არჩევნები საქართველოში

დაილევა თუ არა ვაკეში ყავა?.. ანუ პირველი ემოციები

1051
დაცლილი საარჩევნო ყუთები და ფიქრები ორი პროცესის მიჯნაზე... ამონარიდები სოციალური ქსელიდან - ვინ რას წერს და რატომ? პასუხის ძიება კითხვაზე - რავარია, ჰაა?

საკამათო არ არის, რომ ახლა ჯერ კიდევ ის დროა, როცა წლის მთავარი მოვლენისა და მასთან დაკავშირებული ნიუანსების შეფასებისას, ნაფიქრალ-ნააზრევის ემოციურად გამოხატვას ფართო გასაქანი მიეცა. ხუმრობა არ არის, ხანგრძლივი, წინააღმდეგობრივი და პოზიტიური თუ ნეგატიური სიურპრიზებით დატვირთული ერთი პოლიტიკური პროცესი დასრულდა. მალე ახალი დაიწყება და დარწმუნებული ვარ კიდევ უფრო მრავლისმნახველნი ვიქნებით, უფრო მეტიც შესაძლოა ყველაზე დიდი გაოცება მომავალში გველის, როცა ჩვენივე არჩევანის შედეგს მოვიმკით და არავინ იფიქროს, რომ მხოლოდ ნეგატიური ან პოზიტიური მოლოდინი უნდა გვქონდეს. მრავალგზის მითქვამს — „ამ ქალაში ყველაფერი  მოსულა!..“ და შესაბამისად ყველაფრისთვის მზად უნდა ვიყოთ… მანამდე კი არის დრო და ერთად გადავხედოთ რას ფიქრობს პოლიტიკური ბატალიების შემხედვარე განცვიფრებული, დაღონებული, ამაყი, აღტკინებული თუ იმედგაცრუებული მოქალაქე…  

   

„კიდევ ოთხი წელი მოგვიწევს ბევრი ისეთის ყურება, უფრო სატირული ჟურნალების პერსონაჟებს რომ ჰგვანან!.. კვლავ ძველი და მობეზრებული კონფიგურაცია მობრუნდა!..“ 

„ნიკა გვარამიამ ტელეკომპანია „რუსთვი 2“-ის ეგზიტპოლშიც კი როგორ გადააგდო თავისი „საყვარელი პოლიტიკოსი“ შალვა ნათელაშვილი!..“

„ვინმემ თქვა, რომ წააგო „ნაციონალურმა მოძრაობამ“?.. მე მგონია, რომ მოგებულები უფრო არიან!..“

„სადაც ბიძინა გეგიძე უგებს ელენე ხოშტარიას, იმ უბანში ყავა როგორ უნდა დალიო?..“

ეს მხოლოდ რამდენიმე ამონარიდია „FACEBOOK“ —ის იმ ე.წ „პოსტებიდან“ არჩევნების დასრულებიდან რამდენიმე საათში რომ დაიწერა… ცნობილების ნაფიქრალი აქვეა უფრო ვრცლად.  

ფილოსოფოსი ზაზა ფირალიშვილი: „მთავარი ისაა, რომ კვლავ ძველი და მობეზრებული კონფიგურაცია მობრუნდა. კიდევ ოთხი წელი მოგვიწევს ბევრი ისეთი მავანის ყურება, უფრო სატირული ჟურნალების პერსონაჟებს რომ ჰგვანან. ასეთებმა იმრავლეს კიდეც. ამას დაუმატეთ ისიც, რომ ოპოზიციური ძალა კატეგორიულად არის ქვეყნის მოსახლეობის დიდი ნაწილისათვის მიუღებელი და მას მხოლოდ საპროტესტო მუხტის მითვისება და გაფანტვა ძალუძს. როგორც არ უნდა მიწყინონ, ეს ასეა. დღეს ხელისუფლებას არ ჰყავს სრულფასოვანი ოპონენტი. ამიტომაც არსებობს საფრთხე, რომ პოლიტიკური ცხოვრება კვლავ შემთხვევითი პოლიტიკური დემაგოგების ხელში ჩავარდება. ასეთი პარლამენტი ქვეყნის სტაბილური განვითარების გარანტი ვერ იქნება. ისევ იმის იმედი თუ გექნება კაცს, რომ მმართველ პარტიაშიც და ოპოზიციაშიც რამდენიმე ადამიანს მაინც ესმის, თუ რა ცუდი სურათი მივიღეთ. ეს დიდი ვერაფერი იმედია, მაგრამ სხვა რა გზაა?! ის, რაც ქართულ პოლიტიკურ სპექტრში ხდება, სხვა არაფერია, თუ არა (როგორც ამას უცხოელებმა უწოდეს) „ფეოდალური პოლიტიკური პლურალიზმი…“ პოლიტიკური პარტიები „ერთადერთი და განუმეორებელი“ ფეოდალების ხელშია, კბილებით რომ იცავენ თავის სამფლობელოებს. იდეოლოგიურ ტყუპისცალებს საერთო ენა ვერ უპოვნიათ. მავანთა პიროვნული მესიანიზმით ჩნდება და ქრება კარიკატურული პოლიტიკური წარმონაქმნები. თუ ადრე ამას რაღაც გამართლება მაინც ჰქონდა, დღეს უკვე ამუხრუჭებს ქვეყნის განვითარებას. პოლიტიკურ და პიროვნულ ნარცისიზმზე აღარაფერს ვიტყვი. სამარცხვინოა, ნარცისივით იქცეოდე და ასეთი შედეგები გქონდეს. იდეოლოგიური სნობიზმი და ზერელობა ხომ კიდევ ცალკე პრობლემაა. მოკლედ ვართ იქ, სადაც ვართ…“

ჟურნალისტი ია ანთაძე: „ჯერ ზუსტად არ ვიცით, რა შედეგი იქნება საბოლოოდ და ექნება თუ არა „ქართულ ოცნებას“ საკონსტიტუციო უმრავლესობა პარლამენტში, მაგრამ შედეგებზე ფიქრისას უნდა გავითვალისწინოთ, რომ რასაც მივიღებთ, სწორედ ეს არის საქართველოს მოსახლეობის ინფორმირებული, გაუყალბებელი, არაძალადობრივი არჩევანის შედეგი…“

ჟურნალისტი თეა ბარამაშვილი: „არც მიშა ჩამოდის საქართველოში, არც სანდრა ჩადის ზუგდიდში და არცა შიოლა ყოფილა…“

პუბლიცისტი ვასილ მაღლაფერიძე: „კარგი იქნება, ეგზიტპოლები რომ ავკრძალოთ! ეგენი ფულს აკეთებენ და ჩვენ ნერვები გვაწყდება!.. ახლა კი ნამდვილად ჩაუვარდა კოვზი ნაცარში მიხეილ სააკაშვილის, მანდ ისეთები არიან, შევლენ კი არა, ვერავინ შეასწრებს, შეიძლება უკვე იქ სხედან კიდეც. აწი თავად მიშასაც მოისვრიან, მისგან ხეირს აღარ გამოელიან. წაგებასაც მთლიანად მიშას დააბრალებენ! ჯერ მხოლოდ „რაზგონს“ იღებენ და ცოტა ხანში მაგარი ურთიერთანათემიზაცია დაეწყებათ!..“

მწერალი პაატა ქურდაძე: „ნიკა გვარამიამ ტელეკომპანია „რუსთვი 2“-ის ეგზიტპოლშიც კი როგორ გადააგდო თავისი „საყვარელი პოლიტიკოსი“ შალვა ნათელაშვილი! უნამუსობასაც ხომ აქვს საზღვარი! რა სატიკად და დაუნდობლად დამთავრდა 2016 წლის წინასაარჩევნო ყველაზე ბედნიერი და მთავარი "ლავ სთორი…" ან სამწუხარო სხვა ამბავი იქნება განა, შალიკოსა და ჯულიეტოვნას ამბავისთანა?!..“

ჟურნალისტი მერაბ მეტრეველი: „როცა პარალელური დათვლის და ცესკო-ს შედეგები ერთმანეთს ემთხვევა, უკვე საეჭვო ალბათ არაფერია. შესაბამისად, უკვე შეგვიძლია ვთქვათ, რომ ტ/კ „რუსთავი 2"-მა ეგზიტპოლებში მთლიანად ჩაისვარა; ვერც „ქართული ოცნების“ შედეგები გამოიცნო და ვერც „ნაციონალური მოძრაობის“… ტ/კ „იმედმა“ ნახევრად ჩაისვარა; „ქართული ოცნების“ შედეგი თითქმის გამოიცნო, „ნაციონალური მოძრაობის“ — ვერა!..“

ანალიტიკოსი არჩილ გამზარდია: „ვინმემ თქვა, რომ წააგო „ნაციონალურმა მოძრაობამ“?.. მე მგონია, რომ მოგებულები უფრო არიან… იმ დროს, როცა პარლამენტში ოპოზიციურ ორბიტაზე არც უნდა იყვნენ, არათუ პირველები, არამედ ერთადერთებიც აღმოჩნდნენ, როგორც ჩანს… ძალადობა იყო „შუაშიზმის“ წინააღმდეგ კამპანია, დიახ, მეტი პროპაგანდა უნდა ყოფილიყო ამ „შუაშიზმის“ სასარგებლოდ და არა მის წინააღმდეგ. ამ კამპანიამ პრაქტიკულად სხვადასხვა პარტიის პოტენციურ ამომრჩეველზე იძალადა კონცეფციით „სამშობლო განსაცდელშია, არ მისცე ხმა არავის „ქართული ოცნების“ (ან ნაციონალური მოძრაობის) გარდა“… ამ სტრატეგიით წარმოებული კამპანია, ცხადია, ვერ იქნებოდა ბუნებრივი მოცემულობა — ბუნებრივი არჩევანი…“

ტ/კ „რუსთავი 2“-ის გენერალური დირექტორი ნიკა გვარამია: „ნეტა იმათ თავში ჩამახედა, ირმა ინაშვილის პარლამენტში ექვსი კაცით შესვლა უფრო დიდი პრობლემა და საგანგაშო სიმპტომი რომ გონიათ, ვიდრე ბიძინას უმრავლესობა. გულუბრყვილობაა, ზედაპირულობა თუ გამოშტერება, არ ვიცი…“

ჟურნალისტი ეკა კვესიტაძე: „სადაც ბიძინა გეგიძე უგებს ელენე ხოშტარიას, იმ უბანში ყავა როგორ უნდა დალიო?..“

დასასრულ მსურდა ორიოდე სიტყვა მეც მეთქვა, თუმცა დავფიქრდი და გადავწყვიტე ახლა მხოლოდ გკითხოთ — რავარია, ჰაა?.. დასმულ კითხვას თავადვე ვუპასუხებ და გეტყვით, რომ „სასწაულია“ იმასთან შედარებით აწი რომ იქნება. ახლა ერთად ვიფიქროთ რა შეიძლება იყოს ასეთი…


1051
თემები:
საპარლამენტო არჩევნები 2016 (185)
თემაზე
საპარლამენტო არჩევნები 2016
ბარბარე 21

პროსტიტუციიდან ქველმოქმედებამდე რა ბედი ეწია „მამიდას" საროსკოპოს

252
(განახლებულია 22:01 09.07.2020)
მსოფლიოს ბევრ ქვეყანას შეშურდება, საქართველოში იმდენი ხუთვარსკვლავიანი სასტუმროა მაღალი კლასის მომსახურებითა და სერვისით. ყველას სახელი შესაძლოა ვერ გავიხსენოთ, მაგრამ არც ისე გამორჩეული, პატარა სასტუმრო „ჭალის ჩიტების“ სახელს დღეს ბევრი ვერ ივიწყებს.

ამის მიზეზს მიხვდებით, თუ გეტყვით, რომ სასტუმროს მეპატრონე საზოგადოებისთვის „მამიდას“ ნიკით ცნობილი როენა ხუცურაული გახლდათ. მიუხედავად მავანთა მიერ ამ სასტუმროში გატარებული დღეებისა, რომელიც ზოგისთვის ტკბილი მოგონება იყო, ზოგისთვის კი იმედგაცრუება, ის სასტუმრო აღარ არის, თქვენ რომ გახსოვთ...

გასული წლის მაისში აქ საგამოძიებო მოქმედებები ჩატარდა. გამოძიებამ დალუქა სასტუმრო „ჭალის ჩიტები“, როგორც პროსტიტუციის ობიექტი. ყველა მთავრობისგან დევნილ ქალს, ერისა და ბერის „მამიდას“, როენა ხუცურაულს კი „ამაგი“ არ დაუფასეს, ხელბორკილები დაადეს და სისხლის სამართლის პასუხისგებაში მისცეს.

„მამიდა“ პატიმრობიდან გირაოს სანაცვლოდ გაათავისუფლეს. მან სასამართლოშივე განაცხადა, რომ აღიშნულ ობიექტზე ქველმოქმედების მიზნით სათნოების სახლის დაარსებას აპირებდა…

„Sputnik–საქართველოს“ როენა ხუცურაულმა მოუთხრო, თუ როგორ აქირავებს დღეს სიმბოლურ ფასად სასტუმროს შშმ პირების დასახმარებლად და არც სამომავლო გეგმები დამალა. მისი ნათქვამიდან ყველაზე ნიშანდობლივი კი მაინც ერთი რამ იყო – „ჩემ სიბერეს ჩემს სასტუმროში ვხედავ“.

ბარბარე 21
© Sputnik / Shota Nozadze
ბარბარე 21

„ქველმოქმედების მიზნით სასტუმროში სათნოების სახლის გახსნას ვაპირებდი. ჯანმრთელობის მდგომარეობის გამო ვეღარ შევძელი, შშმ პირებისთვის ადაპტირებული გავხადე და პანსიონატისთვის სიმბოლურ ფასად, 1 ათას ლარად გავაქირავე. ესეც დახმარებაა. თუ ჯანმრთელობა ხელს შემიწყობს, ამ კეთილ საქმეში თავადაც ჩავერთვები. ყველაფერი ღვთის ნებაა. როცა წლებში შედიხარ ადამიანი, უკვე სხვანაირად ფიქრობ. ჩემ სიბერეს კი ჩემს სასტუმროში ვხედავ“, - გვითხრა როენა ხუცურაულმა.

ქველმოქმედება – ლამაზი სიტყვაა, ქმედება – კიდევ უფრო ლამაზი. ხოლო ნებისმიერი ქმედება, თუ სიკეთეს არ ემსახურება, მხოლოდ შიშველი ინსტინქტია. ძნელია ისაუბრო ქველმოქმედი ადამიანის მოტივაციაზე. ალბათ, ეს უფრო ბუნებრივი მოთხოვნილებაა, სიამოვნებაა, რაც ნებისმიერ ხორციელ სიამოვნებაზე გაცილებით ძლიერია.

„მამიდის“ ნათქვამის პატივისცემის მიუხედავად, ჩვენმა ჟურნალისტმა მისი მონათხრობი გადაამოწმა, ესტუმრა ახლა უკვე თავშესაფარს და, როგორც აღმოჩნდა, მას პირობა შეუსრულებია…

Ბარბარე 21
© Sputnik / Shota Nozadze
Ბარბარე 21

დაწყებული საქმიანობა მოხუცთა თავშესაფრის „ბარბარე 21“-ის მფლობელმა, „ქართული ოცნების“ ყოფილმა წევრმა მერაბ შათირიშვილმა განაგრძო. დაწესებულების კედლებში კი ახალი სიცოცხლე დაიწყო. მთლიანი შენობა და ცალკეული ოთახები მოძღვარმა აკურთხა, აურა გაიწმინდა და ახლა შენობის ფანჯრებიდან ბენეფიციარების ბედნიერი ხმა გამოდის.

შენობა 16 ბენეფიციარზეა გათვლილი. თითოეულ ოთახს აქვს თავისი სველი წერტილები, ცხელი და ცივი წყალი, გათბობა. სართულებს შორის გადასაადგილებლად კი არის ადაპტირებული ლიფტიც.

სააგენტოსთან საუბრისას მერაბ შათირიშვილმა აღნიშნა, რომ შენობა ხუთი წლით იქირავა, სხვა სასტუმროებს კი მოუწოდა, როენა ხუცურაულისგან მაგალითი აიღონ.

Ბარბარე 21
© Sputnik / Shota Nozadze
Ბარბარე 21

„მეპატრონეს თავად სურდა თავშესაფრის დაარსება. ნებართვაც ჰქონდა, თუმცა შემდეგ ცოტა გაუჭირდა თავის გართმევა, დამიკავშირდა და ბოლოს იმავე მიზნით ხუთი წლით ვიქირავე. ქირას სიმბოლური თანხაც შეიძლება ვუწოდოთ. მანამდე მეპატრონეს არ ვიცნობდი. მიკვირს, რატომ არის როენას სასტუმრო ასეთი ყურადღების ცენტრი, ან დღეს რა აზრი აქვს ადრე აქ რა იყო. თვითონ ცხოვრებამ გარკვეულწილად იმ გზით წაიყვანა, რომ გართობის ადგილი ყოფილიყო, მაგრამ თბილისის სხვა ნებისმიერ სასტუმროშიც შეუძლია წყვილს ღამის გათენება. ასეთ სასტუმროებს ვურჩევ ასეთ სიკეთის სახლებად გადაკეთებას, ვიდრე შეფარულად ყოფნას“, – გვითხრა შათირიშვილმა.

Ბარბარე 21
© Sputnik / Shota Nozadze
Ბარბარე 21

კითხვაზე, თუ როგორ ახდენს თავშესაფარი შეზღუდული შესაძლებლობების მქონე პირთა ინტეგრაციას საზოგადოებაში და მათთვის თანაბარი შესაძლებლობების უზრუნველყოფას, მერაბ შათირიშვილმა აღნიშნა, რომ, მაგალითად, შაბათს ვაკის პარკში გაიმართება საქველმოქმედო კონცერტი, სადაც მათი თავშესაფრიდან ბენეფიციარი იღებს მონაწილეობას.

ასე მოხდა... ქართულ საზოგადოებას კიდევ ერთი ქველმოქმედი და პატიოსანი ადამიანი შეემატა, „სასტუმროების ბიზნესს“ კი ერთი მზრუნველი ადამიანი გამოაკლდა.

რამდენად ქველმოქმედია „მამიდა“, ეს საზოგადოებამ განსაჯოს, თუმცა აქვე ცნობილი ფრაზა აგეკვიატება – ყველამ თავის მამიდას მიხედოს...

ჩვენ კი დავძენთ, სასიამოვნო სიახლეები კარგია, თუნდაც მოულოდნელი იყოს!..

252
ჯანმრთელი საკვები

როგორ გამოვიყენოთ ზაფხული წონაში დასაკლებად

2394
(განახლებულია 16:56 06.07.2020)
ზედმეტ კილოგრამებთან საბრძოლველად ზაფხული საუკეთესო დროა, რადგან ამ სეზონზე განებივრებული ვართ ახალი ხილითა და ბოსტნეულით, ეს საკვები კი დიდი რაოდენობით შეიცავს ბოჭკოებს, ვიტამინებს, მინერალურ და სხვა სასარგებლო ნივთიერებებს.

როგორ გამოვიყენოთ ზაფხულის პერიოდი როგორც ჭარბ წონასთან საბრძოლველად, ასევე ორგანიზმის ზოგადი მდგომარეობის გასაუმჯობესებლად, „Sputnik-საქართველოსთან“ ექიმი ენდოკრინოლოგი თინათინ კაჭარავა საუბრობს.

ექიმი ენდოკრინოლოგი თინათინ კაჭარავა
photo: courtesy of Tinatin Katcharava
ექიმი ენდოკრინოლოგი თინათინ კაჭარავა

- რატომ არის ზაფხულში წონაში დაკლება უფრო ადვილი?

- ყველასთვის ცნობილია, რომ ზამთარში ორგანიზმს გასათბობად დიდი რაოდენობით ცხიმი სჭირდება, ხოლო ზაფხულში ამის საჭიროება არ არის, ამ პერიოდში ჩქარდება ნივთიერებათა ცვლაც, რაც კიდევ ერთ ხელშემწყობ  პირობას წარმოადგენს წონაში კლების პროცესისთვის. 

წონაში დაკლება
© CC0 / Pixabay
წონაში დაკლება

- როგორი უნდა იყოს ზაფხულში კვების რაციონი?

- კვების რაციონი უნდა იყოს მდიდარი ახალი სეზონური ხილით და ბოსტნეულით. უნდა ვერიდოთ მძიმედ მოსანელებელ ცხიმიან საკვებს. სიცხის მიუხედავად უარი არ უნდა ვთქვათ წვნიანებზე, რადგან ისინი დადებით გავლენას ახდენს კუჭ-ნაწლავის გამართულ ფუნქციონირებაზე, რაც აუცილებელი წინაპირობაა წონის კლებისთვის.

სასურველია კერძები მოვამზადოთ უშუალოდ კვების წინ, რადგან მაღალი სიცხის დროს ინტოქსიკაციების (მოწამვლების) რისკი იზრდება. გარდა ამისა, უარი უნდა ვთქვათ მალფუჭებად პროდუქტებზე. სასურველია მინიმუმამდე შემცირდეს ყავის და ჩაის რაოდენობა რაციონში, რადგან ისინი ხელს უწყობენ ორგანიზმიდან სითხის გამოდევნას. ზაფხულში უპირატესობა უნდა მივანიჭოთ სუფთა წყალს და ახალ გამოწურულ წვენებს.

საზამთროს წვენი
© CC0 / Pixabay
საზამთროს წვენი

- რა სიხშირით უნდა ვიკვებოთ და რა რაოდენობით?

- დღის მანძილზე აუცილებელია ჯერადი და მრავალფეროვანი რაციონი. სასურველია ვიკვებოთ დღეში ოთხჯერ. საუზმეზე შეგვიძლია მივირთვათ უფრო ნოყიერად, ვიდრე დღის სხვა მონაკვეთებში. საუზმიდან დაახლოებით სამ საათში სასურველია ცალკე სრულფასოვან კვებად მივიღოთ სეზონური ხილი, დაახლოებით 300-400 გრამის ოდენობით. შუადღეს სადილზე სასურველია იყოს წვნიანი, ცილოვანი საკვები, სალათები. ხოლო ვახშამი უნდა იყოს ძალიან მსუბუქი, მაგალითად, ბოსტნეულის სალათა ან რძის ნაწარმი. ზოგადად, ყველა ადამიანზე ერთნაირი რაციონის მორგება ძალიან რთულია, რადგან ყველა ადამიანს მისთვის დამახასიათებელი ინდივიდუალური მეტაბოლიზმი აქვს. რაც შეეხება ბოლო კვების დროს, სასურველია საღამოს 6-7 საათის შემდეგ არაფერი მივირთვათ.

ხმელთაშუა ზღვისპირული დიეტა
© CC0 / Pixabay
ხმელთაშუა ზღვისპირული დიეტა

- მარილი და შაქარი როგორ მოქმედებს წონაში კლების პროცესზე?

- მნიშვნელოვანია ასევე რაციონიდან პრაქტიკულად ამოვიღოთ შაქარი და მარილი. მარილი ხელს უწყობს ორგანიზშმი წყლის შეკავებას და აძლიერებს მადას. რაც შეეხება შაქარს, იგი ხელს უწყობს ინსულინის გამოყოფას, რაც, თავის მხრივ, ანაბოლური (მაშენებელი) ჰორმონია და ამ შემთხვევაშიც ხდება მადის გაძლიერება. 

მარილი
© CC0 / Pixabay
მარილი

- რანდენი კალორია უნდა მიიღოს ადამიანმა წონაში დასაკლებად?

- კონკრეტული კალორაჟის დასახელება, თუ როდის იწყება წონაში კლება, ძალიან რთულია, რადგან ეს არის ინდივიდუალური და დამოკიდებულია ორგანიზმის ნივთიერებათა ცვლაზე და იმაზე, თუ რამდენი კილოგრამი აქვს ადამიანს დასაკლები. მაგალითად, ზოგი ადამიანი 2500 კილოკალორიაზე იწყებს კლებას, ზოგი კი 1000-ზე, ამიტომ კონკრეტული კალორაჟის ყველა ადამიანზე მორგება შეუძლებელია.

- წონაში კლების პროცესში რამდენად მნიშვნელოვანი ადგილი უჭირავს წყლის მიღებას?

- პირველ რიგში, აღვნიშნოთ, რომ ჩვენი ორგანიზმის 70% შედგება წყლისგან. წყლის შენარჩუნებულ ბალანსზეა დამოკიდებული ორგანიზმის სწორი ნივთიერებათა ცვლა.

გარდა ამისა, წყლის ნაკლებობა ორგანიზმში იწვევს მუდმივი გადაღლილობის შეგრძნებას და მრავალ სხვა სიმპტომს: გულის ფრიალი, თავის ტკივილი, არტერიული წნევის დაქვეითება, კანის სიმშრალე, კუჭ-ნაწლავის ტრაქტის არასწორი ფუნქციონირება და ა.შ. განსაკუთრებით კი საყურადღებოა ზაფხულის პერიოდი, რადგან ცხელ დღეებში ორგანიზმი კარგავს დიდი რაოდენობით სითხეს, ოფლთან ერთად ასევე იკარგება მიკრო- და მაკროელემენტები და ვიტამინები, სწორედ ამიტომ შენარჩუნებული წყლის ბალანსი და კვების ჯანსაღი რაციონი აუცილებელია, რათა თავიდან ავირიდოთ დეჰიდრატაცია (გაუწყლოვნება) და ავიტამინოზი (ვიტამინების დეფიციტი).

ნატა პატარაია

2394
ანთებული სანთლები

საქართველოს დედაქალაქში და რეგიონებში 90-იან წლებში დაღუპული სამხედროები დაკრძალეს

0
(განახლებულია 16:17 15.08.2020)
ნეშტებს, რომლებიც წლების შემდეგ აღმოაჩინეს, იდენტიფიცირების და ნათესაური კავშირების დადგენის მიზნით დნმ-ის ანალიზი ჩაუტარდა. 

თბილისი, 15 აგვისტო — Sputnik. გასული საუკუნის 90-იან წლებში აფხაზეთის  შეიარაღებული კონფლიქტის დროს დაღუპული 13 სამხედრო მოსამსახურე დაკრძალეს, იუწყება პირველი არხი.

ნეშტებს, რომლებიც წლების შემდეგ აღმოაჩინეს, იდენტიფიცირების და ნათესაური კავშირების დადგენის მიზნით დნმ-ის ანალიზი ჩაუტარდა. 

გუშინ სამების საკათედრო ტაძარში სამოქალაქო პანაშვიდი გაიმართა. დაღუპულთა ოჯახის წევრებს სამძიმარი პირადად გამოუცხადეს პრეზიდენტმა სალომე ზურაბიშვილმა, მინისტრთა კაბინეტის წევრებმა, დეპუტატებმა და რიგითმა მოქალაქეებმა.

საქართველოს ტერიტორიაზე კონფლიქტების შედეგად 1990-იან წლებში უგზო-უკვლოდ 2,2 ათასზე მეტი ადამიანი დაიკარგა.

თბილისის ძმათა სასაფლაოზე ორი სამხედრო დაკრძალეს, დანარჩენების ნეშტები ოჯახებმა გადაასვენეს, რათა თავიანთი ნათესავები ოჯახურ სასაფლაოებზე დაკრძალონ.

2010 წელს წითელი ჯვრის საერთაშორისო კომიტეტის ფინანსური და ტექნიკური მხარდაჭერით შეიქმნა საკოორდინაციო მექანიზმი, რომლის წყალობით ნაპოვნია აფხაზეთში საბრძოლო მოქმედებების დროს უგზო-უკვლოდ დაკარგული 563 ადამიანის ნეშტი, საიდანაც 200-ზე მეტი იდენტიფიცირებულია. დანარჩენი ნეშტების ამოცნობის პროცესი გრძელდება.

0