Грузинское застолье онлайн

სადღეგრძელოები ონლაინ ანუ როგორ ვცდილობ გადავაგორო „კორონობა“

151
(განახლებულია 18:47 17.05.2020)
საქართველოში გვიყვარს დალევა, თან ერთად: სუფრასთან აზრების გაცვლა, სიცილი, ხარხარი, მუსიკა, მოფერება. თუმცა რა ხდება ახლა? ყველანი თვითიზოლაციაში, სულ მარტო - თან მთელი დღე ოთხ კედელს ჩემმა მტერმა უყურა ფხიზელი, მგონი დროა ყველამ მოვიძიოთ  სახლებში ღვინის ბოთლები...  

წარმოუდგენელია, ერთმა პატარა ვირუსმა როგორ წამართვა ერთ დღეში ყველაფერი... იმდენად იმოქმედა სახლში ჩაკეტილობამ ჩემზე, რომ ეს ბოლო ორი თვეა აღარც სწავლის და აღარც მუშაობის სურვილი აღარ მაქვს. აღარც ერთი ფილმი, სერიალი, წიგნი, თამაში, სტატია, ნახატი თუ მუსიკა რომელიც ერთ დროს მოტივაციის წყაროდ მქონდა ქცეული, უკვე ვეღარ მხიბლავს და ჩემი რაიმე პროდუქტიულის გაკეთების ყოველი მცდელობა კრახით მთავრდება...

უკვე ორი თვეა ვზივარ სახლში, ოთხ კედელს შუა, ვუყურე ყველა ფილმს რისთვისაც კი მინდოდა მეყურებინა, ყველა სერიალს. ესენი რომ მოვილიე, წიგნებს მივადექი - მერე კომპიუტერულ თამაშებს. მოკლედ, ყველაფერი რისი გაკეთებაც დროის არ ქონის გამო არ შემეძლო ამ ორ თვეში ჩავატიე. ვიცი, რომ კიდევ ბევრია საკითხავი და სანახავი, მაგრამ სიმართლეს გეტყვით და დავიღალე. დავიღალე ამდენი თავისუფალი დროის ქონით.

არადა არასოდეს მიყვარდა უძრავად ყოფნა. სულ გარეთ მიმიწევდა გული, მაგრამ ახლა „დარჩით სახლშის“ - გარდა ვეღარაფერს გაიგებ ტელევიზორიდან, ალბათ ასეც არის საჭირო და ვრჩებით კიდევაც, მაგრამ ის მაინც გვითხარით, ამდენი ხანი ოთხ კედელს შორის გამოკეტილებმა რა ვაკეთოთ.

თავიდან, როგორც ყველა, მეც ვფიქრობდი, რომ ორ კვირიანი დასვენება არ იქნებოდა ცუდი, მაგრამ ორი კვირა ორ თვედ რომ იქცა, მაშინ უკვე გავაანალიზე, რომ სახლში ჯდომისგან გაგიჟება არ ამცდებოდა.

ზემოთ აღშნიშნული რისკის შემცირება კი სასმელით დავიწყე. ისე, რომ ჩემს ოჯახს ამის შესახებ არ გაეგო და ალბათ ვერც ვერასოდეს გაიგებდნენ, საქვეყნოდ რომ არ გამომეჭენებინა სტატიაში.

მოკლედ, როგორც ყველა ქართველს, მეც მიყვარს დალევა, თან ამ კარანტინის გადამკიდე მე კი არა, ყველა თქვენი მეგობარი, ვის ხელში ლუდის ბოთლიც კი არ დაგინახავთ, ცოტათი მაინც ეტანება სასმელს. აბა ისე აქამდე აუცილებლად გადავიდოდა ჭკუიდან. ამას მაშინ მივხვდი, როცა რამდენიმე დღის წინ მარტოობით შეწუხებულმა ჩემმა მეგობარმა დამირეკა და უცბად ერთმანეთის მოკითხვა და ლაპარაკი სმაში გადაგვეზარდა. ყოველი ჭიქის მერე თითო ადამიანს ვამატებდით სასაუბრო ჩატში და აღარ გაგიკვირდებათ თუ გეტყვით, რომ ყველა მათგანმა გამოაჩინა მშობლებისგან გადამალული სასმელი და მოგვეხმარა მამაპაპურ საქმიანობაში.

ზოგადად ქართველები ხშირად ვსვამთ განსხვავებულებით და ზიარების არ იყოს  - ერთი სასმისიდან. მერე ჩახუტება და მოფერება... სიმთვრალისას ხომ საერთოდ სიყვარულის ბუშტი გვისიკდება და ძალიან ბევრს ვიკოცნებით ხოლმე უაზროდ. ახლა კიდევ რა ხდება - ერთი სასმისიდან დალევა  და კოცნა კი არა ერთ მეტრზეც ვეღარ ვუახლოვდებით ერთმანეთს. აღარც აზრების გაცვლა თანამოსაუბრესთან, აღარც ხმაური, აღარც ყვირილი, აღარც ხმამაღალი მუსიკა, აღარც ხუმრობა და სიცილი. ასე ყველაფრისგან იზოლირება ძალიან ძნელია, მაგრამ სხვა გზა არ არის...

ღვინო გაზიარებისთვისააო, ნათქვამია. ყოველთვის სირცხვილად მიმაჩნდა მარტო დალევა, რადგან ჩემთვის სულ ლოთობასთან და უსაქმურობასთან ასოცირდებოდა. ახალმა კორონა ვირუსმა ყველანაირი შეხედულება შეცვალა და ყველანი ჩვენთვის ჯერ კიდევ უცნობ სიტუაციაში ჩაგვყარა.

აქვე მინდა გითხრათ, რომ თუ ალკოჰოლთან პრობლემები გაქვთ, თუ დამოკიდებული ხართ მასზე ანდა დეპრესია გაწუხებთ დალევა გამოსავალი არასოდეს არის არის.

თუმცა სხვა შემთხვევაში რატომაც არა, შეიძლება ვახშამთან ერთად ვისიამოვნოთ ერთი ჭიქა ღვინით.

ქართველი მწერლის აკა მორჩილაძის სიტყვებით: „ღვინო რომ არ იყოს, საქართველოც არ იქნებოდა. თუკი საქართველო რამეს უჭირავს, ერთ-ერთი ამათგანი არის ღვინო. იცინი - სვამ, ტირი - სვამ, სვამ დილიდან და ნაშუაღამევს. ღვინო აერთიანებს და აცალკევებს, ღვინო მალავს იმ დარდებს და აღვიძებს მსახიობობის სურვილს, ღვინო შვებასა გვრის ამტან კაცს და ეხმარება მას მოქნილ აზრთა დალაგებაში“.

ჩვენ ყველანი, ჩვენი ცხოვრების რამდენიმე თვეს ვწირავთ ისევ ჩვენივე თავის, ჩვენივე ოჯახისა და გარშემომყოფების კეთილდღეობისათვის. თავს ვარიდებთ მოგზაურობას, ბარებში სიარულს, აღარ ვნახუალობთ მეგობრებს, აღარც ვმუშაობთ, ვეღარც ვსწავლობთ და ვკარგავთ ძვირფას დროს ისევ და ისევ ჩვენი კეთილდღეობისთვის.

თუმცა ეს იმას არ ნიშნავს, რომ ჩვენ ყველანაირი გასართობი უნდა მოვიკლოთ და  სახლში გამოკეტილებმა ვიგლოვოთ. ჩემი რჩევა იქნება, რომ ყველამ ისიამოვნოს ამ რამდენიმეთვიანი დასვენებით და ასე შორიდან თითო ჭიქით სადღეგრძელო შევსვათ იმ დღის, როცა ჩვენ ყველა ისევ ერთად შევიკრიბებით.

ჯერჯერობით კი დარჩით სახლში!

 

151
მზის პანელები

9 მილიონის გრანტები სოფლად ბიზნესის განვითარებისთვის როგორ მოვიპოვოთ

1779
(განახლებულია 15:25 25.05.2020)
ალბათ საკამათო არაა, რომ ქვეყნის ეკონომიკური ზრდისა და განვითარებისთვის დიდი მნიშვნელობა ენიჭება სოფლის განვითარებას. ბოლო წლებია ამ მიმართულებით საქართველოში მნიშვნელოვანი ნაბიჯები იდგმება.

რამდენიმე დღეს წინ სოფლად ბიზნესის განვითარების დასახმარებლად ევროკავშირმა (EU) და გაეროს განვითარების პროგრამამ (UNDP) 9 მლნ ლარის ღირებულების საგრანტო პროგრამა გამოაცხადა. საგრანტო პროგრამის მიზანი სოფლად არასასოფლო-სამეურნეო სამეწარმეო საქმიანობის განვითარებაა. კერძოდ, არაფერმერული ბიზნესის განვითარება, სტაბილური სამუშაო ადგილების შექმნა, ბუნებრივი რესურსების მართვა და კლიმატის ცვლილების შერბილებისთვის ხელის შეწყობა.

საგრანტო პროგრამის პირობები:

აღნიშნული საგრანტო პროგრამა განხორციელდება 8 მუნიციპალიტეტში – ახალქალაქში, ბორჯომში, დედოფლისწყაროში, თეთრიწყაროში, ლაგოდეხში, ქედაში, ხულოსა და ყაზბეგში. პროგრამის პირველ ეტაპზე განცხადებები მიმდინარე წლის 1 აგვისტომდე მიიღება.

წარმოდგენილი პროექტის მთლიანი ღირებულების არანაკლებ 20%-იანი თანადაფინანსება ბენეფიციარებმა უნდა უზრუნველყონ. თავად სააგენტო კი თითოეულ ბიზნეს-პროექტზე გასცემს არანაკლებ 20 ათასი და არაუმეტეს 170 ათასი ლარის ოდენობის გრანტს.

კომერციული საქმიანობისთვის გათვლილი განახლებადი ენერგიების და ენერგოეფექტური პროექტები, რომლებიც ითვალისწინებს განახლებადი ენერგიების გამოყენებით თერმულ იზოლაციას ან სითბო/სიცივის გენერირებას, დაფინანსდება შემდეგი პირობებით: სააგენტოს თანადაფინანსების მინიმალური ოდენობა შეადგენს 1 500 ლარს, ხოლო მაქსიმალური ოდენობა შეადგენს 30 000 ლარს.

როგორც ზემოთ აღვნიშნეთ, წარმოდგენილი პროექტის მთლიანი ღირებულების არანაკლებ 20%-იანი თანადაფინანსება ბენეფიციარმა უნდა უზრუნველყოს. ეს შეიძლება იყოს ფულადი სახსრები, ან ბენეფიციარმა უნდა წარმოადგინოს (პროგრამაში განაცხადის წარმოდგენამდე არაუმეტეს ერთი წლით ადრე რეგისტრირებული) მეწარმე იურიდიული პირი, რომელსაც საკუთრებაში გააჩნია ძირითადი საშუალებები.

ვის აქვს პროგრამაში მონაწილეობის მიღების უფლება:

- საქართველოს მოქალაქე მეწარმე ფიზიკურ და იურიდიულ პირს.

ბენეფიციარს მოეთხოვება შემდეგი პირობების დაცვა:

- პროექტის განსახორციელებლად შერჩეული უძრავი ქონება უნდა ჰქონდეს საკუთრებაში ან მიღებული ჰქონდეს იჯარით/აღნაგობით

- უძრავ ქონებას არ უნდა ედოს ყადაღა ან/და იპოთეკა (დასაშვებია მხოლოდ საქართველოში რეგისტრირებული კომერციული ბანკების იპოთეკა);

- არ უნდა გააჩნდეს დავალიანება სახელმწიფო ბიუჯეტის ან შემოსავლების სამსახურის მიმართ.

- იმ შემთხვევაში, თუ პოტენციური ბენეფიციარი არის სააგენტოს მიერ განხორციელებული რომელიმე პროექტის  ბენეფიციარი, მას განაცხადის წარმოდგენის მომენტისთვის არ უნდა ჰქონდეს პროექტის პირობები დარღვეული.

რა სახის პროექტები არ დაფინანსდება:

პროექტები, რომლებიც უკავშირდება

- სამხედრო, ბირთვულ, სპირტის და ალკოჰოლური სასმელების, თამბაქოს და სახიფათო ნივთიერებების წარმოებას;

- სასოფლო-სამეურნეო პროდუქციის პირველად და სურსათის წარმოებას

- სათამაშო ბიზნესს და აზარტულ თამაშებს;

- საფინანსო მომსახურებას (მათ შორის სალომბარდო);

- საქველმოქმედო საქმიანობას;

- ვაჭრობას.

როგორ მივიღოთ თანადაფინასება:
თანადაფინანსების მისაღებად შემდეგი ეტაპები უნდა გაიაროთ:

1. ვებ-გვერდზე რეგისტრაცია

განაცხადის შესავსებად უნდა დარეგისტრირდეთ ვებ-გვერდზე (www.arda.gov.ge). რეგისტრაცია ხორციელდება აუცილებელი ველების შევსების შემდეგ.

რეგისტრაციისას სავალდებულოდ შესავსები ველები:

• სახელი/გვარი;

• დაბადების თარიღი;

• პირადი ნომერი;

• მობ/ტელ ნომერი;

• დამატებითი ტელ. ნომერი;

• ელექტრონული ფოსტის მისამართი;

• პაროლი

განაცხადის შევსება
 1. შედიხართ ვებ-გვერდის საკუთარი მართვის პანელში;

2. აჭერთ ღილაკს „განაცხადის დამატება“;

3. ირჩევთ - „ფიზიკური პირი“/„იურიდიული პირი“;

4. ავსებთ განაცხადის ელექტრონულ ფორმას;

5.  ავსებთ განაცხადის ფორმაში ყველა აუცილებელ ველს;

6.  განაცხადის ფორმის შევსების შემდეგ ავსებთ ბიზნეს-მოდელის ელექტრონულ ფორმას;

7. ღილაკზე დაჭერით ადასტურებთ, რომ თქვენ მიერ მიწოდებული ინფორმაცია არის უტყუარი;

8.  აჭერთ ღილაკს „განაცხადის/ბიზნეს-მოდელის შენახვა“.

განაცხადის/ბიზნეს-მოდელის შესავსებ გვერდზე განთავსებულია ღილაკი „განაცხადის გაგზავნა“, რომელზეც დაჭერის შემდეგ ვებ-გვერდზე ჩნდება შეტყობინება განაცხადის გაგზავნის თანხმობის შესახებ – „ვეთანხმები“.

თქვენი თანხმობის შემთხვევაში შევსებული განაცხადი აღირიცხება სისტემაში და მიენიჭება სარეგისტრაციო ნომერი.

განაცხადის/ბიზნეს-მოდელის გადაგზავნაზე თანხმობის შემდგომ მისი კორექტირება დაუშვებელია.

აპლიკაციის შეფასება

პოტენციური ბენეფიციარების მიერ გაგზავნილი განაცხადები სააგენტოს მონაცემთა ბაზაში აღირიცხება და ავტომატურად გადაუნაწილდება სააგენტოს თანამშრომლებს განსახილველად. განაცხადების განხილვა ხორციელდება მხოლოდ იმ შემთხვევაში, თუ მოცემულ დროს ხელმისაწვდომია განაცხადით მოთხოვნილი თანადაფინანსების შესაბამისი ბიუჯეტი.

აღსანიშნავია, რომ პროექტის დასრულებიდან 3 წლის განმავლობაში ბენეფიციარი ვალდებულია ყოველწლიურად წარმოადგინოს აუდიტორული დასკვნა ფინანსური მდგომარეობის, პროფილის შენარჩუნების, დასაქმებულთა რაოდენობის, გადახდილი ხელფასების, გაწეული მომსახურების ან/და წარმოებული პროდუქციის მოცულობის და შესყიდული ნედლეულის (ღირებულება და მოცულობა) შესახებ.

სააგენტო უფლებამოსილია ნებისმიერ დროს, წინასწარი შეტყობინების გარეშე, პროექტის განხორციელების ადგილზე არსებული მდგომარეობის და პროექტის პროგრესის შეფასების მიზნით განახორციელოს ვიზიტი პირადად ან დამოუკიდებელი სპეციალისტის/ექსპერტის/აუდიტორის მეშვეობით.

გაითვალისწინეთ, პროგრამით გათვალისწინებული მიზნობრიობის შესაბამისი განაცხადის ფორმები და ბიზნეს-მოდელის ფორმა, ასევე მომზადების ინსტრუქციები მოცემულია ელექტრონული სახით ვებ-გვერდზე (www.arda.gov.ge) და ხელმისაწვდომი გახდება რეგისტრაციის გავლის შემდეგ.

1779
დედა შვილებთან ერთად კარანტინში

ფსიქოლოგის რჩევა მშობლებს, რომელთა შვილებიც სახლში არიან გამოკეტილი

255
(განახლებულია 22:27 27.04.2020)
მსოფლიოში გავრცელებულმა პანდემიამ უამრავი ადამიანის ცხოვრება შეცვალა და თავდაყირა დააყენა. ერთ დღესაც ადამიანებმა სულ სხვა, მათთვის უჩვეულო რეალობაში გაიღვიძეს. ამ რეალობასთან შეგუება კი არც ისე მარტივი აღმოჩნდა.

ამ ყველაფრის აღქმა და გააზრება განსაკუთრებით ბავშვებს გაუჭირდათ. როგორ შეუძლიათ მშობლებს დაეხმარონ ბავშვებს, რომ მათ შეინარჩუნონ ემოციური და ფსიქოლოგიური სტაბილურობა, სიმშვიდე, ამის შესახებ ფსიქოლოგი მარიამი შოვნაძე საუბრობს.

მარიამ შოვნაძე
მარიამ შოვნაძე

 

- რა უარყოფითი გავლენა შეიძლება იქონიოს ხანგრძლივმა შიდა იზოლაციამ ბავშვის ფსიქოემოციურ მდგომარეობაზე?

- ჩვენ ერთ დღეს სრულიად ახალ რეალობაში აღმოვჩნდით. ვიღვიძებთ და აღარსად მივდივართ. ეს ხდება არა მარტო ჩვენს საცხოვრებელ უბანში ან ქალაქში, არამედ მთელ მსოფლიოში. ხშირად საუბრობენ, რომ ახლა განსაკუთრებით სტრესულია ყოველი დღე. ადამიანები მნიშვნელოვანი და მოულოდნელი ცვლილებების წინაშე აღმოვჩნდით, მაგალითად, ახლა ის გვაქვს ძალიან ბევრი, რაც ადრე უფრო დეფიციტური იყო ჩვენს ცხოვრებაში - თავისუფალი დრო, რომელიც თავისთავად მრავალ ფაქტორთან არის დაკავშირებული და უფრო კომპლექსურ ცვლილებებს იწვევს.

არა მარტო ზრდასრულების, არამედ ბავშვების ყოველდღიურობაც რადიკალურად შეიცვალა. ისინი აღარ მიდიან ბაღში, სკოლაში, აღარ აქვთ ძველი ინტენსივობით ფიზიკური და სოციალური აქტივობები, შეეცვალათ დღის რუტინა, ძილის განრიგი და კვებითი ჩვევები. იზოლაციის პერიოდში განსაკუთრებით რთულია პირადი სივრცის დაცვა, ემოციების კონსტრუქციული ფორმით გამოხატვა და დღის მრავალფეროვნად გატარება. ამ პერიოდში ხშირად ვისმენ ბავშვებისგან (8-9 წლიდან), რომ არიან მოწყენილები, მათი თქმით, არაფერი კარგი არ ხდება, გრძნობენ მობეზრებას, რადგან ყოველი დღე ერთნაირად იწყება და მთავრდება, უფრო მარტივად ღიზიანდებიან ან ტირიან. აქვთ კითხვები, რატომ ხდება ეს ყველაფერი და უფრო მეტი კითხვის ნიშნები აქვთ მომავალთან - როდის დაბრუნდებიან სკოლაში, მეგობრებთან. 5-7 წლის ბავშვებისგან უფრო დადებით ფრაზებს ვისმენ, უხარიათ, რომ მშობლები მათთან ერთად არიან და ერთად ატარებენ დროს. თუმცა აუცილებლად უნდა გამოვყოთ, რომ შიდა იზოლაციის პერიოდში არსებობს საშიშროება გამოვლინდეს ემოციური და ქცევითი სირთულეები, რაც ზემოთ ნახსენები ფაქტორებით არის განპირობებული.

- როგორ უნდა დაეხმარონ მშობლები ბავშვებს, რომ შეინარჩუნონ ემოციური სტაბილურობა?

- პირველ რიგში, მნიშვნელოვანია ზრდასრულებმა ვიზრუნოთ საკუთარ ფსიქოემოციურ მდგომარეობაზე. ხშირად ბავშვებს ვეუბნებით ერთს, მაგრამ ვაკეთებთ სრულიად საწინააღმდეგოს. ბავშვები გაცილებით მეტ ინფორმაციას იღებენ ჩვენი ქმედებებიდან, ვიდრე საუბრის დროს. მაგალითად, თუ მშობელი ბავშვს ეუბნება, რომ არაფერია საშიში, მაგრამ რამდენიმე წუთში ის შფოთვას იწყებს და მეგობარს ესაუბრება ტელეფონზე იმის შესახებ, თუ როგორ ღელავს, ნერვიულობს, რა თქმა უნდა, ბავშვს დაავიწყდება მშობელმა რა უთხრა, ის სრულიად სააწინააღმდეგო სურათს ხედავს. არა მარტო ქმედება, არამედ ჩვენი, ზრდასრულების ემოციები გადადის ბავშვებზე. ამიტომ მნიშვნელოვანია რამდენიმე ფაქტორის გათვალისწინება.

· მშვიდად და თავდაჯერებულად ვესაუბროთ ბავშვებს, ჩვენი ქმედებები კი შეესაბამებოდეს ჩვენს ტექსტებს (მესიჯებს);

· მივცეთ ბავშვებს დრო და სივრცე საკუთარი ემოციების გასაზიარებლად. ავუხსნათ, რომ ისინი ახლა რასაც გრძნობენ, ეს სრულიად ბუნებრივია, თუნდაც ეს იყოს შიში, ბრაზი ან მობეზრება. განსაკუთრებით აუცილებელია მოზარდებს დავუტოვოთ პირადი სივრცე.

· მივცეთ ბავშვებს შესაძლებლობა დასვან კითხვები, ჩვენ ამ პუნქტის საშუალებით გავიგებთ რეალურად ისინი რა დოზის ინფორმაციას ფლობენ და რამდენად სწორი წყაროებიდან, აქედან გამომდინარე შევძლებთ საჭიროების შემთხვევაში სწორი ფორმით ჩავერიოთ.

· საინფორმაციო გამოშვებების ყურება შევზღუდოთ მაქსიმალურად, დღის განმავლობაში ეს შეიძლება იყოს ერთი საათი.

· გავწეროთ დღის რუტინა, თუ რას ვაკეთებთ დღის განმავლობაში. უფრო მეტი დრო დაეთმოს საოჯახო აქტივობებს, თამაშებს, სახლის განახლებას, თუნდაც კულინარიას და ახალ ინტერესებს. დღის ბოლოს შეაჯამეთ, თუ როგორ წარმატებით შეასრულეთ დღის გეგმის ყველა პუნქტი, თქვენ ნახავთ, რომ დრო სულაც არ გადის ტყუილად და თქვენ ისევ ქმედითი ხართ.

- სკოლა გადავიდა დინსტანციური სწავლების მეთოდზე, ამასთან, ბავშვები ერთობიან სოციალურ  სივრცეში, უყურებენ ფილმებს, თამაშობენ სხვადასხვა თამაშებს და ა.შ. როგორ ფიქრობთ, ზედმეტად ბევრ დროს ხომ არ ატარებენ ისინი ეკრანთან? რა გავლენა შეიძლება იქონიოს ამან ბავშვებზე და ამ მხრივ სიმკაცრე უნდა გამოიჩინონ თუ არა მშობლებმა, როგორ უნდა დაარეგულირონ მათ ეს საკითხი?

- ამ პერიოდში საშიშროება არსებობს ეკრანზე დამოკიდებულების ჩამოყალიბების, ან კიდევ უფრო მეტად გამძაფრების, ამიტომ დღის რუტინაში ცალსახად უნდა იყოს გაწერილი დისტანციური გაკვეთილების შემდეგ დასვენების დრო, მეგობრებთან კონტაქტის და სხვა აქტივობების დრო, რომელიც ეკრანთან არ უნდა იყოს დაკავშირებული. მიუხედავად იმისა, რომ ჩვენ სახლში ვართ, აუცილებელია არსებობდეს დღის რუტინა არა მარტო ბავშვებისთვის, ასევე მშობლებისთვის. ეკრანთან დაკავშირებული რეკომენდაციები მხოლოდ ბავშვებისთვის არ არის. მნიშვნელოვანია თავად მშობელიც აკონტროლებდეს დროს ეკრანთან, სოციალურ ქსელში.

- იმისთვის, რომ მშობლებმა შვილებს შეუნაჩუნონ ფსიქიკური მდგრადობა, პირველ რიგში, აუცილებელია მათ საკუთარ ემოციურ და მენტალურ ჯანმრთელობაზე იზრუნონ. როგორ უნდა მოახერხონ ეს, რას ურჩევთ მათ?

- ბავშვებს რა მიმართულებასაც ვაძლევთ და რა მითითებების შესრულებასაც ვთხოვთ, ჩვენ ზრდასრულებმაც ზუსტად იგივე უნდა გავაკეთოთ.

· ყოველ დილით გავწეროთ დღის რუტინა, დღის ბოლოს კი შევაჯამოთ. აღმოვაჩენთ, რომ იზოლაციის პერიოდში ისევ პროდუქტიულები ვართ;

· საინფორმაციო გამოშვებების ყურება და სოციალური ქსელის მოხმარება უმჯობესია ვაკონტროლოთ;

· დავიცვათ ძილის ჰიგიენა;

· მოვაწესრიგოთ კვების რეჟიმი, მივირთვათ ფიზიოლოგიური შიმშილის მიხედვით და არა მადის გათვალისწინებით;

· თავი ავარიდოთ სხვადასხვა სახის დამოკიდებულების ჩამოყალიბებას (საკვები, თამბაქო, ალკოჰოლი და ა.შ.);

· აღმოვაჩინოთ სიახლეები - ეს შეიძლება იყოს კულინარია, მებაღეობა, ახალი ენის ან პროგრამის შესწავლა;

· დავგეგმოთ საოჯახო აქტივობები, მაგალითად, სამაგიდო თამაშები, სახლში გამოფენის მოწყობა და ა.შ;

· ვცადოთ ფიზიკური აქტივობების დაწყება, თუნდაც მცირე დოზით;

· ვეკონტაქტოთ დისტანციურად მეგობრებს, ახლობლებს, თანამშრომლებს და გავუზიაროთ ჩვენი ემოციები;

დიახ, ვერ გავექცევით მოცემულობას, რომ დღეს სხვადასხვა ქვეყნებში ადამიანები ვირუსს ებრძვიან, ჩვენ კი სახლში ვართ. ეს რეალობაა, რომელიც უნდა მივიღოთ, რათა არსებულ მოცემულობასთან ადაპტირება შევძლოთ. სანამ ერთ დღეს მსოფლიო შეიცვლებოდა, ბევრი ქმედების განხორციელება გვსურდა, თუმცა ვერ ვახერხებდით და მიზეზი დეფიციტური დრო იყო. ახლა შეგვიძლია გავიხსენოთ ჩვენი სურვილები და ხანდახან, როცა ვამბობთ „არ ვიცი რა გავაკეთო“, ამ თავისუფალ დროში დავინახოთ შესაძლებლობები. მნიშვნელოვანია გავუფრთხილდეთ საკუთარ თავს და ოჯახის წევრებს, მეგობრებს არა მხოლოდ ფიზიკური თავლსაზრისით, არამედ გავაძლიეროთ ემოციურადაც.

 

255
მატარებელი

„საქართველოს რკინიგზა“ მზადაა: ვინ და რატომ აფერხებს სარკინიგზო მიმოსვლის აღდგენას

0
(განახლებულია 18:35 03.06.2020)
მგზავრთა სარკინიგზო ტრანსპორტით გადაყვანა, კორონავირუსის გავრცელების პრევენციის მიზნით, 31 მარტს შეჩერდა.

 

თბილისი, 3 ივნისი - Sputnik.  საქალაქთაშორისო მგზავრთა გადაყვანა 8 ივნისიდან აღდგება, თუმცა, ძალაში რჩება სარკინიგზო ტრანსპორტით მგზავრთა გადაყვანაზე დაწესებული შეზღუდვა – საქართველოს მთავრობის 23 მაისის დადგენილებაში შესაბამისი ცვლილებები სამშაბათს შევიდა. 

როგორც დადგენილებაშია აღნიშნული, შეზღუდულია სარკინიგზო ტრანსპორტით მგზავრთა გადაყვანა, გარდა ოფიციალური სარკინიგზო გადაზიდვებისა, რომლის ფარგლებშიც ხორციელდება „საქართველოს რკინიგზის“ თანამშრომელთა გადაყვანა ექსპლუატაციის ადგილამდე ან პირიქით, ოპერატიულ შტაბთან შეთანხმებით.

ამასთან, „საქართველოს რკინიგზა“ მზადყოფნას გამოთქვამს მგზავრთა მომსახურებისთვის. ამ მიზნით უკვე შეძენილია სადეზინფექციო საშუალებები და უკონტაქტო თერმომეტრები. თუმცა, როდის განახლდება სარკინიგზო მიმოსვლა, ჯერჯერობით, უცნობია.

 „მოსალოდნელია, რომ ეს საკითხი უწყებათაშორისი საკოორდინაციო საბჭოს სხდომაზე გადაწყდება“, – განაცხადეს „საქართველოს რკინიგზის“ წარმომადგენლებმა ტელეკომპანია „იმედთან“. 

მგზავრთა სარკინიგზო ტრანსპორტით გადაყვანა, კორონავირუსის გავრცელების პრევენციის მიზნით, 31 მარტს შეჩერდა. 

3 ივნისისთვის საქართველოში კორონავირუსით ინფიცირებულთა რაოდენობამ 800–ს მიაღწია. გამოჯანმრთელდა 640 ადამიანი, გარდაიცვალა 13. კარანტინში იმყოფება 2424 ადამიანი, სტაციონარში მეთვალყურეობის ქვეშ – 304.   უცხოეთიდან სამშობლოში სამკურნალოს საქართველოს სამი მოქალაქეა გადმოყვანილი.

ქვეყანაში 23 მაისიდან საგანგებო მდგომარეობა და კომენდანტის საათი, რომელიც 21 მარტს ამოქმედდა, გაუქმდა. ამ დრომდე მკაცრი კარანტინი მოქმედებს თეთრიწყაროში და ბოლნისის რაიონის ორ სოფელში: მუშევანსა და გეტაში.

გარდა ამისა, მოქმედ შეზღუდვებში შედის საერთაშორისო სახმელეთო, საჰაერო და საზღვაო მიმოსვლაზე აკრძალვა, ასევე 10 კაცზე მეტის შეკრება ტრადიციულ სოციალურ ღონისძიებებზე (ქორწილი, დაკრძალვა, იუბილე და ა.შ.).

ქვეყანაში 29 მაისიდან მუშაობა განაახლა საზოგადოებრივმა ტრანსპორტმა. 1 ივლისიდან კი საერთაშორისო ავიამიმოსვლის აღდგენა იგეგმება.

0
თემები:
COVID-19 საქართველოში