მოქალაქეების შემოწმება კორონავირუსზე

ახალი დადგენილება: ვის შეუძლია საქართველოში შემოსვლა კარანტინის/იზოლაციის გარეშე

651
(განახლებულია 18:57 30.06.2020)
კორონავირუსის პანდემიის გამო საქართველო, ისევე, როგორც დანარჩენი მსოფლიო, ბოლო რამდენიმე თვეა განსაკუთრებულ რეჟიმში ცხოვრობს.

ყველაზე მეტი დაბნეულობა და გაურკვევლობა ქვეყანაში შემოსვლის ან გამგზავრების მსურველებს აქვთ, რადგან  მსოფლიო რუკაზე მოვლენები ელვის სისწრაფით იცვლება და ასევე ყოველდღიურად იცვლება სიტუაცია საქართველოშიც.

დღეს არავის აქვს ზუსტი ინფორმაცია, რა შეიცვლება 1 ივლისიდან, მაშინ, როცა ევროკავშირი საზღვრებს გვიხნის, გაიხსნება თუ არა საქართველოს ცა, დაგვჭირდება თუ არა ე.წ. კოვიდ-პასპორტები ან ორკვირიანი სავალდებულო კარანტინი, ძალაში დარჩება თუ არა დღეს მოქმედი რეგულაციები. თუმცა, ჩვენ შევეცადეთ თავი მოგვეყარა ყველა იმ ინფორმაციისთვის, რაც დღეს არსებობს და რომელსაც საქართველოში შემომსვლელი ყველა პირი უნდა დაექვემდებაროს.

უკვე რამდენიმე თვეა, უცხოეთიდან დაბრუნებული საქართველოს ყველა მოქალაქე კორონავირუსის გავრცელების პრევენციის მიზნით 14-დღიან სავალდებულო კარანტინში გადაჰყავთ.

საქართველოს მოქალაქეები სავალდებულო კარანტინს სასტუმროებში გადიან, რომლებიც საკარანტინო სივრცეებად გადაკეთდა. ამ დროისათვის ტურიზმის ეროვნული ადმინისტრაცია ოპერირებას უწევს დაახლოებით 90 საკარანტინო ზონას, რომლებიც 5 ათასზე მეტ ადამიანზეა გათვლილი.

თუმცა, საქართველოს მთავრობის 2020 წლის 29 ივნისის N391 დადგენილებით განისაზღვრა იმ პირთა წრე, რომლებიც საქართველოში შემოსვლისას კარანტინს/იზოლაციას არ დაექვემდებარებიან.

დადგენილების მიხედვით, იზოლაციას/კარანტინს არ ექვემდებარებიან:

1. საქართველოში ოფიციალური ვიზიტით ჩამოსული საზღვარგარეთის ქვეყნების/საერთაშორისო ორგანიზაციების ოფიციალური დელეგაციების წევრები;

2. საქართველოს სამთავრობო და საპრეზიდენტო დელეგაციების წევრები უცხო ქვეყანაში ოფიციალური ვიზიტიდან დაბრუნებისას.

ახალი წესების მიხედვით, საქართველოში ოფიციალური ვიზიტით ჩამოსული საზღვარგარეთის ქვეყნების/საერთაშორისო ორგანიზტაციების ოფიციალური დელეგაციების წევრებმა სასაზღვრო პუნქტებზე უნდა წარმოადგინონ ოფიციალურ ვიზიტამდე უკანასკნელი 72 საათის განმავლობაში ჩატარებული PCR კვლევის დამადასტურებელი საბუთი.

რაც შეეხება უცხო ქვეყანაში ოფიციალური ვიზიტიდან დაბრუნებულ საქართველოს სამთავრობო და საპრეზიდენტო დელეგაციების წევრებს, ისინი ვალდებული არიან, საქართველოში შემოსვლიდან 14 დღის განმავლობაში ყოველ 72 საათში ჩაიტარონ PCR კვლევა, რომლის ხარჯები ანაზღაურდება შესაბამისი საჯარო დაწესებულების ბიუჯეტიდან.

დღეს მოქმედი კანონით, ზემოთ აღნიშნული პირების გარდა, უცხო ქვეყნიდან შემოსული ყველა ფიზიკური პირი ექვემდებარება 14 დღის განმავლობაში კარანტინს.

აღსანიშნავია, რომ ქვეყანაში შემოსვლის მსურველი მოქალაქეების გარკვეულ კატეგორიას ასევე ეძლევა შესაძლებლობა, რომ საკარანტინო ზონის ნაცვლად თვითიზოლაციაში მოთავსება მოითხოვოს. ამისთვის მათ უნდა შეავსონ თვითიზოლაციის მოთხოვნის სპეციალური ფორმა.

კარანტინის ნაცვლად თვითიზოლაციაში გადაყვანის მოთხოვნა შეიძლება:

- თუ პირი ჯანმრთელობის მდგომარეობის გათვალისწინებით (მაგალითად, ქირურგიული ოპერაციის შემდეგ, ქიმიოთერაპიის, დიალიზის სეანსების საჭიროებისას და სხვ.) შესაბამის სამედიცინო დოკუმენტაციას წარადგენს;

- საქართველოში საერთაშორისო მისიების წარმომადგენლების, აკრედიტებული დიპლომატიური მისიების წარმომადგენლებისა და მათი ოჯახის წევრების მოთხოვნის შემთხვევაში, შესაბამისი სახელმწიფო უწყებების შუამდგომლობის გათვალისწინებით;

- სხვა განსაკუთრებული გარემოებების/სოციალური ფაქტორების (შშმ, არასრულწლოვნობა და მსგავსი) არსებობისას, რომელიც ამართლებს თვითიზოლაციაში პირის ყოფნის უპირატესობას.

გასათვალისწინებელია, რომ თვითიზოლაციის სპეციალური მოთხოვნის ფორმა მოგზაურებმა საქართველოში ჩამოსვლამდე 3 დღით ადრე უნდა შეავსონ და შევსებული კითხვარი უნდა გაგზავნონ მისამართზე covisolation@moh.gov.ge.

კორონავირუსის პანდემიის გამო საქართველოში უცხო ქვეყნის მოქალაქეების შემოსვლა 18 მარტიდან შეიზღუდა. დღევანდელი მდგომარეობით, ეს შეზღუდვა ისევ ძალაშია. თუმცა არავინ იცის, ხვალიდან რა შეიცვლება, გაიხსნება თუ არა საქართველოს საზღვრები უცხო ქვეყნის მოქალაქეებისთვის, ან საქართველოს მოქალაქეები თუ შეძლებენ საზღვრის კვეთას. ამ ეტაპზე კი საქართველოს საზღვრის გადმოკვეთა არ შეუძლია უცხო ქვეყნის მოქალაქეს, გარდა:

- საქართველოში აკრედიტებული დიპლომატიური მისიების, საერთაშორისო ორგანიზაციების წარმომადგენლებისა და მათი ოჯახის წევრებისა;

- შერეული ოჯახებისა, რომელშიც ერთ-ერთი მეუღლე ან არასრულწლოვანი შვილი არის საქართველოს მოქალაქე;

- ჰუმანიტარული მისიით მომავალი პირებისა, თუ დღის წესრიგში დადგა ასეთი მისიის მოვლენის აუცილებლობა (ექიმები, მოხალისეები);

- მოქალაქეობის არმქონე პირის სტატუსის მქონე პირებისა – გაცემული საქართველოს შესაბამისი ორგანოს მიერ;

- სტატუს-ნეიტრალური დოკუმენტის მქონე პირებისა;

- საქართველოში ლტოლვილის სტატუსის მქონე პირებისა.

- ოფიციალური დელეგაციების საკითხი გადაწყდება ყოველ კონკრეტულ შემთხვევაში ინდივიდუალურად.

რაც შეეხება საქართველოს ტერიტორიაზე ლეგალურად მყოფ უცხო ქვეყნის მოქალაქეებს და მოქალაქეობის არმქონე პირებს, COVID-19 პანდემიის გამო შექმნილი ვითარებიდან გამომდინარე, მათთვის საქართველოში ლეგალურად ყოფნის ვადა 2020 წლის 31 ივლისამდე გახანგრძლივდა.

ეს ეხება იმ პირებს, ვინც 2020 წლის 14 მარტისთვის ლეგალურად იმყოფებოდა საქართველოს ტერიტორიაზე და ვერ შეძლო ქვეყნის დატოვება კანონიერად ყოფნის ვადის ამოწურვამდე. ასეთ შემთხვევაში პირი უფლებამოსილია იმყოფებოდეს საქართველოს ტერიტორიაზე 2020 წლის 31 ივლისამდე.

651
თერმოსკრინინგი

რამდენად სანდოა თერმოსკრინინგის აპარატები და რა უნდა გავაკეთოთ „ჩვენ“

271
(განახლებულია 17:29 18.09.2020)
ნაცნობია არც ისე იშვიათი შემთხვევები, როდესაც თერმოსკრინინგის აპარატმა გადაწყვიტა, რომ ტემპერატურა არარეალურად დაბალი გაქვთ, ხოლო ადამიანი, რომელიც იმ პატარა ეკრანზე ამას კითხულობს, ჩუმად არის...

საქართველოში კორონავირუსის შემთხვევები დღითი დღე რეკორდს ამყარებს, ყოველდღიური გამოვლინება უკვე სამნიშნა რიცხვებით იზომება.

რადგან ახალი რეგულაციების თანახმად საერთო მოხმარების სივრცეში – სკოლებში, გასართობ ადგილებში, ბანკებში, აეროპორტებში, მოლებში, მაღაზიებში, სარკინიგზო სადგურებში, ავტოსადგურებში, საგამოფენო დარბაზებსა თუ მუზეუმებში უნდა მოხდეს იქ მყოფი ადამიანების ტემპერატურის კონტროლი, ტრადიციული თერმომეტრის გამოყენება მისი დეზინფექციის გარეშე შეუძლებელია. ამიტომ შემოწმების წარმატებით და დროულად განხორციელება მხოლოდ თერმოსკრინინგის აპარატების (სიცხის საზომი უკონტაქტო თერმომეტრი) მეშვეობით არის შესაძლებელი. როგორც უკვე ვიცით, თუ სადმე შესვლას ვაპირებთ, ტემპერატურა არ უნდა აღემატებოდეს 37.0 გრადუსს. თუმცა...

ასეა თუ ისე, მით უფრო ამ ბოლო დროს, ალბათ ბევრი თქვენგანისთვის ნაცნობია არც ისე იშვიათი შემთხვევები, როდესაც აპარატმა გადაწყვიტა, რომ ტემპერატურა 33 გრადუსი, ან რაღაც მსგავსი, არარეალურად დაბალი გაქვთ, ხოლო ადამიანი, რომელიც იმ პატარა ეკრანზე ამას კითხულობს, ჩუმად არის. აქ მოქალაქეობრივი პასუხისმგებლობის დანაშაული გვახსენდება...

ყველა აპარატს შეძენისას მოჰყვება ვარგისიანობის ვადა, რესურსი, რამდენჯერ შეუძლია გაზომოს ტემპერატურა. ნორმალური ხარისხის აპარატს საშუალოდ 10 ათასჯერ შეუძლია გაზომვა.

სიცხის საზომს უნდა ჰქონდეს ხარისხის სერტიფიკატიც.

საქართველოში თერმოსკრინინგის აპარატის ღირებულება 65 ლარიდან 300 ლარამდე მერყეობს. ხოლო თუ უცხოურ საიტებს გადავხედავთ, აპარატის შეძენას ბევრად იაფად, 7–10 დოლარადაც შევძლებთ.

ჩნდება კითხვა: რამდენად გამართულად მუშაობს ათასობით ობიექტზე აღნიშნული აპარატები და აქვთ კი უწყებებს ძალა და რესურსი ობიექტების კონტროლისთვის? ან იქნებ მართლაც სამოქალაქო პასუხისმგებლობის იმედად ვართ?

როგორც ჯანდაცვის სამინისტროს შრომის პირობების ინსპექტირების დეპარტამენტის ინსპექტირების სამმართველოს უფროსმა მაია მიქაიამ „Sputnik–საქართველოს“ განუცხადა, მთავრობის მიერ დადგენილი რეკომენდაციების გათვალისწინებით ერთ-ერთი ვალდებულებაა თერმოსკრინინგი, ხოლო აპარატის გამართულად მუშაობაზე ობიექტის მენეჯერია პასუხისმგებელი.

„მთავრობის მიერ დადგენილი რეკომენდაციების მიღების შემდეგ გაფრთხილებულია ყველა ობიექტი, თუ როგორ უნდა იხელმძღვანელონ წესების დაცვით. ერთ-ერთი ვალდებულებაა თერმოსკრინინგი. აპარატებს მოჰყვება პასპორტი, თუ რამდენჯერ არის შესაძლებელი ტემპერატურის გაზომვა. ამ შემთხვევაში მენეჯერი უზრუნველყოფს თერმომეტრის გამართულობას. ჩვენც ვცდილობთ, რომ პირველად არა სანქციებით, არამედ გაფრთხილებით და დახმარებით მოვახდინოთ პრობლემის აღმოფხვრა, მაგრამ იურიდიული პირი, რომელიც დადგენილ რეკომენდაციებს არ ემორჩილება, დაჯარიმდება 10 ათასი ლარით, ხოლო ფიზიკური პირი – 2 ათასი ლარით“, – განუცხადა მაია მიქაიამ სააგენტოს.

მაგალითად, აჭარაში რამდენიმე დღის წინ ობიექტების მიერ კორონავირუსის პრევენციის კუთხით რეკომენდაციების შესრულების შემოწმების დროს დეპარტამენტის თანამშრომლებმა 600 ბიზნეს-სუბიექტი სიტყვიერად გააფრთხილეს, ხოლო 15 – დააჯარიმეს.

საქმე რთულადაა. ქვეყანაში უფრო მეტი ობიექტია, ვიდრე შესაბამისი მაკონტროლებელი უწყების თანამშრომელი.

რა ხდება მაშინ, როდესაც პანდემიას მხოლოდ უწყებები ვერ ერევიან? როდესაც მე აღარ ვარ უბრალოდ „მე“, ვხდები „ჩვენ“ და პასუხისმგებელი ვხდები სხვა, ბევრი ადამიანის ბედ-იღბალსა და ჯანმრთელობაზე? მარტივია – ჩნდება ვალდებულება, რომ აღარ გაქვს იმის უფლება, რომ ჩაატარო ექსპერიმენტი მაშინ, როდესაც წინ უამრავი მაგალითი გაქვს.

როგორც „Sputnik–საქართველოს“ დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელმა ამირან გამყრელიძემ განუცხადა, ინფექციის ზრდა ჩვენ ყველამ ერთად, სახელმწიფოსთან, ექიმებთან და მოსახლეობასთან ერთად უნდა შევაკავოთ.

„კორონავირუსულ პანდემიას მოერევა ერთად სახელმწიფო, ექიმები და საზოგადოება. საჭიროა მათი მჭიდრო თანამშრომლობა და კოორდინირებული მუშაობა პანდემიასთან ბრძოლის პროცესში. ჩვენ, ყველამ უნდა გავითავისოთ ჩვენი წილი პასუხისმგებლობა. ამას ვერ გააკეთებენ ცალკეული სახელმწიფოები, ეს უნდა მოხდეს გლობალურად. ამიტომ საერთაშორისო თანამშრომლობა უაღრესად მნიშვნელოვანია“, – განუცხადა სააგენტოს ამირან გამყრელიძემ.

რეალობამ დაგვანახა, რომ დაავადებათა კონტროლის ცენტრის ხელმძღვანელის თუ უწყებების მოწოდებებს იმისთვის არ უნდა დაველოდოთ, რომ მტვრიანი დეზობარიერები, არასწორად გაკეთებული პირბადეები და ვადაგასული თერმოსკრინინგის აპარატები აღარ იყოს.

არ ვიცით კიდევ რამდენ ხანს, მაგრამ ახლა ასეა: „მე“ – არა, „შენ“ – არა, არამედ „ჩვენ“ და ისევ ორი მეტრის დაშორებით...

 

271
ბარბარე 21

პროსტიტუციიდან ქველმოქმედებამდე რა ბედი ეწია „მამიდას" საროსკოპოს

335
(განახლებულია 22:01 09.07.2020)
მსოფლიოს ბევრ ქვეყანას შეშურდება, საქართველოში იმდენი ხუთვარსკვლავიანი სასტუმროა მაღალი კლასის მომსახურებითა და სერვისით. ყველას სახელი შესაძლოა ვერ გავიხსენოთ, მაგრამ არც ისე გამორჩეული, პატარა სასტუმრო „ჭალის ჩიტების“ სახელს დღეს ბევრი ვერ ივიწყებს.

ამის მიზეზს მიხვდებით, თუ გეტყვით, რომ სასტუმროს მეპატრონე საზოგადოებისთვის „მამიდას“ ნიკით ცნობილი როენა ხუცურაული გახლდათ. მიუხედავად მავანთა მიერ ამ სასტუმროში გატარებული დღეებისა, რომელიც ზოგისთვის ტკბილი მოგონება იყო, ზოგისთვის კი იმედგაცრუება, ის სასტუმრო აღარ არის, თქვენ რომ გახსოვთ...

გასული წლის მაისში აქ საგამოძიებო მოქმედებები ჩატარდა. გამოძიებამ დალუქა სასტუმრო „ჭალის ჩიტები“, როგორც პროსტიტუციის ობიექტი. ყველა მთავრობისგან დევნილ ქალს, ერისა და ბერის „მამიდას“, როენა ხუცურაულს კი „ამაგი“ არ დაუფასეს, ხელბორკილები დაადეს და სისხლის სამართლის პასუხისგებაში მისცეს.

„მამიდა“ პატიმრობიდან გირაოს სანაცვლოდ გაათავისუფლეს. მან სასამართლოშივე განაცხადა, რომ აღიშნულ ობიექტზე ქველმოქმედების მიზნით სათნოების სახლის დაარსებას აპირებდა…

„Sputnik–საქართველოს“ როენა ხუცურაულმა მოუთხრო, თუ როგორ აქირავებს დღეს სიმბოლურ ფასად სასტუმროს შშმ პირების დასახმარებლად და არც სამომავლო გეგმები დამალა. მისი ნათქვამიდან ყველაზე ნიშანდობლივი კი მაინც ერთი რამ იყო – „ჩემ სიბერეს ჩემს სასტუმროში ვხედავ“.

ბარბარე 21
© Sputnik / Shota Nozadze
ბარბარე 21

„ქველმოქმედების მიზნით სასტუმროში სათნოების სახლის გახსნას ვაპირებდი. ჯანმრთელობის მდგომარეობის გამო ვეღარ შევძელი, შშმ პირებისთვის ადაპტირებული გავხადე და პანსიონატისთვის სიმბოლურ ფასად, 1 ათას ლარად გავაქირავე. ესეც დახმარებაა. თუ ჯანმრთელობა ხელს შემიწყობს, ამ კეთილ საქმეში თავადაც ჩავერთვები. ყველაფერი ღვთის ნებაა. როცა წლებში შედიხარ ადამიანი, უკვე სხვანაირად ფიქრობ. ჩემ სიბერეს კი ჩემს სასტუმროში ვხედავ“, - გვითხრა როენა ხუცურაულმა.

ქველმოქმედება – ლამაზი სიტყვაა, ქმედება – კიდევ უფრო ლამაზი. ხოლო ნებისმიერი ქმედება, თუ სიკეთეს არ ემსახურება, მხოლოდ შიშველი ინსტინქტია. ძნელია ისაუბრო ქველმოქმედი ადამიანის მოტივაციაზე. ალბათ, ეს უფრო ბუნებრივი მოთხოვნილებაა, სიამოვნებაა, რაც ნებისმიერ ხორციელ სიამოვნებაზე გაცილებით ძლიერია.

„მამიდის“ ნათქვამის პატივისცემის მიუხედავად, ჩვენმა ჟურნალისტმა მისი მონათხრობი გადაამოწმა, ესტუმრა ახლა უკვე თავშესაფარს და, როგორც აღმოჩნდა, მას პირობა შეუსრულებია…

Ბარბარე 21
© Sputnik / Shota Nozadze
Ბარბარე 21

დაწყებული საქმიანობა მოხუცთა თავშესაფრის „ბარბარე 21“-ის მფლობელმა, „ქართული ოცნების“ ყოფილმა წევრმა მერაბ შათირიშვილმა განაგრძო. დაწესებულების კედლებში კი ახალი სიცოცხლე დაიწყო. მთლიანი შენობა და ცალკეული ოთახები მოძღვარმა აკურთხა, აურა გაიწმინდა და ახლა შენობის ფანჯრებიდან ბენეფიციარების ბედნიერი ხმა გამოდის.

შენობა 16 ბენეფიციარზეა გათვლილი. თითოეულ ოთახს აქვს თავისი სველი წერტილები, ცხელი და ცივი წყალი, გათბობა. სართულებს შორის გადასაადგილებლად კი არის ადაპტირებული ლიფტიც.

სააგენტოსთან საუბრისას მერაბ შათირიშვილმა აღნიშნა, რომ შენობა ხუთი წლით იქირავა, სხვა სასტუმროებს კი მოუწოდა, როენა ხუცურაულისგან მაგალითი აიღონ.

Ბარბარე 21
© Sputnik / Shota Nozadze
Ბარბარე 21

„მეპატრონეს თავად სურდა თავშესაფრის დაარსება. ნებართვაც ჰქონდა, თუმცა შემდეგ ცოტა გაუჭირდა თავის გართმევა, დამიკავშირდა და ბოლოს იმავე მიზნით ხუთი წლით ვიქირავე. ქირას სიმბოლური თანხაც შეიძლება ვუწოდოთ. მანამდე მეპატრონეს არ ვიცნობდი. მიკვირს, რატომ არის როენას სასტუმრო ასეთი ყურადღების ცენტრი, ან დღეს რა აზრი აქვს ადრე აქ რა იყო. თვითონ ცხოვრებამ გარკვეულწილად იმ გზით წაიყვანა, რომ გართობის ადგილი ყოფილიყო, მაგრამ თბილისის სხვა ნებისმიერ სასტუმროშიც შეუძლია წყვილს ღამის გათენება. ასეთ სასტუმროებს ვურჩევ ასეთ სიკეთის სახლებად გადაკეთებას, ვიდრე შეფარულად ყოფნას“, – გვითხრა შათირიშვილმა.

Ბარბარე 21
© Sputnik / Shota Nozadze
Ბარბარე 21

კითხვაზე, თუ როგორ ახდენს თავშესაფარი შეზღუდული შესაძლებლობების მქონე პირთა ინტეგრაციას საზოგადოებაში და მათთვის თანაბარი შესაძლებლობების უზრუნველყოფას, მერაბ შათირიშვილმა აღნიშნა, რომ, მაგალითად, შაბათს ვაკის პარკში გაიმართება საქველმოქმედო კონცერტი, სადაც მათი თავშესაფრიდან ბენეფიციარი იღებს მონაწილეობას.

ასე მოხდა... ქართულ საზოგადოებას კიდევ ერთი ქველმოქმედი და პატიოსანი ადამიანი შეემატა, „სასტუმროების ბიზნესს“ კი ერთი მზრუნველი ადამიანი გამოაკლდა.

რამდენად ქველმოქმედია „მამიდა“, ეს საზოგადოებამ განსაჯოს, თუმცა აქვე ცნობილი ფრაზა აგეკვიატება – ყველამ თავის მამიდას მიხედოს...

ჩვენ კი დავძენთ, სასიამოვნო სიახლეები კარგია, თუნდაც მოულოდნელი იყოს!..

335
მიკროფონი

მიხეილ ხიდურელი:  წელსმაქსიმალურად ბევრი კვალიფიციური ბიზნეს იდეის დაფინანსებას  შევძლებთ

0
(განახლებულია 15:30 29.09.2020)
მიკრო და მცირე მეწარმეობის საგრანტო პროგრამით გათვალისწინებული მიკროგრანტების ზღვარი 20 000 ლარიდან  30 000 ლარამდე გაიზარდა, განაცხადა სააგენტო „აწარმოე საქართველოში“ დირექტორმა მიხეილ ხიდურელიმა.
მიხეილ ხიდურელი: წელსმაქსიმალურად ბევრი კვალიფიციური ბიზნეს იდეის დაფინანსებას შევძლებთ
„წელს სხვა ანტიკრიზისული პროგრამების ფარგლებში მიკროგრანტების პროგრამასაც ექნება უპრეცენდენტო ბიუჯეტი - 40 მილიონი ლარი, რაც იმას ნიშნავს, რომ სხვა წლებისგან განსხვავებით წელს შევძლებთ მაქსიმალურად ბევრი კვალიფიციური ბიზნეს იდეის დაფინანსებას და წარმატებული მეწარმის დახმარებას. რაც შეეხება უშუალოდ პროგრამის თანამონაწილეობას, ანუ იმ თანხას რაც მეწარმემ თავის მხრივ უნდა დახარჯოს გრანტის მისაღებად, აქაც  20%-ის  მაგივრად 10%-ის დადება მოუწევს“, - განაცხადა მიხეილ ხიდურელმა ტელეკომპანია „მაესტროს“ ეთერში.

„აწარმოე საქართველოში“ – საქართველოს მთავრობის ერთ-ერთი წარმატებული პროექტია, რომელიც მიზნად ისახავს ქვეყანაში ადგილობრივი წარმოების წახალისებას. სააგენტო აერთიანებს ყველა სახელმწიფო პროგრამას, რომელიც ბიზნეს-სექტორისა და ქვეყნის ეკონომიკური განვითარების ხელშეწყობისკენაა მიმართული. კორონავირუსის პანდემიით გამოწვეული კრიზისის პირობებში მეწარმეთა დახმარების მიზნით გადაწყდა პროგრამის გაფართოება.

0