საპროტესტო აქცია ერევანში

დავით ბერძენიშვილი: ყველაზე მაგარი სომეხია ფაშინიანი

99
(განახლებულია 19:31 10.11.2020)
იმისთვის, რომ ფაშინიანის გადაწყვეტილების სისწორე გააცნობიერონ, სომხეთის მოქალაქეებს მრავალი წელი დასჭირდებათ, მიიჩნევს ქართველი პოლიტიკოსი.

თბილისი, 10 ნოემბერი – Sputnik. სომხეთის პრემიერ-მინისტრმა ნიკოლ ფაშინიანმა ქვეყანა ყარაბაღის ტვირთისგან გაათავისუფლა – ყარაბაღთან დაკავშირებული სომხეთი განწირული იყო, მიიჩნევს ოპოზიციური „რესპუბლიკური პარტიის“ ერთ-ერთი ლიდერი დავით ბერძენიშვილი.

ამბოხის ღამე ერევანში: 10 ნოემბრის მოვლენების ქრონიკა - ვიდეო>>

აზერბაიჯანის პრეზიდენტმა ალიევმა, სომხეთის პრემიერმა ფაშინიანმა და რუსეთის პრეზიდენტმა პუტინმა 9 ნოემბერს ხელი მოაწერეს განცხადებას მთიან ყარაბაღში ცეცხლისა და ყველა სამხედრო მოქმედების სრული შეწყვეტის შესახებ 2020 წლის 10 ნოემბრიდან. განცხადების თანახმად, აზერბაიჯანი და სომხეთი დაკავებულ პოზიციებზე რჩებიან, ასევე მათ უნდა გაცვალონ ტყვეები. ყარაბაღში რუსი მშვიდობისმყოფელები განთავსდებიან.

„ნიკოლ ფაშინიანმა, ნებსით თუ უნებლიეთ, ამხელა ყარაბაღული ტვირთისგან, მარწუხებისგან სომხეთის გათავისუფლების პროცესი წამოიწყო. ბევრი წელი დასჭირდებათ სომხებს ამის გასაცნობიერებლად... ბევრია წარსულზე ორიენტირებული ხალხი... ყველაზე მაგარი სომეხია ფაშინიანი. განწირული იყო ყარაბაღით დაბმული სომხეთი“, – დაწერა ბერძენიშვილმა თავის Facebook-გვერდზე.

პოლიტიკოსის აზრით, ახლა არსებითი მნიშვნელობა აღარ აქვს, შეძლებს თუ არა ფაშინიანი ხელისუფლების შენარჩუნებას.

„მან სიმართლეს გაუსწორა თვალი, იომა და, როგორც მოსალოდნელი იყო, მარცხდებოდა. გაბედა და, გაუბედავი ტერ-პეტროსიანისგან განსხვავებით, ადეკვატურად მოიქცა. სტეფანაკერტი, ლაჩინის დერეფანი სომხურ/რუსული კონტროლით ჯერჯერობით შეინარჩუნა. ტერ-პეტროსიანმა ვერც ხელისუფლება შეინარჩუნა და ორ ათეულ წელზე მეტიც დააკარგინა სომხეთს. სიმართლე ესაა, ჩემი აზრით“, – დაწერა ბერძენიშვილმა.

ფაშინიანის განცხადებას ყარაბაღში ომის შეწყვეტისა და ტერიტორიების დათმობის შესახებ სომხეთის მოქალაქეების მხრიდან წამიერი რეაგირება მოჰყვა. მთავრობის სახლთან შეკრებილი საპროტესტო აქციის მონაწილეები შენობაში შეიჭრნენ, ფაშინიანის კაბინეტი დაარბიეს და სახელმწიფო სიმბოლიკა გაიტაცეს. ამის შემდეგ ისინი პარლამენტისკენ დაიძრნენ, სადაც ეროვნული კრების სპიკერი არარატ მირზოიანი სცემეს. 

მასობრივი არეულობა სომხეთში: რა მოჰყვა ფაშინიანის განცხადებას ყარაბაღის შესახებ? - ფოტო>>

ბრძოლები მთიან ყარაბაღში 27 სექტემბერს დაიწყო, ხოლო კონფლიქტი რეგიონში 1988 წელს, როდესაც ყარაბაღის ავტონომიური რესპუბლიკის სომხურმა მოსახლეობამ აზერბაიჯანიდან გასვლის თაობაზე გამოაცხადა.

მას შემდეგ აზერბაიჯანი თავისი ტერიტორიული მთლიანობის შენარჩუნებაზე ზრუნავს, ხოლო სომხეთი არაღიარებული რესპუბლიკის ინტერესებს იცავს.

99
თემები:
ესკალაცია ყარაბაღში 2020 (155)
ნიკოლ ფაშინიანი

ფაშინიანმა საქართველოს მხარდაჭერისთვის მადლობა გადაუხადა

45
(განახლებულია 23:01 21.06.2021)
სომხეთის ცენტრალური საარჩევნო კომისიის წინასწარი მონაცემებით, საპარლამენტო არჩევნებში ფაშინიანის პარტიამ გაიმარჯვა.

თბილისი, 21 ივნისი - Sputnik. სომხეთის პრემიერ-მინისტრის მოვალეობის შემსრულებელმა ნიკოლ ფაშინიანმა საქართველოს და თავის კოლეგა ირაკლი ღარიბაშვილს მხარდაჭერისთვის მადლობა გადაუხადა.

ფაშინიანმა განცხადება გააკეთა პარტია „სამოქალაქო შეთანხმების“ ოფისში სომხეთის ვადამდელი საპარლამენტო არჩევნების წინასწარი შედეგების გამოცხადების შემდეგ.

„მინდა მადლობა გადავუხადო საქართველოს პრემიერ-მინისტრის, ჩემი საუკეთესო მეგობრის, ირაკლი ღარიბაშვილის ხელმძღვანელობით. დარწმუნებული ვარ, მომავალში გავაღრმავებთ და გავაუმჯობესებთ საქართველოსთან ურთიერთობას. ასევე მინდა, მშვიდობა ვუსურვო ჩვენს რეგიონს. სტაბილურობა და მშვიდობა - ჩვენი მნიშვნელოვანი დღის წესრიგია. ჩვენი პრიორიტეტია - ჩვენი ხალხისთვის მშვიდობისა და განვითარების ეპოქის შექმნა“, - აღნიშნა ფაშინიანმა.

სომხეთის ცესკოს წინასწარი მონაცემებით, ფაშინიანის პარტია „სამოქალაქო შეთანხმებამ“ საპარლამენტო არჩევნებზე ხმების 53,92% მიიღო. ყოფილი პრეზიდენტის, რობერტ ქოჩარიანის ბლოკ „სომხეთს“ ამომრჩეველთა 21,4%-მა დაუჭირა მხარი, კიდევ ერთი ყოფილი პრეზიდენტის სერჟ სარგსიანის ბლოკს „პატივი მაქვს“ – 5,23%-მა.

მიუხედავად იმისა, რომ ამ უკანასკნელს ხმათა 7% არ მიუღია (საარჩევნო ბარიერი), ის პარლამენტში მაინც მოხვდება, რადგან სომხეთის საკანონმდებლო ორგანოში სულ მცირე სამი პოლიტიკური ძალის არსებობა სავალდებულოა.

არჩევნების საბოლოო შედეგები კენჭისყრიდან მეშვიდე დღეს გამოცხადდება.

 

45
ნიკოლ ფაშინიანი

საქართველოს პრემიერმა ფაშინიანს გამარჯვება მიულოცა

27
(განახლებულია 22:59 21.06.2021)
საქართველოს მთავრობის მეთაური ირაკლი ღარიბაშვილი სომხეთის ახალ მთავრობასთან მჭიდრო თანამშრომლობის იმედს გამოთქვამს.

თბილისი, 21 ივნისი - Sputnik. საქართველოს პრემიერ-მინისტრმა ირაკლი ღარიბაშვილმა ნიკოლ ფაშინიანის პარტიას სომხეთის საპარლამენტო არჩევნებში გამარჯვება მიულოცა.

„სომხეთის პრემიერ-მინისტრ ნიკოლ ფაშინიანს გულითადად ვულოცავ წარმატებული არჩევნების ჩატარებას და, წინასწარი მონაცემებით, გამარჯვებას პარტია „სამოქალაქო შეთანხმებას“. გისურვებთ წარმატებას მომავალშიც! მოუთმენლად ველი მჭიდრო თანამშრომლობას სომხეთის მთავრობასთან“, - წერს ღარიბაშვილი სოციალურ ქსელ „ტვიტერში“.

სომხეთის ცესკოს წინასწარი მონაცემებით, ფაშინიანის პარტია „სამოქალაქო შეთანხმებამ“ საპარლამენტო არჩევნებზე ხმების 53,92% მიიღო. ყოფილი პრეზიდენტის, რობერტ ქოჩარიანის ბლოკს „სომხეთს“ ამომრჩეველთა 21,4%-მა დაუჭირა მხარი, კიდევ ერთი ყოფილი პრეზიდენტის სერჟ სარგსიანის ბლოკს „პატივი მაქვს“ – 5,23%-მა.

მიუხედავად იმისა, რომ ამ უკანასკნელს ხმათა 7% არ მიუღია (ბარიერი), ის პარლამენტში მაინც მოხვდება, რადგან სომხეთის საკანონმდებლო ორგანოში აუცილებელია სულ მცირე სამი პოლიტიკური ძალის არსებობა.

არჩევნების საბოლოო შედეგები კენჭისყრიდან მეშვიდე დღეს გამოცხადდება.

27
თურქეთის დროშა

საქართველო და თურქეთი თავისუფალი ვაჭრობის ხელშეკრულების გაფართოებას გეგმავენ

0
თავისუფალი ვაჭრობის შესახებ ხელშეკრულება საქართველოსა და თურქეთს შორის 2007 წელს გაფორმდა და ის გარკვეული საქონლის იმპორტზე გადასახადისგან გათავისუფლებას ითვალისწინებს.

თბილისი, 24 ივნისი - Sputnik. საქართველომ და თურქეთმა ქვეყნებს შორის თავისუფალი ვაჭრობის ხელშეკრულების ფარგლებში განიხილეს სოფლის მეურნეობის პროდუქტებზე ტარიფების შემდგომი ლიბერალიზაცია და დოკუმენტში სერვისებით ვაჭრობის ჩართვის შესაძლებლობა, იტყობინება საქართველოს ეკონომიკისა და მდგრადი განვითარების სამინისტროს პრესსამსახური.

ანკარამ უმასპინძლა საქართველო-თურქეთის თავისუფალი ვაჭრობის ხელშეკრულების შედეგად დაარსებული ერთობლივი კომიტეტის მე -12 სხდომას, რომლის ფარგლებში გაიმართა მოლაპარაკებები დოკუმენტში შესწორებების შეტანის შესახებ.

საქართველოს დელეგაციას ხელმძღვანელობდა ეკონომიკის მინისტრის მოადგილე გენადი არველაძე, ხოლო თურქეთის დელეგაციას - ვაჭრობის მინისტრის მოადგილე მუსტაფა თუზჯუ.

არველაძის თქმით, ქვეყნებს შორის თავისუფალი ვაჭრობის შესახებ შეთანხმებაში შეტანილი ცვლილება, განსაკუთრებით სოფლის მეურნეობის ტარიფების შემდგომი ლიბერალიზაციის შესახებ, გაზრდის ექსპორტს საქართველოდან თურქეთში და დაეხმარება ქართველ მწარმოებლებს, თავიანთი სოფლის მეურნეობის პროდუქტები თურქეთის ბაზარზე კონკურენტუნარიანი გახადონ. მისივე თქმით, ამ საკითხზე თურქულ მხარესთან კონსულტაციების პროცესი წარმატებით მიმდინარეობს.

კომიტეტის შემდეგი სხდომა თბილისში 2021 წლის ბოლოს გაიმართება, მანამდე კი კონსულტაციები ექსპერტების დონეზე ონლაინ რეჟიმში გაგრძელდება.

თავისუფალი ვაჭრობის ხელშეკრულება საქართველოსა და თურქეთს შორის 2007 წელს გაფორმდა და ის გარკვეული საქონლის იმპორტზე გადასახადისგან გათავისუფლებას ითვალისწინებს.

საქართველოს სავაჭრო პარტნიორებს შორის თურქეთი პირველ ადგილზეა – 2021 წლის იანვარ–მაისში, გასული წლის ანალოგიურ პერიოდთან შედარებით, მეზობელ ქვეყანასთან საგარეო სავაჭრო ბრუნვა 35%–ით გაიზარდა და 758,1 მლნ დოლარი – საქართველოს საერთო სავაჭრო ბრუნვის 15,1% შეადგინა.

გასულ წელს საქართველოსა თურქეთს შორის სავაჭრო ბრუნვა, 2019 წლის იმავე პერიოდთან შედარებით, 12,2%-ით შემცირდა და 1,6 მლრდ დოლარი შეადგინა.  მიუხედავად ამისა, 2020 წელსაც თურქეთი საქართველოს ერთ-ერთი მთავარი სავაჭრო პარტნიორი იყო.

საქართველოდან თურქეთში ექსპორტზე გადის ფეროშენადნობები, ტრიკოტაჟის ნაწარმი, ფოლადის ნახევარფაბრიკატები, შავი ლითონის ჯართი და სხვა საქონელი.

თურქეთიდან შემოდის 10 და მეტი ადამიანის გადასაყვანი ავტომობილები, სატვირთო ავტომობილი, შავი ლითონის მილები, მილაკები და ღრუ პროფილები, სამკურნალო პრეპარატი და ა.შ. 

0