ჩაკრულ პურს?

ეზოში მოწყობილი თონე
ეზოში მოწყობილი თონე

- აქ გაქვთ მარანი, სადაც ვფიქრობ, განსაკუთრებით უცხოელი სტუმრებისთვის, ბევრი გექნებათ სათქმელი...

- ჩვენთან მოსული უცხოელი სტუმრები სიამოვნებით აგემოვნებენ ქვევრის ღვინოს, აქვე, რა თქმა უნდა, მათ ქართული სუფრის ტრადიციაზე ვესაუბრებით, მოგვიანებით კი, ყველაფერს უკვე თვალნათლივ ვაჩვენებთ. განსაკუთრებული ხაზგასმით ვეუბნებით (ვინც იცის, მათ ვახსენებთ) იმ ფაქტს, რომ სიტყვა „ღვინო“ მსოფლიოში ქართული სიტყვისგან გავრცელდა, რადგან საქართველო ღვინის სამშობლოა, სადაც 8000 წელზე უფრო ადრინდელი ყურძნის წიპწებიანი თიხის დოქებია აღმოჩენილი, რომ ჩვენთან ადამიანმა ველური ვაზი „გააკულტურულა და გააშინაურა“.

ამელის მარანი
"ამელის" მარანი

- დარწმუნებული ვარ, რომ ამ მარანში განსაკუთრებით მამაკაცებს უყვართ დაყოვნება...

 - ერთ ასეთ ამბავს გავიხსენებ, რომელიც ცნობილი ფილმის, „ღვინის ქურდების“ ეპიზოდს გაგახსენებთ. ადრე ბალტისპირეთიდან გვყავდა სტუმრები, როდესაც ყველამ დაიძინა, მარნიდან ხმაური შემომესმა. ავდექი და რას ვხედავ?- ჩვენი ერთი სტუმარი მისულია ერთ-ერთ ქვევრთან, რომელსაც შუშა აქვს გადაფარებული და მას ახლოდან აკვირდება. მივედი და ვეკითხები: რა ხდება მეთქი? ასე მიპასუხა: ვერაფრით დავიჯერე, რომ ამ ქვევრებში მართლა ღვინო გაქვთო. მე გადავწიე შუშა და ვაჩვენე. სიცილით მითხრა: გამაგებინეთ, რა გაძინებთ ზემოთ ასე მშვიდად, როდესაც აქ ამდენი ღვინოაო?

ფოტოსესია ამელში
ფოტოსესია "ამელში"

- უკვე წარმომიდგენია, როგორც მოიქცეოდით...

- იქვე დავსხედით, ქვევრიდან ღვინო ამოვიღე და დილამდე მარანში ვიყავით. დილით მისი მეგობრებიც შემოგვიერთდნენ. აქ მარტო ღვინოში არაა საქმე, მათ ჩვენგან წაღებული სითბო და იმ დღის მოგონება, დარწმუნებული ვარ, დიდხანს გაჰყვებათ. ისიც ეცოდინებათ, რომ ქართული სტუმართ-მასპინძლობის ამბავი ლეგენდა არ არის...

ამელის ეზო
"ამელის" ეზო

- თქვენთან ბევრი ცნობადი სახე ყოფილა სტუმრად...

- დიახ, გამორჩეული სტუმრებიც გვყავდა. მარტო ის რად ღირს, რომ ჩვენს როიალზე თავისი ქართული მუსიკა ააჟღერეს ისეთმა კომპოზიტორებმა, როგორებიც არიან: ვაჟა აზარაშვილი და კახა ცაბაძე, მეამაყება, რომ ისინი აქედან ნასიამოვნები წავიდნენ.

რეკვიზიტები ფოტოსესიისთვის
რეკვიზიტები ფოტოსესიისთვის

- როგორც ექიმი, შექნილ ვითარებაში რას ურჩევდით ადამიანებს?

- ძალიან მიკვირს მათი, ვისაც ამ ფონზე, რაც მსოფლიოში და კერძოდ, ჩვენთანაცაა, ჯერ კიდევ ეჭვი ეპარებათ კოვიდის არსებობაში. ყველას მინდა კიდევ ერთხელ ვურჩიო, რომ გაითვალისწინონ ჩემი კოლეგა ეპიდემიოლოგების რეკომენდაციები. ჩვენს სასტუმროშიც მათ ზედმიწევნით მკაცრად ვიცავთ. სხვაგვარად არაფერი გამოვა...

ზურან გერმანიშვილი და მისი მეუღლე, თამარ ბარამიძე
ზურან გერმანიშვილი და მისი მეუღლე, თამარ ბარამიძე

- რაიმე, განსაკუთრებული კახური რეკომენდაცია ხომ არ გაქვთ?

- რა თქმა უნდა მაქვს, პროფილაქტიკისთვის ყველას ორას გრამ წითელ ღვინოს და ნივრიან ხაშლამას ვთავაზობთ. საერთოდ კი, მე, როგორც ნეიროქირურგი გირჩევთ, გონება გაათავსუფლონ ნეგატიური აზრებისგან, ატარეთ დამცავი პირბადეები და უარი თქვით ხელოვნური, შინაგანი ნიღბებისგან, რაც ცხოვრებასა და ადამიანებთან ურთიერთობაში ხელს გიშლით...

 

2008
მოდელი სალომე ღვინიაშვილი

ზღაპრული სანაპირო და შოკოლადისფერი რუჯი: სად და როგორ ისვენებენ ქართველი სელებრითები

635
(განახლებულია 17:27 22.05.2019)
ზაფხულის დაუვიწყარი დღეებისთვის მომზადება ქართველმა ვარსკვლავებმა წინასწარ დაიწყეს. შოკოლადისფერი რუჯი და ხავერდოვანი კანი არც ერთ მათგანს არ აკლია, თუმცა ზღვის ნაპირზე ან მთაში დასვენება მეტ ენერგიას, სილაღესა და კომფორტს ჰმატებთ.

Sputnik-საქართველო მოგიყვებათ, რომელ კურორტს ან ვისთან ერთად დასვენებას მიანიჭეს უპირატესობა ქართველმა სელებრითებმა...

ყველაზე სექსუალური და წარმატებული: აირჩიეთ ქართველი მაჩო>>

ყველასათვის საყვარელმა და შეუდარებელმა მოდელმა სალომე ღვინიაშვილმა 18 მაისს 35 წლის იუბილე ფეხბურთელ მეუღლესთან ზურა ხიზანიშვილთან ერთად აღნიშნა.

წყვილმა საგაზაფხულო არდადეგები თურქეთის ხუთვარსკვლავიან სასტუმროში მოიწყო. უამრავ მილოცვასთან ერთად სალომე ღვინიაშვილის ფოტოებმა 10 000 მოწონება დაიმსახურა.

ეკო ფანგანი – ქართული ტელესივრცის ერთ-ერთი გამორჩეული სახეა. მისი თვალშისაცემი სტილი და დამახასიათებელი ხმის ტემბრი არავის ტოვებს გულგრილს. ჟურნალისტმა და ტელეწამყვანმა მეგობრებთან ერთად ქალაქ ბოდრუმს მიანიჭა უპირატესობა და მზიანი დღეების გასატარებლად სწორედ თურქეთში გაემგზავრა. 

ვიცე-მის საქართველომ, მოდელმა და ცნობილი ჟურნალისტების ქალიშვილმა ნანუკა გოგიჩაიშვილმა რომაული არა, მაგრამ ავსტრიული არდადეგები ნამდვილად მოიწყო. მოდელმა ვენაში დაუვიწყარი დღეები გაატარა. ულამაზეს ტყავის მოსასხამსა და კაბაში გამოწყობილი სელებრითი ნება-ნება მისეირნობს ევროპის განსაკუთრებულ ქალაქში.

ნოე სულაბერიძე და ჯანეტ ქერდიყოშვილი სულ ახლახან დაოჯახდნენ და ერთად მოგზაურობას არ წყვეტენ. საზოგადოებამ მათი მარშრუტი ალბათ ზეპირად იცის... მათ იტალია, ავსტრია, თურქეთი მოიარეს. ამჯერად ულამაზესი წყვილი ისევ თურქეთშია.

ამ ქართველ მსახიობს ხშირად მე-20 საუკუნის უმშვენიერეს ვარსკვლავს ოდრი ჰეპბერნს ადარებენ. ნინო გაჩეჩილაძე საზოგადოებამ ყველასათვის ცნობილი სატელევიზიო სერიალიდან „ჩემი ცოლის დაქალებიდან“ გაიცნო. მისი გმირი ჩერჩეტი და ქარაფშუტა ქალბატონი კატოა, რომელიც მუდმივად ქალური ბედნიერების ძიებაშია. ამჯერად ნინო გაჩეჩილაძე „ფორმულა კრეატივის“ შემოქმედებით ჯგუფთან ერთად ეგვიპტეში, შარმ-ელ-შეიხშია გადაღებაზე.

ქეთევან ხატიაშვილი ტანმოვარჯიშეა, საზოგადოებამ გაიცნო პროექტით „ცეკვავენ ვარსკვლავები“ და მალევე შეაყვარა ყველას თავი. მისი მეუღლე ცნობილი ქართველი მორაგბე დავით კაჭარავაა. წყვილმა მაისის არდადეგები საქართველოში, ყაზბეგის მთებში მოიწყო. ეს წყვილი თქვენ ყურადღებას აუცილებლად მიიპყრობს.

635
საბადურის

კვირის ასტროპროგნოზი: სიყვარული, ფინანსები, სამუშაო 25 ოქტომბერი - 1 ნოემბერი

0
(განახლებულია 12:11 25.10.2020)
როგორი იქნება ეს კვირა ზოდიაქოს ნიშნების წარმომადგენლებისთვის, როგორ მივაღწიოთ წარმატებებს, როგორ ავარიდოთ თავი განსაცდელს – ყოველივე ამის შესახებ ასტროლოგები გვიამბობენ.

ვარსკვლავების განწყობა ამ კვირაში ცვალებადი იქნება, თუმცა ერთი რამის თქმა მაინც შეიძლება – კვირის მეორე ნახევარი პირველზე გაცილებით პოზიტიური იქნება.

ვერძი

ამ კვირაში სიბრძნე და ძალა მოგემატებათ. ამისთვის უნდა მისდიოთ სასარგებლო რჩევებს, ასევე ენდოთ ინტუიციას, რომელიც ახლა სათანადო სიმაღლეზეა. ასტროლოგები გირჩევენ, შეაკავოთ ნეგატიური ემოციები და გამოხატოთ პოზიტიური. აჩვენეთ სიყვარული ახლობლებს და თავი შეიკავეთ, თუ ვინმე სკანდალის პროვოცირებას შეეცდება.

როგორი დასვენება უყვართ ზოდიაქოს ნიშნებს>>

კვირის მეორე ნახევარი იდეალურია იმიჯის შეცვლისთვის. ეს განსაკუთრებით წაადგება მათ, ვინც სამუშაოს ეძებს. ძალზე მნიშვნელოვანია, რომ ყურადღება მიაქციოთ ჯანმრთელობას და არ გადაიღალოთ.

კურო

კვირის დასაწყისი მერკურისა და მზის ძალაუფლების ქვეშ იქნება. კუროებს ცხოვრებაში არცთუ სასიამოვნო ცვლილებები გელოდებათ. შესუსტებული იქნება საინფორმაციო ნაკადები, ამიტომ ექსპერტები გირჩევენ, სიმართლე და სიცრუე ერთმანეთისგან განაცალკევოთ. კვირის პირველ დღეებში მატყუარა და ანგარებიანი ადამიანები გააქტიურდებიან – არ აიღოთ მათგან მაგალითი.

28 ოქტომბრიდან ძალზე ხელსაყრელი პერიოდი დადგება, როდესაც გაგიმართლებთ სიყვარულშიცა და საქმიანობაშიც.  ამისთვის კი აუცილებელია, რომ იზრუნოთ ჯანმრთელობასა და ენერგეტიკაზე. წაგადგებათ მოძრაობა, სეირნობა, სპორტი. კვირის ბოლო ასევე კარგი დროა მოგზაურობისთვის, მივლინებებისთვის.

ტყუპი

26 და 27 ოქტომბერი შეიძლება ნეგატიური ენერგიით იყოს დატვირთული. ეცადეთ, გონება უარყოფითი აზრებისგან გაწმინდოთ. ოთხშაბათიდან ვითარება მკვეთრად შეიცვლება. სამუშაო კვირის ბოლო ნებისმიერი პროფესიის წარმომადგენლებისთვის ძალზე პროდუქტიული იქნება.

იდეალური ქვეყანა ზოდიაქოს თითოეული ნიშნისთვის>>

ოთხშაბათიდან შაბათის ჩათვლით ვარსკვლავები და პლანეტები დიდ იღბლიანობასა და პოზიტივს მოიტანენ. შეგიძლიათ ახალი საქმეების დაწყება, რამე მნიშვნელოვანსა და საპასუხისმგებლოზე შეჭიდება, შესაძლებელია ფულის გამომუშავება და მისი გონივრულად დახარჯვა.

კირჩხიბი

ბედნიერება მხოლოდ ის არაა, როცა რაღაცას ვიღებთ, არამედ ისიც, როდესაც ვიწმინდებით არასაჭირო და ტოქსიკურისგან. მაგალითად, უნდა გათავისუფლდეთ წუწუნის, ყველაფრის სხვებისთვის დაბრალების  ჩვევისგან, ნეგატიური აზროვნებისგან, საკუთარი თავის მართლების, შიშების, ჭორებისგან და ასევე სიყვარულზე „ნარკოტიკული“ დამოკიდებულებისგან. ამ ყველაფრისთვის ეს იდეალური კვირაა.

არ არის გამორიცხული, რომ რაღაც მნიშვნელოვანი საიდუმლო შეიტყოთ, რომელიც დიდი ხანი დამალული იყო. ღამის მანათობლები ასევე დაგეხმარებიანსხვადასხვა ნივთის შეძენაში, მნიშვნელოვანი გარიგებების დადებაში, იურიდიული პრობლემების გადაჭრაში. კვირის მიწურულს გამძაფრდება ურთიერთობებისა და რომანტიკის მოთხოვნილება.

ლომი

ლომები ყველანაირად უნდა ეცადოთ, რომ ნეგატიურ ადამიანებს მოერიდოთ. მათ შეუძლიათ, უარყოფითი ენერგიით დაგმუხტონ და თან – გაუცნობიერებლად, არა სპეციალურად. მარტოხელა ლომებს ექსპერტები გირჩევენ, რომანტიკასა და ახალი ნაცნობობების ძიებას სწავლა და ახალი უნარების გამომუშავება ამჯობინოთ, მით უმეტეს, რომ თქვენი მეხსიერება და ყურადღება უფრო გამახვილდება.

სად იმალება ზოდიაქოს თითოეული ნიშნის ბედნიერების საიდუმლო>>

ინტელექტუალური სამუშაო შესანაშნავად შესრულდება, მაგრამ მგზავრობა და მივლინებები, სჯობს, გადადოთ, აუცილებლობის შემთხვევაში კი გზისთვის დიდი ყურადღებით გაემზადეთ და იფრთხილეთ.

ქალწული

ქალწულებმა ენერგია, სჯობს, სამუშაოზე, ბიზნესსა და ფინანსურ საკითხებზე დახარჯოთ. მოსალოდნელია პროდუქტიულობის ზრდა, გაგიმართლებთ სამუშაო სფეროში. გააქტიურება ასევე საჭიროა სიყვარულშიც. არაა გამორიცხული, რომ შეხვდეთ სასიამოვნო ადამიანს, რომელიც მომავალში, შესაძლოა, თქვენი მეორე ნახევარი ან კარგი მეგობარი გახდეს.

უპრიანია, კვირა სახლის საფუძვლიანი დალაგებითა და მოწესრიგებით დაიწყოთ. გათავისუფლდით და გადაყარეთ უსარგებლო და ძველი ნივთები – მათ თქვენი უარყოფითი ენერგიით დამუხტვა შეუძლიათ. შეამოწმეთ ფინანსები, შეადგინეთ საყიდლების სია, გეგმა. ასევე მნიშვნელოვანია, რომ მეტი დრო დაუთმოთ ოჯახის წევრებსა და ნათესავებს.

სასწორი

სასწორებისთვის კვირის პირველი ორი დღე შეიძლება ძალზე ნერვული აღმოჩნდეს, რადგან ვარსკვლავები და პლანეტები დისონანსში იქნებიან. კარგი პერიოდია ნათესავებთან დაახლოების, რემონტის ან ერთობლივი საქმეების დაწყებისთვის. შეიძლება შოპინგი, საჩუქრების გაკეთება საყვარელი ადამიანებისთვის.

ზოდიაქოს ნიშნები, რომლებსაც განსაკუთრებული მისია აკისრიათ>>

უქმეებზე ასტროლოგები კარგად დასვენებასა და გართობას გირჩევენ. ამასთან, გაფრთხილებენ, რომ მოერიდოთ ზედმეტ აზარტსა და რისკს. ვარსკვლავები მოტივაციით დაგასაჩუქრებენ, დაგეხმარებიან ახალი ცოდნისა და სურვილების წყაროს პოვნაში. შემოქმედებითი პროფესიების წარმომადგენლებს 28 ოქტომბრიდან დიდი შთაგონება გელოდებათ.

მორიელი

ასტროლოგები გირჩევენ, შურის გრძნობას შეებრძოლოთ. ეს გრძნობა თქვენთვის დამანგრეველია განსაკუთრებით ამ კვირაში. მან შეიძლება გავლენა მოახდინოს თქვენს სამუშაო გეგმაზე, ჯანმრთელობაზე. სამუშაო სფეროში წესიერება და პატიოსნება დაგჭირდებათ – ამ ორი თვისების წყალობით წარმატებებს უფრო მალე მიაღწევთ.

სხვების წარმატებებს ყურადღებას ნუ მიაქციევთ, არამედ მთელი ყურადღება საკუთარ მიღწევებზე გაამახვილეთ. ვარსკვლავები დაგეხმარებიან შრომისმოყვარეობის გაძლიერებაში, განამტკიცებენ თქვენს ჯანმრთელობასა და მორალურ სულს. ასევე ექსპერტების რჩევაა, რომ წარსულში არ გაიხედოთ, მზერა მომავლისკენ მიმართეთ და იზრუნეთ აწმყოზე. არ ღირს საკუთარი თავის კრიტიკა და დასჯა წარსულის შეცდომების გამო.

მშვილდოსანი

მშვილდოსნებისთვის დგება იმის დრო, რომ თავი მიუძღვნათ სიყვარულს, ოჯახსა და მეგობრებს. ახლობელ ადამიანებთან ურთიერთობები აამაღლებს თქვენს ენერგეტიკას და მოგმატებთ იღბალს. ახლობლებზე ზრუნვა აწმყოსა და მომავალში მათი მხრიდან დახმარების გარანტი იქნება.

ზოდიაქოს ხუთი ყველაზე კაშკაშა ნიშანი, რომელთა შეყვარება ძალიან ადვილია>>

რაც შეეხება ფინანსურ სფეროს, აქ მშვილდოსნებს ყველა მიმართულებით გაგიმართლებთ. შესაძლებელია შემოსავლების გაზრდა, შემოსავლების მიღების ახალი წყაროების მოძებნა და პოვნა, ფულის სწორად დახარჯვა. შოპინგი განწყობის ამაღლებასა და პოზიტიური ენერგიით დამუხტვაში დაგეხმარებათ.

თხის რქა

ამ კვირაში წაგადგებათ ახალი შეხვედრები, ნაცნობობა, ურთიერთობები. არ ღირს საკუთარ თავში ჩაკეტვა. მოუსმინეთ გარშემომყოფების რჩევებს, განსაკუთრებით 28 ოქტომბრის შემდეგ. კვირის პირველ ორ დღეს არის რისკი იმისა, რომ სამუშაოსა და ბიზნესში მძლავ დაპირისპირებას შეეჯახოთ. არ არის გამორიცხული, რომ გააქტიურდნენ მტრები და არაკეთილმოსურნეები.

კოლეგებთან, პარტნიორებთან ან კლიენტებთან მეტი მოქნილობა გმართებთ. თხის რქები ბრძენ ნიშანთა რიცხვს განეკუთვნებით, მაგრამ პირველ ორ დღეს მაინც შეიძლება ადვილად გაანაწყენოთ ვინმე. თუ გარშემომყოფები თავიანთი პირობების კარნახს შეეცდებიან, დათმობაზე წასვლა თქვენს საზიანოდ არ ღირს. ექსპერტები ასევე ვარაუდობენ, რომ შესაძლებელია გაუთვალისწინებელი ხარჯები.

მერწყული

როგორც ეზოთერიკოსები ამბობენ, სწორად შერჩეული სიტყვები იღბლიანობას ზრდის. მიზიდულობის კანონი ნამდვილად მუშაობს, ამიტომ სჯობს, ჯერ დაფიქრდეთ და შემდეგ ილაპარაკოთ პოზიტიურ რამეებზე, მეტად გწამდეთ საკუთარი თავის და არ დაიწყოთ ურთიერთობების გამორკვევა მეორე ნახევართან. ჩხუბი და ნეგატივი პრობლემების პროვოცირებას მოაწყობს სხვა სფეროებშიც.

ზოდიაქოს ნიშნები, რომლებსაც ერთი ნახვით უყვარდებათ>>

მარტოხელა მერწყულებმა, სჯობს, შეაჩეროთ პარტნიორის ძებნის პროცესი და სამუშაოზე გადაერთოთ. განსაკუთრებული ყურადღება უნდა დაუთმოთ საოჯახო საქმეებსაც. წაგადგებათ გარეგნობის შეცვლა, გარდერობის განახლება. უქმეებზე კი კარგი იქნება გართობა.

თევზები

თევზებისთვის ძალზე წარმატებული და პოზიტიური კვირაა. შეგიძლიათ ახალი ცხოვრების დაწყება, რომელიც ბედნიერებამდე მიგიყვანთ. კარგად აეწყობა ახალი საქმეები, ახალი სამსახურის ძებნა, საყვარელი ადამიანის პოვნის პროცესი. ექსპერტების რჩევაა, გააქტიურდეთ სოციალურ ქსელებში.

ასტროლოგები ასევე გირჩევენ, გაწმინდოთ საინფორმაციო ველი. წაშალეთ არასაჭირო კონტაქტები ტელეფონიდან, სოციალური ქსელებიდან. ახლა ენერგეტიკული აღმავლობის გზაზე ხართ. გეყოფათ ძალა, რომ მთები გადადგათ. ძალზე მნიშვნელოვანია, რომ პოზიტიური განწყობა გარშემომყოფებს გაუზიაროთ.

0