ბადრი ვადაჭკორია

ფოტოებზე აღბეჭდილი სხვა სამყარო და ბადრი ვადაჭკორიას თვალით დანახული მსოფლიო

266
(განახლებულია 14:23 04.11.2017)
ჟურნალისტი, ფოტოგრაფი, დიპლომატი და მოგზაური ბადრი ვადაჭკორია „Sputnik საქართველოს“ მოგზაურობის დროს განცდილ შთაბეჭდილებებზე ესაუბრა. რაოდენ გასაკვირიც არ უნდა იყოს, ბატონი ბადრი ასზე მეტ ქვეყანაშია ნამყოფია და თითოეულ მათგანს სიამოვნებით იხსენებს.

ემოცია, ალბათ ყველაზე კარგი გასაღებია, რომელიც შეიძლება ცხოვრებას მოარგო. სწორედ ამ ემოციას უნაწილებს ბატონი ბადრი ადამიანებს, ემოციას, რომელიც თავად განიცადა ამა თუ ქვეყანაში ყოფნის დროს და კადრზე აღბეჭდა საუცხოო ადგილები. უყურებ მის გადაღებულ ფოტოებს და თითქოს იქ ხარ, მაროკოში, ევერესტზე, ბელგიაში, ფერეიდანში, ირანში… ფოტოებზე ბატონმა ბადრიმ სულ სხვა მსოფლიო აღმოაჩინა.

ბადრი ვადაჭკორია
Photo: Courtesy of Badri Vadachkoria
ბადრი ვადაჭკორია

— ხშირად ვმოგზაურობ, მაგრამ არა ისე ხშირად, როგორც მე მინდა. ვცდილობ მაქსიმალურად მეტი ქვეყანა ვნახო. რა  თქმა უნდა არა მარტო უცხოეთში, არამედ პირველ რიგში საქართველოში.

- მაშინ საქართველოზე საუბრით დავიწყოთ ჩვენი ინტერვიუ. შეიძლება ცოტა ბანალური კითხვაა, მაგრამ მაინც გკითხავთ. საქართველოს რომელ კუთხეს გამოარჩევდით?

— ამ კითხვაზე შემიძლია დიპლომატიურად გიპასუხოთ, რომ საქართველოს ყველა კუთხე თავისებურად ლამაზია, თუმცა გეტყვით, რომ განსაკუთრებულად მომწონს თუშეთი, თავისი სილბოთი და არაჩვეულებრივი ბუნებით.  მოხდა ისე, რომ თუშეთში ნამყოფი ვიყავი რამდენჯერმე შვეულმფრენით. პირველად 1014 წელს წავედი მანქანით. საოცარი სილამაზე გადაიშალა ჩემს თვალწინ და იმდენად მოვიხიბლე, ყოველ 50 მეტრში ვაჩერებდი მანქანას.

სუმელას მონასტერი, თურქეთი
Photo: Courtesy of Badri Vadachkoria
სუმელას მონასტერი, თურქეთი

- ექსტრემალურ სიტუაციებში თუ გიმოგზაურიათ?

— კი იყო ასეთი შემთხვევებიც. დაახლოებით ორი წლის წინ მივდიოდი ხევსურეთში. სანამ სოფელ როშკას მიუახლოვდებით, ჩამოდის როშკის წყალი. არაჩვეულებრივი ადგილია და იქ ჩავირბინე. თურმე იქ ყოფილა ჭაობი. ჩავვარდი ამ ჭაობში ისე, რომ დავეჯახე ლოდს და მოვიტეხე მხარი.

- ამ დროს მარტო იყავით?

— მეგობრები ზემოთ იყვნენ, ქვევით მე ვიყავი მარტო. ვინ იცის კიდევ რამდენჯერ ჩამოვვარდნილვარ დაბლა, მაგრამ ღვთის წყალობით ყოველთვის მშვიდობიანად დამთავრებულა.

სასტუმრო Winter Palace, საფრანგეთი
Photo: Courtesy of Badri Vadachkoria
სასტუმრო Winter Palace, საფრანგეთი

- თუ არსებობს ფოტო, რომელიც განსაკუთრებული, საამაყო და ძალიან მნიშვნელოვანია თქვენთვის?

— ძნელია ერთი ფოტოს გამოყოფა, ბევრია ასეთი. მიუხედავად იმისა, რომ საქართველო მეტნაკლებად შემოვლილი მაქვს, სულ რამდენიმე დღის წინ აღმოვაჩინე სოფელ საროში,(არმისული ვარძიამდე) მე-7 საუკუნის ძეგლი, ულამაზესი ტაძარი. როგორც ჩანს მის გარშემო იყო ციხესიმაგრეები, რომლის ასაკი დაახლოებით 4000 წელია. ამ ტაძრის გადაღება ძალიან სასიამოვნო და საამაყო იყო ჩემთვის.

რაც შეეხება საზღვარგარეთ,  გადაღებულ ფოტოებს, თვითმფრინავიდან გადავიღე ფოტო, სადაც „ევერესტი“, მსოფლიოს ყველაზე მაღალი მწვერვალი ჩემს ქვემოთაა… არა მგონია ძალიან ბევრმა დაიტრაბახოს, რომ მსგავსი რაკურსით ეხილოს „ჯომოლუნგმა“. ეს იყო არაჩვეულებრივი შეგრძნება, ვერასოდეს ვერ ვიოცნებებდი, რომ ზემოდან დამენახა როგორია ევერესტი.

ევერესტი
Photo: Courtesy of Badri Vadachkoria
ევერესტი

- არის საქართველოში ადგილი რაც ჯერ არ გადაგიღიათ?

— მყინვარწვერზე მინდა ასვლა, მაგრამ უკვე დაგვიანებულია, ფეხით ვეღარ ავალ იქ. სამეგრელოში არის ტბების მთელი სერია და ძალიან მინდა მათი გადაღება. ჯერჯერობით ვერ მოვახერხე იქ წასვლა.

- რაც შეეხება უცხოეთში მოგზაურობას, პირველად როდის გადაკვეთეთ საქართველოს საზღვარი?

— ჩემთვის პირველი მოგზაურობა იყო 1988 წელს იუგოსლავიაში. ეს იყო ყველა საბჭოელისთვის საოცნებო ქვეყანა, რადგან ის ნახევრად კაპიტალისტური ქვეყანა იყო. ეხლაც სასიამოვნოდ მახსენდება იუგოსლავია, რომელიც მთლიანი, ძლიერი სახელმწიფო იყო თავისი შემადგენელი, ულამაზესი რესპუბლიკებით.

ეგვიპტე, ეკატერინეს ტაძარი
Photo: Courtesy of Badri Vadachkoria
ეგვიპტე, ეკატერინეს ტაძარი

- ამის შემდეგ რამდენ ქვეყანაში იმოგზაურეთ?

— დღემდე ასზე მეტ ქვეყანაში ვარ ნამყოფი.

- რა ტიპის ქვეყნებმა მოახდინა თქვენზე განსაკუთრებული შთაბეჭდილება?

— ძალიან მომწონს აზიური ქვეყნები. გვინდა არ გვინდა ჩვენ შედარებით ევროპულ ყოფაში ვართ. ჩემთვის აღმოსავლური, ეგზოტიკური ცხოვრების წესი, კულტურა ძალიან საინტერესოა.

უზარმაზარი და ულამაზესი ქვეყანაა ჩინეთი. განსაკუთრებული და საოცრად საინტერესოა პეტრა, იორდანია. მუსულმანური ქვეყანაა, მაგრამ თავისუფალი ქვეყანაა. ჩაცმულობას და მსგავს საკითხებს მნიშვნელობას არ ანიჭებენ. იმ ადგილებს შორის, რაც კი მინახავს ეს არის ყველაზე საოცარი ადგილი.

ფერეიდნელი ქართველები ეროვნული ქართული სამოსით
Photo: Courtesy of Badri Vadachkoria
ფერეიდნელი ქართველები ეროვნული ქართული სამოსით

უმნიშვნელოვანესი იყო ჩემი მოგზაურობა ფერეიდანში. ჩვენთვის ძალიან ღირებული და მნიშვნელოვანია იქ მცხოვრები ქართველები, როგორ საოცრად შემოიხანეს ქართული ადათ წესი, ენა, ტრადიციები. არ მეგონა თუ ჩემს ცხოვრებაში ამდენ ატირებულ ადამიანს ვნახავდი ერთად, რა თქმა უნდა ჩემი თავის ჩათვლით. უნდა გენახათ როგორ გვეხვეოდნენ, რამხელა სითბო და სიყვარული მოდიოდა მათგან. ერთადერთი შემთხვევა იყო, რომ არ მრცხვენოდა და მოთქმით ვტიროდი.

ნიანგები
Photo: Courtesy of Badri Vadachkoria
ნიანგები

- აღმოსავლეთის ქვეყნებში ყველაზე უცნაური კანონი, ან ტრადიცია რა შეგხვედრიათ?

— ირანში არის ძალიან ბევრი შეზღუდვები, რომელსაც უნდა გაეცნო წინასწარ, მითუმეტეს, როცა ფოტო აპარატით ხარ. არ უნდა გადაიღო პოლიციელი, ჯარისკაცი, ისეთი დაწესებულებები, თუ არ იცი რა არის იქ განთავსებული და ა.შ. სასურველია, რომ ამ დროს გახლდეს ვინმე, ვინც კარგად იცნობს ქალაქს.

- მეგაპოლისები თუ გიზიდავთ?

— საერთოდ დიდი ქალაქები არ მიყვარს. მეგაპოლისებზე მეტად მიყვარს პატარა ქალაქები. სულ სხვა ხიბლი, ინტიმურობა, სიმყუდროვის შეგრძნება აქვთ მათ. გერმანიაში ძალიან ბევრია პატარა და ლამაზი ქალაქები, სოფლები, ასევე იტალიაში.

ქალაქი რიკვირი, საფრანგეთი
Photo: Courtesy of Badri Vadachkoria
ქალაქი რიკვირი, საფრანგეთი

საქართველო ყველაზე პატარა ქვეყანაა ამ ქვეყნებს შორი, რაზეც აქამდე ვისაუბრე, მაგრამ არის ყველაზე მრავალფეროვანი. ერთ ციცქნა მიწაზე თავმოყრილია მთაც, ზღვაც, მდინარეც, უდაბნოც და ა.შ.

პეტრა, იორდანია
Photo: Courtesy of Badri Vadachkoria
პეტრა, იორდანია

- რა სირთულეებს აწყდებით ხოლმე მოგზაურობის დროს?

— მთავარი პრობლემა არის ფული. ფული გაქვს, პრობლემაც არ არის. არ გაქვს ფული? არის პრობლემა. ყოფილა შემთხვევა გავჩერებულვარ მინუს ორ ვარსკვლავიან სასტუმროში და პლიუს ექვს ვარსკვლავიან სასტუმროშიც. მინუს ორი ეს იყო რაღაც საშინელება. თეთრეული არ იყო გამოცვლილი, იყო საშინელი ჭუჭყი, სიბინძურე. თუმცა დღეს ამაზე ვიცინი და ის მოგზაურობა მაინც სასიამოვნოდ მახსენდება. პლიუს ექვს ვარსკვლავიანი სასტუმრო იყო დუბაიში, ზღაპარში გეგონებოდა თავი.

ბადრი ვადაჭკორია ნეპალში
Photo: Courtesy of Badri Vadachkoria
ბადრი ვადაჭკორია ნეპალში

- ახლო მომავალში სად გეგმავთ გამგზავრებას?

— წელს მხოლოდ ორ ქვეყანაში ვიყავი. ძალიან მინდა აზიაში წასვლა, კიდევ ერთხელ მოვინახულო შრი-ლანკა.

 

266
ზურაბ გერმანიშვილი

მარანში ღამით შეპარული სტუმარი, კახური ღვინო და ნივრიანი ხაშლამა კოვიდისგან თავდასაცავად

2008
(განახლებულია 22:27 17.10.2020)
ოქტომბერია, გოგლა ლეონიძის სიტყვებით, “ჩამაჭრდა კახეთს ჰაერი“. ახლა იქ გზებზე ფერადი ხალიჩაა და კახური შემოდგომა თავისკენ გიხმობს...

თელავში ბევრი რამაა სანახავი, უფრო სწორედ, ხელახლა სანახავი და იქ ჩასულ სტუმრებს ამაში ცალკეული ადამიანებიც ეხმარებიან. გერმანიშვილების, პროფესიონალი ექიმების ტრადიციულ ოჯახს ყველა იცნობს. პანდემიამდე მათ არაჩვეულებრივი სასტუმრო „ამელი“ გახსნეს. იქ ჩასულები მარტო პასიურად კი არ ისვენებენ, კახური შემოდგომის ფერხულში უშუალოდაც ებმევიან.

ჯერ ორი სიტყვა მასპინძლებზე მინდა გითხრათ, ბატონი ზურაბ გერმანიშვილი გახლავთ ნეიროქირურგი, რომელიც წლებია თბილისის პირველ კლინიკურ საავადმყოფოში მუშაობს და პაციენტებში ნდობითა და პატივისცემით სარგებლობს. ასევე მისი მეუღლე, თამარ ბარამიძეც ექიმია, სამედიცინო ინსტიტუტის პროფესორი და მარდალეიშვილის კლინიკის თავ-კისრის ონკოლოგი. მათი ვაჟი, ასლანი, მამის კვალს გაჰყვა, ნეიროქირურგია და გერმანიის ერთ-ერთ კლინიკაში 13 წლის განმავლობაში მუშაობდა, ამჟამად საქართველოშია.

ზურაბ გერმანიშვილი და თამარ ბარამიძე
ზურაბ გერმანიშვილი და თამარ ბარამიძე

როგორც ექიმებმა, კარგად იციან რა არის საჭირო იმისთვის, რომ ადამიანმა ფიზიკურის გარდა, სრული ფსიქოლოგიური რელაქსი განიცადოს. საკუთარი ხელით შექმნილ ედემში საამისო ყველა პირობაა: არაჩვეულებრივი გარემო, გემოვნებით მოწყობილი ლანდშაფტი და სასტუმრო, რომელიც ყოველ სეზონზე, იქ ჩასულებს, ახალ-ახალ სიურპრიზებს სთავაზობს. სასტუროს ხშირად სტუმრობდნენ უცხოელი ტურისტები და საქართველოს სხვადასხვა კუთხიდან ჩამოსულები, მათ შორის, ბევრი ცნობადი სახეც იყო. დანარჩენს თავად ბატონი ზურაბი გვეტყვის.

სტუმრები ისრაელიდან
სტუმრები ისრაელიდან

- ბატონო ზურაბ, შემოდგომა განსაკუთრებით აქტიურია თქვენთან...

- კოვიდამდე წელიწადის არც ერთ სეზონზე არ ვუჩიოდით სტუმრების ნაკლებობას და ყველა საჭირო პირობის დაცვით, მათ ახლაც ვმასპინძლებთ. ისევე ყოველ ოქტომბერს, ახლაც, 20 ოქტომბრიდან ჩვენთან მასტერ-კლასები დაიწყება. ეს იქნება სასიამოვნო პროცესი, რომლის დროსაც ჩვენთან მოსული სტუმარი ისწავლის: ჩურჩხლის ამოვლებას, პურის ცხობას, მწვადის შეწვას, ხინკლის მოხვევას. რა თქმა უნდა, მათ საშუალება ექნებათ, რომ ჩვენს მიერ დაწურული არაჩვეულებრივი საფერავი და გამოხდილი ჭაჭა დააგემოვნონ. მოკლედ ეს იქნება სახალისო და ამასთან, შემეცნებითი ფორმის დასვენება, რომელიც დაუვიწყარ მოგონებას აჩუქებს. ჩვენ გვინდა სულ სხვა თვალით დანახული თელავი დაგამახსოვროთ.

სტუმრები თონეში პურს აკრავენ
სტუმრები თონეში პურს აკრავენ

- თქვენი კრეატივი, „ფოტოსესია წარსულში“ რას გულისმობს?

- მოგეხსენებათ, როგორი აქტუალურია ფოტო-სესიის მოწყობა, რომლისთვისაც სხვადასხვა საინტერესო გარემოს ეძებენ. მე ვფიქრობ, რომ ის, რასაც ჩვენ ვთავაზობთ ნებისმიერი ასაკის სტუმრისთვის სახალისო იქნება. ჩვენთან შეიძლება ფოტოების გადაღება ძველ, რეტრო გარემოში და ამასთან ქართული ნაციონალური სამოსით. კარგად იცით, რომ ეროვნული ტანსაცმელი ეთნიკური კუთხეების მიხედვით როგორი მრავალფეროვნებით გამოირჩევა. მანდილოსნებისთვის გვაქვს ტრადიციული გრძელი კაბები და თავსაბურავები, მამაკაცებისთვის კი- ჩოხა-ახალუხი, გვაქვს ასევე ძველი ქალაქური სამოსიც, მოკლედ არჩევანი თქვენზეა.

ფოტოსესია
ფოტოსესია

-თქვენთან არის თონე, სადაც ნებისმიერ მსურველს შეუძლია საკუთარი ხელით ჩაკრული პური დააგემოვნოს...

- დიახ, თონეც გვაქვს. თავიდან უფრთხიან ხოლმე თონეში პურის ჩაკვრას, მაგრამ უკვე მეორე მცდელობაზე ვატყობთ, რომ ამას სიამოვნებით აკეთებენ. რა ჯობია თონეში საკუთარი ხელით ჩაკრულ პურს?

ეზოში მოწყობილი თონე
ეზოში მოწყობილი თონე

- აქ გაქვთ მარანი, სადაც ვფიქრობ, განსაკუთრებით უცხოელი სტუმრებისთვის, ბევრი გექნებათ სათქმელი...

- ჩვენთან მოსული უცხოელი სტუმრები სიამოვნებით აგემოვნებენ ქვევრის ღვინოს, აქვე, რა თქმა უნდა, მათ ქართული სუფრის ტრადიციაზე ვესაუბრებით, მოგვიანებით კი, ყველაფერს უკვე თვალნათლივ ვაჩვენებთ. განსაკუთრებული ხაზგასმით ვეუბნებით (ვინც იცის, მათ ვახსენებთ) იმ ფაქტს, რომ სიტყვა „ღვინო“ მსოფლიოში ქართული სიტყვისგან გავრცელდა, რადგან საქართველო ღვინის სამშობლოა, სადაც 8000 წელზე უფრო ადრინდელი ყურძნის წიპწებიანი თიხის დოქებია აღმოჩენილი, რომ ჩვენთან ადამიანმა ველური ვაზი „გააკულტურულა და გააშინაურა“.

ამელის მარანი
"ამელის" მარანი

- დარწმუნებული ვარ, რომ ამ მარანში განსაკუთრებით მამაკაცებს უყვართ დაყოვნება...

 - ერთ ასეთ ამბავს გავიხსენებ, რომელიც ცნობილი ფილმის, „ღვინის ქურდების“ ეპიზოდს გაგახსენებთ. ადრე ბალტისპირეთიდან გვყავდა სტუმრები, როდესაც ყველამ დაიძინა, მარნიდან ხმაური შემომესმა. ავდექი და რას ვხედავ?- ჩვენი ერთი სტუმარი მისულია ერთ-ერთ ქვევრთან, რომელსაც შუშა აქვს გადაფარებული და მას ახლოდან აკვირდება. მივედი და ვეკითხები: რა ხდება მეთქი? ასე მიპასუხა: ვერაფრით დავიჯერე, რომ ამ ქვევრებში მართლა ღვინო გაქვთო. მე გადავწიე შუშა და ვაჩვენე. სიცილით მითხრა: გამაგებინეთ, რა გაძინებთ ზემოთ ასე მშვიდად, როდესაც აქ ამდენი ღვინოაო?

ფოტოსესია ამელში
ფოტოსესია "ამელში"

- უკვე წარმომიდგენია, როგორც მოიქცეოდით...

- იქვე დავსხედით, ქვევრიდან ღვინო ამოვიღე და დილამდე მარანში ვიყავით. დილით მისი მეგობრებიც შემოგვიერთდნენ. აქ მარტო ღვინოში არაა საქმე, მათ ჩვენგან წაღებული სითბო და იმ დღის მოგონება, დარწმუნებული ვარ, დიდხანს გაჰყვებათ. ისიც ეცოდინებათ, რომ ქართული სტუმართ-მასპინძლობის ამბავი ლეგენდა არ არის...

ამელის ეზო
"ამელის" ეზო

- თქვენთან ბევრი ცნობადი სახე ყოფილა სტუმრად...

- დიახ, გამორჩეული სტუმრებიც გვყავდა. მარტო ის რად ღირს, რომ ჩვენს როიალზე თავისი ქართული მუსიკა ააჟღერეს ისეთმა კომპოზიტორებმა, როგორებიც არიან: ვაჟა აზარაშვილი და კახა ცაბაძე, მეამაყება, რომ ისინი აქედან ნასიამოვნები წავიდნენ.

რეკვიზიტები ფოტოსესიისთვის
რეკვიზიტები ფოტოსესიისთვის

- როგორც ექიმი, შექნილ ვითარებაში რას ურჩევდით ადამიანებს?

- ძალიან მიკვირს მათი, ვისაც ამ ფონზე, რაც მსოფლიოში და კერძოდ, ჩვენთანაცაა, ჯერ კიდევ ეჭვი ეპარებათ კოვიდის არსებობაში. ყველას მინდა კიდევ ერთხელ ვურჩიო, რომ გაითვალისწინონ ჩემი კოლეგა ეპიდემიოლოგების რეკომენდაციები. ჩვენს სასტუმროშიც მათ ზედმიწევნით მკაცრად ვიცავთ. სხვაგვარად არაფერი გამოვა...

ზურან გერმანიშვილი და მისი მეუღლე, თამარ ბარამიძე
ზურან გერმანიშვილი და მისი მეუღლე, თამარ ბარამიძე

- რაიმე, განსაკუთრებული კახური რეკომენდაცია ხომ არ გაქვთ?

- რა თქმა უნდა მაქვს, პროფილაქტიკისთვის ყველას ორას გრამ წითელ ღვინოს და ნივრიან ხაშლამას ვთავაზობთ. საერთოდ კი, მე, როგორც ნეიროქირურგი გირჩევთ, გონება გაათავსუფლონ ნეგატიური აზრებისგან, ატარეთ დამცავი პირბადეები და უარი თქვით ხელოვნური, შინაგანი ნიღბებისგან, რაც ცხოვრებასა და ადამიანებთან ურთიერთობაში ხელს გიშლით...

 

2008
მოდელი სალომე ღვინიაშვილი

ზღაპრული სანაპირო და შოკოლადისფერი რუჯი: სად და როგორ ისვენებენ ქართველი სელებრითები

635
(განახლებულია 17:27 22.05.2019)
ზაფხულის დაუვიწყარი დღეებისთვის მომზადება ქართველმა ვარსკვლავებმა წინასწარ დაიწყეს. შოკოლადისფერი რუჯი და ხავერდოვანი კანი არც ერთ მათგანს არ აკლია, თუმცა ზღვის ნაპირზე ან მთაში დასვენება მეტ ენერგიას, სილაღესა და კომფორტს ჰმატებთ.

Sputnik-საქართველო მოგიყვებათ, რომელ კურორტს ან ვისთან ერთად დასვენებას მიანიჭეს უპირატესობა ქართველმა სელებრითებმა...

ყველაზე სექსუალური და წარმატებული: აირჩიეთ ქართველი მაჩო>>

ყველასათვის საყვარელმა და შეუდარებელმა მოდელმა სალომე ღვინიაშვილმა 18 მაისს 35 წლის იუბილე ფეხბურთელ მეუღლესთან ზურა ხიზანიშვილთან ერთად აღნიშნა.

წყვილმა საგაზაფხულო არდადეგები თურქეთის ხუთვარსკვლავიან სასტუმროში მოიწყო. უამრავ მილოცვასთან ერთად სალომე ღვინიაშვილის ფოტოებმა 10 000 მოწონება დაიმსახურა.

ეკო ფანგანი – ქართული ტელესივრცის ერთ-ერთი გამორჩეული სახეა. მისი თვალშისაცემი სტილი და დამახასიათებელი ხმის ტემბრი არავის ტოვებს გულგრილს. ჟურნალისტმა და ტელეწამყვანმა მეგობრებთან ერთად ქალაქ ბოდრუმს მიანიჭა უპირატესობა და მზიანი დღეების გასატარებლად სწორედ თურქეთში გაემგზავრა. 

ვიცე-მის საქართველომ, მოდელმა და ცნობილი ჟურნალისტების ქალიშვილმა ნანუკა გოგიჩაიშვილმა რომაული არა, მაგრამ ავსტრიული არდადეგები ნამდვილად მოიწყო. მოდელმა ვენაში დაუვიწყარი დღეები გაატარა. ულამაზეს ტყავის მოსასხამსა და კაბაში გამოწყობილი სელებრითი ნება-ნება მისეირნობს ევროპის განსაკუთრებულ ქალაქში.

ნოე სულაბერიძე და ჯანეტ ქერდიყოშვილი სულ ახლახან დაოჯახდნენ და ერთად მოგზაურობას არ წყვეტენ. საზოგადოებამ მათი მარშრუტი ალბათ ზეპირად იცის... მათ იტალია, ავსტრია, თურქეთი მოიარეს. ამჯერად ულამაზესი წყვილი ისევ თურქეთშია.

ამ ქართველ მსახიობს ხშირად მე-20 საუკუნის უმშვენიერეს ვარსკვლავს ოდრი ჰეპბერნს ადარებენ. ნინო გაჩეჩილაძე საზოგადოებამ ყველასათვის ცნობილი სატელევიზიო სერიალიდან „ჩემი ცოლის დაქალებიდან“ გაიცნო. მისი გმირი ჩერჩეტი და ქარაფშუტა ქალბატონი კატოა, რომელიც მუდმივად ქალური ბედნიერების ძიებაშია. ამჯერად ნინო გაჩეჩილაძე „ფორმულა კრეატივის“ შემოქმედებით ჯგუფთან ერთად ეგვიპტეში, შარმ-ელ-შეიხშია გადაღებაზე.

ქეთევან ხატიაშვილი ტანმოვარჯიშეა, საზოგადოებამ გაიცნო პროექტით „ცეკვავენ ვარსკვლავები“ და მალევე შეაყვარა ყველას თავი. მისი მეუღლე ცნობილი ქართველი მორაგბე დავით კაჭარავაა. წყვილმა მაისის არდადეგები საქართველოში, ყაზბეგის მთებში მოიწყო. ეს წყვილი თქვენ ყურადღებას აუცილებლად მიიპყრობს.

635
საბადურის

კვირის ასტროპროგნოზი: სიყვარული, ფინანსები, სამუშაო 25 ოქტომბერი - 1 ნოემბერი

0
(განახლებულია 12:11 25.10.2020)
როგორი იქნება ეს კვირა ზოდიაქოს ნიშნების წარმომადგენლებისთვის, როგორ მივაღწიოთ წარმატებებს, როგორ ავარიდოთ თავი განსაცდელს – ყოველივე ამის შესახებ ასტროლოგები გვიამბობენ.

ვარსკვლავების განწყობა ამ კვირაში ცვალებადი იქნება, თუმცა ერთი რამის თქმა მაინც შეიძლება – კვირის მეორე ნახევარი პირველზე გაცილებით პოზიტიური იქნება.

ვერძი

ამ კვირაში სიბრძნე და ძალა მოგემატებათ. ამისთვის უნდა მისდიოთ სასარგებლო რჩევებს, ასევე ენდოთ ინტუიციას, რომელიც ახლა სათანადო სიმაღლეზეა. ასტროლოგები გირჩევენ, შეაკავოთ ნეგატიური ემოციები და გამოხატოთ პოზიტიური. აჩვენეთ სიყვარული ახლობლებს და თავი შეიკავეთ, თუ ვინმე სკანდალის პროვოცირებას შეეცდება.

როგორი დასვენება უყვართ ზოდიაქოს ნიშნებს>>

კვირის მეორე ნახევარი იდეალურია იმიჯის შეცვლისთვის. ეს განსაკუთრებით წაადგება მათ, ვინც სამუშაოს ეძებს. ძალზე მნიშვნელოვანია, რომ ყურადღება მიაქციოთ ჯანმრთელობას და არ გადაიღალოთ.

კურო

კვირის დასაწყისი მერკურისა და მზის ძალაუფლების ქვეშ იქნება. კუროებს ცხოვრებაში არცთუ სასიამოვნო ცვლილებები გელოდებათ. შესუსტებული იქნება საინფორმაციო ნაკადები, ამიტომ ექსპერტები გირჩევენ, სიმართლე და სიცრუე ერთმანეთისგან განაცალკევოთ. კვირის პირველ დღეებში მატყუარა და ანგარებიანი ადამიანები გააქტიურდებიან – არ აიღოთ მათგან მაგალითი.

28 ოქტომბრიდან ძალზე ხელსაყრელი პერიოდი დადგება, როდესაც გაგიმართლებთ სიყვარულშიცა და საქმიანობაშიც.  ამისთვის კი აუცილებელია, რომ იზრუნოთ ჯანმრთელობასა და ენერგეტიკაზე. წაგადგებათ მოძრაობა, სეირნობა, სპორტი. კვირის ბოლო ასევე კარგი დროა მოგზაურობისთვის, მივლინებებისთვის.

ტყუპი

26 და 27 ოქტომბერი შეიძლება ნეგატიური ენერგიით იყოს დატვირთული. ეცადეთ, გონება უარყოფითი აზრებისგან გაწმინდოთ. ოთხშაბათიდან ვითარება მკვეთრად შეიცვლება. სამუშაო კვირის ბოლო ნებისმიერი პროფესიის წარმომადგენლებისთვის ძალზე პროდუქტიული იქნება.

იდეალური ქვეყანა ზოდიაქოს თითოეული ნიშნისთვის>>

ოთხშაბათიდან შაბათის ჩათვლით ვარსკვლავები და პლანეტები დიდ იღბლიანობასა და პოზიტივს მოიტანენ. შეგიძლიათ ახალი საქმეების დაწყება, რამე მნიშვნელოვანსა და საპასუხისმგებლოზე შეჭიდება, შესაძლებელია ფულის გამომუშავება და მისი გონივრულად დახარჯვა.

კირჩხიბი

ბედნიერება მხოლოდ ის არაა, როცა რაღაცას ვიღებთ, არამედ ისიც, როდესაც ვიწმინდებით არასაჭირო და ტოქსიკურისგან. მაგალითად, უნდა გათავისუფლდეთ წუწუნის, ყველაფრის სხვებისთვის დაბრალების  ჩვევისგან, ნეგატიური აზროვნებისგან, საკუთარი თავის მართლების, შიშების, ჭორებისგან და ასევე სიყვარულზე „ნარკოტიკული“ დამოკიდებულებისგან. ამ ყველაფრისთვის ეს იდეალური კვირაა.

არ არის გამორიცხული, რომ რაღაც მნიშვნელოვანი საიდუმლო შეიტყოთ, რომელიც დიდი ხანი დამალული იყო. ღამის მანათობლები ასევე დაგეხმარებიანსხვადასხვა ნივთის შეძენაში, მნიშვნელოვანი გარიგებების დადებაში, იურიდიული პრობლემების გადაჭრაში. კვირის მიწურულს გამძაფრდება ურთიერთობებისა და რომანტიკის მოთხოვნილება.

ლომი

ლომები ყველანაირად უნდა ეცადოთ, რომ ნეგატიურ ადამიანებს მოერიდოთ. მათ შეუძლიათ, უარყოფითი ენერგიით დაგმუხტონ და თან – გაუცნობიერებლად, არა სპეციალურად. მარტოხელა ლომებს ექსპერტები გირჩევენ, რომანტიკასა და ახალი ნაცნობობების ძიებას სწავლა და ახალი უნარების გამომუშავება ამჯობინოთ, მით უმეტეს, რომ თქვენი მეხსიერება და ყურადღება უფრო გამახვილდება.

სად იმალება ზოდიაქოს თითოეული ნიშნის ბედნიერების საიდუმლო>>

ინტელექტუალური სამუშაო შესანაშნავად შესრულდება, მაგრამ მგზავრობა და მივლინებები, სჯობს, გადადოთ, აუცილებლობის შემთხვევაში კი გზისთვის დიდი ყურადღებით გაემზადეთ და იფრთხილეთ.

ქალწული

ქალწულებმა ენერგია, სჯობს, სამუშაოზე, ბიზნესსა და ფინანსურ საკითხებზე დახარჯოთ. მოსალოდნელია პროდუქტიულობის ზრდა, გაგიმართლებთ სამუშაო სფეროში. გააქტიურება ასევე საჭიროა სიყვარულშიც. არაა გამორიცხული, რომ შეხვდეთ სასიამოვნო ადამიანს, რომელიც მომავალში, შესაძლოა, თქვენი მეორე ნახევარი ან კარგი მეგობარი გახდეს.

უპრიანია, კვირა სახლის საფუძვლიანი დალაგებითა და მოწესრიგებით დაიწყოთ. გათავისუფლდით და გადაყარეთ უსარგებლო და ძველი ნივთები – მათ თქვენი უარყოფითი ენერგიით დამუხტვა შეუძლიათ. შეამოწმეთ ფინანსები, შეადგინეთ საყიდლების სია, გეგმა. ასევე მნიშვნელოვანია, რომ მეტი დრო დაუთმოთ ოჯახის წევრებსა და ნათესავებს.

სასწორი

სასწორებისთვის კვირის პირველი ორი დღე შეიძლება ძალზე ნერვული აღმოჩნდეს, რადგან ვარსკვლავები და პლანეტები დისონანსში იქნებიან. კარგი პერიოდია ნათესავებთან დაახლოების, რემონტის ან ერთობლივი საქმეების დაწყებისთვის. შეიძლება შოპინგი, საჩუქრების გაკეთება საყვარელი ადამიანებისთვის.

ზოდიაქოს ნიშნები, რომლებსაც განსაკუთრებული მისია აკისრიათ>>

უქმეებზე ასტროლოგები კარგად დასვენებასა და გართობას გირჩევენ. ამასთან, გაფრთხილებენ, რომ მოერიდოთ ზედმეტ აზარტსა და რისკს. ვარსკვლავები მოტივაციით დაგასაჩუქრებენ, დაგეხმარებიან ახალი ცოდნისა და სურვილების წყაროს პოვნაში. შემოქმედებითი პროფესიების წარმომადგენლებს 28 ოქტომბრიდან დიდი შთაგონება გელოდებათ.

მორიელი

ასტროლოგები გირჩევენ, შურის გრძნობას შეებრძოლოთ. ეს გრძნობა თქვენთვის დამანგრეველია განსაკუთრებით ამ კვირაში. მან შეიძლება გავლენა მოახდინოს თქვენს სამუშაო გეგმაზე, ჯანმრთელობაზე. სამუშაო სფეროში წესიერება და პატიოსნება დაგჭირდებათ – ამ ორი თვისების წყალობით წარმატებებს უფრო მალე მიაღწევთ.

სხვების წარმატებებს ყურადღებას ნუ მიაქციევთ, არამედ მთელი ყურადღება საკუთარ მიღწევებზე გაამახვილეთ. ვარსკვლავები დაგეხმარებიან შრომისმოყვარეობის გაძლიერებაში, განამტკიცებენ თქვენს ჯანმრთელობასა და მორალურ სულს. ასევე ექსპერტების რჩევაა, რომ წარსულში არ გაიხედოთ, მზერა მომავლისკენ მიმართეთ და იზრუნეთ აწმყოზე. არ ღირს საკუთარი თავის კრიტიკა და დასჯა წარსულის შეცდომების გამო.

მშვილდოსანი

მშვილდოსნებისთვის დგება იმის დრო, რომ თავი მიუძღვნათ სიყვარულს, ოჯახსა და მეგობრებს. ახლობელ ადამიანებთან ურთიერთობები აამაღლებს თქვენს ენერგეტიკას და მოგმატებთ იღბალს. ახლობლებზე ზრუნვა აწმყოსა და მომავალში მათი მხრიდან დახმარების გარანტი იქნება.

ზოდიაქოს ხუთი ყველაზე კაშკაშა ნიშანი, რომელთა შეყვარება ძალიან ადვილია>>

რაც შეეხება ფინანსურ სფეროს, აქ მშვილდოსნებს ყველა მიმართულებით გაგიმართლებთ. შესაძლებელია შემოსავლების გაზრდა, შემოსავლების მიღების ახალი წყაროების მოძებნა და პოვნა, ფულის სწორად დახარჯვა. შოპინგი განწყობის ამაღლებასა და პოზიტიური ენერგიით დამუხტვაში დაგეხმარებათ.

თხის რქა

ამ კვირაში წაგადგებათ ახალი შეხვედრები, ნაცნობობა, ურთიერთობები. არ ღირს საკუთარ თავში ჩაკეტვა. მოუსმინეთ გარშემომყოფების რჩევებს, განსაკუთრებით 28 ოქტომბრის შემდეგ. კვირის პირველ ორ დღეს არის რისკი იმისა, რომ სამუშაოსა და ბიზნესში მძლავ დაპირისპირებას შეეჯახოთ. არ არის გამორიცხული, რომ გააქტიურდნენ მტრები და არაკეთილმოსურნეები.

კოლეგებთან, პარტნიორებთან ან კლიენტებთან მეტი მოქნილობა გმართებთ. თხის რქები ბრძენ ნიშანთა რიცხვს განეკუთვნებით, მაგრამ პირველ ორ დღეს მაინც შეიძლება ადვილად გაანაწყენოთ ვინმე. თუ გარშემომყოფები თავიანთი პირობების კარნახს შეეცდებიან, დათმობაზე წასვლა თქვენს საზიანოდ არ ღირს. ექსპერტები ასევე ვარაუდობენ, რომ შესაძლებელია გაუთვალისწინებელი ხარჯები.

მერწყული

როგორც ეზოთერიკოსები ამბობენ, სწორად შერჩეული სიტყვები იღბლიანობას ზრდის. მიზიდულობის კანონი ნამდვილად მუშაობს, ამიტომ სჯობს, ჯერ დაფიქრდეთ და შემდეგ ილაპარაკოთ პოზიტიურ რამეებზე, მეტად გწამდეთ საკუთარი თავის და არ დაიწყოთ ურთიერთობების გამორკვევა მეორე ნახევართან. ჩხუბი და ნეგატივი პრობლემების პროვოცირებას მოაწყობს სხვა სფეროებშიც.

ზოდიაქოს ნიშნები, რომლებსაც ერთი ნახვით უყვარდებათ>>

მარტოხელა მერწყულებმა, სჯობს, შეაჩეროთ პარტნიორის ძებნის პროცესი და სამუშაოზე გადაერთოთ. განსაკუთრებული ყურადღება უნდა დაუთმოთ საოჯახო საქმეებსაც. წაგადგებათ გარეგნობის შეცვლა, გარდერობის განახლება. უქმეებზე კი კარგი იქნება გართობა.

თევზები

თევზებისთვის ძალზე წარმატებული და პოზიტიური კვირაა. შეგიძლიათ ახალი ცხოვრების დაწყება, რომელიც ბედნიერებამდე მიგიყვანთ. კარგად აეწყობა ახალი საქმეები, ახალი სამსახურის ძებნა, საყვარელი ადამიანის პოვნის პროცესი. ექსპერტების რჩევაა, გააქტიურდეთ სოციალურ ქსელებში.

ასტროლოგები ასევე გირჩევენ, გაწმინდოთ საინფორმაციო ველი. წაშალეთ არასაჭირო კონტაქტები ტელეფონიდან, სოციალური ქსელებიდან. ახლა ენერგეტიკული აღმავლობის გზაზე ხართ. გეყოფათ ძალა, რომ მთები გადადგათ. ძალზე მნიშვნელოვანია, რომ პოზიტიური განწყობა გარშემომყოფებს გაუზიაროთ.

0