საქართველოში საპარლამენტო არჩევნები იწყება

საქართველოში საპარლამენტო არჩევნები იწყება

94
(განახლებულია 08:24 31.10.2020)
საქართველოში 2020 წლის საპარლამენტო არჩევნები, კორონავირუსის პანდემიიდან გამომდინარე, უჩვეულოდ და განსაკუთრებული წესებით ჩატარდება

თბილისი, 31 ოქტომბერი – Sputnik. საქართველოში საპარლამენტო არჩევნები ტარდება. საარჩევნო უბნები ზუსტად 08:00 საათზე გაიხსნება.

დღეს საპარლამენტო არჩევნების პარალელურად საკრებულოების შუალედური, მერების რიგგარეშე და აჭარის უმაღლესი საბჭოს არჩევნები იმართება.

ინსტრუქცია: როგორ მივიღოთ მონაწილეობა კენჭისყრაში და არ ვავნოთ ჯანმრთელობას>>

2020 წლის საპარლამენტო არჩევნებისთვის ცესკომ დაარეგისტრირა 48 პარტია და ორი ბლოკი. ქვეყნის მოსახლეობა 150 დეპუტატს აირჩევს – 120–ს პროპორციული, 30–ს კი მაჟორიტარული წესით.

არჩევნები განსაკუთრებულ და უჩვეულო გარემოში ტარდება – კორონავირუსის გამო, მოსახლეობის დაცვის მიზნით, საარჩევნო უბნებზე განსაკუთრებული წესები მოქმედებს.

პანდემიური ვითარებიდან გამომდინარე ცესკომ იმ მოქალაქეებისთვის, რომლებიც კოვიდ-ცენტრებში, საკარანტინო სივრცეებსა და თვითიზოლაციაში იმყოფებიან, 127 სპეციალური საარჩევნო უბანი შექმნა. გადასატანი საარჩევნო ყუთი 4 ათასზე მეტმა ამომრჩეველმა მოითხოვა. 

COVID-19–ის პანდემიის გამო გარკვეული ცვლილებები შევიდა პენიტენციურ დაწესებულებებში არჩევნების ჩატარების წესთან დაკავშირებით, სადაც სულ 11 საარჩევნო უბანი გაიხსნება.

არჩევნები გისოსებს მიღმა: როგორ მიიღებენ არჩევნებში მონაწილეობას ქართველი პატიმრები?>>

საქართველოს საარჩევნო კოდექსში შეტანილი ცვლილებების თანახმად, წელს პატიმრების რაოდენობა, რომელთაც არჩევნებზე ხმის უფლება აქვთ, გაზრდილია, რადგან კენჭისყრაში მონაწილეობა შეუძლიათ არა მხოლოდ ნაკლებად მძიმე დანაშაულის ჩამდენ პატიმრებს, არამედ იმათაც, ვინც მძიმე დანაშაულებისთვისაა გასამართლებული.

არჩევნებს ადგილობრივი და საერთაშორისო დამკვირვებლები მიადევნებენ თვალს, მათ შორის – ონლაინ.

პანდემიის გამო რამდენიმე ავტორიტეტულმა საერთაშორისო ორგანიზაციამ არჩევნებზე დაკვირვების მასშტაბი შეამცირა.

ეუთო გეგმავდა ქვეყანაში 250 დამკვირვებლის გამოგზავნას, თუმცა პანდემიის გამო ეს გადაწყვეტილება შეიცვალა. ქვეყანაში იმუშავებს 13 ექსპერტისგან და 27 გრძელვადიანი დამკვირვებლისგან დაკომპლექტებული მისია.

ევროკავშირმა გადაწყვიტა, არ გამოგზავნოს სადამკვირვებლო მისია საქართველოში.

პროცედურები არჩევნების შემდეგ: როდის ეყოლება საქართველოს ახალი მთავრობა>>

აშშ-ის ეროვნულმა დემოკრატიულმა ინსტიტუტმა (NDI) და აშშ-ის საერთაშორისო რესპუბლიკურმა ინსტიტუტმა ასევე უარი თქვეს საქართველოში სპეციალური სადამკვირვებლო მისიების გამოგზავნაზე – ისინი კენჭისყრის პროცესს შორიდან, საქართველოში მყოფი თანაშემწეების დახმარებით დააკვირდებიან.

მაგრამ დამკვირვებლების გარეშე საქართველო არ დარჩება – არჩევნებზე დაკვირვებისთვის 120 ქართული და 48 საერთაშორისო ორგანიზაცია დარეგისტრირდა – სულ 47 ათასზე მეტი დამკვირვებელი. საქართველოში დამკვირვებლები ჩამოვლენ პოლონეთიდან, ბულგარეთიდან, ყაზახეთიდან, აზერბაიჯანიდან.

ეუთოს საპარლამენტო ასამბლეამ თბილისში 31 ოქტომბრისთვის 28 დამკვირვებელი გამოგზავნა.

რაც შეეხება სპეციალისტებს დიდი ბრიტანეთიდან, ნიდერლანდებიდან, ესტონეთიდან, ავსტრიიდან, იტალიიდან, არჩევნებს ამ და სხვა ქვეყნების საელჩოების თანამშრომლები დააკვირდებიან.

კენჭისყრაში მონაწილეობა შეუძლიათ როგორც საქართველოში, ისე უცხოეთის ქვეყნებში მცხოვრებ საქართველოს მოქალაქეებს. სულ ერთიან საარჩევნო სიაში დარეგისტრირებულია 3 526 032 ამომრჩეველი. აქ შედიან საქართველოს ის მოქალაქეებიც, რომლებიც ქვეყნის ფარგლებს გარეთ ცხოვრობენ (14 170).

ცესკომ გუშინ დააზუსტა ის ქვეყნები, სადაც საარჩევნო უბნები პანდემიის გამო არ გაიხსნება. კერძოდ, უბნები არ გაიხსნება აზერბაიჯანში, ხოლო საბერძნეთში ხუთიდან მხოლოდ სამი უბანი გაიხსნება.

როგორ შეძლებენ უცხოეთში მყოფი მოქალაქეები კენჭისყრაში მონაწილეობას? ინსტრუქცია მზადაა>>

გარდა ამისა, საარჩევნო უბნები არ გაიხსნება რუსეთშიც, რომელთანაც საქართველოს 2008 წლიდან აქვს გაწყვეტილი დიპლომატიური ურთიერთობები.

94
თემები:
საქართველოს საპარლამენტო არჩევნები 2020 (596)
ცესკო

არჩევნების შედეგების გამოცხადების თარიღი ცნობილია: რას მოიმოქმედებს ოპოზიცია

35
საბოლოო შედეგების შეჯამების შემდეგ საქართველოს პრეზიდენტი 10 დღის განმავლობაში მეათე მოწვევის პარლამენტის პირველ სხდომას დანიშნავს

თბილისი, 1 დეკემბერი – Sputnik. ცენტრალური საარჩევნო კომისია 3 დეკემბრის სხდომაზე საპარლამენტო არჩევნების საბოლოო შედეგებს შეაჯამებს, ნათქვამია უწყების განცხადებაში.

ცესკოს ვებგვერდზე განთავსებული განცხადების თანახმად, სხდომაზე დაგეგმილია მაჟორიტარული არჩევნების მეორე ტურის შედეგების და საპარლამენტო არჩევნების საერთო შედეგების შეჯამება.

საქართველოში საპარლამენტო არჩევნები 31 ოქტომბერს ჩატარდა. შედეგად, 30 მაჟორიტარული ოლქიდან 17-ში დაინიშნა მეორე ტური. 22 ნოემბერს მაჟორიტარ დეპუტატთა არჩევნების მეორე ტური გაიმართა. ოპოზიციის კანდიდატებმა უარი თქვეს მასში მონაწილეობაზე, თუმცა ნომინალურად მაინც იყვნენ ბიულეტენებში.

საბოლოო შედეგების შეჯამების შემდეგ, საქართველოს პრეზიდენტი სალომე ზურაბიშვილი მეათე მოწვევის პარლამენტის პირველ სხდომას დანიშნავს. ამისთვის მას 10 დღე ექნება.

რთული არჩევნები

ოფიციალური შედეგების თანახმად, ქვეყნის მმართველმა პარტიამ პირველად საქართველოს პოლიტიკურ ისტორიაში ძალაუფლების შენარჩუნება შეძლო.

წინასწარი გათვლებით, პარტია „ქართული ოცნება - დემოკრატიულ საქართველოს" ქვეყნის საკანონმდებლო ორგანოში 90 ადგილი ექნება, რაც მას საშუალებას მისცემს პარლამენტის თავმჯდომარე და კომიტეტის თავმჯდომარეები აირჩიოს, ჩამოაყალიბოს მთავრობა და მიიღოს ნებისმიერი კანონი, ოპოზიციასთან შეთანხმების გარეშე.

რვა ოპოზიციური პარტია და ბლოკი, რომლებმაც საარჩევნო ბარიერი გადალახეს, გაინაწილებენ დარჩენილ 60 ადგილს და გავლენის მოხდენას მხოლოდ საქართველოს კონსტიტუციასა და მიწის შესახებ კანონში ცვლილებების მიღებაზე შეძლებენ.

ამასთან, ოპოზიცია არ ეთანხმება არჩევნების შედეგებს და ამტკიცებს, რომ მმართველმა პარტიამ გამოიყენა თავისი გავლენა ცესკოში და არჩევნები გააყალბა. უფრო მეტიც, ოპოზიციური პარტიები არ აპირებენ თავიანთი საპარლამენტო მანდატების გამოყენებას და თავიანთი პროპორციული სიების ჩახსნას აპირებენ.

გარდა ამისა, ბოლო რამდენიმე დღის განმავლობაში ოპოზიციამ აქტიური კონსულტაციები დაიწყო აქციის მომზადებაზე, რომელიც პარლამენტის სხდომის პირველ დღეს გაიმართება. ის ჩატარდება მეტეხის ტაძრის ეზოში, სადაც პარლამენტში შესული ოპოზიციონერი დეპუტატები ხელს მოაწერენ მემორანდუმს, რომ არ შევლენ პარლამენტში და რიგგარეშე სამართლიან არჩევნებს მოითხოვენ.

ოპოზიციის მხრიდან საბოლოო ბოიკოტამდე, საერთაშორისო შუამავლები - ევროკავშირისა და აშშ-ს საელჩოები კვლავ ცდილობენ იპოვონ კომპრომისი მმართველ პარტიასა და ოპოზიციას შორის, რათა მან მანდატებზე უარი არ თქვას.

მხარეებმა უკვე ჩაატარეს მოლაპარაკებების ორი რაუნდი, რომელიც ოპოზიციის მხრიდან რიგგარეშე არჩევნების მოთხოვნით დასრულდა. რაც შეეხება მმართველ პარტიას, „ქართულმა ოცნებამ“ თავისი წინადადებები უნდა წარადგინოს მოლაპარაკებების მესამე რაუნდში, რომლის თარიღი ჯერ არ არის ჩანიშნული.

იმავდროულად, პარლამენტის პირველი სხდომა უნდა ჩატარდეს 13 დეკემბრამდე და თუ შეთანხმება ვერ იქნება მიღწეული, მას მხოლოდ და მხოლოდ პარტია „ქართული ოცნება - დემოკრატიული საქართველო“ დაესწრება და პარლამენტის მთელ სტრუქტურას თავისი რიგებიდან აირჩევს.

ამ შემთხვევაში პარლამენტში იქნება 90 კაციანი ერთი ფრაქცია, რომელიც მომდევნო ოთხი წლის განმავლობაში გამართავს სხდომებს და მიიღებს ყველა კანონს ოპონენტების კრიტიკის გარეშე.

მისი პირველი ორი გადაწყვეტილება იქნება მინისტრთა კაბინეტის დამტკიცება და 2021 წლის ბიუჯეტის მიღება.

35
თემები:
საქართველოს საპარლამენტო არჩევნები 2020 (596)
ზაალ უდუმაშვილი

ქართული ოპოზიციის გეგმები შეიცვალა: მზადდება ახალი დეკლარაცია

98
(განახლებულია 22:08 30.11.2020)
პარლამენტში შესული ოპოზიციური პარტიების ლიდერებს კვლავ ძველი მოთხოვნა აქვთ - რიგგარეშე საპარლამენტო არჩევნები

თბილისი, 30 ნოემბერი – Sputnik. ქართულმა ოპოზიციამ გეგმები შეცვალა - მეათე მოწვევის პარლამენტის სხდომის პირველ დღეს მასშტაბური საპროტესტო აქციის ნაცვლად ოპოზიციის ლიდერები მეტეხის ტაძრის ეზოში ერთობლივ დეკლარაციას მოაწერენ ხელს.

კახა კალაძე: ახალი არჩევნების ჩატარების საფუძველი არ არსებობს >>

ამის შესახებ ცნობილი გახდა ოპოზიციიც ლიდერების შეხვედრის შემდეგ, რომელიც ორშაბათს „ლელოს“ ოფისში გაიმართა. დეკლარაციას პარლამენტის ბოიკოტის შესახებ ხელს მოაწერენ პარლამენტში გასული ოპოზიციური პარტიები, აგრეთვე ისინი თავის პარტიულ სიებს გაიწვევენ.

„დღეს შევათანხმეთ საბოლოო დეტალები იმ ღონისძიების, რომელიც გაიმართება პირველი სხდომის პარალელურად. როგორც უკვე იცით, ყველა ოპოზიციური პარტია, რომელიც ითხოვს რიგგარეშე არჩევნებს, შეიკრიბება მეტეხის ტაძართან, სადაც ჩვენ გავაფორმებთ დეკლარაციას, ყველა ოპოზიციური პარტია მოაწერს ხელს. გარდა ამისა, ყველა დეპუტატი, რომელიც ცესკოს მონაცემებით პარლამენტშია შესული, მანდატის დატოვების შესახებ განცხადებას დაწერს. რა თქმა უნდა, პარალელურად ჩაიხსნება ყველა პარტიული სია. საბოლოო დეტალები გავიარეთ“, - განაცხადა „ნაციონალური მოძრაობის“ წევრმა ზაალ უდუმაშვილმა.

31 ოქტომბრის არჩევნების შედეგების მიხედვით პარლამენტში მოხვდა რვა ოპოზიციური პარტია და ბლოკი. ისინი არჩევნების შედეგებს არ ცნობენ, მიიჩნევენ, რომ მმართველმა პარტიამ „ქართულმა ოცნებამ“ არჩევნები გააყალბა და მეათე მოწვევის პარლამენტში შესვლას არ აპირებენ.

უახლოეს დღეებში ხელისუფლებასა და ოპოზიციას შორის უნდა გაიმართოს მოლაპარაკებათა მესამე რაუნდი, რომელიც საქართველოში აშშ-ის და ევროკავშირის ელჩების მიერ არის ორგანიზებული. ამ დროისათვის ცნობილია, რომ ოპოზიცია რიგგარეშე საპარლამენტო არჩევნებს მოითხოვს, ხოლო „ქართული ოცნება“ ამის კატეგორიული წინააღმდეგია და ამას ერთადერთ შეუსრულებელ მოთხოვნას უწოდებს.

„მესამე რაუნდი თავიდან ბოლომდე დამოკიდებულია ხელისუფლებაზე, თუ რამდენად რაციონალური წინადადებებით მოვლენ ისინი. როგორც ჩანს, მათ არ აქვთ ჯერჯერობით რაციონალური წინადადება. შესაბამისად, ამ ეტაპზე მესამე რაუნდის პერსპექტივა არ ჩანს. ის მაშინ გაჩნდება, როდესაც მათი მხრიდან იქნება კონკრეტული წინადადებები“, - განაცხადა „ევროპული საქართველოს“ ლიდერმა გიგი უგულავამ.

ევროკავშირის და აშშ-ის ელჩებმა პოზიციების დასაახლოებლად ოპოზიციის ლიდერებთან უკვე რამდენიმე შეხვედრა გამართეს, თუმცა ახალი რაუნდის თარიღი ჯერჯერობით უცნობია.

ცესკომ უახლოეს დროს არჩევნების მეორე ტურის არჩევნების შედეგები უნდა შეაჯამოს, შემდეგ კი 20 დღის განმავლობაში პარლამენტის პირველი სხდომა დაინიშნება. ოპოზიციის მიერ ბოიკოტის მიუხედავად, პარლამენტი, რომელშიც „ქართული ოცნება“ 90 დეპუტატით იქნება წარმოდგენილი, მუშაობის დაწყებას და კანონების მიღებას მაინც შეძლებს.

მმართველ პარტიაში ოპოზიციის მოქმედებებს დესტრუქციულს, დესტაბილიზაციისკენ მიმართულს უწოდებენ და მას ვითარების ხელოვნურად დაძაბვაში ადანაშაულებენ.

98
თემები:
პროტესტი საქართველოში: ოპოზიცია საპარლამენტო არჩევნების შედეგებს არ აღიარებს
სულისა და სხეულის ჰარმონია- ქალი ზღვის პირას

2021 წლის ჰოროსკოპი: სასწორი ფინანსები, სიყვარული, ჯანმრთელობა

0
(განახლებულია 11:11 01.12.2020)
როგორი იქნება 2021 წელი სასწორებისთვის, რას მოუტანს ის ამ ნიშნით დაბადებულ ქალებსა და მამაკაცებს ცხოვრების სხვადასხვა სფეროში – გაეცანით ჩვენს ჰოროსკოპს

ასტროლოგების აზრით, 2021 წელს ვითარება გაუმჯობესდება და წელი უფრო მშვიდი იქნება, ვიდრე 2020 ნაკიანი წელიწადი. და მაინც, ხარის წელიწადს მოდუნება არ ივარგებს, რადგან ამ წლის მფარველი კეთილგანწყობილია მათ მიმართ, ვისაც შრომა უყვარს და პასუხისმგებლობას არ გაურბის.

ასე რომ, სასწორის ნიშნით დაბადებულებს 2021 წელს ბევრში შრომა მოგიწევთ. მთავარია, თქვენი ენერგია და ძალა საჭირო მიმართულებით დახარჯოთ.

სასწორები საჭიროებენ განმარტოებას, რათა დაფიქრდნენ ამ ცხოვრებაზე და მშვიდ ვითარებაში შეადგინონ მოქმედებების გეგმა. მაგრამ 2021 წელს ასტროლოგები აქტიურ მოქმედებებს ურჩევენ მათ, წინააღმდეგ შემთხვევაში საკუთარ სამყაროში დიდი ხნით ყოფნა და უმოქმედობა, შესაძლოა, არაერთი უსიამოვნების მიზზი გახდეს.

მამაკაცი სასწორი

სასწორ მამაკაცებს 2021 წელს დაგეხმარებათ სერიოზული საკითხების გადაწყვეტისადმი არასტანდარტული დამოკიდებულების უნარი. ამ წელს ხელს შეგიშლით დიდხანს ფიქრი, ასევე იმპულსურობა და ცვალებადობა. სირთულეებთან გამკლავებაში საკუთარ საქციელზე პასუხისმგებლობის აღება დაგეხმარებათ. თუ ისწავლით უარყოფით ემოციებთან გამკლავებას და ამპარტავნებას მოთოკავთ, თეთრი ხარი თქვენთვის საიმედო მფარველი გახდება.

ზოდიაქოს ნიშნები, რომლებსაც ამ სამყაროში ჰარმონია და წონასწორობა შემოაქვთ>>

ფინანსები და სამუშაო: ასტროლოგები გირჩევენ, მოერიდოთ დაუსრულებელ საქმეებს, რომლებსაც ბევრი ძალა და ენერგია მიაქვს და ხელს გიშლით ახალი იდეების ხორცშესხმაში, რადგან საამისოდ დრო აღარ გყოფნით. ფინანსური მხარე პოზიტიური იქნება, თუ სამუშაოს არ შეუშინდებით და ვალებს მინიმუმამდე დაიყვანთ. მოერიდეთ საეჭვო გარიგებებს – გაქვთ იმის უნარი, რომ ადამიანების ზრახვები ამოიცნოთ.

სიყვარული და ურთიერთობები: სასწორებს ურთიერთობების ახლებურად აწყობა მოგიწევთ – კომპრომისული გადაწყვეტილებების მიღწევითა და იმის აღიარებით, რომ პარტნიორსაც აქვს ხმის უფლება. წარმატება პირად ცხოვრებაში ელოდება მათ, ვინც მზადაა ცვლილებებისთვის და რჩეულთან ერთად კეთილდღეობის გზაზე სიარულისთვის. წინააღმდეგ შემთხვევაში ურთიერთობები შეიძლება დასრულდეს.

განწყობა და ჯანმრთელობა: 2021 წელს თქვენი განწყობაცა და ჯანმრთელობაც სათანადო დონეზე იქნება, მაგრამ ეს არ ნიშნავს, რომ ჯანმრთელობაზე ზრუნვა აღარ გჭრიდებათ. საშიშროება ემუქრება მათ, ვინც ძალიან ბევრს მუშაობს და გადაღლას ყურადღებას არ აქცევს. დროული დასვენება და ფიზიკური დატვირთვები სასარგებლოა როგორც ჯანმრთელობის, ისე კარგი განწყობის შესანარჩუნებლად.

ზოდიაქოს ნიშნები, რომლებიც ნებისმიერ ასაკში იოლად თხოვდებიან>>

ქალი სასწორი

ასტროლოგები გირჩევენ, „არას“ თქმა ისწავლოთ როგორც საკუთარი წამიერი სურვილების, ისე ტოქსიკური ადამიანებისთვის. ახალ წელს ვინც თავის სისუსტეებს აჰყვება, ფინანსური გაჭირვება ელოდება, ხოლო თუ ტოქსიკურ ადამიანებს დროულად არ შეაჩერებთ, უსიამოვნებების კასკადი გარდაუვალი გახდება. პრობლემებთან გამკლავებაში თავდაჯერებულობა დაგეხმარებათ.

ფინანსები და სამუშაო: ნუ ეცდებით, მთელი ოჯახის ბიუჯეტი თქვენ შეავსოთ. ამ შემთხვევაში ძლიერი გადაღლა და ძალების გამოფიტვა გელოდებათ, ასევე გახდებით გაღიზიანებული. წარმატება ერთბაშად არ მოვა, თუმცა, თუ დროულად დაისვენებთ და ამასთან, ისწავლით ერთპიროვნული გადაწყვეტილებების მიღებას დაყოვნების გარეშე, წარმატებაც მალე გეწვევათ.

სიყვარული და ურთიერთობები: ურთიერთობებში ჰარმონიას ვერ მიაღწევთ, თუ ყველას გულის მოგებას შეეცდებით. მკაფიოდ უნდა გამოკვეთოთ თქვენი პოზიცია, რათა დროულად გაიყვანოთ თქვენი საურთიერთობო წრიდან ის ადამიანები, რომლებსაც თქვენთვის ბედნიერებისა და კეთილდღეობის მოტანა არ შეუძლია. ეს ეხება როგორც ახლობელ ადამიანებთან, ისე კოლეგებთან ურთიერთობებს.

ინდივიდუალური დიეტა ზოდიაქოს ნიშნებისთვის>>

განწყობა და ჯანმრთელობა: ხარის წელიწადში თქვენს განწყობასა და ჯანმრთელობას სერიოზული საფრთხეები არ ელოდება, მაგრამ პოზიტიური განწყობა უნდა შეინარჩუნოთ არა მხოლოდ მაშინ, როცა ყველაფერი კარგად მიდის, არამედ მაშინაც, როცა რთული დრო გიდგათ. ასევე ასტროლოგების რჩევაა, გადახედოთ კვების რაციონს და მასში რაც შეიძლება მეტი სასარგებლო პროდუქტი შეიტანოთ. ეს დაგეხმარებათ, რომ დატკბეთ აქტიური ცხოვრებით და თან ახალგაზრდული იერი შეინარჩუნოთ.

გაეცანით ასევე 2021 წლის ჰოროსკოპს ვერძებისკუროებისტყუპებისკირჩხიბების, ლომებისა და ქალწულებისთვის.

0