თბილისის ტაქსი

კალაძე: სერვისი რომ უფრო გამართული იყოს, ტაქსების რეფორმა გაგრძელდება

45
(განახლებულია 13:09 01.06.2021)
თბილისის მერიამ ტაქსის რეფორმა 2018 წელს დაიწყო, რის შემდეგაც მძღოლებს ტაქსის ლიცენზიის აღება და ტექნიკური ინსპექტირების გავლა დაევალათ.

თბილისი, 1 ივნისი - Sputnik. ტაქსების რეფორმა დასრულებული არ არის და ამ მიმართულებით იქნება შემდეგი ეტაპები, განაცხადა დედაქალაქის მერმა კახა კალაძემ ტრანსპორტის პოლიტიკის მიმართულებით განხორციელებული პროექტების ანგარიშის წარდგენისას.

კალაძის თქმით, ტაქსის რეფორმასთან დაკავშირებით დაგეგმილ სხვა ღონისძიებებზე ინფორმაციას საზოგადოება უახლოეს მომავალში მიიღებს.

„იქნება შემდეგი ეტაპები, რათა ეს სერვისი, რომლითაც ძალიან ბევრი ადამიანი სარგებლობს, იყოს გამართული და მოწესრიგებული. ავტომობილები უნდა იყოს სუფთა, რომ ადამიანს სიამოვნებდეს ტაქსით მგზავრობა დედაქალაქში“, - აღნიშნა კალაძემ.

თბილისში ტაქსის რეფორმა 2018 წელს დაიწყო. პირველ ეტაპზე ტაქსის მძღოლებს ლიცენზიის აღება და ტექნიკური ინსპექტირების გავლა დაავალდებულეს. მეორე ეტაპზე, 2019 წლის 1 ოქტომბრიდან კი ძალაში შევიდა ტაქსების А და В კატეგორიებად დაყოფის ნორმა.

A კატეგორიის ლიცენზია მათთვისაა განკუთვნილი, ვისთვისაც ტაქსის მძღოლობა შემოსავლის მთავარი წყაროა. მათი ავტომობილები აუცილებლად თეთრი ფერის უნდა იყოს. მათ მგზავრების აყვანა შეუძლიათ როგორც ქუჩაში, ისე გამოძახებით – ტაქსების სხვადასხვა კომპანიასთან თანამშრომლობის საფუძველზე.

B კატეგორიის ლიცენზიის მქონე მძღოლებს შესაძლებლობა აქვთ ნებისმიერი ფერის ავტომობილით იმუშაონ, თუმცა მათ ტაქსის ამოსაცნობი ნიშნის განთავსებისა და მგზავრის ქუჩაში აყვანის უფლება არ აქვთ. აღნიშნული კატეგორიის მქონე ტაქსის მძღოლებისთვის მუშაობა მხოლოდ ტაქსის კომპანიებთან თანამშრომლობით არის ნებადართული.

2019 წლის პირველი ოქტომბრიდან ასევე ამოქმედდა ფერისა და მანათობლის სტანდარტი. მანათობლები ტაქსის მძღოლებს უფასოდ დაურიგდათ, ფერის სტანდარტის დაკმაყოფილების მიზნით კი მერიამ უფასო ვაუჩერი დააწესა. ამასთან, სატრანსპორტო საშუალებების მოსაწესრიგებლად მძღოლებს ქიმიური წმენდის უფასო ვაუჩერები დაურიგდათ.

45
თემები:
თბილისი დღეს (2047)

საქართველოში შრომითი პირობების გაუმჯობესებას მოითხოვენ ვიდეო

61
(განახლებულია 18:46 18.06.2021)
გუშინ პარლამენტთან ახალი შრომის კოდექსის მიღების მოთხოვნით საპროტესტო აქცია გაიმართა. დაწვრილებით – იხილეთ „Sputnik-საქართველოს“ ვიდეოში.

აქციის ორგანიზატორი იყო ოპოზიციური პარტია „ქართული დასი“. ამ პარტიას ეკუთვნის საკანონმდებლო ინიციატივა მშრომელი ადამიანის მდგომარეობის გაუმჯობესებასთან დაკავშირებით, რომელიც პარლამენტში წარადგინეს.

აქციაში დაახლოებით ოცი ადამიანი მონაწილეობდა. მათ ხელში ეჭირათ პლაკატები, რომლებზეც ეწერა ლოზუნგები: „დამლაგებელი მონა არ არის “, „მუშა მონა არ არის“, „არც ექიმია მონა“, „არც ოფიციანტია მონა“, „მონის კოდექსი შევცვალოთ შრომის კოდექსით“.

პარტიის ლიდერმა ჯონდი ბაღათურიამ აქციის მონაწილეებთან ერთად პარლამენტში შეიტანა კანონპროექტი შრომის პირობების გაუმჯობესების შესახებ, რომელიც ითვალისწინებს დამსაქმებლის მიერ დასაქმებულისადმი სამართლიან დამოკიდებულებას, მინიმალური ანაზღაურების ზრდას, ზეგანაკვეთური სამუშაოს შესაბამის ანაზღაურებას.

წლის დასაწყისიდან ქვეყანაში არაერთი აქცია გაიმართა ხელფასების ზრდისა და სამუშაო პირობების გაუმჯობესების მოთხოვნით. უმეტეს შემთხვევაში პროტესტის მონაწილეებმა მიზანს მიაღწიეს.

61
ვაკის პარკი

თბილისის მერიამ ვაკის პარკში შადრევნების სარეაბილიტაციო სამუშაოებისთვის ტენდერი გამოაცხადა

46
ვაკის პარკში შადრევნების და კასკადის აღსადგენი სამუშაოები თბილისის 2021-2022 წლის ბიუჯეტიდან იქნება დაფინანსებული.

თბილისი, 17 ივნისი - Sputnik. თბილისში, ვაკის პარკის ტერიტორიაზე არსებული შადრევნებისა და კასკადის სარეაბილიტაციო სამუშაოებისთვის დედაქალაქის მერიამ ელექტრონული ტენდერი გამოაცხადა. ნათქვამია სახელმწიფო შესყიდვების სააგენტოს ვებგვერდზე.

განაცხადების მიღება მიმდინარე წლის 2 ივლისს დაიწყება და 7 ივლისს დასრულდება.

როგორც სატენდერო მოთხოვნებიდან ირკვევა, შესრულებული სამუშაოების, მათ შორის დეკორატიული სანათის ნათურების საგარანტიო პერიოდად მიღება-ჩაბარების აქტის გაფორმებიდან 2 წელი არის განსაზღვრული.

ვაკის პარკში არსებული შადრევნებისა და კასკადის სარეაბილიტაციო სამუშაოები 2021-2022 წლებში თბილისის ბიუჯეტით დაფინანსდება. აღნიშნული სამუშაოებისთვის 2021 წელს 3 მლნ ლარი, ხოლო 2022 წელს – 8,5 მილიონ ლარზე მეტი დაიხარჯება.

ამასთან, ელექტრონულ ტენდერში გამარჯვებულმა კომპანიამ, ანუ მიმწოდებელმა ადგილზე სამუშაოები ხელშეკრულების გაფორმებიდან 510 დღის ვადაში უნდა დაასრულოს და საჭიროების შემთხვევაში, ობიექტზე სამუშაოები 24-საათიან რეჟიმში აწარმოოს. შესყიდვის სავარაუდო ღირებულება 11,5 მლნ ლარს აჭარბებს.

2021 წლის თებერვლიდან ვაკის პარკი სრულმასშტაბიან  რემონტზე მთლიანად დაიკეტა.

ვაკის პარკი 1946 წელს ტრიალ მინდორზე გაშენდა.  2017 წელს პარკის ტერიტორია გაფართოვდა, მან კულტურული მემკვიდრეობის ძეგლის სტატუსი მიიღო. აქ არის უცნობი ჯარისკაცის საფლავი და მარადიული ალი იწვის. ეს არის მეორე მსოფლიო ომის ვეტერანების შეხვედრის ტრადიციული ადგილი 9 მაისს.

46
მომავლის გზა - მამა და შვილი

საქართველოში მამის დღე აღინიშნება

0
(განახლებულია 14:41 19.06.2021)
მამის დღე ახსენებს საზოგადოებას, თუ რამდენად დიდია შვილების აღზრდის პროცესში მამების ჩართულობა და აქტივობა.

თბილისი, 19 ივნისი — Sputnik. საქართველოში 20 ივნისს მამის საერთაშორისო დღეს აღნიშნავენ.

მამის დღე საქართველოში, გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია Care Together-ის ინიციატივით, კამპანიის „კაცები ზრუნავენ“ ფარგლებში წელს მეექვსედ აღინიშნება.

ამ დღის აღსანიშნავად ზუგდიდსა და ოზურგეთში რამდენიმე ღონისძიება იგეგმება.

კერძოდ, 19 ივნისს, 12:00 საათიდან 17:00 საათამდე, ზუგდიდის სპორტულ დარბაზში მამებისა და შვილებისთვის გაიმართება ტექნოლოგიური ვორქშოპი.

ვორქშოპის მიმდინარეობისას მამები და შვილები ერთად იმუშავებენ ტექნოლოგიურ პროექტებზე, რაც, ერთი მხრივ, დააახლოებს მათ და, მეორე მხრივ, ბავშვების ტექნოლოგიებით დაინტერესებას შეუწყობს ხელს.

შეხვედრა ილიას სახელმწიფო უნივერსიტეტთან და საქართველოს ინოვაციებისა და ტექნოლოგიების სააგენტოსთან თანამშრომლობით გაიმართება.

ასევე, 19 ივნისს, 18:00 საათზე, ზუგდიდის ბოტანიკურ ბაღში გაიმართება წიგნის „მამები და შვილები“ პრეზენტაცია, რომელიც 2020 წელს გამომცემლობა „არტანუჯის“ მიერ გამოიცა.

წიგნში თავმოყრილია 13 წლის მუხრან მაჭავარიანის წერილი მამისადმი, ოთარ და თაკო ჭილაძეები, გელა ჩარკვიანი და მისი შვილები – ირაკლი და თეონა, ფრიდონ და ზაზა ხალვაშები, ვახტანგ და ირინა ჯავახაძეები, ბაჩანა ბრეგვაძე და მისი ქალიშვილები ქეთევანი და ანა. ასევე ამ წიგნში შეგხვდებათ, თუ რას წერდნენ ერთმანეთს და ერთმანეთის შესახებ მიხეილ და ქეთევან ჯავახიშვილები, პაოლო და მედეა იაშვილები, კონსტანტინე და ზვიად გამსახურდიები.

ღონისძიებას ზვიად კვარაცხელია და დავით გორგილაძე გაუძღვებიან.

ხვალ, 20 ივნისს, ოზურგეთში, კაფეში „8+1“, საბავშვო წიგნის „ლუნა და ციცინათელების პლანეტა“ პრეზენტაცია გაიმართება.

წიგნის ავტორი დავით გორგილაძეა. წიგნი ერთი ჩვეულებრივი ოჯახის თავგადასავლებზე მოგვითხრობს, რომლის გარშემოც ჯადოსნური ამბები ხდება, დედა და მამა თანაბრად ინაწილებენ შვილების აღზრდის პასუხისმგებლობასა და საოჯახო საქმეებს. უახლოეს ადამიანებზე ყოველდღიური ზრუნვა და საერთო გამოწვევების გააზრება ამ ოჯახის ბედნიერებისა და ჰარმონიის საფუძველია.

ღონისძიებას წიგნის ავტორები, მწერალი დათო გორგილაძე და ილუსტრატორი თათია ნადარეიშვილი გაუძღვებიან.

მამის დღე არის დღესასწაული, რომელიც ბევრ ქვეყანაში მამობის აღსანიშნავად და მამების პატივსაცემად ყოველწლიურად აღინიშნება. ის, როგორც წესი, ივნისის მესამე კვირა დღეს იმართება. დღესასწაული პირველად აშშ-ში 1910 წლის 19 ივნისს აღინიშნა.

გაეროს მოსახლეობის ფონდის (UNFPA) საქართველოს ოფისისა და არასამთავრობო ორგანიზაცია We Care-ის ინიციატივით საქართველოში 2016 წელს დაიწყო კამპანია „კაცები ზრუნავენ“ გაეროს ერთობლივი პროგრამის „გენდერული თანასწორობისთვის" ფარგლებში და შვედეთის მთავრობის ფინანსური მხარდაჭერით.

0