ციცი ჩხეიძე

მუსიკით შთაგონებული „ინდიგოს“ მოგზაურობა

750
(განახლებულია 10:17 13.02.2018)
ჩვენი რუბრიკის დღევანდელი სტუმარი ფოტოგრაფი ციცი ჩხეიძეა. ციცი არც ისე ბევრ ქვეყანაშია ნამყოფი, თუმცა მისი მოგონებების სკივრი უამრავი ლამაზი და საინტერესო მოგონებით არის სავსე.

ციცი ამბობს, რომ საზღვრის გადაკვეთა ყოველთვის მისი საყვარელი შემსრულებლების ლაივ–კონცერტს უკავშირდება. პირველად თურქეთში იმოგზაურა. რა თქმა უნდა, მიზეზი აქაც მუსიკა იყო.

ციცი ჩხეიძე
Courtesy by Tsitsi Chkheidze
ციცი ჩხეიძე

— არა თუ მოგზაურობა, ერთი საათით ჩვეულ გარემოს მოწყვეტა (რაც უმეტესობა ჩვენგანისთვის ოფისის ნაცრისფერი კედლები და კომპიუტერთა მოციმციმე ეკრანებია) და ბუნებაში გასეირნება გვცვლის, გონებას გვიხსნის და ახლებურად აღვიქვამთ ყოველდღიური რუტინის შემადგენელ მოვლენებს, საგნებს, ნივთებსაც კი, რომელთაც გაუაზრებლად ვეხებით და ვიყენებთ დანიშნულებისამებრ.

საზღვარგარეთ უცხო ქვეყნის კულტურასთან შეხება, განსხვავებული სამოქალაქო შეგნების ადამიანებთან ურთიერთობა, იმ ქვეყნის განვითარების მიხედვით ქალაქ-სოფლის ცხოვრების წესში ჩართვა ჩვენც ახალ უნარებს გვივითარებს. მოკლე დროში სხვა რიტმზე მორგებით ცნობიერებაც გვიმაღლდება. ეს ყველაფერი საინტერესოსთან ერთად სახალისოცაა, თუნდაც შემხვედრი სირთულეების ფონზე, რომელსაც მოგონებებში მაინც მხიარულად ვიხსენებთ.

შემიძლია გადაჭრით ვთქვა, რომ მოგზაურობა (მუსიკის შემდეგ) არის ყველაზე მაგარი რამ, რისთვისაც უნდა ვიცხოვროთ! თუმცა ჩემთვის მუსიკა და მოგზაურობა პირდაპირ კავშირშია – ყველა ჩემი საზღვრის გადაკვეთა საყვარელი შემსრულებლების ლაივს უკავშირდება. პირადი გამოცდილების ფონზე ვიტყვი, რომ ეს სულაც არაა წარმოუდგენელ ხარჯებთან დაკავშირებული. მაგალითად, David Gilmour-ის ლაივისთვის თანხას ფაქტიურად ორი წელი ვაგროვებდი. სანამ ვინმეს გაუკვირდება, რომ ამდენი ხნით ადრე კონცერტი არ ანონსდება, აქვე განვმარტავ: დევიდმა ჯერ ახალ ალბომზე მუშაობა დააანონსა, მე, როგორც Pink Floyd-ის ისეთი ფანი, რომელიც არა მხოლოდ უსმენს მათ, არამედ ესმის მათი, რა თქმა უნდა, ჩემში „მერაღაცამდენე“ გრძნობამ გაიღვიძა და ვიცოდი, რომ ახალ ალბომს აუცილებლად მოჰყვებოდა ტურნე. სადღაც 5-6 თვეში ალბომიც გამოვიდა. მალევე ტურიც დაანონსდა, შემდეგ თარიღებიც დაიდო. 20-მდე ფანი შევიკრიბეთ და ერთად წავედით. საფრენი ბილეთების ადრე შეძენით საკმაოდ კარგ ფასში გამოდის ყიდვა, 15-25 ევროს ფარგლებში ძალიან კარგი ჰოსტელებია, სუფთა და ყველა საჭიროებით აღჭურვილი. კვება ჩვენ ქვეყანასთან შედარებით, რა თქმა უნდა, ძვირია, მაგრამ იმ ჩვენი სამოგზაურო პერიოდისთვის ღირს რაღაცები შევიზღუდოთ. წინასწარ დაგეგმვის შემთხვევაში ყოველთვიურად მცირე თანხის გადადებით შეგვიძლია საკუთარ თავს წელიწადში ერთხელ მაინც ყველაზე კარგი საჩუქარი გავუკეთოთ.

ციცი ჩხეიძე მეგობრებთან ერთად
Courtesy by Tsitsi Chkheidze
ციცი ჩხეიძე მეგობრებთან ერთად

– პირველი მოგზაურობა გაიხსენეთ…

— პირველად ვიყავი თურქეთში, რა თქმა უნდა, მიზეზი აქაც მუსიკა იყო. ჩემი ყველაზე დიდი ოცნების Roger Waters-ის The Wall Show. როდესაც Pink Floyd-ის მოსმენა დავიწყე, არც კი მიოცნებია, რომ ოდესმე შევძლებდი ლაივში მომესმინა.

სტამბულში მეუღლესთან ერთად ავტობუსით წავედი ბილეთის დაბალი ფასიდან გამომდინარე. ტრანსპორტი ჩემზე ძალიან ცუდად მოქმედებს, მხოლოდ იმ დროს არ მაწუხებს, როცა მე ვარ საჭესთან. 26 საათი მხოლოდ კონცერტის მოლოდინი მაძლებინებდა. ავტობუსი სადგურში რომ შევიდა, ხერხემალი ისეთ მდგომაროებაში მქონდა, გამართვასაც კი ვერ ვახერხებდი. იმდენად ვიყავი მხოლოდ ლაივზე კონცენტრირებული, ირგვლივ ქალაქის არქიტექტურასაც კი ვერ ვამჩნევდი, თანაც იმ დროს თურქეთში არეულობა, აქციები იყო და საშინლად ვნერვიულობდი კონცერტი არ ჩაშლილიყო. ოცნების ლაივის დღეს არენაზე მიმავალს პირველი თვალში ტრანსპორტის საოცარი კომფორტულობა მომხვდა, უხმაურო, საოცრად რბილი, კონდიცირებული, დაუჯერებლად მოწესრიგებული მოძრაობა. თუ სწორად მახსოვს, რუკებზე ადგილები სულ თურქულად იყო აღნიშნული, ადგილობრივთა უმრავლესობამ უცხო ენა არ იცის. როდესაც მიმართულების მითითება გვჭირდებოდა, მიუხედავად იმისა, რომ თურქულად მხოლოდ „მერჰაბა“ გვესმოდა, რადგან ჩვენებურ სახელ მერაბისთან ასოცირდება და გონებამ მარტივად დაიმახსოვრა, ახსნას მაინც მთელი გულით განაგრძობდნენ, ჩვენ კი მხოლოდ ვუღიმოდით და შიგადაშიგ თუ სიტყვის ჩართვის საშუალება მოგვეცემოდა (ძალიან სწრაფად და უხვად საუბრობენ), ვუმეორებდით, რომ არაფერი გვესმოდა. ქალაქში წარწერებიც სულ თურქულადაა, ჩვენთვის გასაგები რუკის მოპოვება კი მხოლოდ მეოთხე დღეს შევძელით. ყველაზე მეტად მათი მომსახურების სტანდარტებით მოვიხიბლე, საოცარი სერვის–პლუსი აქვთ, განსაკუთრებით კვების ობიექტებში, რომ არ გშიოდეს, მაინც რომ ესტუმრები, ისეთი. საშოპინგოდაც მშვენიერი ქალაქია, ძალიან დაბალ ფასად შესანიშნავი ხარისხის სამოსი და ფეხსაცმელი შევიძინე.

ციცი ჩხეიძე
Courtesy by Tsitsi Chkheidze
ციცი ჩხეიძე

– დაახლოებით რამდენ ქვეყანაში იქნებით ნამყოფი და მათგან რომელს გამოარჩევდით?

— ამ დროისათვის მხოლოდ შვიდ ქვეყანაში ვარ ნამყოფი. მე ბავშვობიდანვე გოთური არქიტექტურის თაყვანისმცემელი ვარ და ამ მხრივ თავი ყველაზე მეტად პრაღამ (ჩეხეთი) დამამახსოვრა.

გოთიკა ყოველთვის იყო ჩემი ინსპირაციის წყარო, კომპიუტერი Gothic Art-ით მაქვს სავსე, ილუსტრაციათა უმეტესობა ჩემთვის მიუწვდომელად და არარეალურად დაილექა გონებაში. ამ მხრივ პირველი ოცნება ვენაში ავიხდინე, წმინდა სტეფანის კათედრალის (St. Sthephen’s Cathedral) სვეტებს შორიდან მოვკარი თვალი და მონუსხული გავქვავდი. ვერ ვიჯერებდი, რომ ჩემ თვალწინ იდგა არქიტექტურის ეს საოცარი ნიმუში, რომელიც ნამდვილი იყო! რომ მივუახლოვდი, ქვის კედლებს ხელისგულებით ვეხებოდი, რომ შემეგრძნო, თუმცა ინტერიერის ნახვა მართლაც შოკი იყო, ჩემ თვალწინ ინტერნეტში ნანახი ფოტოები და ფილმების კადრები ცოცხლდებოდა. მგონია, რომ ამ არქიტექტურის ტაძრების სილამაზეს მთელი ცხოვრება ყოველდღე რომ ვუყუროთ, მაინც ვერ ამოვწურავთ. გამიმართლა და ამ კათედრალის ორღანიც მოვისმინე, რომელიც ძალიან ძველია და მხოლოდ განსაკუთრებულ შემთხვევებში უკრავენ ხოლმე. იმ დროს გამოვცადე იდიომის მნიშვნელობა – „ძარღვებში სისხლი გამეყინა“.

ციცი ჩხეიძე
Courtesy by Tsitsi Chkheidze
ციცი ჩხეიძე

– გაიხსენეთ ის, რამაც ყველაზე მეტად მოგხიბლათ უცხოეთში.

— როგორც გითხარით პირველი გასვლა თურქეთში მქონდა. როგორც ყველა ტურისტი, მეც ეროვნული კერძით დავინტერესდი. სადილად ყველა თურქი რაღაც წვნიანს მიირთმევდა. სასურველ საკვებთან ერთად ესეც შევუკვეთე. რომ გავსინჯე, არ მომეწონა და, რა თქმა უნდა, დავტოვე. ანგარიში რომ მომიტანეს, მომსახურე პერსონალმა ამ წვნიანის თანხა უკან დამიბრუნა…  სადაც ვყოფილვარ, ყველა ქვეყანა განვითარების დონით მაღლაა და მათგან ხუთი მათგანი შენგენის ზონაში, ამიტომ განსაკუთრებულ ტრადიციას ან წეს-ჩვეულებას ჩემი იქ ყოფნის მანძილზე არ წავწყდომივარ.

ციცი ჩხეიძე
Courtesy by Tsitsi Chkheidze
ციცი ჩხეიძე

– მოგზაურობის დროს თქვენი ყველაზე სასურველი პარტნიორი ვინ არის და რატომ?

— რა თქმა უნდა, მეუღლე, რომელთანაც არ მომერიდება იმის თქმა, რომ შემცივდა, მომშივდა, დავიღალე, „ხერხემლის მე-7 მალა გამენასკვა“ და ა.შ.

მოგზაურობის დროს კომპანიონს საერთოდ სხვა კუთხით ვიცნობთ და წლების მეგობარში შეიძლება ისეთი თვისებები აღმოვაჩინოთ, ძალიან (უმეტესად უსიამოვნოდ) რომ გაგვაკვირვოს. სამსახურიდან გამომდინარე, მეუღლე ქვეყნის დატოვებას ვერ ახერხებს, ამიტომ უმეტესად ფანებთან ერთად დავდივარ ხოლმე. შენგენის ზონაში ჩემი პირველი გასვლისას (ავსტრიაში) სხვა ქვეყნიდან ჩამოვიდა მეგობარი, რომელიც წლები არ მყავდა ნანახი და ყველაფერი მან მომატარა. ზუსტად ვიცი, რომ მის გარეშე ასე ვერ შევიგრძნობდი მოგზაურობას. ჩვენ დუეტს ფანებიდან ერთ-ერთიც შემოუერთდა და ჩვენი ტრიო დღეში 20-დან 40 კილომეტრამდე გადიოდა ფეხით. დილით ადრე ვდგებოდით და ღამით გვიანობამდე დავეხეტებოდით, უამრავი რამ ვნახე. მეგობარს დავყავდი ისეთ ადგილებში, რომელიც თავად გათელილი ჰქონდა, მაგრამ ჩემთვის ბოლომდე დაიხარჯა, მიზიარებდა თავის გამოცდილებას, არ დამზარდა არც ერთი პუნქტის მონახულებაზე, გამასინჯა ეროვნული დელიკატესები (თუმცა ჩემ შემთხვევაში ეს მხოლოდ ტკბილეული იყო, რადგან ვეგეტარიანელი ვარ, ავსტრია კი ხორცის კერძების ქვეყანაა). ორივე მოთმინებით იტანდა ჩემ ყოველდღიურ ვიზიტებს სტეფანის კათედრალში და მელოდებოდნენ, სანამ ტაძრით ვტკბებოდი. ამ დეტალებზე იმიტომ ვწვრილმანდები, რომ კომპანიონობის უდიდეს მნიშვნელობას გავუსვა ხაზი. არ არსებობს ორი იდენტური მისწრაფების ადამიანი, ამიტომ ურთიერთგაგება ასეთ შემთხვევებში მნიშვნელოვანია, გემოვნების სხვაობის შესაბამისად დათმობაზე წასვლა და დროის გადანაწილება, რომ ყველა მხარემ მიიღოს თავისი.

მოგზაურობების პირადი გამოცდილებიდან გამომდინარე, თუ არ შემიძლია მეუღლესთან ან იმ მეგობართან ერთად წასვლა, რომელთანაც კომფორტულად ვარ, მირჩევნია მარტო წავიდე. მილანში ყოფნისას დუომოს გრანდიოზული ტაძარი რომ დავინახე, რა თქმა უნდა, მინდოდა ჩემებურად შემეგრძნო, მაგრამ არ დამცალდა, რადგან ათნი ვიყავით და დანარჩენი ცხრისთვის მოკლე ექსკურსია დამაკმაყოფილებელი აღმოჩნდა; ყველას სხვადასხვა სურვილები გვაქვს, და სწორედ ეს არის ჯგუფური სიარულის მინუსი. ზოგს შოპინგი უნდა, ზოგს კოსმეტიკა, ზოგს ფეხბურთი, ზოგს შია, ზოგი დაიღალა და ა.შ. ჩემნაირ „გაფრენილებს“ კი გოთიკური არქიტექტურის უდიადესი შედევრის ქანდარაზე ჯდომა არ ჰყოფნით. თანაც, როგორც ფოტოგრაფს, კარგი კადრისთვის სწორი რაკურსის შესარჩევად მეტი დრო მჭირდება, ვიდრე მობილურით „მიუცბათებული“ სამახსოვრო კადრია.

ციცი ჩხეიძის ფოტო
Courtesy by Tsitsi Chkheidze
ციცი ჩხეიძის ფოტო

– რამე თავგადასავალს ხომ არ გაიხსენებთ?

— სამწუხაროდ, საშინელი ორიენტირება მაქვს. თუ ვინმესთან ერთად ვარ, უნებურად მთლიანად მას ვენდობი და გზის დამახსოვრებაზე საერთოდ არ ვფიქრობ. ორ მოგზაურობაში ჩემზე უარესი კომპანიონები შემხვდნენ. ერთხელ, ბუდაპეშტში ყოფნისას მეგობარმა მე და ჩემზე უარესი ორიენტირების მქონე ტურისტი ჩვენი ჰოსტელის გზაზე დაგვაყენა. იმ დღეს ღამის სამ საათამდე ვიარეთ და ფეხზე ვეღარ ვიდექით, თავად კი გასავათებული ბრუნდებოდა სასტუმროში. წესით, 50 მეტრში უკვე ჩვენს ჰოსტელთან უნდა ვყოფილიყავით, მაგრამ ვერც ერთმა ვერ გავიგეთ „რა ჯადოთი“ ავცდით გზას ისე, რომ გავიარეთ მეტროს ორი სადგური ფეხით. თანაც ქუჩაში არავინ ჭაჭანებდა, რომ გზა გვეკითხა. წრეზე ბატებივით სიარულისას ტურისტებს ისევ ტურისტი დაგვეხმარა, რომელიც მიხვდა, რომ ნამდვილად ვერ შევძლებდით მარტო სახლის მიგნებას და ბოლომდე გამოგვაცილა. ის რომ არა, ალბათ ახლაც ბუდაპეშტის ქუჩებში ვივლიდი დაბნეული. მილანშიც, მინი ჯგუფებად რომ დავიყავით, კომპანიონად ორი ჩემზე უარესი შემხვდა. რამდენჯერმე გზის აბნევის შემდეგ მდგომარეობა რომ გავიაზრე, ტვინში ნათურა ამენთო და მეტროს სადგურების რუკების, ტრაფარეტების მიხედვით მშვენივრად ვიარე და ვატარე მეგობრები. მას შემდეგ თავდაჯერებული ვარ და მზად ვარ მარტო მოგზაურობისთვის.

– ყველაზე შთამბეჭდავი ადგილი, რაც ცხოვრებაში გინახავთ…

— ამ მხრივ ბუდაპეშტს გამოვარჩევდი. მთელი ქალაქი თითქოს ხელოვნების ნიმუშია, ძველებური, კარგად შემონახული შენობები, მრავალფეროვანი არქიტექტურა და რაღაცნაირი თბილი ქუჩები, თან ნოსტალგიური სევდა რომ გასდევს. წამოსვლის წინა საღამო გავატარე Buda Hill-ზე მეგობრებთან ერთად. ღამის ბუდაპეშტის საოცარი ხედი იშლება, მდინარის ფონზე ალიცლიცებული განათება, ღამის ცა, ბუდაპეშტური საღამოს ჰაერი — შეიძლება არქიტექტურულად ბევრად გამორჩეული ადგილები მინახავს, მაგრამ ყველაზე შთამბეჭდავ მოგონებად მიანც ეს ხედი ჩამრჩა მეხსიერებაში.

– საქართველოდან რომელ ადგილს გამოარჩევდით?

— სამწუხაროდ, საკუთარი ქვეყნის ძალიან ცოტა ადგილი მაქვს ნანახი. ძალიან მინდა სვანეთისა და „ღრუბლებს ზემოთ მდგომი“ გომის მთის მონახულება. ბავშვობიდან მიზიდავდა და მემისტიურებოდა ხვამლის მთა. იმედი მაქვს, ოდესმე შევძლებ, გამოვნახავ დროსა და საშუალებას, რომ ეს გამოვასწორო.

ციცი ჩხეიძის ფოტო
Courtesy by Tsitsi Chkheidze
ციცი ჩხეიძის ფოტო

– მთის კურორტები გიზიდავთ, ზამთრის, თუ ზაფხულის?

— სიმწვანე, ტყე და ბუნება ძალიან მიყვარს, მაგრამ ჩემთვის ნომერი პირველი ადგილზე მაინც ზღვაა. შემიძლია საათობით ვიჯდე ნაპირზე, ჰორიზონტს ვუყურო და ტალღების ხმას ვუსმინო. ჩემი ფოტოსესიების უმეტესობაშიც წყალი დომინირებს. განსაკუთრებით მზის ჩასვლისას მიყვარს წყალში შესვლა და მზის ბილიკის მიმართულებით ლივლივი, ასეთ დროს თითქოს სხვა განზომილებაში გადავდივარ.

– რომელი ქვეყნის სამზარეულოს გამოარჩევდით?

— სამწუხაროდ, ვერც ერთი ქვეყნის სამზარეულოს ვერ გამოვარჩევ. როგორც ბავშვობაში მეძახდნენ, „უნაირო მჭამელი“ ვარ და უნდა ვაღიარო, რომ ყველგან მენატრებოდა ქართული, იმერული ხაჭაპური და ოჯახურად შემწვარი კარტოფილი. მიუხედავად ჩემი ვეგეტარიანელობისა, ბოსტნეულიც დიდად არ მიყვარს და როცა მშია, მეც არ ვიცი რა მინდა, რომ ვჭამო. ამიტომ საზღვარგარეთ ყოფნისას ძირითად რძის პროდუქტებსა და შოკოლადებზე ვარ ხოლმე.

– საქართველოს გარდა რომელ ქვეყანაში იცხოვრებდით?

— ბავშვობიდანვე ამერიკაა ჩემი ოცნება, თავისუფლების ქვეყანა უამრავი შესაძლებლობებით აღსავსე.

– ახლო მომავალში სად გეგმავთ გამგზავრებას და რას მოინახულებთ იქ?

— რამდენიმე თვეში მივდივარ ავსტრიაში, ვენაში. პირველ რიგში Roger Waters-ს მოვინახულებ. ასევე ზუსტად ვიცი, რომ ისევ ყოველდღე ვივლი სტეფანის კათედრალში. მინდა მიმდებარე ქვეყნებიც მოვიარო, თუმცა ამას უფრო წასვლის თარიღი რომ მოახლოვდება, იმ დროს დავგეგმავ ჩემი დროისა და საშუალების შესაბამისად.

ყველას ვუსურვებ ჰქონდეთ დრო და სახსრები, რომ ამ მხრივ გაიფართოონ თავიანთი მსოფლმხედველობა. გარდა იმისა, რომ მოგზაურობა სასიამოვნო და სახალისოა, დამიჯერეთ, ძალიან საჭიროცაა. როცა პირველად გამოცდით, თავად დარწმუნდებით. მინდა ტოლკინის სიტყვებით დავასრულო: “All we have to decide is what to do with the time that is given us”.

750
თემები:
ქართველი სელებრითები - 2018 (66)
ზურაბ გერმანიშვილი

მარანში ღამით შეპარული სტუმარი, კახური ღვინო და ნივრიანი ხაშლამა კოვიდისგან თავდასაცავად

1985
(განახლებულია 22:27 17.10.2020)
ოქტომბერია, გოგლა ლეონიძის სიტყვებით, “ჩამაჭრდა კახეთს ჰაერი“. ახლა იქ გზებზე ფერადი ხალიჩაა და კახური შემოდგომა თავისკენ გიხმობს...

თელავში ბევრი რამაა სანახავი, უფრო სწორედ, ხელახლა სანახავი და იქ ჩასულ სტუმრებს ამაში ცალკეული ადამიანებიც ეხმარებიან. გერმანიშვილების, პროფესიონალი ექიმების ტრადიციულ ოჯახს ყველა იცნობს. პანდემიამდე მათ არაჩვეულებრივი სასტუმრო „ამელი“ გახსნეს. იქ ჩასულები მარტო პასიურად კი არ ისვენებენ, კახური შემოდგომის ფერხულში უშუალოდაც ებმევიან.

ჯერ ორი სიტყვა მასპინძლებზე მინდა გითხრათ, ბატონი ზურაბ გერმანიშვილი გახლავთ ნეიროქირურგი, რომელიც წლებია თბილისის პირველ კლინიკურ საავადმყოფოში მუშაობს და პაციენტებში ნდობითა და პატივისცემით სარგებლობს. ასევე მისი მეუღლე, თამარ ბარამიძეც ექიმია, სამედიცინო ინსტიტუტის პროფესორი და მარდალეიშვილის კლინიკის თავ-კისრის ონკოლოგი. მათი ვაჟი, ასლანი, მამის კვალს გაჰყვა, ნეიროქირურგია და გერმანიის ერთ-ერთ კლინიკაში 13 წლის განმავლობაში მუშაობდა, ამჟამად საქართველოშია.

ზურაბ გერმანიშვილი და თამარ ბარამიძე
ზურაბ გერმანიშვილი და თამარ ბარამიძე

როგორც ექიმებმა, კარგად იციან რა არის საჭირო იმისთვის, რომ ადამიანმა ფიზიკურის გარდა, სრული ფსიქოლოგიური რელაქსი განიცადოს. საკუთარი ხელით შექმნილ ედემში საამისო ყველა პირობაა: არაჩვეულებრივი გარემო, გემოვნებით მოწყობილი ლანდშაფტი და სასტუმრო, რომელიც ყოველ სეზონზე, იქ ჩასულებს, ახალ-ახალ სიურპრიზებს სთავაზობს. სასტუროს ხშირად სტუმრობდნენ უცხოელი ტურისტები და საქართველოს სხვადასხვა კუთხიდან ჩამოსულები, მათ შორის, ბევრი ცნობადი სახეც იყო. დანარჩენს თავად ბატონი ზურაბი გვეტყვის.

სტუმრები ისრაელიდან
სტუმრები ისრაელიდან

- ბატონო ზურაბ, შემოდგომა განსაკუთრებით აქტიურია თქვენთან...

- კოვიდამდე წელიწადის არც ერთ სეზონზე არ ვუჩიოდით სტუმრების ნაკლებობას და ყველა საჭირო პირობის დაცვით, მათ ახლაც ვმასპინძლებთ. ისევე ყოველ ოქტომბერს, ახლაც, 20 ოქტომბრიდან ჩვენთან მასტერ-კლასები დაიწყება. ეს იქნება სასიამოვნო პროცესი, რომლის დროსაც ჩვენთან მოსული სტუმარი ისწავლის: ჩურჩხლის ამოვლებას, პურის ცხობას, მწვადის შეწვას, ხინკლის მოხვევას. რა თქმა უნდა, მათ საშუალება ექნებათ, რომ ჩვენს მიერ დაწურული არაჩვეულებრივი საფერავი და გამოხდილი ჭაჭა დააგემოვნონ. მოკლედ ეს იქნება სახალისო და ამასთან, შემეცნებითი ფორმის დასვენება, რომელიც დაუვიწყარ მოგონებას აჩუქებს. ჩვენ გვინდა სულ სხვა თვალით დანახული თელავი დაგამახსოვროთ.

სტუმრები თონეში პურს აკრავენ
სტუმრები თონეში პურს აკრავენ

- თქვენი კრეატივი, „ფოტოსესია წარსულში“ რას გულისმობს?

- მოგეხსენებათ, როგორი აქტუალურია ფოტო-სესიის მოწყობა, რომლისთვისაც სხვადასხვა საინტერესო გარემოს ეძებენ. მე ვფიქრობ, რომ ის, რასაც ჩვენ ვთავაზობთ ნებისმიერი ასაკის სტუმრისთვის სახალისო იქნება. ჩვენთან შეიძლება ფოტოების გადაღება ძველ, რეტრო გარემოში და ამასთან ქართული ნაციონალური სამოსით. კარგად იცით, რომ ეროვნული ტანსაცმელი ეთნიკური კუთხეების მიხედვით როგორი მრავალფეროვნებით გამოირჩევა. მანდილოსნებისთვის გვაქვს ტრადიციული გრძელი კაბები და თავსაბურავები, მამაკაცებისთვის კი- ჩოხა-ახალუხი, გვაქვს ასევე ძველი ქალაქური სამოსიც, მოკლედ არჩევანი თქვენზეა.

ფოტოსესია
ფოტოსესია

-თქვენთან არის თონე, სადაც ნებისმიერ მსურველს შეუძლია საკუთარი ხელით ჩაკრული პური დააგემოვნოს...

- დიახ, თონეც გვაქვს. თავიდან უფრთხიან ხოლმე თონეში პურის ჩაკვრას, მაგრამ უკვე მეორე მცდელობაზე ვატყობთ, რომ ამას სიამოვნებით აკეთებენ. რა ჯობია თონეში საკუთარი ხელით ჩაკრულ პურს?

ეზოში მოწყობილი თონე
ეზოში მოწყობილი თონე

- აქ გაქვთ მარანი, სადაც ვფიქრობ, განსაკუთრებით უცხოელი სტუმრებისთვის, ბევრი გექნებათ სათქმელი...

- ჩვენთან მოსული უცხოელი სტუმრები სიამოვნებით აგემოვნებენ ქვევრის ღვინოს, აქვე, რა თქმა უნდა, მათ ქართული სუფრის ტრადიციაზე ვესაუბრებით, მოგვიანებით კი, ყველაფერს უკვე თვალნათლივ ვაჩვენებთ. განსაკუთრებული ხაზგასმით ვეუბნებით (ვინც იცის, მათ ვახსენებთ) იმ ფაქტს, რომ სიტყვა „ღვინო“ მსოფლიოში ქართული სიტყვისგან გავრცელდა, რადგან საქართველო ღვინის სამშობლოა, სადაც 8000 წელზე უფრო ადრინდელი ყურძნის წიპწებიანი თიხის დოქებია აღმოჩენილი, რომ ჩვენთან ადამიანმა ველური ვაზი „გააკულტურულა და გააშინაურა“.

ამელის მარანი
"ამელის" მარანი

- დარწმუნებული ვარ, რომ ამ მარანში განსაკუთრებით მამაკაცებს უყვართ დაყოვნება...

 - ერთ ასეთ ამბავს გავიხსენებ, რომელიც ცნობილი ფილმის, „ღვინის ქურდების“ ეპიზოდს გაგახსენებთ. ადრე ბალტისპირეთიდან გვყავდა სტუმრები, როდესაც ყველამ დაიძინა, მარნიდან ხმაური შემომესმა. ავდექი და რას ვხედავ?- ჩვენი ერთი სტუმარი მისულია ერთ-ერთ ქვევრთან, რომელსაც შუშა აქვს გადაფარებული და მას ახლოდან აკვირდება. მივედი და ვეკითხები: რა ხდება მეთქი? ასე მიპასუხა: ვერაფრით დავიჯერე, რომ ამ ქვევრებში მართლა ღვინო გაქვთო. მე გადავწიე შუშა და ვაჩვენე. სიცილით მითხრა: გამაგებინეთ, რა გაძინებთ ზემოთ ასე მშვიდად, როდესაც აქ ამდენი ღვინოაო?

ფოტოსესია ამელში
ფოტოსესია "ამელში"

- უკვე წარმომიდგენია, როგორც მოიქცეოდით...

- იქვე დავსხედით, ქვევრიდან ღვინო ამოვიღე და დილამდე მარანში ვიყავით. დილით მისი მეგობრებიც შემოგვიერთდნენ. აქ მარტო ღვინოში არაა საქმე, მათ ჩვენგან წაღებული სითბო და იმ დღის მოგონება, დარწმუნებული ვარ, დიდხანს გაჰყვებათ. ისიც ეცოდინებათ, რომ ქართული სტუმართ-მასპინძლობის ამბავი ლეგენდა არ არის...

ამელის ეზო
"ამელის" ეზო

- თქვენთან ბევრი ცნობადი სახე ყოფილა სტუმრად...

- დიახ, გამორჩეული სტუმრებიც გვყავდა. მარტო ის რად ღირს, რომ ჩვენს როიალზე თავისი ქართული მუსიკა ააჟღერეს ისეთმა კომპოზიტორებმა, როგორებიც არიან: ვაჟა აზარაშვილი და კახა ცაბაძე, მეამაყება, რომ ისინი აქედან ნასიამოვნები წავიდნენ.

რეკვიზიტები ფოტოსესიისთვის
რეკვიზიტები ფოტოსესიისთვის

- როგორც ექიმი, შექნილ ვითარებაში რას ურჩევდით ადამიანებს?

- ძალიან მიკვირს მათი, ვისაც ამ ფონზე, რაც მსოფლიოში და კერძოდ, ჩვენთანაცაა, ჯერ კიდევ ეჭვი ეპარებათ კოვიდის არსებობაში. ყველას მინდა კიდევ ერთხელ ვურჩიო, რომ გაითვალისწინონ ჩემი კოლეგა ეპიდემიოლოგების რეკომენდაციები. ჩვენს სასტუმროშიც მათ ზედმიწევნით მკაცრად ვიცავთ. სხვაგვარად არაფერი გამოვა...

ზურან გერმანიშვილი და მისი მეუღლე, თამარ ბარამიძე
ზურან გერმანიშვილი და მისი მეუღლე, თამარ ბარამიძე

- რაიმე, განსაკუთრებული კახური რეკომენდაცია ხომ არ გაქვთ?

- რა თქმა უნდა მაქვს, პროფილაქტიკისთვის ყველას ორას გრამ წითელ ღვინოს და ნივრიან ხაშლამას ვთავაზობთ. საერთოდ კი, მე, როგორც ნეიროქირურგი გირჩევთ, გონება გაათავსუფლონ ნეგატიური აზრებისგან, ატარეთ დამცავი პირბადეები და უარი თქვით ხელოვნური, შინაგანი ნიღბებისგან, რაც ცხოვრებასა და ადამიანებთან ურთიერთობაში ხელს გიშლით...

 

1985
მოდელი სალომე ღვინიაშვილი

ზღაპრული სანაპირო და შოკოლადისფერი რუჯი: სად და როგორ ისვენებენ ქართველი სელებრითები

634
(განახლებულია 17:27 22.05.2019)
ზაფხულის დაუვიწყარი დღეებისთვის მომზადება ქართველმა ვარსკვლავებმა წინასწარ დაიწყეს. შოკოლადისფერი რუჯი და ხავერდოვანი კანი არც ერთ მათგანს არ აკლია, თუმცა ზღვის ნაპირზე ან მთაში დასვენება მეტ ენერგიას, სილაღესა და კომფორტს ჰმატებთ.

Sputnik-საქართველო მოგიყვებათ, რომელ კურორტს ან ვისთან ერთად დასვენებას მიანიჭეს უპირატესობა ქართველმა სელებრითებმა...

ყველაზე სექსუალური და წარმატებული: აირჩიეთ ქართველი მაჩო>>

ყველასათვის საყვარელმა და შეუდარებელმა მოდელმა სალომე ღვინიაშვილმა 18 მაისს 35 წლის იუბილე ფეხბურთელ მეუღლესთან ზურა ხიზანიშვილთან ერთად აღნიშნა.

წყვილმა საგაზაფხულო არდადეგები თურქეთის ხუთვარსკვლავიან სასტუმროში მოიწყო. უამრავ მილოცვასთან ერთად სალომე ღვინიაშვილის ფოტოებმა 10 000 მოწონება დაიმსახურა.

ეკო ფანგანი – ქართული ტელესივრცის ერთ-ერთი გამორჩეული სახეა. მისი თვალშისაცემი სტილი და დამახასიათებელი ხმის ტემბრი არავის ტოვებს გულგრილს. ჟურნალისტმა და ტელეწამყვანმა მეგობრებთან ერთად ქალაქ ბოდრუმს მიანიჭა უპირატესობა და მზიანი დღეების გასატარებლად სწორედ თურქეთში გაემგზავრა. 

ვიცე-მის საქართველომ, მოდელმა და ცნობილი ჟურნალისტების ქალიშვილმა ნანუკა გოგიჩაიშვილმა რომაული არა, მაგრამ ავსტრიული არდადეგები ნამდვილად მოიწყო. მოდელმა ვენაში დაუვიწყარი დღეები გაატარა. ულამაზეს ტყავის მოსასხამსა და კაბაში გამოწყობილი სელებრითი ნება-ნება მისეირნობს ევროპის განსაკუთრებულ ქალაქში.

ნოე სულაბერიძე და ჯანეტ ქერდიყოშვილი სულ ახლახან დაოჯახდნენ და ერთად მოგზაურობას არ წყვეტენ. საზოგადოებამ მათი მარშრუტი ალბათ ზეპირად იცის... მათ იტალია, ავსტრია, თურქეთი მოიარეს. ამჯერად ულამაზესი წყვილი ისევ თურქეთშია.

ამ ქართველ მსახიობს ხშირად მე-20 საუკუნის უმშვენიერეს ვარსკვლავს ოდრი ჰეპბერნს ადარებენ. ნინო გაჩეჩილაძე საზოგადოებამ ყველასათვის ცნობილი სატელევიზიო სერიალიდან „ჩემი ცოლის დაქალებიდან“ გაიცნო. მისი გმირი ჩერჩეტი და ქარაფშუტა ქალბატონი კატოა, რომელიც მუდმივად ქალური ბედნიერების ძიებაშია. ამჯერად ნინო გაჩეჩილაძე „ფორმულა კრეატივის“ შემოქმედებით ჯგუფთან ერთად ეგვიპტეში, შარმ-ელ-შეიხშია გადაღებაზე.

ქეთევან ხატიაშვილი ტანმოვარჯიშეა, საზოგადოებამ გაიცნო პროექტით „ცეკვავენ ვარსკვლავები“ და მალევე შეაყვარა ყველას თავი. მისი მეუღლე ცნობილი ქართველი მორაგბე დავით კაჭარავაა. წყვილმა მაისის არდადეგები საქართველოში, ყაზბეგის მთებში მოიწყო. ეს წყვილი თქვენ ყურადღებას აუცილებლად მიიპყრობს.

634
ნახევარმთვარე

მთვარის კალენდარი: 24 ოქტომბერი რისი გაკეთება შეიძლება და რისი არა

0
(განახლებულია 10:51 22.10.2020)
გაეცანით ჩვენს ყოველდღიურ კალენდარს და შეიტყვეთ, რა საქმიანობა იქნება წარმატების მომტანი ამა თუ იმ დღეს ღამის მანათობლის განწყობის მიხედვით.

მთვარეს უზარმაზარი ძალა გააჩნია და დიდი ზეგავლენის მოხდენა შეუძლია ადამიანებზე, რადგან ყველა კოსმოსურ ობიექტს შორის დედამიწასთან ყველაზე ახლოს იმყოფება.

24 ოქტომბერი, შაბათი. ამ დღეს სატურნი მართავს. მზარდი მთვარე მერწყულის ნიშანშია.

მთვარე მერწყულის ნიშანში – ამ დღეს ჩნდება ინტერესი ყოველი ახლისადმი, მოულოდნელად მოდის საინტერესო იდეები, ადამიანებში იზრდება დამოუკიდებლობის წყურვილი, ექსტრავაგანტულობა, კომუნიკაბელურობა, ექსპერიმენტებისკენ სწრაფვა, შემოქმედებითი დამოკიდებულება ყველაფრისადმი.

კარგი დღეა მეგობრობისა და ფლირტისთვის. თუ გინდათ, რომ პარტნიორისთვის საყვარელი ადამიანი იყოთ, გახდით მისი მეგობარიც და არ შეუშინდეთ ორიგინალობას. მთვარეს მერწყულში უცნაური და უჩვეულო ნაცნობობა შეუძლია მოიტანოს. არ გაგიკვირდეთ ვითარების სწრაფი ცვლა, ეცადეთ, პარტნიორი იდეალურად არ აღიქვათ.

ასეთ დროს სასიყვარულო ურთიერთობებზე დიდ გავლენას ახდენს მეგობრების მოსაზრებები. თუ გაჩნდება მეგობრობა, ურთიერთგაგება, მაშინ რომანი, დიდი ალბათობით, დიდხანს გაგრძელდება. ეს უფრო ორიგინალური კავშირი იქნება, ვიდრე მგზნებარე და ვნებიანი.

რეკომენდებულია ძველი პროექტების განხორციელებისას კრეატიული იდეების გამოყენება, მცირე ფინანსური საქმეების გადაწყვეტა, ახალი პარტნიორების ძებნა, ინდივიდუალურად მუშაობა და გუნდური მუშაობის შეზღუდვა.

არარეკომენდებულია საკუთარ შესაძლებლობების ზედმეტად შეფასება, დატვირთვა სამუშაოზე.

არცთუ ხელსაყრელი დღეა მგზავრობისთვის, მოგზაურობის დაწყებისთვის.

თმის შეჭრა, შეღებვა: ამ დღეს სჯობს, თმის შეჭრისგან თავი შეიკავოთ. შეღებვისთვის კარგი დროა. მანიკურისთვის ძალზე ხელსაყრელი დღეა.

მებაღეობა:  ვინაიდან მერწყულის ნიშანი მებაღეობის მხრივ არცთუ ნაყოფიერი პერიოდია, შეიძლება მხოლოდ ბრძოლა მავნებლებთან, მცენარეების შეწამვლა, ნიადაგის გაფხვიერება, არ ღირს პიკირება, მცენარეების დარგვა და გადარგვა.

0