კორონავირუსის ეპიდემია

რატომ არ აღიარებენ საქართველოში კორონავირუსის არსებობას და რა საფრთხეებს უკავშირდება ეს

194
(განახლებულია 22:06 25.11.2020)
რუხის რესპუბლიკური საავადმყოფოს ინფექციონისტი მაიკო ჯანაშია „Sputnik–საქართველოს“ მკითხველისთვის საუბრობს, თუ რატომ არ სჯერა ქართველ ხალხს COVID-19-ის და რა რისკებს უკავშირდება ეს უნდობლობა.

კორონავირუსით ინფიცირებულთა რიცხვმა მსოფლიოში 45 მილიონს გადააჭარბა, საქართველოში კი ბოლო დღეებში ყოველდღიური მაჩვენებელი 2 ათასს გადასცდა. მიუხედავად ამისა, მოქალაქეთა ნაწილი ვირუსის არსებობას დღემდე არ აღიარებს. თუ რა საფრთხეებს უკავშირდება ეს უნდობლობა, „Sputnik–საქართველო“ რუხის საავადმყოფოს ინფექციონისტს მაიკო ჯანაშიას ესაუბრა.

- მეტ-ნაკლებად ყველამ ვისწავლეთ კორონავირუსთან თანაცხოვრება. მიუხედავად ცხრა თვის გამოცდილებისა, რატომ არ სჯერა მოსახლეობის ნაწილს მისი არსებობის?

- კორონავირუსი იმდენად არაპროგნოზირებადია, რომ სიფრთხილეს თავი არ სტკივა და რაც უფრო დაიჯერებენ, რომ არსებობს, და ნამდვილად არსებობს, მით უკეთესი ყველასთვის. საერთოდ, საქართველოში არსებობს რაიმე თემა, რაზეც ერთგვარია მოსაზრებაა? ალბათ იმიტომ აქვთ ეს განცდა, რომ ხშირ შემთხვევაში კორონავირუსი სერიოზული სიმპტომების გამოვლენის გარეშე მიმდინარეობს. როცა ადამიანი თავს ცუდად არ გრძნობს, ჰგონია, რომ ეს ვირუსი არ არსებობს, მაგრამ, სამწუხაროდ, რეალობა სხვა სურათს გვაჩვენებს.

- წარმოადგენს თუ არა ის ხალხი, ვისაც არ სჯერა COVID-19-ის არსებობის, განსაკუთრებულ საფრთხეს ირგვლივ მყოფებისთვის და ვირუსის გავრცელების ერთ-ერთ ძირითად წყაროს?

- რა თქმა უნდა, დიახ, ეს ხალხი არის ვირუსის გავრცელების წყარო, რადგან არ სჯერათ ამ ვირუსის არსებობის და, შესაბამისად, მინიმალურად იცავენ დადგენილ სტანდარტს. არ ერიდებიან სხვასთან კონტაქტსაც. არიან სიმპტომიანი პაციენტებიც კი, რომლებსაც არ სჯერათ კორონავირუსის და ამბობენ, რომ ეს ჩვეულებრივი გრიპია, გაციებაა. ამ შემთხვევაშიც ხდებას ის, რომ რიგ შემთხვევაში მოგვიანებით ხდება ვირუსის დადასტურება. ძალიან რომ გაურთულდებათ, მაშინ მოგვმართავენ და უკვე შორს წასული პროცესია. ამასობაში რამდენ ხანს ჰქონდათ სხვა ადამიანებთან კონტაქტი? რაც უფრო მეტი დღე ექნებათ, მით უფრო მეტია რაოდენობრივად ვირუსის გადადების რისკი.

- რას ამბობენ პაციენტები, რომლებიც დადასტურებული დიაგნოზით შემოჰყავთ საავადმყოფოში, ისევ არ სჯერათ COVID-19-ის?

- ჭირს ამ ადამიანების დარწმუნება, მაგრამ ზოგი საბოლოოდ მაინც არ იჯერებს, მაგრამ უმეტესობა კლინიკაში მოთავსებული იჯერებს, როცა ხედავს მის ირგვლივ ცოტა უფრო მძიმე მდგომარეობაში მყოფ პაციენტს. ნუ ვეძებთ განსაკუთრებულ სიმპტომებს, რომ დავიჯეროთ კორონავირუსის არსებობა, რადგან ნებისმიერი რამ შეიძლება იყოს. ვიღაცას თუ გაუმართლა და ჟანგბადის აპარატით არ წევს, ეს არ ნიშნავს, რომ სხვას არ დასჭირდება.

- როგორც წესი, კოვიდ-ინფიცირებულ გარდაცვლილებს თანმხლები დაავადებები ჰქონდათ. რატომ კეთდება აქცენტი კორონავირუსზე, როცა პაციენტს სხვა მძიმე დაავადებები აქვს?

- ცალსახად აქ ძირითადი მიზეზი მაინც არის კორონავირუსი. არ არის სწორი ვთქვათ, რომ „მთელი ცხოვრება თანმხლები დაავადებით ცხოვრობდა“. მართალია, ეს დაავადებები ადამიანებს ერთი თვის წინაც სჭირდათ. მაშინ რატომ არ გარდაიცვალნენ ერთი ან ორი თვის წინ? დაერთოთ კორონავირუსი და გაურთულდათ დაავადებები. „ჰქონდათ თანმხლები დაავადებები“ – ნიშნავს, რომ დასუსტებული ორგანიზმი ვერ ებრძვის სათანადოდ ამ დაავადებას და უფრო დიდი შანსია მდგომარეობის დამძიმების.

- დღეს უფრო მეტს სჯერა კორონავირუსის, თუ „პირველი ტალღის“ დროს უფრო სჯეროდათ?

- ადამიანებს მობეზრდათ შეზღუდვები, კარანტინი. მობეზრდათ პირბადე და ურჩევნიათ დაიჯერონ ის, რაც მათთვის უფრო მისაღებია. შესაბამისად, რაც უფრო დრო გავა, მით უფრო ნაკლებად დაიჯერებენ კორონავირუსის არსებობას. გასაგებია, რომ რიგ შემთხვევაში დაავადება მსუბუქად მიდის და არ არის მომაკვდინებელი, მაგრამ ერთი რამ ძალიან კარგად ვიცი – ეს ვირუსი ამოუცნობია, 21-ე საუკუნეში მისი საწინააღმდეგო წამალი ამ დრომდე რომ ვერ გამოიგონეს, ეს უკვე ნიშნავს, რომ ხვალ-ზეგ რას მოიმოქმედებს, არავინ იცის.

- ხალხის ნაწილი ფიქრობს, რომ არჩევნების შემდგომ ინფიცირებულების რიცხვის რადიკალური მატება და ანტირეკორდები პოლიტიკური ინტერესია...

- ამ ხალხს ვკითხავ – ვირუსი ხომ გარკვეულ ქვეყნებში არ დაწყებულა, სადაც არჩევნები ტარდება? კორონავირუსი არის როგორც საქართველოში, ისე სხვა ქვეყნებში. სტატისტიკას თუ უყურებს ხალხი, მიხვდება, რომ დიდი ხანია დაიწყო მატება. წინა პერიოდში ჩაკეტვის ფონზე ავირიდეთ პირველი ტალღის გამწვავება, ჩაკეტვამ ინფიცირების შემცირება გამოიწვია. ახლა კი ვირუსს გარკვეული პერიოდი დასჭირდა, რომ „აეკრიფა“. ვირუსის ბუნება, სამწუხაროდ, ისეთია, რომ იზოლირებულად ერთ ქვეყანაში ვერ დამთავრდება, უნდა დამთავრდეს გლობალურად.

სექტემბრის დასაწყისიდან საქართველოში მკვეთრად იმატა კორონავირუსით ინფიცირებულთა რაოდენობამ. 

უწყებათშორისი საკოორდინაციო საბჭოს გადაწყვეტილებით, ამ ეტაპზე ქვეყანაში წერტილოვანი შეზღუდვები მოქმედებს ცალკეულ დასახლებულ პუნქტებში, სადაც სიტუაცია ყველაზე მეტად საგანგაშოა. მთელი ქვეყნის მასშტაბით, რესტორნები მუშაობის შეზღუდულ რეჟიმზე გადავიდნენ, მათ სტუმრების მომსახურება მხოლოდ 22:00 საათამდე შეუძლიათ. ქალაქებში სრულად დისტანციურ რეჟიმზე გადავიდნენ სკოლები და ასევე დისტანციურ რეჟიმზე გადადიან ხვალიდან საბავშვო ბაღები.

ბოლო მონაცემებით, საქართველოში ახალი კორონავირუსით დაავადებულთა რაოდენობა 46 ათასს აჭარბებს.

საქართველოში კორონავირუსის პირველი შემთხვევა 26 თებერვალს დაფიქსირდა.

194
მადონა კოიძე

ჯანმრთელობისთვის საფრთხის შექმნისთვის ბიზნესი მხოლოდ 1000 ლარით არ უნდა ჯარიმდებოდეს

123
(განახლებულია 18:26 12.11.2020)
ვინ და როგორ იცავს საქართველოში მომხმარებელთა უფლებებს იმ ფონზე, როცა ქვეყანაში შესაბამისი კანონი არ არსებობს – „Sputnik-საქართველოს“ საქართველოს მომხმარებელთა ფედერაციის თავმჯდომარე და პოპულარული გადაცემა „სახალხო კონტროლის“ წამყვანი მადონა კოიძე ესაუბრა.

- თქვენი შეფასებით, რამდენად უსაფრთხოა საქართველოს რესტორნებსა და კაფე-ბარებში მომზადებული საკვები?

- ძნელია ამ კითხვაზე ცალსახად პასუხი. მართალია, ბევრია საქართველოში ისეთი ობიექტი, სადაც ნაწარმოები პროდუქტი მომხმარებლის ჯანმრთელობისთვის რისკის შემცველია, მაგრამ ასევე ბევრია კეთილსინდისიერი ბიზნეს-ოპერატორიც, რომლებსაც შეუძლიათ სერიოზული კონკურენცია გაუწიონ ცნობილ უცხოურ რესტორნებსაც კი. ამიტომ მარტო „სახალხო კონტროლის“ საფუძველზე მსჯელობა არასწორი იქნება. ჩვენ გადაცემაზე მუშაობისას ძირითადად ვცდილობთ გამოვავლინოთ პრობლემები და დავეხმაროთ ობიექტებს ამ ნაკლოვანებების აღმოფხვრაში. 

- გადაცემაში ბევრი წერილი შემოდის და რამდენად შეესაბამება იქ აღწერილი სიტუაცია სიმართლეს?

- მართლაც ძალიან ბევრი წერილი შემოდის „სახალხო კონტროლში“. მომხმარებლები ისეთი ობიექტების შესახებ გვწერენ, სადაც ნაკლოვანებები შემჩნეული აქვთ. თუმცა არის კონკურენტების ან განაწყენებული თანამშრომლის მიერ დაწერილი წერილებიც. მაგრამ ჩვენ ვცდილობთ, რომ გავფილტროთ და მხოლოდ დასურათებულ და ვიდეომასალით გამყარებულ ინფორმაციაზე მოვახდინოთ რეაგირება.

- ძირითადად რა სახის დარღვევები გხვდებათ ხოლმე საზოგადოებრივი კვების ობიექტების სამზარეულოებში?  

- ყველაზე ხშირად თვალში საცემია საერთო სანიტარულ-ჰიგიენური მდგომარეობა – დასასუფთავებელი იატაკი, კედლები, ჭერი, ნიჟარების და მაცივრების მდგომარეობა, დარღვეულია პროდუქტის შენახვის პირობები.

- რამდენად ახერხებს სურსათის ეროვნული სააგენტო ყველა ობიექტის შემოწმებას?  

- სურსათის ეროვნული სააგენტო მუშაობს დღე და ღამე. მე წვდომა მაქვს თვეში მაქსიმუმ 20 ობიექტზე, მაშინ, როდესაც ამ უწყების მხოლოდ ერთ ჯგუფს აქვს ჩემზე მეტი ობიექტი გაკონტროლებული თვის განმავლობაში. მაგრამ მათი მუშაობა არ ჩანს, მე კი ყველაფერს ვაშუქებ და ეს საზოგადოებისთვის ხელმისაწვდომია. ძალიან გული მწყდება ხოლმე, როდესაც წერენ, რას აკეთებს სურსათიო… სურსათი აკეთებს თავის საქმეს, მეორე საკითხია, რომ არასაკმარისი რესურსი აქვთ, ჩემი აზრით, რადგან ათეულობით ათასი ობიექტია საქართველოში და ეს ნამდვილად არის გადასახედი.

- კიდევ რა პრობლემებს გამოყოფდით ამ სფეროში?

- პრობლემა არის ძალიან დაბალი საჯარიმო სანქციები. სირცხვილია, როდესაც საწარმოს პროდუქციით შეიძლება ასობით ადამიანი მოიწამლოს და ამისთვის მხოლოდ 1000 ლარით დაჯარიმდეს ბიზნეს-ოპერატორი, ხოლო სამუშაო პროცესი მხოლოდ რამდენიმე დღით შეუჩერდეს. ჯარიმა უნდა იყოს ძალიან მაღალი. როდესაც ამ ჯარიმებს აწესებდნენ, მაშინდელი პარლამენტის კომიტეტის პოზიცია იყო, რომ ჯარიმა ბიზნეს-ოპერატორისთვის ძალიან მტკივნეული არ ყოფილიყო. არასამთავრობო სექტორი მაშინ ამას ძალიან ვეწინააღმდეგებოდით. ბიზნეს–სექტორი უნდა იყოს ორიენტირებული, რომ დაიცვას ყველა პირობა და საერთოდ არ გადაიხადოს ჯარიმა. მისთვის არც დიდი და არც პატარა ჯარიმა არ იქნება მტკივნეული. თუ ის საერთოდ არ გადაიხდის და თუ ის, მაგალითად, დააზარალებს ათეულობით და ასეულობით მომხმარებელს თავისი არაკეთილსინდისიერების გამო, საერთო სანიტარულ-ჰიგიენური მდგომარეობის გამო, ან პროდუქტის არასწორი შენახვის გამო, იმდენად მკაცრი უნდა იყოს მისთვის სასჯელი, რომ სხვა ბიზნეს-ოპერატორებისთვის ეს მაგალითი გახდეს. ეს ყველა ვარიანტში უნდა გადაიხედოს ახალი პარლამენტის მიერ და განსაკუთრებით მძიმე მდგომარეობაზე უნდა იყოს სისხლის სამართლის პასუხისმგებლობაც კი. თუ ერთი ადამიანი მეორის ჯანმრთელობას დააზიანებს და მის სიციცხლეს საფრთხეს შეუქმნის, მან ციხე უნდა მოიხადოს სისხლის სამართლის კოდექსიდან გამომდინარე. მაგრამ ახლა თუ სასურსათო პროდუქციის მწარმოებელი თავისი უყურადღებობით და არაკეთილსინდისიერებით რისკის წინაშე დააყენებს ათობით და ასობით მომხმარებლის ჯანმრთელობას, მხოლოდ 1000 ლარი უნდა გადაიხადოს – ძალიან შეუსაბამობა გავქვს ამასთან დაკავშირებით და ამას უნდა მიეხედოს რაც შეიძლება სწრაფად.

- რამდენად იცავს კანონი მომხმარებელს და რა უნდა ქნას მომხმარებელმა, თუ ხედავს, რომ მისი უფლებები ირღვევა?

- სამწუხაროდ, ცალკე კანონი მომხმარებელთა უფლებების შესახებ საქართველოში არ გაგვაჩნია და მომხმარებლის უფლებების დაცვა არის გადანაწილებული სხვადასხვა კანონებში თუ კოდექსებში. ძალიან რთულია ასეთ შემთხვევაში მომხმარებელმა თვითონ დაიცვას საკუთარი უფლებები. ამიტომ არის, საბედნიეროდ, ისეთი ორგანიზაციები, როგორიცაა მომხმარებელთა ფედერაცია, არის სტრატეგიული კვლევების ცენტრი, სადაც პროექტი აქვთ მომხმარებელთა უფლებების დაცვის შესახებ. სურსათის კოდექსშია კიდევ ჩანაწერი მომხმარებელთა ინფორმირებულობისა და უფლებების შესახებ, მაგრამ სანამ ცალკე კანონი არ იქნება მიღებული, მანამ ჩვენი ორგანიზაციები ვეხმარებით მომხმარებლებს და ვცდილობთ ვასწავლოთ როგორ უნდა დაიცვან თავიანთი უფლებები.

ნატა პატარაია

 

123
პოლიცია მეტროში

ვინ უზრუნველყოფს ქუჩასა და ტრანსპორტში პირბადის სწორად ტარებასა და სოციალურ დისტანციას

57
(განახლებულია 17:05 06.11.2020)
შსს-ს მიერ გაკონტროლდება თბილისის ყველა მეტროსადგურის ჩასასვლელი. სამინისტრო ქვეყნის მასშტაბით ასევე მონიტორინგს გაუწევს ბაზრობების ტერიტორიას.

თბილისი, 6 ნოემბერი - Sputnik. შინაგან საქმეთა სამინისტროს საპატრულო პოლიციის დეპარტამენტის თანამშრომლები საზოგადოების თავშეყრის ადგილებში კონტროლს აქტიურ რეჟიმში ახორციელებენ, - ნათქვამია უწყების მიერ გავრცელებულ განცხადებაში.

სამინისტრომ გადაწყვეტილება უწყებათაშორისი საკოორდინაციო საბჭოს რეკომენდაციების შესაბამისად, კორონავირუსის გავრცელების წინააღმდეგ მიმართული წესების აღსრულების მიზნით მიიღო.

უწყების ცნობით, პატრულ ინსპექტორები მობილიზებულები არიან თბილისში არსებულ მეტროსადგურებთან და .კორონავირუსის გავრცელების პრევენციის მიზნით, მოქალაქეების მიერ მოქმედი წესების დაცვას და პირბადეების სწორად ტარებას აკონტროლებენ.

„სამართალდამცველები დედაქალაქსა და საქართველოს ყველა დიდ ქალაქში არსებული აგრარული ბაზრების, ასევე ბაზრობების ტერიტორიაზე, საზოგადოებრივი წესრიგისა და უსაფრთხოების დასაცავად, ინტენსიურ რეჟიმში პატრულირებენ“,  - ნათქვამია განცხადებაში.

შინაგან საქმეთა სამინისტრო მოსახლეობას სოციალური დისტანციის დაცვისკენ და პირბადის გამოყენებისკენ მოუწოდებს.

საქართველოში ეპიდვითარება ყოველდღიურად უარესდება. შექმნილი მდგომარეობიდან გამომდინარე, ქვეყნის მთელ ტერიტორიაზე პირბადის ტარება როგორც დახურულ, ისე ღია სივრცეში სავალდებულო გახდა.

საქართველოში ახალი კორონავირუსით დაავადებულთა რაოდენობა ბოლო დღე-ღამეში 2 775-ით გაიზარდა და ინფიცირებულთა საერთო რიცხვმა 51993-ს მიაღწია.

ქვეყანაში კორონავირუსის პირველი შემთხვევა 26 თებერვალს დაფიქსირდა.

57
არმენ სარქისიანი

სომხეთის პრეზიდენტი რუსეთში კერძო ვიზიტით იმყოფება

0
პრეზიდენტი მოსკოვში გეგმავს მთიანი ყარაბაღის გარშემო მიმდინარე პროცესებისა და სომხეთში არსებული ვითარების განხილვას დიასპორის წარმომადგენლებთან

თბილისი, 28 ნოემბერი — Sputnik. სომხეთის პრეზიდენტი არმენ სარქისიანი რუსეთში კერძო ვიზიტით გაემგზავრა, იუწყება Sputnik-სომხეთი.

პრეზიდენტის პრესსამსახურის ცნობით, იგი სომხური თემის წარმომადგენლებთან გამართავს დისკუსიებს მთიანი ყარაბაღსა და სომხეთში არსებული სიტუაციის ირგვლივ, ასევე შეხვდება დიასპორის წარმომადგენლებს.

ვითარება მთიან ყარაბაღში

სექტემბრის ბოლოს მთიან ყარაბაღში დაიწყო შეიარაღებული კონფლიქტი, რომელშიც სომხეთმა და აზერბაიჯანმა ერთმანეთი დაადანაშაულეს. რუსეთის შუამავლობით მხარეები 2020 წლის 10 ნოემბრიდან ცეცხლისა და საბრძოლო მოქმედებების შეწყვეტაზე შეთანხმდნენ.

ხელშეკრულების მიხედვით, აზერბაიჯანი და სომხეთი დაკავებულ პოზიციებზე რჩებიან და ამასთან მიმდინარეობს ტყვეთა გაცვლა. ნოემბერ–დეკემბერში სომხეთმა აზერბაიჯანს უნდა გადასცეს მთიანი ყარაბაღის ტერიტორიების დიდი ნაწილი. ამ დროისათვის ყარაბაღში რუსი სამშვიდობოები შედიან, რომლებიც მხარეთა გამყოფ ხაზზე და იმ დერეფნის გასწვრივ განლაგდებიან, რომელიც ყარაბაღს სომხეთთან აკავშირებს.

0
თემები:
ესკალაცია ყარაბაღში 2020