ტყის ხანძარი აზერბაიჯანში

აზერბაიჯანში ტყეები იწვის: ხელისუფლება არ გამორიცხავს, რომ ხანძარი განზრახ არის გაჩენილი

57
(განახლებულია 14:08 27.08.2019)
გირკანის ნაციონალური პარკის ხელმძღვანელობამ უკვე მიმართა სამართალდამცველ ორგანოებს ხანძრის გაჩენაში დამნაშავეთა მოძებნისა და დასჯის თხოვნით.

თბილისი, 27 აგვისტო – Sputnik. აზერბაიჯანში ტყის მასობრივი ხანძრები შეიძლება განზრახ იყოს გაჩენილი. როგორც „Sputnik-აზერბაიჯანი" იუწყება, ამის ალბათობა არ გამორიცხა ეკოლოგიისა და ბუნებრივი რესურსების სამინისტროსთან არსებული ბიომრავალფეროვნების დაცვისა და განსაკუთრებით დაცული ბუნებრივი ტერიტორიების განვითარების დეპარტამენტის დირექტორმა ჰიკმეთ ალიზადემ. მან მთელი ქვეყნის ტერიტორიაზე ბოლო კვირების განმავლობაში გაჩენილი ხანძრების მიზეზებზე ისაუბრა.

2019 წლის 20 აგვისტოდან მოყოლებული, აზერბაიჯანის ტერიტორიაზე ტყეებში ხანძრის არაერთი კერა გაჩნდა. ყველაფერი გირკანის ნაციონალური პარკიდან დაიწყო. მოგვიანებით ხანძრის ახალი კერები გაჩნდა კიდევ ცხრა რაიონში. ამჟამად ოთხ რაიონში ხანძარი ჩამქრალია. საგანგებო სიტუაციების სამინისტრომ ხანძრების სალიკვიდაციოდ 900 თანამშრომელი, 70 ერთეული ტექნიკა, ოთხი ვერტმფრენი და ერთი თვითმფრინავი-ამფიბია გაგზავნა.

როგორც ალიზადემ აღნიშნა, ყველა ხანძრის მიზეზი ადამიანური ფაქტორია: „ძირითადად, ეს ხდება ცეცხლთან უდიერად მოპყრობისა და სახანძრო უსაფრთხოების წესების დაუცველობის გამო. მაგრამ არ არის გამორიცხული, რომ ადამიანებმა თავად დაწვან მცენარეულობა".

რადგან ტყეები ჯერ კიდევ იწვის, ამჟამად ეკოლოგიისა და ბუნებრივი რესურსების სამინისტროს სპეციალისტებს უჭირთ გამოწვეული ზარალის შეფასება. ეკოლოგის თქმით, რუსეთთან და აშშ-თან შედარებით აზერბაიჯანს გაუმართლა, რადგან ადგილობრივი ხანძრები ვერ შეედრება ასობით ათასი ჰექტარის მასშტაბებს.

არსებული მონაცემებით, რესპუბლიკაში ცეცხლი მოედო ათი, ხუთი ან ორი ჰექტარის ფართობის მონაკვეთებს.

„ჩვენ დაინტერესებული ვართ, ყოველი შემთხვევა ცალ-ცალკე გამოვიძიოთ. გირკანის ნაციონალურ პარკში ხანძრის შემდეგ ხელმძღვანელობამ მიმართა პოლიციას დამნაშავეთა პოვნის თხოვნით. ამავდროულად გამოძიებას აწარმოებენ საგანგებო მდგომარეობის სამინისტროს სპეციალისტები. იმედი გვაქვს, რომ დამნაშავეთა წინააღმდეგ სისხლის სამართლის დევნა დაიწყება. მაშინაც კი, თუ ეს უბრალოდ დაუდევრობა იყო, ბუნებას ძალიან დიდი ზიანი მიადგა – მუშაობენ ვერტმფრენები, სპეცტექნიკა, ადამიანები მოწყვეტილი არიან თავიანთ ძირითად საქმიანობას", – განაცხადა ალიზადემ.

საგანგებო სიტუაციების სამინისტროს თანამშრომლებთან ერთად ხანძრების ჩასაქრობად მობილიზებული არიან ეკოლოგიისა და ბუნებრივი რესურსების სამინისტროს თანამშრომლები.

აღსანიშნავია, რომ 2018 წელს ეკოლოგიის სამინისტრომ დაიწყო ტყეებში ვიდეოკამერების დამონტაჟება. თუმცა აპარატურამ ხანძრის გაჩენის მომენტები ვერ დააფიქსირა. კამერები მხოლოდ გარკვეულ ადგილებშია განთავსებული და სრულად ვერ მოიცავს ყველა მონაკვეთს: ტყეები აზერბაიჯანის რესპუბლიკის საერთო ფართობის 11%-ს იკავებს. 

ხანძრის კერების საბოლოო ლიკვიდაციის შემდეგ ეკოლოგები შემოდგომაზე აპირებენ გამწვანების აქციის ჩატარებას ტყის დამწვარი მონაკვეთების აღსადგენად.

57
თემები:
მსოფლიო დღეს (1919)
კომპიუტერთან მუშაობა

სომხეთი ინტერნეტის გარეშე დარჩება? Caucasus Online-ის აქციები ბაქოს ხელშია

101
აზერბაიჯანის მხარეს არაერთხელ უცდია Caucasus Online-ის აქციების ხელში ჩაგდება, მაგრამ წინა წლებში საკითხი პოლიტიკურ დონეზე წყდებოდა. ამჯერად კი შეთანხმება ხელისუფლების გარეშე შედგა.

თბილისი, 7 აგვისტო - Sputnik. ინტერნეტკავშირის - Caucasus Online-ის მაგისტრალური არხის აქციების 49%-ის მიყიდვამ აზერბაიჯანელი მეწარმისთვის სომხეთში შეშფოთება გამოიწვია. ექსპერტების შეფასებით, გარიგება ბაქოს რეგიონულ ჰაბად აქცევს, რისკენაც ის არაერთი წელია, ისწრაფვის. მეტიც, ეს აზერბაიჯანის მხარეს სომხეთის ინტერნეტ-ტრაფიკის მონიტორინგის თუ არა, სულ მცირე, გაანალიზების შესაძლებლობას მისცემს.

Sputnik-სომხეთთან საუბრისას ექსპერტმა საინფორმაციო უსაფრთხოებისა და ტექნოლოგიების სფეროში აღნიშნა, რომ Caucasus Online-ის შეძენა აზერბაიჯანს სტრატეგიული თვალსაზრისით მრავალ შესაძლებლობას აძლევს, უხეშად რომ ვთქვათ, ბაქოს ხელ-ფეხს უხსნის.

ამ მოსაზრებას ეთანხმებიან ქართველი ექსპერტებიც. ინტერნეტ-კომუნიკატორის მისამართით უკვე გაისმა არაერთი კრიტიკული შეფასება. ამასთან, ერევანში უკვე ცდილობენ ქართულ მხარესთან თანამშრომლობის გზით შესაძლო რისკების მინიმუმამდე შემცირებას.

რა მოხდა?

ქართული კომპანია Caucasus Online - არის ოპტიკური კაბელის ოპერატორი, რომელიც საქართველოდან ბულგარეთის მიმართულებით შავი ზღვის ფსკერზე გადის. ესაა ევროპასა და სამხრეთ კავკასიას შორის უმსხვილესი ინტერნეტარხი. კომპანიის მთავარი აქციონერები არიან ქართველი ინვესტორები, რომელთა ნაწილი ევროპაშია რეგისტრირებული.

17 ივლისს საქართველოს პარლამენტმა 88 ხმით მიიღო მთავრობისა და კომუნიკაციების ეროვნული კომისიის მიერ ინიცირებული შესწორებები კანონში „ელექტრონული კომუნიკაციების შესახებ“. ცვლილებები მარეგულირებელს უფლებას აძლევს, დანიშნოს სპეციალური მმართველები კომპანიებში, რომლებიც მის მოთხოვნებს არ ასრულებენ.

ქართულ მასმედიაში ამას მოჰყვა ინფორმაციის „გაჟონვა“ მარეგულირებლის გვერდის ავლით გარიგების, კერძოდ, ინტერნეტკომპანია Caucasus Online-ის აქციების 49%-ის აზერბაიჯანისთვის მიყიდვის შესახებ. მეტიც, აზერბაიჯანში აშშ-ის ყოფილი ელჩის, მეთიუ ბრაიზას ინფორმაციით, აქციები 61 მილიონ აშშ დოლარად გაიყიდა.

იმავე მასმედიის ცნობით, აქციები შეიძინა აზერბაიჯანის ხელისუფლებასთან დაახლოებულმა მეწარმე ნასიმ გასანოვმა. იგი არის ასევე ნავთობის ბიზნესში უმსხვილესი ჰოლდინგის - კომპანია NEQSOL-ის - მფლობელი. ქართული მხარის ინფორმაციით, ინტერნეტკომპანიის საკუთარი წილი გაყიდა საქართველოს ყოფილ ხელისუფლებასთან („ნაციონალური მოძრაობა“) დაახლოებულმა ბიზნესმენმა ხვიჩა მაქაცარიამ.

ამასთან, Caucasus Online-ის გაყიდვის შესახებ არ აცნობეს მარეგულირებელს - საქართველოს კომუნიკაციების ეროვნულ კომისიას, რაც „ელექტრონული კომუნიკაციების შესახებ“ კანონის დარღვევაა. კანონის თანახმად, აქციების 5 ან მეტი პროცენტის გაყიდვის შემთხვევაში, ამის თაობაზე კომისიას უნდა ეცნობოს. 

Caucasus Online ერთხელ უკვე დაჯარიმდა დარღვევის გამო, როდესაც კომპანია „რკინიგზის ტელეკომში“ თავისი წილი გაყიდა. კომპანიამ „საქართველოს რკინიგზის ტელეკომი“ 2010 წელს შეიძინა. ამან მას მისცა შესაძლებლობა, შემოსულიყო სამხრეთ კავკასიის რეგიონში, ასევე გასულიყო ირანსა და ერაყში.

საქართველოში წინააღმდეგი არიან

მთელ ამ ისტორიას ქართველი ექსპერტების შეუმჩნევლად არ  ჩაუვლია. ისინი აქტივების გაყიდვის გადაწყვეტილებას სასტიკად აკრიტიკებენ. ბევრი საუბრობს ბაქოს გეგმებზე, ხელში ჩაიგდოს ინტერნეტ-კომუნიკაციები და ერთადერთი კაბელი, რომლითაც ევროპიდან საქართველოს, სომხეთსა და აზერბაიჯანს 2016 წლიდან ინტერნეტი მოეწოდებათ. კაბელი შავი ზღვის ფსკერზე გადის.

იმ დროს გაყიდვის საკითხი პოლიტიკურ დონეზე დაიხურა საქართველოს ყოფილი პრემიერ-მინისტრ გიორგი კვირიკაშვილის განცხადების შემდეგ იმის შესახებ, რომ კაბელი და კომპანია არ იყიდება, რადგან საქართველოსთვის სტრატეგიული მნიშვნელობა აქვს.

პოლიტიკურ მეცნიერებათა დოქტორმა ვახტანგ მაისაიამ Sputnik-სომხეთის კორესპონდენტთან საუბრისას აღნიშნა, რომ ამით ბაქო ცდილობს, საკუთარ თავზე მოირგოს რეგიონში ინტერნეტჰაბის როლი.

რაც შეეხება საინფორმაციო უსაფრთხოების სფეროში შესაძლო რისკებს, მან აღნიშნა, რომ რისკები შესაძლოა არსებობდეს, თუმცა დასაწყისისთვის აუცილებელია გაგება, რამდენად გაფართოვდა აზერბაიჯანული მხარის უფლებამოსილება.

ზოგიერთი ქართველი ექსპერტი შიშობს, რომ ეს აზერბაიჯანს ხელ-ფეხს გაუხსნის და იგი რეგიონში თამაშის წესების კარნახს დაიწყებს.

Caucasus Online-ის ყოფილმა მფლობელმა მამია სანადირაძემ ტელეარხ „იმედის“ ეთერში აღნიშნა, რომ საქართველოსთვის სასიცოცხლოდ მნიშვნელოვანია, ფლობდეს დამოუკიდებელ კაბელს ევროპაში და ამას აქსიომა უწოდა. მისი შეფასებით, ინტერნეტის უსაფრთხოდ მიღებას ქვეყნისთვის სტრატეგიული მნიშვნელობა აქვს.

რა საფრთხეს შეიძლება უქმნიდეს ეს სომხეთს?

გარიგების შესახებ ცნობამ, ბუნებრივია, მეზობელ სომხეთში შეშფოთება გამოიწვია. როგორც სომეხმა ექსპერტმა ინტერნეტკომუნიკაციების სფეროში Sputnik-სომხეთთან საუბრისას აღნიშნა, აქციების გაყიდვა არ ნიშნავს, რომ აზერბაიჯანის მხარე სომხეთს ინტერნეტს გამოურთავს.

„ჯერ ერთი, ესაა 49% და არა საკონტროლო პაკეტი, მეორეც, Caucasus Online საქართველოს ტერიტორიაზე მდებარეობს და ნაკლებ მოსალოდნელია, საქართველოს ხელისუფლებამ ვინმეს ხაზების ბლოკირების ნება დართოს“, - აღნიშნა მან.

თუმცა ტექნიკურ დონეზე ეს აზერბაიჯანელ პარტნიორებს ტრაფიკის გაანალიზების, გარკვეული კანონზომიერების პოვნისა და ამის საფუძველზე დასკვნების გაკეთების შესაძლებლობას მისცემს. ეს მათთვის ერთმნიშვნელოვნად ხელსაყრელია.

„ისინი ნამდვილად გამოიყენებენ ტელესაკომუნიკაციო ინფრასტრუქტურას, რათა თავიანთი პროექტები განავითარონ და ჩვენები „ჩაძირონ“, - აღნიშნა მან.

სომეხი ექსპერტის შეფასებით, Caucasus Online-ის აქციების შეძენა აზერბაიჯანს საშუალებას მისცემს, დააჩქაროს TASIM-ის პროექტის რეალიზება (ტელესაკომუნიკაციო ტრანზიტი დასავლეთ ევროპიდან აღმოსავლეთ აზიის მიმართულებით). იგი აერთიანებს ევროპის, საქართველოს, აზერბაიჯანის, თურქმენეთის, ყაზახეთის ტელეკომუნიკაციებს მომავალში აზიასა და ჩინეთში გასვლის პერსპექტივით.

ამგვარად, ამ ნაწილის გაძლიერებამ შესაძლოა ხელი შეუშალოს სომხეთის გეგმებს, გააფართოვოს თავისი სატრანზიტო ფუნქციები ახლო აღმოსავლეთისა და ცენტრალური აზიისკენ.

ექსპერტის თქმით, ამ მიზნით სომხეთში უკვე შექმნილია არაოფიციალური ჯგუფი, რომელიც სომხური კომპანიების რეგიონული ტელეკომ-ინფრასტრუქტურის განვითარებისა და გავრცელების გეგმაზე იმუშავებს.

იგი სომხეთს ურჩევს, გამოიყენოს უკმაყოფილება საქართველოში და შექმნას კოოპერაციები. მნიშვნელოვანია საკუთარი ინტერესების, რეგიონული გეგმების ხორცშესხმა.

„ამასთან, ჩვენ ქართველ მარეგულირებელთან და სამინისტროსთან, ინტერნეტის განვითარების სტრატეგიის ფარგლებში, უნდა შევთანხმდეთ კონსოლიდირებულ მოქმედებაზე რეგიონული ინფრასტრუქტურის შესაქმნელად, რომელიც სომხეთსა და საქართველოს გააერთიანებს“, - განაცხადა მან.

როგორც ცნობილია, 2019 წლის ნოემბერში საქართველოს ეკონომიკისა და მდგრადი განვითარების მინისტრის მოადგილე ნიკოლოზ ალავიძემ განაცხადა, რომ Caucasus Online არ გაიყიდებოდა ყოველმხრივი განხილვის გარეშე.

საქართველოზე, სხვადასხვა შეფასებით, მოდის სომხეთის საგარეო ინტერნეტ-ტრაფიკის 80%. გარდა ამისა, სომხეთი იყენებს კიდევ ორ კაბელს რუსეთში - შავი ზღვისას და სახმელეთოს. ტრაფიკის 20% მოდის ირანისკენ გამავალ კაბელებზე.

სომხეთის ოპერატორები ასრულებენ ირანში, ავღანეთსა და კატარში ინტერნეტის ტრანზიტის ფუნქციას.

101
სასაზღვრო პუნქტი „წითელი ხიდი

საქართველოდან სამშობლოში აზერბაიჯანის კიდევ 200 მოქალაქე ბრუნდება

380
(განახლებულია 20:50 06.08.2020)
აზერბაიჯანის მოქალაქეებთან ერთად საქართველოდან ევაკუირებული იქნებიან ის ქართველებიც, რომლებსაც აზერბაიჯანში ცხოვრების უფლება აქვთ

თბილისი, 6 აგვისტო — Sputnik. საქართველოდან აზერბაიჯანის კიდევ 200 მოქალაქე სამშობლოში დაბრუნდება, იუწყება Sputnik–აზერბაიჯანი.

აზერბაიჯანის მოქალაქეებთან ერთად საქართველოდან გაყვანილი იქნებიან ის ქართველებიც, რომლებსაც აზერბაიჯანში ცხოვრების უფლება აქვთ.

პარასკევს, 7 აგვისტოს ყველა მათგანს თბილისის ლაბორატორიაში COVID–19–ზე ტესტირება ჩაუტარდება. ვისც ვირუსი არ აღმოაჩნდება, სპეციალურ სერტიფიკატს გადასცემენ.

შემდეგ მათ 8 აგვისტოს სპეციალური ავტობუსებით თბილისში აზერბაიჯანის საელჩოდან სასაზღვრო პუნქტ „წითელ ხიდამდე“ გადაიყვანენ.

პანდემიის პერიოდში აზერბაიჯანში საქართველოს გავლით ათასზე მეტი აზერბაიჯანის მოქალაქე გავიდა.

380
თემები:
COVID-19-ის პანდემია მსოფლიოში
რუსთავი

თბილისის შემდეგ რუსთავში: გაეროს განვითარების პროგრამამ მოხუცებულთა სახლს ტექნიკა გადასცა

0
(განახლებულია 15:32 07.08.2020)
საქართველოში კორონავირუსის გავრცელების პირველივე დღეებიდან UNDP პანდემიასთან ბრძოლისა და ამ მხრივ, საქართველოს ხელშეწყობის მოწინავე ხაზზეა.

თბილისი, 7 აგვისტო  — Sputnik.  გაეროს განვითარების პროგრამამ (UNDP) ქალაქ რუსთავის მოხუცებულთა სახლს საჩუქრად სამედიცინო და საყოფაცხოვრებო ტექნიკა გადასცა, ნათქვამია რუსთავის მერიის ვებგვერდზე გავრცელებულ განცხადებაში.

UNDP–იმ ამ დღეებში ანალოგიური ჰუმანიტარული დახმარება აღმოუჩინა თბილისის მოხუცებულთა სახლს.

საქართველოში გაეროს მუდმივი კოორდინატორი და პროგრამის წარმომადგენელი ლუიზა ვინტონი რუსთავის მოხუცთა სახლს, საქართველოს რეგიონული განვითარებისა და ინფრასტრუქტურის მინისტრის მოადგილე მზია გიორგობიანთან და რუსთავის მერ ირაკლი ტაბაღუასთან ერთად ესტუმრა.  

როგორც განცხადებაშია ნათქვამი, ლუიზა ვინტონმა მოხუცთა სახლს სამედიცინო და საყოფაცხოვრებო აღჭურვილობა, მათ შორის ჟანგბადის კონცენტრატორი, მაცივრები, გაზქურა, სამზარეულოს სავენტილაციო სისტემა და მინიტრაქტორი გადასცა.

 „კორონავირუსის პანდემია განსაკუთრებულ საფრთხეს წარმოადგენს უსახლკარო და მზრუნველობამოკლებული ადამიანებისთვის. ამ  თვალსაზრისით თავშესაფრების რაოდენობა ნამდვილად მისასალმებელია. UNDP-ის მიზანია თავშესაფრების უსაფრთხოებისა და საცხოვრებელი პირობების გაუმჯობესება, პანდემიის შემდეგ კი გრძელვადიანი სისტემური გადაწყვეტილებების მოძიება მოწყვლადი მოსახლეობის დასახმარებლად“, – განაცხადა ლუიზა ვინტონმა.

საყოფაცხოვრებო ტექნიკისა და სამედიცინო აღჭურვილობის შეძენა, გაეროს განვითარების პროგრამის ინიციატივით, დანიის მთავრობისა და გაეროს პანდემიაზე რეაგირებისა და აღდგენის ფონდის ფინანსური ხელშეწყობით განხორციელდა.

საქართველოში კორონავირუსის გავრცელების პირველივე დღეებიდან UNDP პანდემიასთან ბრძოლისა და ამ მხრივ, საქართველოს ხელშეწყობის მოწინავე ხაზზეა. ქვეყანაში შექმნილი ვითარების გათვალისწინებით ორგანიზაცია ცვლილებები შეიტანა მიმდინარე პროექტებში, რომელთა ჯამური ღირებულება წელიწადში 20 მილიონ აშშ დოლარს შეადგენს.

0