თბილისი, 16 ივლისი — Sputnik. აზერბაიჯანელ ხალხს მობეზრდა მთიანი ყარაბაღის კონფლიქტის დარეგულირებაზე მოლაპარაკებები, განაცხადა პრეზიდენტმა ილჰამ ალიევმა მინისტრთა კაბინეტის თათბირზე.
პრეზიდენტის სიტყვას აზერბაიჯანის თავდაცვის სამინისტო აქვეყნებს საკუთარ საიტზე.
„აზერბაიჯანელ ხალხს მობეზრდა ეს უაზრო მოლაპარაკებები. ამიტომ, დაე, ისინი, ვინც ამ საკითხითაა დაკავებული და ამ დღეებში საშუამავლო წინადადებებს აყენებენ, დაფიქრდნენ ამაზე. აზერბაიჯანელი ხალხის მოთმინება უსაზღვრო არააა... აზერბაიჯანის ტერიტორიული მთლიანობა უნდა აღდგეს და ჩვენი აზრი ამ საკითხზე კატეგორიულია“, — განაცხადა ალიევმა.
ამასთან ქვეყნის ლიდერმა ხაზი გაუსვა, რომ „არავის ურჩევს გაუსწროს მოვლენებს აზრბაიჯანში“, ვინაიდან ამან „შესაძლოა ზიანი გამოიწვიოს“, რომ რესპუბლიკაში იციან, „რა, როდის და როგორ უნდა გაკეთდეს“.
ყარაბაღში კონფლიქტი 1988 წელს დაიწყო, როდესაც ავტონომიის მოსახლეობის სომხურმა ნაწილმა საბჭოთა აზერბაიჯანის შემადგენლობიდან საბჭოთა სომხეთის შემადგენლობაში გადასვლა მოისურვა. კონფლიქტი 1990-იანი წლების დასაწყისში სრულმასშტაბიან ომში გადაიზარდა. 1994 წელს ხელმოწერილი ოფიციალური ცეცხლის შეწყვეტის შეთანხმების მიუხედავად, რეგიონში პერიოდულად ხდება სამხედრო დაპირისპირება.
მიმდინარე წლის 12 ივლისს კი ახალი შეტაკებები დაიწყო აზერბაიჯანსა (თოვუზის რაიონი) და სომხეთს (ტავუშის ოლქი) შორის საზღვარზე, რომელიც საკმაოდ ახლოსაა საქართველოს საზღვართან და ასობით კილომეტრითაა დაშორებული არაღიარებული მთიანი ყარაბაღიდან, სადაც ამ დროისათვის სიმშვიდეა.
აზერბაიჯანი და სომხეთი ერთმანეთს აბრალებენ შეტაკების დაწყებასა და სროლებს. მსოფლიოს რიგმა ქვეყნებმა და საერთაშორისო ორგანიზაციებმა შეშფოთება გამოთქვეს შექმნილი ვითარების გამო და მხარეებს დიალოგისკენ მოუწოდეს.
